သေဆုံး

မြေလတ်အသံ၊ ဇူလိုင် ၂၁၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်မှာ စစ်ကောင်စီတပ်က ပစ်ခတ်လိုက်တဲ့ လက်နက်ကြီးကျည်တွေ စာသင်ကျောင်းအနီးကို ကျရောက်ပေါက်ကွဲခဲ့တာကြောင့် ၇ နှစ်ကလေးငယ် ၁ ဦးသေဆုံးခဲ့တယ်လို့ ဒေသခံတွေက ပြောပါတယ်။

ဇူလိုင် ၂၁ ရက်မနက် ၉ နာရီကျော်မှာ ချောင်းဦးမြို့ ထွေအုပ်ရုံးရှိစစ်ကောင်စီအထိုင်စခန်းကနေ လက်နက်ကြီး ၄ လုံးပစ်ခတ်ခဲ့ရာ ကျည် ၂ လုံးမှာ မှန်ချိုကျေးရွာတောင်ပိုင်းရှိ စာသင်ကျောင်း(အလက) အနီး ကျရောက်ပေါက်ကွဲခဲ့တာလို့ ဆိုပါတယ်။

“တိုက်ပွဲမရှိပါဘူး။ ကျောင်းက မုန့်စားကျောင်းဆင်းချိန်ပါ။ ကျောင်းထဲမကျဘူး။ သေတဲ့ကလေးက လက်နက်ကြီးထုတယ်ဆိုလို့ အိမ်ပြန်ပြေးတာလမ်းမှာထိတာ။ တခြားကလေးနှစ်ယောက်က ကျောင်းနားတလုံးကျလို့ အစစင်တာ”လို့ မြေပြင်အခြေအနေကို သိရှိတဲ့ အမျိုးသားတဦးကပြောပါတယ်။

သေဆုံးသူမှာ ၇ နှစ်အရွယ်ကျောင်းသူဖြစ်ပြီး ဒဏ်ရာရသူတွေကတော့ ၅ နှစ်နဲ့ ၆ နှစ်အရွယ် ကျောင်းသား ၂ ဦးတို့ဖြစ်ပြီး ဒဏ်ရာမစိုးရိမ်ရဘူးလို့ ဆိုပါတယ်။

လက်နက်ကြီးကျရောက်လာခဲ့တာကြောင့် ချောင်းဦးမြို့နဲ့ ၃မိုင်ကျော်ကွာ၊ အိမ်ခြေ ၉၀၀ ခန့်ရှိတဲ့ မှန်ချိုကျေးရွာက ဒေသခံတွေထွက်ပြေးတိမ်းရှောင်နေကြရပါတယ်။

ပြီးခဲ့တဲ့ မေ ၁၅ ရက်ကလည်း ချောင်းဦးမြို့နယ် အထွေထွေအုပ်ချုပ်ရေးရုံးမှာ တပ်စွဲထားတဲ့ စစ်ကောင်စီတပ်က လက်နက်ကြီး ၃ လုံးပစ်ခတ်ခဲ့ရာ ၂ လုံးမှာ ငါးလုံးတင်ကျေးရွာကို ကျရောက်ပေါက်ကွဲခဲ့တာကြောင့် ဒေသခံ ၅ ဦးသေဆုံးခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ ဇူလိုင် ၂၁၊ ၂၀၂၅။

ပဲခူးတိုင်း၊ အုတ်ဖိုမြို့၊ ကွေ့ချောင်းရပ်ကွက်အုပ်ချုပ်ရေးမှူး နဲ့ ဇနီးဖြစ်သူ ၂ ဦးတို့ ပစ်ခတ်ခံရပြီးသေဆုံးခဲ့တယ်လို့ ဇူလိုင် ၂၁ ရက်ဒီနေ့မှာ သာယာဝတီခရိုင်တပ်ရင်း ၃၈၀၂၊ တပ်ခွဲ ၄ က ထုတ်ပြန်ပါတယ်။

