PDF

စစ်ကိုင်း၊ မေ ၂၃၊ ၂၀၂၃။

စစ်ကိုင်းတိုင်း ၊ မုံရွာမြို့နယ်၊ သာစည်ရွာနယ်မြေရဲစခန်းက စစ်ကောင်စီလက်အောက်ခံရဲတပ်သား ၂ ဦး မေလ ၂၀ရက်နေ့လယ် ၁၂ နာရီလောက်မှာ ကျေးရွာထဲကို ကွမ်းယာလာဝယ်ချိန် ပစ်ခတ်ခံရလို့ တဦး သေဆုံးသွားတယ်လို့PDF အဖွဲ့ဝင်တွေဆီကသိရပါတယ်။

သာစည်ရဲစခန်းကနေ မီတာ ၁၀၀ ကျော်သာအကွာအဝေးရှိတဲ့ ကျေးရွာထဲကို အရပ်ဝတ်နဲ့ ကွမ်းယာလာဝယ်စဉ် အသင့်စောင့်ဆိုင်းပစ်ခတ်ခဲ့တာလို့ မုံရွာခရိုင်တပ်ရင်း၂၄ တပ်ခွဲ (၁) က တပ်ဖွဲ့ဝင်တဦးက ပြောပါတယ်။

“အဲဒီစခန်းထဲကရဲတွေက နေ့တိုင်းဆိုသလိုရွာထဲကိုလာပြီးအရက်၊ ကွမ်းယာတွေ လာဝယ်တာမျိုးတွေ လုပ်တယ်။အဲဒီနေ့ကလည်း သူတို့ကွမ်းလာဝယ်တုန်း အလစ်အငိုက် ပစ်ခတ်ခဲ့တာပါ။ ထိသွားတဲ့တ ယောက်က ရင်ဘတ်ကိုထိသွားတာ ကျန်တဲ့တယောက်ကတော့ လွတ်သွားတယ်”လို့ပြောပါတယ်။

ပစ်ခတ်မှုဖြစ်ပွားပြီတဲ့နောက်မှာတော့ သာစည်ရွာရဲစခန်းမှာတပ်စွဲထားတဲ့ စစ်ကောင်စီတပ်နဲ့ရဲအင်အား ၂၀ နီးပါးဟာ ကျေးရွာထဲကိုသေနတ်ပစ်ဖောက်ဝင်ရောက်လာကာအော်ဟစ်ဆဲဆိုနေတယ်လို့လည်း ဆိုပါတယ်။

ပစ်ခတ်တိုက်ခိုက်မှုကို မုံရွာခရိုင်တပ်ရင်း(၂၄ ) နဲ့အတူ မုံရွာခရိုင်တပ်ရင်း(၂၅)တပ်ခွဲ(၄)၊ပုဏ္ဏက ပြောက်ကျားတပ်ဖွဲ့(မုံရွာ) တို့နဲ့ ပူးပေါင်းတိုက်ခိုက်ခဲ့တယ်လို့သိရပါတယ်။

မုံရွာမြို့ပေါ်စစ်ကောင်စီတပ်စွဲထားတဲ့နေရာတွေနယ်မြေရဲစခန်းတွေ မကြာခဏပစ်ခတ်ခံနေရပြီး ပြီးခဲ့ တဲ့ ဧပြီလ ၂ ရက်နေ့ မနက်အစောပိုင်းကလည်းမုံရွာမြို့ပေါ်ရှိ မြန်မာ့စီးပွားရေးဘဏ်မှာတပ်စွဲထားတဲ့ စစ်ကောင်စီတပ်ဖွဲ့တွေ အနီးကပ်ပစ်ခတ်တိုက်ခိုက်ခံခဲ့ရပါသေးတယ်။

စာတည်း – ရင်ငြိမ်း

စစ်ကိုင်း၊ မေ ၂၂၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်၊ ပဒူရွာ ရဲစခန်းအနီးမှာ စစ်ကောင်စီတပ်တွေနဲ့ ဒေသခံကာကွယ်ရေးတပ်တို့ ထိတွေ့ပစ်ခတ်မှုဖြစ်ပြီးနောက် စစ်ကောင်စီဘက်က ရွာကို လေကြောင်းကနေ တိုက်ခိုက်ခဲ့တယ်လို့ သိရပါတယ်။

