ဖမ်းသွား

အင်းတော်၊ ဧပြီ ၂၆၊ ၂၀၂၃။

စစ်ကိုင်းတိုင်း၊ အင်းတော်မြို့နယ်၊ မံဟဲရွာကနေ စစ်ကောင်စီတပ်တွေဖမ်းသွားတဲ့ ဒေသခံရွာသား ၅ ဦးကို တလအကြာမှာ သေဆုံးလျက်ပြန်တွေ့ခဲ့တယ်လို့ သိရပါတယ်။

သူတို့ ၅ ဦးကို ဧပြီလ ၂၅ ရက်မနေ့ကနေ့လယ်ပိုင်းက မံဟဲရွာနဲ့ ၈ မိုင်ခန့်အကွာ မော်လူးမြို့တောင်ဘက် တောထဲမှာ အပိုင်းပိုင်းခုတ်ဖြတ်ပြီး မီးရှို့ခံထားရတဲ့အနေအထားနဲ့ ပြန်တွေ့ခဲ့တာလို့ Indaw Revolution-IR တာဝန်ရှိသူက ပြောပါတယ်။

“သူတို့ဖမ်းဆီးခံရပြီး ပျောက်နေတာတနယ်လုံးနီးပါး သိကြတယ်။ မနေ့ကကျတော့ တောထဲသွားတဲ့ ပြည်သူတဦးက တွေ့ပြီး အကြောင်းကြားလို့ မိသားစုဝင်တွေက သွားကြည့်ကြတာ။ ဟိုရောက်တော့ ကြွင်းကျန်ရစ်တဲ့ပစ္စည်းတွေ တွေ့ရလို့ သူတို့ဆိုတာအတည်ပြုလို့ရခဲ့တာ။ ကျန်ရှိတဲ့ အပိုင်းအစတွေကိုတော့ မိသားစုဝင်တွေက ပြန်သယ်လာပြီး”လို့ ပြောပါတယ်။

ဒေသခံတွေဘက်က ပေးပို့လာတဲ့ ပုံတွေထဲမှာတော့ အသတ်ခံထားရသူအချို့မှာ ခြေ၊ လက်တွေပြတ်ပြီး ကိုယ်ခန္ခာတခုလုံးမှာလည်း မီးလောင်ကျွမ်းထားတာကို တွေ့ရပါတယ်။

အသက် ၂၅ နှစ်အရွယ် ကိုညီညီနဲ့ ကိုလောရှုပ်၊ ၃၈ နှစ်အရွယ် ကိုအောင်မင်းသိုက်နဲ့ ကိုနေလင်းထွန်း၊ ၄၈ နှစ်အရွယ် ကိုဖိုးရှမ်းတို့ဖြစ်ပြီး၊ သူတို့ကို ပြီးခဲ့တဲ့ မတ်လ ၂၄ ရက်မှာ ရွာကိုစစ်ကြောင်းထိုး ဝင်ရောက်လာတဲ့ စစ်ကောင်စီတပ်သားတွေက ဖမ်းသွားခဲ့တာပါ။

ဖမ်းဆီးသတ်ဖြတ်ခံရသူတွေဟာ နိုင်ငံရေးနဲ့ပတ်သက်သူတွေမဟုတ်ဘဲ သာမန်ရွာသားတွေသာ ဖြစ်သလို၊ စစ်အုပ်စုက ရွာကိုဝင်ချိန်မှာ အမျိုးသား၊ အမျိုးသမီးအပါ လူ ၂၀ လောက်ဖမ်းဆီးခဲ့ပေမယ့် ရွာက ပြန်ထွက်ချိန်ကျမှာတော့ အထက်ပါအမျိုးသား ၅ ဦးကိုသာ လူသားဒိုင်းအဖြစ် ဖမ်းဆီးသွားခဲ့တာလို့ ဒေသခံတွေက ပြောပါတယ်။

သူတို့ရဲ့ နာရေးကို ကျန်ရှိနေတဲ့ မိသားစုဝင်တွေက ဒေသဓလေ့ထုံးစံအတိုင်း ပြုလုပ်ဖို့စီစဥ်နေကြတယ်လို့ သိရပါတယ်။

ပြီးခဲ့တဲ့မတ်လအတွင်းမှာလည်း အင်းတော်မြို့နယ်ထဲမှာ မြို့နယ် ပကဖ အဖွဲ့ဝင် ၂ ဦးအဖမ်းခံရပြီးနောက် CDM ဆရာမ ၃ ဦးအပါအဝင် ဒေသခံ ၂၀ ကျော်ကိုလည်း PDF ထောက်ပံသူတွေလို့ဆိုကာ စစ်ကောင်စီတပ်သားတွေက ဖမ်းဆီးခဲ့ပါသေးတယ်။

