လေပြင်းတိုက်ခတ်

ကောလင်း၊ မေ ၄၊ ၂၀၂၆။

စစ်ကိုင်းတိုင်း၊ ကောလင်းမြို့နယ်အနောက်ခြမ်း မိုးနံရွာနဲ့ဥက္ကံရွာကို ဆက်သွယ်ထားတဲ့ ဒေါင်းမြူးချောင်း ကြိုးတံတားပေါ်ကနေ လေပြင်းတိုက်ချိန်ပြုတ်ကျတာကြောင့် ၅ ဦး ဒဏ်ရာရခဲ့တယ်လို့ ဒေသခံတွေဆီက သိရပါတယ်။

မေလ ၃ ရက်ညနေ ၄ နာရီခန့်မှာ မိုးသည်းထန်စွာရွာသွန်းပြီး လေပြင်းတိုက်ချိန် ကြိုးတံတားပေါ်က ဖြတ်သန်းသွားလာနေသူတွေဟာ လေပြင်းကြောင့် အမြင့်ပေ ၃၀ ခန့်ရှိ တံတားပေါ်ကနေ မြေပြင်ပေါ်ကို ဆိုင်ကယ်ကော လူတွေပါပြုတ်ကျကုန်တာလို့ ဆိုပါတယ်။

“လေတိုက်နေချိန်မှာ ပုံမှန်လောက်ထင်ပြီး လူတွေကဖြတ်ကြတာ။ အဲဒီအချိန်မှာ လေကကြမ်းလိုက်တာ။ အဲ့တာဆိုတော့ ကြိုးတံတားက လိမ်ပီးတော့ ဆိုင်ကယ်တွေ လူတွေပြုတ်ကျကုန်တာ။ မသေတာကံကောင်းတယ်ဗျ”လို့ ဒေသခံတဦးက ပြောပါတယ်။

တံတားပေါ်ကပြုတ်ကျလို့ အသက် ၂၀ ကနေ ၄၀ ကြား အမျိုးသမီး ၂ ဦးနဲ့အမျိုးသား ၃ ဦး လက်ကျိုးသူ၊ ထိခိုက်ဒဏ်ရာရသူတွေရှိခဲ့ကာ ဆိုင်ကယ် ၃ စီးလည်းပျက်စီးခဲ့တယ်လို့ ဆိုပါတယ်။

ထိခိုက်ဒဏ်ရာရသူတွေကတော့ နီးစပ်ရာဆေးခန်းမှာဆေးကုသမှုခံယူနေကြပြီး အခြေအနေသက်သာကြတယ်လို့ သိရပါတယ်။

လေပြင်းတိုက်ချိန် မိုးသီးတွေပါကြွေကျပြီး မိုးနံရွာနဲ့ဥက္ကံရွာမှာ လမ်းမတွေပေါ် သစ်ပင်တွေလည်း လဲကျခဲ့တယ်လို့ သိရပါတယ်။

စာတည်း – လင်း

ကနီ၊ ဧပြီ ၂၂၊ ၂၀၂၃။

စစ်ကိုင်းတိုင်း၊ ကနီမြို့နယ်အတွင်းမှာ ဧပြီလ ၂၁ ရက် မနေ့ ညနေ ၅ နာရီလောက်က လေပြင်းတိုက်ခတ်ခဲ့လို့ လူနေအိမ် ၁၅၀ နီးပါး ပျက်စီးသွားတယ်လို့ ဒေသခံတွေဆီက သိရပါတယ်။

ကနီမြို့နယ် ချင်းတွင်းမြစ်အနောက်ဘက်ကမ်းက ကျေးရွာတွေဖြစ်တဲ့ အိုင်တောင် မြောက်ရွာ၊ အရှေ့ရွာ၊ အနောက်ရွာနဲ့ အဲ့ဒီအနီးနားမှာရှိတဲ့ ကျေးရွာ ၅ ရွာကို အချိန်အခါမဟုတ် လေပြင်းတိုက်ခတ်ခဲ့တာကြောင့် လူသေဆုံးတာမျိုး မရှိပေမယ့် နေအိမ် တော်တော်များများပျက်စီးသွားတယ်လို့ ကနီဒေသခံတဦးက မြေလတ်အသံကို ပြောပါတယ်။

“မိုးများပြီး လေကြမ်းတာ။ လေပြင်းဝင်တာ ၈ ရွာပေါ့။ အဲ့ဒီလောက် လေကြမ်း၊မိုးကြမ်းတာ တခါမှမကြုံဖူးဘူး ပထမဆုံးပဲ။ မီးတွေလည်း ဖြတ်ခံထားရတာ ၂ ရက်ရှိပြီ။ အခုချိန်ထိလည်း မီးမလာသေး” လို့ဆိုပါတယ်။

