မြေလတ်အသံ၊ ဇူလိုင် ၁၊ ၂၀၂၅။

မန္တ‌လေး၊ အိုးဘိုထောင်ကို ပြောင်းရွှေ့ခံရချိန် ထောင်အရာရှိတဦးရဲ့ ရိုက်နှက်မှုကြောင့် နဖူးကွဲဒဏ်ရာရရှိခဲ့တဲ့ သပိတ်ခေါင်းဆောင် ကိုဝေမိုးနိုင် ဆေးရုံတက်ကုသခွင့်မရဘဲ ဒီ‌နေ့အထိ တိုက်ပိတ်ခံထားရတယ်လို့ မြန်မာနိုင်ငံလုံးဆိုင်ရာနိုင်ငံရေးအကျဥ်းသားများကွန်ရက်(PPNM)က ထုတ်ပြန်ထားပါတယ်။

ဇွန် ၁၂ ရက်နေ့က မုံရွာထောင်ကပြောင်းလာတဲ့ ကိုဝေမိုးနိုင်ကိုထောင်ဗူးဝမှာ အိုးဘိုထောင်အရာရှိက သံတုတ်နဲ့ ရိုက်နှက်ခဲ့မှုကြောင့် သတိ မေ့မျောသွားခဲ့ပြီး နဖူးကွဲဒဏ်ရာရရှိခဲ့တာလို့ သိရပါတယ်။

ဒါ့အပြင် ဦးခေါင်းနဲ့ခန္ဓာကိုယ်အနှံ့မှာ ထိခိုက်ဒဏ်ရာတွေရရှိခဲ့ပေမယ့် ထောင်အာဏာပိုင်တွေက ဆေးရုံကိုပို့ဆောင်တာမရှိဘဲ ဇူလိုင် ၁ ရက်၊ ဒီနေ့ထိ တိုက်ပိတ်ပြစ်ဒဏ်ချခံထားရတယ်လို့ ဆိုပါတယ်။

“ပေါက်ပြဲဒဏ်ရာပေါ့။ ဆိုးဆိုးဝါးဝါးဒဏ်ရာတွေကိုတော့ ချုပ်ထားရတယ်။ ဒါကိုတော့ အတည်ပြုဖို့ကြိုးစားနေဆဲဖြစ်ပါတယ်။ လုံးလုံးဆေးဝါးကုသမှု မပေးဘူးဆိုတဲ့အခြေအနေမျိုးမဖြစ်ရလေအောင် အင်မတန်စိုးရိမ်ရပြီး ဦးခေါင်းပေါက်ပြဲတဲ့ ဒဏ်ရာတွေဆိုရင် ဆရာဝန်တွေ၊ ဆေးရုံတွေဘက်ကနေမှ လာရောက်ပြီးမှ ကြည့်ရှုကုသတာမျိုးပေါ့။ ကုသတဲ့နေရာမှာလည်း လာရောက်ကြည့်ရှုပြီးမှ လိုအပ်တဲ့ ဒီချုပ်ဖို့လိုအပ်တာဆိုရင် ချုပ်ဖို့ကြိုးစားတာမျိုးတော့ ဆောင်ရွက်တာရှိတယ်”လို့ PPNMမှဦးဆောင်ကော်မတီဝင် ကိုသိုက်ထွန်းဦးက ပြောပါတယ်။

ဒါ့အပြင် ကိုဝေမိုးနိုင်ဟာ ပါဆယ်နဲ့ထောင်ဝင်စာဧည့်တွေ့ခွင့်‌တွေကိုပါ ကန့်သတ်ထားခံထားရပြီး ခြေကျင်းခတ်ကာ သီးခြားတိုက်မှာ တိုက်ပိတ်ပြစ်ဒဏ်ပေးခံထားရတာဖြစ်တယ်လို့ ကိုသိုက်ထွန်းဦးက ပြောပါတယ်။

ထောင်ဗူးဝမှာ ရိုက်နှက်ခံရချိန် ရိုက်နှက်သူ ထောင်အရာရှိက “မင်းလားကွာ..ဝေမိုးနိုင်၊ မင်းကိုငါတို့က စောင့်နေတာ။ မင်းလားကွာ..သပိတ်ခေါင်းဆောင်”ဆိုတဲ့စကားလုံးတွေကို ပြောပြီးဆဲဆိုကာရိုက်နှက်ခဲ့တာကြောင့် ကိုဝေမိုးနိုင်ကို ပုဂ္ဂိုလ်ရေးအရ ဂုဏ်သိက္ခာကျဆင်း​​စေပြီး ဦးချိုးတဲ့သဘောမျိုးလို့ ကိုသိုက်ထွန်းဦးက သုံးသပ်ပြောဆိုပါတယ်။

