မြေလတ်အသံ၊ သြဂုတ် ၁၆၊ ၂၀၂၅။

မန္တလေးတိုင်း၊ အိုးဘိုအကျဥ်းထောင် ဗုံးကြဲတိုက်ခိုက်ခံရတာကြောင့် နိုင်ငံရေးအကျဥ်းသား ၇ ဦး သေဆုံးခဲ့တယ်လို့ သြဂုတ် ၁၆ ရက်ဒီကနေ့မှာ မြန်မာနိုင်ငံလုံးဆိုင်ရာနိုင်ငံရေးအကျဥ်းသားများ ကွန်ရက် – PPNM က ထုတ်ပြန်ပါတယ်။

သြဂုတ် ၈ ရက်မနက်ပိုင်းမှာ အိုးဘိုထောင်ရှိ အမျိုးသားအဆောင် ၄ နဲ့ ၆ အပေါ်ကို ဒရုန်းဗုံးသီး ၃ လုံးကြဲချခံရာ ဗုံးသီး ၂ လုံး ပေါက်ကွဲမှုဖြစ်သွားခဲ့တာကြောင့် အသက် ၂၃ နှစ်ကနေ ၃၇ နှစ်အရွယ်ရှိ နိုင်/ကျဥ်းအမျိုးသား ၇ ဦး သေဆုံးခဲ့တာလို့ ဆိုပါတယ်။

“ဒရုန်းဗုံးကြဲချမှုအပေါ်မှာ နိုင်ငံရေးအကျဥ်းသားတွေ၊ တခြားအကျဥ်းသားတွေလည်း သေဆုံးမှုရှိခဲ့ပါတယ်။ နိုင်ငံရေးအကျဥ်းသားသေဆုံးမှုကတော့ ပိုပြီးတော့များတယ်။ ကျနော်တို့အတည်ပြုထားနိုင်တာက အနည်းဆုံး ၇ ဦးရဲ့အချက်အလက်တွေကို အတည်ပြုထားနိုင်ခဲ့တယ်”လို့ PPNM မှ ဦးဆောင်ကော်မတီဝင် ကိုသိုက်ထွန်းဦးကပြောပါတယ်။

ဒါ့အပြင် ဒဏ်ရာရရှိတဲ့ အကျဥ်းသား အနည်းဆုံး ၁၀ ဦးဝန်းကျင်ရှိပြီး အသက်အန္တရာယ်စိုးရိမ်ရတဲ့ အခြေအနေဖြစ်နေကြတယ်လို့ ကိုသိုက်ထွန်းဦးကဆိုပါတယ်။

ဗုံးကြဲခံရတဲ့နေ့မှာ ထောင်ပြင်ပအနီးပတ်ဝန်းကျင်မှာ တိုက်ပွဲဖြစ်တာမရှိဘဲ ဒရုန်းဗုံးနဲ့ရုတ်တရက်ကြဲချခံလိုက်ရတာဖြစ်ပြီး ဒီလိုလုပ်ရပ်အပေါ် PPNM အနေနဲ့ လုံးဝကန့်ကွက်ရှုတ်ချတယ်လို့လည်း ကိုသိုက်ထွန်းဦးက ပြောပါတယ်။

“လုပ်တဲ့(ဗုံးကြဲ)အဖွဲ့အစည်းကတော့ တော်လှန်ရေးတပ်လား၊ စစ်တပ်လားဆိုတာ အတည်မပြုနိုင်သေးဘူး။ စုံစမ်းနေဆဲဖြစ်ပါတယ်။ မည်သည့်အဖွဲ့ကပဲလုပ်သည်ဖြစ်စေ ကျနော်တို့အနေနဲ့ ဒီကိစ္စကို ပြင်းပြင်းထန်ထန် ကန့်ကွက်ပါတယ်”လို့ သူကဆိုပါတယ်။

အကျဥ်းထောင် တိုက်ခိုက်ခံရမှုနဲ့ပတ်သက်တဲ့ အခြေအနေအတိအကျကိုတော့ မြေလတ်အသံက သီးခြားအတည်မပြုနိုင်သေးပါဘူး။

