ရေနံမြေ

မကွေး၊ ဇွန် ၉၊ ၂၀၂၃။

မကွေးတိုင်း၊ ပခုက္ကူမြို့နယ်မှာ စစ်ကောင်စီထောက်ပို့ကားတွေကို ကင်းစောင့်ပေးဖို့လာတဲ့ ပျူစောထီးကား ၂စီးကို ဇွန်လ ၇ရက်က မိုင်းဆွဲတိုက်ခိုက်ခဲ့တဲ့အပြင် ဒရုန်းနဲ့ပါ ဗုံးသီးချတိုက်ခိုက်ခဲ့လို့ ၃ ဦးသေ ၆ဦး ဒဏ်ရာရသွားတယ်လို့ ပခုက္ကူ PDF ဆီက သိရပါတယ်။

မြိုင်မြို့နယ် ရေနံမြေကိုသွားမယ့် ထောက်ပို့ကား ၆ စီးကို ကင်းစောင့်ပေးဖို့ ညောင်ဂျစ်ရွာကနေ ကား၂စီးနဲ့ ထွက်လာတဲ့ ပျူစောထီးတွေကို မိုင်း ၅လုံး ဖောက်ခွဲတိုက်ခိုက်ခဲ့တာဖြစ်တယ်လို့ PPDF တာဝန်ရှိသူတဦးက ပြောပါတယ်။

“သူတို့က မိုင်းကွင်းဘယ်နားရှိတယ်ဆိုတာ သိတယ်။ မိုင်းဆွဲ မခံရခင် သူတို့က မိုင်းကွင်းနေရာတွေကို ပစ်ခတ်ပြီးမှထွက်လာကြတာ။ မိုင်းဆွဲခံရတော့ ၃ ဦးသေတယ် ၄ ဦး ဒဏ်ရာရတယ်။ အီနာဂါနဲ့ချတော့ ၂ဦးဒဏ်ရာပြင်းထန်တယ်။” လို့ပြောပါတယ်။

ကား ၂စီးနဲ့ ထွက်လာတဲ့ ပျူတွေကို ပေါက်-ပခုက္ကူလမ်းပေါ်အရောက် မနက် ၆ နာရီဝန်းကျင်မှာ မိုင်းဆွဲခဲ့ပြီး မှိုက်ပင်ကုန်းရွာမှာ ကင်းပုန်းဝပ်ပြီးကျန်နေတဲ့ ပျူအချို့ကို ဒရုန်းနဲ့ အီနာဂါ ၅လုံး ကြဲချတိုက်ခိုက်ခဲ့တာလို့ ဆိုပါတယ်။

ပြီးခဲ့တဲ့ ဇွန်လ ၅ရက်ကလည်း ပေါက်ကနေ ပခုက္ကူကိုသွားတဲ့ စစ်ကောင်စီကား ၃၀ပါ ယာဥ်တန်းကို ပခုက္ကူ-​ပေါက်လမ်းပေါ်မှာ ၃ကြိမ်မိုင်းခွဲတိုက်ခိုက်ခဲ့ပြီး ကင်းစောင့်ပေးတဲ့ ပျူစောထီးတွေကို ဒရုန်းနဲ့ ဗုံး ၁၃လုံးကြဲချတိုက်ခိုက်ခဲ့ပါသေးတယ်။

ပခုက္ကူ – ပေါက်လမ်းကို အသုံးပြုပြီး စစ်ကောင်စီရဲ့ ထောက်ပို့ယာဥ်တန်းတွေ မကြာခဏ ဖြတ်လေ့ရှိတာကြောင့် ဒေသကာကွယ်ရေးတပ်တွေက မိုင်းဆွဲတာ ဒရုန်းနဲ့ ဗုံးသီးချတိုက်ခိုက်တာတွေမကြာခဏ ဖြစ်လေ့ရှိနေပါတယ်။

အဲ့ဒီယာဥ်တန်းတွေကို နီးစပ်ရာ ပျူကျေးရွာတွေက ထွက်ပြီး ကင်းစောင့်ပေးရသလို အဲ့ဒီပျူစောထီးတွေကိုလည်း PDF ပူးပေါင်းတပ်ဖွဲ့တွေက မိုင်းဆွဲတိုက်ခိုက်လေ့ရှိတယ်လို့ သိရပါတယ်။

