မန္တလေး၊ ဩဂုတ် ၂၉၊ ၂၀၂၅။

ငလျင်ဒဏ်ကြောင့် ပြိုကျပျက်စီးသွားတဲ့ မန္တလေး၊ Sky Villa အဆောက်အဦထဲမှာ သေဆုံးနေတဲ့ ရုပ်အလောင်း ၇ လောင်း ထပ်မံတွေ့ရှိခဲ့တယ်လို့ ဒေသခံတွေဆီက သိရပါတယ်။

ဩဂုတ် ၂၉ ရက် ဒီမနက်မှာ Sky Villa အဆောက်အဦထဲက အပျက်အစီးတွေအောက်မှာ ရှာဖွေရေးတွေလုပ်နေစဥ် အဆောင် A၊ အခန်းအမှတ် A 3 ထဲကနေ သေဆုံးနေတဲ့ အမျိုးသားအလောင်း ၂ လောင်းနဲ့ အမျိုးသမီး အလောင်း ၅ လောင်းထပ်မံတွေ့ရှိခဲ့ရတယ်လို့ ဆိုပါတယ်။

“A3 အခန်းတခုတည်းကပါ။ မနက် ၉ (နာရီ) ကနေ ၁၂ အတွင်းရှာတွေ့ထားတာ။ ရုပ်တွေတော့ မပြီပြင်တော့ဘူး။ အရိုးနဲ့အသားနဲ့အချို့လည်းအရိုးဘဲကျန်တော့တယ်”လို့ ဒေသခံတဦးက ပြောပါတယ်။

အပျက်အစီးရှင်းလင်းမှုတွေကို မြန်မာနိုင်ငံမီးသတ်၊ စည်ပင်သာယာနဲ့ဒေသလူမှုကူညီရေးအဖွဲ့အချို့က လုပ်ဆောင်နေတာဖြစ်ပြီး အဆောက်အဦထဲက အပျက်အစီးတွေကိုရှင်းလင်းနေတာမှာ ရာခိုင်နှုန်း တော်တော်များများပြီးစီးနေပြီး A အဆောင်ကိုရှင်းလင်းပြီးပါက ပြီးစီးပြီလို့ သူကဆက်ပြောပါတယ်။

မတ် ၂၈ ရက်မှာ လှုပ်ခတ်ခဲ့တဲ့ငလျင်ကြောင့် Sky Villa အဆောက်အဦအတွင်း သေဆုံးခဲ့သူတွေဟာ သြဂုတ် ၂၉ ရက်ဒီကနေ့အထိဆိုရင် ၁၈၀ ကျော်ရှိလာကြောင်း လူမှုကူညီရေးအသင်းအဖွဲ့တွေရဲ့ စာရင်းတွေအရသိရပါတယ်။

ငလျင်လှုပ်ခတ်မှုကြောင့် ပြိုကျပျက်စီးသွားတဲ့ Sky Villa အဆောက်အဦကို ငလျင်လှုပ်ခတ်ပြီး ၅ လဝန်းကျင် ကြာတဲ့အထိ အပျက်အစီးတွေရှင်းလင်းနေရဆဲဖြစ်ပြီး အပျက်အစီးတွေအောက်နေ သေဆုံးသူတွေရဲ့အလောင်းတွေလည်း ဆက်လက်တွေ့ရှိနေဆဲဖြစ်ပါတယ်။

စစ်ကိုင်းမြို့နဲ့ မန္တလေးမြို့အနီးကို အခြေပြုလှုပ်ခတ်ခဲ့တဲ့ စစ်ကိုင်းငလျင်ကြောင့် သေဆုံးသူ ၃,၇၄၀ ဦး၊ ထိခိုက်ဒဏ်ရာရသူ ၅,၁၀၄ ဦးနဲ့ ပျောက်ဆုံးနေသူ ၆၇ ဦးရှိပြီး တွက်ချက်မှုတွေအရ ငွေကျပ် ၃,၆၂၉ ဒသမ ၂၀၈ ဘီလီယံ ပျက်စီးဆုံးရှုံးခဲ့တယ်လို့ ဇွန် ၁ ရက်နေ့ စစ်ကောင်စီပိုင်သတင်းစာမှာ ဖော်ပြထားချက်အရ သိရပါတယ်။

