◼ စဉ့်ကူးမှာလည်း ဗုံးထပ်ကြဲခံရလို့ လူနေအိမ်နဲ့စျေးဆိုင်တွေ မီးလောင်

မြေလတ်အသံ၊ ဒီဇင်ဘာ ၁၆၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်နဲ့ မန္တလေးတိုင်း၊ စဉ့်ကူးမြို့နယ်တွေမှာ စစ်ကော်မရှင်တပ်က လေယာဥ်နဲ့ ဗုံးကြဲတိုက်ခိုက်ခဲ့တယ်လို့ ဒေသခံတွေက ပြောပါတယ်။

ဒီဇင်ဘာ ၁၄ ရက် ည ၆ နာရီကျော်မှာ ကန့်ဘလူမြို့နယ်၊ ပဇီကြီးကျေးရွာဘုန်းကြီးကျောင်းကို တိုက်လေယာဥ် ၁ စီးနဲ့ဗုံး ၂ လုံးကြဲချခဲ့တာကြောင့် ကျောင်းအတွင်းကို ကျရောက်ပေါက်ကွဲခဲ့ပြီး ဘုန်းကြီးကျောင်းဆောင်တွေပျက်စီးခဲ့ကာ သံဃာ ၁ ပါးဒဏ်ရာရခဲ့တယ်လို့ ကန်ဘလူဒေသခံအမျိုးသားတ​ဦးက မြေလတ်အသံကို ပြောပါတယ်။

“ကျောင်းမှာ အဆောင် ၅ ဆောင်ရှိတာ ၅ ဆောင်လုံး ပျက်သွားတယ်။ သံဃာ ၁ ပါးကတော့ ဒဏ်ရာရတယ်။ ကျန်တဲ့သံဃာတွေနဲ့ ကိုရင်​တွေကတော့ လေယာဥ်သံကြားတာနဲ့ ဗုံးကျင်းထဲကို ဝင်ပုန်းနေကြလို့ လွတ်သွားတယ်”လို့ သူက ပြောပါတယ်။

၂၀၂၃ ၊ ဧပြီလ ၁၁ ရက်က ပဇီကြီးကျေးရွာမှာ ပြည်သူ့အုပ်ချုပ်ရေးရုံးဖွင့်ပွဲအခမ်းအနားအဖြစ် ကျွေးမွေးတဲ့အစားအသောက်တွေကို ရွာခံတွေဝိုင်းဖွဲ့စားသောက်နေစဥ် စစ်ကော်မရှင်တပ်ကတိုက်လေယာဥ်နဲ့ ဗုံးကြဲတိုက်ခိုက်ခဲ့တဲ့အပြင် ရဟတ်ယာဥ်နဲ့ပါ ပစ်ခတ်တိုက်ခိုက်ခဲ့တာကြောင့် ကလေး ၃၇ ဦးအပါ လူ ​၁၅၈ ဦးသေဆုံးခဲ့တာပါ။

အဲ့ဒီဗုံးကြဲတိုက်ခိုက်မှုဟာ စစ်ကော်မရှင်တပ်ရဲ့ လေကြောင်းတိုက်ခိုက်မှုတွေကြောင့် လူအစုလိုက်၊ အပြုံလိုက်သေဆုံးမှု အများဆုံးဖြစ်စဥ်တခုလည်း ဖြစ်ပါတယ်။

အလားတူ ဒီဇင်ဘာ ၁၅ ရက် ညနေ ၄ နာရီကျော်မှာ စဉ့်ကူးမြို့နယ်၊ လက်ပံလှကျေးရွာကို စစ်တပ်က တိုက်လေယာဥ် ၁ စီးနဲ့ ဗုံး ၂ လုံးကြဲချခဲ့တာကြောင့် ကျေးရွာစျေးဆိုင်တန်းတွေနဲ့ လူနေအိမ်တွေပေါ် ကျရောက်ပေါက်ကွဲခဲ့ပြီး မီးလောင်ပျက်စီးခဲ့တယ်လို့ သိရပါတယ်။

