အောင်လအန်ဆန်း

မြေလတ်အသံ၊ ဖေဖော်ဝါရီ ၂၁၊၂၀၂၅။

ဖေဖော်ဝါရီ ၂၀ ရက် ဒီနေ့ညမှာ ကာတာနိုင်ငံမှာကျင်းပတဲ့ ONE 171 ပြိုင်ပွဲမှာတော့  အောင်လအန်ဆန်းဟာ ပထမအချီ ၁ မိနစ်မပြည့်ခင်မှာပဲ ပြိုင်ဘက်ရှာမီးအာဒိုဂန်ရဲ့ အမြင့်ကန်ချက် တချက်တည်းနဲ့ အလဲထိုးအရှုံးပေးခဲ့ရပါတယ်။ 

မြေလတ်အသံ၊ ဖေဖော်ဝါရီ ၂၀၊၂၀၂၅။

ဖေဖော်ဝါရီ ၂၀ ရက်၊ ကာတာနိုင်ငံမှာကျင်းပသွားမယ့် ONE 171 ပြိုင်ပွဲမှာတော့ အောင်လအန်ဆန်းရဲ့ပွဲစဉ်ပါဝင်ပြီး တူရကီနိုင်ငံသား အာဒိုဂန်နဲ့ မကြေပွဲပြန်လည်ထိုးသတ်သွားရမှာ ဖြစ်ပါတယ်။ 

ဒီပွဲဟာနှစ်ယောက်စလုံးအတွက် ပြိုင်ဘက်မခြားဘဲ နှစ်ပွဲဆက်တိုက်ထိုးကြရတာဖြစ်ပြီး ပထမတွေ့ဆုံစဉ်မှာတုန်းကတော့ အာဒိုဂန်က အောင်လကို အသာစီးကထိုးသတ်ကစားသွားခဲ့ကာ ဒုတိယအချီမှာ ဒိုင်ပွဲရပ်နဲ့အနိုင်ရသွားခဲ့ပါတယ်။ 

အဲ့ဒီပွဲစဉ်မှာ အာဒိုဂန်ဟာဝိတ်တောင်လာမချိန်ဘဲကစားခဲ့တာကြောင့် အဲ့ဒီအကျိုးဆက်အနေနဲ့ အနိုင်ရပေမယ့် ဘောနပ်စ်ဆုနဲ့ဝေးခဲ့ရသလို ချန်ပီယံခါးပတ်စိန်ခေါ်ခွင့်ကိုပါလက်လွှတ်ဆုံးရှုံးခဲ့တယ်လို့ ထင်ရပါတယ်။ 

အခုပွဲပြန်လည်တွေ့ဆုံရာမှာတော့ အာဒိုဂန်သာသတ်မှတ်ဝိတ်အတွင်း ဝင်ရောက်ခြင်းမရှိရင် ဒီပွဲစဉ်ကို လက်ခံကစားမှာမဟုတ်ဘူးလို့ ပြောကြားခဲ့တဲ့အောင်လဟာ သူကိုယ်တိုင် ဟိုက်ဒရေးရှင်းစစ်ဆေးမှုကို မကျော်ဖြတ်နိုင်ခဲ့ပါဘူး။ အာဒိုဂန်ကတော့ သတ်မှတ်ဝိတ်ရော၊ ဟိုက်ဒရေးရှင်းစစ်ဆေးမှုမှာပါ အောင်မြင်သွားတာကြောင့် ဝိတ်ကိုချိန်ညှိထိုးသတ်ရတော့မှာဖြစ်သလို အောင်လအနေနဲ့ သူ့ရဲ့ထိုးကြေးတွေထဲကနေ တချို့တဝက်ကို ခွဲဝေပေးရတော့မှာလည်းဖြစ်ပါတယ်။  

နောက်ဆုံးထွက်ပေါ်လာတဲ့သတင်းတွေအရ ကစားသမား ၂ ဦးဟာ ပေါင်ချိန် ၂၁၀ နဲ့ ဝိတ်ညှိထိုးသတ်သွားမယ်လို့ သိရပါတယ်။ 