ပြီးခဲ့တဲ့ဇွန် ၁၂ ရက်မနက် ၅ နာရီကျော်မှာ မုံရွာထောင်ကနေ နိုင်ငံရေးအကျဥ်းသား ၁၀၀ ခန့်နဲ့ ရာဇဝတ်မှုကြောင့် အကျဥ်းကျနေတဲ့ အကျဥ်းသား ၁၀၀ ခန့်တို့မှာ အနော က်မြောက်တိုင်းစစ်ဌာနချုပ်(နမခ)မှ သံ ပြားကာကား ၂ စီး၊ အိမ်စီးကား ၃ စီး၊ ဆယ့်နှစ်ဘီးကား ၆ စီးတို့နဲ့ အိုးဘိုထောင်ကို ပို့ဆောင်ခံလိုက်ရတာပါ။

အဲဒီအထဲက ကိုဝေမိုးနိုင်အပါအဝင် နိုင်ငံရေး အကျဉ်းသား၊ အကျဉ်းသူတွေကို အိုးဘိုထောင်အဝင်မှာ ထောင်ဝန်ထမ်းတွေက ဝိုင်းဝန်းရိုက်နှက်ခဲ့ကြပြီး အများစုကို သီးခြားတိုက်ပိတ်ထားတယ်လို့ သိရပါတယ်။

ဒါ့အပြင် အိုးဘိုထောင်ကနေတဆင့် နိုင်ငံရေးအကျဥ်းသား တချို့နဲ့ ရာဇဝတ်မှုကြောင့်ကျခံနေရတဲ့ အကျဥ်းသားတချို့တို့ကို ဇွန် ၁၃ ရက်နေ့မှာ မြင်းခြံထောင်နဲ့ မ‌ကွေးထောင်တွေဆီ အသီးသီးပို့ဆောင်ခံလိုက်ရတယ်လို့ သိရပါတယ်။

စာတည်း – မြတ်

စဥ့်ကူး၊ ဇွန် ၂၉၊ ၂၀၂၅။

မန္တလေးတိုင်း၊ စဉ့်ကူးမြို့နယ်၊ လက်ပန်လှကျေးရွာ၊ ပြည်စိုးအောင်ရပ်ကွက်မှာ ဗုံးကြဲခံရလို့ နေအိမ်ထဲရှိနေတဲ့ အမျိုးသမီးတဦး ဗုံးစထိမှန်သေဆုံးခဲ့တယ်လို့ စဥ့်ကူးမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

သေဆုံးသူဟာ အသက် ၄၀ ခန့်အရွယ်ရှိ မခင်မျိုးဆန်းဆိုသူဖြစ်ပြီး ဇွန် ၂၉ ရက်နေ့လယ် ၁၂ နာရီခန့်က နေအိမ်မှာရှိနေချိန် စစ်ကောင်စီရဲ့ဂျက်ဖိုက်တာ ၁ စီးပေါ်ကနေကြဲချတဲ့ ဗုံးမှန်ကာ သေဆုံးသွားတာဖြစ်ပြီး နေအိမ် ၃ လုံးလည်းပျက်စီးခဲ့တယ်လို့ ဆိုပါတယ်။

“ပေါင် ၃၀၀ ဗုံး ၁ လုံးနဲ့ချတာ။ မခင်မျိုးစန်းက လမ်းမသွားနိုင်လို့ ခြေထောက်က ကျောက်ပတ်တီး စည်းထားရတာ။ နေအိမ်မှာရှိနေတဲ့အချိန်မှာ ဗုံးကသူ့ဘေးကိုတည့်တည့်ကျတာ။ အသားစအချို့နဲ့ အရိုး နည်းနည်းလောက်ဘဲပြန်ရတယ်”လို့ စဥ့်ကူးမြို့နယ်ပကဖ ပြန်ကြားရေးတာဝန်ခံ ကိုသံမဏိက ပြောပါတယ်။

စစ်ကောင်စီဘက်က ဗုံးလာကြဲခဲ့တဲ့ လက်ပန်လှကျေးရွာအနီးမှာ တိုက်ပွဲဖြစ်တာမရှိဘဲ ဒေသကာကွယ်ရေးအဖွဲ့ဝင်တွေလည်း ကျေးရွာထဲမှာနေထိုင်တာမရှိဘူးလို့ သိရပါတယ်။

ဇွန် ၂၂ ရက်ညပိုင်းကလည်း စဥ့်ကူးမြို့နယ်၊ ယက္ကန်းစင်တောင်ကျေးရွာရှိ ပါချုပ်ဆရာတော် တည်ထောင်ပေးထားတဲ့ မေတ္တာနန္ဒဆေးရုံကို စစ်ကောင်စီဘက်က ဗုံးကြဲခဲ့လို့ အမျိုးသမီး ၁ ဦးသေဆုံးပြီး ၁၂ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ ဇွန်‌ ‌၂၇၊ ၂၀၂၅။

မန္တလေးတိုင်းဒေသကြီး လွှတ်တော်ဥက္ကဌ ဦးအောင်ကျော်ဦးဟာ ဇွန် ၂၇ ရက်ဒီနေ့မနက်ပိုင်းမှာ မန္တလေးအိုးဘိုအကျဉ်းထောင်မှာ သေဆုံးခဲ့ပြီး ရုပ်အလောင်းကို နေအိမ်ပြန်သယ်ခွင့်မရဘူးလို့ ဦးအောင်ကျော်ဦးနဲ့ နီးစပ်သူတွေဆီက သိရပါတယ်။

