မိုင်းနင်းမိ

သရက်၊ မတ် ၁၆၊ ၂၀၂၃။

မကွေးတိုင်း၊ သရက်မြို့နယ်၊ သမန်းပြင်ကျေးရွာမှ အမျိုးသား ၂ ဦးမှာ မိသားစုစားဝတ်နေရေးအတွက် ယနေ့ မတ်လ ၁၆ ရက် မနက် ၆ နာရီကျော်မှာ တောင်ပေါ်ကို ဝါးခုတ်ဖို့သွားချိန် မိုင်းနင်းမိခဲ့တာကြောင့် ၁ ဦးမှာ ဒဏ်ရာအနည်းငယ်ရရှိခဲ့သလို ၁ ဦးမှာ ခြေထောက်တဖက် ပြတ်ထွက်သွားခဲ့တယ်လို့ သိရပါတယ်။

ဒဏ်ရာရသူ ၂ ဦးမှာ ဦးမောင်ကြီး ၄၀ နှစ် (ဒဏ်ရာအနည်းငယ်ရ)၊ ဦးသိန်းစိုး ၃၅ နှစ် (ဘယ်ဖက်​ခြေထောက်ပြတ်) တို့ဖြစ်ပြီး၊ သူတို့ ၂ ဦးမှာ နောက်ထပ်အမျိုးသား ၈ ဦးနဲ့အတူ စစ်ကောင်စီတပ်သားတွေ တပ်စွဲနေတဲ့ တွင်းလယ်ကျေးရွာအနီးက တောင်ပေါ်ကိုသွားချိန် မိုင်း နင်းမိခဲ့တာဖြစ်တယ်လို့ ရွာခံအမျိုးသားတဦးက ပြောပါတယ်။

“သူတို့ နှစ်ယောက်မှာ သိန်းစိုးက မိုင်းကိုနင်းမိတာ။ အဲ့ဒါကြောင့် မောင်ကြီးမှာ အစတွေပဲ မှန်သွားတာ။ အခုတော့ သူတို့ကို မကွေးဆေးရုံကို ကားနဲ့ယူသွားကြတယ်။ သိန်းစိုးခြေထောက်ကတော့ ဖြတ်ရမယ့်အခြေအနေ ရှိပါတယ်။ ဘယ်ခြေထောက်ရဲ့ ခြေကျင်းဝတ်အောက်ကနေ အသားတွေက ပွန်းထွက်သွားတာ” လို့ ဆိုပါတယ်။

အဆိုပါဒေသခံတွေ တက်နင်းမိတဲ့ မြေမြုပ်မိုင်းဟာ သမန်းပြင်ရွာနဲ့ ရွာချင်းစပ်လျှက်ရှိတဲ့ တွင်းလယ်ကျေးရွာမှာ တပ်စွဲထားတဲ့ စစ်ကောင်စီတပ်သားတွေ ထောင်ထားတဲ့မိုင်း ဖြစ်တယ်လို့ အထက်ပါအမျိုးသားက ပြောပါတယ်။

“သမန်းပြင်နဲ့တွင်းလယ်ရွာက ရွာချင်းစပ်တွေဗျ။ စကစတွေက PDF တွေ လာတိုက်ခိုက်မှာကို ကြောက်လို့ ရွာပတ်ပတ်လည် မိုင်းတွေထောင်ထားတာ။ အဲဒီနေရာတွေကို မသွားဖို့ကိုလည်း စကစ တွေဘက်က ရွာသားတွေကို ပြောထားတယ်။ ဒါပေမယ့် တရက်လုပ်မှ တရက်စားရတဲ့သူတွေက ခိုးထွက်ပြီးတော့ ဝါးတွေခုတ်ကြရတာပေါ့” လို့ ဆိုပါတယ်။

စစ်ကောင်စီတပ်သား ၅၀ ကျော်ဟာ တွင်းလယ်ကျေးရွာမှာ လာရောက်တပ်စွဲနေတာ ၁ နှစ်နီးပါး ကြာမြင့်နေပြီး၊ သူတို့လုံခြုံရေးအတွက်ဟုဆိုကာ ကျေးရွာပတ်ပတ်လည်ကို မြေမြုပ်မိုင်းတွေ ထောင်ထားလို့ တောတောင်ကို အမှီပြုပြီး လုပ်ကိုင်စားသောက်နေကြရတဲ့ လက်လုပ်လက်စား ဒေသခံတွေဟာ အခက်အခဲတွေ ဖြစ်ပေါ်နေကြရတယ်လို့ သိရပါတယ်။

စာတည်း – 007

မကွေး၊ ဒီဇင်ဘာ ၃၁၊ ၂၀၂၂။

မကွေးတိုင်း ဂန့်ဂေါခရိုင် ထီးလင်းမြို့နယ်မှာ ၅ တန်း ကျောင်းသားတဦး မိုင်းနင်းမိလို့ ခြေတဖက်ဖြတ်ထားရသလို အသက်အန္တရာယ်ပါ စိုးရိမ်နေရတယ်လို့ သိရပါတယ်။

ထီးလင်းမြို့နယ် ဝက်သက်ရွာမ စာသင်ကျောင်းရှေ့က သစ်ပင်အောက်မှာ ထောင်ထားတဲ့ နင်းမိုင်းကို ၁၂ အရွယ် ၅ တန်းကျောင်းသား မောင်စွမ်းထက်နိုင်က ဒီနေ့မနက် ၉ နာရီဝန်းကျင်မှာ နင်းမိခဲ့တာဖြစ်တယ်လို့ Yaw Revolution Army – ထီးလင်း ခေါင်းဆောင် သခင်ဇော်က ပြောပါတယ်။

