အမျိုးသားဖြစ်သူ ဒဏ်ရာတွေနဲ့ထွက်ပြေးလွတ်မြောက်လာ

မြေလတ်အသံ၊ အောက်တိုဘာ ၁၇၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်ရှိ ပျူစောထီးဂိတ်မှာ ဖမ်းဆီးခံလိုက်ရတဲ့ လင်မယား ၂ ဦးထဲက အမျိုးသမီးကို ပျူစောထီးတွေက အဓမ္မပြုပြီး ပစ်ခတ်ခဲ့တာကြောင့် သေဆုံးခဲ့ပြီး အမျိုးသားဖြစ်သူကတော့ ထွက်ပြေးလွတ်မြောက်လာခဲ့တယ်လို့ ကန့်ဘလူခရိုင်အမှတ် ၃ တပ်ရင်းကပြောပါတယ်။

အဆိုပါလင်မယား ၂ ဦးမှာ ကောလင်းမြို့နယ်၊ ညောင်ကုန်းကျေးရွာမှ ၃၈ နှစ်အရွယ် ကိုကျော်မျိုးနဲ့ ၃၃ နှစ်အရွယ် မအေးမာဦး တို့ဖြစ်ပြီး ၎င်းတို့ဟာ ရွှေဘို-မြစ်ကြီးနားလမ်းပိုင်းပေါ်ရှိ စံပယ်နံ့သာ ပျူစောထီးအထိုင်စခန်းဂိတ်မှာ အောက်တိုဘာ ၁၆ ရက်မနက် ၉ နာရီကျော်က ဖမ်းဆီးခံလိုက်ရတာလို့ ဆိုပါတယ်။

“သူတို့က ကထိန်ခင်းဖို့အတွက် တန့်ဆည်ကိုသွားတာ။ ဆိုင်ကယ်နဲ့ပေါ့။ စံပယ်နံ့သာ အရောက်မှာ ဖမ်းခံရတာ။ ကိုကျော်မျိုးနဲ့ မအေးမာဦးကို ဝါးနှစ်ပြန်အကွာ တယောက် တနေရာစီခွဲထားတယ်။ မအေးမာဦးကို ပျူတွေက တကောင်ပြီးတကောင် မုဒိမ်းကျင့် ကြတယ်။ အော်ဟစ်သံတွေတောင်ကြားရတယ်တဲ့။ ပြီးတော့ ပစ်သတ်လိုက်တာ”လို့ ကိုကျော်မျိုးရဲ့ပြောဆိုချက်ကို ကိုးကားပြီး ကန့်ဘလူခရိုင်အမှတ် ၃ တပ်ရင်းမှတာဝန်ရှိ သူတဦးက ပြောပါတယ်။

အဲ့ဒီနေ့ညနေ ၅ နာရီကျော်မှာ အရက်မူးနေတဲ့ ပျူစောထီး ၃ ဦးက ကိုကျော်မျိုးကို ရိုက်နှက်နှိပ်စက်ပြီး လက်ပြန်ကြိုးတုပ်ကာ ချောင်းကမ်းစပ်အနီးမှာ ပစ်သတ်ဖို့ရာ ဒူးထောက်ခိုင်းထားချိန် ချောင်းထဲကို ခုန်ချပြီး ထွက်ပြေးခဲ့တာလို့ပြောဆိုကြောင်း အထက်ပါတာဝန်ရှိသူကဆိုပါတယ်။

ကိုကျော်မျိုးမှာ ရိုက်နှက်နှိပ်စက်ခံခဲ့ရတာကြောင့် မျက်နှာပြင်တခုလုံး ညိုမဲစွာ ဖူးရောင်နေသလို လက်ကောက်ဝတ်နှစ်ခုစလုံးမှာလည်း မီးလောင်ဒဏ်ရာတွေ၊ ဦးခေါင်းမှာ ပေါက်ပြဲဒဏ်ရာ၊ ကျောကုန်းမှာ ညိုမဲစွဲ ဒဏ်ရာတွေနဲ့ အောက်တိုဘာ ၁၇ ရက်မနက် ၇ နာရီခန့်မှာ ကန့်ဘလူခရိုင်အမှတ် ၃ တပ်ရင်းဆီကို ရောက်ရှိလာခဲ့တာလို့ အထက်ပါတာဝန်ရှိသူက ဆိုပါတယ်။

ဒါ့အပြင် ဖမ်းဆီးခံရချိန်မှာတော့ ပျူစောထီးတွေက ဆွဲသီးပါ ရွှေဆွဲကြိုး ၂ ကုံး၊ ၁ ကျပ်သားရွှေအခဲ ၁ ခဲ၊ နားကပ် ၁ ရံ၊ လက်ကောက် ၁ ကွင်းအပါအဝင် စုစုပေါင်း ရွှေ ၃ ကျပ်သားနဲ့ ငွေသား ၇ သိန်း၊ ဖုန်း ၃ လုံး၊ ဆိုင်ကယ် ၁ စီး ယူဆောင်ထားတယ်လို့ သိရပါတယ်။

ပြီးခဲ့တဲ့အောက်တိုဘာ ၁၃ ရက်ကလည်း ရွှေဘိုကနေ တနိုင်းဘက်ကိုထွက်ခွာလာတဲ့ ကား ၁ စီးပေါ်ကနေ လူငယ်အမျိုးသား ၉ ဦးကို စံပယ်နံ့သာ ပျူစောထီးဂိတ်ကနေ ဖမ်းဆီးခဲ့တာကြောင့် ခရီးသွားပြည်သူတွေအနေနဲ့ ခရီးသွားလာချိန် စကမတပ်စခန်းတွေရှိရာနေရာတွေကို သတိပြုရှောင်ရှားသွားလာကြဖို့ ကန့်ဘလူခရိုင် အမှတ် ၃ PDF တပ်ရင်းက အသိပေးထားပါတယ်။