ပစ်ခတ်ခံရသူ ၂ ဦးဟာ စစ်ကောင်စီတပ်ကဖွဲ့စည်းထားတဲ့ ပြည်သူ့လုံခြုံရေးနှင့် အကြမ်းဖက်နှိမ်နင်းရေး အဖွဲ့ဝင်ဖြစ်တဲ့ အုပ်ချုပ်ရေးမှူး ကိုရဲအောင်နဲ့ ဇနီး မခင်မာရီတို့ဖြစ်ပြီး ဒီမနက် ၆ နာရီမှာ ပစ်ခတ်ခဲ့တာလို့ဆိုပါတယ်။

“ရဲအောင်က အုပ်ကြီးဖြစ်တာတော့ကြာပြီဗျ။ သူ့မိန်းမက သူ့ထက်ပိုဆိုးနေတာ ငွေရမှန်းသိတော့။ စကစအလိုကျလုပ်ပေးနေတာ။ အာဏာစသိမ်းထဲက လုပ်နေတာ။ သူတို့သေတော့ အဲ့ရပ်ကွက်က ပြည်သူတွေပျော်နေကြတာ။ သူတို့ပစ်ခံရပြီးတော့ စကစနဲ့ရဲတွေ ရောက်လာတယ်ဗျ။ နာရေးကူညီမှုကားနဲ့ တင်သွားတယ်လို့သိရတယ်ဗျ”လို့ သာယာဝတီခရိုင်တပ်ရင်း ၃၈၀၂၊ တပ်ခွဲ ၄ မှတာဝန်ရှိသူတဦးက ပြောပါတယ်။

ကိုရဲအောင်နဲ့ မခင်မာရီတို့ဆီကနေ လက်ပစ်ဗုံး ၁ လုံး၊ ဖျူး ၁ ခု၊ မိုလ်ဘိုင်းဖုန်း ၁ လုံး၊ မှတ်ပုံတင်ကတ် ၂ ခု၊ ပြည်သူ့လုံခြုံရေး နှင့်အကြမ်းဖက်နှိမ်နင်းရေးအဖွဲ့ (လုံကြမ်း) ကတ် ၁ ခု၊ ငွေသား ၈၅,၀၀၀ ကျပ်တို့ကို သိမ်းဆည်းရရှိခဲ့တယ်လို့ အထက်ပါတာဝန်ရှိသူက ဆိုပါတယ်။

ဒါ့အပြင်သူတို့ ၂ ဦးဟာ စစ်ကောင်စီတပ်ကပြုလုပ်မယ့် ရွေးကောက်ပွဲမှာ ကြံ့ခိုင်ရေးပါတီကို မဲထည့်ဖို့၊ ပါတီထဲဝင်ရောက်ပါက စစ်မှုထမ်းကင်းလွတ်ခွင့်ရမှာဖြစ်ကြောင်း လူငယ်တွေကိုစည်းရုံးတာ၊ ပြည်သူ တွေဆီက စစ်မှုထမ်းကြေးငွေကောက်ခံတာတို့ကို လုပ်ဆောင်နေသူတွေ ဖြစ်တယ်လို့လည်း ဆိုပါတယ်။

ဒါ့အပြင် ရဲအောင်မှာ ပြည်သူ့လုံခြုံရေးနှင့်အကြမ်းဖက်နှိမ်နင်းရေးအဖွဲ့ခေါင်းဆောင်တာဝန်ယူပြီး တော်လှန်ရေးအဖွဲ့တွေကို စုံစမ်းထောက်လှမ်းပြီး သတင်းပေးတာတွေကို လုပ်ဆောင်နေသူ ဖြစ်တယ်လို့လည်း သူကပြောပါတယ်။

