အကျဥ်းထောင်

မြေလတ်အသံ၊ အောက်တိုဘာ ၂၇၊ ၂၀၂၅။

မန္တလေးတိုင်း၊ မြင်းခြံမြို့အကျဥ်းထောင်မှာ နိုင်ငံရေးအကျဥ်းသားတဦး ဆေးဝါးစောင့်ရှောက်မှု လုံလောက်စွာမရရှိတာကြောင့် သေဆုံးခဲ့တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က အောက်တိုဘာ ၂၇ ရက်ဒီကနေ့မှာ ထုတ်ပြန်ပါတယ်။

သေဆုံးသူမှာ အသက် ၂၉ နှစ်အရွယ် ကိုချမ်းမင်းဟိန်းဖြစ်ပြီး အောက်တိုဘာ ၁၈ ရက်က ထောင်တွင်းဆေးရုံကတဆင့် မြင်းခြံမြို့ပြည်သူ့ဆေးရုံကို ဆေးကုသဖို့ရောက်ရှိချိန် ၁ နာရီအကြာမှာသေဆုံးခဲ့တာ လို့ ဆိုပါတယ်။

“ကိုချမ်းမင်းဟိန်းက ထောင်တွင်းဆေးရုံမှာ ပို့ဆောင်ပြီးတော့ ပြင်းထန်တဲ့ရောဂါဝေဒနာကို ခံစားနေရတဲ့အတွက် ပြင်ပဆေးရုံကိုပို့ဆောင်ခဲ့ပါတယ်။ ဆေးရုံကိုပို့ဆောင်ပြီး တနာရီအတွင်းမှာ ကျဆုံးခဲ့တာပါ”လို့ PPNM မှ ဦးဆောင်ကော်မတီဝင် မရောင်နီလင်းက ပြောပါတယ်။

ကိုချမ်းမင်းဟိန်းဟာ ကျောက်ကပ်၊ အသဲခြောက်၊ အသဲရောင်အသားဝါ‌ရောဂါတွေနဲ့ သေဆုံးခဲ့တာ ဖြစ်တယ်လို့ မြင်းခြံအကျဥ်းထောင်ရဲ့ထုတ်ပြန်ချက်မှာဖော်ပြထားကြောင်း မရောင်နီလင်းက ပြောပါတယ်။

နိုင်ငံရေးအကျဉ်းသား ကိုချမ်းမင်းဟိန်းဟာ ၅၀၅(က)၊ ဆက်သွယ်ရေးပုဒ်မ၊ ဖောက်ခွဲ၊ လက်နက်မှု စတဲ့ ပုဒ်မတွေနဲ့ ဖမ်းဆီးခံခဲ့ရပြီး ထောင်ဒဏ် ၁၅ နှစ် ၆ လ ချမှတ်ခံထားရသူဖြစ်တယ်လို့ သူက ဆက်ပြောပါတယ်။

ပြီးခဲ့တဲ့အောက်တိုဘာ ၃ ရက်ကလည်း ထားဝယ်အကျဥ်းထောင်မှာ ထောင်ဒဏ် ၈ နှစ်ကျခံနေရတဲ့ နိုင်ငံရေးအကျဥ်းသား ကိုအောင်ကိုဦးဟာ ဆီးချို၊ ကျောက်ကပ်ရောဂါတွေနဲ့ ထောင်တွင်း သေဆုံးခဲ့တယ်လို့ သိရပါတယ်။

ပြီးခဲ့တဲ့ဇန်နဝါရီလကနေ အောက်တိုဘာလအထိ နိုင်ငံတဝန်းအကျဉ်းထောင်အသီးသီးမှာ ဆေးဝါးစောင့်ရှောက်မှု လုံလောက်စွာမရှိမှုနဲ့ အရေးပေါ်ဆေးကုသခွင့် မရရှိမှုတွေမရရှိတာကြောင့် နိုင်ငံရေးအကျဥ်းသား ၂၈ ဦးသေဆုံးခဲ့တယ်လို့ PPNM ရဲ့မှတ်တမ်းအရသိရပါတယ်။

