ရေတာရှည်၊ နိုဝင်ဘာ ၂၂၊ ၂၀၂၅။

ပဲခူးတိုင်း၊ ရေတာရှည်မြို့နယ်အပိုင် ရန်ကုန်-မန္တလေး အမြန်လမ်းမှာယာဥ်တိုက်မှုဖြစ်ပြီး ၃ ဦးသေဆုံးခဲ့တယ်လို့ ကူညီဆောင်ရွက်ပေးခဲ့သူတွေဆီက သိရပါတယ်။

နိုဝင်ဘာ ၂၂ ရက်မနက် ၅ နာရီခန့်မှာ ရန်ကုန်ဘက်နေ နေပြည်တော်ကို ဦးတည်မောင်းလာတဲ့ ကုန်တင်ကားဟာ လမ်းမိုင်တိုင်အမှတ် ၁၈၀/၂ နဲ့ ၁၈၀/၃ ကြားမှာရပ်ပြီးစစ်ဆေးနေချိန် အနောက်ကလာတဲ့ Surf ကားက ဝင်ရောက်တိုက်မိခဲ့တာလို့ ဆိုပါတယ်။

“ကုန်ကားက ရပ်ဖို့ဆိုပြီး မီးအချက်ပြပြီးဆင်းတဲ့အချိန်မှာ အနောက်ကနေတိုက်တာ။ ကားလေးကတော့ Speed များလောက်တယ်။ ကားကြီးအောက်ထဲတော်တော်ဝင်သွားတာဆိုတော့”လို့ ကူညီဆောင်ရွက်ပေးခဲ့သူတဦးက ပြောပါတယ်။

ယာဥ်တိုက်မှုကြောင့် Surf ယာဥ်ပေါ်ပါ အသက် ၃၀ ကနေ ၅၀ ကြားအမျိုးသား ၃ ဦးစလုံး နေရာမှာတင်သေဆုံးပြီး သူတို့နဲ့ပတ်သက်တဲ့ အချက်အလက်တွေကိုတော့ မသိရသေးဘူးလို့ ဆိုပါတယ်။

သေဆုံးသူတွေကိုတော့ ဒေသလူမှုကူညီရေးအသင်းကကောက်ယူပြီး ဆွာဆေးရုံကို ပို့ဆောင်ပေးထားရတယ်လို့ သိရပါတယ်။

နိုဝင်ဘာ ၁၀ ရက်နေ့ကလည်း ဖြူးမြို့နယ်အပိုင်၊ ရန်ကုန်-မန္တလေးအမြန်လမ်း မိုင်တိုင် ၁၀၁ နဲ့ ၁၀၂ ကြားမှာ အိမ်စီးမော်တော်ယာဥ် ၁ စီးရှေ့ဘီးပေါက်ကာ လမ်းဘေးကာရံထားတဲ့ အကာအရံတွေကို တိုက်မိတိမ်းမှောက်လို့ ကလေးငယ် ၁ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ နိုဝင်ဘာလ ၅၊ ၂၀၂၅။

နေပြည်တော်၊ ပျဥ်းမနားမြို့မှာ ယမန်နေ့ နိုဝင်ဘာ ၄ ရက်တန်ဆောင်မုန်းလပြည့်ည ပံ့သကူလိုက်ကောက်သူတွေ ကား၊ ဆိုင်ကယ်တွေနဲ့တိုက်မိလို့ ကိုရင် ၁ ပါးအပါ ၃ ဦးပြင်းထန်ဒဏ်ရာတွေရခဲ့တယ်လို့ ကူညီဆောင်ရွက်ပေးခဲ့သူတွေထံက သိရပါတယ်။

ယမန်နေ့ည ၈ နာရီကျော်က ပျဥ်းမနားမြို့၊ ပန်းခင်းရပ်မီးပွိုင့်အနီး ရန်ကုန်-မန္တလေးလမ်းဟောင်းမှာ ပံ့သကူကောက်သူတွေနဲ့ စည်ကားနေချိန် ကားတစီးက လမ်းဘေးမှာရပ်နေတဲ့ အသက် ၁၁ နှစ်အရွယ် မိန်းကလေး ၁ ဦးကို တိုက်မိခဲ့တယ်လို့ ဆိုပါတယ်။

