မြေလတ်အသံ

ရေတာရှည်၊ ဒီဇင်ဘာ ၂၆၊ ၂၀၂၅။

ပဲခူးတိုင်း၊ ရေတာရှည်မြို့နယ်၊ နှောပင်ကျေးရွာမှာ ပဲခင်းထဲသွားတဲ့ သက်ကြီးအမျိုးသား ၁ ဦး မိုင်းထိပြီး ခြေထောက်ပြတ်သွားတယ်လို့ ကူညီလုပ်ဆောင်ပေးခဲ့သူတွေဆီက သိရပါတယ်။

မိုင်းထိသူဟာ နှောပင်ကျေးရွာနေ အသက် ၆၇ နှစ်အရွယ် ဦးစံအေးဆိုသူဖြစ်ပြီး ဒီဇင်ဘာ၂၅ ရက် ညနေ ၄ နာရီခန့်မှာ ရွာပြင်ပဲခင်းထဲကိုသွားချိန် မြေမြုပ်မိုင်းထိခဲ့တာလို့ ဆိုပါတယ်။

“သူအိမ်ကနေ ပဲခင်းအသွားမှာထိတာ။ ရွာဝန်းကျင်မှာပဲထိတာ။ ခွဲစိတ်ဖို့ကတော့ ဒီနေ့မှလုပ်ရမယ်။ ထိတာကညာဘက်ခြေထောက်ပါ”လို့ ကူညီလုပ်ဆောင်ပေးခဲ့သူတဦးကပြောပါတယ်။

မိုင်းထိလို့ ဦးစံအေးမှာ ညာဘက်ခြေကျင်းဝတ်ကနေပြတ်ထွက်သွားပြီး ဆေးရုံရောက်လာချိန် အရေးပေါ်သွေးသွင်းကာ ပြတ်သွားတဲ့ခြေထောက်ကို ဒီဇင်ဘာ ၂၆ ရက် ဒီကနေ့မှာ ခွဲစိတ်မှုပြုလုပ်သွားဖို့ရှိနေပြီး လိုအပ်တဲ့ဆေးစစ်မှုတွေလည်းပြုလုပ်ရမယ်လို့ ဆိုပါတယ်။

မိုင်းထိတဲ့နေရာဟာ စစ်ကော်မရှင်တပ်နဲ့ တော်လှန်ရေးတပ်တွေဘက်က စစ်ရေးလှုပ်ရှားသွားလာနေတဲ့နယ်မြေဖြစ်တာကြောင့် ဘယ်အဖွဲ့ကထောင်ထားတဲ့မိုင်းဆိုတာမသိရသေးဘူးလို့ ဆိုပါတယ်။

ပြီးခဲ့တဲ့ မတ်လ ၂ ရက်ကလည်း ရေတာရှည်မြို့နယ်၊ ကျွန်းတောကုန်းကျေးရွာမှာ ပဲကောက်ထွက်တဲ့ ၁၂ အရွယ် Grade – 3 ကျောင်းသား မိုင်းထိပြီး ခြေထောက် ၂ ချောင်းပြတ်သွားတယ် သိရပါတယ်။

စာတည်း – လင်း

မြေလတ်အသံ၊ ဒီဇင်ဘာ ၂၄၊ ၂၀၂၅။

မကွေးတိုင်း၊ ငဖဲမြို့နယ်၊ အမ်း-ပဒါန်းလမ်းရှိ ရခိုင်ရိုးမပေါ်က နတ်ရေကန်တောင်ဗျူဟာစခန်းအနီးမှာ ရောက်ရှိနေတဲ့ ရှေ့တန်းစစ်ကြောင်းမှ စစ်ကော်မရှင်တပ်သား ၃ ဦး လက်နက်နဲ့အတူ ဘက်ပြောင်းလာခဲ့တယ်လို့ CDF-Asho က ဒီဇင်ဘာ ၂၄ ရက်မှာ သတင်းထုတ်ပြန်ပါတယ်။