” စျေးဆိုင်တွေအကုန်လုံးပျက်စီးတယ်။ ပြီးတော့ အိမ် ၂ လုံးပျက်စီးပြီးတော့ မီးပါလောင်သွားတယ်။ အစတော့မီးက မများဘူး။ ငြှိမ်းမယ့်သူမရှိတော့ မီးကများသွားတယ်။ အကုန်လုံးနီးပါးကစစ်ရှောင်နေကြတာ”လို့ စဉ့်ကူးဒေသခံအမျိုးသားတဦးက ပြောပါတယ်။

လက်ပံလှကျေးရွာရှိ ပြည်သူတွေအများစုဟာ စစ်ဘေးတိမ်းရှောင်နေကြတာကြောင့် ဗုံးကြဲတိုက်မှုအတွင်း လူအထိအခိုက်မရှိခဲ့တာလို့ သူကဆိုပါတယ်။

ဒီဇင်ဘာ ၁၃ ရက်ညပိုင်းကလည်း လက်ပံလှကျေးရွာကို စစ်ကော်မရှင်တပ်က ဒရုန်းနဲ့ဗုံးချခဲ့တာကြောင့် အသက် ၃၀ ကျော်အရွယ် အမျိုးသား ၂ ဦးသေဆုံးပြီး အမျိုးသမီး ၁ ဦး ဒဏ်ရာပြင်းထန်ရရှိခဲ့တယ်လို့သိရပါတယ်။

မြေလတ်အသံ၊ နိုဝင်ဘာ ၁၉၊ ၂၀၂၅။

မကွေးတိုင်း၊ ဂန့်ဂေါမြို့နယ်၊ တောင်ခင်ရန်းကျေးရွာကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့လို့ အမျိုးသား ၁ ဦးသေဆုံးပြီး ၇ ဦးဒဏ်ရာရရှိခဲ့တယ်လို့ ဒေသခံတွေကပြောပါတယ်။

အိမ်ခြေ ၅၀၀ ခန့်ရှိတဲ့ တောင်ခင်ရန်းရွာထဲကို နိုဝင်ဘာ ၁၈ ရက် ည ၉ နာရီကျော်မှာ တိုက်လေယာဥ် ၁ စီးနဲ့ ဗုံး ၂ လုံး ကြဲချခဲ့တာဖြစ်ပြီး ကျေးရွာတွင်းနေအိမ်တွေကို ကျရောက်ပေါက်ကွဲခဲ့တယ်လို့ ဆိုပါ တယ်။

” ဒဏ်ရာရ၊ သေဆုံးသူတွေက မိသားစုဝင်တွေ။ မိသားစုက ၂ စုထက်မနည်းဘူး၊ ထိခိုက်တာ” လို့ မြေပြင်အခြေအနေကိုသိရှိသူ ဒေသခံအမျိုးသားတဦးက ပြောပါတယ်။

နေအိမ်တွေပေါ်ဗုံးကျရောက်ပေါက်ကွဲတာကြောင့် တောင်ခင်ရန်းရွာခံ အသက် ၃၀ နှစ်ခန့်ရှိ ဦးနိုင်ထွန်း သေဆုံးခဲ့ပြီး ၎င်းရဲ့မိသားစုဝင်တချို့အပါအဝင် အမျိုးသား ၅ ဦးနဲ့ အမျိုးသမီး ၂ ဦး စုစုပေါင်း ၇ ဦး ဒဏ်ရာရှိခဲ့တဲ့အပြင် နေအိမ် ၂ လုံးထက်မနည်းပျက်စီးခဲ့တယ်လို့ သိရပါတယ်။

တောင်ခင်ရန်းကျေးရွာဟာ ပျူစောထီးနဲ့ စစ်ကော်မရှင်တပ်စခန်းအထိုင်ချတပ်စွဲထားတဲ့ မြောက်ခင်ရန်း ကျေးရွာနဲ့ ၁ မိုင်ကျော်ကွာဝေးပြီး လတ်တလောမှာ တိုက်ပွဲဖြစ်ပွားတာမရှိဘဲ အခုလိုဗုံးကြဲတိုက်ခိုက်ခဲ့တာလို့ အထက်ပါအမျိုးသားက ပြောပါတယ်။

