ဝန်ကြီးချုပ်

ပဲခူး၊ ဇန်နဝါရီ ၁၅၊ ၂၀၂၅။

ပဲခူးတိုင်း၊ ပြည်မြို့ကို စစ်ကောင်စီခန့် ပဲခူးတိုင်းဝန်ကြီးချုပ် ဦးမျိုးဆွေဝင်းနဲ့ ဒုဝန်ကြီးတို့ ၂ ဦး ဇန်နဝါရီ ၁၄ ရက် မနက်ပိုင်းမှာ ရောက်ရှိခဲ့တယ်လို့ ဒေသခံတွေကပြောပါတယ်။

အဲဒီဝန်ကြီး ၂ ဦးရောက်ရှိနေတာကြောင့် ပြည်မြို့ပေါ်က ဗိုလ်ချုပ်လမ်းတလျှောက်၊ ဘုရင့်နောင်လမ်းတလျှောက်ရှိ ဓာတ်တိုင် ၁ တိုင်အကွာမှာ လုံခြုံရေးစစ်သား ၂ ဦးစီချထားပြီး လမ်းသွားလမ်းလာပြည်သူတွေရဲ့ ဖုန်းတွေနဲ့ဆိုင်ကယ်တွေကို အဓိကထားစစ်ဆေးခဲ့တယ်လို့ ဆိုပါတယ်။

“ရွှေဆံတော်ဘုရားကို ယတြာလာချေတယ်လို့ သိထားပါတယ်။ တခြားအစီအစဥ်တော့ မသိရပါဘူး။ မနေ့ကတည်းက မြို့ပေါ်မှာ မီးမပြတ်တာပါ။ ညရောနေ့ရော အစစ်အဆေးတင်းကျပ်ထားပါတယ်။”လို့ မြို့ခံတဦးက ပြောပါတယ်။

ဝန်ကြီး ၂ ဦး ယ​တြာလာချေတဲ့ ရွှေဆံတော်ဘုရားမှာ ပြည်မြို့ အရှေ့ပိုင်း၊ ဆင်စုရပ်မြောက်ဘက်မှာတည်ရှိပြီး အဲဒီဘုရား​မှာ ဆေးပဌာန်းယတြာလာချေတာဖြစ်တယ်လို့ အထက်ပါဒေသခံက ဆိုပါတယ်။

“ဆေးပဌာန်းယတြာလို့ သိထားပါတယ်။ နားမလည်လို့အတိအကျမပြောတတ်ပါ”လို့ သူက ဆိုပါတယ်။

ဝန်ကြီးတွေရောက်ရှိလာပြီးနောက် ခေတ္တရာမြို့သစ်ရပ်ကွက်ထဲကို စစ်ကား၊ ဆိုင်ကယ်တွေနဲ့ လှည်ပတ်နေပြီး “ထွန်း” ဟိုတယ် အနီးအနားအရောက်မှာတော့ သေနတ်သံ ၁ ချက်ကြားလိုက်ရတယ်လို့ သူက ပြောပါတယ်။

ပြည်မြို့ပေါ်ကိုရောက်ရှိနေတဲ့ ဝန်ကြီး ၂ ဦး ဇန်နဝါရီ ၁၅ ရက် ဒီကနေ့မှာ မြို့ပေါ်ကနေ ထွက်ခွာသွား၊ မသွားကို မသိရှိရပေမယ့် မြို့ပေါ်မှာတော့ လျှပ်စစ်မီးဖြတ်တောက်တာမရှိသေးသလို လမ်းပေါ်တွေမှာ စစ်ဆေးရေးတင်းကျပ်မှုတွေ ဆက်ရှိနေသေးတယ်လို့လည်း သိရပါတယ်။

အာရက္ခတပ်တော် AAက တောင်ကုတ်မြို့ကို သိမ်းပိုက်ထိန်းချုပ်ပြီးနောက် ပြည်-တောင်ကုတ်လမ်းပေါ်က နောက်ဆုံးကျန် တောင်ပုံကြီးစခန်းကို ဇန်နဝါရီ ၈ ရက်မှာ အပြီးသတ်သိမ်းပိုက်ခဲ့ပါတယ်။

စစ်ကောင်စီတပ်က အဲဒီတောင်ပုံကြီးစခန်းကို ဆုံးရှုံးခဲ့ရပြီးနောက် ပြည်မြို့တဖက်ကမ်းက ဥသျှစ်ပင်နဲ့ ပန်းတောင်းမြို့တို့ကို စစ်ကားတွေနဲ့ အင်အားအများအပြားပို့ဆောင်ခဲ့တယ်လို့ သိရပါတယ်။

