မြင်းခြံ

မြင်းခြံ၊ နိုဝင်ဘာ ၅၊ ၂၀၂၅။

မန္တလေးတိုင်း၊ မြင်းခြံမြို့နယ်၊ လယ်သစ်ကျေးရွာရှိ ပူးပေါင်းစစ်ဆေးရေးဂိတ်ကို ဝင်ရောက်စီးနင်းတိုက်ခိုက်ခဲ့တယ်လို့ Zero ပြောက်ကျားတပ်မဟာ မြင်းခြံခရိုင် တပ်ရင်း ၇ ဆီက သိရပါတယ်။

မြင်းခြံအခြေစိုက် ခမရ ၁၅ နဲ့ ၂ မိုင်အကွာရှိ စစ်ကော်မရှင်တပ်၊ ရဲနဲ့ ပျူစောထီးပူးပေါင်းတပ်ဖွဲ့အင်အား ၅၀ ဦး ခန့်တပ်စွဲနေတဲ့ အဲ့ဒီစစ်ဆေးရေးဂိတ်ကို နိုဝင်ဘာ ၄ ရက် မနေ့ နေ့လယ် ၂ နာရီမှာ စီးနင်းတိုက်ခိုက်ခဲ့တာဖြစ်ပြီး တိုက်ပွဲဖြစ်ပွားချိန် မိနစ် ၂၀ ခန့်ကြာမြင့်ခဲ့တယ်လို့ ဆိုပါတယ်။

” မီတာ ၁၀၀ လောက်အကွာကနေ ပစ်ခတ်နိုင်ခဲ့တယ်။ ဘန်ကာအတွင်း ပြေးဝင်ပုန်းတာကို ကျနော်ရဲ့ ရဲဘော် ပေါ့ဘာက RPG နဲ့ပစ်ခတ်ခဲ့ရာ ဘန်ကာထိမှန်ခဲ့ပြီး လွှင့်စင်ပြီးအထိနာခဲ့တယ်။ ကျနော်တို့ ခွာစစ်ဆင်တဲ့အခါမှာလည်း ဒလန် ၂ ဦးကို ဖမ်းဆီးနိုင်ခဲ့တယ်” လို့ Zero ပြောက်ကျားတပ်မဟာ တပ်ရင်းမှူး ဗိုလ်သက်ကြီးက မြေလတ်အသံကို ပြောပါတယ်။

စစ်ဆေးရေးဂိတ်ဘန်ကာတွေကို တော်လှန်ရေးတပ်တွေဘက်ကပစ်ခတ်တဲ့ RPG ဗုံးသီး ထိမှန်ခဲ့တာကြောင့် ဘန်ကာအတွင်းရှိ စစ်ကော်မရှင်တပ်သား ၈ ဦးသေဆုံးပြီး ၁၀ ဦးကျော်ဒဏ်ရာရရှိခဲ့တယ်လို့ သူက ပြောပါတယ်။

စစ်ကော်မရှင်တပ်ဖွဲ့ဝင်သေဆုံးမှုတွေနဲ့ပတ်သက်ပြီး မြေလတ်အသံက သီးခြားအတည်မပြုနိုင်ပါဘူး။

” ဘန်ကာထဲက အင်အားကတော့ ၂၀ ကျော်လောက်ရှိတာ ကျနော်တို့ မျက်မြင် မြင်ရတယ်” လို့ ဗိုလ်သက်ကြီးက ပြောပါတယ်။

လယ်သစ်ရွာစစ်ကော်မရှင်တပ်စစ်ဆေးရေးဂိတ်ဟာ လမ်းသွား၊ လမ်းလာတွေကို ဖမ်းဆီးတာ၊ ဖြတ်သန်းသွားလာနေတဲ့ ကားတွေကို ခြိမ်းခြောက်ငွေတောင်းတာတွေလုပ်ဆောင်နေတဲ့ဂိတ် ဖြစ်တယ်လို့ သိရပါတယ်။

တိုက်ခိုက်မှုကို Zero ပြောက်ကျားတပ်မဟာ တပ်ရင်း ၇ မြင်းခြံခရိုင်၊ ရွှေကံသားစစ်ကြောင်း(မြင်းခြံမြို့နယ်ပကဖ)၊ စစ်သူကြီး(ဒေါင်းစစ်သည် – zero – column- 5 )၊ ရန်ကုန်အကြီးကောင်စစ်ကြောင်း ၁၊ ရွှေကံသားစစ်ကြောင်း ၂ တို့က ပူးပေါင်းလုပ်ဆောင်ခဲ့တာ ဖြစ်ပါတယ်။