အလားတူ ည ၉ နာရီခန့်မှာလည်း ပျဥ်းမနားမြို့၊ လက်ပန်ခါးလှကျေးရွာအနီး ရန်ကုန်-မန္တလေးလမ်းဟောင်းပေါ်မှာ လမ်းပေါ်တက် ပံသကူကောက်သူ အသက် ၅၀ ကျော်အရွယ် အမျိုးသား ၁ ဦးနဲ့အသက် ၁၀ နှစ်အရွယ် ကိုရင် ၁ ပါးကို ဆိုင်ကယ်က ဝင်တိုက်မိခဲ့တာပါ။

” ရှေ့က ကားပေါ်က ကြဲသွားတာကို နောက်က ဆိုင်ကယ်၊ ကားတွေမကြည့်တော့ဘူး၊ ဝင်ကောက်တော့တိုက်မိတာ။ ဖြစ်တာက ၂ နေရာပါ။ ကောင်မလေးက လမ်းဘေးကနေ ပိုက်ဆံကြဲနေတာ။ ရုတ်ရုတ်သဲသဲတွေဖြစ်နေတော့ ကားသမားလည်းပြာသွားတာနေမယ် ဝင်တိုက်မိတာ။ ကားက လမ်းအတိုင်းမောင်းလာတဲ့ကားပါ”လို့ အခင်းဖြစ်ပွားမှုကို ကူညီဆောင်ရွက်ပေးခဲ့သူဒေသခံတဦးက မြေလတ်အသံကို ပြောပါတယ်။

ယာဥ်တိုက်မှုကြောင့် မိန်းကလေးငယ်မှာ လက်၊ ခြေထောက်နဲ့ ယာဘက်မျက်လုံးပြင်းထန်ဒဏ်ရာရခဲ့ပြီး ကိုရင်နဲ့ သက်ကြီးအမျိုးသားမှာလည်း စိုးရိမ်ရဒဏ်ရာတွေရထားတာကြောင့် ပျဥ်းမနားမြို့ ကုတင် ၂၀၀ ဆေးရုံကို ပို့ဆောင်ကုသနေရတယ်လို့ ဆိုပါတယ်။

တန်ဆောင်မုန်းလပြည့်ညဟာ မြန်မာ့ရိုးရာဓလေ့ ပံ့သကူပစ်လေ့ရှိကြပြီး ပံ့သကူပစ်သူတွေက ငွေနဲ့ပစ္စည်းတွေကို လမ်းတွေပေါ် မှာထားခဲ့ကြရာ ကောက်ယူသူတွေကလည်း ရှာဖွေကောက်ယူကြတာပါ။

လမ်းမတွေပေါ် ပစ်တဲ့ ပံ့သကူငွေတွေကို လုယက်ကောက်ယူသူများပြားတာကြောင့် ပံ့သကူကောက်ယူသူတွေနဲ့ လမ်းသွား၊ လမ်းလာယာဥ်တွေအကြား မတော်တဆမှုတွေ နှစ်စဥ်ဖြစ်ပွားနေပြီး လူသေဆုံးတဲ့ဖြစ်စဥ်တွေ ရှိနေတာလည်း ဖြစ်ပါတယ်။

စာတည်း – ဟိန်းစံ

မိတ္ထီလာ၊ အောက်တိုဘာ ၁၈၊ ၂၀၂၅။

မန္တလေးတိုင်း၊ မိတ္ထီလာမြို့၊ ရန်ကုန်-မန္တလေးလမ်းဟောင်း ရှမ်းတဲလေတပ်အရှေ့မှာ Express ကားနဲ့ ဟိုက်ဂျက်ကားတိုက်မိပြီး အမျိုးသမီး ၁ ဦးသေဆုံးကာ ၄ ဦးဒဏ်ရာရခဲ့တယ်လို့ ကူညီဆောင်ရွက်ပေးခဲ့သူတွေဆီက သိရပါတယ်။

အောက်တိုဘာ ၁၇ ရက်မနက် ၁၁ နာရီခန့်မှာ မန္တလေးဘက်ကနေ မိတ္ထီလာမြို့ဘက်ကို မောင်းလာတဲ့ ခရီးသည်တင် Express ကားဟာ ရှေ့မှာသွားနေတဲ့ ဟိုက်ဂျက်ကားကိုနောက်ကနေ ဝင်တိုက်ခဲ့တာလို့ဆိုပါတယ်။

