မန္တလေး

စဥ့်ကူး၊ မတ် ၂၀၊ ၂၀၂၃။

မန္တလေးတိုင်း၊ စဥ့်ကူးမြို့နယ်၊ ရွာသာယာရွာက စစ်တပ်သတင်းပေးလို့လူသိများတဲ့ အမျိုးသမီးတဦး မတ်လ ၁၉ ရက် မနေ့ကနေ့လယ်ပိုင်းမှာ ပစ်ခတ်ရှင်းလင်းခံခဲ့ရပါတယ်။

အသက် ၄၃ နှစ်အရွယ် မယုခိုင်ဟာ စစ်တပ်ကို သတင်းပေးတိုင်ကြားတာတွေ လုပ်တာကြောင့် သူ့နေအိမ်ကနေ ဖမ်းလာပြီး ရွာအနောက်ဘက်ကမ်းရှိ သေနပ်ကျွန်းပေါ်အရောက်မှာ ပစ်ခတ်ရှင်းလင်းခဲ့တာလို့ Bo Tiger-ဗိုလ်ကျားကြီးအဖွဲ့ ခေါင်းဆောင် ဗိုလ်ကျားကြီးက ပြောပါတယ်။

“သူက PDF တွေ ဘယ်မှာရှိတယ်။ ဘယ်နေရာမှာနေတယ်ဆိုတာကို စစ်တပ်ကို ဖုန်းနဲ့သတင်းပေးတာ။ သူ့ရဲ့ဖုန်းစစ်‌ဆေးကြည့်လိုက်တော့လည်း စစ်တပ်နဲ့ဆက်သွယ်ပြီး ပြောဆိုရေးသားထားတာတွေ တွေ့တယ်။ သေချာတာကြောင့် သူ့ကိုနေအိမ်ကနေ ဖမ်းလာပြီး သေနတ်ကျွန်းပေါ်ရောက်မှ သေနတ်နဲ့ ၂ ချက် ပစ်ခတ်ခဲ့တာပါ” လို့ ပြောပါတယ်။

ဒီရှင်းလင်းမှုကို Bo Tiger-ဗိုလ်ကျားကြီးအဖွဲ့နဲ့ ရဲရဲတောက်အဖွဲ့တို့က ပူးပေါင်းလုပ်ဆောင်ခဲ့တာ ဖြစ်ပြီး၊ ဗိုက်နဲ့ နားထင်ကို ၁ ချက်စီပစ်ခတ်ခဲ့တာကြောင့် မယုခိုင်မှာ နေရာတင်ပွဲချင်းပြီး သေဆုံးခဲ့တယ်လို့ ဆိုပါတယ်။

ပြီးခဲ့တဲ့ မတ်လ ၁၇ ရက်ကလည်း မယ်ဇလီချောင်၊ အက်နံ၊ ရွှေခဲပြန်ရွာတွေကို စစ်ကြောင်းထိုးပြီးထွက်လာတဲ့ စစ်အုပ်စုကို ရွှေခဲပြန်ရွာအထွက်မှာ Bo Tiger အဖွဲ့က တိုက်ခိုက်ခဲ့ရာ စစ်သားသေဆုံးမှုတွေ ရှိခဲ့ပါသေးတယ်။

စာတည်း – လင်း

မတ္တရာ၊ မတ် ၁၉၊ ၂၀၂၃။

မန္တလေးတိုင်း၊ မတ္တရာမြို့နယ်၊ ရွှေခဲပြန်ကျေးရွာကအမျိုးသမီးတဦး စစ်ကောင်စီတပ်တွေရဲ့ ဖမ်းဆီးတာကိုခံခဲ့ရပြီးနောက် အဓမ္မပြုကျင့်ခံထားရတဲ့ပုံစံနဲ့ သေဆုံးလျက်ပြန်တွေ့ခဲ့တယ်လို့ သိရပါတယ်။

