မြေလတ်အသံ၊ ဇူလိုင် ၁၈၊ ၂၀၂၅။

မန္တလေးတိုင်းနဲ့ နေပြည်တော်ကောင်စီနယ်မြေတို့မှာ ဇူလိုင် ၁၈ ရက်ဒီနေ့လယ်ပိုင်းက မြေငလျင် ထပ်မံလှုပ်ခတ်ခဲ့တယ်လို့ မိုးလေဝသနဲ့ ဇလဗေဒညွှန်ကြားမှုဦးစီးဌာနက ထုတ်ပြန်လာပါတယ်။

ဒီမနက် ၁၀ နာရီ ၄၂ မိနစ်မှာ နေပြည်တော်၊ ပျဥ်းမနားမြို့ရဲ့ အနောက်မြောက်ဘက် ၃ မိုင်ခန့်အကွာမှာ ၃.၁ ရက်(ခ်)တာစကေး ငလျင်လှုပ်ခတ်ခဲ့ပြီး ဒီနေ့လယ် ၁ နာရီ ၃၉ မိနစ်မှာ နေပြည်တော်၊ တပ်ကုန်းမြို့ရဲ့ အရှေ့မြောက်ဘက် ၁၉ မိုင်ခန့်အကွာမှာ အင်အား ၃.၆ ရစ်(ခ်)တာစကေးရှိ ငလျင်လှုပ်ခဲ့တယ်လို့ ဆိုပါတယ်။

ဒါ့အပြင် ညနေ ၄ နာရီမှာ မန္တလေးတိုင်း၊ မတ္တရာမြို့ရဲ့ အနောက် မြောက်ဘက် ၆ မိုင်ခန့်အကွာမှာ အင်အား ၅.၅ ရစ်(ခ်)တာစကေးရှိ မြေငလျင်ထပ်မံလှုပ်ခတ်ခဲ့တာလို့ မိုးဇလကထုတ်ပြန်ပါတယ်။

မတ် ၂၈ ရက်မှာဖြစ်ပွားခဲ့တဲ့ အင်အားပြင်းငလျင်ကြီးနောက်ပိုင်းကစလို့ မန္တလေး၊ နေပြည်တော် အပါအဝင် တိုင်းနဲ့ပြည်နယ်အများစုမှာ နောက်ဆက်တွဲငလျင်တွေ ဆက်တိုက်ဆိုသလို လှုပ်ခတ်နေဆဲ ဖြစ်ပါတယ်။

ဇူလိုင် ၁၇ ရက် နေ့လယ် ၂ နာရီ ၂၄ မိနစ်မှာလည်း စစ်ကိုင်းတိုင်း၊ ကလေးမြို့ရဲ့ အရှေ့-အရှေ့မြောက်ဘက် ၇ မိုင်အကွာမှာ အင်အားရစ်(ခ်)တာစကေး ၄.၅ အဆင့်ရှိငလျင်ငယ် လှုပ်ခတ်ခဲ့ပါသေးတယ်။

ငလျင်ကြီးအပြီး နောက်ဆက်တွဲငလျင် ၁၉၄ ကြိမ်မြောက်လှုပ်ခဲ့

မန္တလေး၊ ဇွန် ၂၅၊ ၂၀၂၅။

ပဲခူးတိုင်းနဲ့မန္တလေးတိုင်းအတွင်းမှာ ဇွန် ၂၂ ရက်ကနေ ၂၅ ရက်အထိ ငလျင် ၄ ကြိမ်လှုပ်ခတ်ခဲ့တယ်လို့ မိုးလေဝသနဲ့ဇလဗေဒညွှန်ကြားမှုဦးစီးဌာနရဲ့ ထုတ်ပြန်ချက်တွေအရ သိရပါတယ်။

ဇွန် ၂၅ ရက်နေ့လယ် ၂ နာရီကျော်က ချမ်းမြသာစည်မြို့နယ် အရှေ့မြောက်ဘက် ၂ မိုင်ခန့်အကွာမှာ ပြင်းအား ၃.၉ ရစ်(ခ်)တာစကေးရှိ ငလျင်တခုက မြေအောက်အနက် ၁၀ ကီလိုမီတာကနေ လှုပ်ခတ်ခဲ့ တာလို့ ထုတ်ပြန်ချက်မှာ ဖော်ပြပါတယ်။

“သိလိုက်ရုံလေးဘဲ မနေ့ကနဲ့ဟိုတနေ့ကလောက်မပြင်းဘူး။ အချို့လူတွေဆို သိလိုက်မှာတောင် မဟုတ်ဘူး။”လို့ ချမ်းမြသာစည်ဒေသခံ လူမှုကူညီရေးအသင်း တာဝန်ရှိသူတဦးက ပြောပါတယ်။