စာတည်း – လင်း

ကန့်ဘလူ၊ မတ် ၂၄၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ထန်းကုန်းတိုက်နယ်၊ ညောင်ဇင်ကြီးရွာက နေအိမ်တွေကို စစ်ကောင်စီတပ်တွေက မီးရှို့ဖျက်ဆီးသွားတဲ့အပြင် ဘုန်းကြီးတပါးကိုလည်း ဖမ်းသွားတယ်လို့ ဒေသခံတွေဆီက သိရပါတယ်။

မတ်လ ၂၃ ရက်မနေ့က ညနေ ၄ နာရီခွဲလောက်မှာ စစ်သားနဲ့ပျူစောထီး ပူးပေါင်းတပ်ဖွဲ့ဟာ အင်အား ၁၅၀ နီးပါးနဲ့ ညောင်ဇင်ကြီးရွာထဲကို လက်နက်တွေပစ်ခတ်ပြီး ဝင်ရောက်လာကာ ရွာထဲက နေအိမ်တွေကို မီးရှို့ခဲ့တာလို့ ကျွန်းလှတက်ကြွလှုပ်ရှားသူများအဖွဲ့မှ တာဝန်ရှိသူတဦးက ပြောပါတယ်။

“အခုလောလောဆယ် စစ်ကြောင်းတွေက မရှင်းသေးတဲ့အတွက် အိမ်ခြေဘယ်လောက် မီးထဲပါသွားလဲ မသိရသေးပါဘူး။ ရွာသားတွေလည်း ရွာထဲဘယ်သူမှ မဝင်ရဲသေးပါဘူး။ ညောင်ဇင်ကြီးရွာက အခုမှ ပထမအကြိမ် မီးရှို့ခံရတာပါ” လို့ ပြောပါတယ်။

ရွာကိုမီးရှို့ပြီး ညနေ ၅ နာရီလောက်မှာတော့ ညောင်ဇင်ကြီးရွာနဲ့ တမိုင်ခွဲလောက်ဝေးတဲ့ ညောင်ဇင်လေးရွာထဲကို ပြန်လည်ဝင်ရောက်သွားတယ်လို့ အထက်ပါတာဝန်ခံက ဆက်ပြောပါတယ်။

“ရွာထဲက ဘုန်းကြီးတပါးကိုလည်း ဖမ်းခေါ်သွားတယ်။ နောက်ပြီး စိတ်ကျန်းမာရေးမကောင်းတဲ့ အသက် ၂၀ အရွယ် ကောင်လေးတဦးကိုလည်း သတ်ဖြတ်ပြီးတော့ မီးရှို့သွားတယ်လို့ ကျနော်တို့ ကြားသိရတယ်။ ရွာထဲက ပစ္စည်းတချို့ကိုယူပြီးတော့ ညောင်ဇင်လေးရွာထဲကို ဝင်သွားတယ်။ ညောင်ဇင်လေးရွာက ပျူအထိုင်ချထားတဲ့ ရွာပါ” လို့ ဆိုပါတယ်။

ဖမ်းဆီးသတ်ဖြတ်ခံရသူတွေနဲ့ပတ်သက်တဲ့ အသေးစိတ်အချက်အလက်တွေကိုတော့ မြေလတ်အသံက ဆက်လက်စုံစမ်းနေဆဲပါ။

ခုလို ရွာကိုမီးရှို့ဖျက်ဆီးသွားတဲ့ စစ်ကောင်စီတပ်ဖွဲ့ဟာ မတ်လ ၂၂ ရက်က ဆူးပုတ်ကုန်းရွာဘုန်းကြီးကျောင်းမှာ ပုန်းရှောင်နေတဲ့ သက်ကြီးရွယ်အိုတွေဆီကနေ ရွှေ၊ ငွေ၊ ဖုန်း၊ ဆိုင်ကယ်တွေနဲ့ နွားအကောင် ၄၀ ကျော်ကို ယူသွားတဲ့အဖွဲ့ ဖြစ်တယ်လို့လည်း ဆိုပါတယ်။

ခုလိုစစ်တပ်က စစ်ကြောင်းထိုးမီးရှို့လို့ ကန့်ဘလူခရိုင်ထဲက ဆူးပုတ်ကုန်း၊ ဘိုကုန်း၊ ဘိုတဲကုန်း၊ မကုန်း၊ ညောင်ဇင်ကြီး၊ ပေလည်နဲ့ သရက်ခေါင်းရွာ စတဲ့ကျေးရွာက ဒေသခံပြည်သူတသောင်းနီးပါး ထွက်ပြေးတိမ်းရှောင်နေရတယ်လို့ ကျွန်းလှတက်ကြွလှုပ်ရှားသူများအဖွဲ့က ထုတ်ပြန်ထားပါတယ်။