အသက် ၂၈ နှစ်အရွယ် မခင်မိုးမိုးဆွေရဲ့ရုပ်အလောင်းကို မတ်လ ၁၈ ရက်မနေ့ကနေ့လယ် ၁ နာရီလောက်က ရွှေခဲပြန်ရွာချောင်းအစပ်မှာတွေ့ခဲ့တာလို့ Bo Tiger အဖွဲ့မှ ဗိုလ်ကျားကြီးက မြေလတ်အသံကို ပြောပါတယ်။

“နယ်မြေရှင်းလင်းရေးလုပ်တာမှာ စစ်ကောင်စီသတ်ဖြတ်ထားတဲ့ အမျိုးသမီးရုပ်အလောင်း ၁ လောင်းတွေ့တယ်၊ အလောင်းကို ရွှေခဲပြန်ရွာချောင်းအစပ်မှာ တွေ့တာ၊ သူတို့သတ်ဖြတ်သွားတဲ့ပုံစံက အဓမ္မကျင့်သတ်ဖြတ်သွားတယ်လို့ ယူဆလို့ရတယ်၊ မီးတွေနဲ့လည်း အမျိုးသမီးရဲ့ တန်ဆာကို မြိုက်ထားတာ” လို့ ပြောပါတယ်။

အဆိုပါအမျိုးသမီးဟာ အဓမ္မပြုကျင့်ခံထားရတာ ဟုတ်၊မဟုတ်ကိုတော့ မြေလတ်အသံက သီးခြားအတည်မပြုနိုင်သေးပါဘူး။ သူ့ရဲ့ရုပ်အလောင်းကိုတော့ မနေ့ကနေ့လယ် ၂ နာရီလောက်မှာပဲ ဒေသခံတွေကသင်္ဂြုလ်ပေးခဲ့တယ်လို့ သိရပါတယ်။

သူ့ကိုဖမ်းဆီးသွားတဲ့ စစ်ကောင်စီတပ်တွေက စစ်ကိုင်းအခြေစိုက် တမခ ၃၃ က စစ်သားတွေဖြစ်ပြီး မတ်လ ၁၇ ရက်က ရွှေခဲပြန်ရွာထဲကိုစစ်ကြောင်းထိုးချိန်မှာ ဖမ်းဆီးသွားတာလည်းဖြစ်ပါတယ်။

မတ္တရာ၊ မတ် ၁၅၊ ၂၀၂၃။

မန္တလေးတိုင်း၊ မတ္တရာမြို့နယ် လဝကဒု-ဦးစီး ဦးကျော်နိုင်ဦးဟာ မတ်လ ၁၄ ရက်နေ့ မနက် ၁၀ နာရီခန့်က သေနတ်နဲ့ပစ်ခတ်ခံရလို့ သေဆုံးသွားတယ်လို့ သိရပါတယ်။

အသက် ၄၇ နှစ်အရွယ် လဝကဒု-ဦးစီး ဦးကျော်နိုင်ဦးဟာ မတ္တရာမြို့နယ်၊ လွန်တောင်းကျေးရွာမှာ နေထိုင်သူဖြစ်ပြီး၊ ဆိုင်ကယ်နဲ့ ရုံးသွားစဥ် ဝရင်းတုတ်ရွာအနီးမှာ သေနတ်နဲ့ပစ်ခတ်ခံရပြီး သေဆုံးသွားတာဖြစ်တယ်လို့ Voice of Mandalay ရဲ့ တာဝန်ရှိသူတဦးက မြေလတ်အသံကို ပြောပါတယ်။

“ပျူ‌တွေကို သင်တန်း‌ပေးတာ စည်းရုံးတာတော့ ကြာပြီ။ ဘယ်လောက်ကြာပြီလည်းဆိုတာတော့ မမှတ်မိတော့ဘူး။ သူ့ရဲ့ခေါင်းကို သေနတ်နဲ့ သုံးချက်တိတိ ပစ်ခဲ့တယ်။ သူပြန်ခုခံလို့ နပန်းလုံးခဲ့ရသေးတယ်” လို့ ဆိုပါတယ်။