“ကားကျော်တဲ့အကျော်မှာ နောက်ကနေဝင်တိုက်လိုက်တာ။ ဟိုက်ဂျက်နောက်မှာစီးတာက အမေကြီးတယောက်၊ ကလေးငယ်နဲ့သေသူအမျိုးသမီး၊ ရှေ့မှာက ယာဥ်မောင်းနဲ့ သေသူယောင်္ကျားပါတယ်။ နောက်ကတိုက်လိုက်တဲ့ အရှိန်နဲ့ နောက်ခန်းပါသူ ၃ ဦးက ကားပေါ်ကပြုတ်ကျသွားတယ်။ အမေကြီးနဲ့ကလေးက ဘေးကိုကျပြီးတော့ ကောင်မလေးကတော့ Express ကားအောက်ထဲကျသွားတာ”လို့ ကူညီဆောင်ရွက်ပေးခဲ့သူတဦးက ပြောပါတယ်။

ယာဥ်တိုက်မှုကြောင့် ဟိုက်ဂျက်ကားမှာလိုက်ပါလာကြတဲ့ အရှေ့ဆည်ကုန်းကျေးရွာနေ အသက် ၂၇ နှစ်အရွယ် မသန္တာဟာ နေရာတင် ပွဲချင်းပြီးသေဆုံးပြီး အသက် ၁ နှစ်ခွဲအရွယ် ကလေးငယ်၊ အသက် ၆၀ ကျော်အရွယ် အမျိုးသမီး၊ အသက် ၃၀ ကျော်အရွယ်အမျိုးသား ၂ ဦးတို့ ထိခိုက်ဒဏ်ရာရခဲ့တယ်လို့ ဆိုပါတယ်။

ကား ၂ စီးလုံးလည်းပျက်စီးမှုရှိခဲ့ပြီး Express ကားပေါ်လိုက်ပါလာသူတွေကတော့ ထိခိုက်မှုတွေမရှိခဲ့ဘူးလို့ သူကပြောပါတယ်။

ယာဥ်တိုက်မှုကြောင့် ထိခိုက်သေဆုံးသူတွေကို မိတ္ထီလာပြည်သူ့ဆေးရုံကို ပို့ဆောင်ထားရပြီး အောက်တိုဘာ ၁၈ ရက်မှာတော့ သေဆုံးသူအလောင်းကိုကျေးရွာပြန်သယ်သွားပြီး ကျန်ဒဏ်ရာရသူတွေကတော့ဆေးရုံမှာ ဆက်လက် ဆေးကုသနေရတယ်လို့ သိရပါတယ်။

ပြီးခဲ့တဲ့ ဇွန် ၂ ရက်ကလည်း မိတ္ထီလာမြို့နယ်၊ ဖလန်ကျင်းကျေးရွာအနီး မိတ္ထီလာ-ကျောက်ပန်းတောင်လမ်းမှာ ခရီးသည်တင်ယာဥ် တိမ်းမှောက်လို့ အမျိုးသမီး ၆ ဦးသေ ၁၁ ဦးဒဏ်ရာရတယ်လို့ သိရပါတယ်။

စာတည်း – လင်း

ရွှေတောင်၊ ဩဂုတ် ၁၆၊ ၂၀၂၅။

ပဲခူးတိုင်း၊ ရွှေတောင်မြို့နယ်၊ ဘို့လည်ကုန်းကျေးရွာအနီး ရန်ကုန်-ပြည်လမ်းပေါ်မှာ ကား ၂ စီး မျက်နှာချင်းဆိုင်တိုက်ခဲ့တာကြောင့် ၁၆ ဦးဒဏ်ရာရတယ်လို့ ကူညီဆောင်ရွက်ပေးခဲ့သူတွေဆီက သိရပါတယ်။

ဩဂုတ် ၁၅ ရက် နေ့လယ် ၂ နာရီခန့်မှာ ရွှေတောင်မြို့ဘက်ကနေ ဇီးကုန်းမြို့ဘက်ကို မောင်းနှင်လာတဲ့ လိုက်ထရပ်ယာဥ်နဲ့ ဇီးကုန်းမြို့ဘက်ကနေ ရွှေတောင်မြို့ဘက်ကို မောင်းလာတဲ့ အန်စာတုံး ခရီးသည်ပို့ဆောင်ယာဥ်တို့ တိုက်မိခဲ့ကြတယ်လို့ ဆိုပါတယ်။