စာတည်း – လင်း

မကွေး၊ ဒီဇင်ဘာ ၂၉၊ ၂၀၂၂။

မကွေးတိုင်းဒေသကြီး၊ ပခုက္ကူမြို့နယ်၊ မြေနီတွင်းကျေးရွာက ဒေသခံ ၅ ဦးကို ပျူစောထီးစစ်ကြောင်းက ကျေးရွာထဲကနေ ဖမ်းခေါ်သွားတယ်လို့ သိရပါတယ်။

ဒီဇင်ဘာလ ၂၈ ရက်မနေ့ကညနေ ၃ နာရီခန့်မှာ ပျူစောထီးအင်အား ၅၀ ကျော်ရှိတဲ့စစ်ကြောင်းဟာ အောင်သာကျေးရွာဘက်ကနေ စစ်ကြောင်းထိုးလာပြီး မြေနီတွင်းကျေးရွာအနီးက ယာခင်းထဲမှာရှိနေတဲ့အမျိုးသား ၅ ဦးကို ဖမ်းဆီးသွားတာလို့ ဒေသခံတဦးက ပြောပါတယ်။

“မနေ့က အဲဒီဘက်ရွာခြမ်းကို အောင်သာနဲ့ဇီးကုန်းဘက်က ပျူစစ်ကြောင်းဝင်လာခဲ့တာ။ သူတို့လာတော့ ရွာသားအချို့ကပြေးကြတယ်။ ခု ဖမ်းခံလိုက်ရတဲ့သူတွေက သူတို့နဲ့မဆိုင်ဘူး။ ဘာမှ မလုပ်လောက်ဘူးဆိုပြီး ရွာထဲကျန်နေတာ။ အဲဒါကို ပျူစစ်ကြောင်းက ဖမ်းသွားတာ။ သူတို့ကို ဖမ်းပြီးတာနဲ့ပြန်ထွက်သွားတယ်” လို့ ပြောပါတယ်။

ဖမ်းဆီးခံရသူတွေဟာ အသက် ၂၀ ဝန်းကျင်အရွယ်တွေဖြစ်တဲ့ မောင်ဆန်းလင်းအောင်၊ မောင်နေသူလွင်၊ မောင်ဇော်ဇော်ဌေး၊ ဖြိုးရန်နိုင်နဲ့ အသက် ၅၀ ကျော်အရွယ်ရှိ ဦးကောင်းဟန်တို့ဖြစ်တယ်လို့ ဆိုပါတယ်။

ဖမ်းဆီးသွားတဲ့သူတွေကို ပျူစောထီးစစ်ကြောင်းက အောင်သာကျေးရွာဘက်ကိုခေါ်သွားပြီး နှိပ်စက်စစ်ဆေးမှုတွေလုပ်နေလို့ မိသားစုဝင်တွေက စိုးရိမ်နေကြတယ်လို့ သိရပါတယ်။

ပခုက္ကူနယ်ဘက်က ရွာတွေမှာ စစ်ကောင်စီတပ်တွေနဲ့ပျူစောထီးအဖွဲ့တွေက ကျေးရွာတွေဘက်ကို စစ်ကြောင်းထိုးချိန် ဒေသခံတွေကို မကြာခဏ ဖမ်းဆီးစစ်ဆေးတာတွေရှိနေပြီး အချို့ကိုတော့ ပြန်လွှတ်ပေးတာတွေရှိခဲ့ပေမယ့် အချို့ကိုတော့ ပုဒ်မတပ် ထောင်ချထားတွေ ရှိနေတာပါ။

ဒါ့အပြင်ပြီးခဲ့တဲ့ ဒီဇင်ဘာလ ၁၆ ရက်မှာလည်း ရန်ကုန်ကနေ ခရီးသည်တင်ကးနဲ့လိုက်ပါလာတဲ့ အသက် ၂၀ နဲ့ ၂၅ ဝန်းကျင်ရှိအမျိုးသား ၄ ဦးကို ဒရုန်းသင်တန်းပေးဖို့လာတဲ့သူတွေလို့ စွပ်စွဲပြီး ပခုက္ကူမြို့နယ်၊ ဧရာဝတီတံတား (ပခုက္ကူ)ပေါ်မှာ စစ်ကောင်စီတပ်သားတွေက ဖမ်းဆီးခဲ့ပါသေးတယ်။