ဘယ်အဖွဲ့က ပစ်ခတ်သွားတာလဲဆိုတာ မသိရသေးသလို၊ လဝကဒု-ဦးစီး ဦးကျော်နိုင်ဦးဟာ ကိုယ်ခံပညာကျွမ်းကျင်သူဖြစ်ပြီး၊ မတ္တရာမြို့နယ်အတွင်း ပျူစည်းရုံးရေးမှူးနဲ့ ထောက်ပို့လုပ်ပေးနေသူဖြစ်ကာ သူသေဆုံးချိန်မှာ သူ့ဆီမှာ သွေးစွန်းနေတဲ့ ဓားတချောင်းနဲ့ စာရွက်စာတမ်းတချို့ သိမ်းဆည်းရမိခဲ့တယ်လို့ သိရပါတယ်။

မန္တလေး၊ မတ် ၁၀၊ ၂၀၂၃။

မန္တလေးတိုင်း၊ မဟာအောင်မြေမြို့နယ်၊ သံလျှက်မှော်အနောက်ရပ်ကွက်၊ လမ်း ၉၀ နဲ့ ၉၁ ကြား၊ ၄၁ နဲ့ ၄၂ လမ်းကြားမှာ မတ်လ ၁၀ ရက် ဒီမနက် ၂ နာရီခွဲဝန်းကျင်က မီးလောင်ကျွမ်းမှု ဖြစ်ပွားခဲ့တယ်လို့ သိရပါတယ်။

အသားခြောက်ကျပ်ကင်လုပ်ငန်း လုပ်ကိုင်သည့်နေအိမ်မှ မီးစတင်လောင်ကျွမ်းခဲ့ခြင်း ဖြစ်ပြီး အချိန် ၁ နာရီနီးပါး မီးငြိမ်းသတ်ခဲ့ရကာ နေအိမ် ၉ လုံး မီးလောင်ဆုံးရှုံးခဲ့တယ်လို့ ဒေသခံတဦးက မြေလတ်အသံကို ပြောပါတယ်။

မီးလောင်ကျွမ်းမှုကြောင့် လူထိခိုက်သေဆုံးမှု မရှိခဲ့ဘဲ နေအိမ် ၉ လုံး မီးလောင်ပျက်စီးကာ ကာလတန်ဖိုး ကျပ်သိန်း ၁၀၀၀ ကျော် ဆုံးရှုံးခဲ့တယ်လို့ မန္တလေးမီးသတ်ဌာနနဲ့ နီးစပ်သူတွေဆီက သိရပါတယ်။

မီးလောင်မှုနဲ့ပတ်သက်ပြီး မီးပေါ့ဆစွာ အသုံးပြုသူ အသားခြောက်လုပ်ငန်းပိုင်ရှင်နဲ့ အလုပ်သမားတွေကို အမှတ်(၇)နယ်မြေရဲစခန်းမှာ ပုဒ်မ(၂၈၅)နဲ့ အမှုဖွင့်ထားတယ်လို့ သိရပါတယ်။

မတ်လ ၅ ရက်နေ့ကလည်း မဟာအောင်မြေမြို့နယ်ထဲမှာ ခြင်ဆေးခွေထွန်းရာကနေ မီးလောင်ကျွမ်းမှု ဖြစ်ပွားခဲ့လို့ နေအိမ် ၂ လုံး မီးလောင်ပျက်စီးခဲ့ပါသေးတယ်။

စာတည်း – ရင်ငြိမ်း

မြင်းခြံ၊ မတ် ၈၊ ၂၀၂၃။

မန္တလေးတိုင်းဒေသကြီး၊ မြင်းခြံမြို့နယ်၊ သင်ပြွန်းရွာ လမ်းခွဲနားမှာ အိမ်စီးကား ၁ စီး ပစ်ခတ်ခံရလို့ ကားပေါ်ပါ ကလေးငယ် ၁ ဦးပါ ၃ ဦး သေဆုံးသွားတယ်လို့ သိရပါတယ်။

