ကျော်ကြီး 
ပဲခူး၊ ဇန်နဝါရီ ၂၄၊ ၂၀၂၅။
ပဲခူးတိုင်း၊ ပဲခူးမြို့နယ်၊ မုက္ကလကျေးရွာမှာ ယာယီကျောင်းအုပ်ဆရာက ကျောင်းသား ၁၇ ဦးအား အဓမ္မပြု ကျင့်ခဲ့တယ်လို့ ဖြစ်စဉ်ကိုသိထားတဲ့ ဒေသခံထံက သိရပါတယ်။
ကျောင်းသားတွေကို အဓမ္မပြုကျင့်သူဟာ မုက္ကလကျေးရွာ အခြေခံပညာအလယ်တန်းကျောင်းခွဲက ယာယီကျောင်းအုပ်ဖြစ်သူ အသက် ၂၉ နှစ်အရွယ် ဦးသက်ဇော်အောင် ဖြစ်တယ်လို့ ဆိုပါတယ်။
အဓမ္မပြုကျင်ခံရတဲ့ ကျောင်းသားတွေထဲက ကျောင်းသားတဦးဖြစ်သူ အသက် ၁၁ နှစ်အရွယ် ၄ တန်း ကျောင်သားက နေအိမ်မှာရှိနေချိန် အနေအထိုင်မမှန်တာကြောင့် မိဘဖြစ်သူတွေက ခေါ်မေးမြန်းရာမှ အဓမ္မပြုကျင့်ခံရတာကို သိရပြီးနောက် ဇန်နဝါရီ ၂၃ ရက် မနေ့ မနက်ပိုင်းမှာ ပဲခူးမြို့မရဲစခန်းမှာ အမှုဖွင်ခဲ့တာလို့ ဆိုပါတယ်။
“၄ တန်းကျောင်းသား မိဘတွေကနေ သိသွားတာ။ ကလေးက ကျန်းမာရေးမကောင်းတဲ့ပုံစံဖြစ်တယ်ဆိုတော့ မိဘတွေက စစ်တော့သိလို့ မိဘတွေကိုယ်တိုင် အမှုဖွင့်တာ။ စုစုပေါင်းဆို ၁၇ ယောက်ရှိတယ်။” လို့ ဖြစ်စဉ်ကို သိထားတဲ့ ဒေသခံအမျိုးသမီးတဦးက ပြောပါတယ်။
၄ တန်းကျောင်းသားလေးကိုတော့ ဦးသက်ဇော်အောင်က ဇန်နဝါရီ ၁၅ ရက် နဲ့ ၁၆ ရက်တွေမှာ ကျောင်းလွှတ်ချိန် ကျောင်းအုပ်ရုံးခန်းထဲကို ခေါ်ဆောင်ပြီး ရုံးခန်းအတွင်းမှာပင် ၂ ရက်ဆက် အဓမ္မပြုကျင့်ခံခဲ့ရတာလို့ ကလေးငယ်ရဲ့ ပြောပြချက်ကို ကိုးကားပြီး သူက ထပ်ပြောပါတယ်။
နစ်နာသူကလေးမိဘတွေရဲ့ တိုင်တန်းချက်အရ ပဲခူးမြို့မရဲစခန်းမှ ရဲအဖွဲ့ဝင်တွေက ကျောင်းဆရာနေထိုင်တဲ့ စိုင်းတီကျေးရွာကနေ အိမ်မှာ သွားရောက်ဖမ်းဆီးခဲ့တယ်လို့ သိရပါတယ်။
ဖမ်းဆီးပြီးနောက် ရဲတွေက စစ်ဆေးမေးမြန်းချိန်မှာ ကျောင်းဆရာရဲ့ထွက်ဆိုချက်အရ ကျန်တဲ့ အသက် ၇ နှစ်ကနေ ၁၅ နှစ်အတွင်းရှိ ကျောင်းသား ၁၇ ဦးကိုပါ ၁ နှစ်အတွင်း အဓမ္မပြုကျင့်ခဲ့တယ်ဆိုတာ သိရတယ်လို့ ဆိုပါတယ်။
ဦးသက်ဇော်အောင်က ကျောင်းသားတွေကို ကျောင်းအုပ်ရုံးခန်း၊ သူနေထိုင်တဲ့နေအိမ်တွေကိုခေါ်ယူပြီး အဓမ္မပြုကျင့်ခဲ့တာလို့ သိရပြီး ကျောင်းဆရာကို ပဲခူးမြို့မရဲစခန်းမှာ ဖမ်းဆီးထားပြီး အမှုဖွင့်ဖို့လုပ်ဆောင်နေ တယ်လို့ သိရပါတယ်။
စာတည်း – လင်းဇေ