သေဆုံးသူနိုင်ငံရေးအကျဥ်းသား ၇ ဦးရဲ့ ကိုယ်ရေးအချက်အလက်တွေအကုန်လုံးကို မြန်မာနိုင်ငံလုံးဆိုင်ရာနိုင်ငံရေးအကျဥ်းသားများကွန်ရက် – PPNM က ရရှိထားပြီးဖြစ်ပေမယ့် လုံခြုံရေးအရ ဖော်ပြနိုင်မှုမရှိဘူးလို့လည်း သိရပါတယ်။

စာတည်း – လင်း

ရွေးကောက်ပွဲအတွက် ကြိုတင်မဲလုပ်မှာကို စိုးရိမ်နေ

မြတ်

မန္တလေး၊ ဇူလိုင် ၉၊ ၂၀၂၅။

မန္တလေးမြို့၊ အိုးဘိုအကျဉ်းထောင်မှာ အကျဉ်းသားတွေရဲ့ မှတ်ပုံတင်နံပါတ်တွေကိုအတည်ပြုကောက်ခံပြီး လက်မှတ်ထိုးခိုင်းခဲ့တယ်လို့ နိုင်ငံရေးအကျဉ်းသားတွေရဲ့ မိသားစုဝင်တွေဆီက သိရပါတယ်။

ဇွန်လနောက်ဆုံးပတ်အတွင်းကစပြီး အကျဥ်းသားတွေအားလုံးကို ဘာကိစ္စဆိုတာမပြောဘဲ လက်မှတ်ထိုးခိုင်းခဲ့တာဖြစ်ပြီး ခုလိုလုပ်တာဟာ ရွေးကောက်ပွဲအတွက် ကြိုတင်မဲလုပ်လိုက်မှာကို စိုးရိမ်မှုတွေလည်း ရှိနေကြတယ်လို့ ဆိုပါတယ်။

“ဘာလုပ်ဖို့ကောက်ခိုင်းတာလဲဆိုတာ မပြောဘူးတဲ့။ အကုန်လက်မှတ်ထိုးခိုင်းတယ်။ အကုန်လုံးက စစ်ကောင်စီကလုပ်မယ့် ရွေးကောက်ပွဲမှာ ကြိုတင်မဲတွေလုပ်ပစ်မှာကို စိုးရိမ်နေကြတယ်”လို့ နိုင်ငံ ရေးအကျဉ်းသူရဲ့မိသားစုဝင်တဦးက ပြောပါတယ်။

အိုးဘိုထောင်တွင်းရှိ အမျိုးသားအကျဉ်းထောင်ဘက်မှာတော့ ပြီးခဲ့တဲ့ ၂၀၂၄ ခုနှစ်အတွင်းမှာ မှတ်ပုံတင်နံပါတ်၊ ဖခင်အမည်၊ အသက်၊ အရပ်နဲ့ ရောဂါရှိမရှိကိုပါစစ်ဆေးထားခဲ့တာရှိခဲ့ပြီး အခုနှစ် ဇွန်လမှာ ထပ်မံ မှတ်ပုံတင်နံပါတ်တွေအတည်ပြုပြီး လက်မှတ်ထိုးခိုင်းခဲ့တာလို့ သိရပါတယ်။

“အရင်ကစစ်မှုထမ်းအတွက် အရပ်တွေပါတိုင်းတယ်ထင်တာပဲ။ ညှိပြီးလွတ်သွားတဲ့သူတွေရှိတယ်လဲသတင်းကြားတယ်။ အခုကဘာမှမေးမရဘဲ လက်မှတ်ထိုးခိုင်းတာလို့ ပြောတယ်”လို့ နိုင်ငံရေးအကျဥ်းသားဟောင်းတဦးကပြောပါတယ်။

စစ်ခေါင်းဆောင်မင်းအောင်လှိုင်ကတော့ ရွေးကောက်ပွဲကို လာမယ့် ၂၀၂၅၊ ဒီဇင်ဘာလနဲ့ ဇန်နဝါရီလ တို့မှာ မဖြစ်မနေပြုလုပ်သွားမယ်လို့ ပြီးခဲ့တဲ့ ဇွန်လထဲမှာ ပြောကြားခဲ့ပါတယ်။