စာတည်း – လင်း

မင်းကင်း၊ စက်တင်ဘာ ၂၆၊ ၂၀၂၅။

စစ်ကိုင်းတိုင်း၊ မင်းကင်းမြို့နယ်၊ မြောက်ချွန်းရွာရပ်ကျေးပြည်သူ့လုံခြုံရေးအဖွဲ့ခေါင်းဆောင်က တရွာတည်းနေ အိမ်ထောင်ရှိအမျိုးသမီးကို အဓမ္မပြုကျင့်မှုနဲ့ပတ်သက်ပြီး ဆန္ဒပြခဲ့ကြတယ်လို့ ဒေသခံတွေဆီက သိရပါတယ်။

အဲ့ဒီနောက် စက်တင်ဘာ ၂၂ ရက်မှာ မြောက်ချွန်းရွာဒေသခံတွေက ရပ်ကျေးပလဖခေါင်းဆောင် အိုက်နိုင်း (ခေါ်) ကိုသိန်းနိုင်ကို အဓမ္မမှုနဲ့ပတ်သက်ပြီး တရားမျှတစွာအရေးယူပေးဖို့ ကျေးရွာတွင်း လှည့်လည်ဆန္ဒပြခဲ့ကြတာလို့ ဆိုပါတယ်။

“ဆန္ဒပြတာက အဓိကအမျိုးသမီးတွေ လုံခြုံရေးကိုထိပါးလာတဲ့ အခြေနေမျိုးပေါ့၊ လက်နက်ကိုင်ထားရင် အာဏာရှိတယ်၊ ငါလုပ်ချင်ရာလုပ်မယ်ဆိုတဲ့ ပညာမဲ့တဲ့ လက်နက်ကိုင်လူတွေ ရှိနေတော့ ပြစ်မှုတခုခုဆိုတိုင်စရာမရှိ၊ အရေးယူဆောင်ရွက်မှုမရှိတော့ ဒါမျိုးဆန္ဒပြ ဖြစ်စဉ်ဖြစ်လာတာပေါ့၊” လို့ ဆန္ဒပြစဥ်မှာပါဝင်ခဲ့တဲ့အမျိုးသမီးတဦးက ပြောပါတယ်။

ကျူးလွန်ခံရသူအမျိုးသမီးဟာ ဇူလိုင် ၉ ရက်မှာ အမျိုးသားဖြစ်သူနဲ့စကားများရန်ဖြစ်ပြီးနောက် အမျိုးသားကရိုက်နှက်မှုတွေလုပ်တဲ့အတွက် ရပ်ကျေးပလဖခေါင်းဆောင် အိုက်နိုင်း (ခေါ်) ကိုသိန်းနိုင်ကို ဆက်သွယ်တိုင်ကြားခဲ့ရာက ပလဖအဖွဲ့ဝင်တွေကအဲ့ဒီနေ့မှာပဲ အမျိုးသားဖြစ်သူကို ဖမ်းဆီးထိပ်တုံးခတ်ခဲ့ကြတယ်လို့ သိရပါတယ်။

“လင်မယားရန်ဖြစ်တာရော၊ ယောက်ျားဖြစ်သူက အရက်တအားသောက်ပြီး အရက်စွဲနေတဲ့ အခြေအနေမျိုး၊ အဲ့ဒါကိုမှ သူက အရက်ပြတ်အောင်လို့ဆိုပြီး ၁ လဆိုပြီးမှ အပ်လိုက်တာပေါ့။ ၁ လဆိုပြီး ဖမ်းသွားတာ၊ အရက်လည်း ပြတ်အောင်လို့၊ ပြီးတော့ အရက်မူးပြီး ရိုက်တဲ့အခြေအနေမျိုး၊ မိန်းမကို ရိုက်လို့ တိုက်လို့ ဖမ်းလိုက်တယ်ဆိုတဲ့သဘောမျိုး။”လို့ ဖြစ်စဉ်သိရှိသူအမျိုးသားတဦးက ပြောပါတယ်။

အမျိုးသားကိုဖမ်းဆီးပြီးနောက် ၃ ရက်မြောက်အကြာ ဇူလိုင် ၁၁ ရက်မှာ ၁ ကြိမ်နဲ့ ၈ ရက်အကြာ ဇူလိုင်တတိယပတ်ထဲမှာ ၁ ကြိမ် ကိုသိန်းနိုင်က အဆိုပါအမျိုးသမီးကို ခင်ပွန်းနဲ့ပတ်သက်ပြီး ပြောစရာရှိတယ်ဆိုကာ ခေါ်ပြီး အဓမ္မပြုခဲ့တာလို့ ဆိုပါတယ်။

အဓမ္မပြုကျင့်တဲ့နေရာဟာ အမျိုးသားကိုဖမ်းဆီးချုပ်နှောင်ထားတဲ့ နေရာနဲ့ ကိုက် ၅၀ အကွာရှိတဲ့အနီးတဝိုက်မှာဖြစ်ပြီး ကျူးလွန်ချိန်မှာ တပ်ဖွဲ့ယူနီဖောင်းဝတ်ထားတာမရှိဘဲ သေနတ်ပါတာကိုတွေ့ရတယ်လို့ ရပ်ကျေးပအဖအဖွဲ့ကစစ်ဆေးရေးမှာ ကျူးလွန်ခံရသူအမျိုးသမီးက ဖွင့်ဟပြောဆိုထားပါတယ်။