“လမ်းလယ်ခေါင်မှာ တိုက်ကြတာပဲ။ ဘယ်သူက မှားလဲ ဘယ်သူကမှန်လဲတော့ မသိဘူး။ အောင်လံဘက်ကနေ ဇီးကုန်းပြန်တဲ့ကားနဲ့ ၁ စီးက ကိုရီးယား(အန်စာတုံး)ကား။ ကားပေါ်မှာတော့ ခရီးသည်မပါဘူး။ လူနာက လိုက်ထရပ်ပေါ်ကများတယ်”လို့ ကူညီဆောင်ရွက်ပေးခဲ့သူတဦးကပြောပါတယ်။

လိုက်ထရပ်ပေါ်မှာ ယာဥ်မောင်းအပါအဝင် လူ ၁၅ ဦးပါပြီး အန်စာတုံးခရီးသည်တင်ယာဥ်ပေါ်မှာတော့ ယာဥ်မောင်း ၁ ဦးသာပါကာ ယာဥ်တိုက်မှုကြောင့် ကား ၂ စီးပေါ်ပါ အသက် ၄၀ ကနေ ၆၀ ကြား အမျိုးသား ၁၀ ဦးနဲ့ အမျိုးသမီး ၆ ဦးဒဏ်ရာရခဲ့ပါတယ်။

လိုက်ထရပ်ယာဥ်ပေါ်ပါသူတွေက ဇီးကုန်းမြို့ခံတွေဖြစ်ပြီး အောင်လံမြို့ဘက်က အလှူတခုကိုသွားပြီး နေထိုင်ရာမြို့ကိုပြန်လာချိန်မှာ ယာဥ်တိုက်မှုဖြစ်ခဲ့တာလို့ ဆိုပါတယ်။

ယာဥ်တိုက်မှုကြောင့် ထိခိုက်ဒဏ်ရာရသူ ၁၆ ဦးကို ဒေသလူမှုကူညီရေးအသင်းတွေက ရွှေတောင်ဆေးရုံကို ပို့ဆောင်ပေးခဲ့ရပြီး အဲဒီထဲက စိုးရိမ်ရ လူနာ ၆ ဦးကို ပြည်ဆေးရုံကို လွှဲပြောင်းကုသခဲ့ရတယ်လို့ သိရပါတယ်။

ပြီးခဲ့တဲ့နှစ် မတ် ၂၂ ရက်နေ့က ရွှေတောင်မြို့နယ်၊ စိုက်ပျိုးရေးရွာသစ်ကျေးရွာအနီး ရန်ကုန်-ပြည်လမ်းပေါ်မှာ ဘုရားဖူးယာဥ်တိမ်းမှောက်ပြီး ၄ ဦးသေဆုံးကာ ၁၀ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

သဲကုန်း၊ ဇွန် ၁၈၊ ၂၀၂၅။

ပဲခူးတိုင်း၊ သဲကုန်းမြို့နယ်၊ ချားလျှားကုန်းကျေးရွာနဲ့ ပျားစည်ကျေးရွာကြား၊ ပြည်-ရန်ကုန် ကားလမ်းပေါ်မှာ ဆိုင်ကယ်လမ်းဘေးရပ်ပြီး မိုးကာဝတ်နေတဲ့လင်မယား ကားတိုက်ခံရပြီး အမျိုးသား သေဆုံးကာ အမျိုးသမီးဒဏ်ရာရတယ်လို့ ကူညီမှုလုပ်ဆောင်ပေးခဲ့သူတွေဆီက သိရပါတယ်။

ဇွန် ၁၇ ရက် ညနေ ၃ နာရီခွဲမှာ ပေါင်းတည်မြို့နယ်၊ ကျီးမနိုးကျေးရွာနေ အသက် ၅၀ ကျော်အရွယ် လင်မယား ၂ ဦးဟာ ပြည်ဘက်ကနေ ပေါင်းတည်ဘက်ကို ဆိုင်ကယ်နဲ့ ပြန်လာချိန် လမ်းဘေးမှာ ဆိုင်ကယ်ရပ်ထားချိန် ကားကဝင်တိုက်ခဲ့တာလို့ဆိုပါတယ်။

“ပြည်ကနေ ဆိုင်ကယ်စီးပြီးပြန်လာတာ။ အဲ့နားရပ်ပြီးမိုးကာဝတ်နေချိန် ကားကစလစ်ဖြစ်ပြီး သူတို့ကိုဝင်တိုက်တာ။ ကားက ရန်ကုန်ဘက်ကလာတာဖြစ်နိုင်တယ်။ သူတို့က လမ်းပုခုံးစပ်ဘေးမှာ ရပ်နေတာ။ ကားကတော့မှောက်သွားတယ်။ စူဇူကီး ဟိုက်ဂျက်ပုံစံမျိုးကား။”လို့ ကူညီဆောင်ရွက်ပေးခဲ့သူတဦးကပြောပါတယ်။