“ခွေးတွေထောင်ထားတဲ့နင်းမိုင်းပါ။ ဒီကလေးကို အမြန်ဆုံးဆေးကုသမှုခံယူဖို့အတွက် လိုက်လံပို့ဆောင်ပေးထားပါတယ်။ ကလေးရဲ့အခြေအနေက ခြေထောက်ကတော့ တဖက်ကတော့ ပြတ်ထွက်သွားတယ်။ အသက်ရှင်နိုင်ဖို့အတွက် ဆေးကုသမှုမီနိုင်မလား မမီနိုင်ဘူးလား မသိရသေးပါဘူး။ အသက်အန္တရာယ်စိုးရိမ်ရပြီး အသက်ဆုံးရှုံးနိုင်မှု အခြေအနေမသိရသေးဘူး” လို့ သခင်ဇော်က ပြောပါတယ်။

ဒီလုပ်ရပ်ဟာ PDF တွေရှိနေလို့ နယ်မြေခံပြည်သူတွေ ဒုက္ခရောက်ရတယ်လို့ ထင်အောင် စစ်ကောင်စီက ရည်ရွယ်ပြီး လုပ်နေတာဖြစ်တယ်လို့ သူက ဆက်ပြောပါတယ်။

“လူစိတ်လုံးဝမရှိတဲ့ လုပ်ရပ်ပါ။ သူတို့ထောင်တဲ့နင်းမိုင်းကလည်း ထောင်တဲ့နေရာက စာသင်ကျောင်းရှေ့မှာ ဖြစ်တယ်။ ကျောင်းဆရာ ဆရာမ မိမလား။ ကလေးမိမလား ကျောင်းသားမိဘမိမလား ဒါပဲရှိမှာပါ။ ဒီလိုထောင်ခြင်းအားဖြင့် ကျနော်တို့ PDF တွေမိမှာ မဟုတ်ဘူး” လို့ ဆိုပါတယ်။

နင်းမိုင်းပေါက်ကွဲခဲ့လို့ လက်ရှိ စာသင်ကျောင်းကို ယာယီပိတ်ထားရတယ်လို့ သိရပါတယ်။

မြေလတ်အသံ၊ စက်တင်ဘာ ၈၊ ၂၀၂၂။

ရခိုင်ပြည်နယ်၊ ပုဏ္ဏားကျွန်းမြို့နယ်၊ ကွမ်းအုံစု ကျေးရွာမှ အမျိုးသားတဦး ယနေ့စက်တင်ဘာ ၈ရက် ညနေ ၄နာရီကျော်အချိန်တွင် ဝါးခုတ်ပြီးပြန်လာစဉ် မိုင်းနင်းမိကာ ခြေထောက်တဖက်ပြတ်ထွက်သွားခဲ့သည်ဟု သိရသည်။

မိုင်းထိမှန်ခဲ့သူမှာ ဦးဘရွှေ ၄၁နှစ် ဖြစ်ပြီး ၎င်းမှာ ကျေးရွာ၏အနောက်ဖက်ရှိ တောင်တန်းမှ ဝါးခုတ်ပြီး ကျေးရွာသို့ပြန်အလာတွင် မိုင်းနင်မိကာ ပေါက်ကွဲမှုဖြစ်သွားသဖြင့် ညာဖက်ခြေထောက် ပြတ်သွားရခြင်းဖြစ်သည်ဟု သားမက်ဖြစ်သူ ကိုဆန်းလင်းကပြောသည်။

“ဒဏ်ရာကတော့ ခြေထောက်ခြေချင်းဝတ်အောက်က ပြတ်သွားတာပါ။ ခန္ဓာကိုယ်အနှံ့မှာတော့ မိုင်းစတွေဝင်သွားတယ်။ အခုတော့ ယိုးတရုတ်ဆေးရုံကို ပို့ထားတယ်။ သိပ်တော့မစိုးရိမ်ရဘူး”ဟုဆိုသည်။

ဩဂုတ် ၁၃ရက်နေ့တွင်လည်း ဗုဒ္ဓေါကျေးရွာအနီးရှိ တောင်တန်းပေါ်တွင် နွားရှာနေစဉ်မိုင်းပေါက်ကွဲမှုဖြစ်၍ ဒေသခံ ၄ဦး ဒဏ်ရာရရှိသွားခဲ့သည်ဟု သိရသည်။

အလားတူ ပြီးခဲ့သည့် ဩဂုတ် ၅ရက်နေ့တွင်လည်း စစ်ကောင်စီက စခန်းချထားသည့် မင်းပြားမြို့နယ်ရှိ ရာမောင်တောင်တန်းပေါ်တွင် မိုင်းပေါက်ကွဲမှုဖြစ်၍ အမျိုးသားတဦး ခြေတဖက်ပြတ်သွားခဲ့သည်။

ရခိုင်ပြည်နယ်၌ ပေါက်ကွဲမှုဖြစ်‌နေသည့်မြေမြုပ်မိုင်းများမှာ စစ်ကောင်စီတပ်မှ ထောင်သည့်မိုင်း များဖြစ်ကြသည်ဟု ဩဂုတ် ၁၁ရက်နေ့ သတင်း စာရှင်းလင်းပွဲတွင် AA၏ ပြောရေးဆိုခွင့်ရှိသူ ခိုင်သုခကပြောဆိုခဲ့သည်။