ထွက်ပြေးတိမ်းရှောင်

ခင်ဦး၊ ဧပြီ ၁၉၊ ၂၀၂၃။

စစ်ကိုင်းတိုင်း၊ ခင်ဦးမြို့နယ်ကို စစ်ကောင်စီတပ်က ၂ရက်ဆက်တိုက် စစ်ကြောင်းထိုးကာ လက်နက်ကြီး၊ လက်နက်ငယ်တွေနဲ့ ကျေးရွာတွေဘက်ကို ပစ်ခတ်နေတာကြောင့် ဒေသခံ ၅၀၀၀ ခန့်ထွက်ပြေးနေကြရတယ်လို့ သိရပါတယ်။

အင်အား ၁၀၀ ကျော်ပါတဲ့ စစ်ကောင်စီတပ်သားတွေဟာ ဧပြီလ ၁၈ ရက်မှာ တကြိမ်၊ ၁၉ ရက် ဒီမနက်မှာ တကြိမ် မြကန်ရွာ၊ အင်းပတ်ကွေ့ရွာ၊ မြင်းဒေါင်းကျေးရွာတွေကို စစ်ကြောင်းထိုးဝင် ရောက်ကာ အနီးပတ်ဝန်းကျင်တွေကို လက်နက်ကြီးတွေနဲ့ ပစ်ခတ်နေတာကြောင့် အခုလို ထွက်ပြေးနေကြရတာဖြစ်တယ်လို့ ခင်ဦးမြို့နယ် သတင်းမှန်ပြန်ကြားရေးအဖွဲ့မှ တာဝန်ခံက ပြောပါတယ်။

မနေ့က စစ်ကောင်စီတပ်တွေက ရွာတွေထဲပစ်ခတ်မှုတွေလုပ်တာကြောင့် ထွက်ပြေးသွားရတဲ့ဒေသခံတွေ ကိုယ့်အိမ်ကိုယ် မပြန်ရသေးခင်မှာ နောက်ထပ်ကျေးရွာတွေက ဒေသခံတွေကပါ ထပ်မံထွက်ပြေးနေရတာ ဖြစ်ပါတယ်။

“အခုက စစ်ကြောင်းက မြကန်၊ မြင်းဒေါင်းရွာဘက်ကို ရောက်နေပြီ။ လက်နက်ကြီးတွေ ဆက်တိုက်ပစ်တယ်။ ပြေးနေရသူတွေကို ထမင်းထုပ်ဝေငှဖို့ရာ အခက်အခဲဖြစ်နေတယ်။ နေဖို့နေရာရယ်ပေါ့” လို့ ခင်ဦးမြို့နယ် သတင်းမှန်ပြန်ကြားရေးအဖွဲ့မှ တာဝန်ခံက ဆိုပါတယ်။

ထွက်ပြေးတိမ်းရှောင်နေကြရတဲ့ ဒေသခံ ၅၀၀၀ ခန့်ဟာ မြကန်၊ အင်းပတ်ကျေးရွာ၊ အင်တိုင်လေး (တောင်/မြောက်)ရွာ၊ သရက်ပင်စု၊ မြင်းဒေါင်း၊ မကျီးအုပ်ကျေးရွာတွေကဖြစ်ပြီး ဒီကျေးရွာတွေဟာ စစ်ကောင်စီတပ်ရဲ့ စစ်ကြောင်းထိုးပစ်ခတ်တာတွေကို မကြာခဏ ခံနေရတဲ့ ကျေးရွာတွေဖြစ်တယ်လို၌ ဒေသခံတွေဆီက သိရပါတယ်။

“အခုကျနော်တို့ရွာဘက်တွေမှာလည်း လက်နက်ကြီးတွေလာကျလို့ ထွက်ပြေးနေရတာ။ ရွာ ၅ ရွာကျော်ရှိမယ်၊ ပြေးနေရတာ။ မနက်စာတွေလည်း မစားကြရသေးဘူး။ တိုက်ပွဲဖြစ်နေလား၊ ဘာကြောင့်လည်းတော့ မသိဘူး” လို့ လက်ရှိ ကိုယ်တိုင်ထွက်ပြေးနေရတဲ့ သရက်ပင်စုကျေးရွာသားတဦးက ပြောပါတယ်။

