ပေါက်ခေါင်း၊ ဩဂုတ် ၂၀၊ ၂၀၂၅။

ပဲခူးတိုင်း၊ ပေါက်ခေါင်းမြို့နယ်၊ ကျောက်ပြင်သာနဲ့ ဖလန်ပင်ကျေးရွာတို့ကို စစ်ကော်မရှင်တပ်က လေကြောင်းကနေဗုံးကြဲတိုက်ခိုက်ခဲ့တာကြောင့် သားအဖ ၂ ဦးသေပြီး ၄ ဦးဒဏ်ရာရတယ်လို့ ဒေသခံတွေဆီက သိရပါတယ်။

ဩဂုတ် ၁၉ ရက် မနက် ၁၁ နာရီကျော်မှာ သဲကုန်းဘက်ကတက်လာတဲ့ စက်တပ်လေထီး ၄ စီးဟာ ကျေးရွာ ၂ ရွာထဲကို ဗုံး ၁၂ လုံးကြဲချခဲ့တယ်လို့ ဆိုပါတယ်။

“ပထမ ၂ စီးလာတယ်။ ကြဲသွားတယ်။ ဒုတိယ ၂ စီးလာတယ်။ ထပ်ကြဲတယ်။ ဖလန်ပင်က အိမ်ထိပေမယ့် လူမထိဘူး။ ကျောက်ပြင်သာ ပြည်သူ ၂ ဦးသေတယ်။ သားအဖ ၂ ယောက်ပေါ့။ ပြည်သူ ၄ ဦးထိတာမှာ စိုးရိမ်ရတဲ့ ၁ ယောက်က သေဆုံးသူကောင်လေးရဲ့အမေပါ”လို့ ပြည်ခရိုင် ၃၆၀၂ တပ်ရင်း သတင်းနဲ့ပြန်ကြားရေးတာဝန်ခံက ပြောပါတယ်။

ဗုံးကြဲခံရလို့ ကျောက်ပြင်သာကျေးရွာက အသက် ၁၀ နှစ်အရွယ် မောင်သက်ပိုင်ဇော်နဲ့ ဖခင်ဖြစ်သူ အသက် ၃၈ နှစ်အရွယ် ဦးသိန်းဇော်တို့သေဆုံးပြီး နာရေးကိုတော့ အဲ့ဒီနေ့ညနေပိုင်းမှာပဲ ကျေးရွာ သုသာန်မှာ သင်္ဂြိုဟ်ခဲ့တယ်လို့ သူကပြောပါတယ်။

ဒါ့အပြင် ကျောက်ပြင်သာရွာက နေအိမ် ၂ လုံးလည်းပျက်စီးပြီး ဦးသိန်းဇော်ရဲ့ မိန်းမဖြစ်သူ အသက် ၃၆ နှစ်အရွယ် အမျိုးသမီး ဖြစ်သူနဲ့ အသက် ၄၀ အရွယ် အမျိုးသမီး ၃ ဦးဒဏ်ရာရကာ ဆေးဝါးကုသဖို့ အခက်အခဲကြုံနေရတယ်လို့ သူကဆက်ပြောပါတယ်။

ဒါ့အပြင် ဖလန်ပင်ကျေးရွာမှာလည်း နေအိမ် ၃ လုံးပျက်စီးခဲ့ပြီး လူထိခိုက်မှုမရှိခဲ့ဘူးလို့ သိရပါတယ်။

ဩဂုတ် ၁၅ ရက်ကလည်း ကြိမ်ချောင်းကျေးရွာကို ပါရာမိုတာနဲ့ဗုံး ၄ လုံးကြဲချခဲ့ရာ အသက် ၁၃ နှစ်အရွယ်မိန်းကလေးငယ် ၁ ဦးအပါအဝင် ၆ ဦးသေဆုံးပြီး ၁၁ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

ရွာ ၈ ရွာဗုံးကြဲခံထားရပြီး လူ ၁၀ ဦးထက်မနည်းသေဆုံး

ကျော်ကြီး၊ ဒိန်းဂျား

မြေလတ်အသံ၊ ဩဂုတ် ၁၉၊ ၂၀၂၅။

မကွေးတိုင်း၊ ဆိပ်ဖြူနဲ့ ပေါက်မြို့နယ်အတွင်းရှိ ကျေးရွာတွေကို စစ်ကော်မရှင်တပ်က လေကြောင်းကနေဗုံးကြဲချခဲ့တာကြောင့် လူ ၁၀ ဦးထက်မနည်းသေဆုံးထားတယ်လို့ ဒေသခံတွေထံက သိရပါတယ်။