နစ်နာသူအမျိုးသမီးက မြောက်ချွန်းရွာတောတိုက်မှာနေထိုင်တဲ့သူဖြစ်ပြီး ကိုသိန်းနိုင်က ဖမ်းခံထားရသူ အမျိုးသားအကြောင်းပြောဆိုဖို့ဆိုကာ ၁ ရက်ခြား ၁ ခါလောက်လာတွေ့ဖို့ပြောခဲ့တာလည်းရှိခဲ့ပြီး သွားတွေ့ တဲ့ ၂ ကြိမ်မှာ ၂ ကြိမ်လုံးအဓမ္မပြုကျင့်တာကြောင့် နောက်ထပ်သွားမတွေ့ဖြစ်တော့ဘူးလို့ ရပ်ကျေး ပအဖရဲ့ စစ်ဆေးချက်တွေအရ သိရပါတယ်။

အမျိုးသားဖြစ်သူကို ဖမ်းဆီးထားစဉ်မှာလည်း ကိုသိန်းနိုင်က ဝါးခြမ်းပြားနဲ့ ၁၀ ချက်အထိ ရိုက်နှက်ခဲ့တယ်လို့ သိရပါတယ်။

စက်တင်ဘာ ၂၂ ရက်ဆန္ဒပြအပြီးမှာတော့ ရပ်ကျေးပြည်သူ့အုပ်ချုပ်ရေးအဖွဲ့က ကျူးလွန်သူနဲ့ နစ်နာသူ လင်မယားကိုခေါ်ယူစစ်ဆေးရေးရာမှာလည်း ကိုသိန်းနိုင်က လက်နက်နဲ့ခြိမ်းခြောက်အကြပ်ကိုင်တာမျိုး မရှိခဲ့ပေမယ့် အဓမ္မမှု ၂ ကြိမ်ကျူးလွန်ခဲ့တာဟုတ်မှန်ကြောင်းကို ဝန်ခံထွက်ဆိုထားပါတယ်။

အဲ့ဒီနောက် စက်တင်ဘာ ၂၄ ရက်ကစတင်ကာ မင်းကင်းမြို့နယ်ပြည်သူ့လုံခြုံရေးအဖွဲ့က ဒီဖြစ်စဥ်နဲ့ ပတ်သက်ပြီး စစ်ဆေးဖို့ဆိုကာ ကျူးလွန်သူနဲ့ နစ်နာသူ ၂ ဦးကိုခေါ်ဆောင်ထားပြီး စက်တင်ဘာ ၂၆ ရက် ဒီကနေ့ထိစစ်ဆေးနေဆဲဖြစ်တယ်လို့ ဖြစ်စဥ်ကိုသိရှိထားတဲ့ ဒေသခံအမျိုးသမီးကပြောပါတယ်။

ဒီဖြစ်စဥ်နဲ့ပတ်သက်ပြီး မင်းကင်းမြို့နယ်ပြည်သူ့လုံခြုံရေးအဖွဲ့ကို မြေလတ်အသံက ဆက်သွယ် မေးမြန်းရာမှာတော့ တိုင်တန်းမှုမရောက်သေးတဲ့အတွက် စစ်ဆေးမှုတွေမလုပ်ရသေးဘဲ ကျူးလွန်သူ ကိုသိန်းနိုင်ကိုတော့ တပ်ဖွဲ့ဝင်ဖြစ်တာကြောင့်ခေါ်ဆောင်ထားတယ်လို့ မြို့နယ်ပလဖတာဝန်ခံက ပြောပါတယ်။

“တိုင်ကြားခံရသူက တပ်ဖွဲ့ဝင်ဖြစ်တဲ့အတွက်ခေါ်ထားပါတယ်၊ အဲ့ဒီတိုင်တန်းမှုလက်ခံရရှိမှ ကျနော်တို့က အမှုမှန် ဟုတ်၊ မဟုတ် စစ်ဆေးဆောင်ရွက်ပြီး ပေါ်ပေါက်မှုပေါ် မူတည်ပြီး တရားရေးကို တင်ပြီး တရားရေးက စစ်ဆေးပြီး အမိန့်ချရတာပါ။ ဒီနေ့ဒီချိန်ထိ တိုင်စာနဲ့တိုင်တန်းတာ တစုံတရာမြို့နယ်ပလဖဆီ မရောက်သေးပါဘူး။ ဒီအတွက် အမှုနဲ့ပတ်သက်လို့ တစုံတရာစစ်ဆေးမှုလည်း မပြုလုပ်ရသေးသည့်အတွက် ဖြေကြားစရာမရှိသေးပါဘူး။” လို့ ဆိုပါတယ်။

ဒါ့အပြင် ဒေသခံတွေအနေနဲ့လည်း ခုလိုအဖြစ်အပျက်တွေဖြစ်မှာကို ကြောက်လန့်နေရပြီး အမျိုးသားညီညွတ်ရေးအစိုးရ – NUG ဘက်ကလည်း အရေးယူမှုတွေလုပ်ပေးစေချင်တယ်လို့ အထက်ပါအမျိုးသမီးက တောင်းဆိုပါတယ်။

“မင်းကင်းမြို့နယ်က ပထဝီမြေနေအထားအရ ခေါင်းပါးတဲ့အရပ်ဆိုတော့ တခုခုဆို အဲ့ဒါကိုအသုံးချပြီး လုပ်နေကြတာ၊ NUG အစိုးရအနေနဲ့ ကျမတို့ မင်းကင်းမြို့နယ် ဖြစ်နေတဲ့အဖြစ်ပျက်တွေကို ကြည့်စေချင်တယ်၊ အရေးယူစေချင်တယ်၊ မဟုတ်ရင် တော်လှန်ရေးဆိုပြီး လုပ်ချင်ရာလုပ်နေတဲ့ လူအုပ်ကြီးကို ကျမတို့ ပြည့်သူတွေကကြောက်နေရမှာပါ။” လို့ ဆန္ဒပြစဉ် ပါဝင်ခဲ့တဲ့ အမျိုးသမီးတဦးက ပြောပါတယ်။

