မြေလတ်အသံ၊ စက်တင်ဘာ ၁၃၊ ၂၀၂၅။

ဝန်ကြီးဌာနနဲ့ ဝန်ထမ်းတွေရဲ့အချက်အလက်တွေ ဆိုရှယ်မီဒီယာပေါ်ပေါက်ကြားနေမှုဟာ နိုင်ငံတော်အဆင့်လုံခြုံရေးထိခိုက်စေနိုင်လို့ ထိထိရောက်ရောက်ကြပ်ကြပ်မတ်မတ်ဆောင်ရွက်ကြဖို့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောဆိုလိုက်ပါတယ်။

စက်တင်ဘာ ၁၂ ရက် မနေ့က နေပြည်တော်မှာ ပြုလုပ်တဲ့ စစ်ကော်မရှင်အစည်းအဝေးမှာ စစ်ကော်မရှင်လက်အောက်ဝန်ကြီးဌာနတွေနဲ့ ဝန်ထမ်းတွေရဲ့အချက်အလက်တွေ လူမှုကွန်ယက်ပေါ်ကို ကျိုးပေါက်နေမှုနဲ့ပတ်သက်ပြီး သူ့ရဲ့လက်အောက်ဌာနဆိုင်ရာဝန်ကြီးတွေကို အခုလို သတိပေးပြောဆိုခဲ့တာပါ။

” ဝန်ကြီးဌာနများရဲ့အချက်အလက်များ ဝန်ထမ်းများရဲ့အချက်အလက်များဟာ ဆိုရှယ်မီဒီယာများ အသုံးပြုမှုမှတဆင့် လုံခြုံရေးကျိုးပေါက်လျက်ရှိတာကို တွေ့ရှိရကြောင်း လုံခြုံရေးဆိုင်ရာအချက်အလက်များ ပုဂ္ဂိုလ်ရေးဆိုင်ရာအချက်အလက်များဟာ တိုက်ရိုက်ကျိုးပေါက်ခြင်း သွယ်ဝိုက်၍ ကျိုးပေါက်ခြင်းများဖြင့် တဦးတယောက်ချင်း ထိခိုက်ခြင်း၊ ဌာနအလိုက်ထိခိုက်ခြင်း၊ ထိုမှတဆင့် နိုင်ငံတော်အဆင့်ထိခိုက်ခြင်းများ ဖြစ်ပေါ်စေနိုင်ကြောင်း၊ သို့ဖြစ်၍ လုံခြုံရေးပိုင်းဆိုင်ရာအရ အသိပညာပေးရန်နဲ့ ထိထိရောက်ရောက်ကြပ်မတ်ခြင်းများဆောင်ရွက်သွားရန်လိုကြောင်း” ဆိုကာ စစ်ခေါင်းဆောင်က ပြောပါတယ်။

ပြီးခဲ့တဲ့ ဇူလိုင်နဲ့ဩဂုတ်လတွေမှာ စစ်ကော်မရှင်လက်အောက် ကာကွယ်ရေး၊ ပြည်ထဲရေးဝန်ကြီးဌာနတွေအပါအဝင် ဝန်ကြီးဌာနအများအပြားရဲ့ဌာနဆိုင်ရာအချက်အလက်တွေ၊ အဲ့ဒီဝန်ကြီးဌာနတွေမှာ တာဝန်ထမ်းဆောင်နေတဲ့ စစ်ကော်မရှင်လက်အောက်ထောင်နဲ့ချီတဲ့ဝန်ထမ်းတွေရဲ့ပုဂ္ဂိုလ်ရေး ဆိုင်ရာအချက် အလက်တွေ လူမှုကွန်ယက်ကို ပေါက်ကြားလာခဲ့တာပါ။

အဲ့ဒီဌာနဆိုင်ရာအချက်အလက်တွေမှာ စစ်ကော်မရှင်လက်အောက်ဌာနအလိုက်တာဝန်ထမ်းဆောင်နေတဲ့ဝန်ထမ်းတွေရဲ့ ဓာတ်ပုံ၊ အမည်၊ မှတ်ပုံတင်အမှတ်၊ မွေးသက္ကရာဇ်စတဲ့ ကိုယ်ရေးအချက်အလက်တွေ ပါဝင်နေတာကြောင့် Non-CDM ဝန်ထမ်းတွေအကြား ဝေဖန်မှုတွေလည်း ဖြစ်ပေါ်ခဲ့ပါတယ်။

