PDF စခန်း

စစ်ကိုင်း၊ ဇန်နဝါရီ ၂၈၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ် အခြေစိုက် Chindwin Revolutionary Fighter နဲ့ မဟူရာဒေါင်မင်း ပြည်သူ့ကာကွယ်ရေးတပ်ဖွဲ့တွေရဲ့ စခန်းကို စစ်ကောင်စီတပ်က ဇန်နဝါရီ၂၅ရက်မနက်ပိုင်းမှာ မီးရှို့ဖျက်ဆီးခဲ့တာကြောင့် သိန်း ၈၀ခန့်တန်ဖိုးရှိတဲ့ လက်နက်၊ခဲယမ်းတွေဆုံးရှုံသွားခဲ့တယ်လို့ သိရပါတယ်။

ဒါ့အပြင် အဆိုပါ စစ်ကြောင်းဟာ စခန်းကို မီးရှို့ဖျက်စီးခဲ့ပြီးနောက် ဇန်နဝါရီ၂၅၊၂၆ရက်နေ့တို့မှာ မြရိပ်ကျေးရွာကိုလည်း ဝင်ရောက်မီးရှို့ခဲ့တာကြောင့် ဘုန်းတော်ကြီးကျောင်းအပါအဝင် အိမ်ခြေ (၇၅)လုံးဆုံးရှူံးခဲ့ရပါသေးတယ်။

စခန်းမီးရှို့ခံလိုက်ရတဲ့ Chindwin Revolution army Fighter နဲ့ မဟူရာဒေါင်မင်း ပြည်သူ့ကာ ကွယ်ရေးတပ်ဖွဲ့တို့ဟာ တပ်စိပ်တခုတည်းဖြစ်သလို စခန်းတခုတည်းမှာအတူတူနေထိုင်ကြတဲ့ အဖွဲ့တွေဖြစ်ကြပါတယ်။

မကွေး၊ ဒီဇင်ဘာ ၁၉၊ ၂၀၂၂။

မကွေးတိုင်း၊ ရေစကြိုမြို့နယ်၊ ကျောက်ထပ်ကျေးရွာအနီးက PDF စခန်းငယ်တခု အသိမ်းခံရပြီး လက်နက်တွေပါ ဆုံးရှုံးသွားတယ်လို့ သိရပါတယ်။

ဒီဇင်ဘာလ ၁၈ ရက်ညနေ ၅ နာရီခန့်က ဒေသခံ PDF အဖွဲ့တခုရဲ့ လူမနေတဲ့လေ့ကျင့်ရေးနေရာဟောင်းတခုကို စစ်ကောင်စီတပ်တွေက ဝင်ရောက်သိမ်းဆည်းခဲ့တာဖြစ်တယ်လို့ ရေစကြိုမြို့နယ်ပြည်သူ့ကာကွယ်ရေးတပ်ဖွဲ့ တာဝန်ရှိသူတဦးက အတည်ပြုပြောဆိုထားပါတယ်။

“လူမနေတဲ့ ကန့်အဟောင်းနေရာတခုပါ။ ဖြစ်စဥ်ဖြစ်တာကတော့ ဟုတ်တယ်။ လက်လုပ်တွေလည်း ပါသွားတာ ဟုတ်တယ်။ ဘယ်အဖွဲ့ရဲ့နေရာလဲဆိုတာ သေချာပြန်စုံစမ်းပေးပါ့မယ်။ တိုက်ပွဲဖြစ်တာတော့မဟုတ်ဘဲ စကစ ဘက်က သတင်းအတိအကျရလို့ လာသိမ်းသွားတဲ့သဘောပဲ။ အဲ့ဒီဘက်ကလည်း စကစနဲ့ နီးတယ်လေ” လို့ ပြောပါတယ်။

စစ်ကောင်စီဘက်က အင်အား ၅၀ ဝန်းကျင်နဲ့ အဲ့ဒီစခန်းကိုဝင်စီးခဲ့တာဖြစ်ပြီး၊ စခန်းအတွင်းဝှက်ထားတဲ့ လက်လုပ်သေနတ် ၁၆ လက်၊ လက်လုပ်မိုင်း ၂ လုံးနဲ့ ဆက်စပ်ပစ္စည်းအချို့ကို သိမ်းဆည်းသွားတယ်လို့ စစ်ကောင်စီဝါဒဖြန့် တယ်လီဂရမ်ချန်နယ်တွေမှာ ဖော်ပြထားပါတယ်။

လက်နက်တွေသိမ်းဆည်းပြီးနောက် စခန်းတဲကိုမီးရှို့သွားခဲ့တယ်လို့ သိရပြီး၊ အဲဒီစခန်းဟာ ဘယ်ကာကွယ်ရေးတပ်ဖွဲ့ကစခန်းဖြစ်တယ်ဆိုတာကိုတော့ သက်ဆိုင်ရာအဖွဲ့က ထုတ်ပြန်ထားတာမျိုး မရှိသေးပါဘူး။

မ‌‌ကွေး၊ မတ် ၁၉၊ ၂၀၂၂။

မကွေးတိုင်း၊ နတ်မောက်မြို့နယ်အတွင်းက PDF စခန်းတခုကို စစ်ကောင်စီတပ်တွေက ပြီးခဲ့တဲ့ မတ်လ ၁၇ ရက် မနက် ၉နာရီလောက်မှာ ဝင်ရောက်စီးနင်းတိုက်ခိုက်ခဲ့ပါတယ်။