စာတည်း – လင်း

ဆားလင်းကြီး၊ ဇူလိုင် ၉၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့နယ်၊ ကျေးရွာတခုက အသက် ၄ နှစ်နဲ့ ၆ နှစ်အရွယ် မိန်းကလေးငယ် ၂ ဦးကို အဓမ္မပြုကျင့်ဖို့ကြံစည်ခဲ့သူကို ဆားလင်းကြီးမြို့နယ်ပြည်သူ့လုံခြုံရေးအဖွဲ့က ဖမ်းဆီးထိန်းသိမ်းထားတယ်လို့ ဆားလင်းကြီးမြို့နယ်ဥပဒေတာဝန်ခံက ပြောပါတယ်။

ဆားလင်းကြီးမြို့နယ်၊ ကျေးရွာတခုက အသက် ၄၀ အရွယ် ဦးအောင်မျိုးဝင်းဟာ သူရဲ့အိမ်နီးချင်းဖြစ်တဲ့ အထက်ပါကလေးငယ်တွေကို ဇွန်လနောက်ဆုံးအပတ်မှာ လိင်ပိုင်းဆိုင်ရာထိတွေ့မှုတွေပြုလုပ်ခဲ့ကြောင်းကို မိဘတွေကသိရှိတိုင်ကြားခဲ့တယ်လို့ ဆိုပါတယ်။

အဲ့ဒီနောက်မှာ ဆားလင်းကြီးမြို့နယ်ပြည်သူ့လုံခြုံရေးအဖွဲ့ရဲ့ ညွှန်ကြားချက်အရ B7 တိုက်နယ်ပြည်သူ့ ကာကွယ်ရေးအဖွဲ့က ဇူလိုင် ၆ ရက်မှာ ဦးအောင်မျိုးဝင်းကို သူ့ရွာမှာဖမ်းဆီးခဲ့ပြီး အမှုဖွင့်တရားစွဲဖို့ ပြင်ဆင်ထားတယ်လို့ ဆားလင်းကြီးမြို့နယ် ဥပဒေတာဝန်ခံကမြေလတ်အသံကို ပြောပါတယ်။

“ကျနော်တို့အခု ဒီဟာကိုသက်ငယ်လည်း ဖြစ်တယ်။ ၃၇၆၊ ၅၁၁ မုဒိမ်းကြံစည်မှုနဲ့ တရားစွဲဖို့ ပြင်ဆင်ထားတယ်၊ မုဒိမ်းမှုကျတော့လည်း မုဒိမ်းမှုရဲ့ ဖွင့်ဆိုချက်နဲ့ မကိုက်ညီတော့လေ၊ ဒါပေမယ့် မုဒိမ်းကြံစည်တာတော့ ပေါ်လွင်နေတာလေ၊ ဒီကလေးလေးတွေဆိုတာ ဘာမှအရွယ်မရောက်သေးတဲ့ ဆော့မယ်၊ စားမယ်အရွယ် ဒီလိုလုပ်တဲ့အတွက် ဥပဒေအရအရေးယူဖို့ စာတင်ထားပါတယ်။” လို့ သူကပြောပါတယ်။

ဒီဖြစ်စဥ်နဲ့ပတ်သက်ပြီး တင်သွင်းထားတဲ့ သက်သေခံပစ္စည်းတွေကိုလည်းရရှိထားကာ နစ်နာသူ ကလေးတွေရဲ့ ပြောဆိုချက်တွေအရ လိင်ပိုင်းဆိုင်ရာထိပါးမှုကို ၂ ကြိမ်ကျူးလွန်ထားတယ်လို့ သိရကြောင်း သူက ဆက်ပြောပါတယ်။

“သက်သေခံပစ္စည်းအဖြစ် ၆ နှစ်သမီးလေးရဲ့ ဘောင်းဘီမှာ သူ့ရဲ့သုတ်ရည်သုတ်ပိုးပါတဲ့ဟာကို သက်သေခံအဖြစ် သွင်းတယ်မိသားစုကပေါ့၊ အဲဒီကလေး ၂ ယောက်က အိမ်နီးနားချင်းဆိုတော့ တတွဲတွဲနေတဲ့ ကလေး ၂ ယောက်လုံးကို ခေါ်ခေါ်ပြီး အမြဲတမ်းလုပ်တာ၊ သူတို့မိသားစုရဲ့ ပြောကြားချက်အရ ကလေးတွေရဲ့ အသံဖိုင်အရ ၂ ကြိမ်ကျူးလွန်တယ်လို့ သိရတယ်၊ ဒုတိယအကြိမ်မှာ အကြီးမလေးရဲ့ ဘောင်းဘီမှာ သုတ်ပိုးတွေ့ရာကနေပြဿနာတတ်တာ။” လို့ ဆားလင်းကြီးမြို့နယ် ဥပဒေတာဝန်ခံကမြေလတ်အသံကို ပြောပါတယ်။

