မြေလတ်အသံ

မြောင်၊ မတ် ၂၄၊ ၂၀၂၆။

စစ်ကိုင်းတိုင်း၊ မြောင်မြို့နယ်၊ သောင်ကြီးကျေးရွာမှာ စစ်ကော်မရှင်တပ်က လေကြောင်းကဗုံးကြဲတာကြောင့် ၆ ဦးသေဆုံးပြီး ၂၀ ကျော်ဒဏ်ရာရတယ်လို့ နဘတ်တိုက်နယ်ပကဖ တာဝန်ရှိသူဆီက သိရပါတယ်။

မတ်လ ၂၃ ရက် မနက် ၁၂ နာရီခန့်မှာ ဂျက်ဖိုက်တာ ၁ စီးနဲ့ရွာထဲကို ဗုံး ၄ လုံးကြဲချခဲ့ရာ ရွာလယ်ပိုင်းရှိနေအိမ်တွေပေါ် ကျရောက်ပေါက်ကွဲခဲ့တာလို့ ဆိုပါတယ်။

“၄ လုံးက ရွာလယ်ခေါင် ၁ နေရာတည်းကျတာ။ ထိခိုက်သေဆုံးများတယ်။ ခုမနက်တင် ရှာရဦးမှာ။ အဲ့ထဲအသေပျောက်တွေ ရှိဦးမှာ။ ဘာပွဲမှမရှိဘူး။ ပြည်သူနေအိမ်ပေါ်ကျတာ။ အိမ်ခြေတွေကလည်း စိပ်တာဆိုတော့ မီးလောင်လို့ အိမ်ပျက်တာများတယ်”နဘတ်တိုက်နယ်ပကဖတာဝန်ရှိသူက ပြောပါတယ်။

ဗုံးကြဲခံရတာကြောင့် အသက် ၆ နှစ်အရွယ် ယောကျ်ားလေး ၁ ဦးအပါအဝင် အသက် ၄၀ ကနေ ၅၀ ကြား အမျိုးသမီး ၃ ဦး၊ အမျိုးသား ၂ ဦး နေရာမှာတင်သေဆုံးကာ ကလေးငယ်တွေအပါအဝင် ဒဏ်ရာရသူ ၂၀ ကျော်ရှိတယ်လို့ ကနဦးသိထားရပြီး ထိခိုက်သေဆုံးသူ အရေအတွက်ပိုများနိုင်သေးတယ်လို့ ဆိုပါတယ်။

ဒါ့အပြင် နွားအကောင် ၂၀ ကျော်သေဆုံးပြီး အိမ်ခြေ ၅၀ ကျော်မီးလောင်ပျက်စီးထားတယ်လို့ သိရပါတယ်။

သောင်ကြီးရွာမှာ အိမ်ခြေ ၁,၀၀၀၊ လူဦးရေ ၄,၀၀၀ ခန့်ရှိပြီး ဒေသခံအများစုက ဘေးလွတ်ရာကို ထွက်ပြေးတိမ်းရှောင်နေကြရတယ်လို့ ဆိုပါတယ်။

မတ်လ ၂၀ ရက်ကလည်း မြောင်မြို့နယ်၊ နဘတ်ရွာမှာ လေကြောင်းကနေ ဗုံးကြဲခံရလို့ ရက်သားကလေးငယ်အပါအဝင် ၃ ဦးသေဆုံး ၁၂ ဦးဒဏ်ရာရရှိခဲ့ပါသေးတယ်။

စာတည်း – လင်း

မင်းလှ၊ မတ် ၂၃၊ ၂၀၂၆။

ပဲခူးတိုင်း၊ မင်းလှမြို့နယ်မှာ စစ်ကော်မရှင်လက်အောက် ရပ်ကျေးအုပ်ချုပ်ရေးမှူး ၁ ဦး သေနတ်ပစ်ခံရပြီး သေဆုံးခဲ့တယ်လို့ ရွှေတန်းမြေပြည်သူကာကွယ်ရေးတပ်ဖွဲ့တာဝန်ရှိသူတွေထံက သိရပါတယ်။

သေဆုံးသူဟာ မင်းလှမြို့နယ်၊ ဝက်လှကြီးကျေးရွာအုပ်ချုပ်ရေးမှူး အသက် ၄၅ နှစ်အရွယ် ဦးအောင်ကျော်မိုးဆိုသူဖြစ်ပြီး ၎င်းကို မတ်လ ၂၂ ရက် ယမန်နေ့ ညနေ ၄ နာရီခန့်မှာ နေအိမ်အတွင်းအထိဝင်ရောက်ပစ်ခတ်ခဲ့တာလို့ ဆိုပါတယ်။