နတ်ရေကန်တောင်ခြေအောက်ရှိ ပဇီကျေးရွာအနီးကို ရောက်ရှိနေတဲ့ စစ်ကော်မရှင်စစ်ကြောင်းက တပ်သား ၃ ဦးဟာ CDF-Asho နဲ့ ချိတ်ဆက်ပြီးတော့ ဒီဇင်ဘာ ၁၄ ရက်နဲ့ ၁၉ ရက်တို့မှာ ဘက်ပြောင်းခိုလှုံလာခဲ့တာလို့ ဆိုပါတယ်။

“(တပ်သား ၃ ဦး)က စခန်းကမဟုတ်ပါဘူး။ ပဇီရွာအနီး ရှေ့တန်းစစ်ကြောင်းကပါ။ (သူတို့ကို) မဖမ်းပါဘူး။ ကြိုတင်ဖုန်းဆက်ကြပြီးမှ ထွက်လာကြတာမျိုးပါ။ လက်ရှိတော့ လုံခြုံတဲ့စခန်းတနေရာကို ပို့ထားပေးပါတယ်” လို့ CDF-Asho မှတာဝန်ရှိသူတဦးက ပြောပါတယ်။

ဘက်ပြောင်းလာသူ ၃ ဦးမှာ ခလရ ၁၀ မှ တပ်သား ကိုသိန်းမော် အသက် ၃၃ နှစ်နဲ့ ကိုမြမင်းခိုင် ၂၈နှစ်၊ တပ်မ ၈၈မှ တပ်သားကိုမိုးကျော် ၃၃ နှစ်တို့ဖြစ်ပြီး ၎င်းတို့ကိုင်ဆောင်တဲ့ သေနတ် ၃ လက်နဲ့ ခဲယမ်း၊ ကျည်တွေ ယူဆောင်လာခဲ့တယ်လို့ သူကဆိုပါတယ်။

လက်ရှိမှာ အဲဒီတပ်သား ၃ ဦးကို လုံခြုံတဲ့ စခန်းတနေရာမှာ ထိန်းသိမ်းထားပြီး၎င်းတို့ မိသားစုတွေနဲ့ ဆက်သွယ်ပြီး ပြန်ပို့ပေးနိုင်ရေးအထိ လမ်းကြောင်းစီစဉ်ပေးဖို့ ပြင်ဆင်ထားတယ်လို့ အထက်ပါတာဝန်ရှိသူက ပြောပါတယ်။

အဆိုပါတပ်သား ၃ ဦးဟာ ရှေ့တန်းစစ်မြေပြင်မှာ အထက်တပ်မှူးတွေရဲ့ ဗိုလ်ကျအနိုင်ကျင့်တာ၊ ညှဉ်းပန်းနှိပ်စက်တာတွေကြောင့် တိုက်ခိုက်လိုစိတ်မရှိတော့ဘဲ အခုလိုထွက်ပြေးလာခဲ့ကြတာ ဖြစ်တယ်လို့လည်း ထွက်ဆိုထားကြောင်း သူကဆိုပါတယ်။

ပြီးခဲ့တဲ့ စက်တင်ဘာနဲ့ အောက်တိုဘာ ၂ လ အတွင်းမှာလည်း နတ်ရေကန်တောင်ဗျူဟာ စခန်းကုန်း တိုက်ပွဲမှ ထွက်ပြေးလာကြတဲ့ စစ်ကော်မရှင်တပ်သား ၆၆ ဦးကို CDF- Asho က ဖမ်းမိပြီး စစ်သုံ့ပန်းဥပဒေနဲ့အညီ ထိန်းသိမ်းထားတယ်လို့ သိရပါတယ်။