ဩဂုတ် ၁၉ ရက် ဒီကနေ့မနက် ၁၁ နာရီခွဲခန့်မှာ ဆိပ်ဖြူမြို့နယ် ပိုင်းရွာ၊ ဝန်ကြီး၊ ရှားလှ၊ ကျွန်းတာ၊ အိုင်ကြီးနဲ့ ကျွန်းချောင်းကျေးရွာတွေကို Y12 လေယာဥ် ၁ စီးနဲ့ ဗုံးအလုံး ၂၀ ခန့်ကြဲချသွားခဲ့ပြီး လူနေအိမ်တွေပေါ်ကို ကျရောက်ပေါက်ကွဲခဲ့တယ်လို့ မြေပြင်အခြေအနေကိုသိရှိသူတဦးက မြေ လတ်အသံကို ပြောပါတယ်။

လတ်တလောကောက်ယူထားရတဲ့စာရင်းတွေအရ ဗုံးကြဲခံရတာကြောင့် ဝန်ကြီးရွာက အမျိုးသမီး ၁ ဦး၊ ရှားလှရွာက ကလေး ၁ ဦးအပါ ၄ ဦး၊ ကျွန်းချောင်းရွာက ၅ ဦး စုစုပေါင်း ၁၀ ဦးသေဆုံးထားကာ ထိခိုက်ဒဏ်ရာရသူ ၁၀ ဦးထက်မနည်းရှိပြီး သေဆုံးထိခိုက်သူတွေရဲ့ အချက်အလက်တွေကို ဆက်လက်ကောက်ယူဆဲဖြစ်တယ်လို့ ၎င်းက ဆက်ပြောပါတယ်။

ဩဂုတ်တတိယအပတ်ကစပြီး ဆိပ်ဖြူနယ်ထဲကို စစ်အင်အားအလုံးအရင်းနဲ့စစ်ကြောင်းထိုးနေတာကြောင့် ပိုင်းရွာ၊ ဝန်ကြီး၊ ရှားလှ၊ ကျွန်းတာ၊ အိုင်ကြီး၊ ကျွန်းချောင်း၊ ဖလံမ၊ ကန်စွန်းမ၊ သုံးလံပြည့်ရွာတွေအပါ ၁၀ ရွာထက်မနည်းက ဒေသခံ ၁၀,၀၀၀ ခန့်ထွက်ပြေးတိမ်းရှောင်နေရတာဖြစ်ပြီး ဒီကနေ့မှာ အဲ့ဒီကျေးရွာတွေကို လေကြောင်းက ထပ်မံဗုံးကြဲခဲ့တာလည်းဖြစ်ပါတယ်။

အလားတူ ပေါက်မြို့နယ်၊ ပန်းတောကန်ရွာ၊ ချက်ကန်ရွာနဲ့ တည်ပင်ကန်ရွာတွေကို ဩဂုတ် ၁၈ ရက် ယမန်နေ့ည ၇ နာရီခန့်မှာ Y 12 လေယာဥ်နဲ့ ဗုံး ၆ လုံးထက်မနည်းကြဲချခဲ့တယ်လို့ ဒေသခံတွေထံက သိရပါတယ်။

ဗုံးကြဲတိုက်ခိုက်ခံရတာကြောင့် ပန်းတောကန်ရွာက အရပ်သားအမျိုးသမီး ၁ ဦး သေဆုံးခဲ့ပြီး ပန်းတောကန်နဲ့ ချက်ကန်ရွာတွေက ဒဏ်ရာရရှိသူ ၄ ဦးရှိခဲ့တယ်လို့ ဆိုပါတယ်။

” Y12 က တခါလာလို့ရှိရင် အကြိမ် ၂၀ လောက်ထိချတယ် တခါချရင် အတွဲလိုက်တွေ ၆လုံး၊ ၇လုံး၊ ၅လုံး၊ ၃လုံး အဲ့တာမျိုးတွေချတာပေါ့ ။ ပတ်ကြဲ ပတ်နေတာပေါ့ သူတို့ချချင်တဲ့နေရာကိုချတာပေါ့၊ အခုထိ ဝဲနေတုန်းပါပဲ ” လို့ ပေါက်မြို့နယ်လူသားစာနာတာဝန်ရှိသူတဦးက ပြောပါတယ်။

