မြေလတ်အသံ၊ ဒီဇင်ဘာ ၁၅၊ ၂၀၂၅။

စစ်ကိုင်းတိုင်း၊ မော်လိုက်မြို့နဲ့ မင်းကွန်းတိုက်နယ်တို့မှာ ထိုးစစ်ဆင်လာတဲ့ စစ်ကော်မရှင်တပ်ဖွဲ့ဝင်တွေကို တိုက်ခိုက်ခဲ့တာကြောင့် စစ်သား ၆ ဦးသေဆုံးပြီး လက်နက်ခဲယမ်းတွေသိမ်းဆည်းနိုင်ခဲ့တယ်လို့ တော်လှန်ရေးတပ်ဖွဲ့တွေဆီက သိရပါတယ်။

ဒီဇင်ဘာ ၁၄ ရက်မနက် ၁၁ နာရီကျော်မှာ မော်လိုက်မြို့နယ်၊ ဆွတ်နန်းရွာနဲ့ မီတာ ၈၀၀ ဝေးတဲ့ ရန်ကင်းတောင်မှာ ၁ နာရီကြာ တိုက်ပွဲဖြစ်ပွားခဲ့ရာ တိုက်ပွဲအတွင်းစစ်သား ၆ ဦးသေဆုံးခဲ့တာလို့ ဆိုပါတယ်။

“ဆွတ်နန်းရွာက ပြည်သူ့စစ်ရွာ။ အဲ့ရွာကနေ ၉ ရက်နေ့က ကျနော်တို့ထိန်းချုပ်ထားတဲ့ ရန်ကင်းတောင်ကို အင်အား ၁၂၀ နဲ့စစ်ကြောင်းထိုးလာတာ။ အဲ့နေ့က ၁၀ မိနစ် လောက်တိုက်ပွဲဖြစ်တယ်။ ကျနော်တို့ဖက်က အင်အားနည်းလို့ပြန်ဆုတ်ခဲ့တယ်။ ၁၄ ရက်နေ့မှာ ကျနော်တို့ပြန်ပြီး တိုက်ခိုက်တာ။ အဲ့မှာ စကစ တွေသေဆုံးတယ်။ ပြန်ဆုတ်သွားတယ်။ အလောင်းတွေကို အခုထိလာမကောက်သေးဘူး”လို့ Mawlaik Revolution မှတာဝန်ရှိသူက ပြောပါတယ်။

တိုက်ပွဲအတွင်း ၁၂၂ မမ ရှော့တိုက်ဒုံး ၇ လုံး၊ MA-1 ၁ လက်၊ MA-3 ၁လက်၊ MA-15 ၁ လက်၊ G-3 ၁ လက်၊ ကျည်ဘောက် ၁၃ ခု၊ ကျည်မျိုးစုံ ၁၂၀၀ တောင့်တို့ကိုရရှိခဲ့တယ်လို့ သူက ဆိုပါတယ်။

တိုက်ပွဲဖြစ်ပွားခဲ့ပြီးနောက် စစ်ကော်မရှင်တပ်သားတွေက ဆွတ်နန်းကျေးရွာစခန်းနဲ့ မော်လိုက်မြို့ပေါ်ရှိတပ်ရင်းတွေကနေ ရန်ကင်းတောင်ကို ဟောင်ဝစ်ဇာလက်နက်ကြီးတွေနဲ့ ပစ်ခတ်ခဲ့သလို ဒရုန်းတွေနဲ့ပါ ဗုံးသီး ချတိုက်ခိုက်ခဲ့တယ်လို့ အထက်ပါတာဝန်ရှိ သူကပြောပါတယ်။

အလားတူဒီဇင်ဘာ ၁၀ ရက် ညနေ ၄ နာရီကျော်ကလည်း မင်းကွန်းနယ်မြေရဲစခန်းက နေ စစ်ကြောင်းထိုးထွက်လာတဲ့ အင်အား ၁၀၀ ခန့်ပါ တပ်မ-၃၃ စစ်ကြောင်းကို ချောင်းမကြီးကျေးရွာ အနီးမှာ တော်လှန်းရေးတပ်ဖွဲ့တွေက ကြားဖြတ်တိုက်ခိုက်ခဲ့တယ်လို့ ဆိုပါတယ်။

