မတ္တရာ၊ ဧပြီ ၁၁၊ ၂၀၂၅။

မန္တလေးတိုင်း၊ မတ္တရာမြို့နယ်၊ ရေချောင်းဘိုကျေးရွာကို ဧပြီ ၁၀ ရက် ယမန်နေ့မနက် ၁၁ နာရီကျော်မှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးပြီး ကလေးငယ် ၁ ဦးအပါ ၃ ဦးဒဏ်ရာရရှိခဲ့တယ်လို့ သိရပါတယ်။

အိမ်ခြေ ၁၀၀ ခန့်ရှိ ရေချောင်းဘိုကျေးရွာကို စစ်ကောင်စီတပ်က တိုက်လေယာဉ် ၁ စီးနဲ့ ဗုံးသီး ၂ လုံးချတိုက်ခိုက်ခဲ့တာဖြစ်ပြီး လူနေအိမ်တွေကို ကျရောက်ပေါက်ကွဲခဲ့တာလို့ ဆိုပါတယ်။

“သေဆုံး၊ ဒဏ်ရာရတဲ့သူတွေက မိသားစု၊ ဆွေမျိုးလားဆိုတာကို မသိရပါ။ ဗုံးကြဲချိန်မှာ သူတို့က နေအိမ်ထဲမှာရှိနေကြတာပါ။ တိုက်ပွဲဖြစ်ပွားခြင်းမရှိဘဲ တိုက်ခိုက်ခံရတာပါ။” လို့ မတ္တရာမြို့နယ်ပြည်သူ့ကာကွယ်ရေးအဖွဲ့မှ သတင်းတာဝန်ခံ ဘိုတောက်က ပြောပါတယ်။

လေယာဉ်ဗုံးထိမှန်တာကြောင့် ရေချောင်းဘိုကျေးရွာနေ မချိုဇင်ဦး ၃၅ နှစ် သေဆုံးခဲ့ပြီး ဦးမျိုးလွင် ၆၁ နှစ်၊ မမာကြည် ၄၇ နှစ် နဲ့ မသိမ့်သိမ့်ထွန်း ၇ နှစ်တို့မှာ ဒဏ်ရာတွေရရှိခဲ့တယ်လို့ သိရပါတယ်။

ဗုံးကြဲတိုက်ခိုက်ခံရတဲ့ကျေးရွာမှာ မတ္တရာမြို့ရဲ့မြောက်ဘက် ၄ မိုင်ခန့်အကွာမှာရှိတာဖြစ်ပြီး ပြီးခဲ့တဲ့မတ် ၁၁ ရက်ကလည်း မတ္တရာမြို့နယ်၊ ဝသုန္ဒရရွာကို လေယာဉ်ဗုံးကြဲတိုက်ခိုက်ခဲ့တာကြောင့် မိသားစုဝင် ၅ ဦး သေဆုံးခဲ့ပါသေးတယ်။

နိုင်ငံရေးအကျဉ်းသားများကူညီစောင့်ရှောက်ရေးအသင်း -AAPP ရဲ့ ဧပြီ ၃ ရက် စာရင်းတွေအရ ယခုနှစ် ဇန်နဝါရီ ၁ ရက်ကနေ မတ် ၃၁ ရက်အထိ စစ်ကောင်စီကြောင့် နိုင်ငံတဝန်းအမျိုးသမီး ၁၄၇ ဦး၊ အမျိုသား ၂၀၅ ဦး၊ စုစုပေါင်း ၃၅၃ ဦး သေဆုံးခဲ့ပြီး အဲ့ဒီထဲက လေကြောင်းတိုက်ခိုက်ခံရမှုကြောင့်သေဆုံးသူ ၂၃၅ ဦးနဲ့ သေဆုံးမှုအများဆုံးဖြစ်တယ်လို့ ဆိုထားပါတယ်။

စာတည်း – ဟိန်းစံ

မန္တလေး၊ ဒီဇင်ဘာ ၂၈၊ ၂၀၂၂။

မန္တလေးတိုင်း၊ မတ္တရာမြို့နယ်၊ ပိုဝမြောက်ရွာနဲ့ စိန်ပန်းကုန်းရွာကဖမ်းဆီးခံလိုက်ရတဲ့ ဒေသခံ ၁၈ ဦးထဲက ၁၅ ဦးကို ဒီဇင်ဘာလ ၂၈ ရက်ဒီမနက်မှာ ပြန်လွှတ်ပေးခဲ့ပေမယ့် အဲဒီထဲက စစ်သင်တန်းဆင်းထားသူ ၃ ဦးကိုတော့ ဆက်လက်ဖမ်းဆီးထားတယ်လို့ သိရပါတယ်။