စာတည်း – လင်း

မန္တလေး၊ ဩဂုတ် ၁၅၊ ၂၀၂၅ ။

ငလျင်ကြီးလှုပ်ခတ်ပြီးနောက် ၄ လကျော်ကြာအထိ Sky Villa ကွန်ဒို အဆောက်အဦပျက်တွေအောက်ကနေ သေဆုံးရုပ်အလောင်းတွေ ဆက်တွေ့နေပြီး ၂ ရက်အတွင်း အလောင်း ၅ လောင်း ထပ်မံတူးဖော်ရရှိခဲ့တယ်လို့ ကူညီရှာဖွေရေးလုပ်ဆောင်ပေးနေသူတွေထံက သိရပါတယ်။

ပြိုကျနေတဲ့ Sky Villa အဆောက်အဦပျက်တွေအောက်ကနေ ဩဂုတ် ၁၃ ရက်မှာ A အဆောင် ၃ လွှာ၊ အခန်းအမှတ် E 3 က အမျိုးသား ၁ ဦးရဲ့ရုပ်အလောင်းကို တူးဖော်ရရှိခဲ့ပြီး ဩဂုတ် ၁၄ ရက်မှာလည်း အမျိုးသား ၁ ဦး၊ အမျိုးသမီး ၃ ဦး ရုပ်အလောင်းတွေကို ထပ်မံတွေ့ရှိခဲ့တယ်လို့ ဆိုပါတယ်။

” အလောင်းတွေ ထပ်တွေ့တာ ဟုတ်တယ်။ စည်ပင်နဲ့ Asiaworld ရှင်းနေတယ်။ A အဆောင်ကျန်တာ။ A အဆောင်ကို ရှင်းနေတာပေါ့။ ရှင်းတာကတော့ ပြီးတော့မှာပါ။ အလောင်းတွေကတော့ ထပ်ရှိနိုင်သေးတယ်။ ရှိရင်လည်း နည်းနည်းပါ” လို့ မန္တလေးမြို့ကူညီကယ်ဆယ်ရေးအသင်းဝင်တဦးက မြေလတ်အသံကို ပြောပါတယ်။

ငလျင်ကြီးလှုပ်ခတ်မှုကြောင့် ပြိုကျပျက်စီးသွားတဲ့ Sky Villa အဆောက်အဦကို လှုပ်ခတ်ပြီး ၄ လကျော်အကြာ လက်ရှိအထိ အပျက်အစီးတွေရှင်းလင်းနေရဆဲဖြစ်ပြီး အပျက်အစီးတွေအောက်နေ သေဆုံးရုပ်အလောင်းတွေ၊ ငွေနဲ့ ရတနာပစ္စည်းတွေလည်း ဆက်လက်တွေ့ရှိနေသေးတာပါ။

ရုပ်အလောင်း ၅ လောင်းထပ်မံတွေ့ရှိတာကြောင့် Sky Villa အဆောက်အဦအတွင်း သေဆုံးသူစုစုပေါင်း ၁၇၀ ဦးဝန်းကျင်ရှိလာကြောင်း လူမှုကူညီရေးအသင်းအဖွဲ့တွေရဲ့ စာရင်းတွေအရသိရကာ ဩဂုတ် ၁၅ ရက်အထိ A အဆောင်တခုသာ ရှင်းလင်းဖို့ကျန်ရှိတော့တယ်လို့ သိရပါတယ်။