စာတည်း – ဟိန်းစံ

မြင်းခြံ၊ အောက်တိုဘာ ၂၄၊ ၂၀၂၅။

မန္တလေးတိုင်း၊ မြင်းခြံမြို့ကနေ စစ်ကော်မရှင်တပ်ဖွဲ့ဝင်တွေလိုက်ပါလာတဲ့ ကားတွေကို ဒေသခံတော်လှန်ရေးတပ်တွေက ကြားဖြတ်တိုက်ခိုက်ပြီး လက်နက်တွေသိမ်းဆည်းခဲ့တယ်လို့ မြင်းခြံခရိုင်၊ တပ်ရင်း ၇ Zero ပြောက်ကျားတပ်မဟာ ဆီကသိရပါတယ်။

အောက်တိုဘာ ၂၁ ရက်မနက်ပိုင်းက စစ်ကော်မရှင်တပ်တွေလိုက်ပါလာတဲ့ Double Cab ကား ၃ စီးကို မြင်းခြံ-နွားထိုးကြီးလမ်းပိုင်းတနေရာမှာ တိုက်ခိုက်ခဲ့ရာ ၃ စီးစလုံးကို ထိမှန်ခဲ့ကာ တိုက်ခိုက်နေချိန်မှာပဲ ကား ၁ စီးကိုထားပြီး ကျန် ၂ စီးနဲ့ထွက်ပြေးသွားကြတယ်လို့ ဆိုပါတယ်။

“နောက်ဆုံးမှာကျန်တဲ့ Jammer တင်တဲ့ Double Cab ကား ၁ စီးက မောင်းလို့ခက်ခဲတာတကြောင်း ရန်သူက ဘယ်ညာအရှေ့အနောက်မှာရှိနေတာကတကြောင်း ဒီစစ်ဆင်ရေးကို မိနစ် ၂၀ လောက်နဲ့ ဖော်ဆောင်ပြီး အမြန်ခွာစစ်ဆင်ခဲ့ရတာကြောင့် ကားတွေလည်းမသယ်နိုင်ဘူး၊ ကျန်နေခဲ့တဲ့ Double Cab နဲ့ Jammer ကားကို လက်ပစ်ဗုံးနဲ့ခွဲပြီးတော့ ကျနော်တို့ ခွာစစ်ဆင်ပြီးတော့ ဆုတ်ခဲ့ရတယ်” လို့ Zero ပြောက်ကျားတပ်မဟာ တပ်ရင်း ၇ မြင်းခြံခရိုင် တပ်ရင်းမှူး ဗိုလ်သက်ကြီးက ပြောပါတယ်။

တိုက်ခိုက်ပြီးနောက် MA1 ၁ လက်၊ MA3 ၁ လက်နဲ့ G3 ၁ လက်တို့ကို သိမ်းဆည်းရခဲ့ပြီး ကျန်ခဲ့တဲ့ ကားပေါ်မှာလည်း သေဆုံးစစ်သားအလောင်း ၁ လောင်းကို မျက်မြင်တွေ့ခဲ့ရတယ်လို့ ဆိုပါတယ်။

ဒီတိုက်ခိုက်မှုကို Zero ပြောက်ကျားတပ်မဟာ တပ်ရင်း ၇ မြင်းခြံခရိုင် နဲ့ မြင်းခြံခရိုင် အမှတ်(၈) တပ်ရင်း တို့ကပူးပေါင်းလုပ်ဆောင်ခဲ့တာပါ။

ပြီးခဲ့တဲ့ ဇူလိုင် ၃ ရက်ကလည်း မြို့သာကနေ ငါန်းဇွန်ဘက်ကို ရိက္ခာပို့တဲ့ စစ်ကြောင်းကို မြို့သာနဲ့ ငါန်းဇွန်ကြားမှာ Zero ပြောက်ကျားတပ်မဟာက ကြားဖြတ်တိုက်ခိုက်ခဲ့ပါသေးတယ်။

စာတည်း – လင်း

မြင်းခြံ၊ စက်တင်ဘာ ၄၊ ၂၀၂၅။

မန္တလေးတိုင်း၊ မြင်းခြံမြို့နယ်၊ ကုက္ကဲရွာ အထကကျောင်းဝန်းထဲမှာတပ်စွဲနေပြီး လမ်းသွားလမ်းလာတွေဆီက ဆက်ကြေးတောင်းနေတဲ့ စစ်ကော်မရှင်အဖွဲ့ကိုတိုက်ခိုက်ရာ ထိခိုက်သေဆုံးမှုရှိပြီး လက်နက်ခဲယမ်း တွေလည်း သိမ်းဆည်းခဲ့တယ်လို့ ရွေခြံသားပြောက်ကျားတပ်ဖွဲ့ – မြင်းခြံမြို့နယ်ဆီက သိရပါတယ်။