ပြန်မလွှတ်ခဲ့သူ ၃ ဦးကတော့ အသက် ၂၃ နှစ်အရွယ် ကိုနိုင်းနိုင်း(ခ)နိုင်းထက်ကျော်၊ ကိုပြည့်ပြည့်ကျော်နဲ့ အသက် ၂၉ နှစ်အရွယ် ကိုအောင်မျိုးနိုင်တို့ဖြစ်ကြပြီး၊ သူတို့ကို စစ်ကောင်စီတပ်သားတွေက စစ်ကြောင်းနဲ့အတူ မတ္တရာမြို့ဘက်ကို ခေါ်သွားတယ်လို့ နွေဦးတော် လှန်ရေး – မတ္တရာမှ တာဝန်ရှိသူတဦးက ပြောပါတယ်။

“အဲဒီသုံးယောက်က နယ်စည်းမခြားတပ်ရင်း ၁၈ ကနေ သင်တန်းဆင်းပြီး ပကဖဖွဲ့ဖို့ ရွာတွေပြန်ဆင်းလာတဲ့လူငယ်တွေပါ။ သူတို့နဲ့တူတူ ဖမ်းခံထားရတဲ့ပြည်သူတွေကိုတော့ ပြန်လွှတ်ပေးခဲ့တယ်။ စကစတွေက အဲဒီလူငယ်သုံးယောက်ကို ကြိုးတုတ်ပြီးတော့ ပိုဝရွာကနေ မတ္တရာဘက်ကို ထွက်သွားကြတယ်” လို့ ဆိုပါတယ်။

အခုပြန်လွှတ်ခဲ့တဲ့ပြည်သူ ၁၅ ဦးနဲ့ စစ်သင်တန်းဆင်း ၃ ဦးတို့ကို စစ်ကောင်စီတပ်သားတွေက ဒီဇင်ဘာလ ၂၆ ရက်မှာ ဖမ်းဆီးခဲ့တာဖြစ်ပြီး၊ သူတို့ကတော့ စိန်ပန်းကုန်းရွာက ၄ ဦးနဲ့ ပိုဝမြောက်ရွာက ၁၄ ဦးတို့ဖြစ်ကြပါတယ်။

“စကစတွေက သူတို့အကုန်လုံးကိုဖမ်းပြီးတော့ ပိုဝမြောက်ရွာက ကျော်မျိုးဝင်းဆိုတဲ့ သူရဲ့နေအိမ်ထဲမှာ သော့ခတ်ပြီးပိတ်ထားတာ။ သူတို့မလွှတ်လာခင် မနေ့ကအဲဒီရွာအနားမှာ ကာကွယ်ရေးတပ်ဖွဲ့တွေနဲ့ အပြန်အလှန်ပစ်ခတ်တာ ဖြစ်ခဲ့သေးတယ်။ ကြာကြာတော့ မဟုတ်ဘူး။ အဲဒီပစ်ခတ်နေတဲ့အချိန်မှာ ကျော်မျိုးဝင်းဆိုသူက ပထဆုံးထွက်ပြေးလွတ်မြောက်လာခဲ့တယ်။ ဒီမနက်ရောက်တော့ ကျန်တဲ့သူတွေကို ပြန်လွှတ်ပေးခဲ့ပြီးတော့ သင်တန်းဆင်းသုံးယောက်ကို ကြိုးတုတ်ပြီး ရွာကနေ ထွက်သွားကြတာ”လို့ အထက်ပါ တာဝန်ရှိသူက ဆိုပါတယ်။

အလားတူ ပြီးခဲ့တဲ့ဒီဇင်ဘာလ ၂၄ ရက်မှာလည်းစစ်ကောင်စီတပ်တွေက စိန်ပန်းကုန်းရွာကို မီးရှို့ပြီး ဒေသခံ ၄ ဦးကို ဖမ်းဆီးသွားခဲ့ရာ အဲဒီထဲက ၁ ဦးရဲ့ရုပ်အလောင်းကိုတော့ ဒီဇင်ဘာလ ၂၇ ရက်မနေ့ကမနက်ပိုင်းမှာ တွေ့ရှိခဲ့ရတယ်လို့ ဒေသခံတွေက ပြောပါတယ်။

အဆိုပါစစ်ကောင်စီတပ်တွေအနေနဲ့ ခုလိုကျေးရွာတွေကိုမီးရှို့ပြီး ဒေသခံတွေကို ဖမ်းဆီးနေတာဟာ ဒီဇင်ဘာလ ၂၃ ရက်က စိန်ပန်းကုန်းကျေးရွာအနီးမှာ စစ်ကောင်စီရဲ့မော်တော်ဘုတ်တစင်း ဒရုန်းနဲ့တိုက်ခိုက်ခံလိုက်ရတာကို အခဲမကြေတဲ့အတွက် လုပ်ဆောင်နေတာဖြစ်နိုင်တယ်လို့ ကာကွယ်ရေးတပ်ဖွဲ့တွေနဲ့ ဒေသခံတွေက ခန့်မှန်းပြောဆိုနေကြပါတယ်။

