မြေလတ်အသံ

ရွှေဘို၊ ဖေဖော်ဝါရီ ၂၄၊ ၂၀၂၆။

စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်အတွင်း စစ်ရေးလှုပ်ရှားနေတဲ့ ပြည်သူ့ကာကွယ်ရေးတပ်မတော် – PDF ရွှေဘိုခရိုင်တပ်ရင်း ၁၅ တပ်ခွဲ ၃ က တပ်ဖွဲ့ဝင် ၂၀ ကျော် PDF အဖြစ်ကနေ နုတ်ထွက်သွားတယ်လို့ အဲ့ဒီတပ်ခွဲထံက သိရပါတယ်။

တပ်ခွဲ ၃ တပ်ဖွဲ့ဝင် ၂၀ ကျော်ဟာ ရွှေဘိုခရိုင်တပ်ရင်း ၁၅ ထံ ပြီးခဲ့တဲ့ ဒီဇင်ဘာလအတွင်းက နုတ်ထွက်စာတင်ပြခဲ့ပြီးနောက် ၂ လကျော်အကြာ ဖေဖော်ဝါရီ ၂၂ ရက်မှာ ထုတ်ယူထားတဲ့လက်နက်ခဲယမ်းနဲ့တွေကို ပြန်လည်အပ်နှံပြီး နုတ်ထွက်ခဲ့တာလို့ ဆိုပါတယ်။

” နုတ်ထွက်စာတင်ထားတာ ၂ လလောက်ရှိပြီး။ ခွဲ ၃ ကရဲဘော်တွေက အဆင်မပြေတော့ဘူး။ ရဲဘော်တွေမှာ ကုန်ထမ်းစားနေရတယ်။ အထက်ကလည်း ဘာမှ မထောက်ပံတော့ကျ ကြာရှည်ကလည်း မရပ်တည်နိုင်တော့ဘူး။ အကြွေးတွေလည်းနစ်နေပြီ။ အဲဒါကြောင့်မို့ပါ ” လို့ PDF အဖြစ်ကနေ နုတ်ထွက်လိုက်တဲ့ တပ်ခွဲ ၃ တပ်ခွဲမှူးဟောင်း ဗိုလ်ချုပ် က မြေလတ်အသံကို ပြောပါတယ်။

လက်ရှိမှာ PDF အဖြစ်ကနေ နုတ်ထွက်လာခဲ့ပေမယ့် ထောက်ပို့ပြည်သူတွေအဖြစ် ဆက်လက်ရပ်တည်သွားမှာဖြစ်တယ်လို့ တပ်ခွဲမှူးဟောင်း ဗိုလ်ချုပ် က ဆက်ပြောပါတယ်။

ရွှေဘိုခရိုင်တပ်ရင်း ၁၅ ကနေ ထုတ်ယူထားတဲ့ သေနတ် ၁၀ လက်၊ ခဲယမ်းနဲ့စစ်အသုံးအဆောင်ပစ္စည်းတွေကို တပ်ရင်းမှူးထံ တိုက်ရိုက်အပ်နှံပြီးနုတ်ထွက်တာမဟုတ်ဘဲ တိုက်နယ်ပကဖကနေတဆင့် အပ်နှံခဲ့တာလို့ သိရပါတယ်။

တပ်ခွဲ ၃ က အပ်နှံတဲ့ စစ်လက်နက်ခဲယမ်းတွေကို လက်ခံထားတဲ့ တိုက်နယ်ပကဖတွေကတဆင့် ရွှေဘိုခရိုင်တပ်ရင်း ၁၅ တပ်ရင်းမှူးထံကို ယမန်နေ့ ဖေဖော်ဝါရီ ၂၃ ရက်မှာ ဆက်လက်လွှဲပြောင်းပေးပြီးဖြစ်တယ်လို့ ဖြစ်စဥ်အခြေအနေကိုသိထားတဲ့ ဒေသအခြေစိုက် PDF အဖွဲ့ဝင်တဦးက ပြောပါတယ်။

” ခွဲ ၃ ဗိုလ်ချုပ်တို့အဖွဲ့က ဗိုလ်ကောက်ရိုးနဲ့အဆင်မပြေတာလို့တော့ သိရတယ်။ အဲဒီတော့ တပ်ရင်းကတပ်ဆင်ထားတဲ့ အီကွေးမန့်(ချပ်ဝတ်တန်ဆာ)၊ လက်နက်ကအစ တိုက်နယ်ကိုအသိသက်သေထားပြီး အပ်သွားတာလို့ သိရတယ်။ အဓိကထောက်ပံမှုမရှိတာ၊ ရင်းမှူးနဲ့အဆင်မပြေတာကြောင့်လို့တော့ သိရတယ်” လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