လေကြောင်းတိုက်ခိုက်မှုတွေကြောင့် ကျူတော၊ ကြအို့၊ ပေခုနှစ်ပင်၊ ခင်ရှည်၊ ပန်းတောကန်၊ တည်ပင်ကန်၊ မှန်ထောင်ကွင်း၊ ဖိုးဖြူလုံးကန်၊ သမားတော်၊ ယင်းမာကုန်း၊ ရေပြာ၊ ဘုရားတောင်ရွာတွေက ဒေသခံတွေ ဘေးလွတ်ရာထွက်ပြေးနေရတယ်လို့ သိရပါတယ်။

ဩဂုတ် ၁၈ ရက်ကစတင်ကာ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် မကွေးမြို့ကို ရောက်ရှိနေပြီး မကွေးတပ်နယ်က ၎င်းရဲ့လက်အောက်တပ်ဖွဲ့ဝင် မိသားစုတွေကို တွေ့ဆုံကာ မြသလွန်ဘုရားကို သွားရောက်ခဲ့ကြောင်း စစ်ကောင်စီက သတင်းထုတ်ပြန်ပါတယ်။

၎င်းရောက်ရှိတဲ့ ယမန်နေ့ကစတင်ကာ မကွေးမြို့ကို လုံခြုံရေးတင်းကျပ်ထားသလို မင်းဘူးနဲ့ စကုမြို့နယ်တွေမှာ စစ်ကြောင်းတွေထိုးနေလို့ တိုက်ပွဲတွေဖြစ်ပွားနေတဲ့အပြင် ဆိပ်ဖြူနဲ့ ပေါက်မြို့နယ်တွေကိုလည်း လေယာဥ်တွေနဲ့ ဗုံးဆက် တိုက်ကြဲချနေတာလည်း ဖြစ်ပါတယ်။

ပုံစာ – မကွေးမြို့ကို ရောက်ရှိနေတဲ့ စစ်ခေါင်းဆောင် နှင့် လေယာဥ်ဗုံးကြဲခံရမှုကြောင့် သေဆုံးနေတဲ့ ဆိပ်ဖြူမြို့နယ် ရှားလှရွာဒေသခံများ။

စာတည်း – ဟိန်းစံ

ဆားလင်းကြီး၊ ဩဂုတ် ၁၈၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့နယ်၊ မိုးကြိုးပြင်ရွာကို စစ်ကောင်စီတပ်က စက်တပ်လေထီးနဲ့ဗုံးကြဲခဲ့တာကြောင့် အသက် ၆၀ အရွယ် အမျိုးသမီး ၁ ဦးသေဆုံးပြီး အသက် ၄၀ အရွယ်အမျိုးသား ၁ ဦး ခြေထောက်ထိမှန် ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဩဂုတ် ၁၈ ရက် ဒီနေ့လယ် ၂ နာရီခွဲက မိုးကြိုးပြင်တောင်ရွာ ရွာထိပ်က လူနေအိမ် ၁ လုံးပေါ်ကို ဗုံးသီးကျပေါက်ကွဲကာ အသက် ၆၀ အရွယ်ရှိ ဒေါ်သောင်းခင်ဆိုသူ ပွဲချင်းပြီးသေဆုံးခဲ့ပြီး ၎င်းရဲ့ သားမတ်ဖြစ်သူ အသက် ၄၀အရွယ် ကိုမင်းသန့်ကတော့ ခြေထောက် ဗုံးစထိမှန်ဒဏ်ရာကြောင့် ခြေထောက်ဖြတ်ပစ်ရမယ့် အခြေအနေရှိတယ်လို့ သိရပါတယ်။

“ရွာရဲ့ ရွာဦးခေါင်း၊ ရွာထိပ်ပေါ့၊ ပုသိမ်-မုံရွာလမ်း အနောက်ဘက်၊ ထိခိုက်ဒဏ်ရာကတော့ မိခင်ဖြစ်သူ ဒေါ်သောင်းခင်ကတော့ ပွဲချင်းပြီး သေဆုံးသွားပြီးတော့ သားမက်ဖြစ်သူ တယောက်ကတော့ ခြေထောက် ဖြတ်ပစ်ရမယ့် အနေအထားထိ ရောက်သွားတယ်။” လို့ ဆားလင်းကြီး ဒေသခံတဦးက ပြောပါတယ်။

