မီးလောင်

ပဲခူး၊ ဇန်နဝါရီ ၂၈၊ ၂၀၂၅။

ပဲခူးတိုင်း၊ ပြည်မြို့၊ မြို့ရှောင်လမ်းရှိ ငွေဗျိုင်းဖြူ ဆီဆိုင်အနီးမှာ ခရီးသည်တင်ကားတစီး မီးလောင်ခဲ့တယ်လို့ ကူညီကယ်ဆယ်ရေးလုပ်ခဲ့သူတွေဆီက သိရပါတယ်။

ဇန်နဝါရီ ၂၇ ရက်ညနေ ၃ နာရီခွဲမှာ ရန်ကုန်ဘက်ကနေ ပေါက်ခေါင်းမြို့ဘက်ကို ခရီးသည် ၁၂ ဦး တင်ပြီး မောင်းနှင်လာတဲ့ကား မီးလောင်ခဲ့တာလို့ဆိုပါတယ်။

“အိတ်ဇော(Exhaust)အပူလွန်ကဲပြီး မီးလောင်တာလို့တော့ သိရတယ်။ မောင်းနေရင်း မီးလောင်တာပေါ့။ ကားကတော့ကုန်သွားတယ်။ ခရီးသည်တွေကတော့ အချိန်မီဆင်းနိုင်သွားတာ”လို့ ကူညီကယ်ဆယ်ရေးမှာပါဝင်ခဲ့သူတဦးက ပြောပါတယ်။

မီးလောင်တဲ့အတွက်ကားပေါ်ပါ ခရီးသည်တွေထိခိုက်တာမျိုးမရှိဘဲ ကားတစီးလုံးကတော့ မီးလောင်ပျက်စီးသွားတယ်လို့ ဆိုပါတယ်။

မီးလောင်ချိန် ပြည်မြို့နယ်မီးသတ်၊ အရန်မီးသတ်တွေနဲ့လူမှုကူညီရေးအသင်းတွေက ဝိုင်းဝန်းမီးငြှိမ်း သတ်ခဲ့ကာ မီးလောင်ပြီးတနာရီခန့်အကြာမှာ မီးငြိမ်းခဲ့တယ်လို့ သိရပါတယ်။

၂၀၂၃ ဒီဇင်ဘာ ၁၈ ရက်ကလည်း ပဲခူးတိုင်း၊ အုတ်တွင်းမြို့နယ်၊ ရန်ကုန်-မန္တလေး အမြန်လမ်းမှာ ငါးပုံးတွေတင်ပြီးမောင်းနှင်လာတဲ့ ကုန်တင်ကားမီးလောင်မှုဖြစ်ပြီး ၁ ကားလုံးပျက်စီးခဲ့ပါသေးတယ်။

စာတည်း – လင်း

မန္တလေး၊ ဇန်နဝါရီ ၁၈၊ ၂၀၂၅။

မန္တလေးတိုင်း၊ အမရပူရမြို့၊ မှန်တန်းရပ်ကွက်၊ နယ်မြေ (၄) ရပ်မှာ ဘတ္ထရီအိုးနဲ့ LED မီးထွန်းရာက မီးလောင်မှုဖြစ်ပြီး နေအိမ် ၅ လုံးမီးလောင်ခဲ့တယ်လို့ မီးလောင်ချိန်ကူညီပေးခဲ့သူတဦးက ပြောပါတယ်။

ဇန်နဝါရီ ၁၇ ရက်မနက် ၁၀ နာရီကျော်မှာ အသက် ၄၆ နှစ်အရွယ် ဦးစိုးထိုက် ရဲ့နေအိမ်ကနေ မီးစတင်လောင်ကျွမ်းခဲ့တယ်လို့ ဆိုပါတယ်။

“မီးထွန်းထားတဲ့ မီးသီးကနေ ရှော့ဖြစ်ပြီး မီးပွားတွေက အောက်ကစာရွက်ပုံပေါ်ကျပြီး မီးက ထရံကိုကူးပြီး မီးလောင်မှုဖြစ်တာ”လို့ မီးလောင်ချိန်မှာကူညီပေးခဲ့သူက ပြောပါတယ်။

မီးလောင်လို့ သွပ်မိုး၊ ထရံကာ၊ နေအိမ် ၅ လုံးမီးလောင်ပျက်စီးခဲ့ပြီး လူတွေကတော့ထိခိုက်မှုမရှိဘူးလို့ သူကပြောပါတယ်။