PDF တွေအနေနဲ့ တပ်ဖွဲ့ဝင်အဖြစ်ကနေ နုတ်ထွက်လိုပါက သက်ဆိုင်ရာတပ်ရင်းကတဆင့် ဝန်ကြီးဌာနအဆင့်ဆင့်ကို တင်ပြပြီး ခွင့်ပြုချက်ရယူဖို့လိုအပ်တယ်လို့ ရွှေဘိုခရိုင်အတွင်းက တော်လှန်ရေးတပ်ဖွဲ့တခုရဲ့ခေါင်းဆောင်တဦးထံက သိရပါတယ်။

တပ်ခွဲ ၃ က ဗိုလ်ချုပ်တို့အဖွဲ့ဟာ ယခင်က LPDF အနေနဲ့ ရပ်တည်ခဲ့ပြီး ၂၀၂၂ အတွင်းမှာ အမျိုးသားညီညွတ်ရေးအစိုးရ-NUG လက်အောက်ရွှေဘိုခရိုင်တပ်ရင်း ၁၅ ရဲ့တပ်ခွဲ ၅ အနေနဲ့ဝင်ရောက်ခဲ့ပြီးနောက် ဗိုလ်ကောက်ရိုး တပ်ရင်းမှူးတာဝန်ရယူချိန်မှာ တပ်ခွဲ ၃ အဖြစ် ပြောင်းလဲဖွဲ့စည်းခဲ့တာလို့ သိရပါတယ်။

မြင်းခြံ၊ ဖေဖော်ဝါရီ ၂၃၊ ၂၀၂၆။

မန္တလေးတိုင်း၊ မြင်းခြံမြို့နယ်၊ ဆီမီးခုံမြို့နဲ့ဆုံရွာကျေးရွာကြားမှာ ရိက္ခာသယ်ပြန်လာတဲ့ စစ်ကော်မရှင်အဖွဲ့ကိုတိုက်ခိုက်ရာ ၆ ဦးသေဆုံးပြီး လက်နက်တွေလည်းသိမ်းဆည်းခဲ့တယ်လို့ မြင်းခြံမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ဖေဖော်ဝါရီ ၂၀ ရက်မနက် ၁၀ နာရီခန့်မှာ ဆီမီးခုံမြို့ကနေ ဆုံရွာကိုစျေးဝယ်ပြီးပြန်လာတဲ့ စစ်ကော်မရှင်တပ်ဖွဲ့ဝင်နဲ့ ပျူစောထီးအင်အား ၂၀ ခန့်ကိုကြားဖြတ်တိုက်ခိုက်ရာမှ ထိခိုက်သေဆုံးမှုတွေရှိခဲ့တာလို့ ဆိုပါတယ်။

“ဆုံရွာကနေ ဆီမီးခုံကို ရိက္ခာသွားဝယ်ပြီး အပြန်မှာဖြစ်တာ။ စောင့်ပြီးတော့တိုက်ကြတာ။ ဆိုင်ကယ်တွေနဲ့လာကြတာ။ ထိတွေ့မှုက မိနစ်ပိုင်းလောက်ဖြစ်တာ။ သူတို့ဘက်က မျက်မြင်ကို ၆ ယောက်ကျတယ်။ သူတို့ဘက်က ကျန်တဲ့ထိခိုက်ဒဏ်ရာရပြီး ဆုတ်ပြေးတယ်”လို့ မြင်းခြံမြို့နယ်ပကဖတာဝန်ရှိသူက ပြောပါတယ်။

တိုက်ပွဲအတွင်းမှာ စစ်ကော်မရှင်နဲ့ပျူစောထီး ၆ ဦးနဲ့ PDF ပူးပေါင်းတပ်ဘက်က အသက် ၂၀ ကျော်တပ်ဖွဲ့ဝင် ၁ ဦးသေဆုံးကာ ၁ ဦးဒဏ်ရာရခဲ့တယ်လို့ ဆိုပါတယ်။