ဒီပွဲဟာ ပရိသတ်တွေအနေနဲ့ အောင်လရဲ့အသက်အရွယ်အရရော ပထမပွဲတွေ့ဆုံစဉ်က အာဒိုဂန်နဲ့ ကွာခြားနေတဲ့ ကစားပုံတွေကြောင့်ပါ အောင်လအနိုင်ရဖို့အတွက် မမျှော်လင့်ရဲကြသလို ကစားသမား ကိုယ်တိုင်ကလည်း ခက်ခဲမယ့်ပွဲတပွဲဖြစ်တယ်လို့ ဝန်ခံပြောကြားထားပါတယ်။ 

ကစားပုံကစားပေါက်ချင်းယှဉ်ရင် အာဒိုဂန်ဟာ ချုပ်ကွက်အားသာချက်ရှိတဲ့ကစားသမားဖြစ်ပြီး ယှဉ်ထိုးရင်လည်း လက်ရည်မနိမ့်တဲ့ကစားသမားတယောက်ဖြစ်ပါတယ်။ ဘယ်ခြေ၊ ဘယ်လက်အားပြုကစားပြီး သူ့ရဲ့လက်သီးချက်တွေအားပါပြင်းထန်တာကို အောင်လနဲ့ပထမပွဲမှာ မြင်နိုင်သလို ခြေကန်ချက်ကောင်းမွန်တာကိုလည်း ဖန်ရောင်နဲ့ပွဲမှာ မြင်တွေ့ခဲ့ရပါတယ်။ 

အောင်လထက် အရပ်နဲ့လက်တံလည်း အားသာချက်ရှိနေတာကြောင့် သူ့ရဲ့ဟာကွက်ကိုရှာဖွေဖို့ ခက်လှပါတယ်။ ဒါပေမယ့် အောင်လနဲ့ပထမပွဲစဉ်ထိုးသတ်ချိန်တုန်းက ဝိတ်ချိန်တာကို မလာရောက်ဘဲ ဝိတ်အသားစီးနဲ့ထိုးသတ်သွားတဲ့အာဒိုဂန်ဟာ ဒီပွဲမှာ သူအရပ်အမောင်းနဲ့ဆို ခက်ခဲနိုင်တဲ့ ဝိတ်သတ်မှတ်ချက်ထဲဝင်အောင်ကြိုးစားထားတာကြောင့် ပထမပွဲစဉ်လောက် ခွန်အားကုန်သုံးနိုင်မလား စောင့်ကြည့်ရပါမယ်။ 

အောင်လကတော့ ပထမပွဲစဉ်မှာ အာဒိုဂန်ပြုသမျှနုခဲ့ရတာကို အခဲကြေဖို့မလွယ်လောက်ဘဲ အစွမ်းကုန် အားထုတ်လာမယ်လို့ ထင်မိပါတယ်။ သူ့ရဲ့အားသာချက်ဖြစ်တဲ့ ညာဖြောင့်လက်သီးချက်တွေ အမြင့်ကန်ချက်တွေ ဒီပွဲမှာမြင်ရမယ်လို့လည်း မျှော်လင့်မိပါတယ်။ 

တချိန်က ONE ရဲ့ပုံရိပ်မြှင့်တင်ရေးမှာ အရေးပါတဲ့ကစားသမားတယောက်ဖြစ်ခဲ့တဲ့ အောင်လဟာ သူ့ရဲ့အောင်မြင်မှု အခြေအနေတွေနားကို တခါပြန်ကပ်နိုင်ဖို့ ဘယ်လောက်အထိကြိုးစားနိုင်မလဲဆိုတာ ဒီနေ့ည ၉း၃၀ အချိန်မှာ ကြည့်ရတော့မှာဖြစ်ပါတယ်။ 

ဒီပွဲမှာရော အောင်လအန်ဆန်းနဲ့ ရှာမီးအာဒိုဂန်ရဲ့ပွဲအဖြေ ဘယ်လိုဖြစ်လာမလဲ။ အာဒိုဂန်ကပဲ နိုင်ပွဲထပ်ယူသွားမလား။ အောင်လကပဲ မကြေပွဲမှာ အနိုင်ပြန်ယူနိုင်မလား မိမိတို့ရဲ့အမြင်တွေကို Comment မှာရေးသားသွားပါဦးခင်ဗျ။ 

မြေလတ်အသံ၊ စက်တင်ဘာ ၇၊ ၂၀၂၄။

စက်တင်ဘာ ၇ ရက် ဒီနေ့မနက်မှာထိုးသတ်သွားတဲ့ ONE:168 ပြိုင်ပွဲမှာ အောင်လအန်ဆန်းဟာ တူရကီဖိုက်တာ အာဒိုဂန်ကို အလဲထိုးနဲ့ရှုံးနိမ့်သွားခဲ့ပါတယ်။ 

