အာဏာသိမ်းစစ်ခေါင်းဆောင်

မြေလတ်အသံ၊ ဧပြီ ၃၊ ၂၀၂၆။

အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် ကို ဒီကနေ့ကျင်းပတဲ့ ပြည်ထောင်စုလွှတ်တော် လျှို့ဝှက်မဲခွဲမှာ မဲအများဆုံးနဲ့ သမ္မတ တင်မြှောက်လိုက်ပါတယ်။

မတ်လ ၃၀ ရက်မှာ ဗိုလ်ချုပ်ကြီး ရဲဝင်းဦးကို ကာကွယ်ရေးဦးစီးချုပ်လွှဲအပ်ခဲ့ပြီး မတ်လ ၃၁ ရက်မှာ ပြည်သူ့လွှတ်တော်ကနေ ဒုသမ္မတအမည်စာရင်းတင်သွင်းခဲ့တဲ့ ဗိုလ်ချုပ်မှူးကြီး မင်းအောင်လှိုင်ဟာ ဒီကနေ့ ပြည်ထောင်စုလွှတ်တော်ကမဲခွဲပွဲမှာတော့ မဲအများဆုံးရရှိပြီး သမ္မတရာထူးကို ရယူခဲ့တာပဲ ဖြစ်ပါတယ်။

အဆိုပါ မဲခွဲပွဲမှာ ပြည်သူ့လွှတ်တော်ကရွေးချယ်တဲ့ ဗိုလ်ချုပ်မှူးကြီးမင်းအောင်လှိုင်က ၄၂၉ မဲရရှိကာ သမ္မတဖြစ်လာသလို တပ်မတော်သားလွှတ်တော်ကိုယ်စားလှယ်တွေရွေးချယ်တဲ့ ဗိုလ်ချုပ်ကြီး(ဟောင်း) ညိုစောက ၁၂၆ မဲနဲ့ ဒုသမ္မတ(၁)၊ အမျိုးသားလွှတ်တော်ကရွေးချယ်တဲ့ ဒေါ်နန်းနီနီအေးက ၂၉ မဲနဲ့ ဒုသမ္မတ(၂) ဖြစ်လာတာလည်း ဖြစ်ပါတယ်။

၂၀၂၀ ရွေးကောက်ပွဲမှာ မဲမသာမှုရှိခဲ့လို့ဆိုပြီး သမ္မတ ဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကို ဖမ်းဆီးပြီးအာဏာသိမ်းခဲ့တဲ့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ဟာ အာဏာသိမ်းပြီး ၅ နှစ်အကြာမှာ စစ်တပ်ကချုပ်ကိုင်ထားတဲ့ အတုအယောင်ရွေးကောက်ပွဲကို ဖန်တီးပြီး ၎င်းလိုချင်နေတဲ့ သမ္မတရာထူးကို ရယူခဲ့တာဖြစ်ပါတယ်။

လူမျိုးတုန်းသတ်ဖြတ်မှုအပါအဝင် စစ်ရာဇဝတ်မှုအမြောက်အမြားအတွက် တာဝန်ရှိသူ ဗိုလ်ချုပ်မှူးကြီး မင်းအောင်လှိုင်ကို အပြည်ပြည်ဆိုင်ရာတရားရုံး(ICJ)က လူမျိုးတုန်းသတ်ဖြတ်မှုနဲ့ တရားစွဲထားပြီး လက်ရှိ တရားရင်ဆိုင်နေရဆဲအခြေအနေဖြစ်ပါတယ်။

မြေလတ်အသံ၊ ဖေဖော်ဝါရီ ၁၂၊ ၂၀၂၅။

ကိုယ်စီလိုလားချက်တွေကို လက်နက်ကိုင်ပြီးမတောင်းဆိုကြဖို့နဲ့ နိုင်ငံရေးပြဿနာတွေကို နိုင်ငံရေးနည်းလမ်းနဲ့သာဖြေရှင်းကြဖို့ တိုက်တွန်းလိုပြီး စည်းလုံးညီညွတ်မှုမရှိတဲ့နိုင်ငံဟာ ရေနဲ့ဆားလို ပျောက်ကွယ်သွားမယ်လို့ အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ၇၈ နှစ်မြောက် ပြည်ထောင်စုနေ့သဝဏ်လွှာမှာ ထည့်သွင်းပြောဆိုလိုက်ပါတယ်။