မေလ ၂၂ ရက် ဒီနေ့မနက်အစောပိုင်းက ထိတွေ့ပစ်ခတ်မှုဖြစ်ပြီးနောက် မနက် ၁၁ နာရီလောက်မှာ တကြိမ်၊ နေ့လယ် ၃ နာရီလောက်မှာတကြိမ် Mi 35 တိုက်ခိုက်ရေးရဟက်ယာဥ်နဲ့ ပဒူကျေးရွာထဲကို လာရောက်ပစ်ခတ်ခဲ့တာလို့ ဝက်လက် ပြည်သူ့အစေခံတော်လှန်တပ်ဖွဲ့မှ တပ်ဖွဲ့ဝင်တဦးက ပြောပါတယ်။

“ရွာထဲကို လေယာဉ်နဲ့လာကြဲသွားတာ။ ထိခိုက်ပျက်စီးမှုတွေတော့ ရှိလိမ့်မယ်။ ဘယ်လောက်ထိ ဘာတွေပျက်စီးသွားလဲ ဆိုတာတော့ အတိအကျမသိနိုင်သေးဘူး။ ရွာထဲလည်း ဘယ်သူမှ ဝင်လို့မရသေးဘူး။ ထိတွေ့ပစ်ခတ်မှုတွေကလည်း မငြိမ်သေးတော့လေ”လို့ ပြောပါတယ်။

တကြိမ်ကို ၁၅ မိနစ်ကြာ ပစ်ခတ်တိုက်ခိုက်ခဲ့တာဖြစ်ပြီး လက်ရှိအချိန်ထိလည်း ပဒူကျေးရွာမှာ စစ်ကောင်စီတပ်တွေနဲ့ ဒေသခံကာကွယ်ရေးတပ်တွေအကြား စစ်ရေးအခြေအနေတွေ ထပ်ပြီး ပြင်းထန်နေဆဲဖြစ်တယ်လို့ ဆိုပါတယ်။

“အခုလည်း ရဲစခန်းသိမ်းဖို့ နောက်ထပ်ပွဲတပွဲ ထပ်ဖြစ်နေတယ်လို့ ကြားတယ်။ ပဒူရွာထဲကနေ အိမ်တွေဘယ်လောက် ထိခိုက်ပျက်စီးသွားလဲ ဆိုတာတော့ လောလောဆယ် မသိရသေးဘူး။ ရွာသားတွေ ထိခိုက်တာတွေလည်းမရှိပါဘူး။ ဘာလို့လည်းဆိုတော့ ရွာသားတွေကို ကျနော်တို့တွေက လွတ်မြောက်နေရာကို ကြိုပြီတော့ ခေါ်ထုတ်ထားလို့ပါ”လို့ အထက်ပါ တပ်ဖွဲ့ဝင်က ဆက်ပြောပါတယ်။

အဲ့ဒီစစ်ကောင်စီတပ်တွေဟာ စစ်ကိုင်းအခြေစိုက် တမခ ၃၃ က ဖြစ်ပြီး၊ မေလ ၂၁ ရက်မနေ့ကတည်းက ပဒူကျေးရွာထဲကို လက်နက်တွေ ပစ်ဖောက်ဝင်ရောက်လာတာဖြစ်သလို ထွက်ပြေးတိမ်းရှောင်ခဲ့ကြရတဲ့ ဒေသခံတွေထဲက အမျိုးသမီးတဦး ကားမှောက်သေဆုံးခဲ့ပြီး၊ ၆ ဦးဒဏ်ရာ ရရှိခဲ့တယ်လို့ မင်းဝံတော်လှန်ရေးအင်အားစုက ထုတ်ပြန်ထားပါသေးတယ်။