ဒီနေ့ပွဲအတွက်အောင်လဟာ သေချာပြင်ဆင်အားခဲထားခဲ့ပေမယ့် ထင်ထားသလိုမဖြစ်ခဲ့ပါဘူး။ အာဒိုဂန်ဟာ ပွဲရဲ့ပထမအချီမှာကတည်းက တချက်နှစ်ချက်သာယှဉ်ထိုးခဲ့ပြီး သူအားသန်တဲ့ချုပ်ကွက်ကို အသုံးချဖို့ကြိုးစားခဲ့ကာ ပွဲကိုလည်း ထိန်းချုပ်သွားခဲ့ပါတယ်။ 

ပွဲရဲ့ဒုတိယအချီမှာတော့ အာဒိုဂန်ဟာသက်လုံခြွေဖို့အတွက် အောင်လကိုထိုးချက်ကန်ချက်တွေနဲ့ အခြေအနေအကဲခတ် ထိုးသတ်ခဲ့ပြီး အောင်လဘက်ကတုံ့ပြန်မှုတွေအားနည်းနေမှန်းသိချိန်မှာတော့ ဘယ်ခြေကန်ချက်၊ ဘယ်ညာလက်သီးချက်တွေကို ဆက်တိုက်အသုံးပြုခဲ့ပြီး အောင်လလဲကျသွားချိန်မှာ ဆက်တိုက်ထိုးနှက်ပြီး အနိုင်ယူသွားခဲ့တာပဲဖြစ်ပါတယ်။ 

ဒီပွဲစဉ်အတွက်အားခဲပြင်ဆင်ထားတဲ့အောင်လအနေနဲ့ ရှုံးနိမ့်သွားရတာဟာအထိနာခဲ့ရသလို အောင်လအန်ဆန်ရဲ့ပွဲစဉ်တွေ One ရဲ့စင်မြင့်ထက်မှာမြင်ရဖို့ ခက်ခဲသွားခဲ့ပြီး အနိုင်ရရှိသွားသူ အာဒိုဂန်ကတော့ လက်ရှိ ဝိတ်တန်းသုံးခုရဲ့ချန်ပီယံ အနာတိုလီမာလီကင် ကိုပါ စိန်ခေါ်သွားခဲ့ပါတယ်။ 

Photo – One Championship Live SS

မြေလတ်အသံ၊ စက်တင်ဘာ ၆၊ ၂၀၂၄။

One Championship ပြိုင်ပွဲတွေမှာ မြန်မာပရိသတ်တွေသာမကဘဲ အာရှပရိသတ်တွေရဲ့ဝန်းရံမှုကိုပါ အခိုင်အမာရရှိထားတဲ့ ကချင်သားကြီး အောင်လအန်ဆန်းကတော့ အမေရိကန်နိုင်ငံ၊ ဒန်ဗာမြို့မှာပြုလုပ်မယ့် ONE 168:Denver ပွဲမှာ တူရကီကိုယ်စားပြုဖိုက်တာ အာဒိုဂန်နဲ့ ယှဉ်ပြိုင်ထိုးသတ်သွားမှာဖြစ်ပါတယ်။ 

အောင်လဟာ ၂၀၂၃ မေလမှာ ထိုးသတ်အနိုင်ရရှိခဲ့တဲ့ တရုတ်ဖိုက်တာ ဖန်ရောင်နဲ့ပွဲပြီးချိန်ကတည်းက ပြိုင်ပွဲတွေနဲ့ဝေးကွာနေခဲ့တာဖြစ်ပြီး မစ်ဒယ်ဝိတ်နဲ့ လိုက်ဟဲဗီးဝိတ်တန်းတွေမှာ ချန်ပီယံဖြစ်ခဲ့ဖူးတဲ့ အောင်လအတွက်တော့  ဒီပွဲဟာ ချန်ပီယံခါးပတ်ပြန်လည်မျှော်လင့်ချက်အတွက် ခက်ခဲတဲ့စမ်းသပ်မှုကို ခံယူရမယ့် ပွဲစဉ်တပွဲလည်း ဖြစ်ပါတယ်။ 