မီးလောင်ချိန် အမရပူရမြို့နယ်မီးသတ်၊ အရန်မီးသတ်တွေနဲ့ ဒေသခံလူမှုကူညီရေးအသင်းတွေ၊ ဒေသခံပြည်သူတွေက ဝိုင်းဝန်းငြှိမ်းသတ်ခဲ့တာကြောင့် မီးလောင်ပြီး ၁ နာရီခန့်မှာ မီးငြိမ်းသွားခဲ့တယ်လို့ ဆိုပါတယ်။

မီးလောင်မှုကြောင့် မီးဘေးသင့်ပြည်သူ ၁၆ ဦးဟာ နီးစပ်ရာဆွေမျိုးနေအိမ်တွေမှာ ယာယီနေထိုင်နေကြပြီး ဦးစိုးထိုက် ကတော့ မီးပေါ့ဆမှုအတွက် ရာဇသတ်ကြီးဥပဒေပုဒ်မ ၂၈၅ နဲ့ အမရပူရနယ်မြေရဲစခန်းမှာ အမှုဖွင့်ခံထားရတယ်လို့ အထက်ပါကူညီပေးခဲ့ကပြောပါတယ်။

ဇန်နဝါရီ ၁၀ ရက်ကလည်း မန္တလေးမြို့၊ ချမ်းအေးသာစံမြို့နယ်၊ ပတ်ကုန်းပျော်ဘွယ်ရပ်ကွက်၊ ၆၆ လမ်းနဲ့ ၆၈ လမ်းကြား၊ ၂၈ လမ်းနဲ့ ၃၀ လမ်းကြားရှိ တိုင်းအကူရဲလိုင်းခန်းမှာ Portable Gas မီးဖိုနဲ့ ကြက်ဥပြုတ်ရာကနေ ရေခမ်းခြောက်ပြီးထရံကို မီးစတင်ကူးစက်လောင်ကျွမ်းရာမှ နေအိမ်လိုင်းခန်း ၈ ခန်း မီးလောင်ပျက်စီးခဲ့သေးတယ်လို့ သိရပါတယ်။

စာတည်း – လင်း

စစ်ကိုင်း၊ ဇွန် ၇၊ ၂၀၂၃။

စစ်ကိုင်းတိုင်း၊ မုံရွာမြို့၊ အေးသာယာရပ်ကွက်မှာ ဘတ္ထရီအိုးအားသွင်းရာမှ မီးလောင်လို့ နေအိမ် ၁၈ လုံး ဆုံးရှုံးသွားတယ်လို့ သိရပါတယ်။

ဇွန်လ ၇ ရက် ဒီမနက် ၁၁ နာရီခန့်မှာ အေးသာယာရပ်ကွက်၊ ချင်းတွင်းကမ်းနားအနီးက ၂ ထပ်နေအိမ်ရဲ့ အပေါ်ထပ်မှာ အင်ဗာတာကနေ ဘတ္ထရီအိုးကို အားသွင်းထားချိန် ပေါက်ကွဲမှုဖြစ်ပြီး နံရံကိုမီးကူးစက်ရာက မီးလောင်ခဲ့တာလို့ ဒေသခံတဦးက ပြောပါတယ်။

“ဘတ္ထရီပေါက်ကွဲတော့ အိမ်နံရံကလည်း ကျူထရံကာဆိုတော့ မီးကူးသွားတယ်။ အများစုကတော့ ၁၀ ပေပတ်လည်တဲ အများဆုံးလောင်သွားတာပါ။ မီးဝိုင်းသတ်နေတဲ့အချိန် အရန်မီးသတ်တဦးလည်း ကျင်းအဟောင်းတခုထဲကျပြီး ဒဏ်ရာရသွားသေးတယ်။ စိုးရိမ်စရာတော့မရှိပါဘူး”လို့ ပြောပါတယ်။

မီးလောင်လို့ နေအိမ် ၁၈ လုံး ပျက်စီးခဲ့ပြီး အများစုက ကျူထရံကာအိမ်တွေဖြစ်သလို ကာလတန်ဖိုး ကျပ်သိန်း ၁၀၀ ကျော်ပျက်စီးခဲ့ပြီး ဒေသခံတွေ ထိခိုက်ဒဏ်ရာရတာမရှိဘူးလို့ ဆိုပါတယ်။