” သူက ထွေအုပ်ကပြန်တာလား စစ်ကွင်းတာဆုံဂိတ်က ပြန်လာတာလားတော့ မသိဘူး။ သူပြန်လာတဲ့အချိန်ကို ရဲဘော်တွေက သွားစောင့်တာ။ သူကအိမ်ကိုရောက်နှင့်နေတုန်းပဲရှိသေးတယ်။ လွယ်အိတ်တွေတောင်မချရသေးဘူး။ အဲ့ဒီအချိန်မှာရဲဘော်တွေက သူ့နာမည်ခေါ်ပြီးဝင်သွားချိန် ထွက်ပြေးဖို့လုပ်လို့ ၂ ချက်ပစ်ခတ်ခဲ့တာ”လို့ ရွှေတန်းမြေပြည်သူ့ကာကွယ်ရေးတပ်ဖွဲ့တာဝန်ရှိသူက မြေလတ်အသံကို ပြောပါတယ်။

သေဆုံးသူ ဦးအောင်ကျော်မိုးဟာ ဝက်လှကြီးကျေးရွာအုပ်ချုပ်ရေးမှူးအဖြစ်လုပ်ကိုင်တာ ၃ လသာ ရှိသေးပြီး ယခင်ဝက်လှကြီးကျေးရွာအုပ်ချုပ်ရေးမှူးက ကျန်းမာရေးမကောင်းတာကြောင့် အနားယူသွားလို့ အစားထိုးဝင်ရောက်လာတာလို့ ဆိုပါတယ်။

ဦးအောင်ကျော်မိုးဟာ အုပ်ချုပ်ရေးမှူးမဖြစ်ခင်ကတည်းက စစ်ကော်မရှင်တပ်၊ အထွေထွေအုပ်ချုပ်ရေးဌာနတွေနဲ့နီးစပ်သူဖြစ်ပြီး အုပ်ချုပ်ရေးမှုးဖြစ်လာပြီးနောက် စစ်မှုထမ်းကြေးအတင်းအဓမ္မတောင်းခံတာ၊ တောင်းခံလို့မရရင်ဖမ်းဆီးမှုတွေလုပ်ဆောင်မယ်လို့ ခြိမ်းခြောက်မှုတွေရှိလာကြောင်း တိုင်ကြားလာလို့ ပစ်ခတ်ရှင်းလင်းခဲ့တာလို့ သိရပါတယ်။

သေနတ်နဲ့အနီးကပ်ပစ်ခံရလို့ ဦးအောင်ကျော်မိုးမှာ နေရာမှာသေဆုံးသွားပြီး ၎င်းထံကနေ နိုင်ငံသားစိစစ်ရေးကတ်၊ ယာဥ်မောင်းလိုင်စင်၊ စစ်မှုထမ်းကြေးကောက်ယူထားတဲ့စာရွက်စာတမ်းတွေ သိမ်းဆည်း ရရှိခဲ့ကာ ပစ်ခတ်မှုဖြစ်ပြီးနောက် ရန်ကုန်-ပြည်လမ်း စစ်ကွင်းတာဆုံဂိတ်တာဝန်ကျ စစ်ကော်မရှင်တပ်ဖွဲ့ဝင်တွေလာရောက်စစ်ဆေးမှုပြုလုပ်ခဲ့တယ်လို့ သိရပါတယ်။

မတ်လ ၁၄ ရက်ကလည်း မင်းလှမြိုနယ်၊ ဘုရားကွင်းကျေးရွာနေ ပျူစောထီးအဖွဲ့ဝင် ဦးရဲထွန်းဆိုသူဟာ နေအိမ်မှာရှိနေချိန် သေနတ်နဲ့ပစ်ခတ်ခံရပြီး သေဆုံးသွားတယ်လို့ သိရပါတယ်။

မြောင်၊ မတ် ၂၁၊ ၂၀၂၆။

စစ်ကိုင်းတိုင်း၊ မြောင်မြို့နယ်၊ နဘတ်ရွာမှာ လေကြောင်းကနေ ဗုံးကြဲခံရလို့ ရက်သားကလေးငယ်အပါအဝင် ၃ ဦးသေဆုံးပြီး ၁၂ ဦးဒဏ်ရာတယ်လို့ နဘတ်တိုက်နယ်ပြည်သူ့ကာကွယ်‌ရေးတပ်ဖွဲ့တာဝန်ရှိသူဆီက သိရပါတယ်။