မတ်လ ၇ ရက်နေ့ည ၁၀ နာရီခန့်မှာ မန္တလေးဘက်ကနေ မြင်းခြံဘက်ကို မောင်းလာတဲ့ မိသားစုဝင် ၅ ဦး လိုက်ပါလာတဲ့ကားဟာ သင်ပြွန်းရွာ လမ်းခွဲအရောက်မှာ ပစ်ခတ်ခံရတယ်လို့ ဒေသခံတဦးက ပြောပါတယ်။

“စစ်ကောင်စီက လိုက်ကြေညာထားတာ။ ပြီးတော့ အမှတ် ၁ အုပ်ကြီး ဝင်းဆွေက ည ၈ နာရီနောက်ပိုင်း အပြင်မထွက်ဖို့၊ အပြင်ထွက်ရင် ပစ်သတ်မှာ၊ တာဝန်မယူဘူးလို့လည်း ပြောထားတာ ရှိတယ်” လို့ ဒေသခံတဦးက ပြောပါတယ်။

စစ်ကောင်စီက ယမန့်နေ့ (မတ်လ ၇ ရက်) တုန်းကပဲ မြင်းခြံမြို့နယ်ထဲ ယောက်ျားလေးဆိုင်ကယ် ၂ ယောက် ပူးမစီးရ၊ မိန်းကလေးမောင်းတဲ့နောက် ယောက်ျားလေး မစီးရ၊ ယောက်ျားလေးမောင်းတဲ့ ဆိုင်ကယ်နောက် မိန်းကလေး ၂ ယောက် ပူးမစီးဖို့ လိုက်လံကြေညာအပြီး ညပိုင်းမှာပဲ ပစ်ခတ်ခံရတာလို့ ဆိုပါတယ်။

စစ်ကောင်စီဝါဒဖြန့် တယ်လီဂရမ်ချန်နယ်တွေကတော့ ရွှေစာရံဘုရားဖူးပြန် ပြည်သူတွေကို PDF တွေ ပြုလုပ်တာလို့ ပြောဆိုရေးသားဖြန့်ဖြူးနေတာတွေ ရှိနေပါတယ်။

“အခုပစ်ခတ်ခံရတဲ့နေရာက PDF နဲ့ ပျူစောထီးတွေလှုပ်ရှားတဲ့ နယ်မြေဖြစ်ပြီး အထူးသဖြင့် ပျူစောထီးတွေက လူသတ်ကာ အလောင်းလာပြီး စွန့်ပစ်တဲ့နေရာဖြစ်သလို ပစ်ခတ်ခံရချိန်ဟာ ည ၈ နာရီကျော်နေပြီ။ ပစ်ခတ်ခံရတဲ့ မိသားစုဝင်တွေကလည်း NLD ပါတီဝင်တွေနဲ့ ဆွေမျိုးတော်စပ်သူတွေ ဖြစ်တယ်” လို့ ဒေသခံက ဆိုပါတယ်။

ထိခိုက်သေဆုံးသွားသူတွေကိုတော့ သက်ဆိုင်ရာ လူမှုကူညီရေးအသင်းတွေက မြင်းခြံဆေးရုံဘက်ကို သယ်ဆောင်သွားတယ်လို့ လူမှုကူညီရေးအသင်းတွေကတဆင့် သိရပါတယ်။