ဒါ့အပြင် စစ်ကော်မရှင်အဖွဲ့တွေကိုင်ဆောင်တဲ့ G3 ၂ လက်၊ ကာဘိုင် ၁ လက်၊ ကင်းထောက်ဒရုန်း ၁ စီးနဲ့ကျည်တွေ သိမ်းဆည်းရရှိတယ်လို့ သိရပါတယ်။

တိုက်ပွဲအတွင်း ကျည်ထိမှန်ကျဆုံးသွားတဲ့တပ်ဖွဲ့ဝင်စျာပနကိုတော့ ဖေဖော်ဝါရီ ၂၁ ရက်မှာ ပြုလုပ်ပြီးစီးပြီလို့ ဆိုပါတယ်။

အဆိုပါတိုက်ခိုက်မှုကိုတော့ မြင်းခြံမြို့နယ်ပကဖ၊ မန္တလေးခရိုင်တပ်ရင်း ၃ အပါအဝင် ပူးပေါင်းတပ်တွေက တိုက်ခိုက်ခဲ့ကြတာဖြစ်ပြီး မန္တလေးခရိုင်တပ်ရင်း ၃ ဘက်က ဖေဖော်ဝါရီလ ၂၂ ရက်မှာ သတင်းထုတ်ပြန်ထားပါတယ်။

ဆုံရွာကျေးရွာမှာ ပျူစောထီးနဲ့စစ်ကောင်စီအင်အား ၁၀၀ ခန့်တပ်စွဲထားတာရှိနေပြီး ပြီးခဲ့တဲ့ ဒီဇင်ဘာ ၂၁ ရက်ကလည်း PDF ပူးပေါင်းတပ်တွေက သွားရောက်တိုက်ခိုက်ရာက ပစ်ခတ်မှုဖြစ်ပြီး ပူးပေါင်းတပ်ဘက်က ၆ ဦးကျဆုံးခဲ့တယ်လို့ သိရပါတယ်။

စာတည်း – လင်း

မုံရွာ၊ ဖေဖော်ဝါရီ ၂၃၊ ၂၀၂၆။

စစ်ကိုင်းတိုင်း၊ မုံရွာမြို့၊ သာစည်ဘုရားမုခ်ပေါက်အနီးရှိ စစ်ကော်မရှင်ဂိတ်အနီးကို လမ်းမှားဝင်သွားတဲ့ ခရီးသည်တင်ကားကို စစ်ကော်မရှင်တပ်တွေကပစ်ခတ်ခဲ့တာကြောင့် ယာဥ်မောင်း ၁ ဦးသေဆုံးခဲ့တယ်လို့ ဖြစ်စဥ်ကိုသိရှိတဲ့ ဒေသခံတွေဆီက သိရပါတယ်။

ဖေဖော်ဝါရီ ၂၁ ရက် ည ၈ နာရီမိနစ် ၄၀ လောက်မှာ မန္တလေးကနေ ဗန်းမော်ကိုသွားမယ့် ယာဥ်မောင်းအပါအဝင် လူ ၆ ဦးလိုက်ပါလာတဲ့ ‘ဗန်းမော်မန်း’ ခရီးသည်တင်ယာဥ်ဟာ မုံရွာမြို့ပေါ်မှာ ကွမ်းခြင်းတွေတင်ပြီးထွက်လာချိန်မှာ စစ်ကော်မရှင်ဂိတ်နဲ့တွေ့ပြီး ပစ်ခတ်ခံရတာလို့ ဆိုပါတယ်။

“ကားသမားက ကွင်းတဲ့လမ်းကိုမသိဘဲနဲ့ မှားဝင်သွားတာဖြစ်နိုင်တယ်။ မုံရွာမြို့ထဲကနေ ၇ နာရီမထိုးခင် ထွက်လို့ရတယ်။ ပုံမှန်ဆို ကွင်းလမ်းကနေသွားရင် ပြသနာမရှိဘူး။ သာစည်ဂိတ်ဘက်ကို ဝင်သွားတော့ ညပိုင်းက သူတို့ဘက်ကို ဘယ်ကားမှမလာတော့ ရပ်တော့ရပ်ခိုင်းသေးတယ်ပြောတယ်။ ကားသမားက နားကနည်းနည်းလေးတော့ မကြားတာနေမယ်”လို့ ဖြစ်စဥ်ကိုသိထားတဲ့ ဒေသခံတဦးက ပြောပါတယ်။