မနေ့ ညနေ ၅ နာရီလောက်မှာ လေပြင်း စတင်တိုက်ခတ်ခဲ့တာ ဖြစ်ပြီး အချိန် ၄၅ မိနစ်ခန့် တိုက်ခတ်ခဲ့တာဖြစ်ကာ ညနေ ၆ နာရီဝန်းကျင်မှာ လေပြင်းတိုက်ခတ်တာ ရပ်တန့်ခဲ့ပေမယ့် မိုးကတော့ ဆက်လက်ရွာသွန်းခဲ့တယ်လို့ သိရပါတယ်။

မနေ့ညနေပိုင်းမှာ ကနီမြို့နယ်အပါအဝင် မြန်မာပြည်အထက်ပိုင်းဒေသတွေဖြစ်တဲ့ စစ်ကိုင်းတိုင်းအတွင်းက မြို့နယ်တချို့နဲ့ ကချင်ပြည်နယ်အတွင်း မြို့နယ်တချို့မှာလည်း လေပြင်းတိုက်ခတ်ကာ မိုးသည်းထန်စွာ ရွာသွန်းမှုတွေ ဖြစ်ပေါ်ခဲ့တယ်လို့ သိရပါတယ်။

စာတည်း – ရင်ငြိမ်း

ပဲခူး၊ မတ် ၁၃၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်ထဲမှာ မတ်လ ၁၃ ရက် ဒီနေ့မနက်အစောပိုင်း ၂ နာရီလောက်က မိုးသက်လေပြင်းတိုက်ခတ်ခဲ့တာကြောင့် လူနေအိမ်တွေထိခိုက်ပျက်စီးခဲ့တယ်လို့ သိရပါတယ်။

လေပြင်းတိုက်ခတ်တာကြောင့် မင်းလှမြို့နယ်၊ စိန်ကန့်လန့်ရွာက လူနေအိမ် ၁ လုံးပြိုကျပျက်စီးခဲ့ပြီး၊ နေအိမ် ၂၅ လုံးခန့်အမိုးလန်ပျက်စီးကာ ရန်ကုန်-ပြည်ကားလမ်းမပေါ်က ကိုင်းပြင်ကြီးရွာ မူလတန်းလွန်ကျောင်းမှာလည်း အမိုးလန်ခဲ့တယ်လို့ ဒေသခံတဦးက မြေလတ်အသံကို ပြောပါတယ်။

“မိုးရောလေရောတိုက်တာဗျ။ လေကလည်းပြင်းသလို မိုးကလည်းကြီးတယ်။ ညပိုင်းဖြစ်နေတော့ မနက်ရောက်မှ အပျက်အစီးတွေမြင်ပြီးမှအမိုးလန်တာကိုသိရတာ။ ပြည်လမ်းပေါ်က ကိုင်းပြင်ကြီးရွာ မူလွန်ကျောင်းမှာလည်း လေပြင်းကြောင့် သွပ်အချပ် ၃၀ လောက်ပျက်စီးခဲ့တယ်” လို့ ပြောပါတယ်။

ကိုင်းပြင်ကြီးရွာအနီး ရန်ကုန်-ပြည်ကားလမ်းမပေါ်မှာလည်း လေပြင်းတိုက်ခတ်မှုကြောင့် သစ်ပင်တွေကျိုးကျနေလို့ လမ်းပိတ်ဆို့မှုတွေဖြစ်ပေါ်ခဲ့သေးတယ်လို့ သူကဆက်ပြောပါတယ်။

ပြင်ပမိုးလေဝသပညာရှင်အချို့ရဲ့ခန့်မှန်းချက်မှာလည်း မြန်မာနိုင်ငံမြေလတ်ဒေသ စစ်ကိုင်း၊ မန္တလေး၊ ပဲခူးနဲ့ မကွေးတိုင်းအပါအဝင်ဒေသအများစုမှာ မတ်လ ၁၃ ရက်ကစတင်လို့ အချိန်အခါမဟုတ် မိုးသက်လေပြင်းကျရောက်တာတွေဖြစ်ပေါ်လာနိုင်တယ်လို့ ခန့်မှန်းထုတ်ပြန်ထားပါတယ်။

ကရင်ပြည်နယ်နဲ့မွန်ပြည်နယ်ကမြို့နယ်အချို့မှာလည်း မနေ့ညပိုင်းနဲ့ ဒီမနက်ပိုင်းမှာ မိုးကြီးပြီးလေပြင်းတိုက်ခဲ့မှုတွေ ဖြစ်ပေါ်ခဲ့တယ်လို့ သိရပါတယ်။

ပြီးခဲ့တဲ့ဖေဖေါ်ဝါရီလ ၁၆ ရက်ကလည်း ပဲခူးတိုင်းအနောက်ခြမ်းက နတ်တလင်း၊ ကြို့ပင်ကောက်၊ မင်းလှမြို့နယ်တွေမှာ မိုးရွာသွန်းခဲ့ပြီး မိုးညိုမြို့နယ်မှာတော့ နေအိမ် ၂၀ ကျော်အမိုးလန်ပျက်စီးခဲ့ပါသေးတယ်။

စာတည်း- ရင်ငြိမ်း