စာတည်း – လင်း

ပဲခူး၊ ဇူလိုင် ၁၉၊ ၂၀၂၅။

ပဲခူးမြို့၊ ဥဿာမြို့သစ်၊ နယ်မြေ ၅၊ ရပ်ကွက်ကြီး ၁၊ ရေစက်လမ်းထိပ်မှာ ပြုတ်ကျနေတဲ့ ဓာတ်ကြိုးကို ခလုတ်တိုက်တဲ့ကလေးငယ်တဦး ဓာတ်လိုက်သေဆုံးသွားတယ်လို့ ဒေသခံအမျိုးသမီးတဦးဆီက သိရပါတယ်။

သေဆုံးသူဟာ ရွှေဘုန်းပွင့် ဘုန်းတော်ကြီးစာသင်ကျောင်းမှ Grade 1 တက်ရောက်နေတဲ့ ရပ်ကွက်ကြီး ၁ မှာနေထိုင်သူ အသက် ၇ နှစ်အရွယ်၊ မောင်ကျော်ကျော်မျိုး ဆိုသူဖြစ်ပြီး ဇူလိုင် ၁၈ ရက် ညနေ ၄ နာရီကျော်ခန့်မှာ သေဆုံးသွားတာလို့ ဆိုပါတယ်။

“ဓာတ်ကြိုး လမ်းမှာပြတ်ကျနေတာကို ကလေးက ခလုတ်တိုက်လဲကျပြီး ဓာတ်လိုက်နေတာ။ ဘယ်သူမှလည်း ဆွဲလို့မရဘူးထင်ပါတယ်။ သေမှပဲ သိကြတာ။ ကျောင်းကအပြန်ကို သူအမေက ခြင်ဆေးခွေဝယ်ခိုင်းတာ။”လို့ ဒေသခံအမျိုးသမီးတဦးက ပြောပါတယ်။

ပြုတ်ကျနေတဲ့ ဓာတ်ကြိုးက ရပ်ကွက်အတွင်းမီးတိုင်တွေကို သွယ်တန်းထားတဲ့ကြိုးမျိုးဖြစ်ပြီး ပြတ်ကျနေတာ ၃ ရက်ခန့်ရှိပြီလို့သိရကာ ရပ်ကွက်က သက်ဆိုင်ရာမြို့နယ် EPC ရုံးကို ဆက်သွယ် အကြောင်းကြားထားပေမယ့် လာရောက်ပြုပြင်ပေးတာမျိုးမရှိဘူးလို့ ဆိုပါတယ်။

သေဆုံးသွားတဲ့ ကလေးငယ်ရဲ့အလောင်းကိုတော့ ဒေသခံလူမှုကူညီရေးအသင်းကကောက်ယူပြီးနောက် ပဲခူးဆေးရုံကို ပို့ဆောင်ပေးရကာ စစ်ဆေးမှုပြုလုပ်ပြီး နေ့ချင်းနေအိမ်ကို ပြန်သယ်ခဲ့ရတယ်လို့ သိရပါတယ်။

ပြီးခဲ့တဲ့ နှစ် ဇူလိုင် ၃၀ ရက်ကလည်း ပဲခူးမြို့ ရေကြီးနေချိန် ပဲခူးမြို့၊ အမှတ်(၁) ကျောင်းရှေ့၊ ရွှေမော်ဓောဘုရားလမ်းပေါ်မှာ စက်ဘီးစီးလာတဲ့လူငယ်တဦးက လမ်းကူးဖို့စောင့်နေရင်း အနီးကဓာတ်တိုင်ကို ကိုင်မိရာမှ ဓာတ်လိုက်သေဆုံးခဲ့သေးတယ်လို့ သိရပါတယ်။