ဒီပစ်ခတ်မှုကြောင့် ယင်းမာပင်မြို့နယ်မှာနေထိုင်သူ အသက် ၅၂ နှစ်အရွယ် ယာဥ်မောင်းအမျိုးသား ၁ ဦး ကျည်ထိမှန်သေဆုံးပြီး အလောင်းကိုလည်း ဖေဖော်ဝါရီ ၂၂ ရက်မနက်ပိုင်းမှ လူမှုကူညီရေးအသင်း ၁ ခုက လာသယ်သွားပြီးနောက် အဲ့ဒီနေ့မှာပဲ မုံရွာဆေးရုံကတဆင့် မိသားစုတွေက ပြန်သယ်သွားပြီလို့ သိရပါတယ်။

ပစ်ခတ်မှုကြောင့် ကားလေကာမှန်နဲ့ ကားခေါင်းပိုင်းတွေမှာ ကျည်ထိပျက်စီးခဲ့ကာ ပစ်ခတ်ပြီးနောက် ကားပေါ်ပါ စပယ်ယာ(ယာဉ်နောက်လိုက်)နဲ့ ကလေးငယ် ၁ ဦးအပါ စုစုပေါင်းခရီးသည် ၄ ဦးတို့ကိုလည်း စစ်ကော်မရှင်တပ်သားတွေကစစ်ဆေးပြီး ဖေဖော်ဝါရီ ၂၂ ရက်မနက်မှာ ပြန်လွှတ်ပေးလိုက်တယ်လို့ သိရပါတယ်။

ဖေဖော်ဝါရီ ၃ ရက်ကလည်း မုံရွာမြို့၊ သာစည်လမ်းပေါ် TTC ကျောင်းအနီးမှာ စစ်ကော်မရှင်တပ်တွေက အိမ်စီးကား ၁ စီးကို ပစ်ခတ်ရာ ကားပေါ်ပါသူ ၃ ဦး သေဆုံးခဲ့တယ်လို့ သိရပါတယ်။

စာတည်း – လင်း

တောင်တွင်းကြီး၊ ဖေဖော်ဝါရီ ၂၃၊ ၂၀၂၆။

မကွေးတိုင်း၊ တောင်တွင်းကြီးမြို့နယ်၊ မှုတ်ရှည်အုပ်စု၊ ညောင်လေးပင်ရွာ အုပ်ချုပ်ရေးမှူး ဖေဖော်ဝါရီ ၂၁ ရက်နေ့လယ်ပိုင်းမှာ ပစ်ခတ်ခံရပြီးသေဆုံးခဲ့တယ်လို့ ဒေသခံတွေဆီက သိရပါတယ်။

ပစ်ခတ်ခံရသူဟာ အသက် ၅၀ အရွယ် အုပ်ချုပ်ရေးမှူး ဆန်းဝင်းဖြစ်ပြီး နေ့လယ် ၁ နာရီဝန်းကျင်မှာ ဒေသခံကာကွယ်ရေးတပ်ဖွဲ့ဝင်တွေက ဝင်ရောက်ပစ်ခတ်ခဲ့တာလို့ ဆိုပါတယ်။

“သူ့နေအိမ်မှာ ပစ်ခတ်ရှင်းလင်းခံရတာ၊ ဦးခေါင်းချည်းပဲ ၄/၅ ချက်လောက်ပစ်သွားတာ၊ မီတာကြေးတွေ အဆမတန်ကောက်တယ်၊ စစ်မှုထမ်းကြေးတွေ ပုံမှန်ဆိုရင် ၁ သောင်း၊ ၂ သောင်းရှိတာကို သူက အိမ်တွေကို ကြည့်ပြီးတော့ ၅ သောင်း၊ ၁ သိန်း၊ ၂ သိန်းဆိုပြီး ခွဲတမ်းချပြီး ကောက်တာ၊ သူ့ကို PDF တွေ(ဆီ)တိုင်ရင်လည်း တရွာလုံးကို ပြာကျအောင်လုပ်မယ်လို့ ကြွေးကြော်ထားတာ”လို့ ညောင်လေးပင် ရွာခံတဦးက ပြောပါတယ်။

ပစ်ခတ်ခံရပြီးနောက် အလောင်းကို နေ့လယ် ၂ နာရီဝန်းကျင်မှာ တောင်တွင်းကြီးနယ်မြေခံရဲစခန်းက ရဲတပ်သား ၁၀ ဦးကျော်လောက်က လာသယ်သွားခဲ့တယ်လို့ ဆိုပါတယ်။