တိုက်ပွဲဖြစ်တာမရှိဘဲ အနောက်မြောက်တိုင်းစစ်ဌာနချုပ်ဘက်က တက်လာတဲ့ ပါရာမော်တာနဲ့ ခုလို ကြဲချသွားတာဖြစ်ပြီး ဗုံးသီးကျတဲ့နေအိမ်လည်း ပျက်စီးခဲ့တယ်လို့ သိရပါတယ်။

ဗုံးကြဲပြီးနောက် လေကြောင်းအန္တရာယ်အပြင် ဝမ်ပေါင်ကုမ္ပဏီကနေ စစ်ကောင်စီတပ်က ခြေလျင်စစ်ကြောင်းထိုးလာတာကြောင့် မိုးကြိုးပြင်နဲ့ အနီးဝန်းကျင်က ဒေသခံတွေ ထွက်ပြေး တိမ်းရှောင်နေရတယ်လို့ သိရပါတယ်။

ဒီကနေ့တရက်တည်းမှာပဲ ဆားလင်းကြီးအပြင် ဝက်လက်မြို့နယ်နဲ့ ဒီပဲယင်းမြို့တို့မှာလည်း စစ်ကောင်စီတပ်က လေကြောင်းကနေဗုံးကြဲတိုက်ခိုက်ခဲ့တာကြောင့် သံဃာတွေအပါအဝင် ဒေသခံ ၁၀ ဦးထက်မနည်း သေဆုံးခဲ့ပါတယ်။

စာတည်း – လင်း

မြေလတ်အသံ၊ သြဂုတ် ၁၇၊ ၂၀၂၅။

မန္တလေးတိုင်း၊ မိုးကုတ်မြို့ပေါ်က နေရာ ၂ခုကို စစ်ကောင်စီတပ်က သြဂုတ် ၁၇ ရက်ဒီမနက် ၈ နာရီကျော်မှာ ဗုံးကြဲတိုက်ခိုက်ခဲ့တာကြောင့် ကလေး ၁ ဦးအပါအဝင် အမျိုးသား ၃ ဦးသေဆုံးပြီး ၁ ဦးပျောက်ဆုံးနေတယ်လို့ ဒေသခံတွေကပြောပါတယ်။

တိုက်ခိုက်ရေးလေယာဥ် ၁ စီးနဲ့ မိုးကုတ်မြို့၊ စစ်တန်းရက်ကွက်ရှိ ပတ္တမြားငမောက်တည်းခိုခန်းရှေ့ ၁ လုံး၊ အစိုးရဘဏ်ရှေ့ ၁ လုံး စုစုပေါင်းဗုံးသီး ၂ လုံးကြဲချခဲ့ရာ လမ်းပေါ်သွားလာနေတဲ့ အသက် ၁၀နှစ် အရွယ် ကလေး(ကျား) ၁ ဦးနဲ့ အသက် ၃၀ အရွယ် အမျိုးသား ၂ ဦးတို့သေဆုံးပြီး စျေးသည်အမျိုးသမီး ၁ ဦးလည်း ပျောက်ဆုံးနေတယ်လို့ ဆိုပါတယ်။

“ဗုံးကျတဲ့နေရာမှာ တည့်တည့်ရောက်နေခဲ့တာ။ သေဆုံးသူတွေက တည်းခိုခန်းရှေ့နားကလူတွေပါ။ပဲ ပြုတ်သည် ၁ ဦးလည်းပါတယ်ပြောတယ်ဗျ။ သူမက အလောင်းမတွေ့ပါ။ ပျောက်ဆုံးအခြေအနေ။ သူ့ပစ္စည်းတွေထားခဲ့ပြီး ပြေးသွားခဲ့တာလား၊ လွင့်စင်သွားခဲ့တာလား မသဲကွဲသေးပါ”လို့ မြို့ခံအမျိုးသားတဦးက ပြောပါတယ်။