ယာဥ်တိုက်မှုကြောင့် အမျိုးသားဖြစ်သူက နေရာတင်သေဆုံးခဲ့ပြီး အမျိုးသမီးဖြစ်သူက ဒဏ်ရာပြင်းထန်လို့ ပြည်ခရိုင်ကုတင် ၅၀၀ ကိုလွှဲပြောင်းကုသထားရတယ်လို့ ဆိုပါတယ်။

ကားသမားကတော့ ကားကိုထားပြီးထွက်ပြေးသွားတဲ့အတွက် ဇွန် ၁၈ ရက်ဒီမနက်ပိုင်းထိတော့ ဖမ်းဆီးရမိတာမရှိသေးဘူးလို့ သိရပါတယ်။

သေဆုံးသွားတဲ့အမျိုးသားအလောင်းကိုတော့ အင်းမဆေးရုံကနေ သူနေထိုင်ရာ ကျီးမနိုးကျေးရွာကို ပြန်လည်သယ်ဆောင်ပြီး ဒီနေ့မှာ နာရေးပြုလုပ်မယ်လို့ သိရပါတယ်။

ပြီးခဲ့တဲ့ မေ ၂၈ ရက်ညကလည်း ချားလျှာကုန်းကျေးရွာနဲ့ ဖလံကုန်းကျေးရွာကြား ပြည်-ရန်ကုန်လမ်းပေါ်မှာ ယာဥ် ၂ စီးမျက်နှားချင်ဆိုင်တိုက်မိပြီး ၂ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ပျော်ဘွယ်၊ ဇွန် ၁၁၊ ၂၀၂၅။

မန္တလေးတိုင်း၊ ပျော်ဘွယ်မြို့မြောက်ဘက်အထွက် နီလာရိုးမစက်သုံးဆီဆိုင်အနီး ရန်ကုန်-မန္တလေး လမ်းပိုင်းမှာ ကားက ဆိုင်ကယ်ကိုဝင်တိုက်ခဲ့တာကြောင့် ၂ ဦးသေပြီး ၃ ဦးဒဏ်ရာရတယ်လို့ ကူညီဆောင်ရွက်ပေးခဲ့သူတွေဆီက သိရပါတယ်။

ဇွန် ၁၀ ရက်ညနေ ၃ နာရီခန့်မှာ ပျော်ဘွယ်မြို့ဘက်နေ မန္တလေးဘက်ကို ဦးတည်ပြီးမောင်းလာတဲ့ ဆိုင်ကယ်ကို နောက်ကမောင်းလာတဲ့ လိုက်ထရပ်ယာဥ်က ကျော်တက်ရာမှာ ယာဥ်တိုက်မှုဖြစ်ခဲ့တာလို့ ဆိုပါတယ်။

“ကားက ဆိုင်ကယ်ကိုတိုက်ပြီးတော့ ကားရှေ့အောက်ထဲ ဆိုင်ကယ်ကဒရွတ်တိုက်ပါသွားတာ။ ကားက လမ်းဘေးထိုးကျတိမ်းမှောက်နေတယ်။”လို့ ကူညီကယ်ဆယ်ရေးပြုလုပ်ပေးခဲ့သူတဦးက ပြောပါတယ်။

ယာဥ်တိုက်မှုကြောင့် ဆိုင်ကယ်စီးလာတဲ့ ပျော်ဘွယ်မြို့နယ်၊ ဧကရာဇ်ကုန်းအုပ်စု၊ ရေလယ်ကွေ့ ကျေးရွာမှာနေထိုင်သူ အသက် ၂၀ အရွယ် အမျိုးသား ၂ ဦးတို့ နေရာတင်သေဆုံးခဲ့တယ်လို့ ဆိုပါတယ်။

ဒါ့အပြင်လိုက်ထရပ်ယာဥ်ပေါ်မှာလိုက်ပါလာတဲ့ ပျော်ဘွယ်မြို့မှာနေထိုင်သူ အမျိုးသား ၃ ဦး ဒဏ်ရာရခဲ့ပြီး ပျော်ဘွယ်မြို့နယ်ဆေးရုံကို ပို့ဆောင်ထားရတယ်လို့ ကူညီကယ်ဆယ်ရေးလုပ်ပေးခဲ့သူက ပြောပါတယ်။