နိုဝင်ဘာ ၁၇ ရက် မနက်ပိုင်းက ဂန့်ဂေါမြို့နယ်၊ စန်းမြို့ရွာအနီးကို တိုက်လေယာဥ် ၁ စီးနဲ့ ဗုံးသီး ၂ လုံးကြဲချတိုက်ခိုက်ခဲ့ပြီး အဲ့ဒီတိုက်ခိုက်မှုမှာ လူနဲ့နေအိမ်တွေထိခိုက်တာမရှိခဲ့ဘူးလို့ သိရပါတယ်။

စာတည်း – ဟိန်းစံ

မြေလတ်အသံ၊ နိုဝင်ဘာ ၁၉၊ ၂၀၂၅။

အမျိုးသားညီညွှတ်ရေးအစိုးရ(NUG)လက်အောက် ပြည်သူ့ကာကွယ်ရေးတပ်တွေထိန်းချုပ်ထားတဲ့ စစ်ကိုင်းတိုင်း၊ ဗန်းမောက်မြို့နဲ့ ကနီမြို့နယ်ကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သား ၃ ဦး သေဆုံးခဲ့တယ်လို့ ဒေသခံတွေက ပြောပါတယ်။

ယမန်နေ့နိုဝင်ဘာ ၁၈ ရက်ညနေ ၄ နာရီကျော်မှာ ဗန်းမောက်မြို့နယ်တောင်ပိုင်းရှိတိုက်နယ်ဆေးရုံနဲ့ အချုပ်ခန်းနေရာတွေကို စစ်ကော်မရှင်တပ်ကတိုက်လေယာဥ်နဲ့ ဗုံးသီး ၁ လုံးစီ ကြဲချခဲ့တာကြောင့် ကျန်းမာရေးဝန်ထမ်းအမျိုးသမီး ၁ ဦးနဲ့ အမျိုးသား ၁ ဦးတို့ သေဆုံးခဲ့တာလို့ဆိုပါတယ်။

” ဆေးရုံကိုအရင်ချတာ။ ပြီးမှအချုပ်ခန်းချတာ။ ဆေးရုံက ၂ယောက်သေတယ်လို့ပဲသိရတယ်။ ကျန်တဲ့ အသေးစိတ်တွေကိုတော့မသိရဗျ။ ထိခိုက်မှုတွေများနိုင်တယ်ဗျ။ ဒီနေရာတွေက လူများတဲ့နေရာတွေလေ”လို့ ဗန်းမောက်ဒေသခံတော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

ဗုံးကြဲခံရတဲ့ ဆေးရုံဟာ အမျိုးသားညီညွတ်ရေးအစိုးရ – NUG ရဲ့ထိန်းချုပ်မှုအောက်မှာလည်ပတ်နေတဲ့ တိုက်နယ်ဆေးရုံဖြစ်ပြီး ဖြစ်စဥ်နဲ့ပတ်သက်လို့ ဗန်းမောက်မြို့နယ် ပကဖ၊ ပအဖ၊ ပလဖ အဖွဲ့အစည်းတွေက သတင်းထုတ်ပြန်တာမရှိသေးပါဘူး။

အလားတူ နိုဝင်ဘာ ၁၈ ရက် ညနေ ၃နာရီကျော်မှာ ကနီမြို့နယ်၊ မင်းအိုကျေးရွာအနီး ယာခင်းတွေထဲကို စစ်တပ်တိုက်လေယာဥ် ၂ စီးက ဗုံး ၂ လုံးကြဲချခဲ့တာကြောင့် ယာခင်းထဲမှာရှိနေတဲ့ အမျိုးသမီး ၁ ဦးသေဆုံးပြီး ၂ ဦး ဒဏ်ရာရရှိခဲ့တယ်လို့ သိရပါတယ်။