မန္တလေး၊ ဒီဇင်ဘာ ၂၈၊ ၂၀၂၂။

မန္တလေးတိုင်း၊ မတ္တရာမြို့နယ်၊ စိန်ပန်းကုန်းကျေးရွာကနေ စစ်ကောင်စီတပ်တွေဖမ်းဆီးသွားခဲ့တဲ့ အမျိုးသား ၄ ဦးထဲက ၁ ဦးရဲ့ရုပ်အလောင်းကို ဒီဇင်ဘာလ ၂၇ ရက်မနေ့ကမနက် ၉ နာရီဝန်းကျင်မှာ တွေ့ရှိခဲ့တယ်လို့ သိရပါတယ်။

အဲဒီရုပ်အလောင်းကိုတော့ ပိုဝမြောက်ရွာရဲ့ အရှေ့ဘက်တံတားအနီးက တောစပ်မှာ ထွက်ပြေးတိမ်းရှောင်နေတဲ့ဒေသခံတွေက တွေ့ရှိခဲ့တာလို့ နွေဦးတော်လှန်ရေး – မတ္တရာမှ တာဝန်ရှိသူက မြေလတ်အသံကို ပြောပါတယ်။

“အလောင်းတွေ့ခဲ့ရတဲ့ဒေသခံက စိန်ပန်းကုန်းရွာအနောက်ဘက် မြေနုကျွန်းမှာ တောင်သူလုပ်နေတဲ့ စစ်ကိုင်းတိုင်းဘက် မင်းရွာတောင်ကလို့ သိရပါတယ်။ တယောက်ထဲ တွေ့သေးတာပါ။ နောက်တယောက်ကို ရှာဖွေနေပါတယ်။ အလောင်းက တော်တော်စုတ်ပြတ်နေပြီ။ ခေါင်းလည်းပြားနေတယ်”လို့ ဆိုပါတယ်။

ပြီးခဲ့တဲ့ဒီဇင်ဘာလ ၂၄ ရက်မှာ စစ်ကောင်စီတပ်တွေက စိန်ပန်းကုန်းကျေးရွာကို မီးရှို့ခဲ့ပြီး အဲ့ဒီကျေးရွာတွေဘက်မှာ လာရောက်စစ်ရှောင်ရင်း တောင်ယာလုပ်နေတဲ့ဒေသခံ ၄ ဦးကို ဖမ်းဆီးသွားကာ အဲဒီထဲက ၁ ဦးရဲ့ ရုပ်အလောင်းကို တွေ့ရှိခဲ့ရတာဖြစ်ပါတယ်။

ဒါ့အပြင်ကျန်တဲ့ဖမ်းဆီးခံ ၃ ဦးထဲက ၂ ဦးမှာတော့ မတ္တရာမြို့ရဲစခန်းမှာ ချုပ်နှောင်ခံထားရပြီး ကျန် ၁ ဦးကိုတော့ ဒီဇင်ဘာလ ၂၈ ရက်ဒီကနေ့မနက်အထိ ရှာမတွေ့သေးဘူးလို့ အထက်ပါတာဝန်ရှိသူက ပြောပါတယ်။

“မီးရှို့တဲ့နေ့က လေးယောက်ဖမ်းခံရတာ။ အဲဒီလေးယောက်မှာ နှစ်ယောက်ကတော့ ရဲစခန်းကို ရောက်နေတယ်လို့ သိရတယ်။ တယောက်ကတော့ အလောင်းတွေ့တယ်။ ကျန်တယောက်ကတော့ အခုထိရှာမတွေ့သေးဘူး။ သူတို့လေးယောက်စလုံးရဲ့ နာမည်တွေကိုတော့ သိရအောင် စုံစမ်းနေပါတယ်”လို့ ဆိုပါတယ်။

စစ်ကောင်စီရဲ့ မီးရှို့တာကို ခံလိုက်ရတဲ့ စိန်ပန်းကုန်းကျေးရွာမှာ အိမ်ခြေ ၁၅၀ ကျော်ရှိပြီး၊ အဲဒီထဲက နေအိမ် ၁၂ လုံး ပြာကျပျက်စီးသွားခဲ့ရသလို ကျေးရွာသူ၊သားတွေအနေနဲ့လည်း အခုအချိန်ထိ ဘေးလွတ်ရာမှာ တိမ်းရှောင်နေကြရတယ်လို့ သိရပါတယ်။