အုပ်ချုပ်ရေးမှူးဆန်းဝင်း ကိုပစ်ခတ်တဲ့ ဒေသကာကွယ်ရေးတပ်ဖွဲ့တွေကတော့ သတင်းထုတ်ပြန်တာ မရှိသေးပါဘူး။

ပြီးခဲ့တဲ့ ဖေဖော်ဝါရီ ၁ ရက်ကလည်း တောင်တွင်းကြီးမြို့နယ်၊ ငှက်ပျောတောကျေးရွာ အုပ်ချုပ်ရေးမှူး ကျော်စိုးကိုလည်း တော်လှန်ရေးတပ်ဖွဲ့ဝင်တွေက နေအိမ်ထဲမှာပစ်ခတ်ရာ သေဆုံးခဲ့ပါသေးတယ်။

စာတည်း – လင်း

တောင်သာ၊ ဖေဖော်ဝါရီ ၂၁၊ ၂၀၂၆။

မန္တလေးတိုင်း၊ တောင်သာမြို့နယ်က ကျေးရွာတွေကို စစ်ကော်မရှင်စစ်ကြောင်းက စစ်ကြောင်းထိုးမီးရှို့နေတာကြောင့် နေအိမ် ၁၀ လုံးကျော်ပျက်စီးခဲ့တယ်လို့ တောင်သာမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ဖေဖော်ဝါရီ ၂၀ ရက် မနက် ၁၀ နာရီခန့်မှာ တောင်သာမြို့ပေါ်ကနေ အင်အား ၁၀၀ ခန့်ပါ စစ်ကြောင်းဟာ လက်သဲကျင်ရွာကို ဝင်ရောက်မီးရှို့ကာ အဲ့ဒီကတဆင့် ညနေ ၄ နာရီခန့်မှာ ညောင်ဒိုရွာကို စစ်ကြောင်းထိုးတပ်စွဲခဲ့ပြီး ဖေဖော်ဝါရီ ၂၁ ရက်မနက် ၆ နာရီလောက်မှာ ရွာထဲကနေအိမ်တွေကိုမီးရှို့ပြီး ခြုံကြီးရွာကို ဆက်သွားတယ်လို့ ဆိုပါတယ်။

“သူတို့လာတာနဲ့ ဒေသခံတွေက ရွာထဲမနေတော့ဘူး။ ရွာထဲလူမရှိတော့မှ ရှို့တာ။ ဒီမနက်တော့ ညောင်ဒိုကိုဆက်ရှို့သွားတယ်။ စစ်ကြောင်းက ခြုံကြီးထဲတော့ရောက်နေပြီး မီးမရှို့သေးဘူး”လို့ တောင်သာမြို့နယ်ပကဖတာဝန်ခံက ပြောပါတယ်။

မီးရှို့ခံရတာကြောင့် လက်သဲကျင်ကျေးရွာက အနည်းဆုံး နေအိမ် ၂ လုံး၊ ညောင်ဒိုကျေးရွာက နေအိမ် ၁၄ လုံး မီးလောင်ပျက်စီးထားတယ်လို့ ဆိုပါတယ်။

စစ်ကြောင်းဝင်မီးရှို့နေတာကြောင့် အိမ်ခြေ ၂၀၀ ကနေ ၁,၀၀၀ ကြားရှိတဲ့ လက်သဲကျင်၊ ညောင်ဒို၊ ခြုံကြီး၊ ကျွန်းရွာလေးကျေးရွာတွေက ဒေသခံ ၆,၀၀၀ ထက်မနည်း ဘေးလွတ်ရာကို တိမ်းရှောင်နေရတယ်လို့ အထက်ပါတာဝန်ခံက ပြောပါတယ်။

ဖေဖော်ဝါရီ ၁၁ ရက်ကလည်း တောင်သာမြို့နယ်၊ ပဲလင်းကျော်ကျေးရွာကို စစ်ကော်မရှင်စစ်ကြောင်းက ဝင်ရောက်မီးရှို့လို့ နေအိမ်နဲ့ဘုန်ကြီးကျောင်းအပါအဝင် အဆောက်အဦ ၅၀ ကျော် မီးလောင်ပျက်စီးခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ ဖေဖော်ဝါရီ ၂၀၊ ၂၀၂၅။