သေဆုံးသွားသူ ၂ ဦးရဲ့အလောင်းတွေကိုတော့ ဇွန် ၁၁ ရက်မှာ ဆေးရုံကနေနေအိမ်ပြန်သယ်ပြီး နာရေးပြုလုပ်သွားမယ်လို့ သိရပါတယ်။

မေ ၉ ရက်ကလည်း ပဲခူးတိုင်း၊ ရေတာရှည်မြို့နယ်၊ ရေတာရှည်မြို့နဲ့ ကေတုမတီမြို့သစ်ကြား မြောက်နမ်ချွန်ကျေးရွာအနီး ရန်ကုန်-မန္တလေး လမ်းဟောင်းမှာ ဆီဘောက်ဆာ ၂ စီးတိုက်ပြီး ၃ ဦးသေ ၄ ဦးဒဏ်ရာရတယ်လို့ သိရပါတယ်။

စာတည်း – လင်း

နာရေးကိုလူထောင်ချီလိုက်ပို့သင်္ဂြိုဟ်ခဲ့

ညောင်လေးပင်၊ ဇွန် ၆၊ ၂၀၂၅။

ပဲခူးတိုင်း၊ ညောင်လေးပင်မြို့နယ်၊ ကြံဘိုကျေးရွာကနေ ညောင်လေးပင်မြို့ပေါ်ကို ကျောင်းသုံးပစ္စည်းသွားဝယ်တဲ့ ဆရာမနဲ့ကျောင်းသား ရွာကိုပြန်ချိန် ယာဥ်တိုက်မှုဖြစ်ပြီးသေဆုံးခဲ့တယ်လို့ ဒေသခံတွေဆီက သိရပါတယ်။

ဇွန် ၁ ရက် ညနေ ၄ နာရီခန့်မှာ ကြံဘိုရွာ အလက ကျောင်းက အသက် ၃၄ နှစ်အရွယ် ဆရာမ ဒေါ်ပြည့်ပြည့်ဖြိုးဝေအောင်နဲ့ G 9 ကျောင်းသား ၁၆ နှစ်အရွယ် ဖြိုးမောင်မောင်တို့ဟာ ညောင်လေးပင်မြို့ ကနေ ကြံဘိုကျေးရွာကိုဆိုင်ကယ်နဲ့ပြန်လာချိန် ဌက်ပျောတောလမ်း၊ ဂျပန်တံတား စစ်တပ်ဂိတ်အနီး အရောက်မှာ ကားတစီးကဝင်တိုက်ခဲ့တာလို့ ဆိုပါတယ်။

“သူကလည်းအရင်ကတည်းက ဘယ်ကျောင်းသားဖြစ်ဖြစ် လိုအပ်တဲ့အဝတ်အစားတွေကအစဝယ် ပေးနေကြ။ ဘယ်ကျောင်းသားအပေါ်ဖြစ်ဖြစ်သဘောကောင်းတယ်။ ရွာကလည်းသူ့ကိုချစ်ကြတယ်။ ဆရာမတွေကလည်း အကုန်ခင်တယ်။ သဘောလည်းကောင်းတယ်။ ခုလည်း ကျောင်းသားအတွက် ထီးနဲ့ဖိနပ်ဝယ်ပေးဖို့ခေါ်လာတာ။ အပြန်မှာဖြစ်တာ”လို့ ဒေသခံတဦးကပြောပါတယ်။

ယာဥ်တိုက်မှုဖြစ်ချိန် ကားနဲ့ဆိုင်ကယ်ကချိတ်ပါသွားပြီး ဆရာမက နေရာတင်ပွဲချင်းပြီးသေဆုံးကာ ကျောင်းသားကတော့ ညောင်လေးပင်ဆေးရုံရောက်မှ သေဆုံးသွားတယ်လို့ ဆိုပါတယ်။

ဆရာမဟာ အိမ်ထောင်ပြုထားတာ ၁ နှစ်ခန့်သာရှိသေးပြီး ထိုင်းမှာအလုပ်လုပ်နေတဲ့ အမျိုးသားဖြစ်သူ နာရေးကိုပြန်လာဖို့စောင့်နေတဲ့အတွက် ဇွန် ၅ ရက်နေ့လယ် ၁၂ နာရီဝန်းကျင်မှ ကျေးရွာသုသာန်မှာ ဆရာမနဲ့ကျောင်းသားတို့ရဲ့ နာရေးကို တချိန်တည်းပြုလုပ်ခဲ့တယ်လို့ သိရပါတယ်။