မန္တလေး၊ ဒီဇင်ဘာ ၂၆၊ ၂၀၂၂။

မန္တလေးတိုင်း၊ မတ္တရာမြို့နယ်၊ ပိုဝမြောက်ရွာကို စစ်ကောင်စီတပ်သားတွေက ဒီဇင်ဘာလ ၂၆ ရက်ဒီကနေ့နေ့လည် ၂ နာရီဝန်းကျင်မှာ မီးရှို့ပြီး ရွာခံ ၃၀ ဦးနီးပါးကိုလည်း ဖမ်းဆီးသွားတယ်လို့သိရပါ တယ်။

စိန်ပန်းကုန်းကျေးရွာကို မီးရှို့ခဲ့တဲ့စစ်ကောင်စီတွေဟာ တိုက်ပွဲမဖြစ်ပဲ ပိုဝမြောက်ရွာကိုဝင်ပြီး နေအိမ် ၁ လုံးကိုမီးရှို့ခဲ့တဲ့အပြင် ဒေသခံတွေကိုပါဖမ်းဆီးသွားတာဖြစ်တယ်လို့ Peacock Warrior Forceမှတာဝန် ခံက မြေလတ်အသံကိုပြောပါတယ်။

“စစ်ကောင်စီတွေက ပိုဝမြောက်ရွာက နေအိမ် တလုံးကိုမီးရှို့တယ်။ ပြီးတော့ ရွာထဲက လူကြီး၊လူငယ် ၂၀ ကျော် ၃၀ လောက်ကိုဖမ်းတယ်။ သူတို့ကို ကြိုးတုတ်ထားပြီးတော့ ရိုက်နှက်ကြတယ်။ ဖမ်းခံထားရသူတွေအကုန်လုံးက ပြည်သူတွေပါ။ နာမည်တွေမသိရသေးဘူး။ စကစတွေက သူတို့ကိုမတ္တရာဘက်ကို ခေါ်သွားတယ်” လို့ဆိုပါတယ်။

ဒါ့အပြင် ပြီးခဲ့တဲ့ဒီဇင်ဘာလ ၂၄ ရက်ညပိုင်းမှာလည်း စိန်ပန်းကုန်းကျေးရွာကို စစ်ကောင်စီတပ်တွေက မီးရှို့ခဲ့တာကြောင့် နေအိမ် ၁၂ လုံးပျက်စီးပြာကျသွားခဲ့ပြီး အဲဒီနေ့မှာပဲ ပိုဝမြောက်ရွာ၊ ပိုဝတောင်ရွာက ဒေသခံတွေဟာ ဘေးလွှတ်ရာကို ထွက်ပြေးတိမ်းရှောင်သွားခဲ့ရတယ်လို့ ထောက်ပို့လုပ်ငန်းတွေလုပ်ဆောင်နေသူတဦးက ပြောပါတယ်။

“ထွက်ပြေးနေရတဲ့ဒေသခံတွေက ရွာသုံးရွာကဆိုတော့ လူဦးရေတထောင်လောက်ရှိတယ်ဗျ။ အခုအဖမ်းထိတဲ့သူတွေက ထွက်မပြေးဘဲရွာမှာကျန်ခဲ့ကြသူတွေပါ။ ထွက်ပြေးတဲ့သူတွေက အခုတော့ ဧရာဝတီမြစ်ရေခမ်းလို့ သောင်ထွန်းနေတဲ့ကုန်းတွေမှာ ကျူပင်တွေနဲ့အဆောင်တွေလုပ်ပြီးတော့ နေနေကြရတယ်” လို့ဆိုပါတယ်။

စစ်ကောင်စီတပ်တွေအနေနဲ့ ကျေးရွာတွေကိုမီးရှို့ပြီးတော့ ဒေသခံတွေကိုဖမ်းဆီးနေတာဟာ ဒီဇင်ဘာလ၂၃ ရက်က စိန်ပန်းကုန်းကျေးရွာအနီးမှာ စစ်ကောင်စီရဲ့မော်တော်ဘုတ်ဒရုန်းနဲ့ တိုက်ခိုက်ခံလိုက်ရတာကို အခဲမကျေတဲ့အတွက် အခုလိုလုပ်ဆောင်နေတာဖြစ်နိုင်တယ်လို့ ကာကွယ်ရေးတပ်ဖွဲ့တွေနဲ့ဒေသခံတွေကလည်း ခန့်မှန်းပြောဆိုနေကြပါတယ်။

အဲ့ဒီနေ့တိုက်ခိုက်မှုမှာ မော်တော်ဘုတ်ထဲမှာ လိုက်ပါလာတဲ့ စစ်သားတွေထဲက ၁ ဦးပွဲချင်းပြီး သေဆုံးခဲ့ပြီး၊ နောက်ထပ် ၅ ဦးမှာလည်း ဒဏ်ရာပြင်းထန် ရရှိသွားခဲ့တယ်လို့သိရပါတယ်။