အသက် ၆၉ နှစ်အရွယ် ဦးအောင်ကျော်ဦးဟာ ဒီမနက်အစောပိုင်းက ရုတ်တရက်မောတယ်ဆိုပြီး ထောင်ဆေးရုံကို ပို့ဆောင်စဥ် မနက် ၇ နာရီမှာ ထောင်ဆေးရုံမှာပဲကွယ်လွန်ခဲ့တာလို့ ဆိုပါတယ်။

“အလောင်းပြန်သယ်ခွင့်မပြုတာကိုတော့ သံသယဖြစ်မိတယ်။ ထောင်တွေရဲ့ လူ့အခွင့်အ‌ရေးချိုးဖောက်မှုက တကယ့်ကိုအဆိုးရွားဆုံးဖြစ်နေတဲ့အပြင် ရည်ရွယ်ချက်ထားပြီး နည်းပေါင်းစုံနဲ့ နိုင်ကျဉ်းတွေ အပေါ်ယုတ်မာကောက်ကျစ်နေကြတာ”လို့ မန္တလေးတိုင်းမှ လွှတ်တော်ကိုယ်စားလှယ်တဦး ကပြောပါတယ်။

ဦးအောင်ကျော်ဦးဟာ တကျော့ပြန်စစ်အာဏာသိမ်းတဲ့ ၂၀၂၁၊ ဖေဖော်ဝါရီ ၁ ရက်မှာပဲဖမ်းဆီးခံခဲ့ရပြီး နိုင်ငံတော်အကြည်ညိုပျက်စေမှု ၅၀၅ (က)နဲ့ ထောင်ဒဏ် ၃ နှစ်၊ သဘာဝဘေး ပုဒ်မ ၂၅ နဲ့ ထောင်ဒဏ် ‌၂ နှစ်၊ စုစုပေါင်းထောင်ဒဏ် ၅ နှစ် ကျခံခဲ့ရတာဖြစ်ပြီး လွတ်ရက်နီးလာချိန်မှာ ခုလိုရုတ်တရက် သေဆုံးခဲ့တာလို့ သိရပါတယ်။

သူဟာ အမျိုးသားဒီမိုကရေစီအဖွဲ့ချုပ်ပါတီ-NLD ရဲ့ မန္တလေးတိုင်း၊ ပုသိမ်ကြီးမြို့နယ်က လွှတ်တော်ကိုယ်စားလှယ် ၁ ဦးဖြစ်ပြီး ၂၀၁၅ နဲ့ ၂၀၂၀ ရွေးကောက်ပွဲနှစ်ခုလုံးမှာအနိုင်ရရှိခဲ့ကာ ၂၀၁၅ ကနေ ၂၀၂၀ အထိ မန္တလေးတိုင်းလွှတ်တော်ဥက္ကဌအဖြစ် တာဝန်ထမ်းဆောင်ခဲ့တာဖြစ်ပါတယ်။

ပြီးခဲ့တဲ့နှစ် အောက်တိုဘာ ၇ ရက် မနက်အစောပိုင်းကလည်း နိုင်ကျဉ်းတွေဆေးကုသခွင့်၊ ဆေးဝါးပေးပို့ခွင့် တင်းကျပ်ခံထားရတဲ့ အိုးဘိုထောင်မှာ ထိန်းသိမ်းခံထားရတဲ့ မန္တလေးတိုင်းဝန်ကြီးချုပ် ဒေါက်တာဇော်မြင့်မောင်ဟာ ကျန်းမာရေးအခြေအနေဆိုးဝါးလာတာကြောင့် မန္တလေးပြည်သူ့ဆေးရုံကြီးမှာ ကုသမှုခံယူနေချိန် သွေးကင်ဆာရောဂါနဲ့ကွယ်လွန်ခဲ့ပါသေးတယ်။

ဒေါက်တာဇော်မြင့်မောင်ရဲ့အလောင်းကိုတော့ မိသားစုတွေပြန်လည်ရရှိကာ ပြည်ကြီးတံခွန်မြို့နယ် ချမ်းမြသာယာရပ်ကွက်၊ ကျွဲဆည်ကန်(၃) လမ်းရှိ ၎င်းရဲ့ဖခင်ဖြစ်သူနေအိမ်မှာ နာရေးပြင်ဆင်ခွင့်ခဲ့ရခဲ့ပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅၊ ဇွန် ၂၆ အထိ အာဏာသိမ်းဖြစ်စဥ်နဲ့ပတ်သက်ပြီး ဖမ်းဆီးခံထားရသူ စုစုပေါင်း ၂၉,၃၃၃ ဦးရှိခဲ့ပြီး အဲ့ဒီထဲက ၂၂,၁၇၅ ဦးကဖမ်းဆီးခံထားရဆဲဖြစ်ကာ ၁၀,၈၇၈ ဦးက ထောင်ဒဏ်ချမှတ်ခံထားရတယ်လို့ နိုင်ငံရေးအကျဥ်းသားများကူညီစောင့်ရှောက်ရေးအသင်း – AAPP ရဲ့ အစီရင်ခံစာအရသိရပါတယ်။