“စစ်ကြောင်းက အထိနာပြီးပြန်ဆုတ်သွားတယ်ဗျ။ သေဆုံး၊ ဒဏ်ရာရရှိနိုင်တယ်ဗျ။ တိုက်ပွဲဖြစ်ပြီး တရက်အကြာ ၁၂ ရက်နေ့မှာတော့ အဲ့စစ်ကြောင်းက တန်ပြန်ထိုးလာတယ်။ ထုံးဘိုရွာနဲ့ မယ်ဇလီရွာတွေမှာ ဝင်ရောက်တပ်စွဲထားတယ်ဗျ”လို့ People Servant Force မှတာဝန်ရှိသူတဦးက ပြောပါတယ်။

တိုက်ပွဲအတွင်း စစ်ကော်မရှင်တပ်တွေဆီကနေ ၇.၆၂ အမျိုးအစား G-3 ကျည် ၈၅၅ တောင့် ၊ ၅.၅၆ ကျည် ၇၉၆ တောင့်၊ ၆၀ မမ ဗုံးသီး ၅ လုံး၊ RPGအသီး ၃ လုံး၊ ပို့ကျည် ၃ တောင့်၊ အီနာဂါ M9 ၁ လုံး၊ ငါးကြင်းမှီးပြောင်း ၁ ပြောင်း၊ MA ကျည်ဘောက် ၃ ဘောက်၊ MA2 ဘောက်အဝိုင်း ၁ ခု နဲ့စစ်အသုံးအဆောင်တွေ သိမ်းဆည်းရရှိခဲ့တယ်လို့ သူကဆိုပါတယ်။

ဒီတိုက်ခိုက်မှုကို People Servant Force နဲ့ မဟာမိတ်တွေဖြစ်ကြတဲ့ မင်းကွန်းတိုက်နယ် ပ.က.ဖ၊ ယူနီကွန်းတပ်ဖွဲ့၊ ရတနာပုံတပ်ဦး၊ No More Dictatogrship-NMD၊ ချမ်းစည်ရိုင်ဖယ် တို့ ပူးပေါင်းလုပ်ဆောင်ခဲ့တာလို့ သိရပါတယ်။

စာတည်း – လင်း

ရွှေဘို၊ ဒီဇင်ဘာ ၁၊ ၂၀၂၅။

စစ်ကိုင်းတိုင်း၊ ရွှေဘိုနဲ့ ဝက်လက်မြို့နယ်မှာ တိုက်ပွဲဖြစ်ပြီး စစ်ကော်မရှင်ဘက်ကသေဆုံးသူများကာ လက်နက်ခဲယမ်းတွေလည်းသိမ်းဆည်းနိုင်ခဲ့တယ်လို့ ၉၇၀၆ တပ်ရင်း ဒေါင်းနီတပ်ဖွဲ့က ဒီဇင်ဘာ ၁ ရက်မှာ သတင်းထုတ်ပြန်ပါတယ်။

နိုဝင်ဘာ ၂၇ ရက် မနက် ၆ နာရီခန့်မှာ ဝက်လက်မြို့နယ်၊ စိုင်နိုင်လေးရွာမှာ တပ်စွဲထားတဲ့ စစ်ကော်မရှင်စစ်ကြောင်းကို ၆ နာရီကျော်ကြာတိုက်ခိုက်ခဲ့ပြီး အဲ့ဒီနေ့ ညနေ ၃ နာရီခန့်မှာ စိုင်နိုင်လေးရွာကို ရွေဘိုမြို့ကနေစစ်ကူလာတဲ့ အင်အား ၇၀ ခန့်ပါစစ်ကြောင်းကို ရွှေဘို တောင်ဘက်အထွက် ရွှေဘိုမြို့နဲ့ တာဂဏန်းကျေးရွာကြားမှာ ၂ နာရီကျော်ကြာထပ်မံတိုက်ခိုက်ခဲ့တာလို့ ဆိုပါတယ်။