စာတည်း – လင်း

ဓါးထိုးသတ်ခံရတဲ့ အမျိုးသား ၁ ဦး ဓါးဒဏ်ရာတွေနဲ့လွတ်မြောက်လာ

မြင်းခြံ၊ ဒီဇင်ဘာ ၂၄၊ ၂၀၂၅။

မန္တလေးတိုင်း၊ မြင်းခြံမြို့နယ်၊ တလုပ်မြို့နဲ့ အိုင်းမရွာက နေအိမ် ၇၀၀ ကို စစ်ကော်မရှင်တပ်ဖွဲ့ဝင်တွေကမီးရှို့ပြီး အနည်းဆုံး ရွာခံ ၃ ဦးကိုလည်းပစ်သတ်ခဲ့တယ်လို့ မြင်းခြံအခြေစိုက် LPDF တခုရဲ့ တာဝန်ရှိသူဆီက သိရပါတယ်။

ဒီဇင်ဘာ ၂၁ ရက် မနက် ၈ နာရီခန့်မှာ တလုပ်မြို့မှာ စစ်ကော်မရှင်တပ်သားတွေက နေအိမ်တွေကို မီးရှို့ခဲ့တာကြောင့် မြို့တွင်းရှိနေအိမ် ၃၀၀ ခန့်မီးလောင်ပျက်စီးသွားတယ်လို့ ဆိုပါတယ်။

ဒါ့အပြင် ဒီဇင်ဘာ ၂၂ ရက်မှာလည်း မြင်းခြံမြို့နယ်မှာစစ်ကြောင်းထိုးနေတဲ့ အင်အား ၆၀ ကျော်ပါစစ်ကြောင်းဟာ အိုင်းမရွာထဲကိုဝင်ရောက်ကာ နေအိမ်တွေကိုမီးရှို့ပြီး ဒေသခံတွေကိုလည်းပစ်ခတ်ခဲ့တယ်လို့ မြင်းခြံအခြေစိုက် LPDF တခုရဲ့ တာဝန်ရှိသူဆီက သိရပါတယ်။

“တလုပ်မှာရှိတဲ့ စကမအဖွဲ့က တလုပ်ကိုရှို့တာက သက်သက်၊ အိုင်းမကိုဝင်လာတဲ့စစ်ကြောင်းက ရှို့တာက သက်သက်၊ အိုင်းမရွာကိုတော့ မနေ့ကထိ နေအိမ်တွေမကုန်မချင်းရှို့နေတာ”လို့ ဆိုပါတယ်။

၂၀၂၅ ဖေဖော်ဝါရီလပိုင်းမှာ တလုပ်မြို့သိမ်းဖို့အတွက် တော်လှန်ရေးတပ်တွေက သွားရောက် တိုက်ခိုက်ခဲ့ပြီးနောက်မှာ ဒေသခံတွေမြို့ပေါ်ကတိမ်းရှောင်ခဲ့ကြပြီး အဲ့ဒီအချိန်ကစလို့ မြို့ပေါ်မှာ စစ်ကော်မရှင်တပ်က တပ်စွဲထားတာလို့ ဆိုပါတယ်။

အိုင်းမရွာမှာ အိမ်ခြေ ၄၀၀ ခန့်ရှိပြီး စစ်ကော်မရှင်စစ်ကြောင်းက ၂ ရက်ဆက်မီးရှို့လို့ ရွာအတွင်းရှိ နေအိမ်အားလုံးနီးပါး မီးလောင်ပျက်စီးသွားပြီလို့ အထက်ပါတာဝန်ရှိသူက ပြောပါတယ်။

အိုင်းမရွာကိုဝင်ရောက်လာတဲ့ စစ်ကော်မရှင်စစ်ကြောင်းက ကျေးရွာအတွင်းတွေ့ရတဲ့ အသက် ၂၅ နှစ်အရွယ် လူငယ် ၁ ဦးရဲ့ ရင်ဘတ်ကို ဓားနဲ့ထိုးလည်ပင်းလှီးပြီး နောက်ထပ်အမျိုးသား ၃ ဦးကိုလည်း သေနတ်ကိုင်ဓာတ်ပုံရိုက်ပြီးနောက် ပစ်သတ်ခဲ့တယ်လို့ ဓားထိုးခံရပြီး ထွက်ပြေးလွတ်မြောက်လာသူရဲ့ ပြောပြချက်ကို အထက်ပါ LPDF တာဝန်ရှိသူက ပြန်ပြောပြပါတယ်။