ဇွန် ၂၄ ရက်မနက် ၁၁ နာရီခန့်မှာလည်း မတ္တရာမြို့ရဲ့ အရှေ့-အရှေ့မြောက်ဘက် ၆ မိုင်အကွာမှာ ပြင်းအား ၃.၁ ရစ်(ခ်)တာစကေးရှိ ငလျင်တခုက မြေအောက်အနက် ၁၅ ကီလိုမီတာကနေ လှုပ်ခတ်ခဲ့ပါတယ်။

အလားတူ ဇွန် ၂၃ ရက်မှာ တောင်ငူမြေငလျင်စခန်းမှ အနောက်ဘက် ၇၃ မိုင်ခန့် ကွာဝေးတဲ့ ပြည်မြို့ရဲ့ အရှေ့ဘက် ၉ မိုင်ခန့်အကွာမှာ ပြင်းအား ၃.၈ ရစ်(ခ်)တာစကေးရှိ ငလျင်တခုဟာ မြေအောက်အနက် ၁၇ ကီလိုမီတာကနေလှုပ်ခဲ့ပါတယ်။

ဇွန် ၂၂ ရက်မှာလည်း ပုသိမ်ကြီးမြို့ရဲ့ အရှေ့-အရှေ့မြောက်ဘက် (၇) မိုင်ခန့်အကွာ ၃.၈ ရစ်(ခ်) တာစကေးရှိငလျင်တို့ လှုပ်ခတ်ခဲ့ပြီး အဲ့ဒီနေ့မှာပဲ လွိုင်ကော်မြို့အရှေ့ဘက် ၇ မိုင်အကွာမှာ ၃.ဝ ရစ်(ခ်) တာစကေးရှိ ငလျင်၊ သာဝတ္ထိမြို့ရဲ့ အရှေ့ဘက် ၃၁ မိုင်ခန့်အကွာမှာ ၃.၂ ရစ်(ခ်)တာစကေးရှိ ငလျင် တို့လှုပ်ခတ်ခဲ့တယ်လို့ မိုးဇလထုတ်ပြန်ချက်အရ သိရပါတယ်။

မတ် ၂၈ ရက်နေ့မှာ လှုပ်ခတ်ခဲ့တဲ့ ပြင်းအား ၇.၇၆ ရစ်ချက်စတာစကေးရှိ ငလျင်ကြီးလှုပ်ခတ်ပြီး နောက်မှာ ၃ လကျော်ထိ ငလျင်ငယ်တွေဆက်တိုက်လှုပ်ခတ်နေပြီး နောက်ဆက်တွဲငလျင် ၁၉၄ ကြိမ် လုပ်ထားတယ်လို့ ဆိုထားပါတယ်။

ငလျင်ကြီးကြောင့် ပြိုကျပျက်စီးခဲ့တဲ့ မန္တလေး sky villa ဟိုတည်လို အဆောက်အဦအောက်တွေမှာလည်း ဒီနေ့အထိ ရုပ်အလောင်းတွေ ဆက်လက်ရှာဖွေတွေ့ရှိနေသေးတယ်လို့ မြန်မာနိုင်ငံ မီးသတ်တပ်ဖွဲ့ထုတ် ပြန်ချက်တွေအရ သိရပါတယ်။

စစ်ကိုင်းမြို့နဲ့ မန္တလေးမြို့အနီးကို အခြေပြုလှုပ်ခတ်ခဲ့တဲ့ စစ်ကိုင်းငလျင်ကြောင့် သေဆုံးသူ ၃,၇၄၀ ဦး၊ ထိခိုက်ဒဏ်ရာရသူ ၅,၁၀၄ ဦးနဲ့ ပျောက်ဆုံးနေသူ ၆၇ ဦးရှိပြီး တွက်ချက်မှုတွေအရ ငွေကျပ် ၃,၆၂၉ ဒသမ ၂၀၈ ဘီလီယံ ပျက်စီးဆုံးရှုံးခဲ့တယ်လို့ ဇွန် ၁ ရက်နေ့ စစ်ကောင်စီပိုင်သတင်းစာမှာ ဖော်ပြထားပါတယ်။

ငလျင်ကြီးဖြစ်ပေါ်ခဲ့တာ ၃ လနီးပါးရှိလာပေမယ့် ငလျင်ဒဏ်သင့်ဒေသတွေမှာ အပျက်အစီးတွေကို မြန်မာနိုင်ငံမီးသတ်တပ်ဖွဲ့နဲ့ လူမှူကူညီရေးအဖွဲ့ဝင်တွေလည်း ရှင်းလင်းရှာဖွေရေးလုပ်ငန်းတွေကို လုပ်ကိုင်နေရဆဲဖြစ်တယ်လို့ သိရပါတယ်။

စာတည်း – လင်း