စာတည်း – လင်း

မကွေး၊ မေ ၁၉၊ ၂၀၂၃။

မကွေးတိုင်း၊ ဂန့်ဂေါခရိုင်၊ ဆောမြို့နယ်အတွင်းရှိ ပြည်သူ့ကာကွယ်ရေးတပ်မတော် အမှတ် ၁ စစ်ဒေသ၊ ဂန့်ဂေါခရိုင်အမှတ် ၁၃ တပ်ရင်း (The Youth Force Saw & Kyaukhtu)အဖွဲ့ ရဲဘော်တွေကို အမျိုးသားညီညွတ်ရေးအစိုးရ NUG၊ ကာကွယ်ရေးဝန်ကြီးဌာနလက်အောက်ရှိ မကွေးတိုင်းကွပ်ကဲရေးရုံးတာဝန်ရှိသူတွေက လာရောက်တွေ့ဆုံခဲ့တယ်လို့ သိရပါတယ်။

မေလ ၁၈ ရက် မနေ့မနက် ၁၀ နာရီဝန်းကျင်မှာ တိုင်းကွပ်ကဲရေးမှူးနဲ့တာဝန်ရှိသူတွေက ရဲဘော်တွေကို ရင်းနှီးခင်မင်စွာနဲ့စကားပြောဆိုခဲ့ကြပြီး လက်နက်တချို့တပ်ဆင်ပေးခဲ့တယ်လို့ တပ်ရင်းတာဝန်ခံက မြေလတ်အသံကို ပြောပါတယ်။

“မနေ့ကမနက်ပိုင်းက ထောက်ပံ့တာပါ။ မကွေးတိုင်းကွပ်ကဲရေးမှူးကိုယ်တိုင် လာပေးပါတယ်။မောင်းပြန် Type 81 အမျိုးအစားလက်နက်တချို့တွေပါ” လို့ ပြောပါတယ်။

မကွေးတိုင်းကွပ်ကဲရေးမှူးအနေနဲ့ တပ်ရင်းရှိရဲဘော်တွေကို စည်းကမ်းပြည့်ဝတဲ့ပြည်သူ့ကာကွယ်ရေးတပ်မတော်သားတွေဖြစ်လာစေဖို့လည်း တွေ့ဆုံအမှာစကားပြောကြားခဲ့တယ်လို့ သိရပါတယ်။

စာတည်း – ရင်ငြိမ်း

ပဲခူး၊ မေ ၁၇၊ ၂၀၂၃။

ပဲခူးမြို့မှာ PDF တွေ အလင်းဝင်ဖို့ စစ်ကောင်စီဘက်က ဗီနိုင်းကပ်တာနဲ့ လက်ကမ်းစာစောင် ဖြန့်ဝေတာတွေ လုပ်နေတယ်လို့ သိရပါတယ်။

မေလ ၁၇ ရက် မနက် ၈ နာရီလောက်ကစတင်ပြီး စစ်ကောင်စီအဖွဲ့နဲ့ လက်အောက်ခံဌာနဆိုင်ရာတွေပါတဲ့ အဖွဲ့တွေက ပဲခူးမြို့ ဘုရားကြီးရှေ့၊ ဘုရားစျေးအရှေ့အပါအဝင် မြို့တွင်းလမ်းတွေမှာ PDF တွေ အလင်းဝင်ဖို့ နစက အဖွဲ့က ဖိတ်ခေါ်စာကို ဗွီနိုင်းထောင်တာ၊ လမ်းသွားလမ်းလာတွေကို လက်ကမ်းစာစောင်ဖြန့်ဝေတာတွေ လုပ်ခဲ့တယ်လို့ ဒေသခံတဦးက ပြောပါတယ်။

“ဒီမနက်ပိုင်းကတည်းက သူတို့လုပ်တာက ဟုတ်တယ်။ PDF တွေအလင်းဝင်ဖို့၊ ဝင်လာရင် ဘာပေးမယ်ညာပေးမယ်ပေါ့။ မြို့ရဲ့လူသွားလူလာများတဲ့လမ်းတွေ၊ စျေးတွေလိုနေရာတွေမှာ လုပ်သွားတာ” လို့ ပြောပါတယ်။