ဆားလင်းကြီး၊ ဩဂုတ် ၂၆၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့နယ်၊ လက်ပံတောင်းတောင်ကြေးနီစီမံကိန်း၊ ဝမ်ပေါင်နဲ့ ယန်စီကုမ္ပဏီက ဝန်ထမ်းအလုပ်သမားတွေအားလုံး ကြိုတင်မဲပေးဖို့ စစ်ကော်မရှင်အုပ်စုခေါင်းဆောင်တွေက လာရောက်ပြောဆိုသွားတယ်လို့ ကုမ္ပဏီတွေနဲ့နီးစပ်သူသတင်းရင်းမြစ်တွေက ပြောပါတယ်။

ဩဂုတ် ၂၃ ရက် မနက် ၉ နာရီဝန်းကျင်မှာ မုံရွာမြို့တော်ခန်းမကနေ ဂျမ်မာကားအပါ ကား ၁၅ စီးပါယာဥ်တန်းနဲ့ စစ်ကိုင်းတိုင်းစစ်ကော်မရှင်အုပ်စုခေါင်းဆောင်တွေက လက်ပံတောင်းတောင်စီမံကိန်းကို လာရောက်ပြီး ဝမ်ပေါင်ကုမ္ပဏီတာဝန်ရှိသူတွေကိုတွေ့ဆုံကာ ဝန်ထမ်းတွေကြိုတင်မဲပေးရမယ့်ကိစ္စတွေ ပြောဆိုသွားတာလို့ ဆိုပါတယ်။

“ ဝမ်ပေါင်ထဲဝင်တော့ လူကြီးပိုင်း စည်းဝေးပွဲလုပ်တယ်။ ဝမ်ပေါင်ထဲကအကြီးအကဲတွေကိုပြောတာက ဝမ်ပေါင်ထဲကဝန်ထမ်းတွေကို ရွေးကောက်ပွဲအတွက် ကြိုတင်မဲပေးရမှာလို့ ပြောသွားကြောင်း သိရတယ်” လို့ ဝမ်ပေါင်ကုမ္ပဏီနဲ့နီးစပ်သူဆားလင်းကြီးဒေသခံတဦးက မြေလတ်အသံကို ပြောပါတယ်။

တရုတ်စီမံကိန်းအတွက် ကြိုတင်မဲတွေကို စစ်ကြောင်းလုံခြုံရေးနဲ့ လာရောက်ပို့ဆောင်ပေးမှာဖြစ်ကြောင်း ပြောဆိုသွားပြီး ပို့ဆောင်မယ့်အချိန်ကာလ အတိအကျကိုတော့ပြောဆိုသွားတာမရှိဘူးလို့ ဆိုပါတယ်။

ဒါ့အပြင်လက်ရှိ ဝမ်ပေါင်နဲ့ ယန်စီကုမ္ပဏီတွေက ဝန်ထမ်းတွေသာမက ၎င်းတို့ရဲ့မိသားစုဝင်တွေပါ ကြိုတင်မဲပေးရမှာဖြစ်ကြောင်း လက်ပံတောင်းတောင်တရုတ်စီမံကိန်းအခြေအနေတွေကိုသိရှိထားတဲ့ လုပ်ငန်းခွင်ပြန်လည်ဝင်ရောက်ဖို့ကမ်းလှမ်းခံထားရသူ ဝမ်ပေါင်ကုမ္ပဏီဝန်ထမ်းဟောင်းတဦးက ပြောပါတယ်။

“ အကိုတို့ စုံစမ်းထားရသလောက်ကတော့ မဲကတော့ မပေးလို့မရဘူး။ ကြိုတင်မဲပေးရမယ်၊ ပေးရမယ့် မဲကလည်း (အလုပ်) ဝင်ပြီးလုပ်တဲ့ မိသားစုတစုလုံးဖြစ်တယ်။ ဝင်ပြီးလုပ်တဲ့ ဝန်ထမ်းတယောက်တောင်မဟုတ်ဘူး၊ သူ့မိသားစု အသက်ပြည့်ခြင်း၊ မပြည့်ခြင်း မပါဘူး။ သူ့မိသားစုရဲ့ ဦးရေအလိုက် ကြံ့ခိုင်ရေးပါတီကို မဲပေးရမယ်” လို့ သူက ပြောပါတယ်။

ပြီးခဲ့တဲ့ ၂၀၁၅ နဲ့ ၂၀၂၀ အထွေထွေရွေးကောက်ပွဲတွေမှာ ဝန်ထမ်းတွေအနေနဲ့ ရွေးကောက်ပွဲကျင်းပတဲ့ရက်တွေမှာသာ လက်ပံတောင်းတောင်နဲ့ ကြေးစင်တောင်အကြားရှိ မိုင်းမြို့မဲရုံတွေဆီ ကိုယ်တိုင်သွားရောက်မဲပေးခဲ့ရတာပါ။