စာတည်း – လင်း

မြေလတ်အသံ၊ ဇူလိုင် ၈၊ ၂၀၂၅။

ပဲခူးတိုင်း၊ ပေါင်းတည်မြို့အကျဥ်းထောင်မှာ နိုင်ငံရေးအကျဥ်းသား ၁ ဦး ရုတ်တရက်နှလုံးရပ် သေဆုံးခဲ့တယ်လို့ မြန်မာနိုင်ငံလုံးဆိုင်ရာနိုင်ငံရေးအကျဥ်းသားများကွန်ရက်(PPNM) က ဇူလိုင် ၈ ရက် ဒီကနေ့မှာ ထုတ်ပြန်ပါတယ်။

သေဆုံးသူမှာ အကြမ်းဖက်မှုတိုက်ဖျက်ရေးဥပဒေပုဒ်မ ၅၀(ည)နဲ့ ထောင်ဒဏ် ၁၀ နှစ်ကျခံနေရတဲ့ ကိုလှမင်း(ခ)ကိုလှကြီး ၄၅ နှစ်ဖြစ်ပြီး ဇူလိုင် ၅ ရက်က ရုတ်တရက်သတိမေ့သွားတာကြောင့် ပေါင်းတည်မြို့ဆေးရုံကို ပို့ဆောင်ဖို့ပြင်ဆင်နေချိန် နှလုံးရပ်သေဆုံးခဲ့တာလို့ ဆိုပါတယ်။

” ကျနော်တို့သိထားရသလောက်တော့ ကိုလှမင်းမှာ ရောဂါအခံမရှိဘဲနဲ့ ရုတ်တရက်ရေသောက်နေရင်းနဲ့မှ မေ့လဲသွားတယ်။ မေ့လဲတဲ့အပေါ်မှာ ဆရာဝန်တွေနဲ့ပြင်ပဆေးရုံကိုထွက်ဖို့ ပြင်ဆင်ကြိုးစားနေတဲ့ အခြေအနေမှာဘဲ ဆုံးပါးသွားတယ်လို့ သိထားရပါတယ်” လို့ PPNM ဦးဆောင်ကော်မတီဝင် ကိုသိုက်ထွန်းဦးက ပြောပါတယ်။

ပြီးခဲ့တဲ့ဇွန် ၁၄ ရက်ကလည်း အိုးဘိုထောင်က နိုင်ငံရေးအကျဥ်းသူ CDM အလယ်တန်းကျောင်းအုပ်ဆရာမကြီး ဒေါ်မြင့်မြင့်သန်းမှာ တီဘီရောဂါဝေဒနာခံစားနေရပေမယ့် ထောင်ပြင်ပဆေးရုံမှာ ကုသခွင့်မရရှိခဲ့တာကြောင့် သေဆုံးခဲ့တယ်လို့ သိရပါတယ်။

ဒါ့အပြင် ဇူလိုင် ၁ ရက်မှာ လွတ်ရက်စေ့နဲ့လွတ်မြောက်ခဲ့တဲ့ သရက်အကျဥ်းထောင်မှ နိုင်ငံရေး အကျဥ်းသား ၂ ဦး ထောင်ဗူးဝမှာ ပြန်လည်ဖမ်းဆီးခံလိုက်ရတယ်လို့ သိရပါတယ်။

အဖမ်းခံရသူ ၂ ဦးမှာ ဦးထွန်းထွန်းအောင်(တရားလွှတ်တော်ရှေ့နေ)နဲ့ ကိုနိုင်လင်းထွန်းတို့ဖြစ်ပြီး ၎င်းတို့ကို သရက်မြို့မရဲစခန်းမှာ ဇူလိုင် ၈ ရက် ဒီကနေ့အထိ ထိန်းသိမ်းထားတယ်လို့ ဆိုပါတယ်။

” သူတို့(အဖမ်းခံရသူ ၂ ဦး)တွေထောင်မှာ ကောင်းကောင်းမွန်မွန်နဲ့ လွတ်စေ့ရက်အထိနေခဲ့တာကို အခုလို မျိုးဖမ်းတာကတော့ တမင်သက်သက် လုပ်ကြံဇာတ်တခုလို့ပဲ သုံးသပ်တယ်”လို့ ကိုသိုက်ထွန်းဦးက ပြောပါတယ်။