ဗုံးကြဲနေရာတွေကို ကယ်ဆယ်ရေးဆောင်ရွက်ပေးနေသူအမျိုးသား ၁ ဦးကလည်း သေဆုံးသူ ၃ ဦး နဲ့ ပျောက်ဆုံးအမျိုးသမီး ၁ ဦးရှိပြီး အခြားထိခိုက်ဒဏ်ရာရရှိသူမရှိခဲ့ဘူးလို့ အတည်ပြုပြောဆိုပါတယ်။

ပြီးခဲ့တဲ့သြဂုတ် ၁၄ ရက်ကလည်း မိုးကုတ်မြို့အရှေ့ပိုင်း ရွှေတိုင်ရက်ကွက်ရှိ လင်းရောင်ခြည်ဘုန်းကြီးကျောင်းဝန်းကျင်ကို ပေါင် ၅၀၀ ဗုံးသီး ၁လုံးကြဲချခဲ့ရာ ကိုယ်ဝန်သည်အမျိုးသမီး ၂ ဦး၊ ၅နှစ် အရွယ်ကလေး(ကျား) ၁ ဦးတို့အပါအဝင် ၂၁ ဦးသေဆုံးခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ သြဂုတ် ၁၆၊ ၂၀၂၅။

မန္တလေးတိုင်း၊ အိုးဘိုအကျဥ်းထောင် ဗုံးကြဲတိုက်ခိုက်ခံရတာကြောင့် နိုင်ငံရေးအကျဥ်းသား ၇ ဦး သေဆုံးခဲ့တယ်လို့ သြဂုတ် ၁၆ ရက်ဒီကနေ့မှာ မြန်မာနိုင်ငံလုံးဆိုင်ရာနိုင်ငံရေးအကျဥ်းသားများ ကွန်ရက် – PPNM က ထုတ်ပြန်ပါတယ်။

သြဂုတ် ၈ ရက်မနက်ပိုင်းမှာ အိုးဘိုထောင်ရှိ အမျိုးသားအဆောင် ၄ နဲ့ ၆ အပေါ်ကို ဒရုန်းဗုံးသီး ၃ လုံးကြဲချခံရာ ဗုံးသီး ၂ လုံး ပေါက်ကွဲမှုဖြစ်သွားခဲ့တာကြောင့် အသက် ၂၃ နှစ်ကနေ ၃၇ နှစ်အရွယ်ရှိ နိုင်/ကျဥ်းအမျိုးသား ၇ ဦး သေဆုံးခဲ့တာလို့ ဆိုပါတယ်။

“ဒရုန်းဗုံးကြဲချမှုအပေါ်မှာ နိုင်ငံရေးအကျဥ်းသားတွေ၊ တခြားအကျဥ်းသားတွေလည်း သေဆုံးမှုရှိခဲ့ပါတယ်။ နိုင်ငံရေးအကျဥ်းသားသေဆုံးမှုကတော့ ပိုပြီးတော့များတယ်။ ကျနော်တို့အတည်ပြုထားနိုင်တာက အနည်းဆုံး ၇ ဦးရဲ့အချက်အလက်တွေကို အတည်ပြုထားနိုင်ခဲ့တယ်”လို့ PPNM မှ ဦးဆောင်ကော်မတီဝင် ကိုသိုက်ထွန်းဦးကပြောပါတယ်။

ဒါ့အပြင် ဒဏ်ရာရရှိတဲ့ အကျဥ်းသား အနည်းဆုံး ၁၀ ဦးဝန်းကျင်ရှိပြီး အသက်အန္တရာယ်စိုးရိမ်ရတဲ့ အခြေအနေဖြစ်နေကြတယ်လို့ ကိုသိုက်ထွန်းဦးကဆိုပါတယ်။

ဗုံးကြဲခံရတဲ့နေ့မှာ ထောင်ပြင်ပအနီးပတ်ဝန်းကျင်မှာ တိုက်ပွဲဖြစ်တာမရှိဘဲ ဒရုန်းဗုံးနဲ့ရုတ်တရက်ကြဲချခံလိုက်ရတာဖြစ်ပြီး ဒီလိုလုပ်ရပ်အပေါ် PPNM အနေနဲ့ လုံးဝကန့်ကွက်ရှုတ်ချတယ်လို့လည်း ကိုသိုက်ထွန်းဦးက ပြောပါတယ်။

