မင်းကင်း

မင်းကင်း၊ ဧပြီ ၂၂၊ ၂၀၂၃။

စစ်ကိုင်းတိုင်း၊ မင်းကင်းမြို့နယ် တောင်တွင်းဒေသမှာရှိတဲ့ စစ်ကောင်စီရဲ့အရေးပေါ် ရဟတ်ယာဉ်ဆင်းကွင်း ၂ ခုကို ဧပြီလ ၂၀ ရက်နေ့မှာ ဒေသကာကွယ်ရေးပူးပေါင်းတပ်ဖွဲ့တွေက ဖျက်ဆီးနိုင်ခဲ့တယ်လို့ MK PDF-2 အဖွဲ့က ဒီကနေ့မှာထုတ်ပြန်ပါတယ်။

တောင်တွင်းဒေသ လမ်းမကြီးတလျှောက်မှာရှိတဲ့ စစ်ကောင်စီတပ်ဖွဲ့တွေရဲ့ ရဟတ်ယာဉ်တွေ အရေးပေါ်ဆင်းဖို့ပြင်ဆင်ထားတဲ့ မြေသားကွင်း ၁ ကွင်းနဲ့ကွန်ကရစ်ကွင်း ၁ ကွင်းကို လက်လုပ်မိုင်း ၄ လုံးနဲ့ ဖောက်ခွဲခဲ့တယ်လို့ MinKin People’s Defence Force (MKPDF – 2) တပ်ဖွဲ့ဝင်တဦးက အခုလို ပြောပါတယ်။

“မြေသားလမ်းပေါ့နော် ဘောလုံးကွင်းလုံးလုပ်ထားတဲ့နေရာမှာတော့ မီးရှို့ပြီး ဖျက်ဆီးခဲ့တယ်။ ကားလမ်းမကြီးတကြောမှာရှိတဲ့ ရဟတ်ယာဉ်ဆင်းကွင်းတခုကတော့ ကွန်ကရစ်နဲ့အခိုင်အမာပြုလုပ်ထားတာ ဖြစ်တဲ့အတွက် ကျနော်တို့ မိုင်းနဲ့ခွဲပြီး ဖျက်ဆီးခဲ့တယ်။ လောလောဆယ်ထိတော့ အဲ့ဒီနေရာတွေကို ကျနော်တို့ စိုးမိုးထားနိုင်တုန်း” လို့ ပြောပါတယ်။

ဧပြီလ ၁၀ ရက်နေ့က ကလေးခရိုင်၊ အမှတ် ၁၁ တပ်ရင်းနဲ့ မင်းကင်းမဟာမိတ်ပူးပေါင်းတပ်ဖွဲ့တွေနဲ့ ပူးပေါင်းပြီး တောင်တွင်းဒေသ မအူ(ပျူစောထီးရွာ)စခန်းကို တိုက်ခိုက်သိမ်းပိုက်ပြီးတဲ့နောက် ရှေ့တန်းစခန်း၊ ကတုတ်ကျင်းနဲ့ ဘန်ကာတွေကို ဖျက်ဆီးနိုင်ခဲ့ပြီး လက်ရှိအထိ အဲ့ဒီတောင်တွင်းဒေသကို PDF တပ်ရင်းတွေက ဆက်လက်စိုးမိုးထားနိုင်ကာ ရဟတ်ယာဉ်ကွင်းတွေကိုပါ ဖျက်ဆီးနိုင်တာလို့ ဆိုပါတယ်။

ဧပြီလ ၁၀ ရက် မအူရွာစခန်းသိမ်းတိုက်ပွဲအတွင်းမှာ စစ်ကောင်စီစခန်းကို မီးရှို့ဖျက်ဆီးနိုင်ခဲ့ပြီး ဒေသကာကွယ်ရေးတပ်ဖွဲ့တွေဘက်က ၆ ဦး ဒဏ်ရာရခဲ့တယ်လို့ သိရပါတယ်။

ပြီးခဲ့တဲ့ဧပြီလ ၂ ရက်နေ့ကလည်း မအူရွာ (ပျူရွာ)မှာတပ်စွဲထားတဲ့ ပျူစခန်းကို Mkpdf-2 ပူးပေါင်းတပ်ဖွဲ့က ၆၀ မမ (၇)လုံး၊ ၄၀ မမ (၃) လုံး၊ လက်နက်ငယ်တွေနဲ့ သွားရောက်ပစ်ခတ်ခဲ့ပြီး PDF တွေဘက်က စနိုက်ဘာကျည်နဲ့ ပစ်ခတ်လိုက်လို့ စစ်ကောင်စီတပ်သား ၁ ဦး သေဆုံးသွားတယ်လို့ သိရပါတယ်။