စာတည်း – လင်း

ရေစကြို၊ ဇူလိုင် ၁၇၊ ၂၀၂၅။

မကွေးတိုင်း၊ ရေစကြိုမြို့နယ်၊ ကမ္ဘဲ့ကျေးရွာမှာ စစ်ကောင်စီတပ်ကပစ်ခတ်တဲ့ လက်နက်ကြီးကျည် ထိမှန်ပြီး ပြည်သူ့တပ်ဖွဲ့ဝင် ၁ ဦးအပါ ၄ ဦးသေဆုံးခဲ့တယ်လို့ ရေစကြိုမြို့နယ်ပြည်သူ့ကာကွယ်ရေးတပ်ဖွဲ့ဆီက သိရပါတယ်။

ဇူလိုင် ၁၅ ရက်ည ၁၀ နာရီဝန်းကျင်မှာ ရေစကြိုအခြေစိုက် ခလရ ၂၅၈ တပ်ကပစ်ခတ်တဲ့ ၈၀ မမ လက်နက်ကြီးကျည်တွေက ကမ္ဘဲ့ကျေးရွာကိုကျရောက်ပေါက်ကွဲချိန် ထိမှန်သေဆုံးခဲ့ကြတာလို့ ဆိုပါတယ်။

“ပထမ ၁ လုံးပစ်ခတ်တာမှာ ပြည်သူနေအိမ်ထိမှန်ပြီး မီးလောင်သွားတာ။ မီးလောင်သွားတဲ့အချိန် ကျနော်တို့ရဲဘော်တွေက မီးလောင်တဲ့အိမ်ကိုသွားရောက်ငြှိမ်းသတ်ဖို့လုပ်တဲ့အချိန် နောက် ၁ လုံးက သူတို့စုဝေးတဲ့နေရာကျရောက်ပေါက်ကွဲပြီး တပ်ဖွဲ့ဝင် ၁ ဦး၊ သူ့ဇနီး၊ CDM ကျောင်းဆရာမနဲ့ ပြည်သူ ၁ ဦးထိခိုက်သေဆုံးခဲ့တယ်” လို့ ရေစကြိုမြို့နယ် ပြည်သူ့ကာကွယ်ရေးတပ်ဖွဲ့ရဲ့ သတင်းနဲ့ ပြန်ကြားရေးတာဝန်ခံက ပြောပါတယ်။

ဒီပစ်ခတ်မှုကြောင့် အသက် ၂၀ နှစ် အရွယ် ရေစကြိုပကဖတပ်ဖွဲ့ဝင်ကောက်ကြီး(ခ)မောင်ရန်နိုင်နဲ့ ဇနီးဖြစ်သူ အသက် ၂၄ နှစ် အရွယ် မသဇင်ဝေ၊ အသက် ၃၂ နှစ် အရွယ် CDM ကျောင်းဆရာမ မနွေဦးမေနဲ့ အသက် ၁၇ နှစ် အရွယ်မောင်ရှင်းလင်းကိုတို့ သေဆုံးခဲ့ပြီး ဒေသခံ ၄ ဦးလည်း ထိခိုက်ဒဏ်ရာရခဲ့တယ်လို့ ဆိုပါတယ်။

“ကျဆုံးသွားတဲ့ တပ်ဖွဲ့ဝင်နဲ့ ဇနီးကိုတော့ ရေစကြို ပကဖ ကနေ စစ်ဓလေ့ထုံးစံအတိုင်း နာရေးကို ပြုလုပ်ပေးခဲ့တယ်၊ CDM ကျောင်းဆရာမကိုတော့ ဇာတိရွာကို ပြန်ခေါ်သွားပြီးတော့ ကောင်းမွန်စွာပဲ သင်္ဂြိုဟ်ပေးကြတယ်၊ ရွာထဲက ပြည်သူကိုလည်း ဒီတချိန်တည်းမှာပဲ မိသားစုတွေက နာရေးလုပ်ခဲ့တာ၊” လို့ အထက်ပါတာဝန်ခံကပြောပါတယ်။