မတ်လ ၂၀ ရက်မနက် ၁၁ နာရီခန့်မှာ စစ်ကော်မရှင်က ဂျက်ဖိုက်တာနဲ့ ၂ ကြိမ်ဗုံးကြဲခဲ့ရာ ရွာအလယ်ပိုင်းရှိနေအိမ်တွေနဲ့လမ်းပေါ်ကို ကျရောက်ပေါက်ကွဲခဲ့တာလို့ ဆိုပါတယ်။

“ရွာနား တိုက်ပွဲမဖြစ်တာ ၂ နှစ်ကျော်ပြီ။ ဘယ်အဖွဲ့အစည်းမှလည်း ရွာထဲမနေဘူး။ ကျတဲ့အိမ်ပေါ်ဆို ရှေးတိုက်ကြီး။ ကျနော်တို့တောင်မမီဘူး(မမွေးခင်ကမရှိဘူး)။ အဲ့တိုက်ဆို ဘာမှသုံးမရတော့ဘူး။ သေတဲ့ကလေးဆို အမည်တောင်မပေးရသေးဘူး ၆ ရက်ပဲရှိသေးတယ်။ ၁ ယောက်ဆို မြင်းမူကနေရွာထဲပလုံလာဝယ်တာကနေ လမ်းပေါ်မှာ ထိပြီးသေတယ်။ အိမ်ထဲသေတာက အဖွားနဲ့ကလေးပါ”လို့ နဘတ်တိုက်နယ်ပကဖတာဝန်ရှိသူက ပြောပါတယ်။

ဗုံးထိမှန်တာကြောင့် အသက် ၆ ရက်အရွယ် ယောက်ျားလေး ၁ ဦး၊ အသက် ၇၇ နှစ်အရွယ် အဖွား ၁ ဦး၊ အသက် ၄၀ အရွယ် အမျိုးသမီး ၁ ဦးတို့ နေရာမှာတင်သေဆုံးခဲ့တယ်လို့ ဆိုပါတယ်။

ဒါ့အပြင် အသက် ၁၀ နှစ်အောက် ကလေး ၃ ဦးအပါအဝင် ကျား၊ မ စိစစ်နေဆဲ စုစုပေါင်း ၁၂ ဦးရှိပြီး ဒဏ်ရာရသူတွေထဲမှာ သေဆုံးကလေးငယ်ရဲ့မိခင်နဲ့ သေဆုံးအမျိုးသမီးရဲ့ ယောက်ျားတို့ပါဝင်ပြီး ဒဏ်ရာပြင်းထန်ရထားကာ နေအိမ် ၉ လုံးပျက်စီးခဲ့ပါတယ်။

ဗုံးကြဲခံရတဲ့ နဘတ်ကျေးရွာဟာ အိမ်ခြေ ၁၄၀၀ ကျော်ရှိတဲ့ ကျေးရွာဖြစ်ပြီး ဗုံးကြဲခံရပြီးနောက် ရွာလယ်ပိုင်းနေ ပြည်သူ ၅၀၀ ကျော်လောက်ဘေးလွတ်ရာရွှေ့ပြောင်းနေထိုင်နေကြပါတယ်။

မတ်လ ၁၈ ရက်ကလည်း မင်းကင်းမြို့နယ်၊ ရွာဘရွာနဲ့မြောက်ချွန်းကျေးရွာအကြား ရွှေမျောတွေကို ဗုံးကြဲခံရလို့ ၁ ဦးသေဆုံး ၃ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ရေတာရှည်၊ မတ် ၂၁၊ ၂၀၂၆။

ပဲခူးတိုင်း၊ ရေတာရှည်မြို့နယ်၊ ကြို့ပင်သာကျေးရွာတောင်ဘက် ရေနုတ်မြောင်းအနီးမှာ အင်ဖက်ကောက် ထွက်တဲ့ အသက် ၁၂ အရွယ် မိန်းကလေးငယ် ကင်းပုန်းဝပ်နေတဲ့ စစ်ကော်မရှင်တပ်တွေရဲ့ ပစ်ခတ်မှု ကြောင့်သေဆုံးသွားတယ်လို့ ကျေးရွာနဲ့နီးစပ်သူတွေဆီက သိရပါတယ်။

ပစ်ခတ်ခံရသူဟာ သပြေကုန်းရွာမှာနေထိုင်သူ အသက် ၁၂ နှစ်အရွယ် မသဲနုခိုင်ဖြစ်ပြီး မတ်လ ၂၀ ရက် မနက် ၅ နာရီခန့်မှာ သပြေကုန်းကျေးရွာနေ ၂ မိုင်ခန့်အကွာ ကြို့ပင်သာကျေးရွာဘက် မိသားစုဝင် ၄ ဦးနဲ့အတူ အင်ဖက်ကောက်ဖို့သွားရာမှ ပစ်ခတ်ခံရတာလို့ ဆိုပါတယ်။