“ရွာသား ၃ ယောက်ကို သေနတ်ကိုင်ခိုင်းပြီး ဓာတ်ပုံရိုက်ပစ်သတ်လိုက်တာကို လွတ်လာတဲ့ ကလေးပြောပြလို့သိရတယ်။ သူ့ကိုလည်း သတ်တာဘဲ။ ကလေးက သေချင်ယောင်ဆောင်ပြီး သူကံလည်းပါတော့ လွတ်လာတာ။ ဒဏ်ရာတွေနဲ့ဆိုတော့ နားလိုက် ပြေးလိုက်နဲ့ လွတ်လာတာ။ ကျနော်တို့ဆီက ပြည်သူအချို့လည်းရှိတော့ ကျနော်ဆီပို့ခိုင်းပြီး ဆေးရုံပို့ပေးခဲ့ရတာ”လို့ ပြောပါတယ်။

ထွက်ပြေးလွတ်မြောက်လာတဲ့ လူငယ်မှာ ရင်ဘတ်ကို ဓားနဲ့ ၃ ချက်ထိုးခံထားရပြီး လည်ပင်းကို ဓားနဲ့ ၁ ချက်လှီးခံထားရတယ်လို့ ဆိုပါတယ်။

ပစ်သတ်ခံရတဲ့ အမျိုးသား ၃ ဦးအပြင် နောက်ထပ်ရွာခံအချို့လည်း ဖမ်းဆီးသတ်ဖြတ်ခံထားရတယ်လို့ သတင်းရထားပေမယ့် စစ်ကော်မရှင်စစ်ကြောင်းက ကျေးရွာထဲရှိနေတာကြောင့် နယ်မြေမရှင်းလင်းနိုင်သေးတဲ့အတွက် အတည်မပြုနိုင်သေးဘူးလို့ ဆိုပါတယ်။

စစ်ကြောင်းဝင်မီးရှို့နေလို့ အိုင်းမ၊ မြို့ကြီးကုန်း၊ မြောက်ရွာ၊ ရဲတိုင်၊ ကျောက်ဖြူကန်ကျေးရွာတွေက ဒေသခံပြည်သူ ၅,၀၀၀ ကျော်ထွက်ပြေးနေရပါတယ်။

ဩဂုတ် ၈ ရက်ကလည်း မြင်းခြံမြို့နယ်၊ ဗလုံကျေးရွာကို စစ်ကော်မရှင်စစ်ကြောင်းထိုးလာပြီး လက်နက်ကြီးနဲ့ပစ် မီးရှို့လို့ စစ်ရှောင် ၃ ဦးဒဏ်ရာရပြီး နေအိမ် ၁၀၀ ကျော်မီးလောင်ပျက်စီးခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ ဒီဇင်ဘာ ၂၄၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ ငါးပတ်ချောင်းကျေးရွာကို ဒီဇင်ဘာ ၂၃ ရက်ညနေ ၄ နာရီကျော်မှာ စစ်ကော်မရှင်တပ်က လေယာဥ်နဲ့ဗုံးကြဲတိုက်ခိုက်ခဲ့တာကြောင့် သက်ကြီးပိုင်းအမျိုးသမီး ၂ ဦးအပါအဝင် ရွာခံ ၄ ဦး သေဆုံးခဲ့တယ်လို့ ဒေသခံတွေက ပြောပါတယ်။

ငါးပတ်ချောင်းရွာကို တိုက်ခိုက်ရေးလေယာဥ် ၁ စီးနဲ့ ပေါင် ၂၀၀ ဗုံးသီး ၃ လုံးကြဲချခဲ့တာကြောင့် အသက် ၈၀ အရွယ် ဒေါ်သန်းမြ၊ ၇၅ နှစ်အရွယ် ဒေါ်ကျင်၊ ၂၅ နှစ်အရွယ် ကိုမင်းသန့်နဲ့ အမျိုးသား ၁ ဦးတို့ သေဆုံးပြီး နောက်ထပ်ဒေသခံ ၇ ဦးဒဏ်ရာရရှိခဲ့တယ်လို့ ဆိုပါတယ်။