အဲ့ဒီစခန်းကို ရွာမွန်ပင်မ စစ်လက်နက်သိုလှောင်ရေးတပ်စခန်းက စစ်သား ၃၀ လောက်က ဝင်ရောက်စီးနင်းခဲ့တာဖြစ်ပြီး၊ စခန်းက PDF ရဲဘော် ၂ ဦးကိုလည်း ဖမ်းဆီးသွားခဲ့တယ်လို့ နတ်မောက်မြို့ ပြည်သူ့ကာကွယ်ရေးတပ်ဖွဲ့ တာဝန်ခံ ဗိုလ်ရာ‌ကျော်က ပြောပါတယ်။

“ စစ်ကောင်စီတပ်ဖွဲ့တွေ စခန်းဝင်ဆီးမှာကိုသိလို့ ရှောင်ဖို့ရှားဖို့နေရာတခုကြိုထားခဲ့ပါတယ်၊ ရဲဘော် ၂ ဦးဟာ မထင်မှတ်တဲ့နေရာကနေဝင်လာတော့ ရဲဘော် ၂ ယောက်ကကျန်နေခဲ့တယ်၊ ဖမ်းဆီးခံလိုက်ရတဲ့ ရဲဘော် ၂ ဦးကတော့ တယောက်ကတော့ ဂျီတီအိုင် ဒုတိယနှစ်ကျောင်းသား မောင်ဆောင်းဦးလင်း နဲ့ ဟန်လွင်ဦးပါ၊ “ လို့ သူကပြောပါတယ်။

စခန်းတွင်းဝင်စီးတဲ့ အချိန်မှာလည်း စစ်ကောင်စီဘက်က လက်နက်ကြီးတွေနဲ့ ၃ ချက်လောက် ပစ်ခဲ့ပြီး၊ လေကြောင်းစစ်ကူတွေလည်း ရောက်လာတယ်လို့ ဗိုလ်ရာကျော်က ဆက်ပြောပါတယ်။

“ ကျနော်တို့အဖွဲ့တွေလူစုကွဲသွားတော့ သူတို့အဖွဲ့တွေက လက်နက်ကြီးတွေနဲ့လှမ်းပစ်ပါတယ်၊ ၂ ချက် ၃ ချက်လောက်လှမ်းပစ်ပါတယ်၊ ခဏနေတော့ သူတို့လေယာဉ် ၂ စီးလာတယ်၊ ကျနော်တို့အဖွဲ့တွေ လူခွဲပြေးတော့သူတို့ပစ်မှတ်ပျောက်နေပုံရတယ်၊ လေယာဉ်ပေါ်ကနေတော့ပစ်မသွားဘူး၊ ‌လေယာဉ်၂ စီးလုံး နောက်ပြန်လှည့်သွားတယ်၊ ‘ လို့ သူကပြောပါတယ်။

ဒါအပြင် စစ်ကောင်စီတပ်တွေဟာ လက်ရှိအချိန်မှာလည်း ဖမ်းဆီးထားတဲ့ ရဲဘော် ၂ ဦး လွတ်ပြီဆိုပြီး လွဲမှားတဲ့ အချက်အလက်တွေပေးကာ အခြား PDF ရဲဘော်တွေကို ထောင်ဖမ်းဖို့ လုပ်ဆောင်နေတယ်လို့လည်း ဆိုပါတယ်။

“ သူတို့အဖမ်းခံရပြီးနောက်မှာ သူတို့လွတ်တယ် သူတို့ကိုလာခေါ်ပါဆိုပြီး ကျနော်တို့ PDFတွေကို စစ်တပ်က ထောင်ဖမ်းတာတွေလုပ်နေတယ်၊ ပထမ တခေါက်မှာ သူတို့ကိုနေရာတခုချိန်းလိုက်တယ်၊ ကျနော်တို့ဘက်ကလည်း အဆင်သင့်ရှိနေပြီးသားနေရာတွေပေါ့၊ အဲဒီနေရာကို ချိန်းပြီးကင်းထောက်လုပ်တယ်၊ သူတို့ ၂ ယောက်ထဲမဟုတ်ပဲနဲ့ နောက်မှာစစ်သားတွေ ပါလာတော့ ကျနော်တို့နောက်ပြန်ပြီးတော့ဆုတ်လာခဲ့ပါတယ်၊” လို့ ဗိုလ်ရာကျော် က ဆိုပါတယ်။

မကွေးတိုင်းအတွင်း စစ်ကောင်စီရဲ့ ထိုးစစ်ဆင်တိုက်ခိုက်မှုတွေဟာ ပြီးခဲ့တဲ့ဖေဖော်ဝါရီလပိုင်းကစလို့ ခပ်စိပ်စိပ်ဖြစ်လာပြီး၊ ဒေသခံကာကွယ်ရေးတပ်တွေနဲ့လည်း မကြာခဏဆိုသလို ထိတွေ့ တိုက်ပွဲတွေ ဖြစ်ပွားလျှက် ရှိနေပါတယ်။