ထွက်ပြေးနေကြရတဲ့ ဒေသခံ ၅၀၀၀ ခန့်မှာ အဝတ်အထည်၊ စားနပ်ရိက္ခာတွေ အရေးပေါ်လိုအပ်လျှက်ရှိနေတယ်လို့ ခင်ဦးမြို့နယ် သတင်းမှန်ပြန်ကြားရေးအဖွဲ့ရဲ့ တာဝန်ခံက ပြောပါတယ်။

ခင်ဦးမြို့နယ်ထဲက ကျေးရွာတွေကို လက်ရှိစစ်ကြောင်းထိုးနေတဲ့ စစ်ကောင်စီတပ်သားတွေဟာ ရေဦးမြို့နယ်၊ တိုင်းရင်းဆေးရုံမှာ အထိုင်ချထားတဲ့ အင်အား ၁၀၀ ကျော်ရှိတဲ့ စစ်ကြောင်းဖြစ်တယ်လို့ သိရပါတယ်။

စာတည်း – လင်းဇေ

ပေါက်၊ မတ် ၁၆၊ ၂၀၂၃။

မကွေးတိုင်းဒေသကြီး၊ ပေါက်မြို့နယ်အတွင်း စစ်ကောင်စီက လက်နက်ကြီးတွေနဲ့ ပစ်ခတ် စစ်ကြောင်းထိုး ဖမ်းဆီးဖျက်ဆီးနေလို့ ဒေသခံတွေ ထွက်ပြေးတိမ်းရှောင်နေကြရတယ်လို့ သိရပါတယ်။

ကျေးရွာတွေထဲက ပစ္စည်းတွေ မွှေနှောက်ရှာဖွေ ယူဆောင်တာ ဖမ်းဆီးခေါ်ဆောင်ပြီး လူသားဒိုင်းအဖြစ် ခေါ်ဆောင်နေတာတွေ နေ့စဉ်ဆိုသလို လုပ်နေတာကြောင့် တိမ်းရှောင်သူတွေ များပြားလာတာလို့ သိရပါတယ်။

“စစ်ဘေးရှောင်ရွာသားတွေက ခြောက်ထောင်ကျော်လောက်ရှိမယ်။ ဖြစ်သလိုနေ ဖြစ်သလိုစားနဲ့ နေရတာ။ အမိုးအကာလည်း လုံခြုံမှုမရှိပါဘူး။ စစ်ကြောင်းဝင်လာတာနဲ့ ဘေးလွတ်ရာ ကူညီပြောင်ပေးနေရတယ်။ ညပိုင်း ကင်းစောင့်ရတာပေါ့။ ပြည်သူတွေအတွက် အကူအညီလိုအပ်နေတာက အများကြီးပါ” လို့ ပေါက်မြောက်ပိုင်းကာကွယ်ရေးတပ်ဖွဲ့ဝင် ဗိုလ်လရောင်က မြေလတ်အသံကို ပြောပါတယ်။

အင်အား ၅၀ နဲ့ ၁၀၀ ကြားရှိ စစ်ကောင်စီတပ်ဖွဲ့ဝင်တွေက မတ်လ ၉ ရက်နေ့ကနေ ၁၅ ရက်နေ့အထိ ကျေးရွာနေအိမ်တွေကို မီးရှို့တာ၊ စစ်ကြောင်းထိုး လက်နက်ကြီးနဲ့ ပစ်ခတ်တာတွေကြောင့် ဒဏ်ရာရတာ သေဆုံးတာတွေရှိနေတယ်လို့ သိရပါတယ်။

