အုပ်ချုပ်ရေးမှူး

သဲကုန်း၊ မတ် ၂၇၊ ၂၀၂၆။

ပဲခူးတိုင်း၊ သဲကုန်းမြို့နယ်၊ ညောင်ဝင်းကျေးရွာအုပ်ချုပ်ရေးမှူး နေအိမ်မှာ ပစ်သတ်ခံရပြီး သေဆုံးခဲ့တယ်လို့ ပြည်ခရိုင်တပ်ရင်း ၁ တာဝန်ရှိသူတွေဆီက သိရပါတယ်။

ပစ်သတ်ခံရသူဟာ အသက် ၅၀ အရွယ် ဦးဇော်မင်း ခ ကုလားဆိုသူဖြစ်ပြီး မတ် ၂၅ ရက်နေ့လယ် ၂ နာရီခန့်မှာ ဒေသခံကာကွယ်ရေးတပ်ဖွဲ့ဝင်တွေက ဝင်ရောက်ပစ်ခတ်ခဲ့တယ်လို့ ဆိုပါတယ်။

“နေအိမ်ထဲဝင်ပြီး ၃ ချက်ပစ်ခဲ့တာ။ ပြန်ခုခံချိန်တော့မရဘူး။ မြို့နဲ့လည်းနီးနေတော့အမြန်ပစ်ပြီး ပြန်ထွက်လာရတယ် ဘာမှမရလိုက်ဘူး။ မိသားစုဝင်တွေရှိပေမယ့် မဆိုင်တဲ့သူကိုဘာမှမလုပ်ခဲ့ဘူး”လို့ ပြည်ခရိုင်တပ်ရင်း ၁ စစ်ထောက်လှမ်းရေးနဲ့ သတင်းပြန်ကြားတာဝန်ခံ Shadow ကပြောပါတယ်။

သေနတ်နဲ့အနီးကပ်ပစ်ခံရတာကြောင့် နေရာမှာတင်သေဆုံးခဲ့ပြီးနောက်မှာ စစ်ကော်မရှင်အဖွဲ့တွေက လာရောက်စစ်ဆေးပြီး အလောင်းကိုသယ်သွားကြတယ်လို့ ဆိုပါတယ်။

အူပ်ချုပ်ရေးမှူး ဇော်မင်း (ခ) ကုလားဟာ ၂၀၂၅ မှာ အုပ်ချုပ်ရေးမှူးဖြစ်လာပြီး သားဖြစ်သူကလည်း သဲကုန်းရဲစခန်းက နယ်ထိန်းဖြစ်တာကြောင့် ညောင်ဝင်းအုပ်စုအတွင်း ပေါ်တာဆွဲတာ၊ စစ်မှုထမ်းကြေး ကောက်ခံတာ၊ ရွာသားတွေကိုခြိမ်းခြောက်တာတွေ ပြုလုပ်တဲ့အတွက် ခုလိုပစ်ခတ်ခဲ့တာလို့ ဆိုပါတယ်။

ဒါ့အပြင် သူဟာ “ရွာသားတွေကြေညာလိုက် ကြိုက်တဲ့ PDF ခေါ်လာခဲ့ မကြောက်လို့အုပ်ချုပ်ရေးမှူးလုပ်နေတာ” လို့လည်း ပြောဆိုကြိမ်းဝါးတတ်တယ်လို့ ပြည်ခရိုင်တပ်ရင်း ၁ စစ်ထောက်လှမ်းရေးနဲ့ သတင်းပြန်ကြားတာဝန်ခံ Shadow က ဆက်ပြောပါတယ်။

ဒီပစ်ခတ်မှုကို ပြည်ခရိုင်တပ်ရင်း ၁ တပ်ရင်းရုံး တိုက်ခိုက်ရေးအဖွဲ့ တပ်ခွဲ ၁ နဲ့ ပြည်ခရိုင်တပ်ရင်း ၂ တပ်ခွဲ ၄ တို့က ပူးပေါင်းလုပ်ဆောင်ခဲ့တာလို့ သိရပါတယ်။

မတ်လ ၈ ရက်ကလည်း သဲကုန်းမြို့နယ်၊ ကြို့ပင်သာရွာနေ အုပ်ချုပ်ရေးမှူး ခင်စိုး နေအိမ်မှာပစ်သတ်ခံရလို့ သေဆုံးခဲ့သေးတယ်လို့ သိရပါတယ်။

စာတည်း – လင်း

မင်းလှ၊ မတ် ၂၃၊ ၂၀၂၆။

ပဲခူးတိုင်း၊ မင်းလှမြို့နယ်မှာ စစ်ကော်မရှင်လက်အောက် ရပ်ကျေးအုပ်ချုပ်ရေးမှူး ၁ ဦး သေနတ်ပစ်ခံရပြီး သေဆုံးခဲ့တယ်လို့ ရွှေတန်းမြေပြည်သူကာကွယ်ရေးတပ်ဖွဲ့တာဝန်ရှိသူတွေထံက သိရပါတယ်။

သေဆုံးသူဟာ မင်းလှမြို့နယ်၊ ဝက်လှကြီးကျေးရွာအုပ်ချုပ်ရေးမှူး အသက် ၄၅ နှစ်အရွယ် ဦးအောင်ကျော်မိုးဆိုသူဖြစ်ပြီး ၎င်းကို မတ်လ ၂၂ ရက် ယမန်နေ့ ညနေ ၄ နာရီခန့်မှာ နေအိမ်အတွင်းအထိဝင်ရောက်ပစ်ခတ်ခဲ့တာလို့ ဆိုပါတယ်။