“လုပ်တဲ့(ဗုံးကြဲ)အဖွဲ့အစည်းကတော့ တော်လှန်ရေးတပ်လား၊ စစ်တပ်လားဆိုတာ အတည်မပြုနိုင်သေးဘူး။ စုံစမ်းနေဆဲဖြစ်ပါတယ်။ မည်သည့်အဖွဲ့ကပဲလုပ်သည်ဖြစ်စေ ကျနော်တို့အနေနဲ့ ဒီကိစ္စကို ပြင်းပြင်းထန်ထန် ကန့်ကွက်ပါတယ်”လို့ သူကဆိုပါတယ်။

အကျဥ်းထောင် တိုက်ခိုက်ခံရမှုနဲ့ပတ်သက်တဲ့ အခြေအနေအတိအကျကိုတော့ မြေလတ်အသံက သီးခြားအတည်မပြုနိုင်သေးပါဘူး။

သေဆုံးသူနိုင်ငံရေးအကျဥ်းသား ၇ ဦးရဲ့ ကိုယ်ရေးအချက်အလက်တွေအကုန်လုံးကို မြန်မာနိုင်ငံလုံးဆိုင်ရာနိုင်ငံရေးအကျဥ်းသားများကွန်ရက် – PPNM က ရရှိထားပြီးဖြစ်ပေမယ့် လုံခြုံရေးအရ ဖော်ပြနိုင်မှုမရှိဘူးလို့လည်း သိရပါတယ်။

စာတည်း – လင်း

မြေလတ်အသံ၊ သြဂုတ် ၁၅၊ ၂၀၂၅။

မန္တလေးတိုင်း၊ မိုးကုတ်မြို့ပေါ်ကို စစ်ကောင်စီတပ်က သြဂုတ် ၁၄ ရက်ည ၈ နာရီကျော်မှာ ဗုံးကြဲတိုက်ခိုက်ခဲ့တာကြောင့် ကလေးငယ်နဲ့ ကိုယ်ဝန်သည်အပါအဝင် သေဆုံးသူ ၁၀ ဦးခန့်ရှိခဲ့တယ်လို့ ဒေသခံတွေ ဆီကသိရပါတယ်။

မိုးကုတ်မြို့အရှေ့ပိုင်း ရွှေတိုင်ရပ်ကွက်ရှိ လင်းရောင်ခြည်ဘုန်းကြီးကျောင်းဝန်းကျင်ကို ပေါင် ၅၀၀ ဗုံးသီး ၁ လုံးကြဲချခဲ့တာဖြစ်ပြီး ဘုန်းကြီးကျောင်းအနီးရှိ ကလေးမွေးဖွားဖို့ ပြင်ဆင်နေတဲ့အိမ်ကိုပါ ဗုံးစ ထိမှန်ခဲ့တာကြောင့် ထိခိုက်သေဆုံးပိုများခဲ့တာလို့ ဆိုပါတယ်။

“ထိခိုက်သူတွေက နေအိမ်ကနေ ပေ ၂၀၀ ကျော်လောက်ထိ လွင့်ထွက်ကုန်တာ။ အချို့က အသားစတွေပဲ ရှာလို့ရတယ်။ ကိုယ်ဝန်သည်လည်း ဆုံးပါးသွားတယ်ပြောတယ်။ ကျနော် အနားထိသွားမရခဲ့ဘူး။ လူနာတွေ အလောင်းတွေက သယ်ထုတ်ပြီးသွားကြပြီ”လို့ မြို့ခံအမျိုးသားတဦးကပြောပါတယ်။

သေဆုံးသူ၊ ထိခိုက်ဒဏ်ရာရရှိသူတွေရဲ့ အသေးစိတ်အချက်အလက် နဲ့ လူနေအိမ် ပျက်စီးမှုအခြေအနေတွေကို သိရှိနိုင်ဖို့မြေလတ်အသံက ဆက်လက်စုံစမ်းနေဆဲဖြစ်ပါတယ်။