“စိုင်နိုင်လေးမှာဖြစ်ပြီးတော့ လိုက်ရှင်းလင်းရေးလုပ်တော့အလောင်းရတယ်။ ခဲယမ်းရတယ်။ ညနေပိုင်းကျတော့ ထွက်သွားတယ်။ ဘုန်းဘွဲရွာထဲဝင်သွားတယ်။ အဲ့မှာလည်းရှင်းလင်းရေးလုပ်တယ်။ ရှင်းလင်းရေးလုပ်နေတဲ့အခါမှာ ဖြတ်တောက်ရေးကိုလည်း ရွှေဘိုဘက်က စစ်ကူလာတဲ့ အင်အား ၇၀ ကျော်လောက်ပါတယ်။ အဲ့စစ်ကြောင်းကလည်း ညီနောင်တွေနဲ့ပေါင်းပြီး နှစ်ဖွဲ့ခွဲပြီးလုပ်တော့ အဲ့မှာလည်း အလောင်း ၂၀ ကျော် ၃၀ လောက်ရတယ်။ လက်နက်ခဲယမ်းတွေလည်းရတယ်”လို့ ၉၇၀၆ တပ်ရင်း ဒေါင်းနီတပ်ဖွဲ့က ဒုတပ်ရင်းမှူး နဂါးလေးက ပြောပါတယ်။

စိုင်နိုင်လေးတိုက်ပွဲအတွင်းမှာ စစ်ကော်မရှင်တပ်သား ၄ ဦးသေဆုံးပြီး အများအပြားဒဏ်ရာရခဲ့သလို ရွှေဘိုအထွက်တိုက်ပွဲမှာတော့ ၃၀ ဦးသေဆုံးကာ ဒဏ်ရာရသူတွေလည်း များခဲ့တယ်လို့ ဆိုပါတယ်။

ဒါ့အပြင်တိုက်ပွဲတွေအတွင်း MA1 ၅ လက်၊ MA2 ၂ လက်၊ MA3 ၂ လက်၊ MA4 ၁ လက်၊ RPG ၁ လက်၊ RPG သီး ၁၃ လုံး၊ ၆၀ မမ ၇ လုံး၊ RPG ပို့ကျည် ၈ တောင့်၊ ကျည်ဘောက် ၁၁ ဘောက် အီနာဂါ ၂ လုံး၊ နာနတ်သီး ၂ လုံးတို့ကို သိမ်းဆည်းရမိခဲ့တယ်လို့ ဆိုပါတယ်။

တိုက်ပွဲဖြစ်နေချိန် ရွှေဘိုအခြေစိုက် ခလရ ၄၂ ကနေ ဟောင်ဝှစ်ဇာနဲ့ ၁၉ ကြိမ် ပစ်ခတ်ပြီး၊ မုံရွာ နမခမှ ၃ စီး၊ Y12 တွေနဲ့လည်း ဗုံးကြဲခဲ့တယ်လို့ ၉၇၀၆ တပ်ရင်း ဒေါင်းနီတပ်ဖွဲ့က ဒုတပ်ရင်းမှူး နဂါးလေး ကပြောပါတယ်။

“ရွှေဘိုမြို့ထဲကနေ ဟောင်ဝင်ဇာနဲ့လှမ်းထုတာ။ ကျနော်တပ်ထောက်အရာရှိက ဟောင်ဝစ်ဇာ ထိတာပေါ့။ ပထမအလုံး ၃ ချက်ပစ်တာ ကျနော်တို့ရဲဘော်တွေရှိနေတဲ့နေရာ။ ဒုရင်းမှူး၊ တပ်ထောက်အရာရှိနဲ့ ဒရုန်းတာဝန်ခံတွေရှိတဲ့နေရာကို ကောင်တာပြန်ပစ်တာမှာ သူတို့ရှိတဲ့ပွိုင့်ကို ပစ်တော့ ထိပြီးတခါတည်းကျတာ။ ကျန်တဲ့သူတွေကဒဏ်ရာရတယ်။”လို့ ဒုတပ်ရင်းမှူး နဂါးလေးက ဆက်ပြောပါတယ်။

လက်နက်ကြီးထိလို့ ၉၇၀၆ တပ်ရင်း ဒေါင်းနီတပ်ဖွဲ့က တပ်ထောက်အရာရှိ ဒင်ကြီး ကျဆုံးခဲ့သလို ရွှေဘိုပကဖက တပ်ဖွဲ့ဝင် ၁ ဦးကျဆုံးပြီး ၄ ဦးဒဏ်ရာရခဲ့တာလို့ ဆိုပါတယ်။