” သူက ထွေအုပ်ကပြန်တာလား စစ်ကွင်းတာဆုံဂိတ်က ပြန်လာတာလားတော့ မသိဘူး။ သူပြန်လာတဲ့အချိန်ကို ရဲဘော်တွေက သွားစောင့်တာ။ သူကအိမ်ကိုရောက်နှင့်နေတုန်းပဲရှိသေးတယ်။ လွယ်အိတ်တွေတောင်မချရသေးဘူး။ အဲ့ဒီအချိန်မှာရဲဘော်တွေက သူ့နာမည်ခေါ်ပြီးဝင်သွားချိန် ထွက်ပြေးဖို့လုပ်လို့ ၂ ချက်ပစ်ခတ်ခဲ့တာ”လို့ ရွှေတန်းမြေပြည်သူ့ကာကွယ်ရေးတပ်ဖွဲ့တာဝန်ရှိသူက မြေလတ်အသံကို ပြောပါတယ်။

သေဆုံးသူ ဦးအောင်ကျော်မိုးဟာ ဝက်လှကြီးကျေးရွာအုပ်ချုပ်ရေးမှူးအဖြစ်လုပ်ကိုင်တာ ၃ လသာ ရှိသေးပြီး ယခင်ဝက်လှကြီးကျေးရွာအုပ်ချုပ်ရေးမှူးက ကျန်းမာရေးမကောင်းတာကြောင့် အနားယူသွားလို့ အစားထိုးဝင်ရောက်လာတာလို့ ဆိုပါတယ်။

ဦးအောင်ကျော်မိုးဟာ အုပ်ချုပ်ရေးမှူးမဖြစ်ခင်ကတည်းက စစ်ကော်မရှင်တပ်၊ အထွေထွေအုပ်ချုပ်ရေးဌာနတွေနဲ့နီးစပ်သူဖြစ်ပြီး အုပ်ချုပ်ရေးမှုးဖြစ်လာပြီးနောက် စစ်မှုထမ်းကြေးအတင်းအဓမ္မတောင်းခံတာ၊ တောင်းခံလို့မရရင်ဖမ်းဆီးမှုတွေလုပ်ဆောင်မယ်လို့ ခြိမ်းခြောက်မှုတွေရှိလာကြောင်း တိုင်ကြားလာလို့ ပစ်ခတ်ရှင်းလင်းခဲ့တာလို့ သိရပါတယ်။

သေနတ်နဲ့အနီးကပ်ပစ်ခံရလို့ ဦးအောင်ကျော်မိုးမှာ နေရာမှာသေဆုံးသွားပြီး ၎င်းထံကနေ နိုင်ငံသားစိစစ်ရေးကတ်၊ ယာဥ်မောင်းလိုင်စင်၊ စစ်မှုထမ်းကြေးကောက်ယူထားတဲ့စာရွက်စာတမ်းတွေ သိမ်းဆည်း ရရှိခဲ့ကာ ပစ်ခတ်မှုဖြစ်ပြီးနောက် ရန်ကုန်-ပြည်လမ်း စစ်ကွင်းတာဆုံဂိတ်တာဝန်ကျ စစ်ကော်မရှင်တပ်ဖွဲ့ဝင်တွေလာရောက်စစ်ဆေးမှုပြုလုပ်ခဲ့တယ်လို့ သိရပါတယ်။

မတ်လ ၁၄ ရက်ကလည်း မင်းလှမြိုနယ်၊ ဘုရားကွင်းကျေးရွာနေ ပျူစောထီးအဖွဲ့ဝင် ဦးရဲထွန်းဆိုသူဟာ နေအိမ်မှာရှိနေချိန် သေနတ်နဲ့ပစ်ခတ်ခံရပြီး သေဆုံးသွားတယ်လို့ သိရပါတယ်။

သဲကုန်း၊ မတ် ၉၊ ၂၀၂၆။

ပဲခူးတိုင်း၊ သဲကုန်းမြို့နယ်၊ ကြို့ပင်သာရွာနေ အုပ်ချုပ်ရေးမှူး ပစ်ခတ်ခံရပြီး သေဆုံးသွားတယ်လို့ ပြည်ခရိုင်တပ်ရင်း ၁ စစ်ထောက်လှမ်းရေးနဲ့ သတင်းပြန်ကြားတာဝန်ခံဆီက သိရပါတယ်။

ပစ်ခတ်ခံရသူဟာ ကြို့ပင်သာရွာအုပ်ချုပ်ရေးမှူး ခင်စိုးဆိုသူဖြစ်ပြီး မတ်လ ၈ ရက်ည ၉ နာရီကျော်က နေအိမ်မှာရှိနေချိန် ပစ်ခတ်ခဲ့တာလို့ဆိုပါတယ်။

“သူအိမ်ထဲဝင်ဖမ်းပြီးတော့ သူခြံဝန်းထဲမှာပဲရှင်းတာ။ ၃ ချက်ပစ်ခတ်ခဲ့တာ။ အိမ်မှာမိသားစုတွေ ရှိတယ်။ မဆိုင်တဲ့သူတွေကို ဘာမှမလုပ်ခဲ့ဘူး”လို့ ပြည်ခရိုင်တပ်ရင်း ၁ စစ်ထောက်လှမ်းရေးနဲ့ သတင်းပြန်ကြားရေး တာဝန်ခံ Shadow ကပြောပါတယ်။