“ဒါ မူမှန်တဲ့အနေအထားမျိုး မဟုတ်ဘူး။ အဲ့ဒီတော့ သူတို့ပေးရမယ့် မဲကလည်း (ပယ်မဲဖြစ်သွားရင်တောင်) လုံးဝပယ်မဲဖြစ်သွားနိုင်မယ့် အနေအထားမျိုး မရှိဘူး။ သူတို့သည် ဟိုမှာ မပေးမနေရ ကြံ့ခိုင်ရေးကို ပေးရမှာ” လို့ ဝန်ထမ်းဟောင်းအမျိုးသားက ဆက်ပြောပါတယ်။

၂၀၂၁ စစ်အာဏာသိမ်းပြီးနောက် တရုတ်စီမံကိန်း ဝမ်ပေါင် – ယန်စီကုမ္ပဏီတွေကဝန်ထမ်း ၃ ပုံ ၂ ပုံခန့်ဟာ အကြမ်းမဖက်အာဏာဖီဆန်ရေး – CDM လှုပ်ရှားမှုတွေမှာ ပါဝင်ခဲ့တာကြောင့် ကြေးနီထုတ်လုပ်ရေးလုပ်ငန်းတွေကို ၂၀၂၃ နှစ်ကုန်ပိုင်းအထိ ၃ နှစ်ခန့် ရပ်နားခဲ့တာပါ။

အဲ့ဒီနောက်၂၀၂၄ ဇွန် ၁ ရက်မှာ ဝန်ထမ်းအင်အားအနည်းငယ်နဲ့ နေ့စားဝန်ထမ်းတွေခန့်အပ်ကာ ကြေးနီစီမံကိန်းလုပ်ငန်းတွေ ပြန်လည်ပတ်ခဲ့ပါတယ်။ ယခုနှစ်ဆန်းပိုင်းကစတင်ကာ CDM မှာပါဝင်ခဲ့တဲ့ ဝန်ထမ်း ၅,၀၀၀ ကျော်လုပ်ငန်းခွင်တွေကို အသီးသီးပြန်လည်ဝင်ရောက်ခဲ့တာကြတာကြောင့် ကြေးနီထုတ်လုပ်ရေး လုပ်ငန်းတွေမှာ ဝန်ထမ်းအင်အား ၆,၀၀၀ ခန့် နဲ့ မူလအတိုင်း ၈ နာရီ ၃ ဆိုင်းခွဲ ပြန်လည်ပတ်နေတာလည်း ဖြစ်ပါတယ်။

ရွေးကောက်ပွဲကို အပိုင်းလိုက်ခွဲပြီး ကျင်းပမယ်လို့ စစ်ကော်မရှင်က အခုလထဲမှာပဲ ထုတ်ပြန်ကြေညာထားပြီး အပိုင်း ၁ အနေနဲ့ မြို့နယ် ၁၀၂ ခုမှာ ကျင်းပမယ်လို့ ဆိုထားကာ အပိုင်း ၁ မှာ ထုတ်ပြန်ထားတဲ့ စစ်ကိုင်းတိုင်း ၁၂ မြို့နယ်အနက် ဆားလင်းကြီးမြို့နယ်ပါဝင်တာမရှိသေးဘဲ ရွေးကောက်ပွဲ အပိုင်း ၁ ကို လာမယ့်ဒီဇင်ဘာ ၂၈ ရက် ပြုလုပ်မယ်လို့ သိရပါတယ်။

ဆားလင်းကြီးမြို့နယ်၊ တရုတ်ကြေးနီစီမံကိန်းက ဝန်ထမ်းတွေနဲ့မိသားစုဝင်တွေကို ကြိုတင်မဲပေးဖို့ စစ်ကော်မရှင်အုပ်စုတွေက ပြောဆိုသွားတာနဲ့ ပတ်သက်ပြီး စစ်ကိုင်းတိုင်းကြံ့ခိုင်ရေးပါတီကို မြေလတ်အသံက မေးမြန်းခဲ့ပေမယ့် ပြန်လည်ဖြေကြားတာမရှိပါဘူး။

