တောင်တွင်းကြီး၊ နိုဝင်ဘာ ၅၊ ၂၀၂၆။
မကွေးတိုင်း၊ တောင်တွင်းကြီးမြို့နယ်၊ ဆတ်သွားမြို့အနီး ဆတ်သွား-လယ်ဝေးလမ်းပိုင်းမှာ ကင်းလှည့်ပြီး၊ ပေါ်တာလိုက်ဆွဲနေတဲ့ ရဲတွေကို ကြားဖြတ်တိုက်ခိုက်ခဲ့ရာ ၂ ဦးသေပြီး ၁ ဦး ဒဏ်ရာရတယ်လို့ နိုဝင်ဘာလ ၄ ရက်နေ့က နေပြည်တော် ၉၀၂ တပ်ရင်း၊ တပ်ခွဲ ၃ က သတင်းထုတ်ပြန်ထားပါတယ်။
အောက်တိုဘာလ ၂၈ ရက်နေ့ ညနေ ၅ နာရီခန့်မှာ ကုက္ကိုကုန်း ရဲစခန်းကနေ အင်အား ၆ ဦး၊ ဆိုင်ကယ် ၃ စီးနဲ့ ဆတ်သွားဘက်ကို ထွက်လာတဲ့ ရဲအဖွဲ့ဝင်တွေကို ကြားဖြတ်တိုက်ခိုက်ခဲ့တာလို့ ဆိုပါတယ်။
“ပစ်ခတ်မှုဖြစ်တာက ၁၅ မိနစ်လောက်ပါပဲ။ ပေါ်တာဆွဲဖို့နဲ့ ကင်းပတ်ဖို့ထွက်လာတဲ့ သဘောရှိပါတယ်။ ပစ်ခတ်မှုဖြစ်တော့ သူတို့ဘက်က သေတဲ့သူတွေပစ်ထားပြီး ကျန်တဲ့သူတွေ ထွက်ပြေးသွားတယ်”လို့ ရိုးမဖိုက်တာ စစ်ကြောင်းမှူး ကိုဇေကြီးက ပြောပါတယ်။
ပစ်ခတ်မှုဖြစ်ပြီးနောက်ပိုင်း စစ်တပ်ဘက်က စစ်ရေးလှုပ်ရှားမှုတွေရှိလာတာကြောင့် စစ်ရေးအခြေငြိမ်သက်မှ သတင်းထုတ်ပြန်ရတာဖြစ်တယ်လို့ ဆိုပါတယ်။
ပစ်ခတ်မှုအတွင်းရဲတပ်သား ၂ ဦးနေရာမှာပင် သေဆုံးပြီး တဦးဒဏ်ရာပြင်းထန်ရရှိသွားကာ ပူးပေါင်းအဖွဲ့တွေဘက်ကတော့ ထိခိုက်သူမရှိဘူးလို့ဆိုပါတယ်။
ဒါ့အပြင် ရဲတွေဆီက MA-13 ၁ လက်နဲ့အတူ ကျည် ၉ တောင့်နဲ့ ဆိုင်ကယ် ၂ စီးကိုတော်လှန်ရေးတပ်တွေက သိမ်းဆည်းရမိခဲ့တယ်လို့ သိရပါတယ်။
အဲဒီ တိုက်ခိုက်မှုကို ရိုးမဖိုက်တာစစ်ကြောင်းအောက်က တပ်ရင်းတပ်ဖွဲ့တွေအပြင် မကွေး-တောင်တွင်းကြီး အထူးပြောက်ကျားတပ်ဖွဲ့နဲ့ တောင်တွင်းကြီးမြို့နယ် ပြည်သူ့ကာကွယ်ရေးအဖွဲ့ (ပုဏ္ဏဝတီ)တို့က ပူးပေါင်း လုပ်ဆောင်ခဲ့တာဖြစ်တယ်လို့ သိရပါတယ်။
ပြီးခဲ့တဲ့ ဇွန်လ ၁၅ ရက်နေ့ကလည်း ဆတ်သွားကျေးရွာအနီး ကားလမ်းပေါ်မှာ စစ်တပ်ဗိုလ်ကြီးစောသန်းထွန်းပါ ၄ ဦးလိုက်ပါလာတဲ့ကားကို ပစ်ခတ်ရာ ဗိုလ်ကြီးစောသန်းထွန်းပါ ၂ ဦးသေဆုံးခဲ့သေးတယ်လို့ သိရပါတယ်။