“ဖက်ကောက်သွားတာကို ပစ်သတ်လိုက်တာ။ မရှိဆင်းရဲတဲ့အခါကျတော့ အင်ဖက်ကောက်စားတာပေါ့။ ရွာကထွက်သွားကြတာက မနက် ၄ နာရီလောက်ကထွက်သွားကြတာ။ ကြို့ပင်သာရွာတောင်ဘက်ကျတော့ မအေ(အမေ)လုပ်သူ ဒေါ်စံပယ်ဦးနဲ့သမီးလုပ်တဲ့သူ ၄ ဦးသွားတာကို စကစအဖွဲ့တွေက ပစ်လိုက်တာ။ ကင်းပုန်းနဲ့ တိုးပြီးပစ်ခံရတာ။ ပစ်ခံရတော့ မအေ(အမေ)လုပ်သူက ကုန်းအော်တော့ စကစအဖွဲ့က ထွက်သွားတယ်”လို့ ကျေးရွာနဲ့နီးစပ်သူတဦးက ပြောပါတယ်။

သေနတ်နဲ့ပစ်ခံရတဲ့ဒဏ်ကြောင့် မသဲနုခိုင်မှာ ပွဲချင်းပြီးသေဆုံးခဲ့ပြီး အလောင်းကိုတော့ မိသားစုဝင်တွေက ရွာကိုပြန်သယ်ကာ နာရေးကို ကျေးရွာရဲ့ထုံးစံအရ မတ်လ ၂၁ ရက်မှာ သင်္ဂြိုဟ်သွားမယ်လို့ သိရပါတယ်။

ပစ်ခတ်ခံရတဲ့နေရာဟာ ရန်ကုန်-မန္တလေး အမြန်လမ်းနဲ့နီးကပ်ပြီး စစ်ကော်မရှင်တပ်တွေ မကြာခဏဆိုသလို ကင်းပုန်းဝပ်နေတတ်တဲ့နေရာဖြစ်တယ်လို့ ဆိုပါတယ်။

ဖေဖော်ဝါရီ ၂၈ ရက်ကလည်း ရေတာရှည်မြို့နယ်၊ မရိုးခုံကျေးရွာအနီးမှာ စစ်ကော်မရှင်စစ်ကြောင်းနဲ့တွေ့တဲ့ PDF ၁ ဦးနဲ့ ပြည်သူ ၁ ဦးဖမ်းဆီးသတ်ဖြတ်ခံရလို့ သိရပါတယ်။

စာတည်း – လင်း

မြေလတ်အသံ၊ မတ် ၂၀၊ ၂၀၂၆။

မန္တလေးတိုင်းနဲ့ ပဲခူးတိုင်းမှာ PDF ၅၀၀ ကျော် ဘက်ပြောင်းလာတယ်လို့ စစ်ကော်မရှင်ဝါဒဖြန့် ရုပ်သံလိုင်းရဲ့ ထုတ်ပြန်ကြေညာချက်တွေအရ သိရပါတယ်။

မတ်လ ၂၀ ရက်မှာ ပဲခူးတိုင်းအတွင်းကနေ ဘက်ပြောင်းလာတဲ့ PDF အမျိုးသား ၂၁ ဦးနဲ့ အမျိုးသမီး ၁ ဦးတို့ကို လက်ခံကြိုဆိုမှုနဲ့ ထောက်ပံကြေးငွေပေးအပ်ပွဲကို တောင်ပိုင်းတိုင်းစစ်ဌာနချုပ်အတွင်းမှာ ပြုလုပ်ခဲ့ပြီး သူတို့နဲ့အတူ သေနတ် ၁၃ လက်၊ လက်ပစ်ဗုံး ၃ လုံး၊ ခဲယမ်းတွေလည်းပါဝင်တယ်လို့ ဆိုထားပါတယ်။

ဒါ့အပြင် မတ်လ ၁၉ ရက်ကလည်း မန္တလေးတိုင်းအတွင်းမှာရှိတဲ့ PDF ၊ TNLA၊ AA နဲ့ လက်နက်ကိုင်အဖွဲ့အမျိုးမျိုးက အလင်းဝင်ရောက်လာတဲ့သူ ၅၀၀ ကျော်ကို အလယ်ပိုင်းတိုင်းစစ်ဌာနချုပ်မှာ ကြိုဆိုပွဲ ပြုလုပ်ခဲ့ပြီး မိဘအုပ်ထိန်းသူတွေဆီကို ပြန်လည်အပ်နှံတဲ့အခမ်းအနား ပြုလုပ်ခဲ့တယ်လို့ သိရပါတယ်။