လက်ရှိမှာတော့ အုန်းတောတောင်စု၊ မြောက်စု၊ ကမ်းပြို၊ မုန်းတော၊ ဆူးလေကုန်း၊ အင်ပင်၊လယ်ဘဲ့၊ သီးချောက်၊ မြို့ခင်းသာ၊ ရေတိမ်၊ ချိုင်ဇောက်အုပ်စု ရွာများမှ ဒေသခံ ၆၀၀၀ ကျော်ဟာ စစ်ကောင်စီတပ်ဖွဲ့တွေရဲ့ ဘေးကနေ လွတ်ရာ တောတွင်းတွေထဲမှာ ရှောင်ပုန်းနေရလို့ နေရာထိုင်ခင်းနဲ့ အစားအစာအခက်ခဲတွေလည်း ရှိနေတယ်လို့ ဆိုပါတယ်။

စာတည်း – 007

ယင်းမာပင်၊ မတ် ၁၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်ထဲက ကုန်းရွာနေအိမ်တွေကို စစ်ကောင်စီတပ်က မီးရှို့နေလို့ ဒေသခံ ၁ သောင်းခန့် ထွက်ပြေးတိမ်းရှောင်နေရတယ်လို့ Bo Thurain-Yinmabin PDF တပ်ရင်းဆီက သိရပါတယ်။

စစ်ကောင်စီတပ်ဖွဲ့တွေဟာ အင်အား ၁၃၀ ‌နီးပါးနဲ့ ယင်းမာပင်မြို့နယ် ကုန်းရွာက နေအိမ်တွေကို ဖေဖော်ဝါရီလ ၂၈ ရက် ညပိုင်း ၇ နာရီအချိန်ကစလို့ ‌မီးရှို့နေတယ်လို့ ဆိုပါတယ်။

“စစ်ကောင်စီတပ်သားတွေက ဝါးရုံတောထဲကနေလာပြီး ကျွန်းတော၊ မြင်သာကုန်းကနေ ကုန်းရွာဘက်ကိုဝင်လာတာ၊ ရွာရဲ့အနောက်ဘက်က နေအိမ်တွေဖျက်ဆီးပြီး မီးတွေရှို့တယ်၊ ကုန်းရွာရွာမကြီးထဲကတော့ အိမ်‌ခြေ ၈၀၀ လောက်ရှိတယ်၊ စတင်မီးရှို့တာက ည ၇ နာရီမှာမီးရှို့တာ၊ လက်ရှိအချိန်အထိ စစ်**တွေက ရွာကနေအိမ်တွေကို မီးရှို့နေလို့ အိမ်ဘယ်လောက်မီးထဲပါတာအတည်မပြုနိုင်သေးဘူး၊ ကုန်းရွာ ဒေသခံ ၁ သောင်းကျော်ထွက်ပြေးနေရတယ်” လို့ ဗိုလ်သူရိန်က ပြောပါတယ်။

စစ်ကောင်စီစစ်ကြောင်းက ဒီကနေ့မနက်(မတ်လ ၁ ရက်)အထိ မထွက်သေးပဲ ကုန်းရွာကိုထပ်မံမီးရှို့နေပြီး စစ်ကောင်စီစစ်ကြောင်းထိုးနေလို့ ကုန်းရွာ၊ ရုန်းလေးပင်ရွာ၊ ပေါက်ပန်းဖြူရွာ၊ ဇီးတောရွာက ဒေသခံတွေ ထွက်ပြေးတိမ်းရှောင်နေရတယ်လို့ သိရပါတယ်။

အဲဒီစစ်ကြောင်းက ယင်းမာပင်မြို့နယ်ထဲက ထန်းတောကြီးရွာကို စစ်ကြောင်းထိုးလာပြီး ပုလဲဘက်ကလာတဲ့ စစ်ကြောင်းလို့ သိရပါတယ်။

ရွှေဘို၊ ဖေဖော်ဝါရီ ၂၅၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်ထဲက ကျေးရွာတွေဘက်ကို စစ်ကောင်စီတပ်က လက်နက်ကြီးနဲ့ ပစ်ခတ်လို့ ကျေးရွာ ၇ ရွာထက်မနည်း ထွက်ပြေးတိမ်းရှောင်နေရတယ်လို့ ဒေသခံတွေဆီက သိရပါတယ်။