ပြီးခဲ့တဲ့ ၂၀၂၃၊ အောက်တိုဘာ ၁၉ ရက်ကလည်း အိမ်ခြေ ၁၀၀ ဝန်းကျင်ရှိတဲ့ ကမ္ဘဲ့ကျေးရွာကို စစ်ကောင်စီတပ်တွေက စစ်ကြောင်းထိုးပြီး နေအိမ်တွေကို မီးရှို့ဖျက်ဆီးခဲ့သေးတယ်လို့ သိရပါတယ်။

စာတည်း – လင်း

သပိတ်ကျင်း၊ ဇူလိုင် ၁၅၊ ၂၀၂၅။

မန္တလေးတိုင်း၊ သပိတ်ကျင်းမြို့နယ်က လီဆူဒေသခံတွေအများဆုံးနေထိုင်တဲ့ ပိုးဇာနွယ်ရွာကို စစ်ကောင်စီတပ်ကလေကြောင်းကနေ ဗုံးကြဲတိုက်ခိုက်ခဲ့လို့ ၁ နှစ်သားကလေးမိသားစုအပါ ၆ ဦး သေဆုံးခဲ့တယ်လို့ ဒေသခံတွေနဲ့ တော်လှန်ရေးတပ်ဖွဲ့ဝင်တွေထံက သိရပါတယ်။

ဇူလိုင် ၁၄ ရက် ယမန်နေ့ညနေ ၅ နာရီကျော်လောက်က တိုက်လေယာဥ် ၁ စီးနဲ့ ဗုံးကြဲချ တိုက်ခိုက်ခဲ့တာဖြစ်ပြီး ကျေးရွာအတွင်း လီဆူခရစ်ယာန်အသင်းတော်ဘုရားကျောင်းအနီး နေအိမ်တွေပေါ်ကျရောက်ပေါက်ကွဲခဲ့တာလို့ ဆိုပါတယ်။

” သေဆုံးသွားတဲ့ ၆ ယောက်ထဲမှာ ၄ ယောက်က မိသားစုလိုက်ကို သေဆုံးတာပါ။ ကျန်တဲ့ ၂ ယောက်ကတော့ အဲ့အိမ်ကိုအလည်လာတဲ့ ကလေးမလေးတွေ ပါ သွားကြတာ။ ပိုးဇာရွာထဲရဲ့ ခရစ်ယာန်ဘုရားကျောင်းကို ဗုံးကြဲချပုံရတယ်ဗျ။ အဲ့ကျောင်းပတ်ပတ်လည်အနီးက နေအိမ်တွေပေါ်ကိုဘဲ ဗုံးကျပေါက်ကွဲတာ။ ပျက်စီးဆုံးရှုံးမှုလည်း များတယ်” လို့ ဒေသတွင်းကာကွယ်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

စစ်ကောင်စီရဲ့ ဗုံးကြဲတိုက်ခိုက်မှုကြောင့် ပိုးဇာရွာနေ လီဆူဒေသခံတွေဖြစ်တဲ့ အသက် ၄၄ နှစ်အရွယ် ဒေါ်ဟွမ်မဆီး၊ သားဖြစ်သူ အသက် ၁ နှစ်အရွယ် မောင်သောင်းစာ၊ သမီးတွေဖြစ်တဲ့ အသက် ၁၁ နှစ် မသောင်းမလေး၊ အသက် ၁၄ နှစ် မသောင်းမီးသာနဲ့ အိမ်နီးချင်းမိန်းကလေးတွေဖြစ်တဲ့ အသက် ၁၂ နှစ်အရွယ် မနောမစာ၊ မဟဲဘိုမီး တို့ ၆ ဦး သေဆုံးခဲ့တယ်လို့ သိရပါတယ်။