စာတည်း – 007

မန္တလေး၊ မတ် ၈၊ ၂၀၂၃။

မန္တလေးတိုင်း၊ မန္တလေးမြို့အတွင်း ပြေးဆွဲနေတဲ့ မီနီအိုးဝေအားလုံးကို အဝါရောင် ပြောင်းဖို့ စစ်ကောင်စီလက်အောက်ခံ မန္တလေးတိုင်းဒေသကြီး ယာဉ်လုပ်ငန်းများကြီးကြပ်ရေးလုပ်ငန်းကော်မတီက အမိန့်ထုတ်ပြန်လိုက်ပြီး မလိုက်နာပါက လိုင်စင်ဖျက်သိမ်းခံရမယ်လို့ ခြိမ်းခြောက်ထားတယ်လို့ သိရပါတယ်။

အခုလို မီနီအိုးဝေယာဥ်တွေကို စစ်ကောင်စီက သူတို့စိတ်ကြိုက် စီမံဖန်တီးနေတာဟာ ဒေသခံ မီနီအိုးဝေမောင်းနေသူတွေအတွက် စားဝတ်နေရေး ခက်ခဲအောင် လုပ်နေတာဖြစ်ပြီး ဖိနှိပ်မှုဖြစ်တယ်လို့ မီနီအိုးဝေ ယာဥ်မောင်းတဦးက ပြောပါတယ်။

“သူတို့က အရောင်မပြောင်းရင် ပြေးဆွဲခွင့်ပိတ်မယ်။ လိုင်စင် ပိတ်သိမ်းမယ် ပြောတယ်ဆိုတော့ မူလအဝါရောင်ရှိတဲ့သူက ပြသနာမရှိဘူး။ ကျန်တဲ့အရောင်ရှိတဲ့ ယာဥ်ပိုင်ရှင်တွက အော်ဆေးတွေ ပျောက်မယ်။ ကုန်ကျစရိတ်တွေ ပိုလာမယ်။ ပြန်ရောင်းရင်လည်း ရှုံးမယ်။ သူတို့ခိုင်းသလို မလုပ်ရင် စားဝတ်နေရေး ခက်ခဲသွားမယ်။ တကယ်တမ်းက မလိုအပ်ဘူးလေ။ သူတို့လုပ်ချင်ရင် အစကတည်းက တင်သွင်းတဲ့ကုမ္ပဏီကို သူတို့ကြိုက်တဲ့ အရောင်တမျိုးတည်း သွင်းခိုင်းပေါ့။ ခုက မရောင်ရာဆီလူးတာနဲ့ တူတူဘဲ” လို့ ပြောပါတယ်။

မန္တလေးမှာ ယခင်က မြို့တွင်းလိုင်းကားပြေးဆွဲမှုတွေ ရှိခဲ့ပေမယ့် မီနီအိုးဝေတွေ ပေါများလာပြီးနောက်မှာ လိုင်းကားပြေးဆွဲတာ မရှိသလောက်နည်းပါးသွားပြီး မြို့တွင်းသွားလာရေးအတွက် မီနီအိုးဝေတွေကိုသာ အသုံးပြုသူများလာတယ်လို့ ဆိုပါတယ်။

မန္တလေးမြိုးနယ်တခွင်မှာ မီနီအိုးဝေ အစီးရေ ထောင်ချီရှိပြီး သာမန်လူတန်းစားအများစုက အိုးဝေမောင်းရင်း မိသားစုစားဝတ်နေရေးကို ဖြေရှင်းနေရတာ ဖြစ်တယ်လို့ သိရပါတယ်။

၂၀၂၃ ခုနှစ်၊ ဇွန်လ ၃၀ ရက်နေ့ထိ နောက်ဆုံးထားပြီး မန္တလေးမြို့တွင်း ပြေးဆွဲနေတဲ့ မီနီအိုးဝေအားလုံး အဝါရောင်ပြောင်းလဲရမယ်လို့ မတ်လ ပထမပတ်အတွင်းက စတင်ပြီး မန္တလေးတိုင်းဒေသကြီး ယာဉ်လုပ်ငန်းများကြီးကြပ်ရေးလုပ်ငန်းကော်မတီ (မြို့တွင်း)မှ အမိန့်ထုတ်ပြန်ထားတာလည်း ဖြစ်ပါတယ်။