အနီးကပ်ပစ်ခတ်ခံရပြီး ဦးခင်စိုးမှာ ဦးခေါင်းကျည်ထိဒဏ်ရာနဲ့ နေရာမှာတင်သေဆုံးသွားပြီး ပစ်ခတ်မှုအပြီး ၂ နာရီကျော်အကြာမှာ အလောင်းကိုစစ်ကော်မရှင်အဖွဲ့တွေလာကောက်သွားပြီး သဲကုန်းဆေးရုံကို သယ်ဆောင်သွားတယ်လို့ ဆိုပါတယ်။

မတ်လ ၉ ရက် ဒီမနက်ပိုင်းမှာတော့ ဦးခင်စိုးရဲ့ရုပ်အလောင်းကိုနေအိမ်ပြန်သယ်လာပြီး နာရေးပြုလုပ်နေကြတယ်လို့ သိရပါတယ်။

ဦးခင်စိုးဟာ စစ်မှုထမ်းကြေး လတိုင်းကောက်ခံပေးတာ၊ ထောက်ခံစာ ၁ စောင်ကို ၂ သောင်းကျပ် ကောက်ခံတာ၊ ဒေသခံတွေကိုပေါ်တာဆွဲဖမ်းဆီးရာမှာ စစ်ကော်မရှင်တပ်သားတွေနဲ့အတူ လိုက်ပါဖမ်းဆီးတာ၊ တော်လှန်ရေးတပ်ဖွဲ့ဝင်တွေရဲ့သတင်းအချက်အလက်တွေကို စုဆောင်းပေးပို့တာတွေ လုပ်ဆောင်နေသူဖြစ်ပြီး သူ့ကြောင့် ဒေသခံ ၅ ဦးဖမ်းဆီးခံရတဲ့ဖြစ်စဥ်တွေရှိခဲ့တာကြောင့် ခုလို ပစ်ခတ်ခဲ့တာလို့ စစ်ထောက်လှမ်းရေးနဲ့ သတင်းပြန်ကြားရေးတာဝန်ခံ Shadow ကပြောပါတယ်။

ပစ်ခတ်မှုပြုလုပ်ပြီး ဦးခင်စိုးဆီက တံဆိပ်တုံးနဲ့ ထောက်ခံစာလုပ်တဲ့ စာရွက်စာတမ်းတွေကို သိမ်းဆည်းခဲ့တယ်လို့ သိရပါတယ်။

ပြီးခဲ့တဲ့ ဒီဇင်ဘာ ၁၃ ရက်ကလည်း သဲကုန်းမြို့နယ်၊ ညောင်ပင်စုကျေးရွာက ကြက်ဝိုင်းမှာ စစ်ကော်မရှင်သတင်းပေး သန်းဇော်ဆိုသူဟာ ပစ်ခတ်ခံရပြီးသေဆုံးခဲ့သေးတယ်လို့ သိရပါတယ်။

စာတည်း – လင်း

တောင်တွင်းကြီး၊ ဖေဖော်ဝါရီ ၂၃၊ ၂၀၂၆။

မကွေးတိုင်း၊ တောင်တွင်းကြီးမြို့နယ်၊ မှုတ်ရှည်အုပ်စု၊ ညောင်လေးပင်ရွာ အုပ်ချုပ်ရေးမှူး ဖေဖော်ဝါရီ ၂၁ ရက်နေ့လယ်ပိုင်းမှာ ပစ်ခတ်ခံရပြီးသေဆုံးခဲ့တယ်လို့ ဒေသခံတွေဆီက သိရပါတယ်။

ပစ်ခတ်ခံရသူဟာ အသက် ၅၀ အရွယ် အုပ်ချုပ်ရေးမှူး ဆန်းဝင်းဖြစ်ပြီး နေ့လယ် ၁ နာရီဝန်းကျင်မှာ ဒေသခံကာကွယ်ရေးတပ်ဖွဲ့ဝင်တွေက ဝင်ရောက်ပစ်ခတ်ခဲ့တာလို့ ဆိုပါတယ်။

“သူ့နေအိမ်မှာ ပစ်ခတ်ရှင်းလင်းခံရတာ၊ ဦးခေါင်းချည်းပဲ ၄/၅ ချက်လောက်ပစ်သွားတာ၊ မီတာကြေးတွေ အဆမတန်ကောက်တယ်၊ စစ်မှုထမ်းကြေးတွေ ပုံမှန်ဆိုရင် ၁ သောင်း၊ ၂ သောင်းရှိတာကို သူက အိမ်တွေကို ကြည့်ပြီးတော့ ၅ သောင်း၊ ၁ သိန်း၊ ၂ သိန်းဆိုပြီး ခွဲတမ်းချပြီး ကောက်တာ၊ သူ့ကို PDF တွေ(ဆီ)တိုင်ရင်လည်း တရွာလုံးကို ပြာကျအောင်လုပ်မယ်လို့ ကြွေးကြော်ထားတာ”လို့ ညောင်လေးပင် ရွာခံတဦးက ပြောပါတယ်။