“ပွဲချင်းပြီး ၃ ယောက်၊ ဆေးရုံ ၁ ယောက် ဆုံးတာ။ ရွာရဲ့အနောက်ဖျား ဘုရားကုန်းရဲ့ အရှေ့ဖက်နားက အိမ်ကို အကြောင်းမဲ့သက်သက် ချသွားတာဗျ။ ဘာတိုက်ပွဲမှမရှိဘူးဗျ “လို့ ဝက်လက်ဒေသခံ အမျိုးသားတဦးက ပြောပါတယ်။

ဒဏ်ရာရရှိသူ ၇ ဦးဟာ ဂျွန်ကိုချစ် ၁၈ နှစ်၊ ထက်အာကာ ၁၆ နှစ်၊ မင်းခန့်ဇင် ၁၈ နှစ်၊ ယဥ်မွန်ဝင်း ၁၇ နှစ်၊ အောင်ခိုင်ထွန်း ၃၀ နှစ်နဲ့ အချက်အလက်စုံစမ်းနေဆဲ ဒေသခံ ၂ ဦးတို့ဖြစ်ပြီး ၎င်းတို့ဟာ ဆေးကုသမှု ခံယူနေရတာကြောင့် အသက်အန္တရာယ်မစိုးရိမ်ရတော့ဘူးလို့ သူကဆိုပါတယ်။

ဗုံးကြဲမှုကြောင့် ငါးပတ်ချောင်းရွာရှိ ဘုရားကုန်းပျက်စီးမှုရှိပြီး လူနေအိမ် ၄ လုံးနဲ့ ကား ၃ စီး မီးလောင်ပျက်စီးခဲ့သလို နွား ၁ ကောင်လည်း သေဆုံးခဲ့တယ်လို့ သိရပါတယ်။

ပြီးခဲ့တဲ့ဒီဇင်ဘာ ၁၃ ရက်ည ၉ နာရီကျော်မှာလည်း ဝက်လက်မြို့နယ်၊ ထုံးဘိုကျေးရွာနဲ့ ရှားကွဲကျေးရွာကြားရှိ စစ်ရှောင်တွေနေတဲ့လမ်းဘေးနေရာကို တိုက်ခိုက်ရေးလေယာဥ် ၂ စီးနဲ့ ဗုံးကြဲချခဲ့တာကြောင့် စစ်ရှောင်ကလေးငယ် ၁ ဦးအပါအဝင် ၄ ဦးသေဆုံးခဲ့ပြီး ၁၅ ဦးဒဏ် ရာရရှိခဲ့ပါသေးတယ်။

စာတည်း – လင်း

မြေလတ်အသံ၊ ဒီဇင်ဘာ၂၃၊ ၂၀၂၅။

စစ်ကိုင်းတိုင်း(အထက်ပိုင်း) ကလေး၊ ဗန်းမောက်နဲ့ ကောလင်းမြို့နယ်တွေကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သား ၁ ဦး သေဆုံးပြီး ၁၃ ဦး ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။

ကလေးမြို့နယ်တောင်ပိုင်း၊ ရှားဖိုကျေးရွာကို ဒီဇင်ဘာ ၂၂ ရက် ယမန်နေ့ ညနေ ၅ နာရီကျော်မှာ မှန်တောရွာစစ်တပ်အထိုင်စခန်းကနေ ဒရုန်း ၁ စီးနဲ့ ဗုံးသီးကြဲချတိုက်ခိုက်ခဲ့ရာ အသက် ၃၄ နှစ်အရွယ် အမျိုးသမီး ၁ ဦးသေဆုံးပြီး အမျိုးသား ၁ ဦး ဒဏ်ရာရရှိခဲ့တယ်လို့ ကလေးဒေသခံတော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