ဆရာမဒေါ်ပြည့်ပြည့်ဖြိုးဝေအောင်ဟာ လူချစ်လူခင်ပေါသူဖြစ်ပြီး ကျောင်းအတွက်လိုအပ်တာရှိပါက ကိုယ်တိုင်ငွေကြေးစိုက်ထုတ်လုပ်ကိုင်တာ၊ ချို့တဲ့ တဲ့ ကျောင်းသားကျောင်းသူတွေအတွက်လည်း ကျောင်းသုံးပစ္စည်းတွေကို ဝယ်ပေးတတ်သူဖြစ်တယ်လို့ ဆိုပါတယ်။

နာရေးကိုလည်းလူထောင်နဲ့ချီလိုက်ပို့ခဲ့ကြပြီး ၂ ဦးစလုံးကိုတော့ ကျေးရွာသုသာန်မှာပင် ဂူသွင်းသင်္ဂြိုဟ်ခဲ့တယ်လို့ ဆိုပါတယ်။

“ကျောင်းသားတွေမှန်သမျှက ဆရာမရဲ့စိတ်ဓာတ်ကိုသိကြတယ်။ ဆရာမကလည်း သဘောတကယ်ကောင်းတာ။ ကလေးတွေကငိုနေတာကလည်း သရုပ်ဆောင်နေကြတာမဟုတ်ဘူး။ သူတို့ဟာသူတို့ သဘာဝကို ငိုနေကြတာ။ တကယ်ငိုတာ။ သူတို့ဆရာမကိုတကယ်ချစ်ကြတာ။ ဆရာမကလည်း အကုန်လုံးကိုချစ်ကြတာ။ တနယ်လုံးချစ်ကြတာ”လို့ သူကဆက်ပြောပါတယ်။

ယာဥ်တိုက်မှုနဲ့ပတ်သက်ပြီး ကားမောင်းသူကို ရဲကဖမ်းထားတယ်လို့သိရကြောင်း အထက်ပါဒေသခံက ပြောဆိုပြီး ဒီအခြေအနေတွေနဲ့ပတ်သက်တဲ့ နောက်ဆက်တွဲကိုတော့မြေလတ်အသံက သီးခြားအတည် မပြုနိုင်သေးပါဘူး။

စာတည်း – လင်း

ကောလင်း၊ မေ ၈၊ ၂၀၂၅။

စစ်ကိုင်းတိုင်း၊ ကောလင်းမြို့နယ်၊ ရွှေဘို – မြစ်ကြီးနားကားလမ်းမပေါ်မှာ အမျိုးသားရုပ်အလောင်း ၁ ခုကို မေ ၇ ရက်ညနေ ၅ နာရီကျော်မှာတွေ့ရှိခဲ့တယ်လို့ ဒေသခံသတင်းရင်းမြစ်တွေဆီက သိရပါတယ်။

သေဆုံးသူမှာ ကုက္ကိုကုန်းရွာမှာနေထိုင်တဲ့ အသက် ၅၀ အရွယ် ဦးကျန့်ဖြစ်ပြီး ကုက္ကိုကုန်းရွာ မြောက်ဘက်ကား လမ်းမပေါ်မှာလဲကျနေတဲ့ဆိုင်ကယ် ၁ စီးအနီးမှာတွေ့ရှိခဲ့တာလို့ ဆိုပါတယ်။

“မနက်စောစောက ဖြစ်သွားပုံရတယ်။ သိတာတော့ ၆ နာရီဝန်းကျင်လောက်မှသိကြတာ။ သူက ကုက္ကိုကုန်းရွာကနေ မြောက်ဘက်ကိုသွားတာ။ ကချင်ကုန်းရွာဘက်ပေါ့။ ကားလမ်းပေါ်မှာ သေနေတာကို တွေ့တာ။ ခေါင်းကပြားပြီးတော့မှမရှိတော့ဘူး” လို့ ဒေသခံသတင်းရင်းမြစ်တဦးက ပြောပါတယ်။

