လူထုဟောပြောပွဲ

ပခုက္ကူ၊ မတ် ၁၃၊ ၂၀၂၃။

မကွေးတိုင်း၊ ပခုက္ကူခရိုင်ထဲကတနေရာမှာ မတ်လ ၁၃ ရက်ဒီညနေပိုင်းက ကိုဖုန်းမော်/ကိုစိုးနိုင် ကျဆုံးခြင်း ၃၅ နှစ်ပြည့်အထိမ်းအမှတ်အဖြစ် ပခုက္ကူလူထုတိုက်ပွဲကော်မတီဝင်တွေက ဦးဆောင်ပြီး လူထုဟောပြောပွဲဖြစ်လုပ်ခဲ့တယ်လို့ သိရပါတယ်။

“အဓိကရည်ရွယ်ချက်ကတော့ ကိုဖုန်းဖော်ကျဆုံးခြင်း ၃၅ နှစ်ပြည့်အထိမ်းအမှတ်အဖြစ်၊ ပြီးတော့ PDF တွေရဲ့လက်နက်ကိုင်တော်လှန်ရေးအပြင် ကျောင်းသားနိုင်ငံရေးမှာ ကျောင်သားသမဂ္ဂတွေက ဘယ်လိုမျိုးရှေ့ကနေဦးဆောင်ပြီး ပေးဆပ်ခဲ့လဲ၊ လုပ်ခဲ့လဲဆိုတဲ့သမိုင်းကို ပေးချင်တာ” လို့ ပြောပါတယ်။

ဒါ့အပြင် ကျောင်းသားတွေအနေနဲ့လည်း ဖက်ဒရယ်ဒီမိုကရေစီနိုင်ငံတော်ကို တည်ဆောက်နေချိန်မှာ အားလုံးကြိုးစားပြီး အလုပ်လုပ်ကိုင်ကြဖို့ကိုလည်းရည်ရွယ်ပြီး ပြုလုပ်ခဲ့တာလို့ ဆိုပါတယ်။

ကိုဖုန်းမော်ဟာ ရန်ကုန် စက်မှုတက္ကသိုလ်ကျောင်းသားတဦးဖြစ်ပြီး၊ ၁၉၈၈ ခုနှစ်၊ မတ်လ ၁၃ ရက်မှာ စစ်အာဏာရှင်စနစ်ကိုဆန့်ကျင်တော်လှန်ရင်း ကျဆုံးခဲ့ရတာလည်းဖြစ်ပါတယ်။

မုံရွာ၊ မတ် ၁၃၊ ၂၀၂၃။

စစ်ကိုင်းတိုင်း၊ မုံရွာမြို့နယ်ထဲက ကျေးရွာတရွာမှာ မုံရွာ−အမြင့်လမ်း သပိတ်ဦးဆောင်ကော်မတီက ဦးဆောင်ပြီး မတ်လ ၁၃ ရက် ဒီနေ့လယ် ၁၂ နာရီလောက်မှာ လူထုဟောပြောပွဲကျင်းပခဲ့ပါတယ်။

လူထုဟောပြောပွဲမှာ ဒေသခံပြည်သူ ၁၀၀ နီးပါး တက်ရောက်ခဲ့ပြီး ဟောပြောပွဲကို ၂ နာရီနီးပါး ပြုလုပ်ခဲ့တယ်လို့ သပိတ်မှာပါဝင်သူ တဦးက ပြောပါတယ်။

“ပြောသွားတာကတော့ လက်ရှိနိုင်ငံရေးအခြေအနေ၊ လူထုပါဝင်မှု၊ ဖက်ဒရယ်ဒီမိုကရေစီအကြောင်းတွေကို အဓိကထားပြီး ပြောသွားခဲ့တာ” လို့ ပြောပါတယ်။

အခုလို ဟောပြောရခြင်း ရည်ရွယ်ချက်မှာလည်း တော်လှန်ရေးမှာ ပြည်သူတွေအနေနဲ့ တက်တက်ကြွကြွ ပါဝင်လာအောင်၊ သပိတ်တွေ အမြဲတမ်းထွက်ဖို့ အဆင်မပြေတဲ့အခါ တော်လှန်ရေးအသိ၊ တော်လှန်ရေးအရွှေ့ကို ဒေသခံတွေသိရှိဖို့အတွက် ပြုလုပ်ရခြင်း ဖြစ်တယ်လို့လည်း ဆိုပါတယ်။

မုံရွာ−အမြင့်လမ်း သပိတ်ဦးဆောင်သူ ကော်မတီအနေနဲ့ အခုလို လူထုဟောပြောပွဲလုပ်တာဟာ ပထမအကြိမ်ဖြစ်ကြောင်းနဲ့ နောက်ထပ်လည်း လူထုဟောပြောပွဲကို ဆက်လုပ်သွားမယ်လို့ သပိတ်မှာပါ၀င်သူ တ‌ဦးက ပြောပါတယ်။

ပြီးခဲ့တဲ့ မတ်လ ၁၀ ရက်ကလည်း မုံရွာ−အမြင့်လမ်း သပိတ်ဦးဆောင်ကော်မတီတပ်ဖွဲ့နဲ့ ချောင်းဦးမြို့နယ် လူငယ်အင်အား သပိတ်ကော်မတီတို့ ပူးပေါင်းပြီး “ဖက်ဒရယ် ခရီးကြမ်းကိုချီ ပြည်သစ်ကိုတည်” စတဲ့ စာသားကို ကိုင်ဆောင်ကာ ချောင်းဦးမြို့နယ်အတွင်းမှာ လူထုသပိတ်တိုက်ပွဲကို ကျင်းပခဲ့ပါသေးတယ်။

စာတည်း – လင်း