ပစ်ခတ်ခံရပြီးနောက် အလောင်းကို နေ့လယ် ၂ နာရီဝန်းကျင်မှာ တောင်တွင်းကြီးနယ်မြေခံရဲစခန်းက ရဲတပ်သား ၁၀ ဦးကျော်လောက်က လာသယ်သွားခဲ့တယ်လို့ ဆိုပါတယ်။

အုပ်ချုပ်ရေးမှူးဆန်းဝင်း ကိုပစ်ခတ်တဲ့ ဒေသကာကွယ်ရေးတပ်ဖွဲ့တွေကတော့ သတင်းထုတ်ပြန်တာ မရှိသေးပါဘူး။

ပြီးခဲ့တဲ့ ဖေဖော်ဝါရီ ၁ ရက်ကလည်း တောင်တွင်းကြီးမြို့နယ်၊ ငှက်ပျောတောကျေးရွာ အုပ်ချုပ်ရေးမှူး ကျော်စိုးကိုလည်း တော်လှန်ရေးတပ်ဖွဲ့ဝင်တွေက နေအိမ်ထဲမှာပစ်ခတ်ရာ သေဆုံးခဲ့ပါသေးတယ်။

စာတည်း – လင်း

ညောင်လေးပင်၊ ဇန်နဝါရီ ၁၂၊ ၂၀၂၆။

ပဲခူးတိုင်း၊ ညောင်လေးပင်မြို့နယ်၊ ပြွန်တန်ဆာမြို့၊ မြို့မ ၁ ရပ်ကွက်မှာ အုပ်ချုပ်ရေးမှူး ၁ ဦး နေအိမ်ထဲပစ်သတ်ခံရတယ်လို့ 9Stars UG အဖွဲ့ဆီက သိရပါတယ်။

ပစ်သတ်ခံရသူဟာ မြို့မ ၁ ရပ်ကွက် အုပ်ချုပ်ရေးမှူး အသက် ၆၈ နှစ်အရွယ် ဦးလှသောင်းဖြစ်ပြီး ဇန်နဝါရီ ၁၂ ရက်မနက် ၅ နာရီခွဲမှာ နေအိမ်အတွင်းဝင်ရောက်ပစ်ခတ်ခဲ့တာလို့ ဆိုပါတယ်။

“သူက သူအိမ်အောက်မှာ အိပ်တာကုတင်နဲ့ အိပ်ယာထဲထိပဲဝင်ပစ်ခဲ့တာ။ ၃ ချက်ပစ်ခဲ့တယ်။ သူမိန်းမလည်း ရှိတယ်။ တွေ့တယ်အော်ဆဲနေတာ ဘာမှမလုပ်ပါဘူး။ ဒီတိုင်းပဲထားခဲ့တယ်။ “လို့ 9Stars UG ခေါင်းဆောင်မြွေပွေးက ပြောပါတယ်။

အုပ်ချုပ်ရေးမှူးနေထိုင်တဲ့နေရာက ပြွန်တန်ဆာရဲစခန်းနဲ့ ကိုက် ၆၀၀ လောက်သာ ဝေးကွာတာကြောင့် ပစ်ခတ်ပြီး အမြန်ပြန်ဆုတ်ခွာခဲ့တယ်လို့ သူကဆက်ပြောပါတယ်။

အုပ်ချုပ်ရေးမှူး ဦးလှသောင်းဟာ သထုံအခြေစိုက် အမှတ် ၅၂၅ ထောက်ပံ့နှင့်ပို့ဆောင်ရေးတပ်ခွဲကနေ တပ်ကြပ်ကြီးရာထူးနဲ့ အငြိမ်းစားယူထားသူဖြစ်ပြီး သား ၂ ဦးဖြစ်တဲ့ ကိုကိုလင်းက အဆိုပါတပ်မှ ဗိုလ်မှူးဖြစ်တယ်လို့သိရပြီး လှဌေးကတော့ ရဲတပ်ဖွဲ့ဝင်ဖြစ်တယ်လို့ 9Stars UG ခေါင်းဆောင်မြွေပွေးက ပြောပါတယ်။

ဦးလှသောင်းဟာ အငြိမ်းစားယူပြီးနောက် အုပ်ချုပ်ရေးမှူးဖြစ်လာပြီး NLD အစိုးရလက်ထက်အတွင်း အုပ်ချုပ်ရေးမှူးရာထူးက ရပ်နားခံခဲ့ရပြီး စစ်အာဏာသိမ်းပြီးနောက်ပိုင်းမှာ အုပ်ချုပ်ရေးမှူး ပြန်ဖြစ်လာသူဖြစ်တဘ်လို့ ခေါင်းဆောင်မြွေပွေးက ပြောပါတယ်။

ဒါ့အပြင် ပြွန်တန်ဆာပျူစောထီးအဖွဲ့ကိုဦးဆောင်ပြီး ဧည့်စာရင်းထောက်ခံစာလုပ်သူတွေကို ငွေအများအပြားတောင်းတာ၊ ဒေသခံတွေကို စစ်မှုထမ်းကြေး ၂ သောင်း၊ ကင်းကြေး ၂ ထောင် လစဥ်ကောက်ခံတာ၊ ရပ်ကွက်ထဲကသူတချို့ကိုလည်း စစ်မှုထမ်းအတွက်ရောင်းစားတာ၊ ရွေးကောက်ပွဲနဲ့ပတ်သက်ပြီး ပူးပေါင်းပါဝင်တာတွေရှိတဲ့အတွက် ခုလိုပစ်ခတ်ခဲ့တာလို့လည်း ဆိုပါတယ်။