မြေလတ်အသံ၊ မေ ၁၊ ၂၀၂၂။

မတရားအသင်း ဆက်သွယ်မှုအက်ဥပဒေပုဒ်မ ၁၇(၁)၊ နိုင်ငံတော်အကြည်အညိုပျက်စေမှု ပုဒ်မ ၅၀၅(ခ)တို့ဖြင့် တရားစွဲခံထားရသည့် ရခိုင်ပြည်နယ် ဝန်ကြီးချုပ်ဦးညီပု၏ သမီးဖြစ်သူ NLD ဗဟိုတာဝန်ခံ မမိုးဆန်းစုကြည်နှင့် မိသားစုအဆက်အသွယ်မရသည်မှာ ၂ လကျော်ရှိနေပြီဖြစ်ကြောင်း မိသားစုဝင်များထံမှ သိရသည်။

မမိုးဆန်းစုကြည်မှာ ပြီးခဲ့သည့် ၂၀၂၁ ခုနှစ် မေလ ၈ ရက်နေ့တွင် ရန်ကုန်မြို့၌ ဖမ်းဆီးခံလိုက်ရခြင်းဖြစ်ပြီး အင်းစိန်အကျဉ်းထောင်၌ ချုပ်နှောင်ခံ ထားရသူဖြစ်သည်။

လက်ရှိတွင် မမိုးဆန်းစုကြည်ကို သာယာဝတီအကျဉ်းထောင်သို့ရွေ့သွားပြီဟု သတင်းကြားရ သော်လည်း သူမနှင့် အဆက်အသွယ်လုံးဝမရသေးဟု အစ်မဖြစ်သူ မကြည်ကြည်ဦးက ပြောသည်။

“ညီမရဲ့ အမှုအခြေအနေလည်း မပြောတတ်တော့ဘူး။ ရုံးချိန်းလည်း မသိဘူး။ လောလောဆယ် အဆက်အသွယ် ပြတ်နေပါတယ်။ ရှေ့နေကလည်း သူနဲ့မတွေ့ရဘူး။ မိသားစုတွေက အရမ်းတွေ့ချင်တာပေါ့။ အခုလေ သူမကို သာယာဝတီကို ရွေ့တယ်လို့သတင်းရတယ်။ အခုချိန်ထိ အဆက်အသွယ်မရသေးဘူး။ သူမနဲ့ပတ်သက်လို့ စိတ်မကောင်းရုံကလွဲလို့ ဘာမှမပြောချင်တော့ဘူး”ဟု မကြည်ကြည်ဦးက ပြောသည်။

ဖမ်းဆီးခံရစဉ်က မမိုးဆန်းစုကြည်မှာ ပုဒ်မ ၅၀၅(ခ) အမှုတခုတည်းဖြင့်တရားစွဲခံရခြင်းဖြစ် သော်လည်း ၂၀၂၂ ခုနှစ် မတ်လ ၈ ရက်နေ့တွင် ပုဒ်မ ၁၇(၁) ဖြင့် ထပ်တိုးတရားစွဲခံလိုက်ရခြင်းဖြစ် သည်။

ထပ်တိုးတရားစွဲလိုက်သည့် ပုဒ်မ ၁၇(၁)သည် ထောင်ဒဏ် ၂ နှစ် သို့မဟုတ် ၃ နှစ်ထက်မပိုသော ပြစ်ဒဏ်ချမှတ်နိုင်သလို ငွေဒဏ်လည်း ချမှတ်နိုင်သည်ဟု ဥပဒေ၌ပြဌာန်းထားသည်။

မမိုးဆန်းစုကြည်မှာ ရခိုင်ပြည်နယ်ဝန်ကြီးချုပ် ဦးညီပု၏ သမီးဖြစ်ပြီး၊ လက်ရှိတွင် ဦးညီပုမှာလည်း ၅၀၅(ခ)၊ ပုဒ်မ ၅၁ တို့ဖြင့် စစ်တွေအကျဉ်းထောင်မှာ ထောင်ဒဏ် ၁၁ နှစ်ကျခံနေရသည်။

စစ်တပ်မှအာဏာသိမ်းပြီးနောက် ရခိုင်ပြည်နယ်မှ အမျိုးသားဒီမိုကရေစီအဖွဲ့ချုပ် (NLD) ပါတီဝင်များဖြစ်ကြသည့် ဦးညီပု၊ ဦးမင်းအောင်နှင့် ဦးစိုးလေးအပါအဝင် ၄ ဦးတို့မှာ ဖမ်းဆီးတရားစွဲ ခံထားကြရသည်။