မန္တလေး၊ ဒီဇင်ဘာ ၂၄၊ ၂၀၂၂။

မန္တလေးတိုင်း၊ မတ္တရာမြို့နယ်၊ စိန်ပန်းကုန်းကျေးရွာကို စစ်ကောင်စီတပ်တွေက ဒီဇင်ဘာလ၂၄ ရက်ဒီကနေ့ည ၆ နာရီ၀န်းကျင်ကစတင်ပြီး မီးရှို့နေတယ်လို့ သိရပါတယ်။

အဲဒီကျေးရွာမှာ အိမ်ခြေ ၁၅၀ ကျော်ရှိပြီး စစ်ကောင်စီတပ်တွေက စစ်ကြောင်း ၂ ကြောင်းနဲ့ နေရာ ၄ နေရာခွဲကာမီးရှို့နေတာလို့ Peacock Warrior Force မှတာဝန်ခံက မြေလတ်အသံကိုပြောပါတယ်။

“ရွာသားတွေကတော့ မနေ့ကတည်းကတိမ်းရှောင်နေကြရတယ်။ အခုဆိုရင် တရွာလုံးလောင်ကျွမ်းနေလောက်ပြီ။ စကစတွေက ဒီရွာကိုမီးမရှို့သေးခင် ရွာထဲကနေပြီးတော့ လက်နက်ကြီးတွေနဲ့ ရွာတန်းရှည်ရွာကို လှမ်းထုခဲ့လို့ အဲဒီရွာကနွားတွေတော်တော်များများ သေခဲ့တယ်ဗျ။ လူတွေကတော့ဘာမှမဖြစ်ခဲ့ဘူး” လို့ဆိုပါတယ်။

ဒါ့အပြင် အခုမီးရှို့နေတဲ့စစ်ကောင်စီတပ်တွေဟာ ဒီဇင်ဘာလ ၂၃ ရက်မနေ့က စိန်ပန်းကုန်းရွာအနီးမှာ စစ်ကောင်စီမော်တော်ဘုတ်တစီး ဒရုန်းနဲ့တိုက်ခိုက်ခံလိုက်ရပြီးနောက် မတ္တရာမြို့ကနေ ကား ၃ စီးနဲ့ရောက်ရှိလာတဲ့ တပ်သားတွေဖြစ်တယ်လို့ အထက်ပါတာဝန်ခံကပြောပါတယ်။

“မော်တော်ဘုတ်ကို ဒရုန်းနဲ့တိုက်ခိုက်ခဲ့တဲ့အခါ စစ်ကောင်စီတယောက်သေပြီးတော့ ငါးယောက် ဒဏ်ရာပြင်းပြင်းထန်ထန်ရသွားခဲ့တယ်။ အဲဒါကိုမကျေနပ်လို့ စကစတွေက ကားတွေနဲ့ ရွာကိုချက်ချင်းဆိုသလိုရောက်လာခဲ့ကြတယ်။ ဒါပေမဲ့မနေ့က ရွာကိုမီးမရှို့သေးဘူး။ ဒီနေ့မှာ ထပ်ပြီးတော့ လက်နက်ကြီးတွေတင်လာတဲ့ ကားနှစ်စီးရောက်လာတယ်။ အဲဒါပြီးတော့မှရွာကိုမီးရှို့နေတာ”လို့ဆိုပါတယ်။

လက်ရှိအချိန်ထိ စိန်ပန်းကုန်းရွာအနီးမှာ စစ်ကောင်စီတပ်တွေရှိနေပြီး အိမ်ခြေဘယ်လောက်မီးလောင်ဆုံးရှုံးမလဲဆိုတာ မသိရသေးပေမယ့် မီးအားပြင်းတဲ့အတွက် တရွာလုံးနီးပါးပြာကျနိုင်တယ်လို့လည်း အထက်ပါတာ၀န်ခံက ခန့်မှန်းထားပါတယ်။

ကာကွယ်ရေးတပ်ဖွဲ့တွေအနေနဲ့ စစ်ကောင်စီရဲ့ မော်တော်ဘုတ်ကို တိုက်ခိုက်ခဲ့ပြီးနောက် စိန်ပန်းကုန်းရွာနဲ့ အနီးအနားကျေးရွာတွေက ဒေသခံတွေကို စစ်ကောင်စီတပ်တွေရဲ့အန္တရာယ်ကနေလွတ်မြောက်အောင် လုံခြုံတဲ့နေရာတွေကို ပို့ပေးခဲ့ကြတယ်လို့သိရပါတယ်။

မန္တလေး၊ ဒီဇင်ဘာ ၂၃၊ ၂၀၂၂။

မန္တလေးတိုင်း၊ မတ္တရာမြို့နယ်၊ အိုက့်ဒိုင်ကျေးရွာနဲ့ ရွှေဂဲပြန်ကျေးရွာက ဒေသခံ ၃ ထောင်ကျော်မှာ တောထဲမှာ တဲဆောင်တွေဆောက်ပြီးတော့ ခိုလှုံနေရတာ ၁ လကျော်ရှိနေပြီလို့ ကာယကံရှင်တွေကပြောပါတယ်။