” ကြဲတဲ့နေရာက PDF စခန်းဟောင်းနေရာလို့ပြောတယ်။ အရင်ကစခန်းချခဲ့တာပေါ့။ အခု မနေတော့ဘူး။ အဲ့နားမှာနှမ်းရိတ်နေကြတဲ့ သားအမိနှစ်ယောက်ထိတယ်။ သမီးဖြစ်သူ သေတယ်။ နောက်ထပ်ထိတဲ့ ယောကျာ်းတယောက်ကတော့ ဘယ်သူလည်းဆိုတာမသိရဘူး” လို့ ကနီဒေသခံအမျိုးသားတဦးက ပြောပါတယ်။

ဗုံးကြဲခံရတာကြောင့် အသက် ၃၀ ဝန်းကျင်ရှိ အမျိုးသမီး ၁ ဦး သေဆုံးခဲ့ပြီး ၎င်းရဲ့မိခင် အသက် ၆၁ နှစ်ရှိ အမျိုးသမီး ၁ ဦးနဲ့ အသက် ၂၃ ဝန်းကျင်ရှိ အမျိုး သား ၁ ဦး ဒဏ်ရာရရှိခဲ့တယ်လို့ ဆိုပါတယ်။

ပြီးခဲ့တဲ့နိုဝင်ဘာ ၁၁ ရက်ကလည်း ကနီမြို့နယ်၊ ဝင်းမနားကျေးရွာရှိ တိုက်နယ်ဆေးရုံကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် ဆေးကုသမှုခံယူနေကြတဲ့ ​ပြည်သူ ၈ ဦးသေဆုံးပြီး ၅၀ ကျော် ဒဏ်ရာရရှိခဲ့တယ်လို့သိရပါတယ်။

စာတည်း – ဟိန်းစံ

■ ဗုံးခိုကျင်းတွေ ကြိုတင်ပြင်ဆင်နိုင်ခဲ့လို့ ထိခိုက်မှုနည်းခဲ့တယ်လို့ဆို

မန္တလေး၊ ဖေဖော်ဝါရီ ၂၊ ၂၀၂၅။

မန္တလေးတိုင်း၊ တောင်သာမြို့နယ်ပကဖရဲ့စစ်သင်တန်းဆင်းပွဲပြုလုပ်ခဲ့တဲ့ ရတနာပုံကျေးရွာအနီးနဲ့ ဇရပ်ကြီးကျေးရွာတွေမှာ ၁ ရက်တည်း ၃ ကြိမ်လေကြောင်းတိုက်ခိုက်ခံရပြီး ဒေသခံ ၁ ဦးအပါ ၃ ဦးဒဏ်ရာရတယ်လို့ တောင်သာမြို့နယ်ပကဖတာဝန်ခံထံက သိရပါတယ်။

ဖေဖော်ဝါရီ ၁ ရက် မနေ့မနက် ၁၀ နာရီကျော်မှာ တောင်သာမြို့နယ်ပကဖရဲ့ အမှတ်စဥ် ၇ စစ်အခြေခံသင်တန်းဆင်းပွဲပြုလုပ်နေချိန် စစ်ကောင်စီဘက်က တိုက်လေယာဉ်နဲ့ ဗုံး ၂ လုံး ကြဲချ၊ ပစ်ခတ်မှုတွေပြုလုပ်ခဲတဲ့အပြင် Y 12 လေယာဉ်နဲ့ဗုံးသီး ၁၆ လုံးချတိုက်ခိုက်ခဲ့တာလို့ ဆိုပါတယ်။

“သင်တန်းဆင်းပွဲမပြီးခင် လာချတာ။ ဗုံးသီးတွေကတော့ ဌာနေ(သင်တန်းဆင်းပွဲနေရာ) နေရာအနှံ့ကိုကျတာ။ ပကဖရဲဘော်တွေကတော့ ထိခိုက်မရှိဘူး။” လို့ တောင်သာမြို့နယ်ပကဖတာဝန်ခံက မြေလတ်အသံကို ပြောပါတယ်။

