ဆိုင်ကယ်

အင်းတော်၊ မတ် ၉၊ ၂၀၂၃။

စစ်ကိုင်းတိုင်း၊ အင်းတော်မြို့နယ် နဘားကျေးရွာလမ်းစုံမှာ ငွေကြေးကောက်ခံနေတဲ့ စစ်ကောင်စီတပ်ဖွဲ့ဟာ ခရီးသွားနေတဲ့ ပြည်သူတချို့ကို သံသယရှိလို့ဆိုပြီး သူတို့ရဲ့လက်ကိုင်ဖုန်း ၈ လုံးကို သိမ်းသွားတဲ့အပြင် ရဟန်းတွေကို ဆွမ်းချိုင့်ပို့နေတဲ့ ဆိုင်ကယ် ၆ စီးကိုလည်း ဖမ်းဆီးထားတယ်လို့ ဒေသခံတွေဆီက သိရပါတယ်။

မတ်လ ၇ ရက်နေ့မှာ စစ်ကောင်စီစစ်ကြောင်းဟာ အင်အား ၁၀၀ နီးပါးနဲ့ နဘားကျေးရွာ လမ်းဆုံမှာ အထိုင်ချထားပြီး လမ်းသွားလမ်းလာပြည်သူတွေဆီကနေ မတရားငွေကြေးကောက်ခံမှုတွေ ပြုလုပ်ပြီး သိမ်းဆည်းထားတဲ့ ပစ္စည်းတွေကိုလည်း ပြန်လည်ပေးဆောင်တာမျိုး မရှိကြောင်းကိုလည်း Indaw Revolution (IR) တပ်ဖွဲ့ဝင်တဦးက ပြောပါတယ်။

“ခရီးသွားသူတွေဆီက ဖုန်းတွေ သိမ်းတယ်။ ထားခဲ့ရမယ်ဆိုပြီး ပြောတယ်။ ပြီးတော့ ပြန်မပေးဘူး။ အဖမ်းခံရတဲ့ ဆိုင်ကယ် ၆ စီးကလည်း နဘားရွာ စမော်တောင်မှာ ဆွမ်းချိုင့်ပို့နေတဲ့ ဘုန်းကြီးတွေရဲ့ဆိုင်ကယ်ပါ။ အခုထိလည်း ဆိုင်ကယ်တွေ ပြန်မရသေးပါဘူး” လို့ ဆိုပါတယ်။

PDF ဟန်ဆောင်ထားတဲ့ စစ်ကောင်စီစစ်ကြောင်းဟာ အင်းတော်မြို့နယ်ထဲက နားရခေါင်ရွာ နဲ့ နဘားရွာတွေကို တလှည့်စီဂိတ်ချပြီး ငွေကြေးကောက်ခံနေသလို ကောက်ခံရတဲ့ငွေကြေးနဲ့ ဆိုင်ကယ်တွေကို အင်းတော်မြို့ပေါ်ကို ပြန်လည်ယူဆောင်သွားတယ်လို့ အထက်ပါ တပ်ဖွဲ့ဝင်က ပြောပါတယ်။

“ခရီးသွားတွေက အခုမှ စစ်**လို့သိတာ။ အရင်ရက်တွေတုန်းကဆို ရွာသားတွေက သူတို့ကို PDF လို့ထင်နေတာ။ သူတို့ပုံစံက စစ်ကောင်စီနဲ့မတူဘဲ PDF ပုံစံမျိုး၊ ယူနီဖောင်းတွေကအစ PDF တွေဝတ်ထားတဲ့ ယူနီဖောင်းပုံစံတွေလိုမျိုး ဝတ်ထားကြတာ။ ခရီးသွားတွေဆီကနေ သိမ်းထားတဲ့ ပစ္စည်းတွေကိုလည်း သုံးဘီးဆိုင်ကယ်တွေနဲ့ အမျိုးသမီးတွေက လာယူသွားကြတယ်” လို့ ဆိုပါတယ်။

စစ်ကောင်စီတပ်ဖွဲ့တွေဟာ PDF ဟန်ဆောင်ပြီး ခရီးသွားပြည်သူတွေဆီကနေ ငွေကြေးကောက်ခံနေတာဟာ ဖေဖော်ဝါရီလကုန်ပိုင်းလောက်ကတည်းက စတင်ခဲ့ပြီး ဒီနေ့အထိလည်း ကောက်ခံနေဆဲဖြစ်ကာ ဂိတ်နောက်မှာလည်း ဗုံးခိုကျင်းတူးထားပြီး လုံခြုံရေးတွေယူထားတယ်လို့ သိရပါတယ်။

စာတည်း – 007

ပဲခူး၊ ဒီဇင်ဘာ ၂၂၊ ၂၀၂၂။

ပဲခူးတိုင်းဒေသကြီး၊ အနောက်ခြမ်းဖြစ်တဲ့ မိုးညို၊ နတ်တလင်း၊ ကြို့ပင်ကောက်၊ အုတ်ဖို၊ ဇီးကုန်း၊ ပေါင်းတည်မြို့နယ်တွေမှာ ရဲ၊ စစ်တပ်၊ ယာဥ်ထိန်းပေါင်းပြီး ဆိုင်ကယ်စီးသူတွေကို ငွေတောင်းကြမ်းနေလို့ ဒေသခံတွေ ခက်ခဲနေတယ်လို့ သိရပါတယ်။