စာတည်း – ဟိန်းစံ

မြေလတ်အသံ၊ ဇန်နဝါရီ ၂၈၊ ၂၀၂၅။

စစ်မှုထမ်းလူစားလဲဖို့ဆိုကာ ငွေသိန်း ၁၀၀ ကျော်ယူတဲ့ ရွှေဘိုမြို့နယ်ရဲမှူးနဲ့ အထွေထွေအုပ်ချုပ်ရေးဌာနက စာရေး ၂ ဦးအပါ စုစုပေါင်း ၃ ဦးကို ဖမ်းဆီးထားတယ်လို့ ဇန်နဝါရီ ၂၈ ရက် စစ်ကောင်စီဝါဒဖြန့်သတင်းစာမှာ ဖော်ပြထားပါတယ်။

ဖမ်းဆီးခံရသူတွေဟာ စစ်ကိုင်းတိုင်း၊ ရွှေဘိုမြို့နယ်ရဲတပ်ဖွဲ့မှူး ရဲမှူးသန်းဇော်၊ မြို့နယ်အထွေထွေအုပ်ချုပ်ရေးမှူးရုံးက အကြီးတန်းစာရေး ကျော်ခိုင်လတ်၊ ခရိုင်အထွေထွေအုပ်ချုပ်ရေးမှူးရုံးက အငယ်တန်းစာရေး သူရိန်ညွန့်တို့ဖြစ်ပါတယ်။

စစ်ကောင်စီရဲ့ မြန်မာ့အလင်းသတင်းစာပါဖော်ပြချက်အရ ရဲမြို့နယ်မှူးသန်းဇော်၊ ရွှေဘိုမြို့နယ်အထွေထွေအုပ်ချုပ်ရေးမှူး ဦးကျော်နိုင်နဲ့ စစ်ကောင်စီလက်အောက်ခံအဖွဲ့တွေဟာ ဇန်နဝါရီ ၂၄ ရက် ည ၇ နာရီလောက်က ရွှေဘိုမြို့၊ အမှတ် ၄ ရပ်ကွက်မှာ ဧည့်စာရင်းစစ်ခဲ့ပါတယ်။

၎င်းတို့ဧည့်စာရင်းဝင်စစ်တဲ့အိမ်မှာ ကျောက်မြစ်ရွာက အသက် ၂၄ နှစ်အရွယ် မောင်ကျော်မင်းခန့်ဟာ ဧည့်စာရင်းမတိုင်ဘဲ ရောက်နေတာကိုတွေ့လို့ သူ့ကို ပြည်သူ့စစ်မှုထမ်းစာရင်းသွင်းမယ်ဆိုကာ မြို့နယ်အထွေထွေအုပ်ချုပ်ရေးမှူးရုံးကို ခေါ်သွားခဲ့ပါတယ်။

အဲဒီနောက် မောင်ကျော်မင်းခန့်မိဘတွေဆီကို အငယ်တန်းစာရေး သူရိန်ညွန့်က ကျပ်သိန်း ၁၃၀ ပေးပါက လူစားလဲပေးမှာဖြစ်တယ်လို့ ဆက်သွယ်မှာတဲ့အတွက် ဇန်နဝါရီ ၂၅ ရက် မွန်းလွဲပိုင်းမှာ မောင်ကျော်မင်းခန့်ရဲ့ဖခင်က တောင်းတဲ့ငွေကိုပေးခဲ့ပါတယ်။

ရတဲ့ငွေတွေကို ရဲမှူးသန်းဇော်က ၂၅ သိန်း၊ အကြီးတန်းစာရေး ကျော်ခိုင်လတ် က ၂၅ သိန်း၊ အငယ်တန်းစာရေး သူရိန်ညွန့်က ၃၀ သိန်းစီခွဲယူပြီး ကျန်တဲ့ ကျပ်သိန်း ၅၀ ကို မောင်ကျော်မင်းခန့်အစား စစ်မှုထမ်းဖို့လိုက်မယ့် ရွှေဘိုမြို့၊ အမှတ် ၁၀ ရပ်ကွက်က ကိုသန်းစိုးထိုက်ကို ပေးတယ်လို့ ဖော်ပြပါတယ်။

အဆိုပါဖြစ်စဉ်ဟာ ပြည်သူ ၁ ဦးက တိုင်တဲ့အတွက်စစ်ဆေးရာက ပေါ်ပေါက်ခဲ့တာဖြစ်ပြီး မောင်ကျော်မင်းခန့် မိသားစုဆီက ၎င်းတို့တောင်းယူခဲ့တဲ့ ကျပ်သိန်း ၁၃၀ ကို ပြန်ပေးခဲ့တယ်လို့ ရေးသားထားပါတယ်။