ပြီးခဲ့တဲ့သြဂုတ် ၉ ရက်ည ၆ နာရီကျော်မှာလည်း မိုးကုတ်မြို့၊ အရှေ့ပိုင်း ကျောက်နဂါးကျေးရွာကို စစ်ကောင်စီတပ်က တိုက်ခိုက်ရေးလေယာဥ် ၁ စီးနဲ့ ဗုံးကြဲတိုက်ခိုက်ခဲ့တာကြောင့် ၇၁ နှစ်ရွယ်အမျိုးသား ၁ ဦး၊ ၈ နှစ်ရွယ် ယောက်ျားလေး ၁ ဦး၊ ကိုရင် ၁ ပါး၊ ၃၂ နှစ်အမျိုးသမီး ၁ ဦး၊ ၁၁ နှစ်အရွယ် မိန်းကလေး ၁ ဦး စုစုပေါင်း ၅ ဦးသေဆုံးပြီး ၄ ဦးဒဏ်ရာရရှိခဲ့တယ်လို့ သိရပါတယ်။

စာတည်း – လင်း

ပေါက်၊ ဩဂုတ် ၁၂၊ ၂၀၂၅။

မကွေးတိုင်း၊ ပေါက်မြို့နယ် အရှေ့ပိုင်းရှိ ကျေးရွာ ၁၂ ရွာထက်မနည်းကို စစ်ကော်မရှင်တပ်က လေယာဥ်နဲ့ ဗုံးကြဲချခဲ့လို့ ကလေး ၁ ဦးအပါ အရပ်သား ၄ ဦး သေဆုံးခဲ့တယ်လို့ ဒေသခံတွေဆီက သိရပါတယ်။

ဩဂုတ် ၁၀ ရက် မနက် ၉ နာရီကျော်မှာ စစ်ကော်မရှင်လေတပ် သယ်ယူပို့ဆောင်ရေးလေယာဥ် Y-12 နဲ့ ပေါက်မြို့နယ် ရေပြာ၊ ရှခွလေး၊ မုန်တော၊ ကမ်းပျို၊ သနပ္ပင်ဇင်း၊ တင်ငုတ်ပြင်၊ ညောင်ပင်တိုက်၊ ရွှေလှံ၊ မြင်းခြံကုန်း၊ ကျွန်းပင်စု၊ ဆင်သေ၊ ငမိုးကြီး၊ ငမိုးလေး၊ ကမ်းတောကုန်း၊ ပြင်းချောင်း၊ ဆယ်ဝ စတဲ့ ရွာတွေကို ဗုံးအလုံးရေ ၅၀ ကျော် ကြဲချခဲ့တဲ့အပြင် ပေါက်အခြေစိုက် ကပစ ၂၄ တပ် ကလည်း ဟောင်ဝစ်ဇာလက်နက်ကြီးတွေနဲ့ ပစ်ခတ်ခဲ့တယ်လို့ ဆိုပါတယ်။

“ တိုက်ပွဲကမဖြစ်ဖူး၊ ပေါက် ကပစ ၂၄ ကနေ ပထမ ဟောင်ဝစ်စာနဲ့ လှမ်းထု(ပစ်)တာ။ ၃ လုံးတွဲ ၂ ခါ ထုပြီး Y 12 က တခါတည်း ‌အပေါ်ကနဲ့ ဗုံးကြဲချတာ။ ရှခွလေးရွာကိုတော့ ၃ လုံးချတယ်၊ ၁ လုံးကွဲတယ်၊ ကမ်းပျိုရွာမှာတော့ ၅ လုံးတွဲချတာ၊ တခါချရင် ၄၊ ၅ လုံးချတာ” လို့ ဗုံးကြဲခံရတဲ့ရွာတွေက စစ်ရှောင်တွေကို ကူညီပေးနေသူတဦးက မြေလတ်အသံကို ပြောပါတယ်။

ဗုံးကြဲခံရမှုကြောင့် ရှခွလေးကျေးရွာက အသက် ၃ နှစ်ကျော်မိန်းကလေး ၁ ဦးနဲ့ အမျိုးသား ၁ ဦး၊ ကမ်းပျိုရွာက အမျိုးသား ၁ ဦး၊ တင်ငုတ်ပြင်ရွာက အသက် ၄၀ ကျော်အမျိုးသား ၁ ဦးနဲ့ ညောင်ပင်တိုက်ရွာက ၁ ဦး စုစုပေါင်း ၅ ဦးသေဆုံးခဲ့ပြီး ကျေးရွာ ၆ ရွာထက်မနည်းက အရပ်သား ၃၀ ခန့် ထိခိုက်ဒဏ်ရာရရှိခဲ့တယ်လို့ သိရပါတယ်။