ဒီဇင်ဘာ ၁၉ ရက်ကလည်း ညောင်လေးပင်မြို့နယ်၊ သံတံတားစံပြကျေးရွာမှာ လယ်ထဲကနေ ပြန်လာတဲ့ အုပ်ချုပ်ရေးမှူး သေနတ်နဲ့ပစ်ခံရပြီးသေဆုံးသွားတယ်လို့ သိရပါတယ်။

စာတည်း – လင်း

ကံမ၊ ဇန်နဝါရီ ၁၂၊ ၂၀၂၅။

မကွေးတိုင်း၊ သရက်ခရိုင်၊ ကံမမြို့နယ်၊ ပြောင်ကျရွာနဲ့ ပယ်ကျရွာအကြားမှာ မဲရုံတွေလိုက်စစ်ပြီး ပြန်လာတဲ့ ကံမမြို့နယ်အုပ်ချုပ်ရေးမှူးနဲ့အဖွဲ့ တိုက်ခိုက်ခံရပြီး အုပ်ချုပ်ရေးမှူးသေတယ်လို့ ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့တွေဆီက သိရပါတယ်။

ဇန်နဝါရီ ၁၁ ရက်မနက် ၁၁ နာရီခန့်မှာ မြို့နယ်အထွေထွေအုပ်ချုပ်ရေးမှုး ဦးဇော်မင်းနိုင်၊ ရဲအဖွဲ့ဝင်တွေနဲ့ မြို့နယ်ကော်မရှင်အဖွဲ့ဝင်တွေ လိုက်ပါလာတဲ့ကားတန်း ကြားဖြတ်တိုက်ခိုက်ခံရတာလို့ ဆိုပါတယ်။

“ကံမမြို့နယ်အုပ်ချုပ်ရေးမှူး သူကမဲရုံတွေကို လိုက်စစ်တယ်ပြောတယ်။ အဲဒီမှာ ကြားဖြတ်တိုက်ခိုက်ခံရတယ်။ မြို့နယ်အုပ်ချုပ်ရေးမှူးက ကျဆုံးတယ်။ သေသွားတယ်ပေါ့။”လို့ ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့ဝင်တဦးက ပြောပါတယ်။

စစ်ကော်မရှင်ထောက်ခံတယ်လီဂရမ်တွေမှာတော့ တိုက်ခိုက်ခံပြီးထိခိုက်ဒဏ်ရာရသွားသူတွေကို စစ်ကော်မရှင်အဖွဲ့တွေက ပြည်မြို့ ပြည်သူ့ဆေးရုံကို တင်ပို့ဆေးကုသချိန်မှာ နေ့လယ် ၁ နာရီခန့်မှာ ဦးဇော်မင်းနိုင် သေဆုံးသွားတယ်လို့လည်း ရေးသားဖော်ပြကြပါတယ်။

အဆိုပါပစ်ခတ်မှုအတွင်း မြို့နယ်အုပ်ချုပ်ရေးမှူး ဦးဇော်မင်းနိုင်၊ ယာဥ်မောင်းဖြစ်သူ ဦးသန့်ဇင်အောင်၊ ရဲတပ်ဖွဲ့ဝင်အချို့ ထိခိုက်ဒဏ်ရာရခဲ့တယ်လို့ သိရပါတယ်။

ဒီပစ်ခတ်မှုတွေမှုကို ဘယ်လက်နက်ကိုင်အဖွဲ့အစည်းက လုပ်ခဲ့တယ်ဆိုတာကိုတော့ အတည်ပြုထုတ်ပြန်လာတာ မရှိသေးပါဘူး။

ဇန်နဝါရီ ၆ ရက်ကလည်း မကွေးတိုင်း၊ မြို့သစ်မြို့နယ်၊ ရွှေပန်းကျေးရွာအနီး မြို့သစ်-ကန်ပြား လမ်းပိုင်းမှာ ရွေးကောက်ပွဲကော်မရှင်ဝန်ထမ်းတွေ လိုက်ပါလာတဲ့ယာဥ်တန်း တိုက်ခိုက်ခံရပြီး မြို့နယ်ရဲတပ်ဖွဲ့မှူးအပါ ၈ ဦးသေတယ်လို့ သိရပါတယ်။

စာတည်း – လင်း

မြေလတ်အသံ၊ ဇန်နဝါရီ ၄၊ ၂၀၂၅။

မကွေးတိုင်း၊ အောင်လံမြို့နယ်မှာ အမျိုးသမီး ၁ ဦး ပစ္စည်းလုအသတ်ခံရပြီး စစ်ကော်မရှင်ခန့် ရပ်/ကျေးအုပ်ချုပ်ရေးမှူး ၁ ဦးလည်း ပစ်သတ်ခံလိုက်ရတယ်လို့ ဒေသခံတွေက ပြောပါတယ်။

အသတ်ခံရသူမှာ ပြကြီးကျေးရွာမှ အသက် ၆၀ နှစ်အရွယ်ရှိတဲ့ ဒေါ်မညွန့်ကြည်နဲ့ မိုးကောင်းကျေးရွာမှ အုပ်ချုပ်ရေးမှူး အသက် ၄၀ အရွယ် ဦးမင်းမင်းတို့ဖြစ်ပါတယ်။