ဖေဖော်ဝါရီ ၁၂ ရက် ဒီကနေ့မှာကျရောက်တဲ့ ၇၈ နှစ်မြောက် ပြည်ထောင်စုနေ့အခမ်းအနားကို နေပြည်တော်မှာ စစ်ကောင်စီဒုတိယခေါင်းဆောင် ဒုတိယဗိုလ်ချုပ်မှူးကြီး စိုးဝင်းက ဦးဆောင်ပြုလုပ်ခဲ့ပြီး စစ်ခေါင်းဆောင်ပေးပို့တဲ့ သဝဏ်လွှာကို ဖတ်ကြားခဲ့တာပါ။

ပါတီစုံဒီမိုကရေစီစနစ်ကို လျှောက်လှမ်းရာမှာ တဦးနဲ့တဦးသဘောထားကွဲလွဲတာတွေရှိနိုင်ပေမယ့် ကိုယ်စီလိုလားချက်တွေကို လက်နက်ကိုင်အကြမ်းဖက်တဲ့နည်းလမ်းနဲ့ တောင်းဆိုတာဟာ မှားယွင်းတဲ့လမ်းစဥ်ဖြစ်လို့ မှန်ကန်တဲ့ကောင်းကျိုးရလဒ်တွေ မရနိုင်ဘူးလို့ စစ်ခေါင်းဆောင်က ပြောပါတယ်။

တိုင်းရင်းသားတွေအနေနဲ့နားလည်မှုလွဲမှားတာတွေ ပဋိပက္ခတွေရှိရင် တွေ့ဆုံဆွေးနွေးခြင်းနဲ့သာ ဖြေရှင်းနိုင်မှာဖြစ်ကြောင်းနဲ့ နိုင်ငံရေးပြဿနာတွေကို နိုင်ငံရေးနည်းလမ်းအရ ဖြေရှင်းနိုင်ဖို့ ငြိမ်းချမ်းရေးတံခါးကို အစဥ်ဖွင့်လှစ်ထားတယ်လို့လည်း ဆိုပါတယ်။

စစ်ခေါင်းဆောင်ကတွေ့ဆုံဆွေးနွေးဖို့အတွက် နှစ်ပတ်လည်သဝဏ်လွှာတွေနဲ့ အစည်းအဝေး၊ မိန့်ခွန်းတွေ အားလုံးနီးပါးမှာ ထည့်သွင်းပြောဆိုလေ့ရှိပေမယ့်တဖက်မှာလည်း နိုင်ငံအနှံ့အပြားရှိ တော်လှန်ရေးတပ်တွေထိန်းချုပ်နယ်မြေတွေက ကျေးရွာ၊ စစ်ရှောင်စခန်းနဲ့ ဘာသာရေးအဆောက်အဦတွေ အပါအဝင် အရပ်ဘက်နေရာတွေကို နေ့စဥ်လေကြောင်းက ဗုံးကြဲတိုက်ခိုက်နေလို့ ကလေးနဲ့အမျိုးသမီးတွေအပါ အရပ်သားတွေသေဆုံးနေရတာပါ။

ယခုလအစောပိုင်းမှာပဲ ကလေးမြို့တောင်ပိုင်းရှိ စစ်ရှောင်စခန်းကို စစ်ကောင်စီကလေယာဥ်နဲ့ ဗုံးကြဲချခဲ့လို့ ကလေးတွေအပါအဝင် စစ်ရှောင်အရပ်သား ၉ ဦးသေဆုံးခဲ့ပြီး ကနီ၊ တောင်သာ၊ ပေါက်၊ မြောင် စတဲ့မြို့နယ်တွေမှာလည်း စစ်ကောင်စီက လေကြောင်းတိုက်ခိုက်မှုတွေ ဆက်တိုက်ပြုလုပ်ခဲ့ပါတယ်။