ဒီတိုက်ခိုက်မှုကိုတော့ ရွှေဘိုခရိုင်တပ်ရင်း (၁၅၊ ၁၈၊ ၂၃၊ ၂၆၊ ၉၇၀၆ – Together We Can)၊ ဝက်လက်/ရွှေဘိုမြို့နယ်ပကဖ/ဒီပဲယင်း ပကဖ အဖွဲ့များ ဒေသခံ တိုက်နယ် ပကဖတွေနဲ့ Drone အဖွဲ့တွေနဲ့မဟာမိတ်ပူးပေါင်းတပ်တွေက စုပေါင်းတိုက်ခိုက်ခဲ့ကြတာလို့ ဆိုပါတယ်။

တိုက်ပွဲပြီးနောက် ရွှေဘိုမြို့ကနေ စစ်ကူထွက်လာတဲ့စစ်ကြောင်းဟာ ရွေဘိုမြို့ထဲပြန်ဝင်သွားပြီး စိုင်နိုင်လေးကျေးရွာကစစ်ကြောင်းကတော့ ဘုန်းဘွဲရွာထဲဝင်ရောက်သွားတယ်လို့ သိရပါတယ်။

နိုဝင်ဘာ ၁၀ ရက်ကလည်း ရွှေဘိုမြို့နယ်၊ တာဂဏန်းကျေးရွာမှာ တိုက်ပွဲ ၂ ကြိမ်ဖြစ်ကာ စစ်ကော်မရှင်ဘက်က ၄ ဦးသေဆုံးပြီး ရွှေဘိုမြို့နယ်ပကဖ အဖွဲ့ဝင် ၁ ဦးသေဆုံးခဲ့တယ်လို့ သိရပါတယ်။

စာတည်း – လင်း

မင်းတုန်း၊ အောက်တိုဘာ ၂၆၊ ၂၀၂၅။

မကွေးတိုင်း၊ မင်းတုန်းမြို့အဝင်မှာ ကုန်ကားတွေကို ငွေကြေးကောက်ဖို့လာတဲ့ ရဲတပ်သား ၂ ဦးကို ပစ်ခတ်ပြီး လက်နက်တွေလည်းသိမ်းဆည်းခဲ့တယ်လို့ သရက်ခရိုင်အမှတ် ၄ တပ်ရင်း သတင်းနဲ့ပြန်ကြားရေးတာဝန်ခံ ကိုမြတ် က ပြောပါတယ်။

မင်းတုန်းမြို့ပေါ်ကလာတဲ့ ရဲတပ်သားနေမင်းထက်နဲ့ သန်းထိုက်စိုးတို့ကို မင်းတုန်းမြို့အဝင်လမ်းပိုင်း အင်းလယ်ကုန်းရွာအနီးမှာ အောက်တိုဘာ ၂၆ ရက်ဒီမနက် ၆ နာရီမှာ ပစ်ခတ်ခဲ့တာလို့ ဆိုပါတယ်။

“အမြဲတမ်း ၂ ယောက်တော့မဟုတ်ပါဘူး။ တခါတလေကျရင် ၄ ယောက် ၅ ယောက်ပေါ့။ နေ့စဉ်ရက်ဆက်ကြီးမဟုတ်ဘူးလို့ ဆိုလိုချင်တာပေါ့။ ဂိတ်ချ အမြဲတမ်းပုံမှန်လုပ်နေတာမျိုးတော့ မဟုတ်ဘူးပေါ့။ သူတို့ငွေလိုရင် လိုသလိုမျိုးနေမှာပေါ့၊ အလောင်းကို နာရေးကူညီမှုကား၂ စီးနဲ့ **တွေနဲ့ လာပြီးတော့ ကောက်သွားတာဖြစ်ပါတယ်”လို့ ကိုမြတ်က ပြောပါတယ်။

ပစ်ခတ်ပြီးနောက် G 3 ၂ လက်၊ ကျည်ဘောက် ၂ ခု၊ ကျည် ၂၉ တောင့်၊ လက်ပစ်ဗုံး ၁ လုံး၊ လက်ထိပ် ၁ ခု၊ ဖုန်း ၁ လုံးနဲ့ ငွေသား ၆,၅၀၀၀ ကျပ်တို့ကို သိမ်းဆည်းခဲ့တယ်လို့လည်း ဆိုပါတယ်။