စာတည်း- ဇို

မန္တလေး၊ ဇွန် ၅၊ ၂၀၂၃။

မန္တလေးတိုင်းဒေသကြီး၊ ညောင်ဦးမြိုနယ်၊ တောင်ဘီလေးကျေးရွာအုပ်စုနဲ့ တက်မကျေးရွာအုပ်စုအတွင်းရှိ တက်မအရေနံမှော် ပိတ်သိမ်းခံရလို့ လုပ်ငန်းလုပ်သူတွေ ထွက်ခွာပြီးနောက် ကျန်ခဲ့တဲ့ပစ္စည်းတွေ ခိုးယူဖျက်ဆီးခံရတာတွေ ရှိနေတယ်လို့ သိရပါတယ်။

လုပ်ငန်းတွေ ဖြုတ်သိမ်းပြီး ထွက်ခွာချိန် ကျန်ခဲ့တဲ့ တွင်းတူး၊ ရေနံထုတ်ရာမှာ အသုံးပြုတဲ့ သံပိုက်တွေ၊ စက်ပစ္စည်းအချို့နဲ့ ဖျက်ယူလို့မရတဲ့ သက်ကယ်တဲ၊ ခြံစည်းရိုး၊ မီးကြိုး​တွေအပါအဝင် ခိုးယူခံရပြီး ညက တဲအချို့ မီးရှို့ဖျက်ဆီးခံရတာတွေရှိနေတယ်လို့ လုပ်ငန်းရှင်တဦးက ပြောပါတယ်။

“အချို့ကျတော့ လုပ်ငန်းပြန်လုပ်လို့ ရနိုင်မလားဆိုပြီး အကုန်သိမ်းမသွားဘဲ ချန်ခဲ့တာတွေရှိတယ်။ အချို့ကျတော့ သိမ်းလို့မရလို့ ထားတဲ့အရာတွေရှိတယ်။ ဥပမာ တွင်းထဲက သံပိုက်လုံးတွေမျိုး၊ သံငြမ်းစင်လိုဟာမျိုးတွေပေါ့။ ဒီလိုသံပိုက်တွေကျတော့ သံတိုသံစအနေနဲ့သွားရောင်းတာတောင် စျေးကောင်းရသေးတာ။ သက်ကယ်တွေကျတော့လဲ အမိုးအကာအတွက်သုံးဖို့နေမယ် ယူသွားကြတယ်။ အချို့ကျတော့ တဲတွေ ဖြုတ်ယူမီးရှို့သွားတယ်” လို့ ပြောပါတယ်။

ခိုးယူသူတွေက ရေနံတွင်းတွေမှာ ကျန်ခဲ့တဲ့ သံပိုက်တွေကို နည်းလမ်းပေါင်းစုံနဲ့သယ်ယူနေကြတာဖြစ်ပြီး စစ်ကောင်စီတပ်တွေရှိနေပေမယ့် တားမြစ်တာမရှိဘူးလို့ ဆိုပါတယ်။

သံပိုက်စျေးတွေက တချောင်းလျင် ကျပ် ၃၀၀၀၀ မှ ကျပ် ၅၀၀၀၀ နီးပါးရှိနေတာကြောင့် သံတိုသံစစျေးအနေနဲ့ ရောင်းစားရင်တောင် စျေးကောင်းရနေကြတယ်လို့ သိရပါတယ်။

ဒါ့အပြင် လုပ်ငန်းလုပ်သူတွေ ချန်ခဲ့တဲ့တဲတွေလည်း မီးရှို့ခံရလို့ ၁၀ လုံးထက်မနည်း မီးလောင်ပျက်စီးတာတွေလဲ ရှိနေတာပါ။

မေလ ၂၅ ရက်ကနေ ၃၁ ရက်နေ့အတွင်း တက်မရေနံမှော်ထဲရှိ လုပ်ကွက်အားလုံး ပိတ်သိမ်းပြီး ထွက်ခွာရမယ်လို့ စစ်ကောင်စီက အမိန့်ထုတ်လိုက်လို့ ရေနံတွင်းလုပ်ငန်းရှင်၊ ဈေးရောင်းစျေးဝယ်နဲ့ ရေနံတွင်းလုပ်သားတွေ အပါအဝင် မှော်အတွင်း လုပ်ကိုင်နေသူအားလုံး နေရပ်ပြန်ကြရလို့ လုပ်သားတွေနဲ့ ဒေသခံ တသိန်းကျော် အလုပ်လက်မဲ့ ဖြစ်ကြရတယ်လို့ သိရပါတယ်။

စာတည်း – 007