ဒါ့အပြင် ဗုံးပေါက်ကွဲမှုကြောင့် လူနေအိမ် ၃ လုံး၊ ဆိုင်ကယ် ၂ စီးနဲ့ ကား ၁ စီး ပျက်စီးခဲ့ကာ သေဆုံးသွားခဲ့တဲ့ အရပ်သား ၆ ဦးရဲ့ ရုပ်အလောင်းတွေကိုတော့ ဇူလိုင် ၁၅ ရက် ဒီကနေ့မှာ စျာပန ပြုလုပ်သွားမယ်လို့ ဆိုပါတယ်။

ဗုံးကြဲခံခဲ့ရတဲ့ ပိုးဇာနွယ်ကျေးရွာဟာ အိမ်ခြေ ၂၀၀ နီးပါးရှိပြီး ခရစ်ယာန်ဘာသာဝင် လီဆူတိုင်းရင်းသားအများစုနေထိုင်တဲ့ရွာဖြစ်တယ်လို့ သိရပါတယ်။

ပြီးခဲ့တဲ့ ဇူလိုင် ၁၂ ရက်နေ့ ညပိုင်းကလည်း သပိတ်ကျင်းမြို့နယ်၊ ဇရပ်ကွင်းရွာကို ဗုံးကြဲချခဲ့လို့ အရပ်သား ၂ ဦး ထိခိုက်ဒဏ်ရာရရှိခဲ့ပြီး ပြည်သူပိုင် နေအိမ် ၄ လုံး ထိခိုက်ပျက်စီးခဲ့တယ်လို့ သိရပါတယ်။

စာတည်း – ဟိန်းစံ

ဒဏ်ရာပြင်းထန်သူများလို့ နောက်ထပ်သေဆုံးသူရှိနိုင်ပြီး ဆေးဝါးပစ္စည်းအရေးပေါ်လိုအပ်နေ

မြေလတ်အသံ၊ ဇူလိုင် ၁၁၊ ၂၀၂၅။

စစ်ကိုင်းမြို့နယ်၊ လင်းတလူးကျေးရွာရှိ သစ္စဝါဒီကျောင်းတိုက်ဗုံးကြဲတိုက်ခိုက်ခံရမှုအတွင်း စစ်ရှောင်နေကြတဲ့ ကလေး ၃ ဦးအပါ စုစုပေါင်း ၂၂ ဦးသေဆုံးထားတယ်လို့ ဒေသခံတွေဆီက သိရပါတယ်။

သေဆုံးသူတွေဟာ ကျော်ဇေယျာကျေးရွာက ကိုခင်မောင်လွင်၊ ကိုလင်း၊ ၈ နှစ်အရွယ် မောင်ဝေဖြိုး၊ မသီရိစန္ဒာ၊ ခေါ်ခင်လေး၊ မလှိုင်၊ မကြည်၊ မတင်မျိုးကြည်၊ မအေးမြတ်မော်၊ ပုဂံတူကျေးရွာက ကိုမြင့်နိုင်၊ ကိုထွန်းထွန်းနိုင်၊ ၁၂ နှစ်အရွယ် ကိုလှိုင်မင်းခန့်၊ ၁၀ နှစ်အရွယ် မောင်စိုင်းမင်းခန့်၊ ဒေါ်ပြာကြီး၊ ဒေါ်မော်ကြီး၊ မခင်ခင်ချော၊ မအေးအေးသင်း၊ မမိစိုး၊ မတင်မျိုးဆွေ၊ မသင်းသင်းခိုင်၊ မခိုင်သဇင်၊ မရွှန်းလဲ့ထွန်း တို့ဖြစ်ပါတယ်။

ဇူလိုင် ၁၁ ရက်မနက် ၁ နာရီကျော်မှာ တိုက်ခိုက်ရေးလေယာဥ် ၁ စီးက သစ္စဝါဒီကျောင်တိုက်ကို ဗုံးသီး ၂ လုံးချတိုက်ခိုက်ခဲ့ရာ စစ်ဘေးရှောင်တွေ စုပေါင်းနေထိုင်ကြတဲ့ဓမ္မာရုံပေါ်ကို ကျရောက်ပေါက်ကွဲခဲ့တာဖြစ်ပါတယ်။