PDF အပါအဝင် ဥပဒေပြင်ပအဖွဲ့အတွင်းရောက်နေသူတွေအနေနဲ့ နိုင်ငံတော်တည်ဆောက်ရေးလုပ်ငန်းတွေမှာ ပါဝင်ဖို့၊ ဥပဒေဘောင်အတွင်း ပြန်လည်ဝင်ရောက်ဖို့ ဖိတ်ခေါ်ပါတယ်လို့ လက်ကမ်းစာရွက်တွေမှာ ရေးသားထားတယ်လို့ သိရပါတယ်။

“စစ်ကောင်စီရဲ့အခုလုပ်ရပ်ဟာ အရူးလုပ်ရပ်လို့ပဲ ပြောရမလား။ ငွေကြေးနဲ့စည်းရုံးချင်တာပေါ့။ PDF တွေဆိုတာက ကိုယ့်စရိတ်ကိုယ်စားပြီး ကိုယ့်လက်နက်ကိုယ်ဝယ်ပြီး တောတောင်ထဲမှာ အပင်ပန်းခံ စစ်ပညာသင်ပြီး သူတို့ကို တိုက်နေတာလေ။ PDF စစ်စစ်ဆိုရင်တော့ စကစ ဘက်ကို ဘယ်တော့မှ အောက်ကျို့ပြီးဝင်မယ့်သူတွေ မဟုတ်ဘူး” လို့ ပဲခူးတိုင်းဒေသကြီး ပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ရှိသူက ပြောပါတယ်။

စစ်ကောင်စီဘက်ကတော့ ပြန်လည်ဝင်ရောက်လာသူတွေဟာ လူသတ်မှု၊ မုဒိန်းမှု၊ သူတပါးအပေါ်ထိခိုက်နစ်နာစေမှုတွေ ကျူးလွန်ထားရင် ထိုက်သင့်တဲ့အပြစ်ဒဏ်ကို တရားရုံးမှာ အမှုရင်ဆိုင်ရမှာဖြစ်ပြီး ဥပဒေကြောင်းအရလိုအပ်တဲ့ ဖြေလျော့မှုတွေ လုပ်ပေးသွားမယ်လို့ ဖော်ပြထားပါတယ်။

ဒါ့အပြင် လက်နက်နဲ့အလင်းဝင်လာပါက လက်နက်အမျိုးအစားအလိုက် ထိုက်သင့်တဲ့ ဆုငွေကို ပေးအပ်သွားမယ်လို့ ဆိုထားပါတယ်။

စစ်ကိုင်း၊ မေ ၁၆၊ ၂၀၂၃။

စစ်ကိုင်းတိုင်း၊ မြင်းမူမြို့ပေါ်မှာ စစ်အုပ်စုက PDF တွေ အလင်းဝင်ဖို့နဲ့ လက်နက်တွေယူဆောင်လာရင် ပါလာတဲ့ လက်နက်၊ ခဲယမ်းအမျိုးအစားအလိုက် ငွေပေးမယ်လို့ ရေးသားထားတဲ့ ဝါဒဖြန့်ဗီနိုင်းတွေ လိုက်ကပ်နေတယ်လို့ သိရပါတယ်။

မြင်းမူမြို့၊ လူစည်ကားရာ မြို့မဈေးအနီးက သစ်ပင်တွေမှာ မေလ ၁၅ ရက် မနေ့မနက်ပိုင်းက အဲ့ဒီဝါဒဖြန့်ဗီနိုင်းတွေ လိုက်ကပ်နေပေမယ့် လူစိတ်ဝင်စားမှုမရှိဘူးလို့ မြို့ခံတဦးကပြောပါတယ်။

“ဝါဒဖြန့်ဗီနိုင်းကို စျေးတောင်ဘက်က ကုက္ကိုပင်တွေမှာ လာကပ်သွားတာ။ PDF တွေကို ငွေနဲ့မြှူဆွယ်နေတာ။ ဘယ်သူမှစိတ်မဝင်စားလို့ မြင်တဲ့သူတိုင်းကတော့ ဦးနှောက်ထဲတောင် ထည့်တဲ့ပုံမပေါ်ဘူး”လို့ ပြောပါတယ်။