စစ်ကောင်စီတပ်က လေကြောင်းနဲ့ဗုံးကြဲတိုက်ခိုက်တာကြောင့် သင်တန်းဆင်းပွဲနေရာဝန်းကျင်မှာရှိနေတဲ့ နန်းမြင့်ကျေးရွာက အသက် ၄၀ ကျော်အရွယ် ကိုအောင်ကိုနဲ့ သုံ့ပန်းအဖြစ် ဖမ်းမိထားတဲ့ ကျွဲတလင်းရွာက အသက် ၇၈ နှစ်အရွယ် ပျူစောထီး ဦးသန်းရွှေဆိုသူတို့ ဒဏ်ရာရခဲ့တယ်လို့ ဆိုပါတယ်။

သင်တန်းဆင်းပွဲမပြုလုပ်မီ ဇန်နဝါရီ ၃၁ ရက် ညပိုင်းမှာ သင်တန်းဆင်းပွဲပြုလုပ်မယ့်နေရာ သတင်းပေါက်ကြားပြီး စစ်ကောင်စီထောက်ခံတယ်လီဂရမ်ချန်နယ်တွေမှာ ဖော်ပြမှုတွေရှိခဲ့ပေမယ့် ဗုံးခိုကျင်းတွေကြိုတင်ပြင်ဆင်ပြီး သင်တန်းဆင်းပွဲကို ပြုလုပ်ခဲ့တာလို့ အထက်ပါတာဝန်ခံက ပြောပါတယ်။

လေကြောင်းကနေဗုံးကြဲခံရချိန် ရဲဘော်တွေနဲ့ သင်တန်းဆင်းပွဲလာပြည်သူတွေက ဗုံးခိုကျင်းတွေထဲ အချိန်မီဝင်ရောက်ပုန်းအောင်းလိုက်နိုင်တာကြောင့် ထိခိုက်သူတွေနည်းသွားခဲ့တာ လို့ဆိုပါတယ်။

ဒါ့အပြင် ယမန်နေ့ညနေပိုင်းမှာ အထက်ပါကျေးရွာတွေအနီးဝန်းကျင်ကို တိုက်လေယာဉ်နဲ့ ဗုံးသီး ၂ လုံးထပ်မံကြဲချခဲ့ရာ ရတနာပုံကျေးရွာလမ်းဆုံကို ကျရောက်ပေါက်ကွဲခဲ့ပြီး ဒေသခံတွေထိခိုက်တာမရှိဘဲ နေအိမ် ၃ လုံး ထိခိုက်ပျက်စီးမှုရှိခဲ့တယ်လို့ ဆိုပါတယ်။

ယမန့်နေ့ည ၁၂ နာရီခန့်မှာ ဇရပ်ကြီးကျေးရွာကို စက်တပ်လေထီး(ပါရာမိုတာ) ၂ စီးနဲ့ ၁၂၀ မမ ဗုံးသီး ၄ လုံးထပ်မံကြဲချခဲ့ရာ ကျေးရွာကာကွယ်ရေးအဖွဲ့ဝင် ၁ ဦးထိခိုက်ဒဏ်ရာရခဲ့တယ်လို့ သိရပါတယ်။

ဇန်နဝါရီ၂၈ ရက်ကလည်း တောင်သာမြို့နယ်၊ ရွာတန်းရှည်ကျေးရွာကို စစ်ကောင်စီတပ်က စက်တပ်လေထီးနဲ့ဗုံးချတိုက်ခိုက်လို့ အမျိုးသမီး ၁ ဦးသေဆုံးပြီး သားအဖ ၂ ဦးဒဏ်ရာရခဲ့တယ်လို့ သိရပါတယ်။