စစ်ကောင်စီတပ်သား၊ ရဲနဲ့ယာဥ်ထိန်းတွေဟာ မြို့တွေရဲ့ လမ်းဆုံလမ်းခွတွေအပါအဝင် ကျေးရွာဘက်ဆင်းတဲ့ လမ်းတွေမှာတောင် ပိတ်ဆို့စစ်ဆေးငွေတောင်းနေလို့ ဒေသခံကျေးရွာနေသူတွေဟာ မြို့ပေါ်တက် ထွက်ကုန်တွေရောင်းချဖို့တောင် ခက်ခဲနေကြတယ်လို့ မိုးညိုဒေသခံတဦးက ပြောပါတယ်။

“ကျွန်တော်တို့ မိုးညိုဘက်မှာဆို မနက် ၅ နာရီလောက်ကတည်းကနေ ညပိုင်းထိဖမ်းနေတာ။ ရွာဘက်က သူတွေ မြို့ပေါ်တက်စျေးတောင်မရောင်းရဲဘူး။ သူတို့နဲ့တွေ့ရင် တခုမဟုတ်တခုအကြောင်းရှာပြီး ငွေတောင်းတယ်။ ကျွန်တော်တောင် တခါ ဖမ်းခံထိတာ ၅၀၀၀၀ မိသွားတယ်။ ကိုယ်တွေ ရွာကလူတွေက အဲလောက်ပိုက်ဆံဆို တပတ်ကျော်လောက်စားလို့ရတယ်လေ။ သူတို့လုပ်မှ လူတွေက ကျီးလန့်စာစားနေရတယ်” လို့ ပြောပါတယ်။

ဆိုင်ကယ်တွေကို စစ်ဆေးချိန်မှာတော့ ယာဥ်လိုင်စင်၊ လူလိုင်စင်၊ ဦးထုပ်၊ ဘက်မှန်၊ နံပါတ်ပြား၊ လေပေါင်တင်းမတင်းတာကအစ စစ်ဆေးနေတယ်လို့ ဆိုပါတယ်။

စစ်ကောင်စီတပ်သား၊ ရဲနဲ့ယာဥ်ထိန်းတွေဟာ ဆိုင်ကယ်ဖမ်းဆီးချိန်မှာ အပြစ်တခုမဟုတ်တခုရှာပြီး ငွေတောင်းနေပြီး အနည်းဆုံးငွေကျပ် ၃၀၀၀၀ ကနေ ကျပ်တသိန်းထိ တောင်းကြတယ်လို့ ဆိုပါတယ်။

“သူတို့လုပ်တာက အခြေခံလူတန်းစားတွေကို ဒုက္ခပေးတာနဲ့တူတူဘဲ။ တမြို့နယ်ထဲလုပ်နေတာမဟုတ်ဘူး။ ပဲခူးအနောက်ခြမ်းမြို့နယ်အားလုံးမှာ တပုံစံတည်းလုပ်နေတာ။ ငွေတောင်းတယ်။ မပေးရင် ဆိုင်ကယ်သိမ်းတယ်။ ဒါက သူတို့ကံကြမ္မာကို သူတို့ဖန်တီးနေတာဘဲ။ ဒီလိုလုပ်လေ လူထုက သူတို့ကို မုန်းလေစိတ်နာလေဘဲ။ ဖမ်းခံထိတဲ့ အထဲမှာ စကစ ထောက်ခံသူ၊ ပါဝင်နေသူတွေတောင် ဖမ်းတာဘဲ။ ဖမ်းဆီးရေးတာဝန်ရှိတဲ့သူတွေက ငွေရဖို့တခုတည်းဘဲ ကြည့်တော့တာ”လို့ ပဲခူးတိုင်းဒေသကြီး ပြည်သူ့ကာကွယ်ရေးတပ်ဖွဲ့ တာဝန်ရှိသူတဦးက ပြောပါတယ်။

ပဲခူးတိုင်းအနောက်ခြမ်းက မြို့နယ်တွေမှာ စစ်ကောင်စီလက်အောက်ခံဌာနဆိုင်ရာရုံး၊ စစ်ကောင်စီခန့် အုပ်ချုပ်ရေးမှူးတွေ၊ စစ်ကောင်စီဂိတ်စခန်းတွေကို ဆိုင်ကယ်စီးနင်းလာသူတွေက ပစ်ခတ်တိုက်ခိုက်တာတွေ မကြာခဏခံနေရလို့ စစ်ကောင်စီဘက်က ဆိုင်ကယ်စီးသူတွေကို တင်းတင်းကြပ်ကြပ် စစ်ဆေးနေတာလို့ သိရပါတယ်။

ဒါအပြင် စစ်ကောင်စီတပ်သားတွေနဲ့ လက်အောက်ခံအဖွဲ့တွေကတော့ လုပ်ပိုင်ခွင့်ကို အသုံးချပြီး ကိုယ်ကျိုးအတွက် ငွေတောင်းကြမ်းနေတယ်လို့ ဆိုပါတယ်။