ဦးကျန့်မှာ မြစ်ကြီးနားဘက်ကနေ ရွှေဘိုဘက်ကိုသွားတဲ့ ကား ၁ စီးတိုက်ခံရကာသေဆုံးခဲ့တာဖြစ်ပြီး လက်ရှိမှာတော့ ဒီယာဥ်တိုက်မှုဖြစ်စဥ်နဲ့ဆက်နွယ်တဲ့ ကားသမားဖမ်းမိထားပြီး ကောလင်းမြို့နယ် ပြည်သူ့လုံခြုံရေးအဖွဲ့က စစ်ဆေးနေတယ်လို့ ဆိုပါတယ်။

ဦးကျန့်ရဲ့အလောင်းကိုတော့ မနေ့ကနေ့ချင်းမှာပဲ သူ့ရွာသုသာန်မှာ သင်္ဂြိုဟ်ခဲ့တယ်လို့ ဆိုပါတယ်။

စာတည်း – လင်း

ပဲခူး၊ ဇွန် ၄၊ ၂၀၂၃။

ပဲခူးတိုင်းအနောက်ခြမ်း၊ ကြို့ပင်ကောက်မြို့နယ်၊ ရန်ကုန် – ပြည်လမ်းမှာ ဇွန်လ ၄ ရက် ဒီမနက်အစောပိုင်းက ရပ်ထားတဲ့ကားကိုဝင်တိုက်တဲ့ ဆိုင်ကယ်သမား ၂ ဦး နေရာမှာပဲ သေဆုံးခဲ့တယ်လို့ မြို့ခံတဦးက ပြောပါတယ်။

ကြို့ပင်ကောက်မြို့နယ်၊ ကျွဲဘိကျေးရွာအနီး ရန်ကုန်ဘက်ကိုမျက်နာမူကာ စက်ပျက်လို့ ရပ်ထားတဲ့တွဲကားကို ဒီမနက်အစောပိုင်း ၁ နာရီလောက်မှာ ဝင်တိုက်ခဲ့တာလို့ ဆိုပါတယ်။

“သူတို့က အလှပြင်လုပ်ငန်းလုပ်ကြတာ၊ ဇီးကုန်းကပြန်လာကြတာမှာ ရပ်ထားတဲ့ကားကို နောက်ဝင်တိုက်မိတာပါ။ နေရာမှာပဲ ပွဲချင်းပြီးဆုံးသွားပါတယ်၊ သူတို့က အရက်နည်းနည်းတော့ သောက်တတ်တယ်”လို့ သေဆုံးသူတွေနဲ့ နီးစပ်သူတဦးကပြောပါတယ်။

သေဆုံးသူတွေဟာ ကြို့ပင်ကောက်မြို့၊ ပြည်တန်းလမ်းက အသက် ၂၃ နှစ်အရွယ် ကိုဆန်းရိူင်းထွဋ်နဲ့ ဦးလူကလေးလမ်းက အသက်၂၆ နှစ်အရွယ် ကိုရိူင်းလင်းထက်တို့ဖြစ်ပြီး၊ သူတို့အလောင်းတွေကို ကြို့ပင်ကောက် ပြည်သူ့ဆေးရုံရင်ခွဲရုံကို ပရဟိတအသင်းကား ၁ စီးနဲ့ ပို့ဆောင်ခဲ့တယ်လို့ပြောပါတယ်။

ဓါတ်ပုံပါ ဖြစ်စဥ်မှာရပ်ထားတဲ့ကားဟာ လမ်းမအလယ်နီးပါးအထိရောက်နေတာကိုတွေ့ရသလို ကားရဲ့နောက်မှာ သစ်ကိုင်းတချို့ချထားတာကိုတွေ့ရပြီး ဘာကြောင့်ဆိုင်ကယ်က ဝင်တိုက်တယ်၊ ဘယ်လိုအရေးယူမယ်ဆိုတာကိုတော့ မသိရှိရသေးပါဘူး။

ပြီးခဲ့တဲ့ဖေဖေါ်ဝါရီလ ၁၅ ရက် နေ့လယ်ကလည်း ကြို့ပင်ကောက်မြို့နယ်၊ ရန်ကုန် – ပြည်လမ်း ကျွဲဘိရွာအနီးမှာပဲ ပြည်မြို့ဘက်ကနေ ရန်ကုန်ဘက်ကိုမောင်းနှင်လာတဲ့Toyota Succed အမျိုးအစား မော်တော်ယာဥ်တစီး အရှိန်လွန်ကာတိမ်းမှောက်ခဲ့လို့ ယာဥ်ပေါ်ပါ အမျိုးသား ၂ ဦး ထိခိုက်ဒဏ်ရာ ရခဲ့ပါသေးတယ်။

စာတည်း – လင်း