လက်ရှိမှာ Sky Villa အဆောက်အဦအတွင်း ရှာဖွေကယ်ဆယ်ရေး၊ အပျက်အစီးရှင်းလင်းရေးလုပ်ငန်းတွေကို မီးသတ်တပ်ဖွဲ့၊ စည်ပင်နဲ့ Asiaworld ကုမ္ပဏီဝန်ထမ်းတွေက ဆက်လက်လုပ်ဆောင်နေကြပြီး လူမှုကူညီရေးအဖွဲ့တွေကတော့ ဇူလိုင်လကစတင်ကာ ရှာဖွေရေးလုပ်ငန်းတွေကို ရပ်နားလိုက်ရပြီလို့ ဆိုပါတယ်။

စစ်ကိုင်းနဲ့ မန္တလေးမြို့အနီးကို အခြေပြုလှုပ်ခတ်ခဲ့တဲ့ စစ်ကိုင်းငလျင်ကြောင့် သေဆုံးသူ ၃,၇၄၀ ဦး၊ ထိခိုက်ဒဏ်ရာရသူ ၅,၁၀၄ ဦးနဲ့ ပျောက်ဆုံးနေသူ ၆၇ ဦးရှိပြီး တွက်ချက်မှုတွေအရ ငွေကျပ် ၃၆၂၉ ဒသမ ၂၀၈ ဘီလီယံ ပျက်စီးဆုံးရှုံးခဲ့တယ်လို့ ဇွန်လ ၁ ရက်နေ့ စစ်ကောင်စီပိုင်သတင်းစာမှာ ဖော်ပြထားချက်အရ သိရပါတယ်။

ဓါတ်ပုံ – Myanmar Fire Services Department.

စာတည်း – ဟိန်းစံ

မန္တလေး၊ ဧပြီ ၈၊ ၂၀၂၅။

မန္တလေးတိုင်း၊ အောင်မြေသာစံမြို့နယ် Sky Villa ကွန်ဒိုပြိုကျမှုကနေ ဧပြီ ၇ ရက် မနေ့က တရက်တည်းမှာတင် အလောင်း ၁၄ လောင်းထပ်မံတွေ့ရှိခဲ့တယ်လို့ မြန်မာနိုင်ငံမီးသတ်တပ်ဖွဲ့ ထုတ်ပြန်ချက်အရ သိရပါတယ်။

Sky Villa အဆောက်အဦပျက်စီးမှုအောက်မှာ ရှိနေသူတွေကို တရုတ်နိုင်ငံ Blue Sky Rescue အဖွဲ့ဝင်တွေနဲ့အတူ မြန်မာနိုင်ငံမီးသတ်၊ ဒေသတွင်း လူမှုကူညီရေးအဖွဲ့တွေနဲ့ တောင်ငူ၊ ဘားအံမြို့တွေက လူမှုကူညီရေးအဖွဲ့ဝင်တွေက ဆက်လက်ရှာဖွေနေရာမှာ အလောင်းတွေ တွေ့ရှိခဲ့တာလို့ဆိုပါတယ်။

“မနေ့ညပိုင်းက ၁၂ လောင်းထွက်တယ်။ မီးသတ်က ထုတ်ပြန်ထားတာဟုတ်မယ်။ ကျနော်ရောက်တဲ့ အချိန်ထိ အဲလောက်ပဲထွက်သေးတယ်။ မနေ့ကတည်းက တရုတ်တွေကပြန်ထွက်သွားပြီ။ မြန်မာတွေပဲကျန်တော့တာ။ “လို့ မန္တလေးအခြေစိုက် လူမှုကူညီရေးအသင်းဝင်တဦးကပြောပါတယ်။

မီးသတ်တပ်ဖွဲ့ရဲ့ ထုတ်ပြန်ချက်အရ Sky Villa အဆောက်အဦအပျက်အစီးအောက်မှာ မနက် ၈ နာရီကျော်ကနေ ည ၆ နာရီ မိနစ် ၃၀ အချိန်ထိ ကလေးအလောင်း ၄ လောင်းနဲ့ လူကြီးအလောင်း ၁၀ လောင်း သယ်ထုတ်ထားနိုင်တယ်လို့ ထုတ်ပြန်ချက်မှာဖော်ပြထားပါတယ်။