စာတည်း – ဟိန်းစံ

မြေလတ်အသံ၊ ဇွန် ၁၃၊ ၂၀၂၅။

အကျဥ်းထောင်တွင်းဆေးဝါးမလုံလောက်တာကြောင့် ၅ လအတွင်း နိုင်ငံရေးအကျဥ်းသူ/သား ၁၀ ဦးသေဆုံးခဲ့တယ်လို့ မြန်မာနိုင်ငံလုံးဆိုင်ရာနိုင်ငံရေးအကျဥ်းသားများကွန်ရက်-PPNM ဆီက သိရပါတယ်။

ဒီအရေအတွက်ဟာ ၂၀၂၅၊ ဇန်နဝါရီလကနေ ဇွန် ၁ ရက်အထိ PPNM ကပြုစုထားတဲ့ အချက်အလက်မှတ်တမ်းဖြစ်ပြီး အိုးဘိုထောင်မှ ၄ ဦး၊ သာယာဝတီထောင်မှ ၂ ဦး၊ ဒိုက်ဦးထောင်မှ ၂ ဦး၊ ကသာထောင်မှ ၁ ဦး၊ မြောင်းမြထောင်မှ ၁ ဦးတို့ဖြစ်ပါတယ်။

“အကျဥ်းထောင်တွေ ကျန်းမာရေးစောင့်ရှောက်မှုလုံလောက်စွာမရရှိလို့ ကျဆုံးရသူ ၁၀ ဦးရှိပါတယ်။ ဒီအထဲမှာတော့ နိုင်ငံရေးအကျဥ်းသူ ၁ ဦးနဲ့ကျန်တာကတော့ နိုင်ငံရေးအကျဥ်းသား ၉ ဦး ဖြစ်ပါတယ်”လို့ မြန်မာနိုင်ငံလုံးဆိုင်ရာနိုင်ငံရေးအကျဥ်းသားများကွန်ရက် (PPNM) မှ ဦးဆောင်ကော်မတီဝင် ကိုသိုက်ထွန်းဦးကပြောပါတယ်။

ပြီးခဲ့တဲ့ မေ ၂၃ ရက်ကလည်း သာယာဝတီအကျဥ်းထောင်မှာ ထောင်ဒဏ် ၁၀ နှစ် ချမှတ်ခံထားရတဲ့ နိုင်ငံရေးအကျဥ်းသား ဦးကျော်စိုး(ခ)ဦးဇော်မှာ ဆေးဝါးစောင့်ရှောက်မှု လုံလောက်စွာမရရှိတာကြောင့် နှလုံးရောဂါ၊ သွေးတိုးရောဂါဝေဒနာတို့နဲ့သေဆုံးခဲ့ရတယ်လို့ ဆိုပါတယ်။

“ကိုကျော်စိုးက ထောင်မှာရောဂါဝေဒနာခံစားခဲ့ရတာ တော်တော်ကြာပြီ။ သူ့ဆီကိုအိမ်ကနေပို့တဲ့ဆေးတွေဆိုလို့ရှိရင် ပုံမှန်အားဖြင့်ကမရောက်တာများတယ်။ ရောက်တယ် ဆိုလို့ရှိရင်လည်း အဖြတ်ခံရတာများတယ်။ အချိန်မီမရောက်ဖြစ်တာတွေလည်း များတယ်။ အဲ့တာတွေကြောင့် ကျဆုံးခဲ့ရတာဖြစ်တယ်”လို့ PPNM မှရုံးတာဝန်ခံ လင်း ကပြောပါတယ်။

ဦးကျော်စိုးမှာ ပြီးခဲ့တဲ့ ၂၀၂၁၊ နိုဝင်ဘာ ၁၀ ရက်က လှည်းကူးမြို့နယ်၊ လှည်းကူးမြို့မရဲစခန်းမှာ ပုဒ်မ ၅၀(ဈ)နဲ့ ဖမ်းဆီးတရားစွဲဆိုခံခဲ့ရတာဖြစ်ပါတယ်။