မြေလတ်အသံ၊ ဇူလိုင် ၁၊ ၂၀၂၅။

မန္တ‌လေး၊ အိုးဘိုထောင်ကို ပြောင်းရွှေ့ခံရချိန် ထောင်အရာရှိတဦးရဲ့ ရိုက်နှက်မှုကြောင့် နဖူးကွဲဒဏ်ရာရရှိခဲ့တဲ့ သပိတ်ခေါင်းဆောင် ကိုဝေမိုးနိုင် ဆေးရုံတက်ကုသခွင့်မရဘဲ ဒီ‌နေ့အထိ တိုက်ပိတ်ခံထားရတယ်လို့ မြန်မာနိုင်ငံလုံးဆိုင်ရာနိုင်ငံရေးအကျဥ်းသားများကွန်ရက်(PPNM)က ထုတ်ပြန်ထားပါတယ်။

ဇွန် ၁၂ ရက်နေ့က မုံရွာထောင်ကပြောင်းလာတဲ့ ကိုဝေမိုးနိုင်ကိုထောင်ဗူးဝမှာ အိုးဘိုထောင်အရာရှိက သံတုတ်နဲ့ ရိုက်နှက်ခဲ့မှုကြောင့် သတိ မေ့မျောသွားခဲ့ပြီး နဖူးကွဲဒဏ်ရာရရှိခဲ့တာလို့ သိရပါတယ်။

ဒါ့အပြင် ဦးခေါင်းနဲ့ခန္ဓာကိုယ်အနှံ့မှာ ထိခိုက်ဒဏ်ရာတွေရရှိခဲ့ပေမယ့် ထောင်အာဏာပိုင်တွေက ဆေးရုံကိုပို့ဆောင်တာမရှိဘဲ ဇူလိုင် ၁ ရက်၊ ဒီနေ့ထိ တိုက်ပိတ်ပြစ်ဒဏ်ချခံထားရတယ်လို့ ဆိုပါတယ်။

“ပေါက်ပြဲဒဏ်ရာပေါ့။ ဆိုးဆိုးဝါးဝါးဒဏ်ရာတွေကိုတော့ ချုပ်ထားရတယ်။ ဒါကိုတော့ အတည်ပြုဖို့ကြိုးစားနေဆဲဖြစ်ပါတယ်။ လုံးလုံးဆေးဝါးကုသမှု မပေးဘူးဆိုတဲ့အခြေအနေမျိုးမဖြစ်ရလေအောင် အင်မတန်စိုးရိမ်ရပြီး ဦးခေါင်းပေါက်ပြဲတဲ့ ဒဏ်ရာတွေဆိုရင် ဆရာဝန်တွေ၊ ဆေးရုံတွေဘက်ကနေမှ လာရောက်ပြီးမှ ကြည့်ရှုကုသတာမျိုးပေါ့။ ကုသတဲ့နေရာမှာလည်း လာရောက်ကြည့်ရှုပြီးမှ လိုအပ်တဲ့ ဒီချုပ်ဖို့လိုအပ်တာဆိုရင် ချုပ်ဖို့ကြိုးစားတာမျိုးတော့ ဆောင်ရွက်တာရှိတယ်”လို့ PPNMမှဦးဆောင်ကော်မတီဝင် ကိုသိုက်ထွန်းဦးက ပြောပါတယ်။

ဒါ့အပြင် ကိုဝေမိုးနိုင်ဟာ ပါဆယ်နဲ့ထောင်ဝင်စာဧည့်တွေ့ခွင့်‌တွေကိုပါ ကန့်သတ်ထားခံထားရပြီး ခြေကျင်းခတ်ကာ သီးခြားတိုက်မှာ တိုက်ပိတ်ပြစ်ဒဏ်ပေးခံထားရတာဖြစ်တယ်လို့ ကိုသိုက်ထွန်းဦးက ပြောပါတယ်။

ထောင်ဗူးဝမှာ ရိုက်နှက်ခံရချိန် ရိုက်နှက်သူ ထောင်အရာရှိက “မင်းလားကွာ..ဝေမိုးနိုင်၊ မင်းကိုငါတို့က စောင့်နေတာ။ မင်းလားကွာ..သပိတ်ခေါင်းဆောင်”ဆိုတဲ့စကားလုံးတွေကို ပြောပြီးဆဲဆိုကာရိုက်နှက်ခဲ့တာကြောင့် ကိုဝေမိုးနိုင်ကို ပုဂ္ဂိုလ်ရေးအရ ဂုဏ်သိက္ခာကျဆင်း​​စေပြီး ဦးချိုးတဲ့သဘောမျိုးလို့ ကိုသိုက်ထွန်းဦးက သုံးသပ်ပြောဆိုပါတယ်။

