ယင်းမာပင်

ယင်းမာပင်၊ ဖေဖော်ဝါရီ ၂၈၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်အခြေစိုက် Chindwin Revolutionary Fighter နဲ့ မဟူရာဒေါင်မင်း ပြည်သူ့ကာကွယ်ရေးတပ်ဖွဲ့တို့ စခန်းမီးရှို့ဖျက်ဆီးခံလိုက်ရပြီးနောက် ပြင်ပကနေ ငွေချေးပြီးတော့ လက်နက်ကြီးကျည်တွေကို ကိုယ်တိုင်ထုတ်လုပ်နေရတယ်လို့ တာဝန်ရှိသူက ပြောပါတယ်။

လက်နက်ကျည်ကတော့ ၆၀ မမ၊ ၁၂၀ မမ၊ ၃၇၃ မမ တို့ဖြစ်ပြီး၊ ထုတ်လုပ်မှုကို ဖေဖော်ဝါရီ လက စတင်ကာ တရက်မှာ အလုံးရေ ၅၀ ခန့် ထုတ်လုပ်နိုင်ခဲ့တယ်လို့ မဟူရာဒေါင်းမင်း ပြည်သူ့ကာကွယ်ရေးတပ်ဖွဲ့ တာဝန်ခံ ကိုမိုးလုံက ပြောပါတယ်။

“သံတွေကိုတော့ မိုင်းတဲတာဝါတိုင်ကနေ ရရှိပါတယ်ဗျ။ တရက်ကို အလုံးရေ ၅၀ ထုတ်လုပ်နိုင်ပါတယ်ဗျ။ ဘယ်လောက်ထုတ်ပြီးပြီဆိုတာတော့ လုံခြုံရေးအတွက် သည်းခံပေးပါဗျ။ ကျည်တစ်လုံး အပြီးအစီးဆိုရင် ၈ သိန်းလောက် ကုန်ပါတယ်။ အလှူငွေကလည်း မတရားနည်းနေပါတယ်။ ပြင်ပကနေ ချေးထားတဲ့ငွေက သိန်းတရာလောက်တော့ ရှိပြီဗျ” လို့ ဆိုပါတယ်။

လက်ရှိမှာ အဆိုပါ ကာကွယ်ရေးတပ် ၂ ဖွဲ့အနေနဲ့ လက်နက်ကျည် ထုတ်လုပ်မှုအပိုင်းကို ဦးစားပေးနေရတာကြောင့် တိုက်ပွဲကြီးတွေ မလုပ်နိုင်သေးဘဲ ပြောက်ကျားစနစ်နဲ့ပဲ လှုပ်ရှားနေတယ်လို့ ကိုမိုးလုံက ဆက်ပြောပါတယ်။

“အချိန်တခုအတွက် စုဆောင်းနေတာပါဗျ။ လက်နက်အစစ်က မပြည့်စုံတော့ တက်တဲ့ပညာကို လေ့လာပြီး ထုတ်လုပ်နေတာပါဗျ။ တိုက်ပွဲတွေလည်း ပြောက်ကျားတိုက်နေပါတယ်။ မပိုင်ဘဲနဲ့ ပစ္စည်းဆုံးရှုံးရတဲ့အဖြစ်ကို မလိုလားလို့ပါ” လို့ ဆိုပါတယ်။

ဒါ့အပြင် လက်နက်ကြီးကျည် ထုတ်လုပ်နေတာဟာလည်း ပြင်ပကနေ ငွေချေးပြီး လုပ်နေရတာကြောင့် မိဘပြည်သူတွေအနေနဲ့ တတ်နိုင်သလောက်လည်း အလှူငွေထည့်ဝင်ပေးကြဖို့ကို အနူးအညွန့် မေတ္တာရပ်ခံတယ်လို့ ကိုမိုးလုံက ဆိုပါတယ်။

Chindwin Revolutionary Fighter နဲ့ မဟူရာဒေါင်မင်း ပြည်သူ့ကာကွယ်ရေးတပ်ဖွဲ့တွေရဲ့ စခန်းကို စစ်ကောင်စီတပ်က ဇန်နဝါရီ ၂၅ ရက် မနက်ပိုင်းမှာ မီးရှို့ဖျက်ဆီးခဲ့တာကြောင့် သိန်း ၈၀ ခန့်တန်ဖိုးရှိတဲ့ လက်နက်၊ ခဲယမ်းတွေ ဆုံးရှုံးသွားခဲ့တယ်လို့ သိရပါတယ်။

ယင်းမာပင်၊ ဖေဖော်ဝါရီ ၂‌၇၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်ဘက်ကို စစ်ကြောင်းထိုးဖို့လာတဲ့ စစ်ကောင်စီစစ်ကြောင်းကို မိုင်းခင်းဖို့ ပြင်နေတဲ့ PDF ရဲဘော် ၂ ဦးဟာ စစ်ကောင်စီစစ်ကြောင်းနဲ့ ထိပ်တိုက်တွေ့ပြီး မီးရှို့သတ်ဖြတ်ခံရတယ်လို့ တပ်ဖွဲ့ဝင်ထံမှ သိရပါတယ်။