ဒါ့အပြင် တိုက်ခိုက်မှုအတွင်း ဒေသခံ ၅၀ ခန့်လည်းဒဏ်ရာပြင်းထန်ရရှိခဲ့ပြီး နောက်ထပ်သေဆုံးမှုတွေလည်းရှိနိုင်တယ်လို့ ကယ်ဆယ်ရေးလုပ်နေတဲ့ အဖွဲ့နဲ့နီးစပ်သူအမျိုးသားတဦးကပြောပါတယ်။

“စစ်ဘေးရှောင်တွေ တည်းခိုနေတဲ့ ဓမ္မာရုံကြီးပေါ်ဗုံးကတည့်တည့်ကျခဲ့တဲ့အတွက်ကြောင့် ဓမ္မာရုံကြီးလဲပြိုကျပျက်စီးသွားခဲ့ပါတယ်။ ဗုံးကြဲတဲ့အချိန်ကညအိပ်မောကျချိန် စစ်ဘေးရှောင်တွေအားလုံး ဘုန်းကြီးကျောင်းရဲ့ဓမ္မာရုံကြီးထဲမှာစုပေါင်းအိပ်ရတာဆိုတော့ နောက်ထပ်လည်းသေဆုံးမှုတွေရှိနိုင်တယ်” အထက်ပါအမျိုးသားက ပြောပါတယ်။

အဆိုပါဓမ္မာရုံအတွင်းမှာ ကျော်ဇေယျာ၊ ပုဂံတူ၊ သစ်ချိုကုန်း၊ ရုံးပင်ကန်၊ ဆင်ပြေ၊ ဒေါင်းမ၊ မအူပင်၊ ညောင်ကုန်း၊ သပြေပင်၊ တဲကြီး၊ သလွန်ဖြူ၊ ဆင်မြေစတဲ့ကျေးရွာတွေက ဒေသခံ ၁၅၀ ကျော် ခိုလှုံနေကြတာ ရက်ပေါင်း ၂၀ ခန့်သာရှိသေးတယ်လို့ သူကဆိုပါတယ်။

ဒါ့အပြင် တိုက်ခိုက်ရေးလေယာဥ်ဟာ လင်းတလူရွာဘုန်းကြီးကျောင်းကို ဗုံးကြဲခဲ့ပြီးနောက် ကျော်ဇေယျာကျေးရွာကိုပါ ထပ်မံဗုံးကြဲခဲ့သေးတယ်လို့ သိရပါတယ်။

အလားတူပြီးခဲ့တဲ့ဇူလိုင် ၉ ရက်ကလည်း ကျော်ဇေယျာ၊ ချိုင်း၊ လင်းလူးစတဲ့ကျေး ရွာ ၃ ရွာကို လေကြောင်းကနေဗုံးကြဲတိုက်ခိုက်တဲ့အပြင် အုန်းတောအခြေစိုက် ၆၀၀၅ တင့်ကား တပ်ရင်းကနေလည်း ဟောင်ဝစ်ဇာတွေနဲ့ပါပစ်ခတ်ခဲ့တယ်လို့ ဒေသခံတွေကပြောပါတယ်။

စစ်ကိုင်းမြို့နယ်မြောက်ခြမ်းရှိ ကျော်ဇေယျာကျေးရွာကို စစ်ကောင်စီတပ်က ဇွန် ၁၇ ရက်မှစတင်ကာ ဇူလိုင် ၁၁ ရက်ဒီနေ့အထိ ထိုးစစ်ဆင်နေတာကြောင့် နှစ်ဖက်တိုက်ပွဲပြင်းထန်နေပြီး တိုက်ပွဲကြောင့် ရွှေဘို-မြစ် ကြီးနားကားလမ်းကိုလည်း ပိတ်ထားရတယ်လို့ သိရပါတယ်။