မြို့နယ်မီးသတ်တပ်ဖွဲ့၊ အရန်မီးသတ်နဲ့ ဒေသခံပြည်သူတွေ ဝိုင်းဝန်းမီးငြိမ်းသတ်ခဲ့တဲ့အတွက် မီးလောင်ပြီး ၁ နာရီလောက်မှာ မီးငြှိမ်းနိုင်ခဲ့တယ်လို့ သိရပါတယ်။

လက်ရှိမှာ မီးလောင်လို့ အိမ်ထောင်စု ၁၈ စု၊ လူဦးရေ ၇၀ ခန့် မီးဘေးသင့်ခဲ့ရပြီး နီးစပ်ရာနေအိမ်တွေမှာ ခေတ္တနေထိုင်နေကြရပါတယ်။

ဇန်နဝါရီလ ၆ ရက် ည ၁၀ နာရီခွဲခန့်မှာလည်း မုံရွာမြို့၊ ဘုန်းစိုးရပ်ကွက်မှာ ဖယောင်းတိုင်မီးကနေတဆင့် မီးလောင်လို့ နေအိမ် ၃ လုံး မီးလောင်ပျက်စီးခဲ့တယ်လို့ သိရပါတယ်။

စာတည်း – လင်း

ပဲခူး၊ မေ ၂၃၊ ၂၀၂၃။

ပဲခူးတိုင်းအနောက်ခြမ်း၊ ပေါင်းတည်မြို့မှာ မေလ ၂၃ ရက် ဒီမနက်အစောပိုင်းက မီးလောင်မှုဖြစ်ရာ နေအိမ် ၅ လုံး ပျက်စီးဆုံးရှုံးခဲ့တယ်လို့ မြို့ခံတဦးဆီက သိရပါတယ်။

ပေါင်းတည်မြို့၊ နွယ်ချို ၁ ရပ်ကွက်အရှေ့လမ်း၊ ဆေးရုံဘက်ခြမ်း(ဆေးရုံအနီး)ရှိ နေအိမ် ၅ လုံး ဒီနေ့မနက် ၄ နာရီခွဲလောက်မှာ မီးလောင်ကျွမ်းခဲ့တာလို့ သိရပါတယ်။

“ဘယ်လိုစလောင်လည်းတော့ မသိဘူး၊ မီးစလောင်တဲ့အိမ်က အိမ်အဟောင်းကြီး။ နေတဲ့သူက အိမ်ပိုင်ရှင်မဟုတ်ဘူး။ သူများရဲ့အိမ်ကို ငှားနေတာ။ အိမ်ကြီးအိမ်ကောင်းတွေ ပါသွားတာ။ ဘာပစ္စည်းမှမရလိုက်ကြဘူး” လို့ မြို့ခံတဦးက ပြောပါတယ်။

မီးလောင်ကျွမ်းမှုကြောင့် လူထိခိုက်အန္တရာယ်မရှိပေမယ့် မီးစတင်လောင်ကျွမ်းတဲ့အိမ်မှာ ငှားရမ်းနေထိုင်နေသူ အသက် ၆၀ နှစ်အရွယ် ဦးဝင်းတင် ကိုတော့ စစ်ကောင်စီလက်အောက်ခံ ရဲက ဖမ်းဆီးသွားတယ်လို့ သိရပါတယ်။

ဦးဝင်းတင်နေအိမ်ကနေ မီးစတင်လောင်ကျွမ်းခဲ့တာဖြစ်ပြီး၊ ရေနွေးအိုးတည်ရာကနေ မီးကူးစက်လောင်ခဲ့တာလို့ နောက်ထပ်ဒေသခံတဦးက ပြောပါတယ်။

“သူတို့အိမ်က မနက်အစော ရေနွေးထတည်တယ်လို့ သိရတယ်။ ထင်းမီးနဲ့ဆိုတော့ မီးတောက်က ထရံကိုကူးပြီး မီးလောင်တာ။ အိမ်ကတော့ နှစ်ထပ်အိမ်။ လူတွေကတော့ လွတ်အောင် ပြေးနိုင်ခဲ့ကြတယ်”လို့ ပြောပါတယ်။