ဒေါ်မညွန့်ကြည်ဟာ ပြည်ပအလုပ်အကိုင်ရှာဖွေရေးလုပ်ငန်းလုပ်ကိုင်နေသူတဦးဖြစ်ပြီး ဦးခေါင်းနဲ့ နံရိုးတို့မှာ ပေါက်ပြဲဒဏ်ရာတွေနဲ့ သေဆုံးနေတဲ့ရုပ်အလောင်းကို ပြလို့ကျေးရွာရှိ ဘုရားကိုးဆူရဲ့ တောင်ဘက်လမ်းကြားမှာ ဇန်နဝါရီ ၃ ရက်မနက်ပိုင်းက တွေ့ရှိခဲ့တာလို့ ဆိုပါတယ်။

“သူ(ဒေါ်မညွန့်ကြည်)ကတော့ ဒလန်မဟုတ်ဘူးဗျ။ လုယက်ခံရပြီး အသတ်ခံရတာပါ။ သူ့ရဲ့ အလောင်းကို က ပြလို့ရွာမှာ ရွာသားတွေတွေ့တာ။ မိသားစုပြောတာကတော့ အလောင်းမှာ နားကပ်၊ ဆွဲကြိုး၊ လက်စွပ်၊ ပိုက်ဆံထုတ်နဲ့ ဖုန်းမတွေ့ရဘူးတဲ့။ ပစ္စည်းတွေပျောက်နေတော့ လုယက် အသတ်ခံရတာလို့ ယူဆကြတာ”လို့ အောင်လံမြို့ မြေပြင်စစ်ရေးသတင်းအဖွဲ့မှ အမျိုးသားတဦးက ပြောပါတယ်။

ဒေါ်မညွန့်ကြည်ရဲ့ ရုပ်အလောင်းကို ပြလို့ရွာရဲစခန်းမှ ရဲသားတွေယူဆောင်ခဲ့ပြီးနောက် ရဲစခန်းကနေတဆင့် သူမရဲ့မိသားစုတွေက အလောင်းကိုလာယူခဲ့ကြတယ်လို့ သိရပါတယ်။

မိုးကောင်းကျေးရွာက အုပ်ချုပ်ရေးမှူး ဦးမင်းမင်းကတော့ ဇန်နဝါရီ ၃ ရက် နေ့လယ် ၁ နာရီကျော်မှာ ရွာရှိအလယ်တန်းကျောင်း(ခွဲ)မှာ ပညာရေးစုံညီပွဲတော်ကျင်းပနေချိန် လက်နက်ကိုင်လူတစုက ပွဲအတွင်းဝင်ရောက်ကာ ပစ်သတ်ခံတာလို့ ဆိုပါတယ်။

“ပစ်ခတ်ခဲ့သူတွေက သေနတ် ၅ ချက်ဖောက်ခဲ့တာဆိုတော့ စုံညီပွဲပျက်တယ်တဲ့။ ဘယ်အဖွဲ့က လုပ်တယ်ဆိုတာ မသိရပါ။ စပစ်တော့ လက်ကိုရှပ်ထိတော့ ထွက်ပြေးတဲ့အချိန် ခုံနဲ့တိုက်ပြီးလဲတာမှာ ၅ ချက်လောက်ထပ်အပစ်ခံရတယ်တဲ့။ ရွာကအကုန် စစ်တပ်ထောက်ခံတယ်လို့တော့ ပြောလို့မရဘူး။ ရွာနားမှာက အောင်လံမြို့မြောက်ဘက် မြို့အဝင်ဂိတ်ရှိတော့ ဒီကောင်ကထောင်(လွှား)တယ်။ သူက သိုင်းတတ်တယ်လည်း ပြောကြတယ်။”လို့ အထက်ပါအမျိုးသားက ပြောပါတယ်။

မိုးကောင်းကျေးရွာဟာ အောင်လံမြို့နဲ့ ၂ မိုင်သာကွာဝေးတာကြောင့် ဦးမင်းမင်းဟာ မြို့မြောက်ဘက်ရှိ ဂိတ်စခန်းမှ စစ်ကော်မရှင်တပ်သားတွေနဲ့ပူးပေါင်းကာ ရွာကနေစစ်မှုထမ်းကောက်ခံတာ၊ လူငယ်တွေကို ပေါ်တာဆွဲဖမ်းတာတွေ လုပ်ဆောင်နေသူတဦးဖြစ်တယ်လို့ သူကဆိုပါတယ်။

အုပ်ချုပ်ရေးမှူး ဦးမင်းမင်း ပစ်သတ်ခံရပြီးနောက် ပညာရေးစုံညီပွဲတော် ပွဲပျက်ခဲ့ပြီး အခင်းဖြစ်နေရာကို စစ်ကော်မရှင်တပ်ဖွဲ့ဝင်တွေရောက်လာတာမရှိခဲ့ဘူးလို့ သိရပါတယ်။