ကုက္ကဲရဲစခန်းအနီးရှိ အထကကျောင်းမှာတပ်စွဲထားတဲ့ အင်အား ၅၀ ကျော်ပါ စစ်ကော်မရှင်တပ်ဖွဲ့ဝင်တွေက ဆက်ကြေးကောက်နေချိန် စက်တင်ဘာ ၂ ရက် မနက် ၉ နာရီခန့်ကစတင်ကာ ၁၅ မိနစ်ကြာ တိုက်ခိုက်ခဲ့တယ်လို့ ဆိုပါတယ်။

“သူတို့က လမ်းသွားပြည်သူတွေဆီက လုယက်တယ်၊ စားစရာတွေကိုလည်းချယူတယ်၊ ဆက်ကြေးကောက်တယ်၊ ဘယ်ကားကို ဘယ်လောက်နှုန်း အနိုင်ကျင့်ပြီးကောက်တာ၊ ကျနော်တို့ ချောင်းတာက ဩဂုတ် ၃၁ ရက်ကစပြီးတော့ mission စဖော်တာ၊ ကျနော်တို့ ၂ ညအိပ်နဲ့ ၁ ရက်စောင့်ခဲ့ရတယ်၊” လို့ ရွှေခြံသားပြောက်ကျားတပ်ဖွဲ့ – မြင်းခြံမြို့နယ်တာဝန်ခံက ပြောပါတယ်။

တိုက်ခိုက်ရာမှာ ရှေ့ထွက်ပဒေသာမိုင်းတွေကိုလည်း အသုံးပြီးခဲ့ပြီး တိုက်ပွဲအတွင်း ၃ ပွင့်ဗိုလ် အောင်သောင်း အပါအဝင် စစ်ကော်မရှင်တပ်ဖွဲ့ဝင် ၇ ဦးသေဆုံးတာကို အတည်ပြုနိုင်ခဲ့တယ်လို့ ဆိုပါတယ်။

ဒါ့အပြင် MA 3 ၆ လက်၊ ကျည်ဘောက် ၂၀ ခု၊ MA 5 ၁ လက်၊ ၆၀ မမ ၁ လက်၊ 5.56 ကျည် ၉၀၄ တောင့်၊ 9 မမကျည် ၅ တောင့်၊ 60 မမဗုံးသီး ၃ လုံး၊အိနာဂါ၂ လုံး၊ ဓား ၅ ချောင်း၊ လက်ပစ်ဗုံး၂ လုံး၊ လေးခွ ၂ လက်၊ ဝက်အူလှည့် ၁ ချောင်း၊ ငွေသား ၁,၄၉၂,၀၀၀ ကျပ်၊ ဖုန်း ၇ လုံး၊ လက်ပတ်နာရီ ၂ လုံးနဲ့ အခြားစစ် အသုံးအဆောင်တို့ကို သိမ်းဆည်းနိုင်ခဲ့တယ်လို့ ဆိုပါတယ်။

မြင်းခြံမြို့နယ်တွင်းကျေးရွာတွေကို လှည့်လှည်စစ်ကြောင်းထိုးနေတဲ့ စစ်ကော်မရှင်နဲ့ ပျူစောထီး ပူးပေါင်းတပ်ဖွဲ့အင်အား ၃၀၀ ကျော်ကိုလည်း နွားထိုးကြီးမြို့နယ်၊ မာန်လည်ရွာဘုန်းကြီးကျောင်းမှာ ယာယီတပ်စွဲနေစဉ် ဩဂုတ် ၂၀ ရက် မနက် ၁၁ နာရီမှာ တော်လှန်ရေးတပ်တွေက တိုက်ခိုက်ပြီးနောက် လက်နက်ခဲယမ်းတွေသိမ်းဆည်းခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ ဩဂုတ်၂၆၊ ၂၀၂၅။

မန္တလေးတိုင်း၊ မြင်းခြံခရိုင်၊ နွားထိုးကြီးမြို့နယ်၊ မာန်လည်ရွာဘုန်းကြီးကြောင်းမှာတပ်စွဲနေတဲ့ စစ်ကော်မရှင်စစ်ကြောင်းကို တိုက်ခိုက်ခဲ့ရာ စစ်သားသေဆုံးမှုများပြီး လက်နက်၊ ခဲယမ်းဆက်စပ်ပစ္စည်းတွေရရှိခဲ့တယ်လို့ မြေပြင်တပ်ဖွဲ့ဝင်တွေထံက သိရပါတယ်။