” ကလေးတောင်ပိုင်းမှာက ထိတွေ့တိုက်ပွဲက နေ့တိုင်းလိုလိုရှိနေတာ။ မှန်တောရွာမှာက ပျူတွေနဲ့ ** တွေ စခန်းချနေတာ။ အဲ့ရွာအနီးမှာဘဲ ရှားဖိုရွာရှိတာ။ သေဆုံးသူနဲ့ ဒဏ်ရာရသူတွေက ရွာကနေမထွက်ပဲ အိမ်စောင့်ကျန်နေတဲ့သူတွေလို့သိရတယ်” လို့ သူက ပြောပါတယ်။

အလားတူ ဒီဇင်ဘာ ၂၁ ရက် ည ၈ နာရီမှာ ဗန်းမောက်မြို့နယ်အနောက်ခြမ်း နားပင်ကျေးရွာဘုန်းကြီးကျောင်းကို တိုက်လေယာဥ် ၁ စီးနဲ့ ဗုံးကြဲတိုက်ခိုက်ခဲ့ရာ ကျောင်းအတွင်းကျရောက်ပေါက်ကွဲပြီး သံဃာ ၁ ပါးအပါ အမျိုးသား၊ အမျိုးသမီး ၆ ဦးဒဏ်ရာရရှိခဲ့တာပါ။

” တိုက်ပွဲမဖြစ်ဘူးဗျ။ အဲ့နေရာကတော်လှန်ရေးတပ်က ထိန်းချုပ်ထားတာ။ အကြောင်းမဲ့လာကြဲတာ။ ၆ ယောက်မှာ ၄ ယောက်က ဒဏ်ရာပြင်းတယ်ဗျ။ ဗုံးသီးက ရေကန်နားမှာကျသွားတာ။ ဘုန်းကြီးကျောင်းလည်း တဝက်တပျက် ပျက်စီးသွားတယ်” လို့ ဗန်းမောက်ဒေသခံအမျိုးသားတဦးက ပြောပါတယ်။

ဒါ့အပြင် ဒီဇင်ဘာ၂၂ ရက် ညနေ ၅ နာရီကျော်မှာ ကောလင်းမြို့နယ်၊ နတ်အင်းကျေးရွာ စာသင်ကျောင်းကို တိုက်လေယာဥ်နဲ့ ဗုံးကြဲတိုက်ခိုက်ခဲ့ရာ အမျိုးသား ၄ ဦး၊ အမျိုးသမီး ၂ ဦး ဒဏ်ရာရရှိခဲ့တယ်လို့ ဆိုပါတယ်။

“နွားတကောင်တော့ ပွဲချင်းပြီးသေတယ်။ စာသင်ကျောင်းခြံထဲမှာကျတာဗျ။ ကျောင်းကတော့ပျက်စီးသွားတယ်။ ဒဏ်ရာရတဲ့သူတွေက ကျောင်းအနီးမှာနေကြတဲ့ အိမ်ကလူတွေရသွားတာ။ ကျောင်းကပိတ်ထားတာ” လို့ ကောလင်းဒေသခံအမျိုးသားတဦးက ပြောပါတယ်။

ဒဏ်ရာရသူ ၆ ဦးမှာ စာသင်ကျောင်းအနီးနေထိုင်တဲ့ နတ်အင်းရွာခံ ဦးမြင့်ဝင်း၊ ဦးကျော်ပိုင်ဦး၊ ဦးစိုးသူအောင်၊ ဦးအောင်မျိုးသူ၊ ဒေါ်အေး၊ ဒေါ်နှင်းမိုးအေး တို့ ၆ ဦးဖြစ်တယ်လို့ သိရပါတယ်၊

ပြီးခဲ့တဲ့ဒီဇင်ဘာ ၇ ရက်ကလည်း ဗန်းမောက်မြို့နယ်တောင်ပိုင်း၊ သုံးမြေဆုံရွှေလုပ်ကွက်ကို တိုက် လေယာဥ်နဲ့ ဗုံးကြဲတိုက်ခိုက်ခဲ့ရာ အမျိုးသား ၁ ဦးသေဆုံးပြီး ၅ ဦးဒဏ်ရာရရှိခဲ့ပါတယ်။

စာတည်း – ဟိန်းစံ