ဦးကျော်စိုးအပါအဝင် အထက်ပါသေဆုံးသူ ၁၀ ဦးဟာ ဆီးကျောက်ရောဂါ၊ နှလုံးဖောက်တာ၊ အစာအိမ်ရောင်ရောဂါ၊ သွေးတိုး၊ ဆီးချို၊ နှလုံး၊ အသည်းရောဂါ၊ အနာကြီးရောဂါ၊ လည်ချောင်း ကင်ဆာ၊ ဦးနှောက်သွေးကြောပြတ်ရောဂါ၊ အတက်ရောဂါတို့နဲ့ သေဆုံးသူခဲ့ရတာ ဖြစ်တယ်လို့ PPNM ရဲ့မှတ်တမ်းအရသိရပါတယ်။

ဒါ့အပြင် ၎င်းတို့ထဲမှာ ၅၁ (ဂ)၊ ၅၂ (ခ)၊ ၂၃ (က)၊ ၅၀၅ (က)၊ ၁၉ (စ)၊ ၁၂၄ (က)၊ ၅၂ (က)၊ ၅၀ (ည)၊ ၄၉၊ ၅၂ (က၊ခ) စတဲ့ပုဒ်မတွေနဲ့ ထောင်ဒဏ်အသီးသီးချမှတ်ခံထားရသူတွေလည်းပါဝင်ပါတယ်လို့ သိရပါတယ်။

ပြီးခဲ့တဲ့ ၂၀၂၁၊ ဖေဖော်ဝါရီ ၁ ရက်ကနေ ၂၀၂၅၊ ဇွန် ၁၂ ရက်အထိ စစ်ကောင်စီနဲ့ ၎င်းတို့ရဲ့ လက်ပါးစေတွေကြောင့် သေဆုံးခဲ့ရတဲ့ ဒီမိုကရေစီရေးလှုပ်ရှားသူတွေနဲ့ ပြည်သူစုစုပေါင်းမှာ ၆,၇၉၅ ဦး ရှိခဲ့တယ်လို့ နိုင်ငံရေးအကျဥ်းသားများကူညီစောင့်ရှောက်ရေးအသင်း – AAPPက ထုတ်ပြန်ပါတယ်။

ဒါ့အပြင် အာဏာသိမ်းဖြစ်စဥ်နဲ့ပတ်သက်ပြီး ဖမ်းဆီးခံခဲ့ရသူ စုစုပေါင်း ၂၉,၂၇၂ဦးရှိပြီး အဲဒီထဲကမှ ၂၂,၁၂၀ ဦးမှာ ထိန်းသိမ်းခံနေရဆဲဖြစ်ကာ ထိန်းသိမ်းခံနေရသူတွေအနက်မှ ၁၀,၈၂၇ ဦးမှာ ထောင်ဒဏ်ချမှတ်ခံထားရတယ်လို့ AAPP ကဆိုထားပါတယ်။

စာတည်း – လင်း

ပြည်၊ ဧပြီ ၂၂၊ ၂၀၂၃။

ပြည်အကျဉ်းထောင်အတွင်း ဖိနှိပ်မှုတွေကို ဆန့်ကျင်တောင်းဆိုမှုတွေ ပြုလုပ်ခဲ့တဲ့ အကျဉ်းသူ မဆုဝေဖြိုး အပါအဝင် အမျိုးသမီး ၄ ဦးကို သာယာဝတီအကျဉ်းထောင်ကို ပြောင်းရွေ့လိုက်တယ်လို့ အကျဉ်းထောင်နဲ့ နီးစပ်သူများထံက သိရပါတယ်။

ယနေ့ ဧပြီလ ၂၂ ရက်နေ့ နံနက်အစောပိုင်းက ပြောင်းရွေ့ခဲ့တာဖြစ်ပြီး သင်္ကြန်ရက်မတိုင်မီကတည်းက ပြောင်းရွေ့မိန့်ကိုကြားသိထားရပေမယ့် မိသားစုဝင်တွေ တွေ့ခွင့်မရဘဲ ပြောင်းရွေ့ခံလိုက်ရတာလို့ အကျဉ်းထောင် ရင်းမြစ်တွေက ဆိုပါတယ်။