မြင်းခြံမြို့နယ်တွင်းကျေးရွာတွေကို လှည့်လှည်စစ်ကြောင်းထိုးနေတဲ့ စစ်ကော်မရှင်နဲ့ ပျူစောထီးပူးပေါင်းတပ်ဖွဲ့အင်အား ၃၀၀ ကျော်ဟာ အဲ့ဒီဘုန်းကြီးကျောင်းမှာ ယာယီတပ်စွဲနေစဥ် ဩဂုတ် ၂၀ ရက် မနက် ၁၁ နာရီမှာ စတင်တိုက်ခိုက်ခဲ့တာဖြစ်ပြီး ညနေ ၅ နာရီခွဲအထိ တိုက်ပွဲဖြစ်ပွားခဲ့တယ်လို့ ဆိုပါတယ်။

“ အပြန်အလှန်ပစ်ပါတယ်။ လက်နက်ကြီးပစ်ကူတွေနဲ့ သူတို့ဘက်က လေကြောင်းပစ်ကူတွေလာပေးပါတယ်။ အလောင်းတွေက သိရသလောက်က သူတို့ကချက်ချင်းမီးထဲကိုပစ်ထည့်တာမျိုးရှိတယ်လို့တော့ သိရပါတယ်။ ကျနော်တို့အလောင်းတော့မရခဲ့ပါဘူး” လို့ တိုက်ခိုက်မှုမှာပါဝင်ခဲ့တဲ့ မြင်းခြံခရိုင်စစ်ရေးသတင်းရင်းမြစ်တဦးက မြေလတ်အသံကို ပြောပါတယ်။

တိုက်ပွဲတွေအတွင်း စစ်ကော်မရှင်တပ်ဖွဲ့ဝင် ၁၀ ဦးသေဆုံးခဲ့ပြီး ၈ ဦး ဒဏ်ရာရရှိခဲ့တယ်လို့ မြေပြင်တိုက်ခိုက်ရေးပါဝင်သူတွေက ပြောဆိုထားပြီး အထိနာတဲ့ စစ်ကောင်စီတပ်က လေကြောင်း၊ လက်နက်ကြီးတွေနဲ့ ပစ်ကူပေးတိုက်ခိုက်ခဲ့တယ်လို့ ၎င်းက ဆိုပါတယ်။

ဒါ့အပြင် တိုက်ပွဲအတွင်း MA 11လက်နက်ငယ် ၂ လက်၊ Drone Shooter ၁ လက်၊ ငါးကြင်းမြီး (စက်လတ်) ပြောင်း ၁ ချောင်း၊ လက်ပစ်ဗုံး ၃ လုံး၊ Starlink အင်တာနက်စက် ၁ လုံး၊ ငွေသားအချို့၊ ကျည်ဘောက် ၂ ခု၊ ကျည်ဆန်တချို့ သိမ်းဆည်းရမိခဲ့တယ်လို့ သိရပါတယ်။

အဆိုပါစစ်ကြောင်းဟာ စစ်ကော်မရှင်တပ်နဲ့ မြင်းခြံခရိုင်ပျူစောထီးခေါင်းဆောင် သီတာယုမွန်လက်အောက်ပျူစောထီးတွေပါဝင်တဲ့ ပူးပေါင်းစစ်ကြောင်းဖြစ်ကာ ဩဂုတ် ၁ ရက်မှာ သစ်ရှည်ပင်ရွာကနေစတင်ကာ ကျေးရွာ ၂၀ ခန့်ကို လှည့်ပတ်စစ်ကြောင်းထိုးခဲ့တာဖြစ်ပြီး မာန်လည်ရွာဘုန်းကြီးကျောင်းမှာ ယာယီတပ်စွဲနေတာပါ။

အဲ့ဒီစစ်ကြောင်းကြောင့် ဩဂုတ်လဆန်းပိုင်းကနေလက်ရှိအထိ မြင်းခြံမြို့နယ် ကျေးရွာပေါင်း ၂၀ ကျော်က ဒေသခံပြည်သူ ၂ သောင်းနီးပါးစစ်ရှောင်နေကြရတယ်လို့ သိရပါတယ်။

တိုက်ခိုက်မှုကို နွားထိုးကြီးပြည်သူ့ကာကွယ်ရေးအဖွဲ့ (ပကဖ)နဲ့အတူ မြင်းခြံခရိုင် PDF တပ်ရင်း၊ တပ်ဖွဲ့တွေ ပူးပေါင်းတိုက်ခိုက်ခဲ့တာလည်း ဖြစ်ပါတယ်။

စာတည်း – ဟိန်းစံ