မြင်းမူမြို့နယ်အတွင်း မြို့ပေါ်ရပ်ကွက်စစ်ကောင်စီတပ်စွဲထားတဲ့ နေရာတွေနဲ့ မုံရွာ-မန္တလေးလမ်းပိုင်းမှာ သွားလာနေတဲ့ စစ်ယာဉ်တန်းတွေ မကြာခဏမိုင်းဆွဲပစ်ခတ်တိုက်ခိုက်ခံနေရကာ ဒီအခြေအနေတွေကို မထိန်းချုပ်နိုင်လို့ အခုလိုလုပ်ဆောင်တာလို့ PDF တာဝန်ခံတဦးက တုန့်ပြန်ပြောဆိုပါတယ်။

“စစ်ကိုင်းတိုင်းကို သူတို့(စကစ) မစိုးမိုးနိုင်လို့၊ ကာကွယ်ရေးရဲဘော်တွေကို ရှုံးနေပြီဆိုတာသူတို့သိလို့၊ ဒီအကြောင်းတွေကို ပြည်သူတွေကနေတဆင့် ကျနော်တို့ဆီရောက်အောင်ပို့ခိုင်းပြီး သူတို့(စကစ) ညံ့တာကို ဝန်ခံသလိုပဲလို့ ကျနော်တို့မှတ်ယူပါတယ်” လို့ မြင်းမူအခြေပြု People’s Defense Comrade ပြန်ကြားရေးတာဝန်ခံ ထူးခန့်ဇော်(အမေ့သား)က ပြောပါတယ်။

စစ်ကောင်စီတပ်က ကပ်ထားတဲ့ဗီနိုင်းတွေမှာ PDF တွေလက်နက်နဲ့အလင်းဝင်ပါက ရိုင်ဖယ်တလက် ကျပ် သိန်း ၅၀၊ ပစ္စတိုတလက်ကျပ်သိန်း ၂၀၊ ပြောင်းချောသေနတ်တလက် ကျပ်သိန်း ၃၀၊ စိန်ပြောင်း/ လောင်ချာ၊ RPG တလက် ကျပ်သိန်း ၇၅ သိန်း၊ လက်လုပ်သေနတ်တလက် ကျပ် ၅ သိန်း၊ လက်လုပ် မိုင်း၊လက်ပစ်ဗုံးကျပ် ၃ သိန်း၊ စကားပြောစက်(Icon)တလုံးကျပ် ၂ သိန်းနဲ့ Drone တစီး ကျပ်သိန်း ၅၀ ပေးမယ်လို့ ရေးသားထားပါတယ်။

ဒါ့အပြင် စစ်အုပ်စုဘက်က ရေဦးကနေ မန္တလေးကိုသွားတဲ့ ခရီးသည်တင်ကားပေါ်တွေမှာလည်း အလားတူဝါဒဖြန့်ရေးသားထားတဲ့ လက်ကမ်းစာရွက်တွေကို ယာဉ်ပေါ်ပါခရီးသည်တွေဆီ ဖြန့်ဝေတာတွေ လုပ်ဆောင်နေတယ်လို့လည်း သူကဆက်ပြောပါတယ်။

PDF တွေကို ငွေနဲ့စည်းရုံးတဲ့ အဲ့ဒီဝါဒဖြန့်မှုတွေကို မေလ ၉ ရက်နေ့ကစတင်လို့ စစ်ကောင်စီရဲ့ သတင်းထုတ်ပြန်ရေး မီဒီယာတွေကနေတဆင့် ထုတ်ပြန်လာတာဖြစ်ပြီး လက်ရှိမှာ စစ်ကိုင်းတိုင်းအတွင်းက မြို့နယ်တချို့မှာပါ အခုလိုဗီနိုင်းတွေ လိုက်ကပ်နေတာပါ။