ပြီးခဲ့တဲ့ဇွန် ၁၂ ရက်မနက် ၅ နာရီကျော်မှာ မုံရွာထောင်ကနေ နိုင်ငံရေးအကျဥ်းသား ၁၀၀ ခန့်နဲ့ ရာဇဝတ်မှုကြောင့် အကျဥ်းကျနေတဲ့ အကျဥ်းသား ၁၀၀ ခန့်တို့မှာ အနော က်မြောက်တိုင်းစစ်ဌာနချုပ်(နမခ)မှ သံ ပြားကာကား ၂ စီး၊ အိမ်စီးကား ၃ စီး၊ ဆယ့်နှစ်ဘီးကား ၆ စီးတို့နဲ့ အိုးဘိုထောင်ကို ပို့ဆောင်ခံလိုက်ရတာပါ။

အဲဒီအထဲက ကိုဝေမိုးနိုင်အပါအဝင် နိုင်ငံရေး အကျဉ်းသား၊ အကျဉ်းသူတွေကို အိုးဘိုထောင်အဝင်မှာ ထောင်ဝန်ထမ်းတွေက ဝိုင်းဝန်းရိုက်နှက်ခဲ့ကြပြီး အများစုကို သီးခြားတိုက်ပိတ်ထားတယ်လို့ သိရပါတယ်။

ဒါ့အပြင် အိုးဘိုထောင်ကနေတဆင့် နိုင်ငံရေးအကျဥ်းသား တချို့နဲ့ ရာဇဝတ်မှုကြောင့်ကျခံနေရတဲ့ အကျဥ်းသားတချို့တို့ကို ဇွန် ၁၃ ရက်နေ့မှာ မြင်းခြံထောင်နဲ့ မ‌ကွေးထောင်တွေဆီ အသီးသီးပို့ဆောင်ခံလိုက်ရတယ်လို့ သိရပါတယ်။

စာတည်း – မြတ်

မြေလတ်အသံ၊ ဇွန် ၁၆၊ ၂၀၂၅။

မန္တလေး၊ အိုးဘိုထောင်ဗူးဝမှာ ထောင်အာဏာပိုင်တွေ ရိုက်နှက်မှုကြောင့် ဒဏ်ရာပြင်းထန်ရရှိခဲ့တဲ့ ကိုဝေမိုးနိုင်အပါအဝင် နိုင်ငံရေးအကျဥ်းသား ၅၀ ဦး ဆေးကုသခွင့်လုံးဝမရရှိကြဘူးလို့ မြန်မာနိုင်ငံလုံးဆိုင်ရာနိုင်ငံရေးအကျဥ်းသားများကွန်ရက် – PPNM ဆီကသိရပါတယ်။

အဆိုပါ နိုင်ငံရေးအကျဥ်းသားတွေဟာ မုံရွာထောင်ကနေ ပြောင်းရွေ့ခံရပြီး ဇွန် ၁၂ ရက်မှာ အိုးဘိုထောင်ကိုရောက်ရှိချိန် ထောင်အာဏာပိုင်တွေက နံပါတ်တုတ်တွေကျိုးကျတဲ့အထိ ရိုက်နှက်ခဲ့တာလို့ဆိုပါတယ်။

“ရိုက်တဲ့ဟာကလည်း စနစ်တကျကို ရည်ရွယ်ချက်ရှိရှိနဲ့ ထောင်ဝင်မှာဦးကျိုးအောင်လို့ ရိုက်တဲ့ကိစ္စရပ်ဖြစ်တဲ့အတွက် ဆေးဝါးစောင့်ရှောက်မှုကတော့ မရရှိဘူး။ ဒီလိုဖြစ်အောင်ကို သေချာရိုက်တဲ့အတွက် ဆေးဝါးကုသဖို့ဆိုတာ အခက်အခဲအများကြီးပဲ ကျနော်တို့နိုင်/ကျဥ်းတွေ အတွက်ရှိပါတယ်”လို့ PPNMမှ ဦးဆောင်ကော်မတီဝင် ကိုသိုက်ထွန်းဦးက ပြောပါတယ်။