ကလေးငယ်တွေရဲ့မိဘတွေအနေနဲ့ အရေးယူဖို့ ဥပဒေအကြံပေးတာ၊ ဥပဒေအရတိုင်ချက်ဖွင့်ဖို့ မြို့နယ်ပလဖ ကကူညီမှုပေးခဲ့ပြီး လိမ်ပိုင်းဆိုင်ရာထိတွေ့မှုအပြင် အခြားကျူးလွန်ခဲ့တာတွေ ရှိ၊ မရှိကိုတော့ ဆရာဝန်ဆေးစစ်ချက်စောင့်နေရတယ်လို့ B7 တိုက်နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ဦးအေင်မျိုးဝင်းကလည်း ဒီဖြစ်စဥ်နဲ့ပတ်သက်လို့ ရပ်ကျေးပြည်သူ့အုပ်ချုပ်ရေးအဖွဲ့ကို ဝန်ခံထားတယ်လို့သိရပြီး ယခင်ကလည်း အရွယ်ရောက်စမိန်းကလေးတဦးကို ပုဆိုးလှန်ပြတာမျိုးလုပ်ခဲ့ဖူးသေးတယ်လို့ ဒေသခံတွေဆီကသိရပါတယ်။

အဆိုပါ ဖြစ်စဉ်ပြီးနောက်ကျူးလွန်သူတွေကို ထိုက်တန်တဲ့ အရေးယူမှုပြုလုပ်ဖို့ ဥပဒေအရ တရားစွဲတာတွေ၊ တင်ပြတာတွေပြုလုပ်ဖို့၊ ငွေကြေးကြောင့် အမှုမဖွင့်နိုင်တာမျိုး မဖြစ်စေဖို့ တိုက်တွန်းနှိုးဆော်ထားတယ်လို့ ဆားလင်းကြီးမြို့နယ်ဥပဒေတာဝန်ခံဆီက သိရပါတယ်။

စာတည်း – လင်း

သာယာဝတီ၊ မတ် ၁၆၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင် မင်းလှမြို့နယ် လတ်ဆတ်ကျေးရွာအုပ်စု စိန်ကန့်လန့်ရွာအခြေစိုက် ခလရ ၁ က စစ်ကောင်စီတပ်သားက စစ်ကောင်စီတပ်ကနေ အငြိမ်း စားယူထားတဲ့ ဗိုလ်ကြီးရဲ့သမီးဖြစ်သူကို အကြိမ်ကြိမ် အဓမ္မပြုကျင့်ခဲ့တယ်လို့ တပ်တွင်းသတင်းရင်းမြစ်တွေနဲ့ ဒေသခံတွေဆီက သိရပါတယ်။

အဓမ္မပြုကျင့်ခံရသူဟာ မင်းလှမြို့နယ်၊ စိန်ကန့်လန့်ရွာ၊ ရေစက်တန်းလမ်းနေ အသက် ၂၁ နှစ်အရွယ် စိတ်ကျန်းမာရေးချို့တဲ့သူ မအဉ္ဇလီမျိုးမြင့် ဖြစ်ပြီး ၎င်းကို ခလရ ၁ တပ်ရင်း အမှတ် ၃ တပ်ခွဲက အသက် ၅၅ နှစ် အရွယ် စစ်ကောင်စီတပ်ဖွဲ့ဝင် တပ်သား ထွန်းနိုင်က မတ်လ ၄ ရက်နဲ့ ၅ ရက်တွေမှာ ၃ ကြိမ် အဓမ္မပြုကျင့်ခဲ့တာလို့ ခလရ ၁ တပ်တွင်းသတင်းရင်းမြစ်တဦးက မြေလတ်အသံကို ပြောပါတယ်။

အဓမ္မပြုကျင့်ခံခဲ့ရတဲ့ မအဉ္ဇလီမျိုးမြင့်ရဲ့မိဘတွေဟာ စစ်ကောင်စီတပ်အငြိမ်းစား ဗိုလ်ကြီးမျိုးမြင့်နဲ့ ဒေါ်ခင်မာလာ ဆိုသူတို့ဖြစ်ပြီး ဧရာဝတီတိုင်း၊ ဖျာပုံမြို့ကို ခရီးသွားနေချိန်မှာ အခုလိုဖြစ်ခဲ့တာပါ။

“ရေစက်တန်းလမ်းဆိုတာ အဲ့နားမှာလည်း စစ်တပ်အငြိမ်းစားတွေချည်းပဲ နေကြတာ။ ခလရ ၁ နဲ့ အဲ့ဒီနေရာနဲ့က လမ်းပဲခြားတယ်။ အဲ့ဒီရက်ပိုင်းက မိဘတွေက ခရီးထွက်နေတဲ့အချိန် အိမ်နီးနားချင်းတွေနဲ့ အပ်ထားခဲ့တာ။ အဲ့ဒီအချိန်မှာ ထွန်းနိုင်က ခလေးမလေးကို မုဒိန်းဝင်ကျင့်တာ။ သူလုပ်တာက ၃ ကြိမ်တောင်ဆိုတော့ အဲ့ဒီအိမ်ကို အဝင်၊အထွက်ထူးခြားနေတာကို သတိထားမိပြီး နောက်ဆုံးအကြိမ်မှာ ဘေးအိမ်နီးချင်းတွေက အိမ်ထဲဝင်ကြည့်တော့ အဲ့ဒီလို တန်းလန်းကြီးမိတာ” လို့ ခလရ ၁ တပ်တွင်းသတင်းရင်းမြစ်က ပြောပါတယ်။

မတ်လ ၄ ရက် မနက် ၈ နာရီမှာ ၁ ကြိမ်၊ ၅ ရက်နေ့ မနက် ၁၀ နာရီနဲ့ နေ့လည် ၂ နာရီတို့မှာ ၂ ကြိမ် အဓမ္မပြုကျင့်ခဲ့တာဖြစ်ပြီး နောက်ဆုံးပြုကျင့်တဲ့ နေ့လည် ၂ နာရီလောက်မှာ အိမ်နီးချင်းတွေက ဝိုင်းဝန်းဖမ်းဆီးခဲ့တာလို့ ဆိုပါတယ်။