စာတည်း – လင်း

ကျော်ကြီး၊ ဒိန်းဂျား

ပွင့်ဖြူ၊ ဇန်နဝါရီ ၃၊ ၂၀၂၆။

မကွေးတိုင်း၊ ပွင့်ဖြူမြို့နယ်၊ ကျောင်းကုန်းကြီးကျေးရွာမှာ အုပ်ချုပ်ရေးမှူးနဲ့အဖွဲ့ပစ်ခတ်ခံရပြီး ၄ ဦးသေဆုံးခဲ့တယ်လို့ ပွင့်ဖြူမြို့နယ်တော်လှန်ရေးတပ်ပေါင်းစုတာဝန်ရှိသူဆီက သိရပါတယ်။

ဇန်နဝါရီ ၃ ရက်မနက် ၄ နာရီခန့်မှာ ကျေးရွာဘုန်းကြီးကျောင်းထဲ နေထိုင်နေတဲ့ ကျေးရွာအုပ်ချုပ်ရေးမှူး အသက် ၄၀ ကျော်အရွယ် ပြားဦး (ခ) မင်းခိုင်ဦးနဲ့အဖွဲ့ကို ဝင်ရောက်ပစ်ခတ်ခဲ့တာလို့ ဆိုပါတယ်။

“သူတို့က ဘုန်းကြီးကျောင်းထဲမှာ စုနေနေတာကိုသိလို့ သူတို့နေတဲ့အခန်းထဲထိ ဝင်ပစ်ခဲ့တယ်။ ထိခိုက်တဲ့ ပျူတယောက်ကတော့ ကျည်မှန်ပြီးကာမှ ပုဆိုးစလွယ်သိုင်းထွက်ပြေးသွားတယ်။”လို့ ပွင့်ဖြူမြို့နယ် တော်လှန်ရေးတပ်ပေါင်းစုတာဝန်ရှိသူတဦးက ပြောပါတယ်။

ပစ်ခတ်ခံရလို့အုပ်ချုပ်ရေးမှူး ပြားဦး (ခ) မင်းခိုင်ဦး၊ အုပ်ချုပ်ရေးမှူးလက်ထောက်တွေဖြစ်တဲ့ ပျူစောထီးအောင်အောင်၊ ရင်မင်းထွန်း၊ အောင်မြင့်သူတို့ ၄ ဦးဟာ နေရာတင်သေဆုံးခဲ့တယ်လို့ ဆိုပါတယ်။

ရွာကနေ တိမ်းရှောင်သွားသူတွေကိုလည်း အဆိုပါအုပ်ချုပ်ရေးမှူးနဲ့အဖွဲ့က ရွာကိုပြန်မလာရင် ငွေကျပ် ၅ သိန်းဒဏ်ရိုက်မယ်လို့ ခြိမ်းခြောက်တာနဲ့ တော်လှန်ရေးအဖွဲ့တွေထိန်းချုပ်ထားတဲ့ရွာတွေက ပြည်သူတွေကိုလည်း ဖမ်းဆီးငွေညှစ်၊ ဆိုင်ကယ်တွေသိမ်းယူတာကြောင့် သွားရောက်ပစ်ခတ်ခဲ့တာ လို့ဆိုပါတယ်။

ပစ်ခတ်ပြီးနောက် ပျူစောထီးအဖွဲ့တွေကိုင်ဆောင်တဲ့ ဓားရှည် ၂ လက်၊ သေနတ် ၁ လက်၊ ကျည်ကာ ၁ ထည်၊ လက်ပစ်ဗုံး ၁ လုံး၊ ကျည်ဘောက် ၂ ခု၊ ဖုန်း ၃ လုံး၊ ကျည်ဆန်အချို့နဲ့ ငွေအချို့ကို သိမ်းဆည်းခဲ့တယ်လို့ ဆိုပါတယ်။

ဒီဇင်ဘာ ၂၃ ရက်ကလည်း ပွင့်ဖြူမြို့နယ်၊ ကျောင်းကုန်းကြီး ပျုစောထီးစခန်းကို တော်လှန်ရေးတပ်ဖွဲ့ဝင်တွေက ဝင်ရောက်တိုက်ခိုက်ရာက အပြန်အလှန်ပစ်ခတ်မှုဖြစ်ပြီး ပျူစောထီး ၆ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း

မလှိုင်၊ ဒီဇင်ဘာ ၂၁၊ ၂၀၂၅။

မန္တလေးတိုင်း၊ မလှိုင်မြို့နယ်၊ လယ်ကြီး၊ မျက်သီးကျင်း၊ ရုံးတောကျေးရွာတွေမှာ ၁ ရက်တည်း အုပ်ချုပ်ရေးမှူးအပါအဝင် ၆ ဦး ပစ်သတ်ခံရတယ်လို့ မလှိုင်မြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ပစ်သတ်ခံရသူတွေဟာ လယ်ကြီးကျေးရွာနေ အုပ်ချုပ်ရေးမှူး ဦးလှမင်းကြည်၊ ဇနီးဖြစ်သူ ဒေါ်ချိုချိုမြင့်၊ မျက်သီးကျင်းကျေးရွာနေ ဒေါ်လှရှင်၊ သမီးဖြစ်သူ ဒေါ်ယဥ်ယဥ်အောင်၊ သားဖြစ်သူ ဦးမိုးသူနဲ့ ရုံးတောကျေးရွာနေ သားဖွားဆရာမ ဒေါ်အေးအေးခိုင်တို့ဖြစ်ပြီး ဒီဇင်ဘာ ၁၉ ရက်မနက် ၅ နာရီကျော်မှာ နေအိမ်တွေကို သွားရောက်ပစ်ခတ်ခဲ့တာလို့ ဆိုပါတယ်။