စစ်ကောင်စီဘက်ကတော့ မန္တလေးမြို့တော်ကို မြို့ပြအင်္ဂါရပ်နဲ့အညီ သန့်ရှင်းသာယာလှပစေရေး၊ ယာဉ်စည်းကမ်း၊ လမ်းစည်းကမ်း စနစ်တကျ ရှိစေရေး၊ ခရီးသည်တွေ လုံခြုံချောမွေ့စွာ သွားလာမှု ပိုမိုအဆင်ပြေစေဖို့နဲ့ သယ်ယူပို့ဆောင်ရေးကဏ္ဍ စနစ်တကျဖွံ့ဖြိုးတိုးတက်စေရေးတို့ကို ရည်ရွယ်ပြီး မန္တလေးတိုင်းဒေသကြီး ဒေသဆိုင်ရာ ကြီးကြပ်ကွပ်ကဲရေးအဖွဲ့ရဲ့ ဆုံးဖြတ်ညွှန်ကြားချက်အရ မန္တလေးမြို့တော် စည်ပင်သာယာရေးနယ်နိမိတ်အတွင်း ခရီးသည်တွေ တင်ဆောင်ပြေးဆွဲလျက်ရှိကြတဲ့ လူစီးသုံးဘီး အငှားယာဉ်တွေကို ဆေးရောင်တရောင်တည်း အဝါရောင် (ကုဒ်နံပါတ်-455)ကို တပြေးညီ ဖြစ်စေရေး ဆေးရောင် ပြောင်းရမယ်လို့ ဆိုထားပါတယ်။

လူစီးသုံးဘီး အငှားယာဉ်တွေကို ပိုင်ဆိုင်ကြတဲ့ ယာဉ်ပိုင်ရှင်တွေအနေနဲ့ မိမိကြိုက်နှစ်သက်ရာ ဘော်ဒီရုံတွေမှာ ဆေးရောင်ပြောင်းခြင်းလုပ်ငန်းကို သတ်မှတ်ရက်အတွင်း ပြီးစီးအောင် ဆောင်ရွက်ရမယ်လို့လည်း သိရပါတယ်။

အရောင်ပြောင်းပြီးတဲ့ ယာဥ်တွေကို ကုန်းလမ်းပို့ဆောင်ရေးညွှန်ကြားမှု ဦးစီးဌာနမှ ယာဉ်စစ်မှတ်တမ်းတင်ခြင်း လုပ်ငန်းတွေကို ချမ်းမြသာစည်မြို့နယ်၊ မန္တလာသီရိအားကစားကွင်းမှာ မတ်လ ၁၆ ရက်ကနေ ဇွန်လ ၃၀ ရက်အထိ ရုံးချိန်အတိုင်း ဆောင်ရွက်ပေးမယ်လို့လည်း သိရပါတယ်။

စာတည်း – လင်း

မန္တလေး၊ မတ် ၂၊ ၂၀၂၃။

မန္တလေးတိုင်း​ဒေသကြီး၊ အောင်မြေသာစံမြို့နယ်၊ ဒေါနဘွားရပ်ကွက်၊ ၁၀ လမ်း၊ ၆၂လမ်း ထောင့်မှာ လူငယ် ၁ ဦး ဆိုင်ကယ်မောင်းနေချိန် သေနတ်နဲ့ ပစ်ခံရလို့ သေဆုံးသွားတယ်လို့ သိရပါတယ်။

မတ်လ၂ရက် ဒီနေ့ နေ့လည် ၁ နာရီခွဲခန့်မှာ ပုသိပ်ကြီးမြို့နယ်၊ မြို့မရပ်ကွက်၊ အောင်မင်္ဂလာရပ်နေ မောင်အောင်မျိုးမြတ် ၂၀ နှစ်ဟာ ဆိုင်ကယ်မောင်းလာချိန် အနောက်ကနေ ဆိုင်ကယ်နဲ့လိုက်လာတဲ့ လူငယ် ၂ ဦးက အနားကပ် ပစ်ခတ်သွားတာ ဖြစ်တယ်လို့ ဒေသခံတဦးက ပြောပါတယ်။