ရိုက်နှက်ခံရတဲ့ နိုင်ငံရေးအကျဥ်းသား ၅၀ ဦးမှာ ဦးခေါင်းပေါက်ပြဲဒဏ်ရာနဲ့ ခန္ဓာကိုယ်မှာ ဒဏ်ရာအသီးသီးရရှိခဲ့ကြပေမယ့် ဇွန် ၁၆ ရက်ဒီကနေ့အချိန်ထိ ဆေးကုသခွင့်မရရှိခဲ့ကြဘူးလို့ သူကဆိုပါတယ်။

ပြီးခဲ့တဲ့ဇွန် ၁၂ ရက်မနက် ၅ နာရီကျော်မှာမုံရွာထောင်ကနေ နိုင်ငံရေးအကျဥ်းသား ၁၀၀ ခန့်နဲ့ ရာဇဝတ်မှုကြောင့် အကျဥ်းကျနေတဲ့ အကျဥ်းသား ၁၀၀ ခန့်တို့ဟာ အနောက်မြောက်တိုင်းစစ်ဌာနချုပ်က သံပြားကာကား ၂ စီး၊ အိမ်စီးကား ၃ စီး၊ ဆယ့်နှစ်ဘီးကား ၆ စီးတို့နဲ့ အိုးဘိုထောင်ကိုပို့ ဆောင်ခံလိုက်ရတာလို့ PPNM ကထုတ်ပြန်ထားပါတယ်။

အိုးဘိုထောင်ကနေတဆင့် နိုင်ငံရေးအကျဥ်းသားတချို့နဲ့ ရာဇဝတ်မှုကြောင့်ကျခံနေရတဲ့ အကျဥ်းသားတချို့တို့ကို ဇွန် ၁၃ ရက်မှာ မြင်းခြံထောင်နဲ့ မ‌ကွေးထောင်တွေဆီ အသီးသီးပို့ဆောင်ခံလိုက်ရတယ်လည်း သိရပါတယ်။

ပြီးခဲ့တဲ့ဧပြီ ၁၃ ရက်လည်း မကွေးထောင်ရှိ ထောင်အာဏာပိုင်တွေက နိုင်ငံရေးအကျဉ်းသား ၄၀ ကျော်ကို မြေမြင်ပေါ်မှာဝမ်းလျားမှောက်ခိုင်းကာ ရိုက်နှက်ခဲ့တာကြောင့် နိုင်/ကျဥ်းတွေမှာ ခါး၊ ခြေထောက်နဲ့ တင်ပါးတွေမှာ ဒဏ်ရာအသီးသီးရရှိခဲ့ကြပေမယ့် ဆေးဝါးကုသခွင့်မရရှိခဲ့ကြဘူးလို့ သိရပါတယ်။

စာတည်း – လင်း

မြေလတ်အသံ၊ ဇွန် ၁၅၊ ၂၀၂၅။

မန္တလေး၊ အိုးဘိုထောင်မှာ ဆေးကုသခွင့်မရရှိတာကြောင့် နိုင်ငံရေးအကျဉ်းသူ CDM ကျောင်းအုပ်ဆရာမ ၁ ဦးသေဆုံးခဲ့တယ်လို့ ဇွန် ၁၄ ရက်မှာ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် – PPNM က ထုတ်ပြန်ပါတယ်။

သေဆုံးသူမှာ အလယ်တန်းကျောင်းအုပ် ဒေါ်မြင့်မြင့်သန်းဖြစ်ပြီး တီဘီရောဂါဝေဒနာကို ခံစားနေရကာ ထောင်ပြင်ပဆေးရုံမှာကုသခွင့်မရခဲ့ဘဲ မေ ၇ ရက်မှာသေဆုံးခဲ့တာလို့ ဆိုပါတယ်။

“ဆရာမကြီးက သွေးကြောပေါက်ချိန်မှာ ပြင်ပဆေးရုံကို ပို့ဆောင်ကုသခွင့်မရခဲ့ဘူး။ သွေးကြောပေါက်တယ်ဆိုတဲ့အခြေအနေကတော့ နောက်ပိုင်းမှာမှကြားသိရတာပါ။ တကယ်တော့ တီဘီရောဂါအခံကြောင့်မို့လို့ ကိုယ်ခံအားကျဆင်းပြီး ကျဆုံးရတဲ့အခြေအနေ ပိုပြီးဖြစ်ဖို့များပါတယ်။”လို့ PPNMမှ ဦးဆောင်ကော်မတီဝင် ကိုသိုက်ထွန်းဦးက ပြောပါတယ်။