စစ်ကောင်စီတပ်ဖွဲ့တွေဟာ အင်အား ၁၀၀ ‌နီးပါးနဲ့ ခင်ဦးမြို့‌ပေါ်မှာ အခြေချထားပြီး ဖေဖော်ဝါရီ ၂၅ ရက် ဒီနေ့ နေ့လယ် ၁၂ နာရီခွဲလောက်မှာတော့ မြို့ပေါ်ကနေ ခြေလျင်နဲ့ ထွက်လာပြီး လက်နက်ကြီးတွေနဲ့ စတင်ပစ်ခတ်ခဲ့တယ်လို့ ဆိုပါတယ်။

အခုလို ကျေးရွာတွေဘက်ကို လက်နက်ကြီးတွေနဲ့ ပစ်ခတ်ခဲ့လို့ ကျေးရွာ ၇ ရွာနီးပါးက ဒေသခံပြည်သူ ၉ ထောင်ကျော်ဟာ ထွက်ပြေးတိမ်းရှောင်နေရတယ်လို့ ခင်ဦးမြို့နယ်သတင်းမှန်ပြန်ကြားရေးမှ တာဝန်ခံတဦးက မြေလတ်အသံကို ပြောပါတယ်။

“စစ်ကောင်စီက တပ်ရင်းတပ်မ ဘယ်လောက်ကလဲဆိုတာ မသိရသေးပါဘူး။ ခင်ဦးနယ်ထဲရောက်နေတာကတော့ ၂ ပတ်ကျော်ပါပြီ။ မြို့ပေါ်ရောက်နေတာ ၂ ရက် ရှိပါပြီ။ အခုက အနောက်ဘက် သူတို့လာခဲ့တဲ့ ရေဦးမြို့ဘက် ပြန်ခေါက်ဖို့ စစ်ကြောင်းထိုးနေတာပါ” လို့ ဆိုပါတယ်။

အခုလို ခင်ဦးမြို့ အနောက်ဘက်မှာရှိတဲ့ ကျေးရွာတွေဘက်ကို စစ်ကောင်စီက လက်နက်ကြီးတွေနဲ့ ရမ်းသမ်းပစ်ခတ်နေလို့ ကံသာယာရွာ၊ ကံသစ်ရွာ၊ ဌက်ပျော်ရွာ၊ ဗအိုးရွာ၊ အင်တိုင်ကြီးရွာ၊ စည်ပုတ္တရွာနဲ့ အနီးနားကျေးရွာက ပြည်သူတွေပါ ထွက်ပြေးတိမ်းရှောင်နေကြရတယ်လို့ အထက်ပါ တာဝန်ခံက ဆက်ပြောပါတယ်။

“သူတို့ ဗအိုးရွာထဲကို လက်နက်ကြီးတွေ ပစ်ပြီး ဝင်နေတယ်။ စစ်ကြောင်းထွက်ရင်း လမ်းကြောင်းရှင်းတဲ့ သဘောနဲ့ ရမ်းပစ်နေတာ အခုလည်း ဗအိုးရွာထဲက နေအိမ်တွေကိုလည်း ဖျက်ဆီးတာတွေ လုပ်နေတယ်။ ထွက်ပြေးနေရတဲ့ ရွာတွေက တရွာနဲ့တရွာ ပေ ၂ ထောင်လောက်ပဲ ဝေးကြတာ” လို့လည်း ဆိုပါတယ်။

အခုလက်ရှိအချိန်ထိ စစ်ကောင်စီစစ်ကြောင်းဟာ ကျေးရွာရဲ့ အနီးနားတဝိုက်မှာ ရှိနေသေးတဲ့အတွက် ဒေသခံပြည်သူတွေဟာ ကျေးရွာထဲကို ဝင်ရောက်နေထိုင်ခြင်း မရှိသေးဘူးလို့ သိရပါတယ်။