“ပထမ သိရတာက ယာဥ်တိုက်မှုဖြစ်လို့ လူငယ် ၁ ဦး လမ်းဘေးလဲကျ သေဆုံးတယ်ဆိုပြီး သိရတယ်။ နောက်မှ မဟုတ်ဘဲ သေနတ်ပစ်ခတ်ခံရပြီး သေဆုံးသွားတယ်ဆိုတာ သိရတာ။ သေသွားတာကတော့ လူငယ်ပိုင်းပဲ။ သူအချက်အလက်ကတော့ နည်းနည်းပဲ သိရတယ်။ သူက လက်ရှိကျောင်းတက်နေသူလို့လည်း ပြန်ကြားမိတယ်။ သူဘာလုပ်လဲဆိုတာတော့ ​​မသိရဘူး” လို့ ပြောပါတယ်။

သေနတ်နဲ့ ပစ်ခတ်ခံရလို့ မောင်အောင်မျိုးမြတ်ဟာ ယာနားအောက် ဖောက်ဝင်ဒဏ်ရာ ၁ ချက် ရရှိပြီး နေရာမှာပဲ သေဆုံးသွားခဲ့ပြီး အလောင်းကိုတော့ လူမှုကူညီရေးအသင်းတွေက မန္တလေးပြည်သူ့ဆေးရုံကို သယ်သွားတယ်လို့ သိရပါတယ်။

ဒေသခံတွေကတော့ အဲဒီပစ်ခတ်မှုဟာ စစ်ကောင်စီဘက်က လုပ်တာဖြစ်နိုင်ပြီး PDF နဲ့ ပြည်သူတွေကို သွေးခွဲအောင်လုပ်တာ ဖြစ်နိုင်တယ်လို့ ဆိုထားသလို စစ်ကောင်စီထောက်ခံ
တယ်လီဂရမ် ချန်နယ်တွေမှာတော့ သေဆုံးသူ လူငယ်ဟာ PDF ၁ ဦး ဖြစ်ပြီး PDF အချင်းချင်း အဝေမတည့်ဖြစ်ရာမှ ပစ်ခတ်တာဖြစ်တယ်လို့ ဖော်ပြထားပါတယ်။

မန္တလေး UG အဖွဲ့တစ်ခုဖြစ်တဲ့ အောင်စည်တော်စစ်ဆင်ရေးအဖွဲ့ကို အဲ့ဒီကိစ္စနဲ့ပတ်သက်ပြီး မေးမြန်းခဲ့ပေမယ့် မသိရသေးဘဲ ဘယ်အဖွဲ့က ဘာကြောင့်လုပ်တယ်ဆိုတာ စုံစမ်းနေဆဲလို့ဆိုပါတယ်။

ဇန်နဝါရီလ ၃၁ ရက်က ပုသိမ်ကြီးမြို့နယ်၊ နန္ဒာတောင်ကျေးရွာနဲ့ မန္တလေး-မတ္တရာသွားကားလမ်းကြားမှာ မင်္ဂလာဆောင်က ပြန်လာတဲ့ အမျိုးသမီးငယ် ၂ ဦး ပစ်ခံရလို့ ၁ ဦး သေဆုံးသွားတယ်လို့ သိရပြီး သေဆုံးသူဟာ ဒလန်ဖြစ်တာကြောင့် ရှင်းလင်းရတာဖြစ်တယ်လို့ ဒေသကာကွယ်ရေးအဖွဲ့တစ်ခုက ထုတ်ပြန်ထားပါတယ်။

စာတည်း – ဇို