စာတည်း – ရင်ငြိမ်း

စစ်ကိုင်း၊ မတ် ၂၈၊ ၂၀၂၃။

စစ်ကိုင်းတိုင်း၊ မင်းကင်းမြို့နယ်ထဲက ချင်းတွင်းမြစ်ကြောင်းမှာရှိတဲ့ တရားမဝင် ရွှေမျှောဖောင်တွေကို စစ်ကောင်စီဘက်က မီးရှို့ဖျက်ဆီးပြီး အလုပ်သမား ၇ ဦးကိုလည်း သတ်သွားခဲ့တယ်လို့ သိရပါတယ်။

မတ်လ ၉ ရက်နေ့က ကဗျစ်၊ ဖရုံကာ၊ ရှမ်းတော့ စတဲ့ကျေးရွာတွေနားမှာရှိတဲ့ ရွှေမျှောဖောင်တွေနဲ့ လူနေတဲတွေကို မီးရှို့ခဲ့ပြီး ရွှေမျှောဖောင် ၅၃ ဖောင်နဲ့ ဆက်စပ်ပစ္စည်းတွေ ဖျက်ဆီးခံလိုက်ရကာ သိန်းထောင်ချီ မီးထဲပါသွားခဲ့တယ်လို့ ဆိုပါတယ်။

“ရွှေတွေနဲ့ တန်ဖိုးကြီးပစ္စည်းတွေတော့ စစ်ကောင်စီဘက်က ယူသွားတယ်။ ပြီးတော့ မျှောထဲမှာ ကျန်ခဲ့တဲ့ အလုပ်သမား ၅ ယောက် ရွာသား ၂ ယောက် အသတ်ခံရတယ်။ ပစ်သတ်ပြီး သဲသောင်ပြင်မှာ မြှုပ်ခဲ့တာ။ ခုပြန်ဖော်ပြီး ဘယ်သူတွေဆိုတာ စစ်ဆေးနေကြတယ်” လို့ မင်းကင်းမြို့နယ် ပကဖတာဝန်ခံက ပြောပါတယ်။

စစ်ကောင်စီတပ်ရဲ့ သတ်ဖြတ်ခြင်းခံထားရတဲ့ ပြည်သူ ၇ ဦးမှာ ၂ ဦးကတော့ ကဗျစ်ရွာသားတွေဖြစ်တယ်လို့ သိထားရပြီး ရွှေမျှောလုပ်ကွက်မှာ နယ်ပေါင်းစုံကလူတွေ လာရောက်လုပ်ကိုင်တဲ့အတွက် ဘယ်သူဘယ်ဝါဆိုတာ သိရဖို့ ကြန့်ကြာနေတယ်လို့ ဆိုပါတယ်။

စစ်ကောင်စီဘက်က ချန်နယ်တွေမှာတော့ ရွှေမျှောလုပ်ကွက်တွေမှာ PDF တွေဝင်ရောက်လုပ်ကိုင်တာတွေရှိတဲ့အတွက် ခုလိုဖျက်ဆီးတာဖြစ်တယ်လို့ ထုတ်ပြန်ထားပေမယ့် ကာကွယ်ရေးအဖွဲ့တွေကတော့ သူတို့နဲ့ဆက်နွယ်မှုမရှိဘဲ တပ်ရင်းတပ်ဖွဲ့ ထိန်းချုပ်နယ်မြေထဲမှာရှိလို့ ခုလို ဖျက်ဆီးခံရတာဖြစ်တယ်လို့ ဆိုပါတယ်။

စစ်ကောင်စီဝါဒဖြန့် တယ်လီဂရမ်တွေမှာတော့ ရွှေမျှောဖောင်တွေနဲ့ ဆက်စပ်ပစ္စည်းတွေကာလတန်ဖိုး ၁၁,၀၅၃,၄၄၀,၀၀၀ ကျပ် (သိန်းပေါင်း တစ်သိန်းတစ်သောင်းကျော်) သိမ်းဆည်းရမိခဲ့တယ်လို့ ဖော်ပြထားပါတယ်။

အဆိုပါ စစ်ကောင်စီစစ်ကြောင်းဟာ အင်အား ၁၀၀ ဝန်းကျင်နဲ့ ဖေဖော်ဝါရီလကတည်းက မင်းကင်းမြို့နယ်ထဲကို စစ်ကြောင်းထိုးနေတာဖြစ်ပြီး မတ်လ ၂၄ ရက်ကမှ မင်းကင်းကနေ ကလေးမြို့ ဒကစထဲကို ပြန်ဆုတ်ခွာသွားတာ ဖြစ်တယ်လို့ သိရပါတယ်။

မတ်လ ၁၄ ရက်နေ့ကလည်း ရွှေမျှောတွေကို ဖျက်ဆီးနေလို့ နယ်မြေခံကာကွယ်ရေးတပ်ရင်းတွေနဲ့ မြို့နယ်ပကဖအဖွဲ့ ပူးပေါင်းကာ သွားရောက်တိုက်ခိုက်ခဲ့ပြီး စစ်ကောင်စီဘက်က ၃ ဦးသေဆုံးခဲ့တယ်လို့ သိရပါတယ်။

စာတည်း – ဇို