သေဆုံး၊ ဒဏ်ရာရသူတွေရဲ့ အသေးစိတ်အချက်အလက်တွေကို မြေလတ်အသံက ဆက်လက်စုံစမ်းနေဆဲဖြစ်ပါတယ်။

ဗုံးကြဲခံရပြီးနောက် စစ်ကော်မရှင်ရဲ့လေကြောင်းအန္တရာယ်ကြောင့် ပေါက်မြို့နယ်အရှေ့ပိုင်းက ကျေးရွာ ၁၆ ရွာက ဒေသခံတွေ ကျေးရွာပြင်ပကို တိမ်းရှောင်နေထိုင်နေရတယ်လို့ သိရပါတယ်။

ဇူလိုင် ၂၇ ရက်ကလည်း ပေါက်မြို့နယ်၊ စဖဲကျေးရွာဆေးပေးခန်းကို စစ်ကော်မရှင်တပ်က တိုက်ခိုက်ရေးဗုံးကြဲလေယာဥ်နဲ့ ဗုံးကြဲချခဲ့တာကြောင့် ဆေးခန်းလာပြသူ အရပ်သား ၂ ဦးသေဆုံးခဲ့သေးတယ်လို့ သိရပါတယ်။

စာတည်း – ဟိန်းစံ

နွားထိုးကြီး၊ ဩဂုတ် ၃၊ ၂၀၂၅။

မန္တလေးတိုင်း၊ နွားထိုးကြီးမြို့နယ်၊ သန်းပင်လှကျေးရွာမှာ လေကြောင်းကနေဗုံးကြဲခံရလို့ ကလေး ၁ ဦးသေဆုံးပြီး ၄ ဦးဒဏ်ရာရတယ်လို့ ဒေသခံတွေဆီက သိရပါတယ်။

ဩဂုတ် ၂ ရက်မနက် ၁၁ နာရီကျော်မှာ စစ်ကောင်စီဘက်က Y 12 ၁ စီးနဲ့ ကျေးရွာထဲကို ဗုံးသီး ၆ လုံး ကြဲချခဲ့တယ်လို့ ဆိုပါတယ်။

“ဒဏ်ရာရသူတွေက အိမ်မှာရှိနေချိန်ထိတယ်။ သေတဲ့ကလေးလေးက ရွာထဲ နွားဆွဲသွားဖို့ လမ်းပေါ်ထွက်ချိန်မှာဖြစ်သွားတာ။ ဗုံးက ရွာထဲကိုကျတာ။ ရွာခံတွေထွက်ပြေးတာတော့ မရှိဘူး”လို့ ဒေသခံတဦးက ပြောပါတယ်။

ဗုံးကြဲခံရလို့ အသက် ၁၀ နှစ်အရွယ် ဖိုးသင်္ကြန်ဆိုသူ နေရာမှာပဲသေဆုံးပြီး အသက် ၃၀ ကနေ ၅၀ ကြား အမျိုးသား ၁ ဦးနဲ့အမျိုးသမီး ၃ ဦးဒဏ်ရာရကာ စိုးရိမ်ရတဲ့အခြေနေရှိတဲ့အပြင် နေအိမ် ၂ လုံးပျက်စီးပြီး နွား ၁ ကောင်လည်းသေဆုံးသွားတယ်လို့ သိရပါတယ်။

သန်းပင်လှရွာက ယခုလိုလေကြောင်းကနေ ဗုံးကြဲခဲရတာ ပထမဆုံးအကြိမ်ဖြစ်ပြီး ကျေးရွာကို စစ်ကြောင်းထိုးနေတာ၊ တိုက်ပွဲဖြစ်နေတာမျိုးမရှိဘူးလို့ အထက်ပါဒေသခံက ဆက်ပြောပါတယ်။

ဇူလိုင် ၂၆ ရက်ကလည်း နွားထိုးကြီးမြို့နယ်၊ မျက်ရှုကျေးရွာမှာ စစ်တပ်ဘက်က ဒရုန်းနဲ့ဗုံးချခံရလို့ ကလေး ၄ ဦးအပါအဝင် ၇ ဦးသေဆုံးပြီး ၆ ဦးဒဏ်ရာရသွားတယ်လို့ သိရပါတယ်။

စာတည်း – လင်း