အဲဒီသတင်းထုတ်ပြန်ချက်မှာ အဖမ်းခံရသူ ၃ ဦးကို ဖမ်းတဲ့ရက်စွဲနဲ့ အမှုဖွင့်ထားတဲ့ပုဒ်မကို ဖော်ပြထားခြင်းမရှိသလို ချုပ်နှောင်ထားတဲ့နေရာကိုလည်း ရေးသားထားတာမတွေ့ရပါဘူး။

အလားတူ စစ်မှုထမ်းဖို့ဖမ်းဆီးပြီး လူစားထည့်ပေးတဲ့ဖြစ်စဉ်တွေ နိုင်ငံအနှံ့အများအပြားရှိပြီး ပြီးခဲ့တဲ့ ဇန်နဝါရီလလယ်ပိုင်းကလည်း ပေါင်းတည်မြို့ပေါ်က လူငယ် ၁ ဦးနဲ့ ကျေးရွာနေသူလူငယ် ၁ ဦးကို ကျပ်သိန်း ၁၀၀ ဝန်းကျင်နဲ့ လဲလှယ်ပေးခဲ့ပါတယ်။

စာတည်း – ဟယ်ရီ

မန္တလေး၊ မေ ၆၊ ၂၀၂၃။

မန္တလေးတိုင်း၊ အမရပူရမြို့နယ်၊ စစ်ကောင်စီလက်အောက်ခံလူဝင်မှုကြီးကြပ်ရေး(လဝက)ရုံး မေလ ၅ ရက် မနေ့ညနေ ၆ နာရီလောက်မှာ ဗုံးပစ်ခံရပြီး ဝန်ထမ်း ၃ ဦး ထိခိုက်ဒဏ်ရာရသွားတယ်လို့ သိရပါ တယ်။

မှန်တန်းရပ်ကွက်မှာရှိတဲ့ စစ်ကောင်စီလဝကရုံးကို ဆိုင်ကယ်စီးလာသူတွေက ဗုံးနဲ့ပစ်ပေါက်ခဲ့လို့ ရုံးဝန်းအတွင်း ကျရောက်ပေါက်ကွဲခဲ့ကာ ရုံးဆင်းဖို့လုပ်နေတဲ့ စစ်ကောင်စီလက်အောက်ဝန်ထမ်းတွေ ထိခိုက်ခဲ့တာလို့ ဒေသခံတဦးက မြေလတ်အသံကို ပြောပါတယ်။

“မနေ့ညနေပိုင်း လဝကရုံး ဗုံးပစ်ခံရတာကဟုတ်တယ်။ အမျိုးသမီးဝန်ထမ်း ၃ ဦးကတော့ ဗုံးစထိမှန် ဒဏ်ရာရသွားတာရှိတယ်”လို့ ပြောပါတယ်။

ဒါ့အပြင် ဗုံးပေါက်ကွဲမှုကြောင့် ရုံးအဆောက်အဦနဲ့ ရုံးဝန်းအတွင်းရပ်ထားတဲ့ ကား ၁ စီး အနည်းငယ် ထိခိုက်ပျက်စီးခဲ့ပြီး ဒဏ်ရာရသွားတဲ့ အမျိုးသမီးဝန်ထမ်း ၃ ဦးကိုတော့ ဒေသလူမှုကူညီရေးအသင်းက မန္တလေးဆေးရုံကြီးကို ပို့ဆောင်ဆေးကုသနေရတယ်လို့ ဆိုပါတယ်။

ဗုံးပစ်ခတ်မှုနဲ့ပတ်သက်လို့ ဒေသတွင်း တော်လှန်ရေးအင်အားစုတွေဘက်က ထုတ်ပြန်ထားတာ မရှိသေးဘဲ ဗုံးပေါက်ကွဲပြီးချိန်မှာတော့ စစ်ကောင်စီတပ်ဖွဲ့တွေ လဝကရုံးကိုရောက်ရှိလာပြီး စစ်ဆေးခဲ့သလို မြို့တွင်းနေရာတချို့မှာလည်း လမ်းပိတ်စစ်ဆေးတာတွေ လုပ်ခဲ့တယ်လို့ သိရပါတယ်။

မေလ ၁ ရက်နေ့ မနက်ပိုင်းကလည်း အမရပူရမြို့မရဲစခန်း ဗုံးပစ်တိုက်ခိုက်ခံရပြီး ရဲတပ်ဖွဲ့ဝင် ၂ ဦး ထိခိုက်ဒဏ်ရာရရှိခဲ့သေးတယ်လို့ သိရပါတယ်။

စာတည်း – ရင်ငြိမ်း