အဆိုပါကားလမ်းပိုင်းကို ပိတ်ထားရတာ တလကျော်ကြာလာနေသလို စစ်ဘေးရှောင်ပြည်သူ သောင်းချီကာထွက်ပြေးထွက်နေရပြီး စားနပ်ရိက္ခာ၊ ဆေးဝါးတွေ ပြတ်လပ်နေတာကြောင့် အရေးပေါ်ကူညီကယ်ဆယ်ရေးတွေလိုအပ်နေတယ်လို့ သိရပါတယ်။

စာတည်း – လင်း

ဝက်လက်၊ ဇူလိုင် ၁၁၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ ရေလည်မော်ကျေးရွာ၊ သံခွန်ဆိပ်ကမ်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသား ၁ ဦးနဲ့ အမျိုးသမီး ၁ ဦးသေဆုံးခဲ့တယ်လို့ ဒေသခံတွေဆီကသိရပါတယ်။

ဇူလိုင် ၁၁ ရက် မနက် ၉ နာရီ ၄၅ မိနစ်လောက်မှာ စစ်ကောင်စီရဲ့ ဂျက်ဖိုက်တာ ၁ စီးက ပေါင် ၃၀၀ ဗုံး ၄ လုံးကြဲချတိုက်ခိုက်ခဲ့တာလို့ ဆိုပါတယ်။

“မြစ်ကြောင်းကိုဖြတ်ဖို့ ပြည်သူတွေသွားလာနေတဲ့ အဆုံကြတာပေါ့၊ ဘယ်နေရာကမှလည်း သွားလာဖြတ်သမ်းခွင့်မရှိတော့ ဒီနေရာကနေ ပြည်သူတွေ၊ ကားတွေသွားနေရတဲ့နေရာတခုပါ၊ လူစုံတဲ့အချိန်ကို ရည်ရွယ်ချက်ရှိရှိနဲ့ လာပြီးဗုံးကြဲပစ်ခတ်သွားတာ၊” လို့ ဝက်လက်မြို့ခံတဦးက ပြောပါတယ်။

အသက် ၄၀ အရွယ်အမျိုးသမီး ၁ ဦးနဲ့ အသက် ၅၀ အရွယ်အမျိုးသား ၁ ဦးသေဆုံးခဲ့ပြီး သူတို့က ဘယ်ဒေသကဆိုတာကိုတော့ အတည်မပြုနိုင်သေးပါဘူး။

ဒ့ါအပြင် ဗုံးကြဲတိုက်ခိုက်ခဲ့ပြီးနောက် ဂျက်ဖိုက်တာပေါ်ကနေပါ စက်လက်တွေနဲ့ပါပစ်ခတ်ခဲ့ကာ နောက်ထပ် ဒဏ်ရာရရှိသူ ၆ ဦးရှိခဲ့ပြီး သူတို့ကိုတော့ဆေးဝါးကုသပေးနေတယ်လို့ သိရပါတယ်။

အခုဗုံးကြဲခံရတဲ့ ရေလှည်မော်ကျေးရွာသံခွန်ဆိပ်ကတဆင့် ဒေသခံတွေပြည်သူတွေဟ မန္တလေး၊ စစ်ကိုင်း၊ မိုးကုတ်၊ မူဆယ်၊ လားရှိုးတို့ကိုကူးသန်းသွားလာတာတွေလုပ်လေ့ရှိတယ်လို့ အထက်ပါဒေသခံက ပြောပါတယ်။

အလားတူ ဒီမနက် ၁ နာရီကျော်လောက်မှာလည်း စစ်ရှောင်တွေရှိနေတဲ့ စစ်ကိုင်းမြို့နယ်၊ လင်းတလူးရွာက ဘုန်းကြီးကျောင်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် စစ်ရှောင် ၃၀ နီးပါးသေဆုံးခဲ့ပါသေးတယ်။

စာတည်း – လင်း