မီးလောင်မှုကြောင့် သွပ်မိုး၊ ပျဥ်ခင်း၊ ထရံကာ နေအိမ်တွေအပါအဝင် နေအိမ် ၅ လုံး မီးလောင်ပျက်စီးခဲ့ပြီး ကျပ်သိန်း ၁၀၀ ကျော် ပျက်စီးဆုံးရှုံးခဲ့ကာ မီးဘေးသင့်ပြည်သူ ၁၅ ဦးကတော့ နီးစပ်ရာဆွေမျိုးတွေဆီမှာ ခေတ္တခိုလှုံနေရတယ်လို့ ဆိုပါတယ်။

မီးလောင်ရာနေရာကို ပေါင်းတည်မြို့နယ် မီးသတ်အပါအဝင် နီးစပ်ရာဒေသက မီးသတ်ယာဥ်တွေနဲ့ ပြည်သူတွေက မီးငြှိမ်းသတ်ခဲ့ကြလို့ မီးလောင်ပြီးတနာရီကျော်အကြာမှာ မီးငြိမ်းသွားခဲ့တယ်လို့ သိရပါတယ်။

ပေါင်းတည်မြို့နယ်မှာ အခုနှစ်ဇန်နဝါရီ ၂၅ ရက် မနက်အစောပိုင်းကလည်း မီးကြွင်းမီးကျန်ကတဆင့် မီးလောင်ကျွမ်းခဲ့လို့ ဗျက်ကြီးရွာက ၂ ထပ်အိမ် ၁ အိမ်နဲ့ စပါးကျီ ၁ လုံး မီးလောင်ဆုံးရှုံးခဲ့ပြီး အသက် ၆၀ ကျော်အရွယ် အမျိုးသမီးတဦး မီးလောင်ဒဏ်ရာရကာ သေဆုံးခဲ့တယ်လို့ မြို့ခံတဦးဆီက သိရပါတယ်။

ဒါ့အပြင် ပဲခူးတိုင်းအနောက်ခြမ်း၊ မိုးညိုမြို့နယ်၊ မှက္ကတန်ရွာမှာလည်း ဇန်နဝါရီလ ၁၁ ရက် နေ့လယ် ၁ နာရီလောက်က မီးဖိုဆောင်ကတဆင့် မီးလောင်ကျွမ်းခဲ့လို့ နေအိမ် ၁၅ လုံးမီးလောင်ကျွမ်းခဲ့ပါသေးတယ်။

စာတည်း – လင်း

ရေစကြို၊ ဧပြီ ၂၀၊ ၂၀၂၃။

မကွေးတိုင်း၊ ရေစကြိုမြို့၊ သုခဝတီရပ်ကွက်မှာ အဝတ်တွေကို မီးပုံရှို့ရာမှ နေအိမ် ၃ လုံး မီးလောင်ပြီး အမျိုးသား ၁ ဦးသေဆုံးသွားတယ်လို့ သိရပါတယ်။

ဧပြီလ ၂၀ ရက်ဒီမနက် ၁၀ နာရီခန့်မှာ သုခဝတီရပ်၊ အောင်သိဒ္ဒိ အရှေ့နားနေ အသက် ၄၇ နှစ်အရွယ်ရှိ ဦးဖိုးဝင်းဆိုသူက နေအိမ်မှာ အဝတ်ပုံကို မီးရှို့ရာမှ မီးလောင်ခဲ့တာဖြစ်တယ်လို့ ဒေသခံတဦးက ပြောပါတယ်။

“အိမ်ရှင်က အရက်သောက်များပြီး စိတ်ကမမှန်ဘူး ဖြစ်နေတာ။ ဒီမနက်မှာ အိမ်ကအဝတ်တွေယူပြီး အိမ်ထဲမှာ မီးပုံရှို့တာ။ လူကလည်း အရက်ကြောင့် စိတ်ကျန်းမာရေးမကောင်းတဲ့အပြင် အောက်ပိုင်းကလည်း သိပ်မသန်တော့ မီးလောင်ချိန်ပြေးမရဘဲ လူပါ မီးထဲပါသွားတာ” လို့ ပြောပါတယ်။

မီးလောင်တာကြောင့် မီးရှို့သူ အမျိုးသားပါ မီးလောင်သေဆုံးသွားပြီး ထရံကာ၊ ပျဥ်ခင်း၊ သွပ်မိုးနေအိမ် ၃ လုံး မီးလောင်ပျက်စီးသွားတယ်လို့ ဆိုပါတယ်။

မီးလောင်မှုကြောင့် မီးဘေးသင့်ပြည်သူ ၁၁ ဦးရှိခဲ့ပြီး နီးစပ်ရာဆွေမျိုးနီးစပ်သူတွေဆီမှာ ယာယီနေထိုင်နေရတယ်လို့ သိရပါတယ်။