စစ်ကိုင်းတိုင်းဟာ မြို့တော်မုံရွာမြို့အပါအဝင် နယ်မြေဒေသအများအပြားကို စစ်ကောင်စီဘက်က ထိန်းချုပ်ဖို့ခက်ခဲနေတာဖြစ်ပြီး ပြီးခဲ့တဲ့ရက်ပိုင်းအတွင်းကဘဲ စစ်အာဏာသိမ်းခေါင်းဆောင် ဗိုလ်ချုပ်မှူးကြီးမင်းအောင်လှိုင်က သူ့ရဲ့တာချီလိတ်မြို့ခရီးစဉ်အတွင်းမှာ PDF ကို အပြတ်ရှင်းမယ်လို့ ပြောဆိုထားပါသေးတယ်။

စာတည်း- ရင်ငြိမ်း

စစ်ကိုင်း၊ မေ ၁၂၊ ၂၀၂၃။

စစ်ကိုင်းတိုင်း၊ ချောင်းဦးမြို့၊ ရန်အောင်မြေရပ်ကွက်က နေရာ ၃ ခုကို စစ်ကောင်စီတပ်သားတွေက မီးရှို့ပြီးနောက် PDF တွေ မီးရှို့တာဆိုပြီး ဒေသခံပြည်သူတွေကို အတင်းအဓမ္မပြောခိုင်းကာ ဗွီဒီယို မှတ်တမ်းရိုက်ယူခဲ့ကြတယ်လို့ ဒေသခံတွေက ပြောပါတယ်။

မေလ ၁၁ ရက် မနေ့ည ၇ နာရီကျော်မှာ ရန်အောင်မြေရပ်ကွက်ထဲရှိ အရပ်ခေါ် (ပွဲရပ်၊ မြေနန်းရပ်၊ ဝင်းရပ်) စတဲ့နေရာတွေက လူနေအိမ်တွေကို စစ်ကောင်စီကမီးရှို့ခဲ့ပြီးနောက် မေလ ၁၂ ရက် ဒီမနက်ပိုင်းမှာ လမ်းသွား၊ လမ်းလာပြည်သူတွေနဲ့ ရပ်ကွက်နေပြည်သူတွေကို ဖမ်းခေါ်ကာ PDF မီးရှို့တာဆိုပြီး ပြောဆိုခိုင်းခဲ့တာဖြစ်တယ်လို့ ချောင်းဦး PDF မှ ရဲဘော်တဦးက ပြောပါတယ်။

“ဒီနေ့မနက်ရောက်တော့ မိမိတို့အိမ်မီးရှို့ထဲပါသွားလား ဆိုပြီး ရပ်ကွက်ထဲကို ဝင်ကြည့်ကြတဲ့သူတွေနဲ့ လမ်းသွားနေကြတဲ့ ယောက်ျားရော၊ မိန်းကလေးရော ဖမ်းပြီးတော့ “PDFတွေကပဲရှို့တာပါ”ဆိုပြီးတော့ အော်ခိုင်းတယ်။ ပြီးတော့ ဗွီဒီယိုရိုက်တယ်ဗျ”လို့ ဆိုပါတယ်။

စစ်ကောင်စီတပ်တွေဟာ ရန်အောင်မြေရပ်ကွက်ကို မီးရှို့နေတဲ့အချိန်မှာ တမြို့လုံးကို အင်အားတွေဖြန့်ထားပြီး၊ ရပ်ကွက်တွေရဲ့ ချောင်ကြို၊ချောင်ကြားပါမကျန် စစ်သားအင်အားကို ဖြန့်ထားခဲ့တဲ့အပြင် သေနတ်တွေလည်း ပစ်ခတ်ခဲ့ပြီး “ထွက်ရဲတဲ့ကောင် ထွက်ခဲ့” ဆိုပြီးလည်း အော်ဟစ်တာတွေ လုပ်ခဲ့တယ်လို့ အထက်ပါရဲဘော်က ပြောပြပါတယ်။

တိုက်ပွဲဖြစ်တာမရှိဘဲ အကြောင်းမဲ့ မီးရှို့ခဲ့တာကြောင့် လူနေအိမ် ၁၀၀ ကျော် မီးလောင်ကျွမ်း ပြာကျသွားတယ်လို့ ဒေသခံတွေဆီက သိရပါတယ်။