ဒေါ်မြင့်မြင့်သန်း သေဆုံးရတာတဲ့ အဓိကအကြောင်းအရင်းမှာ သွေးကြောပေါက်ပြီးသေဆုံးတာလို့ စုံစမ်းသိရှိရပေမယ့် ဆေးမှတ်တမ်းကို ရယူကြည့်ခွင့်မရှိခဲ့တဲ့အတွက် တီဘီရောဂါအခံအပါအဝင် ကိုယ်ခံအားကျဆင်းလာမှုကြောင့် တခြားရောဂါတွေဝင်လာခဲ့ချိန် ဆေးပြင်းတွေ၊ ဆေးဝါးမျိုးစုံသောက်သုံးရတဲ့အတွက် သေဆုံးရတာလို့ ကိုသိုက်ထွန်းဦးက ယူဆပါတယ်။

ဒေါ်မြင့်မြင့်သန်းဟာ ပြီးခဲ့တဲ့ ၂၀၂၃ ဇူလိုင် ၂၇ ရက်မှာ ဖမ်းဆီးခံရပြီးနောက် ပုဒ်မ – ၅၂(က)နဲ့ အိုးဘိုထောင်မှာ ထောင်ဒဏ် ၅ နှစ်ချမှတ်ခံရသူ ဖြစ်ပါတယ်။

အလားတူ ပြီးခဲ့တဲ့ဇွန် ၁၃ ရက်မှာလည်း အိုးဘိုထောင်မှာ ထောင်ဒဏ် ၁၈ နှစ်ကျခံနေရတဲ့ နိုင်ငံရေးအကျဥ်းသား ဦးမော်ထူးဟာ ငလျင်ကြောင့်ရရှိခဲ့တဲ့ လည်ပင်းနဲ့ ဦးခေါင်းဒဏ်ရာတို့ကို ခွဲစိတ်ကုသချိန် ကိုမာဝင်ပြီး သေဆုံးခဲ့တယ်လို့ သိရပါတယ်။

PPNM ရဲ့မှတ်တမ်းအရ အကျဉ်းထောင်အသီးသီးမှာ ဆေးဝါးလုံလောက်စွာနဲ့ ဆေးကုသခွင့်မရရှိတာကြောင့် ဖေဖော်ဝါရီ ၁ ရက်ကနေ ဇွန် ၁ ရက်အထိ သေဆုံးသူ နိုင်ငံရေးအကျဉ်းသား/အကျဉ်းသူ ၁၁ ဦးရှိတယ် လို့သိရပါတယ်။

စာတည်း – လင်း

မြေလတ်အသံ၊ ဇွန် ၁၃၊ ၂၀၂၅။

မန္တလေး၊ အိုးဘိုထောင်မှာ ငလျင်ကြောင့်ဒဏ်ရာပြင်းထန်စွာရရှိခဲ့တဲ့ နိုင်ငံရေးအကျဥ်းသား ၁ ဦး ဆေးကုသနေရင်း သေဆုံးခဲ့တယ်လို့ ဇွန် ၁၃ ရက်ဒီကနေ့မှာ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန် (PPNM)က ထုတ်ပြန်ပါတယ်။

သေဆုံးသူမှာ ထောင်ဒဏ် ၁၈ နှစ်ကျခံနေရတဲ့ ဦးမော်ထူး ၅၄ နှစ်ဖြစ်ပြီး သူရရှိခဲ့တဲ့ လည်ပင်းနဲ့ဦးခေါင်းဒဏ်ရာတွေကို မန္တလေးမြို့ ပြည်သူ့ဆေးရုံကြီးမှာ ခွဲစိတ်ကုသမှု ၂ ကြိမ်ခံယူပြီးနောက် ကိုမာဝင်သွားကာ ဇွန် ၁၃ ရက်မှာသေဆုံးခဲ့တာလို့ဆိုပါတယ်။