စစ်ကိုင်းတိုင်း၊ ကျွန်းလှမြို့နယ်၊ သဖန်းဆိပ်ဆည်ကနေ ရေမလွှတ်တဲ့အတွက် ဒေသခံတောင်သူတွေ စိုက်ပျိုးရေးလုပ်ဖို့ အခက်တွေ့နေရတယ်လို့ တောင်သူတွေဆီက သိရပါတယ်။

ဖေဖော်ဝါရီ ၂၀ ရက်ဒီကနေ့ထိ ဆည်ရေက မူးဘောင်တွေအတွင်းကို မရောက်လာသေးတာကြောင့် စစ်ကိုင်းတိုင်းအတွင်းရှိ မြို့နယ် ၁၀ မြို့နယ်ဝန်းကျင်မှာ ပဲ၊ နှမ်း၊ နွေစပါးတွေ စတင်မစိုက်ပျိုးနိုင်သေးဘူး လို့ ဆိုပါတယ်။

“အဲဒီအထက်ပိုင်း(သဖန်းဆိပ်ဆည်ထဲ)မှာ ရွှေမျောတွေ၊ ရွှေဖောင်တွေလုပ်ပြီးတော့ တိုက်ပွဲတွေ ပြင်းထန်ဖြစ်နေတယ်လို့သာပြောပြီးတော့ ရေတွေလွှတ်မပေးဘူးပေါ့။ ရေဖွင့်မပေးတဲ့အပေါ် တောင်သူတွေကအကျိုးဆက်ဘာဖြစ်နေလဲဆိုတော့ ဘာသီးနှံကိုစိုက်ရမှန်းမသိဘဲနဲ့ ပဲစိုက်ရမလား၊ နှမ်းစိုက်ရမလားမသိဘဲနဲ့ အခြေနေတွေဖြစ်နေတယ်။”လို့ ရွှေဘိုနယ် တောင်သူတဦးက ပြောပါတယ်။

ယခင်နှစ်တွေမှာ ဖေဖော်ဝါရီလ တတိယအပတ်အတွင်း သဖန်းဆိပ်ဆည်ကလွှတ်တဲ့ရေက မူးဘောင်တွေအတွင်းစိုက်ပျိုးနိုင်တဲ့အခြေနေအထိ ရောက်ရှိနေပြီးဖြစ်ပေမယ့် ဒီနှစ်မှာတော့ ဆည်ရေနောက်ဆုံးလွှတ်ရမယ့် ဖေဖော်ဝါရီ ၂၀ ရက် ဒီကနေ့အထိ ရေမရောက်သေးတာကြောင့် စိုက်ပျိုးလို့မရမှာကိုလည်း စိုးရိမ်နေကြတယ်လို့ ဆိုပါတယ်။

ဆည်ရေမရလို့ သီးနှံတွေအချိန်မီ မစိုက်ပျိုးနိုင်ပါက တောင်သူတွေအတွက် စားဝတ်နေရေးကြပ်တည်း လာနိုင်သလို ဒေသတွင်းစစ်ဘေးရှောင်တွေနဲ့ နေ့စားလုပ်သားတွေအတွက်လည်း အခက်အခဲကြုံလာနိုင်တယ် လို့ သိရပါတယ်။

“ကျမတို့လယ်တွေ စိုက်ပျိုးရလို့ရှိရင် စစ်ဘေးရှောင်တွေကို အလုပ်ပေးလို့ရတယ်။ ကျမတို့စပါးတွေ မစိုက်နိုင်ဘူးဆိုရင် နေရပ်စွန့်ခွာတဲ့စစ်ဘေးရှောင်တွေကို အလုပ်ပေးလို့မရတော့ဘူး။ သူတို့ဘဝတွေလည်း ဒီထက်ပိုပြီး ခက်ခဲကုန်မှာ။ အမှန်ဆိုရင် စပါးမစိုက်ရမှာစိုးရိမ်နေကြတာ။”လို့ အထက်ပါ တောင်သူအမျိုးသမီးက ဆက်ပြောပါတယ်။