“အဲ့ဒီလိုမိတော့ ကလေးမလေးကို ဝိုင်းမေးကြတော့ စလုပ်တဲ့နေ့က အတင်းဝင်လာ တွန်းလှဲပြီး အော်ရင် သတ်ပစ်မယ်ဆိုပြီး ခြိမ်းခြောက်ပြီး တခါလုပ်တယ်။ နောက်ရက်မိတဲ့နေ့မှာလည်း ၂ ခါလုပ်တယ်လို့ဖြေပြီး ကြောက်လို့ပါဆိုပြီး ငိုယိုနေတယ်။ ကိုထွန်းနိုင်က အသက်တွေလည်း ကြီးနေပြီ အမှုတွေလည်း တောက်လျှောက်ဖြစ်လို့ ခုအရွယ်ထိ တပ်သားအဆင့်ပဲ” လို့ သူက ဆက်ပြောပါတယ်။

အဓမ္မပြုကျင့်ခဲ့တဲ့ ခလရ ၁ စစ်ကောင်စီတပ်ဖွဲ့ဝင် တပ်သား ထွန်းနိုင်ဟာ ခလရ ၁ တပ်အတွင်း နေထိုင်သူဖြစ်ပြီး ၎င်းမှာ မိန်းမဖြစ်သူနဲ့သမီး ၃ ယောက်ရှိကာ သားသမက်တွေလည်း ရှိသူဖြစ်တယ်လို့ သိရပါတယ်။

လက်ရှိမှာ စစ်ကောင်စီတပ်သား ထွန်းနိုင် ကို ခလရ ၁ တပ်တွင်းအချုပ်မှာ ချုပ်နှောင်ထားပြီး ဒီအမှုနဲ့ပတ်သက်လို့ ခလရ ၁ နောက်တန်းမှူးက တပ်မ ၆၆ ဌာနချုပ်နဲ့ ဒေသကွပ်ကဲမှုစစ်ဌာနချုပ် (ဒကစ- ပြည်) တို့ကို သတင်းပို့တင်ပြတာမျိုး မရှိသေးဘဲ ပြုကျင့်ခံရတဲ့ အမျိုးသမီးငယ်ရဲ့မိသားစုဝင်တွေကို အမှုကြေအေးပေးဖို့ လတ်ဆတ်ကျေးရွာအုပ်စု စစ်ကောင်စီခန့်အုပ်ချုပ်ရေးမှူး ထွန်းမြင့် ကနေတဆင့် ခလရ ၁ တပ် တာဝန်ရှိအရာရှိတွေက ဖိအားပေးပြောဆိုခိုင်းနေတယ်လို့ ဆိုပါတယ်။

စစ်ကောင်စီတပ်ရဲ့ ခလရ ၁ တပ်ရင်းဟာ သဲကုန်းမြို့နယ်၊ အင်းမမြို့အခြေစိုက် အမှတ် ၆၆ ခြေမြန်တပ်မ ဌာနချုပ်(တမခ ၆၆) လက်အောက်ခံတပ်ရင်းတခုဖြစ်ပြီး လက်ရှိ တပ်မ ၆၆ နဲ့လက်အောက်ခံတပ်ရင်းတွေဟာ ကရင်နီ(ကယား)ပြည်နယ်အတွင်း တိုက်ခိုက်ရေး ဝင်ရောက်နေတဲ့ တပ်မတခု ဖြစ်ပါတယ်။

တပ်မ ၆၆ နဲ့ လက်အောက်ခံတပ်ရင်းတွေဟာ ကရင်နီ(ကယား)ပြည်နယ်အတွင်း စစ်အာဏာသိမ်းပြီး နောက်၂၀၂၁ ခုနှစ်၊ နိုဝင်ဘာလကစလို့ တိုက်ခိုက်ရေးဝင်ရောက်နေတာဖြစ်ပြီး ကရင်နီပူးပေါင်းအဖွဲ့တွေနဲ့ ၁ နှစ်ခွဲနီးပါးကာလအတွင်း တိုက်ပွဲတွေအကြား တပ်ရင်းမှူးအဆင့်တွေပါ အပါအဝင် အများအပြားထိခိုက်သေဆုံးဒဏ်ရာရမှု‌၊ အရှင်ဖမ်းဆီးခံရမှုနဲ့ ဒေသကာကွယ်ရေးတပ်ဖွဲ့တွေဘက်ကို ဘက်ပြောင်း CDM ပြုလုပ်မှုတွေ များပြားနေလို့ စစ်အင်အား သိသိသာသာ ယုတ်လျော့နေတဲ့ တပ်မတခု ဖြစ်တယ်လို့ တပ်တွင်း သတင်းရင်းမြစ်တွေက ပြောပါတယ်။

စစ်ကောင်စီတပ် တပ်မ ၆၆ ရဲ့ စစ်အင်အား အများအပြား ယုတ်လျော့လာမှုတွေကြောင့် စစ်ခေါင်းဆောင်တွေအနေနဲ့ စစ်အင်အား ထပ်မံမပြုန်းတီးစေရေးအတွက် ၎င်းတို့လက်အောက်ခံ စစ်ကောင်စီတပ်ဖွဲ့ဝင်တွေက သူတို့အပေါ် အမိန့်မနာခံ စစ်ပုန်ကန်မှုကလွဲရင် ကျန်တဲ့အမှုတွေကို အရေးယူဆောင်ရွက်တာမျိုး လုပ်ဆောင်မှာမဟုတ်ဘူးလို့ CDM တပ်မတော်သားအရာရှိ တဦးက ပြောပါတယ်။