“မူလ(ဒဏ်ရာရတဲ့အချိန်)က ပြင်ပဆေးရုံကိုဆေးကုသခွင့်မရခဲ့ဘဲနဲ့ သင်္ကြန်နောက်ပိုင်းမှာမှ ထောင်ပြင်ပဆေးရုံဖြစ်တဲ့ မန္တလေးဗဟိုဆေးရုံကို ပို့ဆောင်ကုသခွင့်ရခဲ့တယ်။ သို့သော်လည်းပဲ သူက အခြေခံမိသားစုကမွေးဖွားလာသူ ဖြစ်တဲ့အတွက် မိသားစုကငွေကြေးမတတ်နိုင်တဲ့အခါမျိုးမှာ ခွဲစိတ်ကုသစရိတ်မရှိတာအတွက် အခုလို ဆုံးရှုံးရတာဖြစ်တယ်။”လို့ PPNMမှဦးဆောင်ကော်မတီဝင် ကိုသိုက်ထွန်းဦးက ပြောပါတယ်။

ဦးမော်ထူး ဆေးကုသရန်နဲ့ ခွဲစိတ်ခကုန်ကျစရိတ်မှာ စုစုပေါင်းငွေကျပ်သိန်း ၈၀ ခန့်လိုအပ်‌သော်လည်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်(PPNM)မှ ၁,၃၆၀,၀၀၀ ကျပ်ကို ကူညီပေးနိုင်ခဲ့ပြီး ထပ်မံခွဲစိတ်ကုသမှုရရှိရန် ငွေကြေးကြိုးစားရှာဖွေနေစဉ်အတွင်း အခုလိုသေဆုံးခဲ့ရတာလို့ သူကဆိုပါတယ်။

ဦးမော်ထူးဟာ ပြီးခဲ့တဲ့၂၀၂၁ ဒီဇင်ဘာ ၂ ရက်မှာ မန္တလေးတိုင်း၊ ချမ်းမြသာစည်မြို့နယ်၊ ချမ်းမြသာစည်ရဲစခန်းမှာ ဖမ်းဆီးထိန်းသိမ်းခံရပြီးနောက် ပုဒ်မ ၅၀၅ -က၊ ၅၀(ည) တို့နဲ့ တရားစွဲဆိုခံရပြီးနောက် ထောင်ဒဏ် ၁၈ နှစ် ကျခံနေရသူဖြစ်ပါတယ်။

ပြီးခဲ့တဲ့မတ် ၂၈ ရက်က လှုပ်ခတ်ခဲ့တဲ့ငလျင်ကြောင့် မန္တလေးအိုးဘိုထောင်မှာ အဆောက်အဦတချို့ပြိုကျပျက်စီးခဲ့ရာ အကျဥ်းသား၊ အကျဥ်းသူ ၆၄ ဦးသေဆုံးခဲ့ပြီး ဒဏ်ရာရရှိသူ ၁၄၀ ဦးအထက်ရှိခဲ့တယ် လို့ PPNM ရဲ့အချက်အလက်အရ သိရပါတယ်။

ထောင်တွင်းဆေးဝါလုံလောက်စွာမရရှိတာကြောင့် ၂၀၂၅ ဇန်နဝါရီကနေ ဇွန် ၁ ရက်အတွင်း သေဆုံးခဲ့တဲ့ နိုင်ငံရေးအကျဥ်းသား/အကျဉ်းသူ ၁၀ ဦးရှိခဲ့တယ်လို့လည်း PPNM က ထုတ်ပြန်ထားပါတယ်။

စာတည်း – လင်း

မန္တလေး၊ ဇွန် ၇၊ ၂၀၂၅။

အင်အားပြင်းငလျင်လှုပ်ခတ်မှုကြောင့် မန္တလေး၊ အိုးဘိုထောင်က အဆောက်အအုံပြိုကျပြီး နိုင်ငံရေး အကျဥ်းသူ၊အကျဥ်းသား ၄၉ ဦးသေဆုံးသွားခဲ့တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဥ်းသားများ ကွန်ရက် PPNM က သေဆုံးသူတွေရဲ့ကိုယ်ရေးအချက်အလက်တွေနဲ့တကွ ထုတ်ပြန်ထားပါတယ်။