ပြီးခဲ့တဲ့ နိုဝင်ဘာလကစတင်ပြီးတော့ စစ်ကောင်စီတွေက အိုက့်ဒိုင်ရွာနဲ့ ရွှေဂဲပြန်ရွာက နေအိမ်တွေကို မီးရှို့ဖျက်စီးခဲ့တဲ့အပြင် မီးမလောင်ဘဲကျန်နေတဲ့ နေအိမ်တွေကိုလည်း ရိုက်နှက်ဖျက်စီးခဲ့တာကြောင့် ရွာလုံးကျွတ်ထွက်ပြေးလာခဲ့ကြရတာဖြစ်တယ်လို့ အိုက့်ဒိုင်ကျေး ရွာသူတဦးက မြေလတ်အသံကိုပြောပါတယ်။

“တန်ဆောင်မုန်းလကတည်းက ပြေးနေရတာပါ။ အခုအချိန်ထိ တောထဲမှာပုန်းနေရတုန်းပါရှင့်။ တောထဲမှာကျူပင်တွေနဲ့ တဲဆောင်ငယ်တွေလုပ်ပြီးတော့ ပုန်းနေရတာပါ။ ကျူတောထဲမှာ အိပ်၊ ကျူတောထဲမှာစားနေရတယ်။ အခုကျမတို့ အအေးဒဏ်ကို တော်တော်လည်းခံစားနေရပါတယ်။ စောင်တထည်တည်းနဲ့ နှစ်ယောက်သုံးယောက်ကျစီခြုံနေရပါတယ်”လို့ဆိုပါတယ်။

မီးရှို့ခံလိုက်ရတဲ့ အိုက့်ဒိုင်ကျေးရွာနဲ့ ရွှေဂဲပြန်ကျေးရွာမှ အိမ်ခြေ ၇၀၀ ကျော်က လူဦးရေ ၃ ထောင်ကျော်မှာ အခုအချိန်ထိနေရပ်ကိုမပြန်နိုင်သေးဘဲ တောထဲမှာခိုလှုံနေရတာကြောင့် အနွေးအထည်တွေ၊ စား နပ်ရိက္ခာတွေနဲ့ ဆေးဝါးပစ္စည်းတွေ အရေးတကြီးလိုအပ်နေတယ်လို့ ကူညီပေးနေသူတဦးက ပြောပါတယ်။

“ဒီဒေသခံတွေက တောထဲခိုလို့ရမယ့်နေရာတွေမှာ နေနေရတယ်။ ကိုင်းပင်တွေကို ခုတ်ပြီး၊ ရိတ်ပြီးတော့ နှင်းလုံအောင်ဆိုပြီးတော့ အမိုးတွေလုပ်ပြီးနေကြတယ်။ ပြောရမယ်ဆိုရင် အခုကဧရာဝတီမြစ်ရေကျနေတော့ သဲ သောင်တွေပေါ်ထွန်းနေတယ်။ အဲဒီပေါ်မှာဘဲ ကျူတွေကိုခုတ်ပြီးနေနေရတာ။ ကျန်းမာရေးအတွက်ကလည်း ဆေးဆရာတွေမရှိတော့ ရောဂါတွေဖြစ်လာရင် စိုးရိမ်ရမယ့်အနေအထားရှိပါတယ်”လို့ဆိုပါတယ်။

အခုလိုနေထိုင်နေကြရတဲ့ဒေသခံတွေအနေနဲ့ မိမိတို့နေရပ်ကို ပြန်ချင်နေကြပေမယ့် နေအိမ်တွေမရှိတော့တာရယ်၊ စစ်ကောင်စီတပ်သားတွေနဲ့ ပြန်တွေ့မှာကို ကြောက်လန့်နေကြရတာကြောင့် တောထဲမှာဘဲဒုက္ခခံပြီး ခိုလှုံနေကြရတာဖြစ်တယ်လို့ ရွှေဂဲပြန်ရွာသားတဦးက ပြောပါတယ်။

“ရွာကအိမ်တွေက မီးရှို့ခံထားရတာများပါတယ်။ စစ်ကောင်စီတွေက မီးမလောင်တဲ့အိမ်တွေဆိုရင်လည်း ရိုက်ဖျက်တယ်။ ဆန်တွေ၊ဆီတွေဆိုရင်လည်း ယူသွားတယ်။ စျေးဆိုင်တွေကဆိုရင်လည်း စားသောက်လို့ရမယ့်ပစ္စည်းတွေ အကုန်လုံးကိုယူသွားတာ။ ပြောရမယ်ဆိုရင် စစ်ကောင်စီတွေက မင်းမဲ့စရိုက်တွေလုပ်ပြီးတော့ ရွာကိုဖျက်စီးသွားတာဗျ။ ကျနော်တို့လည်း အသက်တချောင်းရှင်နေရင်ပြီးတော့ ဆိုပြီး အခုလိုရွာကိုမပြန်ရဲဘဲ တောထဲမှာခိုနေရတာ”လို့ ဆိုပါတယ်။