မင်းတုန်းမြို့က စစ်ကော်မရှင်တပ်ဖွဲ့ဝင်တွေဟာ အဆိုပါလမ်းပိုင်းမှာလာတဲ့ ကုန်ကားတွေဆီကနေ ခြိမ်းခြောက်ငွေတောင်းလေ့ရှိပြီး ကားသမားတွေမှာလည်း ကျပ်သိန်း ၅၀ ဝန်းကျင်လောက်ထိပေးရကာ လမ်းပိုင်းတလျောက် ပေါ်တာဆွဲဖမ်းဆီးတာတွေလည်းလုပ်တယ်လို့ သိရပါတယ်။

ဒီပစ်ခတ်မှုကို ပြည်သူ့ကာကွယ်ရေးတပ်မတော်၊ သရက်ခရိုင်အမှတ် ၄ တပ်ရင်း၊ တပ်ခွဲ ၂၊ တပ်စိတ် ၅ ကလုပ်ဆောင်ခဲ့တာပါ။

ပြီးခဲ့တဲ့ စက်တင်ဘာ ၂၈ ရက်ည ၁၁ နာရီကျော်ကလည်း မင်းတုန်းမြို့ပေါ်ကနေ စစ်ကော်မရှင်တပ်တွေ မောင်းနင်လာတဲ့ကားကို ကျောက်တိုင်ရွာအနီးမှာ စစ်ဆေးဖို့ရပ်တန့်ခိုင်းရာ မရပ်ဘဲ ပစ်ခတ်ထွက်ပြေးခဲ့ပြီးနောက် တော်လှန်ရေးတပ်တွေလိုက်လံပစ်ခတ်ချိန်မှာ ကားကိုထားပြီး ထွက်ပြေးကြတာကြောင့် ကျန်ခဲ့တဲ့ကားကို မီးရှို့ဖျက်ဆီးခဲ့တယ်လို့ United States Of Burma Army -USBA ဆီက သိရပါတယ်။

စာတည်း – လင်း

ပဲခူး၊ အောက်တိုဘာ ၁၆၊ ၂၀၂၅။

ပဲခူးတိုင်း၊ လက်ပံတန်းမြို့နယ်၊ သရက်ချောင်းကျေးရွာကို စစ်ကြောင်းထိုးလာတဲ့ စစ်ကော်မရှင်တပ်ကို အောက်တိုဘာ ၁၅ ရက်မနက် ၁၀ နာရီကျော်မှာကြားဖြတ်တိုက်ခိုက်ပြီးနောက် လက်နက်ခဲယမ်းတွေနဲ့ သုံ့ပန်းတွေကို သိမ်းဆည်းဖမ်းမိနိုင်ခဲ့တယ်လို့ အမျိုးသားညီညွတ်ရေးအစိုးရ – NUG၊ ကာကွယ်ရေးဝန်ကြီးဌာန ရဲ့ စစ်ရုံးချုပ်က အောက်တိုဘာ ၁၆ ရက်ဒီကနေ့မှာ ထုတ်ပြန်ပါတယ်။

အဆိုပါတိုက်ပွဲအတွင်း စစ်ကော်မရှင်တပ်အထိအခိုက်များခဲ့ပြီး ၁၅ ဦးထက်မနည်း သေဆုံးကာ စစ်သုံ့ပန်းအဖြစ် ၁၂ ဦးကို ဖမ်းဆီးရရှိခဲ့ကာ လက်နက်အစုံ ၁၉ လက်၊ ခဲယမ်းများနဲ့ စစ်သုံးပစ္စည်းများစွာကိုလည်း သိမ်းဆည်းရမိတယ်လို့ ထုတ်ပြန်ချက်မှာ ဖော်ပြပါတယ်။

ဒီတိုက်ခိုက်မှုကို ပြည်သူ့ကာကွယ်‌ရေးတပ်မတော်၊ အမှတ် (၂) စစ်ဆင်ရေးနယ်မြေ၊ ပဲခူးတိုင်းစစ်ဌာန၊ ဗျူဟာ ၂၂ ကွပ်ကဲမှုနဲ့ အမှတ် (၃၈၀၂) တပ်ရင်း၊ အမှတ် (၃၈၀၃) တပ်ရင်း၊ ရွှေတန်းမြေ ပြည်သူ့ကာကွယ်ရေးတပ်ဖွဲ့၊ ဂဠုန်ပြည်သူ့ကာကွယ်ရေးတပ်ဖွဲ့ ပူးပေါင်းတပ်ဖွဲ့တွေက ပြုလုပ်ခဲ့တာလို့ ဆိုပါတယ်။