ဖေဖော်ဝါရီ ၂၃ ရက်နေ့မှာ ယင်းမာပင်ပြည်သူ့ကာကွယ်ရေးတပ် ရိုးမဖိုက်တာ ခရိုင်တပ်ရင်း အမှတ် (၃၄) တပ်ဖွဲ့ဝင်ဖြစ်တဲ့ ရဲဘော်ချစ်ကောင်းစံ အသက် (၁၈) နှစ်နဲ့ ရဲဘော် အောင်ဇေယျ (ခ) မီးပွား အသက် (၂၁) တို့ဟာ စစ်ကောင်စီကို မိုင်းခင်းဖို့ စခန်းမှာ ဘတ်ထရီပြန်ယူနေစဉ် စစ်ကောင်စီစစ်ကြောင်းနဲ့ တိုးပြီး ဖမ်းဆီးခံခဲ့ရပါတယ်။

အဲဒီနောက် ဖေဖော်ဝါရီ ၂၄ ရက် မနက် ၁၀ နာရီလောက်မှာတော့ မီးရှို့ခံထားရတဲ့ ရဲဘော် ၂ ဦးရဲ့ ရုပ်အလောင်းကို ယင်းမာပင်မြို့နယ်ထဲက တာဝကျေးရွာ စာသင်ကျောင်းမှာ တွေ့ရှိခဲ့တယ်လို့ ရိုးမဖိုက်တာတပ်ရင်းမှူးက မြေလတ်အသံကို ပြောပါတယ်။

“အဖမ်းခံရတာကတော့ ရဲဘော် ၃ ဦးနဲ့ ရွာသားတွေလည်း ပါတယ်။ ရဲဘော်တဦးနဲ့ ရွာသားတွေကတော့ လွတ်သွားတယ်။ သူတို့ ၂ ဦးပဲ ကျန်ခဲ့တယ်။ ပထမတော့ တာဝရွာဘုန်းကြီးကျောင်းမှာ သူတို့ကို စစ်ဆေးပြီး ရိုက်နှက်တယ်။ ခဏနေတော့ ဘုန်းကြီးကျောင်းကနေ ထွက်သွားပြီး စာသင်ကျောင်းဘက်မှာ မီးရှို့သွားတယ်” လို့ ဆိုပါတယ်။

မီးရှို့ခံရတဲ့ ရဲဘော် ၂ ဦး ရဲ့ ရုပ်အလောင်းကို မိသားစုဝင်တွေထံ ပြန်လည်ပို့ဆောင်ပေးဖို့ကလည်း မိသားစုဝင်တွေက စစ်ရှောင်နေရတဲ့အတွက် မိမိတို့တပ်ဖွဲ့တွေကသာ မြေမြုပ် သဂြိုလ်ပေးလိုက်တယ်လို့လည်း ပြောပါတယ်။

ရဲဘော် ချစ်ကောင်းစံ နဲ့ ရဲဘော် အောင်ဇေယျ (ခ) မီးပွား ကို မီးရှို့သတ်ဖြတ်သွားတဲ့ စစ်ကောင်စီစစ်ကြောင်းဟာ အိမ်ခြေ ၆၀၀ ကျော်ရှိတဲ့ တာဝရွာက နေအိမ် ၂၀ ကျော်ကိုလည်း ဖေဖော်ဝါရီ ၂၄ ရက်နေ့ မနက်ပိုင်းမှာ တကြိမ် ဖေဖော်ဝါရီ ၂၅ ရက်နေ့ ညနေပိုင်းမှာ တကြိမ် ၂ ကြိမ်တိတိ မီးရှို့ဖျက်ဆီးသွားတယ်လို့ ဆိုပါတယ်။

စစ်ကိုင်း၊ ဇန်နဝါရီ ၂၈၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ် အခြေစိုက် Chindwin Revolutionary Fighter နဲ့ မဟူရာဒေါင်မင်း ပြည်သူ့ကာကွယ်ရေးတပ်ဖွဲ့တွေရဲ့ စခန်းကို စစ်ကောင်စီတပ်က ဇန်နဝါရီ၂၅ရက်မနက်ပိုင်းမှာ မီးရှို့ဖျက်ဆီးခဲ့တာကြောင့် သိန်း ၈၀ခန့်တန်ဖိုးရှိတဲ့ လက်နက်၊ခဲယမ်းတွေဆုံးရှုံသွားခဲ့တယ်လို့ သိရပါတယ်။

ဒါ့အပြင် အဆိုပါ စစ်ကြောင်းဟာ စခန်းကို မီးရှို့ဖျက်စီးခဲ့ပြီးနောက် ဇန်နဝါရီ၂၅၊၂၆ရက်နေ့တို့မှာ မြရိပ်ကျေးရွာကိုလည်း ဝင်ရောက်မီးရှို့ခဲ့တာကြောင့် ဘုန်းတော်ကြီးကျောင်းအပါအဝင် အိမ်ခြေ (၇၅)လုံးဆုံးရှူံးခဲ့ရပါသေးတယ်။

စခန်းမီးရှို့ခံလိုက်ရတဲ့ Chindwin Revolution army Fighter နဲ့ မဟူရာဒေါင်မင်း ပြည်သူ့ကာ ကွယ်ရေးတပ်ဖွဲ့တို့ဟာ တပ်စိပ်တခုတည်းဖြစ်သလို စခန်းတခုတည်းမှာအတူတူနေထိုင်ကြတဲ့ အဖွဲ့တွေဖြစ်ကြပါတယ်။