ဒါ့အပြင် အခုလိုတောထဲမှာ ၁ လကျော်ကြာခိုလှုံနေကြရတဲ့ သက်ကြီးရွယ်အိုးတွေ၊ ကလေးသူငယ်တွေအတွက် ဆေးဝါးပစ္စည်းတွေ၊ အနွေးအထည်တွေနဲ့ စားနပ်ရိက္ခာတွေကို နီးစပ်ရာကျေးရွာတွေနဲ့ အဖွဲ့အစည်းတွေက ကူညီထောက်ပံ့ပေးထားရတာကြောင့် ပြည်တွင်း၊ပြည်ပကအလှူရှင်တွေအနေနဲ့ တတ်နိုင်သလောက်လည်း လှူဒါန်းပေးကြဖို့ကို ဒေသခံတွေနဲ့ ကူညီဆောင်ရွက်ပေးနေသူတွေက မျှော်လင့်နေကြပါတယ်။

မတ္တရာ၊ ဒီဇင်ဘာ ၂၂၊ ၂၀၂၂။

မန္တလေးတိုင်း၊ မတ္တရာမြို့နယ်၊ သုံးဆယ်ပေးကျေးရွာမှာ တပ်စွဲနေထိုင်တဲ့ စစ်ကောင်စီတွေကို ဒီဇင်ဘာ ၂၁ ရက် မနက် ၁၁ နာရီကျော်လောက်မှာ ဒရုန်းနဲ့ဗုံးကြဲတိုက်ခိုက်ခဲ့လို့ ၄ ဦး ထိမှန်ဒဏ်ရာရရှိသွားခဲ့တယ်လို့ သိရပါတယ်။

စစ်ကောင်စီတွေက သုံးဆယ်ပေးကျေးရွာ ဘုန်းတော်ကြီးကျောင်းထဲမှာ တပ်စွဲနေထိုင်ပြီးတော့ ရွာရဲ့အနောက်ဖက်မှာ ကင်းပုန်းဝပ်နေချိန် ကာကွယ်ရေးတပ်ဖွဲ့ ၄ ဖွဲ့က ဒရုန်းနဲ့ဗုံးကြဲတိုက်ခိုက်ခဲ့တာ ဖြစ်တယ်လို့ SKY HERO-Maday မှ တာဝန်ရှိသူတဦးက မြေလတ်အသံကို ပြောပါတယ်။

“ကျနော်တို့တပ်ဖွဲ့တွေက ကင်ပုန်းဝပ်နေတဲ့ စစ်ကောင်စီတွေကို ဒရုန်းနဲ့တိုက်ခိုက်တဲ့အခါ ဗုံးသီးတလုံးက သူတို့ကင်းပုန်းဝပ်နေတဲ့ အနီးစပ်ဆုံးနေရာကို ကျသွားခဲ့ပါတယ်။ အဲဒါကြောင့် လေးယောက် ထိခိုက်ဒဏ်ရာရသွားခဲ့ပါတယ်။ သေတော့ မသေခဲ့ဘူးပေါ့။ ကျနော်တို့ဖက်ကတော့ အထိအခိုက်မရှိ ပြန်ဆုတ်နိုင်ခဲ့ပါတယ်” လို့ဆိုပါတယ်။

တိုက်ခိုက်ချိန်မှာ လေတိုက်နှုန်းပြင်းထန်နေချိန်ဖြစ်လို့ ပစ်မှတ်လွဲချော်ကာ ဒဏ်ရာရှိမှုသာ ရှိခဲ့တာလို့ ဆိုပါတယ်။

တိုက်ခိုက်မှုကိုတော့ ယူနီကွန်းပြောက်ကျားတပ်ဖွဲ့၊ SKY HERO – Madaya၊ ဒေါင်းစစ်သည်ပြည်သူ့ကာကွယ်ရေးတပ်ဖွဲ့ (မတ္တရာ)၊ Peacock Warrior Force-Madaya အဖွဲ့တို့က ပူးပေါင်းတိုက်ခိုက်ခဲ့ကြတာဖြစ်တယ်လို့ သိရပါတယ်။