မီးလောင်ချိန်အတွင်း မြို့နယ်မီးသတ်တပ်ဖွဲ့အပါအဝင် ဒေသခံတွေက ဝိုင်းဝန်းမီးငြိမ်းသတ်လို့ မီးလောင်ပြီး ၁ နာရီခန့်အကြာမှာ မီးငြိမ်းသွားခဲ့တယ်လို့ သိရပါတယ်။

စာတည်း – လင်း

စစ်ကိုင်း၊ ဧပြီ ၁၉၊ ၂၀၂၃။

စစ်ကိုင်းတိုင်း၊ စစ်ကိုင်းမြို့၊ နီလာရပ်ကွက်ရှိ စက်သုံးဆီသိုလှောင်ရောင်းချနေတဲ့ဆိုင်မှာ ဧပြီလ ၁၉ ရက် ဒီကနေ့မနက် ၆ နာရီကျော်က မီးလောင်မှုဖြစ်ပွားလို့ အမျိုးသား ၁ ဦး ဒဏ်ရာရပြီး ကျပ်သိန်းရာချီ ဆုံးရှုံးသွားတယ်လို့ သိရပါတယ်။

မီးလောင်မှုဖြစ်ပွားတဲ့ဆိုင်ဟာ စက်သုံးဆီကို ဂါလံပုံးတွေနဲ့ရောင်းချတာဖြစ်ပြီး ဆိုင်ဝန်ထမ်းတွေက ပေပါထဲကဆီကိုပုံးတွေထဲပြောင်းထည့်တာကနေ မီးလောင်မှုစတင်ဖြစ်ပွားခဲ့တာလို့ ဒေသခံတဦးက မြေလတ်အသံကို ပြောပါတယ်။

“ဆီဆိုင်မီးလောင်တာဆိုတော့ ကုန်သလောက် ဖြစ်သွားတယ်။ သူ့ဆိုင်က ပန့်နဲ့ရောင်းတဲ့ဆိုင်တော့ မဟုတ်ဘူး။ ဂါလံပုံးတွေနဲ့ သယ်ပို့ရောင်းတဲ့ဆိုင်မျိုးပါ။ ကံကောင်းတာက ဘေးအိမ်တွေကို မီးမကူးသွားတာ။ အိမ်ခြေမကပ်တာတွေလည်း ပါတာပေါ့။ မဟုတ်ရင်တော့ တော်တော်ကုန်သွားမယ်” လို့ ပြောပါတယ်။

မီးလောင်ကျွမ်းတာကြောင့် ဆီဆိုင်အပါအဝင် ဆိုင်အတွင်းရှိဓာတ်ဆီပေပါတွေနဲ့ ဆိုင်နဲ့တွဲလျက်ရှိတဲ့နေအိမ်တွေမီးလောင်လို့ ကျပ်သိန်း ၃၀၀ နီးပါး ပျက်စီးဆုံးရှုံးသွားပြီး ဆိုင်ဝန်ထမ်း ကိုရန်အောင်ဆိုသူမှာ လက်နဲ့ကျောပြင်တွေမှာ မီးလောင်ဒဏ်ရာရသွားကာ စစ်ကိုင်းဆေးရုံကို ပို့ဆောင်ထားရတယ်လို့ ဆိုပါတယ်။

မီးလောင်တဲ့ဆီဆိုင်ကို မီးသတ်တပ်ဖွဲ့၊ အရန်မီးသတ်နဲ့ရပ်ကွက်နေပြည်သူတွေက ဝိုင်းဝန်းမီးငြိမ်းသတ်လို့ မီးလောင်ပြီး ၁ နာရီကျော်လောက်မှ မီးငြိမ်းသွားတယ်လို့ သိရပါတယ်။

ဇန်နဝါရီလ ၃ ရက်နေ့ကလည်း စစ်ကိုင်းမြို့၊ နန္ဒဝန်ရပ်ကွက်၊ ၃ လမ်းမှာ ရေနွေးအိုးတည်ထားချိန် ဝါယာရှော့ဖြစ်ပြီး နေအိမ်မီးလောင်လို့ ညီအကို ၂ ဦး မီးလောင်သေဆုံးသွားတယ်လို့ သိရပါတယ်။

စာတည်း – ရင်ငြိမ်း