တရုတ်နိုင်ငံ Blue Sky Rescue အဖွဲ့ဝင်တွေက ဧပြီ ၇ ရက်က ပြန်သွားပြီဖြစ်လို့ Sky Villa အပျက်အစီးအောက်က ရှာဖွေကယ်ဆယ်ရေးလုပ်ငန်းတွေကို ဧပြီ ၈ ရက်ကစတင်ပြီး မြန်မာ လူမှုကူညီရေးအဖွဲ့ဝင်တွေနဲ့ဆက်လက်ရှာဖွေနေပါတယ်။

“အလောင်းတွေ တွေ့တဲ့နေရာက လှေကားရင်းနားမှာစုပြုံတွေ့တာလို့ သိရတယ်။ မြို့ခံတယောက် တင်ထားတဲ့ ဗွီဒီယိုဖိုင်ဆို သူကပြေးထွက်လာတာလွတ်သွားပြီးသူနောက်ကလူတွေက ပိပြီးသေသွားတာလို့ပါတယ်။ ရှာဖွေရေးတွေတော့ဆက်လုပ်နေတုန်းပဲ”လို့ တောင်ငူအခြေစိုက် လူမှုကူညီရေးအဖွဲ့ဝင်တဦးကပြောပါတယ်။

အဆောက်အဦထဲမှာ လူဦးရေ ဘယ်လောက်ထိနေထိုင်တယ်ဆိုတဲ့ စာရင်း၊ အသက်ရှင်လျက် ထွက်လာနိုင်သူစာရင်းနဲ့ရှာဖွေတွေ့ရှိထားတဲ့ အလောင်းစာရင်းတွေကိုတော့ မြို့နယ်ထွေအုပ်နဲ့ Sky Villa တာဝန်ရှိသူတွေထံမှာသာရှိနေပြီး တရားဝင်ထုတ်ပြန်ထားတာမျိုးလည်းမရှိတာဘူးလို့ ဆိုပါတယ်။

တရုတ်နိုင်ငံ Blue Sky Rescue အဖွဲ့ဝင်တွေရဲ့ ကူညီကယ်ဆယ်ရေးအသုံးပြုစက်နဲ့ရှာဖွေတွေ့ရှိမှုအရ အပျက်အစီးအောက်မှာ အလောင်း ၂၀၀ လောက်ပိမိနေတာရှိတယ်လို့ အထက်ပါလူမှုကူညီရေး အဖွဲ့ဝင်က ဆက်ပြောပါတယ်။

ဧပြီလ ၈ ရက်အထိ မန္တလေးမြို့အတွင်းက အပျက်အစီးတွေအောက်မှာ သေဆုံးသူအလောင်းတွေကို မီးသတ်နဲ့လူမှုကူညီရေးအဖွဲ့တွေက ဆက်လက်ရှာဖွေနေဆဲဖြစ်ပြီး သေဆုံးသူအလောင်းတွေလည်း ဆက်လက်တွေ့ရှိနေရသေးတယ်လို့ မန္တလေးအခြေစိုက် လူမှုကူညီရေးအသင်းဝင်က ဆက်ပြောပါတယ်။

စစ်ကောင်စီသတင်းပြန်ကြားရေးရဲ့ ဧပြီ ၇ ရက်သတင်းထုတ်ပြန်ချက်အရ ငလျင်ဒဏ်ကြောင့် နိုင်ငံတဝန်း လူဦးရေ ၃,၆၀၀ ဦး သေဆုံးထားပြီး ဒဏ်ရာရသူ ၅,၀၁၇ ဦးနဲ့ပျောက်ဆုံးနေသူ ၁၆၀ ဦးရှိတယ်လို့ သိရပါတယ်။

ပုံစာ – မြန်မာနိုင်ငံမီးသတ်တပ်ဖွဲ့။

စာတည်း – လင်း