မန္တလေး၊ ဒီဇင်ဘာ ၂၁၊ ၂၀၂၂။

မန္တလေးတိုင်း၊ မတ္တရာမြို့နယ်၊ မြွေဟင်္ဟာရွာက စစ်ကောင်စီလက်အောက်ခံ အုပ်ချုပ်ရေးမှူး သေနတ်နဲ့ပစ်သတ်ခံရပြီး သူ့ရဲ့အလောင်းကိုလာသယ်တဲ့ စစ်ကောင်စီတပ်သားတွေလည်းမိုင်းဆွဲခံခဲ့ရပါတယ်။

ဒီဇင်ဘာလ ၂၀ ရက်မနေ့ကမနက် ၇ နာရီလောက်မှာ အသက် ၄၀ နှစ်ဝန်းကျင်ရှိ မြွေဟင်္သာရွာ အုပ်ချုပ်ရေးမှူးဦးသန့်ဇင်ကို ရွာနဲ့တမိုင်သာသာဝေးတဲ့ မြွေတလိုင်းကျေးရွာအနီးမှာ တောကြီးမြွေပွေးအဖွဲ့က သေနတ်နဲ့ပစ်ခတ်ရှင်းလင်းခဲ့တာပါ။

“ဒီနေ့မနက် ၇ နာရီလောက်မှာ အုပ်ချုပ်ရေးမှူးကိုသေနက်နဲ့ပစ်ခဲ့တယ်။ စစ်ကောင်စီနဲ့ပေါင်းပြီး PDF နဲ့ဆက်သွယ်သူတွေဖမ်းတယ်၊ CDM လုပ်တဲ့သူတွေကိုလည်း ပြန်လုပ်ဖို့ခြိမ်းခြောက်တယ်။ ခေါင်း ၁ ချက် ရင်ဘက် ၂ ချက်ပစ်ခတ်ခဲ့တယ်” လို့ တောကြီးမြွေပွေးအဖွဲ့ခေါင်းဆောင်ဗိုလ်တီက ပြောပါတယ်။

ဒါ့အပြင် သူ့ရဲ့အလောင်းကိုလာသယ်တဲ့ စစ်ကောင်စီတပ်သားတွေကိုလည်း နှစ်ကြိမ်ထပ်မံမိုင်းဆွဲတိုက်ခိုက်ခဲ့ရာ စစ်သား ၅ ဦးခန့်သေဆုံးနိုင်တယ်လို့ဆိုပါတယ်။

“အလောင်းလာသယ်တဲ့ကားမိုင်းထပ်ဆွဲခဲ့ရတော့ သူတို့ဖောကား ၂ စီးနဲ့ထပ်လာတယ်၊ မိုင်းကွင်းမရောက်ခင် ကားရပ်ထားပြီး ခြေလျင်စစ်ကြောင်းလာတယ်၊ အဲဒါကိုပြန်ပြီးတော့ ထပ်မိုင်းဆွဲလိုက်တယ်၊ ခွေး ၅ ကောင်သေပါတယ်၊ မိုင်း ၃ လုံးပဲဆွဲနိုင်ခဲ့ပါတယ်၊ အဲဒီမြို့နယ်တွေကစစ်တပ်ကလွှမ်းမိုးမှုရှိတာကြောင့် မိုင်းအများကြီးသုံးလို့မရပါဘူး”လို့ ဗိုလ်တီကပြောပါတယ်။

မနက် ၉ နာရီလောက်မှာအလောင်းလာသယ်တဲ့ကားတစီးနဲ့ ခြေလျင်စစ်ကြောင်းကို ပထမတကြိမ်မိုင်းဆွဲတိုက်ခိုက်ခဲ့ပြီး နေ့လည် ၁၂ နာရီလောက်မှာ နောက်ထပ်တပ်ကူအနေနဲ့လာတဲ့ စစ်ကောင်စီဖောကားတစီးကိုပါ ဒုတိယအကြိမ်တိုက်ခိုက်ခဲ့တာလည်းဖြစ်ပါတယ်။

ခုလိုတိုက်ခိုက်ခံရပြီးနောက် မတ္တရာမြို့နယ်အတွင်း စစ်ကောင်စီဘက်က အင်အားအပြည့်ဖြည့်ထားတဲ့အပြင် အခင်းဖြစ်ရာအနီးကိုလည်း စစ်သားတွေထပ်ရောက်လာတယ်လို့ သိရပါတယ်။

ပြီးခဲ့တဲ့နိုဝင်ဘာလ ၁၄ ရက်ကလည်း တောကြီးမြွေပွေးအဖွဲ့နောက်ကိုလိုက်လာတဲ့ စစ်ကောင်စီတပ်သားတွေကို မတ္တရာမြို့နယ်၊ မြွေတလိုင်းရွာအနီးမှာ ပြန်လည်မိုင်းဆွဲခဲ့ရာ စစ်သား ၉ ဦးသေဆုံးခဲ့ပါသေးတယ်။