မတ် ၂၈ ရက်ကလှုပ်ခတ်ခဲ့တဲ့ အင်အားပြင်းငလျင်ကြောင့် မန္တလေးမြို့၊ အောင်မြေသာစံမြို့နယ်၊ အိုးဘိုရပ်မှာရှိတဲ့ အိုးဘိုအကျဥ်းထောင်အတွင်းက အလုပ်ရုံ၊ အမျိုးသမီးဆေးရုံအဆောင် ၁၊ ၃ စတဲ့ အဆောက်အအုံတွေ ပြိုကျပျက်စီးခဲ့ပြီး နိုင်ငံရေးအကျဥ်းသား၊ အကျဥ်းသူ ၄၉ ဦးသေဆုံးသွားခဲ့ တယ်လို့ သိရပါတယ်။

သေဆုံးသွားခဲ့တဲ့ နိုင်ငံရေးအကျဥ်းသား၊ အကျဥ်းသူတွေရဲ့ တချို့မိသားစုဝင်တွေဟာ ငလျင်ကြောင့် သေဆုံးသွားခဲ့တယ်လို့ မသိရှိခဲ့ရတာကြောင့် သက်ပျောက်ဆွမ်းတောင်မကပ်လိုက်ရဘူးလို့ ဆိုပါတယ်။

“တချို့မိသားစုဝင်တွေကလည်း သေဆုံးသွားတာ သိတယ်။ ရုပ်အလောင်းတွေကတော့ မရလိုက်ကြဘူး။ စစ်ကောင်စီတွေကပဲ သင်္ဂြိုဟ်ပေးလိုက်တယ်လို့ ကြားထားပါတယ်။ တချို့ကတော့ မိမိရဲ့ သားသမီးဆုံးပါးသွားတာ မသိရသေးတဲ့မိသားစုဝင်တွေလည်း ရှိပါတယ်။ မသိရှိရသေးတဲ့သူတွေအနေနဲ့ ရက်လည်ဆွမ်းကျွေးကောင်းမှုကုသိုလ်လုပ်ရဖို့ နာမည်နဲ့တကွ ထုတ်ပြန်တာ ဖြစ်ပါတယ်။”လို့ PPNM ရဲ့တာဝန်ရှိသူ ကိုသိုက်ထွန်းဦးက ပြောပါတယ်။

သေဆုံးသွားခဲ့တဲ့ နိုင်ငံရေးအကျဥ်းသား၊ အကျဥ်းသူ ၄၉ ဦးဟာ အသက် ၁၈ နှစ်အရွယ်ကနေ ၅၀ ကျော်အရွယ်ထိပါဝင်ပြီး အမျိုးသား ၃၁ ဦးနဲ့ အမျိုးသမီး ၁၈ ဦးတို့ ဖြစ်တယ်လို့ သိရပါတယ်။

အိုးဘိုအကျဉ်းထောင်အတွင်း အဆောက်အအုံပြိုကျ၍ သေဆုံးသူ ၇၀ ဦးကျော်ရှိခဲ့ပေမယ့် PPNM ရဲ့စိစစ်စောင့်ကြည့်မှတ်တမ်းကောက်ယူမှုတွေအရ အနည်းဆုံး နိုင်ငံရေးအကျဉ််းသား၊ အကျဉ်းသူ ၄၉ ဦး ပါဝင်ခဲ့တာလို့လည်း ဆိုထားပါတယ်။

လက်ရှိအချိန်အထိ အိုးဘိုအကျဉ်းထောင်အတွင်းမှာရှိတဲ့ နိုင်ငံရေးအကျဉ်းသားတွေ အပါအဝင် တခြားသော ပုဒ်မများနဲ့ တရားဆွဲဆိုခံထားရတဲ့ အကျဉ်းသားတွေအတွက် ကူညီထောက်ပံ့မှု များစွာလိုအပ်လျက်ရှိတာကြောင့် လူ့အခွင့်အရေးနဲ့ တရားမျှတမှုကို ဖော်ဆောင်နေကြတဲ့ အဖွဲ့အစည်းတွေကနေ ထောက်ပံ့မှုများ ဆောင်ရွက်ပေးစေလိုတယ်လို့ PPNM က ထုတ်ပြန်ချက်မှာ ရေးသားဖော်ပြထားပါတယ်။

စာတည်း – လင်း