ဖေဖော်ဝါရီ ၂၄ ရက်ကလည်း အဲဒီစစ်ကြောင်းဟာ ခင်ဦးမြို့ပေါ်က အောင်ချမ်းသာရပ်ကွက်မှာ နေထိုင်တဲ့ မိသားစုဝင်တချို့နဲ့ လူလတ်ပိုင်း အမျိုးသား ၁၀ ဦးထက်မနည်း မြို့ပေါ်ကို ဖမ်းဆီးခေါ်ဆောင်သွားပြီး ယနေ့ထိ ပြန်လွှတ်မပေးသေးဘူးလို့ ခင်ဦးမြို့နယ် သတင်းမှန်ပြန်ကြားရေး Page မှထုတ်ပြန်ထားပါတယ်။

စစ်ကိုင်း၊ ဒီဇင်ဘာ ၂၇၊ ၂၀၂၂။

စစ်ကိုင်းတိုင်း၊ ချောင်းဦးမြို့နယ်၊ ကံကြီးကုန်းရွာအနီး စစ်ကောင်စီတပ်ဖွဲ့ဝင်တွေနဲ့ ဒေသခံပြည်သူ့ကာကွယ်ရေးတပ်ဖွဲ့တွေအကြား ဒီဇင်ဘာလ ၂၅ ရက်နေ့ကစတင်တိုက်ပွဲဖြစ်ပွားခဲ့ပြီး တိုက်ပွဲအနီးအနားဝန်းကျင် ကျေးရွာ ၇ ရွာက ဒေသခံနှစ်ထောင်နီးပါး အိုးအိမ်စွန့်ခွာ ထွက်ပြေးနေရပြီး အကူအညီတွေလိုအပ်နေတယ်လို့ Chaung U Revolution ကသိရပါတယ်။

ဆီပန်းကန်၊ ရွှေကူ၊ ငွေသာ၊ ကုန်းသာ၊ အမြင့်၊ နဂါးဘို၊ တောကျောင်းလေးအစရှိတဲ့ ရွာတွေက ဒေသခံတွေအကုန် ထွက်ပြေးတိမ်းရှောင်နေရတာပါ။ ဒီဇင်ဘာ ၂၅ ရက်နေ့ညနေ ၆ နာရီဝန်းကျင်မှာ တိုက်ပွဲဖြစ်ပွားခဲ့ပြီး မနေ့ကဒီဇင်ဘာ၂၆ ရက်နေ့ထိ စစ်ကောင်စီတပ်ကရွာတွေအပေါ်မှာ တိုက်လေယာဉ်တွေ ပျံဝဲခဲ့တယ်လို့ Chaung U Revolution တာဝန်ရှိသူတဦးကဆိုပါတယ်။

“လေယာဉ်တွေပတ်တာ နှစ်နာရီလောက်ကြာတယ်။ တိုက်ပွဲမှာတော့ ဒေသခံတွေ ထိခိုက်ဒဏ်ရာရတာမရှိဘူး။အကုန်တော့ပြေးနေရတယ်” လို့ ဆိုပါတယ်။

ချောင်းဦးမြို့နယ်အတွင်းက ရှေးဟောင်းဇုန်သတ်မှတ်ထားတဲ့ ရှေးဟောင်းအမြင့်မြို့ပတ်လည်ကို စစ်ကောင်စီက ဒီဇင်ဘာ ၂၄ ရက်နေကစပြီး MI35 ရဟတ်ယာဉ်နဲ့ လှည့်ပတ်ပစ်ခတ်တာတွေပြုလုပ်သေးတယ်လို့ သူကဆက်ပြောပါတယ်။

ကုလသမဂ္ဂ လူသားချင်းစာနာမှုဆိုင်ရာ ပေါင်းစပ်ညှိနှိုင်းရေးမှူးရုံး (UNOCHA) ရဲ့ ဒီဇင်ဘာလ ၃ ရက်နေ့ထိ စာရင်းတွေအရ အာဏာသိမ်းပြီးနောက် မလုံခြုံမှုနဲ့ ပဋိပက္ခတွေကြောင့် စစ်ကိုင်းတိုင်းက ဒေသခံ ခြောက်သိန်းကျော် အိုးအိမ်စွန့်ခွာ ထွက်ပြေးနေရတယ်လို့ သိရပါတယ်။