“၃ ဖွဲ့ခွဲပြီး ၃ ရွာ တပြိုင်တည်းဝင်ရှင်းခဲ့တာ။ အုပ်ချုပ်ရေးမှုးရယ်၊ Nurse(သူနာပြု)ရယ်၊ အရပ်သားဆိုပေမယ့် **တွေနဲ့ပိုင်တယ်ဆိုပြီး မဲကိစ္စတွေမှာပါဝင်ပြီး ဟိုတိုင်ဒီတိုင်လုပ်နေကြတဲ့သူတွေ။ ဒလန်ပေါ့ဗျာ”လို့ မလှိုင်ပကဖတာဝန်ရှိသူတဦးက ပြောပါတယ်။

ဒီပစ်ခတ်မှုကို မလှိုင်မြို့နယ်ပကဖ တပ်ဖွဲ့ဝင်တွေကလုပ်ဆောင်ခဲ့တာဖြစ်ပြီး ၆ ဦးစလုံးဟာ ပစ်ခတ်ခံရပြီးနောက် နေရာတင်ပွဲချင်းပြီး သေဆုံးခဲ့တယ်လို့ ဆိုပါတယ်။

နိုဝင်ဘာ ၂၆ ရက်ကလည်း မလှိုင်မြို့နယ်၊ သဲကန်ကျေးရွာအုပ်ချုပ်ရေးမှူး အသက် ၄၀ ကျော်အရွယ်ရှိ ကိုသိန်းဇော်နဲ့ စာရေး အောင်ကိုမြင့်ကို နေအိမ်မှာ ပစ်သတ်ခံရပြီး သေဆုံးခဲ့သေးတယ်လို့ သိရပါတယ်။

စာတည်း – လင်း

ချောက်၊ ဒီဇင်ဘာ ၅၊ ၂၀၂၅။

မကွေးတိုင်း၊ ချောက်မြို့၊ အမှတ် ၅ ရပ်ကွက် အုပ်ချုပ်ရေးမှူးကို လူငယ် ၂ ဦးက ဧည့်စာရင်းတိုင်ဖို့ဆိုကာ ဝင်ရောက်လာပြီးနောက် နေအိမ်ထဲမှာပဲပစ်သတ်သွားတယ်လို့ ဖြစ်စဥ်ကိုသိရှိတဲ့ ချောက်မြို့ခံတွေဆီက သိရပါတယ်။

ပစ်သတ်ခံရသူက အမှတ် ၅ ရပ်ကွက်အုပ်ချုပ်ရေးမှူး အသက် ၅၂ အရွယ် ထွေးအောင်နိုင်ဖြစ်ပြီး ဒီဇင်ဘာ ၄ ရက် ညနေ ၅ နာရီဝန်းကျင်မှာ ပစ်သတ်ခံရတဲ့အပြင် လက်တဖက်လည်း ဖြတ်ခံလိုက်ရတယ်လို့ ဆိုပါတယ်။

“ကောင်လေး ၂ ဦးက ဧည့်စာရင်းတိုင်ချင်တယ်ဆိုပြီး အိမ်ထဲဝင်ပစ်သွားတာ၊ အိမ်ထဲထိဝင်ပြီး ၃ ချက် ပစ်သွားတာ၊ ဦးခေါင်းပွင့်သွားတယ်၊ လက်တဖက် ပြတ်သွားတယ်၊ သေသွားပြီ၊ အခု ‘မနောဖြူ’ နာရေးကားနဲ့ ချောက်ရင်ခွဲရုံကိုပို့ထားတယ်၊ သူ့လက်ထဲမှာလည်း သေနက်အတိုရှိတယ်၊ သူကိုယ်ပိုင်ဝယ်ကိုင်ထားတာ၊ ချောက်မြို့မှာ ၁၅ ရပ်ကွက် ရှိတာကို ၁၅ ရပ်ကွက်ရဲ့ အုပ်ချုပ်ရေးမှူးတွေ အပေါ်မှာဆရာကြီးလိုနေတာ”လို့ ချောက်မြို့ခံတဦးက ပြောပါတယ်။

ဒီပစ်ခတ်မှုကိုဘယ်အဖွဲ့အစည်းတွေကလုပ်ခဲ့တယ်ဆိုတာကိုတော့ ထုတ်ပြန်ကြေညာတာမရှိသေးပါဘူး။

အမှတ် ၅ အုပ်ချုပ်ရေးမှူး ပစ်ခတ်ခံရပြီးနောက် ချောက်မြို့ အမှတ် ၁ ရပ်ကွက်၊ အမှတ် ၂ ရပ်ကွက်၊ အမှတ် ၃ ရပ်ကွက်၊ အမှတ် ၄ ရပ်ကွက်နေရာတွေမှာ စစ်ကော်မရှင်တပ်တွေက အသွားအလာတွေကို စစ်ဆေးနေတယ်လို့ သိရပါတယ်။

ပြီးခဲ့တဲ့ ဇန်နဝါရီ ၁၁ ရက်ကလည်း ချောက်မြို့နယ်၊ ဆားလယ်ကျွန်းကျေးရွာက စစ်တပ် သတင်းပေး ထွန်းနိုင် ဆိုသူ အသတ်ခံရပြီးသေဆုံးခဲ့ပါသေးတယ်။

စာတည်း – လင်း