“သူက ထောင်တွင်းတောင်းဆိုမှုတွေ လုပ်တာရှိတယ်။ အမျိုးသမီးဆောင်မှာ ဖိနှိပ်တာမျိုးပေါ့။ သန့်ရှင်းရေးတို့ သစ်ပင်စိုက်တာတို့ ည ကိုးနာရီ မဖြစ်မနေ အိပ်ရမယ်ဆိုတာတွေကို ထောင်ပိုင်တန်းစီးလာတဲ့အချိန်မှာ တိုက်ရိုက် တောင်းဆိုလိုက်တယ်။ အဲနောက်ပိုင်း ညပိုင်းအိပ်တာကိုတော့ လျော့ပေးလိုက်တယ် ကြားတယ်။ ထောင်အရာရှိအချို့က သိပ်မကျေနပ်ကြဘူး။ နောက်သူက ဆံပင်ဆေးဆိုးထားတော့ အနက်ဆိုးခိုင်းတာကို မဆိုးဘူးဆိုပြီး ငြင်းတယ်။ အဲဒါမျိုးတွေတော့ ရှိတယ်။” လို့ အကျဉ်းထောင်ရင်းမြစ်က ဆိုပါတယ်။

မဆုဝေဖြိုးအပါ အမျိုးသမီး အကျဉ်းသူ ၄ ဦးနဲ့ အခြား အမျိုးသားအကျဉ်းသားတချို့ကိုလည်း ပြောင်းရွေ့ခဲ့ပေမယ့် အခြားသူများရဲ့ အသေးစိတ် အချက်အလက်တွေကိုတော့ မသိရသေးဘူးလို့ သူက ပြောပါတယ်။

မဆုဝေဖြိုး ဟာ ပြည်ခရိုင်ကျောင်းသားသမဂ္ဂဥက္ကဌဟောင်းကိုစိုးမြတ်မင်းရဲ့ ဇနီးဖြစ်သလို ကိုစိုးမြတ်မင်း ဖမ်းဆီးခံရပြီး ၅ ရက်အကြာဖြစ်တဲ့ ၂၀၂၂ ခုနှစ်၊ မေလ ၈ ရက်နေ့မှာ ပြည်ခရိုင်၊ ရွှေတောင်မြို့နယ်ထဲက ကျေးရွာတရွာမှာ မဆုဝေဖြိုးနဲ့ သားဖြစ်သူ ၂ နှစ်သားအရွယ် ကလေးကိုလည်း စစ်ကောင်စီက ဖမ်းဆီးခဲ့တာပါ။

“လင်မယားနှစ်ယောက်လုံးက အဖမ်းခံရပြီး သားကလေးကတော့ မဆုဝေဖြိုးအမေတွေဆီမှာ နေတယ်လို့ သိရပါတယ်။ သာယာဝတီကို အပြောင်းခံလိုက်ရပြီဆိုတော့ ထောင်ဝင်စာ ပစ္စည်းတွေ ပို့ဖို့ ခက်သွားတာပေါ့။ အရင်ကလည်း လူတွေ့တော့ မရဘူး။” လို့ ကိုစိုးမြတ်မင်းနဲ့ ရင်းနှီးခဲ့ဖူးသူ မိတ်ဆွေတဦးက ပြောပါတယ်။

မဆုဝေဖြိုးဟာ အကြမ်းဖက်မှု တိုက်ဖျက်ရေးဥပဒေ ပုဒ်မ-၅၁(ဂ) နဲ့ ထောင်ဒဏ် ၇ နှစ်ချမှတ်ခံထားရတာဖြစ်ပြီး ၂၀၂၂ ခုနှစ်မှစတင်ကာ ဖမ်းဆီးခံရသူတွေကို စစ်ကောင်စီအထူးတရားတွေက အကြမ်းဖက်မှု တိုက်ဖျက်ရေးဥပဒေတွေနဲ့သာ အမှုဖွင့်တရားစွဲဆို အမိန့်ချခဲ့တာဖြစ်ပြီး အများစုမှာ ထောင်တသက်အပါအဝင် နှစ်ရှည်ထောင်ဒဏ်များကို ချမှတ်ခံထားရတယ်လို့ ရှေ့နေအသိုင်းအဝိုင်းက သိရပါတယ်။