စာတည်း – ဟိန်းစံ

စစ်ကိုင်း၊ မေ ၉၊ ၂၀၂၃။

စစ်ကိုင်းတိုင်း၊ ရေဦးမြို့နယ်အနောက်ခြမ်း၊ ထန်းတောရွာထိပ်ရှိ ကလေးတွေကို စာသင်ပေးနေတဲ့ CDM စာသင်ကျောင်း (အရပ်ခေါ် ဗောဓိကျောင်း) ကို မေလ ၉ ရက်နေ့လယ် ၂ နာရီကျော်လောက်မှာ စစ်ကောင်စီက လေယာဥ်နဲ့ဗုံးကြဲခဲ့တာကြောင့် အဆောက်အဦးတချို့ ပျက်စီးမှုရှိခဲ့တယ်လို့ သိရပါတယ်။

အဲ့ဒီကျောင်းကို တံတားဦး လေတပ်စခန်းကနေ ဂျက်ဖိုင်တာ ၁ စီးနဲ့ ဗုံးသီး ၂ လုံးကြဲချခဲ့တာကြောင့် စာသင်ကျောင်းထဲရှိ လုပ်သားအဆောင်တဆောင်မှာ မီးလောင်ပျက်စီးခဲ့သလို ကျောင်းမုဒ်ဦးတွေနဲ့ ရွာမှာသွယ်တန်းထားတဲ့ လျှပ်စစ်မီးကြိုးတွေလည်း ကျိုးကျသွားခဲ့ကြတယ်လို့ People’s Defense Comrade မှ ပြန်ကြားရေးတာဝန်ခံ ထူးခန့်ဇော်(အမေ့သား)က ပြောပါတယ်။

“ဒီကျောင်းမှာ ကလေးတွေကိုမနက်ပိုင်းကနေ မွန်းလွဲ၁၂နာရီအထိသင်ကြားပေးခဲ့ပြီး ကျောင်းဆင်းတာ။ ဗုံးလာကြဲတာက ၂ နာရီဆိုတော့ ကလေးတွေ၊ ဆရာ၊မတွေနဲ့ ရွာသားတွေ ထိခိုက်တာမရှိခဲ့ဘူးဗျ။ ကံကောင်းသွားတာပေါ့။ လေယာဥ်က ကျောင်းကိုအသွားတခေါက် ဗုံးတလုံးကြဲချတယ်၊ ပြီးတော့ ပြန်ဝိုက်လာပြီးတော့ ဗုံးတလုံးထပ်ကြဲချခဲ့တာ။ လေယာဥ်ကကျောင်းပေါ်မှာ ၁၅ မိနစ်လောက် ကြာဝဲပျံခဲ့တယ်။ ဒီကျောင်းက ရွာရဲ့ထိပ်ဦးမှာတည်ရှိတာ”လို့ ဆိုပါတယ်။

အသက် ၅ နှစ်ကနေ ၁၀ နှစ်အထိရှိတဲ့ ကလေးသူငယ် ၅၀ ကျော်ကို CDM ဆရာ၊ ဆရာမတွေနဲ့ ဆယ်တန်းဖြေထားပြီးတဲ့ ကျောင်းသူ/သားတွေက စာသင်ကြားပေးနေတဲ့ ကျောင်းဖြစ်တယ်လို့လည်း သူကဆက်ပြောပါတယ်။

အဲ့ဒီကျောင်းကို ဂျက်ဖိုင်တာနဲ့လာရောက် ဗုံးကြဲတာဟာ ပထဆုံးအကြိမ်ဖြစ်သလို၊ လေယာဥ်နဲ့ ထပ်ပြီးဗုံးကြဲမှာကို စိုးရိမ်တဲ့အတွက် အိမ်ခြေ ၁၀၀ ကျော်ရှိတဲ့ ထန်းတောရွာ၊ အိမ်ခြေ ၆၀၀ ခန့်ရှိတဲ့ တင်းတိန်ရံရွာက ဒေသခံပြည်သူတွေကို ဘေးလွတ်ရာနေရာကို ရွေ့ပြောင်းပေးထားတယ်လို့ သိရပါတယ်။

စာတည်း – လင်း