အလားတူ မေလ ၁၁ ရက်ည ၇ နာရီကျော်မှာလည်း ချောင်းဦးမြို့နဲ့ ၃ မိုင်ခန့်အကွာ အိမ်ခြေ ၁၀၀၀ ခန့်ရှိတဲ့ ငါးယှန်ကျေးရွာကို စစ်ကောင်စီတပ်သားတွေက ပစ်ခတ်ဝင်ရောက်ပြီး လူနေအိမ် ၂၀၀ ခန့်ကို မီးရှို့ခဲ့ရာ ပစ်ခတ်ခဲ့မှုကြောင့် အသက် ၅၀ အရွယ် အမျိုးသားတဦးပါ လက်နက်ကြီးကျည်ထိမှန် သေဆုံးခဲ့ပါသေးတယ်။

စာတည်း – လင်း

မကွေး၊ မေ ၁၁၊ ၂၀၂၃။

မကွေးတိုင်း၊ မြိုင်မြို့နယ်အတွင်းမှာ စစ်ကောင်စီတပ်သား ၁ ဦးကို မေလ ၁၁ ရက် ဒီနေ့လယ်ပိုင်းမှာ အရှင်ဖမ်းဆီးမိခဲ့တယ်လို့ နှလုံးလှလူမိုက်အဖွဲ့ဆီက သိရပါတယ်။

မိုးညှင်းအခြေစိုက် အမှတ် ၆၀၃ ဒုံးတပ်ရင်း – ဒတရ ၆၀၃ မှ တပ်သားကိုဇော်လင်း (ခ) ကိုရဲမင်းနိုင်ဖြစ်ပြီး မေလ ၁၁ ရက် နေ့လယ် ၁ နာရီခွဲလောက်မှာ ဖမ်းမိတာခဲ့တာလို့ ဆိုပါတယ်။

“သူက ကျနော်တို့ဂိတ်ရဲ့အရှေ့ဘက်ကို ကင်းပုန်းလာဝပ်တာ၊ မသင်္ကာလို့ သူ့ကိုဝိုင်းထားပြီး ဖမ်းလိုက်တာ၊ သူကလည်း စစ်ဖြစ်ကြောင်း ဖော်ပါတယ်၊ သူက အရပ်သားပုံစံမျိုးနဲ့လာတာ၊ ကျနော်တို့က ဂန်းတွေနဲ့ချိန်တဲ့အခါမှာ သူကနေပြီးတော့ မင်းတို့ငါ့ကို ဘာကြောင့်ဖမ်းတာလည်း ပြောတယ်၊ ကျနော်တို့က စစ်မှန်းလည်းမသိဘူး၊ ဖမ်းပြီး ကျနော်တို့စခန်းရောက်မှ စစ်ဆေးကြည့်မှ သူက စစ်*ဖြစ်မှန်းသိတာ” လို့ နှလုံးလှလူမိုက်အဖွဲ့မှ ဗိုလ်ဒဿက ပြောပါတယ်။

အဲ့ဒီတပ်သားကို အရပ်ဝတ်နဲ့ ဖမ်းမိခဲ့တာဖြစ်ပြီး၊ သူ့ကို စစ်ဆေးမေးမြန်းရာမှာလည်း သူဟာ စစ်တပ်ကနေ ထွက်ပြေးလာတာလို့ ပြောဆိုခဲ့တယ်လို့ ဗိုလ်ဒဿက ဆိုပါတယ်။

လက်ရှိမှာတော့ စခန်းအတွင်းမှာပဲ ထိပ်တုံးခတ်ကာ စစ်ဆေးမေးမြန်းမှုတွေလုပ်နေပြီး၊ ရိုက်နှက်နှိပ်စက်တာတွေ မလုပ်ဘဲ နောက်ထပ်အဖွဲ့အစည်းတခုဆီကို အပ်ဖို့စီစဥ်ထားတယ်လို့ သိရပါတယ်။

စာတည်း – လင်း