စစ်ကိုင်း၊ ဒီဇင်ဘာ ၂၃၊ ၂၀၂၂။

စစ်ကိုင်းတိုင်းမုံရွာမြို့နယ်၊ သာစည်ရွာက အကျဥ်းထောင်အသစ်မှာ အကျဥ်းသားမထားပဲ ဝင်ရောက်တပ်စွဲနေတဲ့စစ်သားတွေကို ဒေသခံပြည်သူ့ကာကွယ်ရေးတပ်ဖွဲ့တွေက လက်နက်ကြီးတွေနဲ့တိုက်ခိုက်ခဲ့တယ်လို့ DRPA က သတင်းထုတ်ပြန်ထားပါတယ်။

အင်အား ၃၀ လောက်နဲ့တပ်စွဲထားတာဖြစ်ပြီး ဒီဇင်ဘာလ ၂၁ ရက်ည ၉ နာရီခွဲလောက်မှာလက်နက်ကြီးတွေနဲ့ နာရီဝက်ကြာခန့်တိုက်ခိုက်ခဲ့ကြတာလို့ ဆိုပါတယ်။

“ကျနော်တို့ မဟာမိတ်တွေပူးပေါင်းပြီး ၄၀ မမ ၆၀ မမ ၁၂၀ မမ တွေနဲ့ သွားပစ်တာဗျ။ သာစည်လမ်းတလျှောက် စစ်တာဆေးတာတွေဒေသခံတွေကို ဖိနှိပ်တာတွေ လုပ်နေတဲ့အတွက် မုံရွာပကဖရဲ့ ခွင့်ပြု့မိန့်ယူပြီး mission ဖော်ဆောင်ခဲ့တာဗျ” လို့ DRPA ရဲ့သတင်းတာဝန်ခံကပြောပါတယ်။

မဟာမိတ်တွေတိုက်ခိုက်ချိန်မှာ စစ်သားတွေပြန်ပြီးပစ်ခတ်တာမျိုး မလုပ်တော့ကြောင်း ဒီဇင်ဘာလ ၁၆ ရက်ညက စီးပွားရေးတက္ကသိုလ်ကျောင်းနားက ကင်းဂိတ်ကို တိုက်ခိုက်တုန်းကမဟာမိတ်တွေ ပစ်ခတ်နေတဲ့ဘက်ကို ထွက်လာတဲ့စစ်သားတချို့ မိုင်းကွင်းမိပြီးအထိနာထားတာရှိသလို အခုအခါမှာလည်း အရက် မူးနေတာနဲ့ အရင်လိုမိုင်းကွင်းထိမှာ ကြောက်ပြီး ပြန်မပစ်တော့တာလို့ သူကဆက်ပြောပါတယ်။

တိုက်ခိုက်မှုကြောင့် ထောင်အတွင်းရှိ ကင်းစခန်းတခုမီးလောင်ပျက်စီးသွားပြီး စစ်ကောင်စီတပ်သားတွေရဲ့ထိခိုက်မှုကို မသိရှိသေးဘူးလို့ ထုတ်ပြန်ချက်မှာ ဖော်ပြထားပါတယ်။

အဲဒီတိုက်ခိုက်မှုမှာ မဟာမိတ်တပ်ပေါင်းစုံအဖွဲ့ဝင်တွေဖြစ်တဲ့ DRPA(မုံရွာ)မြို့ပြပြောက်ကျားတပ်ဖွဲ့၊ မုံရွာခရိုင်တပ်ရင်း24-MONYWARANGER TRUTHARMY၊MACYပြောက်ကျားတပ်ဖွဲ့၊ ပုဏ္ဏကပြောက်ကျားတပ်ဖွဲ့၊ FUTURESTAR(L.P.D.F)၊ Thousand Of Silver Stars နယ်မြေစည်းမခြားပြောက်ကျားတပ်ဖွဲ့တို့ပူးပေါင်းခဲ့တာလို့ သိရပါတယ်။

DRPA အဖွဲ့ ဟာဒီဇင်ဘာလ ၇ ရက်ကလည်း စစ်ကောင်စီဖမ်းဆီးထားရာကထွက်ပြေးလာသူကို လိုက်ဖမ်းတဲ့စစ်တပ်နဲ ကနီမြို့နယ်၊ဆင်တန်းရွာအနီးမှာထိပ်တိုက်တိုးပြီး နာရီဝက်ကြာ ပြန်လှန်ပစ်ခတ်မှု ဖြစ်ပွားခဲ့သေးပါတယ်။