မတ်လ ၁၈ ရက်မှာ ရေတာရှည်အခြေစိုက် မြေလတ်ဗမာအဖွဲ့က မိုင်းတာဝန်ရှိသူဒေါင်းနီဆိုသူဟာ သေနတ် ၂ လက်၊ ဆိုင်ကယ်နဲဖုန်းအချို့ကိုယူပြီး စစ်ကော်မရှင်တပ်ဆီ ဘက်ပြောင်းသွားတဲ့ဖြစ်စဥ် ရှိခဲ့တယ်လို့ သိရပါတယ်။

ဘက်ပြောင်းလာသူတွေဆီကနေ လက်နက် ၁၀၀ ဝန်းကျင်၊ ခဲယမ်း ၆၀၀၀ ကျော်၊ အလင်းဝင်ရောက်လာသူ အမျိုးသား ၄၅၃ ဦး၊ အမျိုး သမီး ၅၃ ဦး စုစုပေါင်း ၅၀၆ ဦးတို့ဖြစ်တယ်လို့ စစ်ကော်မရှင်ရဲ့ ထုတ်ပြန်ချက်တွေအရ သိရပါတယ်။

ချောင်းဦး၊ မတ် ၂၀၊ ၂၀၂၆။

စစ်ကိုင်းတိုင်း၊ ချောင်းဦးမြိုနယ်၊ ငါးယှန်ကျေးရွာကို စစ်ကော်မရှင်တပ်ကမီးရှို့ခဲ့တာကြောင့် အိမ်ခြေ ၁၃၀ ကျော်မီးလောင်ပျက်စီးခဲ့တယ်လို့ ချောင်းဦးမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

မတ်လ ၁၉ ရက်မနက် ၇ နာရီလောက်မှာ ငါးယှန်ရွာအတွင်း အင်အား ၅၀ ကျော်နဲ့အထိုင်ချထားတဲ့ စစ်ကော်မရှင်အဖွဲ့တွေက ရွာထဲကနေအိမ်တွေကိုမီးရှို့ခဲ့တာလို့ ဆိုပါတယ်။

“ရွာထိပ်စာသင်ကျောင်းဘေးမှာကို အထိုင်ချထားတာရှိတယ်။ ဟန်သစ်ဆီဆိုင်ဝန်းကျင်ကအိမ်တွေကို မီးရှို့တာ။ နွေရာသီဆိုတော့ လေတွေလည်းတိုက်နေတာနဲ့ မနေ့ကတည်းကလောင်တဲ့မီးက ဒီမနက်ထိ လောင်နေတုန်း”လို့ ချောင်းဦးပကဖတာဝန်ရှိသူတဦးက ပြောပါတယ်။

ငါးယှန်ကျေးရွာမှာ ၂၀၂၄ အတွင်း စစ်ကော်မရှင်စစ်ကြောင်းတွေအထိုင်လာချပြီးကတည်းက ဒေသခံတွေဟာ ဘေးလွတ်ရာမှာ ထွက်ပြေးတိမ်းရှောင်နေကြတာကြောင့် မီးရှို့ချိန်မှာ ရွာခံတွေမရှိကြဘူးလို့ ဆိုပါတယ်။

ငါးယှန်ရွာမှာ အိမ်ခြေ ၁,၀၀၀ ကျော်ရှိပြီး စစ်ကော်မရှင်တပ်သားတွေအထိုင်လာချပြီးကတည်းက ကျေးရွာနေအိမ်တွေကိုမီးရှို့တာ ၁၀ ကြိမ်ခန့်ရှိပြီဖြစ်ကာ အိမ်ခြေထက်ဝက်ကျော် မီးလောင်ပျက်စီးထားတယ်လို့ သိရပါတယ်။

မတ်လ ၁၀ ရက်ကလည်း စစ်ကိုင်းတိုင်း၊ ဝက်လက်မြို့နယ်၊ ငါးဘတ်ချောင်းကျေးရွာကို စစ်ကော်မရှင်စစ်ကြောင်းဝင်သွားပြီးနောက် မီးရှို့သတ်ဖြတ်ခံထားရတဲ့ အမျိုးသမီးအလောင်း ၁ လောင်းတွေ့ရှိခဲ့ကာ နေအိမ် ၆ လုံးလည်း မီးလောင်ပျက်စီးခဲ့တယ်လို့ သိရပါတယ်။

စာတည်း – လင်း