“လက်ရှိအခြေအနေမှာ စကစတပ်က စစ်ဆင်ရေးအမှု၊ နောက် သူတို့သတင်းတွေအပြင်ကိုပေးတဲ့ ဖရဲသီးလိုအမှုမျိုးကလွဲရင် ကျန်တဲ့ကာရိုက်တာအမှုတွေနဲ့ပတ်သက်ပြီးအတတ်နိုင်ဆုံးအရေးမယူတော့ဘူး။ မလိုအပ်ဘဲအင်အားထပ်ပြီးပြုန်းတီးမခံတော့ဘူးပေါ့။ အောက် ခြေ စစ်ကောင်စီတပ်သားတွေ စိတ်ပျက်ပြီးထွက်ပြေးမှာကိုသူတို့အတော်စိုးရိမ်နေတယ်။ အဲ့တာကြောင့်ဒီလိုအမှုတွေကိုလည်း အင်အားမပြုန်းအောင် သတင်းဖုံးဖိပြီးအမှုကြေအေးနိုင်ဖို့ ဖိအားပေးလုပ်ဆောင်နေတာဖြစ်တယ်” လို့ CDM တပ်မတော်သား ဗိုလ်ကြီး ဇင်ယော်က ပြောပါတယ်။

ခလရ ၁ ယခင် တပ်ရင်းမှူး ဒု-ဗိုလ်မှူးကြီး ကျော်ဇေယျ မှာလည်း ကရင်နီပြည်နယ်အတွင်း တိုက်ပွဲကျ သေဆုံးခဲ့တာဖြစ်ပြီး သူ့သေဆုံးမှုဟာ တပ်ရေးဗိုလ်ကြီး မျိုးဝင်းခိုင်ဆိုသူနဲ့လူမှုရေးဖောက်ပြန်နေတဲ့ ဇနီးဖြစ်သူ တပ်ရင်းမှူးကတော်ရဲ့ အောက်လမ်းအစီအရင်တွေကြောင့် တိုက်ပွဲကျသေဆုံးခဲ့တာလို့ တပ်တွင်းမှာ လက်ရှိအချိန်ထိ ဝေဖန်ပြောဆိုနေကြတယ်လို့ သိရပါတယ်။

တန့်ဆည်၊ မတ် ၁၃၊ ၂၀၂၃။

စစ်ကိုင်းတိုင်း၊ တန့်ဆည်မြို့နယ်၊ ပေါင်းကျကျေးရွာက အမျိုးသမီးငယ်တဦး စစ်ကောင်စီတပ်နဲ့ ပျူစောထီးတွေရဲ့ဖမ်းဆီးခြင်းခံရပြီးတဲ့နောက် အဓမ္မပြုကျင့်ခံထားရတဲ့ အနေအထားနဲ့ သေဆုံးနေတာကို ပြန်တွေ့ ခဲ့ရတယ်လို့ ဒေသခံတွေက ပြောပါတယ်။

သေဆုံးသူမှာ အသက်၂၆ နှစ်အရွယ် မခိုင်လင်းကြည် ဖြစ်ပြီး မတ်လ ၄ ရက်နေ့မနက်ပိုင်းက သူ့ကိုစစ်အုပ်စုက ဖမ်းဆီးခေါ်ဆောင်သွားတာဖြစ်ပြီး ဖမ်းဆီးခံရပြီး ၈ ရက်အကြာ မတ်လ ၁၁ ရက်နေ့က မြို့ရဲ့အရှေ့ဘက်မှာ ရုပ်အလောင်းကို ပြန်လည်တွေ့ရှိခဲ့တာ ဖြစ်တယ်လို့ ပေါင်းကျရွာခံ တဦးက မြေလတ်အသံကို ပြောပါတယ်။

“သူမရဲ့ ဦးခေါင်းမှာ သေနတ်ဒဏ်ရာ တွေ့တယ်။ မုဒိမ်းကျင့်ပြီး သတ်သွားတဲ့အနေအထားမျိုးပဲ။ အလောင်းကိုစတွေ့တော့ အဝတ်တွေလည်း မပါဘူး။ အလောင်းကို ခြုံပုတ်ထဲမှာ ထားခဲ့တာ။ စစ်ကြောင်းသွားတဲ့ တလျှောက်လုံးခေါ်သွားပြီးတော့ သတ်ပြီးထားခဲ့တာ” လို့ ပြောပါတယ်။

သေဆုံးခဲ့တဲ့ မခိုင်လင်းကြည်ဟာ အဓမ္မပြုကျင့်ခံခဲ့ရခြင်းရှိ၊ မရှိကိုတော့ မြေလတ်အသံအနေနဲ့ သီးခြားအတည်ပြုနိုင်တာမျိုး မရှိသေးပါဘူး။

မခိုင်လင်းကြည်ဟာ တန့်ဆည်မြို့ပေါ်က ကုန်စုံဆိုင်တဆိုင်မှာ အရောင်းဝန်ထမ်း လုပ်ကိုင်နေသူဖြစ်ပြီး စစ်အုပ်စုက ဘာကြောင့်ဖမ်းဆီးပြီး သတ်သွားတာလဲ ဆိုတာကိုတော့ မသိရဘူးလို့ ဆိုပါတယ်။

“မြို့ပေါ်ဆိုင်တဆိုင်မှာ အရောင်းဝန်ထမ်း လုပ်နေချိန် တရွာတည်းနေသူ ပျူတပ်ဖွဲ့ဝင် မိုးသူဇာရဲ့ သတင်းပေးပို့ချက်အရ ဖမ်းခံလိုက်ရတာ။ အခုဆိုရင် မြို့ပေါ်က ပြည်သူတွေ ကျီးလန့်စာစား ဖြစ်နေကြရတယ်။ မကြာမကြာ သူတို့က မထင်ရင်လာဖမ်းကြတာ” လို့ သူက ဆက်ပြောပါတယ်။