ပြီးခဲ့တဲ့ ဇန်နဝါရီလကုန်မှာ ကန့်ဘလူမြို့နယ်၊ ကိုးတောင်ဘိုစခန်းအပါအဝင် ကျွန်းလှသဖန်းဆိပ်ဆည်အနီးတဝိုက်က စစ်ကော်မရှင်နဲ့ပြည်သူ့စစ်စခန်းအချို့ကို တော်လှန်ရေးအဖွဲ့တွေဘက်က တိုက်ခိုက်ပြီး ဆည်ဝန်ထမ်း Non-CDM တွေကိုပါထိန်းသိမ်းလိုက်ပြီးနောက် ဆည်ရေပေးဝေမှု အခြေအနေကိုပါ တော်လှန်ရေးအဖွဲ့တွေဘက်က ထိန်းချုပ်ထားတာလို့ အခြေနေကိုသိထားတဲ့ ဒေသကာကွယ်ရေးအဖွဲ့ဝင်တဦးက ပြောပါတယ်။

“Non သမားတွေကို ဖမ်းလိုက်တာ။ CDM တွေကနေပြီးတော့ နည်းပညာပိုင်းဆိုင်ရာ ဝန်ဆောင်မှုပေးတဲ့ အရာကို ကျွမ်းကျင်ဝန်ထမ်းတွေပြန်ရှာနေရတယ်။ ဆည်စောင့်တွေအနေနဲ့ စစ်ကောင်စီဝန်ထမ်းတွေလည်းရှိတာကိုး။ သူတို့ကိုထိန်းထားတော့ အခုရေပေးတဲ့နေရာမှာ အခက်ခဲဖြစ်နေတာ။ ရေကရှိတော့ရှိတယ်။ မျှဝေတဲ့နေရာမှာ နည်းပညာပိုင်းဆိုင်ရာမှာ ပြန်ပြီးလုပ်ရမယ့်သဘောရှိတယ်”လို့ သူကပြောပါတယ်။

ယခင်က သဖန်းဆိပ်ဆည်တဝိုက်မှာ စစ်ကော်မရှင်တပ်နဲ့ တော်လှန်ရေးပူးပေါင်းတပ်တွေ နှစ်ဖက်စလုံးကလှုပ်ရှားခဲ့ပြီး အခုနှစ် ဇန်နဝါရီလကုန်ပိုင်းမှာ တော်လှန်ရေးပူးပေါင်းတပ်တွေဘက်က အပြည့်အဝထိန်းချုပ်လိုက်တယ်လို့ သိရပါတယ်။

ရွှေဘိုခရိုင်အတွင်းက PDF စိုက်ပျိုးရေးတာဝန်ရှိတဦးကတော့ “ပြည်သူတွေက ရေမရလို့အော်နေတဲ့ အသံကို တပ်ရင်းတပ်ဖွဲ့တွေအနေနဲ့ နားထောင်ပေးပြီးတဲ့အခါက အချို့သောကိစ္စတွေကို ဖြေလျော့ပေးပြီးတော့ ရေလွှတ်ဖို့လုပ်ဆောင်ပေးမှ အဆင်ပြေမှာ”လို့ ပြောပါတယ်။

ရေမရလို့ စပါးအပါအဝင် သီးနှံတွေအချိန်မီ မစိုက်ပျိုးနိုင်ပါက စစ်ကိုင်းတိုင်းအတွင်းရှိ စိုက်ပျိုးထုတ်လုပ်မှုကျဆင်းပြီး GDP(Gross Domestic Product – စုစုပေါင်း ပြည်တွင်းထုတ်ကုန်) ကျနိုင်သလို ဒေသတွင်းပြည်သူတွေ စားနပ်ရိက္ခာ အခက်အခဲလည်းကြုံလာနိုင်တယ်လို့ ရွှေဘိုခရိုင်အတွင်းက PDF စိုက်ပျိုးရေးတာဝန်ရှိတဦးက ခန့်မှန်းပါတယ်။

သဖန်းဆိပ်ဆည်ကိုအမှီပြုပြီး ပဲ၊ နှမ်း၊ စပါးတွေနဲ့ ရာသီပေါ်သီးနှံတွေစိုက်ပျိုးနေရတဲ့ ရွှေဘို၊ ဝက်လက်၊ တန့်ဆည်၊ ရေဦး၊ ခင်ဦး၊ ဒီပဲယင်း၊ ကန့်ဘလူ၊ ဘုတလင်၊ အရာတော်၊ စစ်ကိုင်းမြို့နယ်တွေက စိုက်ဧက ၅ သိန်းကျော်ရှိတယ်လို့ သဖန်းဆိပ်ဆည်နဲ့ပတ်သက်ပြီး ဆည်မြောင်းဦးစီးဌာနထုတ်ပြန်ထားချက်တွေအရ သိရပါတယ်။

စာတည်း – လင်း