အောင်လဟာ ဒီပွဲစဉ်အတွက် မျှော်လင့်ချက်တွေအများကြီးထားထားတယ်ဆိုတာကိုတော့ သူ့ရဲ့ပြင်ဆင်မှုရုပ်သံဖိုင်တွေက သက်သေပြနေပါတယ်။ အမြင့်ကန်ချက်တွေ၊ လက်သီးပါဝါပြင်းပြင်းတွေနဲ့ Stand Fight ပိုင်းကိုပိုင်နိုင်တဲ့အောင်လအတွက် အခုတခါပြိုင်ဘက်ကတော့ နပန်းကစားနည်းကို ကြေညက်အားသန်တဲ့ဖိုက်တာတယောက်ဖြစ်ပါတယ်။ 

အောင်လအနေနဲ့ ပွဲစဉ်တလျှောက်မှာ အာဒိုဂန်ရဲ့ဆွဲလှဲတာကို တောင့်ခံနိုင်ဖို့ကြိုးစားရမှာဖြစ်သလို ရုတ်တရက်ဝင်လာနိုင်တဲ့ ဘယ်ခြေကန်ချက်နဲ့ ဘယ်ထောက်လက်သီးတွေကိုလည်း သတိပြုသွားရမှာဖြစ်ပါတယ်။ တူရကီကိုယ်စားပြုထိုးသတ်နေတဲ့ အာဒိုဂန်ကတော့ ရုရှမှာမွေးဖွားကြီးပြင်းခဲ့တာကြောင့် နပန်းပိုင်းပိုင်နိုင်ပြီး တခြားနပန်းအားသန်ကစားသမားတွေထက် သာလွန်တဲ့အချက်ကတော့ Stand Fight ပိုင်းမှာလည်း ကောင်းကောင်းကစားနိုင်တာဖြစ်ပါတယ်။ 

အာဒိုဂန်ဟာ အသက် ၃၄ နှစ်အရွယ်ရှိနေပြီဖြစ်ပြီး ၂၀၂၃ ဇွန်လမှာ အောင်လနောက်ဆုံးထိုးသတ် အနိုင်ယူထားတဲ့ တရုတ်ဖိုက်တာဖန်ရောင်ကိုပဲ ထိုးသတ်အနိုင်ရရှိထားပြီး ပြိုင်ပွဲတွေနဲ့ ဝေးကွာနေပေမယ့် လှုပ်ရှားထိုးသတ်ပုံတွေကတော့ ပေါ့ပါးကောင်းမွန်နေတုန်းပါပဲ။ ပြိုင်ပွဲမှတ်တမ်းတွေမှာတော့ ရှုံးပွဲမရှိသေးတဲ့ဖိုက်တာတယောက်ဖြစ်ပြီး ပြိုင်ဘက်ကို Ground ပေါ်ရောက်အောင် ဆွဲခေါ်တတ်သူတယောက်ဖြစ်ကာ ဆွဲလှဲနိုင်လိုက်တာနဲ့ ပြိုင်ပွဲကိုဦးဆောင်ထိုးသတ်သွားနိုင်သူတယောက်လည်း ဖြစ်ပါတယ်။ 

ONE 168 ပွဲမှာ မာဂုဏ်မြင့်မားတဲ့အောင်လအန်ဆန်းက အားပါပြင်းထန်တဲ့ ထိုးချက်၊ ကန်ချက်တွေနဲ့ အနိုင်ပိုင်းပြီး တကျော့ပြန်ချန်ပီယံခြေလှမ်းတွေပြန်လှမ်းလာမလား၊ အာဒိုဂန်ကပဲ မြေပြင်ပေါ် ဆွဲခေါ်လှဲချ အနိုင်ယူသွားမလားဆိုတာကို စောင့်ကြည့်ရပါတော့မယ်။ 

အမေရိကန်နိုင်ငံ၊ ကော်လိုရာဒိုပြည်နယ်၊ ဒန်ဗာမြို့မှာကျင်းပမယ့် ONE 168: Denver ပြိုင်ပွဲကို စက်တင်ဘာ ၇ ရက် မြန်မာစံတော်ချိန် မနက် ၆း၃၀ နာရီမှာ စတင်ကျင်းပသွားမှာဖြစ်ပြီး One Championship ရဲ့ Youtube Channel နဲ့ Facebook Page တို့မှာ ကြည့်ရှုနိုင်မှာဖြစ်ပါတယ်။  

Photo – SS from One Championship Youtube.