မခိုင်လင်းကြည်ကို ဖမ်းဆီးသတ်သွားတဲ့ စစ်ကောင်စီတပ်သားတွေဟာ ရေဦးမြို့နယ်က ရောက်ရှိလာတဲ့ ခမရ ၃၆၁ တပ်ရင်းက စစ်ကောင်စီတပ်ဖွဲ့ဝင်တွေ ဖြစ်ပြီး အဲ့ဒီစစ်ကြောင်းဟာ ရေဦးမြို့နယ်အတွင်းက ရွာအများအပြားကို မီးရှို့ထားတဲ့စစ်ကြောင်း ဖြစ်တယ်လို့ သိရပါတယ်။

စာတည်း – ရင်ငြိမ်း

မကွေး၊ မတ် ၈၊ ၂၀၂၂။

မကွေးတိုင်း၊ ပေါက်မြို့နယ်၊ အင်းဒေါင့်ငယ်ရွာက မိခင်ဖြစ်သူကို အဓမ္မပြုကျင့်ပြီး အသက် ၂ နှစ်အရွယ်ကလေးငယ်အပါအဝင် သားအမိ ၂ ဦးစလုံးကို ပြီးခဲ့တဲ့ မတ်လ ၆ ရက်နေ့က စစ်ကောင်စီက သတ်ဖြတ်သွားတယ်လို့ ဒေသခံတွေဆီက သိရပါတယ်။

အသက် ၄၂ နှစ်အရွယ် မအေးအေးဝင်း၊ အသက် ၂ နှစ်အရွယ် မရတီမိုးတို့ ဖြစ်ပြီး၊ စစ်ကောင်စီနဲ့ပျူစောထီးအဖွဲ့တွေဟာ သူတို့အိမ်မှာရှိတဲ့ငွေတွေကို ဝင်လုပြီးတဲ့နောက် မိခင်ဖြစ်သူ မအေးအေးဝင်းကို အဓမ္မပြုကျင့်ပြီးမှ သတ်ပစ်ခဲ့တာလို့ ဒေသခံတဦးက ပြောပါတယ်။

“ပိုက်ဆံ သိန်း ၅၀ ရှိတယ်ဆိုပြီး ဝင်လုတာ၊ သားအမိ ၂ ယောက်ကို သတ်သွားကြတာ၊ မအေနဲ့ သမီးကိုသတ်သွားတာ၊ စစ်သားတွေက မိခင်ကို မဒိန်းကျင့်သွားပြီး သမီးကို ဓါးနဲ့ထိုးပြီး သတ်သွားတာ”လို့ သူကပြောပါတယ်။

အင်အား ၅၀ လောက်ပါတဲ့ စစ်ကောင်စီတပ်တွေဟာ ကျေးရွာအတွင်းက တန်ဖိုးကြီးပစ္စည်းတွေကိုလည်း သယ်သွားပြီး၊ မအေးအေးဝင်းရဲ့ သမီးကြီးဖြစ်သူ အသက် ၁၁ နှစ်အရွယ် မသင်းသင်းမိုးကိုလည်း ဖမ်းဆီးခေါ်သွားကာ လမ်းမှာသတ်ပစ်ခဲ့တယ်လို့ သိရပေမယ့် မြေလတ်အသံက သီးခြားအတည်ပြုနိုင်ခြင်းမရှိသေးပါဘူး။

ခုလို စစ်ကောင်စီက ကလေးငယ်တွေနဲ့ အမျိုးသမီးတွေအပေါ် ရက်စက်စွာ သတ်ဖြတ်တာဟာ စစ်တပ်ရဲ့ကျင့်ဝတ်ပိုင်းအရရော၊ လူ့အခွင့်အရေးအရပါ ကိုက်ညီမှုမရှိပဲ လုံးဝမလုပ်သင့်တဲ့ ကိစ္စတခုဖြစ်တယ်လို့ မကွေးလူထုတိုက်ပွဲကော်မတီမှ ကိုချစ်ဝင်းမောင်က သူရဲ့အမြင်ကို ခုလိုပြောပါတယ်။

“ဒီဖြစ်စဥ်မှာဆိုလည်း ကလေးငယ်အပါအဝင် အမျိုးသမီးတွေကို သတ်ဖြတ်တာဟာ ဘယ်လိုရှုထောင့်ကပဲကြည့်ကြည့်၊ ကျင့်ဝတ်ပိုင်းအရရော၊ လူ့အခွင့်အရေးအရပါ ဘယ်လိုမှမဖြစ်သင့်တဲ့ ကိစ္စတခုလို့ ကျနော်တို့မြင်တယ်၊ စစ်အုပ်စုမှာက ကလေးဆိုတာလည်း မရှိဘူး၊ အမျိုးသမီးဆိုတာလည်းမသိဘူး၊ သူတို့ကိုဆန့်ကျင်တဲ့သူအားလုံးကို ရန်သူလို့သတ်မှတ်ပြီး၊ ပြည်သူတွေကိုလည်း ခုလိုရက်စက်သက်ဖြတ်နေတာပဲဖြစ်တယ်၊” လို့ ပြောပါတယ်။

ဒါ့အပြင် အင်းဒေါင့်ငယ်ရွာသား ၂၉ ဦးကိုလည်း လူသားဒိုင်းကာအဖြစ်ဖမ်းခေါ်သွားတယ်လို့ သိရပြီး၊ အဲ့ဒီဖြစ်စဥ်နဲ့ ပက်သက်တဲ့ နောက်ဆက်တွဲ အခြေအနေတွေကိုတော့ မြေလတ်အသံက ဆက်လက်စုံစမ်းနေဆဲပါ။