မြစ်ခြေ၊ ဇွန် ၁၅၊ ၂၀၂၅။

မကွေးတိုင်း၊ ပခုက္ကူခရိုင်၊ မြစ်ခြေမြို့၊ အောင်သာရွာက ပျူစောထီးတပ်ဖွဲ့ဝင် ၁ ဦး လက်နက်၊ ခဲယမ်းတွေနဲ့အတူ မိသားစုလိုက် ဘက်ပြောင်းခိုလှုံလာတယ်လို့ ဧရာဒေါင်းပြည်သူ့ကာကွယ်ရေးတပ်ဖွဲ့ဆီက သိရပါတယ်။

ဘက်ပြောင်းလာသူမှာ ပျူစောထီးစခန်းတွေအခိုင်အမာအထိုင်ချထားတဲ့ အောင်သာရွာက ပျူစောထီးတပ်ဖွဲ့ဝင် မောင်စိုးထက် ဖြစ်ပြီး ၎င်းရဲ့မိသားစုဝင် ၈ ဦး၊ သူငယ်ချင်း ၂ ဦးကိုခေါ်ဆောင်ကာ ဇွန် ၁၂ ရက် မှာ တော်လှန်ရေးတပ်ဖွဲ့ဝင်တွေနဲ့ ချိတ်ဆက်ခိုလှုံလာတာလို့ ဆိုပါတယ်။

“ ကျနော်တို့တော့ သွားစောင့်ပြီး သူ့ကိုခေါ်ထုတ်ရတာ၊ လွယ်လွယ်ကူကူပဲ၊ ကျနော်တို့ ရွာခြေထိကိုကပ်ပြီး ခေါ်ပေးခဲ့တာ။” လို့ ဧရာဒေါင်းပြည်သူ့ကာကွယ်ရေးတပ်ဖွဲ့ သတင်းနဲ့ပြန်ကြားရေးတာဝန်ခံ ကိုရှိန်းက မြေလတ်အသံကို ပြောပါတယ်။

အဆိုပါပျူစောထီးနဲ့အတူ BA 63(G3) ၁ လက်၊ ကျည်ဘောက် ၈ ခု၊ ကျည် ၃၅၀ တောင့်၊ အီနာဂါဗုံးသီး ၁ လုံး၊ စစ်ချပ်ဝတ်တန်ဆာ ၁ စုံ အတူပါလာတဲ့အတွက် ကျပ် ၅၀ သိန်း ဆုချီးမြှင့်ပေးထားပြီး လက်ရှိမှာ အခြေခံစစ်ပညာသင်တန်းတက်ရောက်နေတယ်လို့ ဆိုပါတယ်။

အောင်သာရွာမှာ ပျူစောထီး ၁၀၀ ကျော်နဲ့ဖွဲ့စည်းထားကာ ပခုက္ကူ၊မြစ်ခြေနယ်တဝိုက် ပျူစောထီးအင်အားအတောင့်တင်းဆုံး ရွာ ၁ ရွာဖြစ်ပြီး ဒေသတွင်းစစ် ကြောင်းထိုးမီးရှို့တာ၊ လူဖမ်းဆီးသတ်ဖြတ်တာတွေမှာ ဦးဆောင်ပြုလုပ်နေတာလည်း ဖြစ်ပါတယ်။

စာတည်း – ဟိန်းစံ

နတ်တလင်း၊ မေ ၂၃၊ ၂၀၂၅။

ပဲခူးတိုင်း၊ နတ်တလင်းမြို့နယ်ကိုရောက်ရှိနေတဲ့ စစ်ကောင်စီစစ်ကြောင်းတခုက စစ်ကောင်စီတပ်သား ၂ ဦး မေ ၁၉ ရက်မနက် ၇ နာရီ ကျော်မှာ လက်နက်နဲ့အတူအလင်းဝင်ရောက်လာခဲ့တယ်လို့ သာယာဝတီခရိုင် အမှတ် (၁) တပ်ရင်း၊ ၃၈၀၁ က မေ ၂၃ ရက်ဒီကနေ့မှာသတင်းထုတ်ပြန်ပါတယ်။

ဘက်ပြောင်းလာသူတွေဟာ အသက် ၃၀ ကျော်အရွယ် နိုင်ဝေလင်းနဲ့ ရာဇာမင်းတို့ဖြစ်ပြီး သူတို့တွေဟာ မေ ၁၂ ရက်မှာ နတ်တလင်းမြို့နယ်၊ ပျဥ်ပုံကျေးရွာက ပျူစောထီးစခန်းကို စစ်ကောင်စီစစ်ကြောင်းနဲ့အတူ ရောက်ရှိလာတာလို့ ဆိုပါတယ်။

“တပ်သားနှစ်ယောက်က ကျနော်တို့ကိုတိုက်ရိုက်ချိတ်ဆက်တာမရှိဘူး။ သူတို့ဘာသာသူတို့ လက်နက်တွေယူလာပြီးတော့ ကျနော်တို့နယ်မြေထဲကိုပြေးလာတယ်။ ပြည်သူနဲ့တွေ့တယ်။ ပြည်သူက တဆင့် ကျနော်တို့နဲ့ချိတ်ဆက်ခိုင်းတယ်။ အဲ့တာကနေ ချိတ်ဆက်ဝင်ရောက်လာပါတယ်”လို့ သာယာဝတီခရိုင်အမှတ် (၁) တပ်ရင်း၊ ၃၈၀၁ မှ တာဝန်ရှိသူတဦးကပြောပါတယ်။

အဆိုပါစစ်ကောင်စီတပ်သား ၂ ဦးဟာ ဧရာဝတီတိုင်း၊ ရေကြည်မြို့နယ်နဲ့ ကျုံပျော်မြို့နယ်တွေကဖြစ်ပြီး စစ်မှုထမ်းအတွက်ဖမ်းဆီးခံခဲ့ရာနေ စစ်ကောင်စီတပ်သားဖြစ်လာသူတွေပါ။

သူတို့နဲ့အတူ MA 1 သေနတ် ၂ လက်၊ လက်ပစ်ဗုံး ၁ လုံး၊ စကားပြောစက် ၁ လုံး၊ ကျည်ဘောက် ၆ ခုတို့ပါလာပြီး သူတို့အနေနဲ့ သာယာဝတီခရိုင် အမှတ်(၁)တပ်ရင်းမှာနေပြီး စစ်အာဏာရှင်စနစ် အပြီးတိုင် ချုပ်ငြိမ်းရေးအတွက် ပြန်လည်တိုက်ပွဲဝင်မယ်လို့လည်း ပြောဆိုထားကြောင်း အထက်ပါတာဝန်ရှိသူက ဆက်ပြောပါတယ်။

စာတည်း – လင်း

ချောက်၊ မေ ၁၆၊ ၂၀၂၅။

ရှမ်းပြည်နယ်တောင်ပိုင်း၊ ဟဲဟိုးမြို့အခြေစိုက် ခမရ ၁၈ တပ်ရင်းက စစ်မှုထမ်းစစ်ကောင်စီတပ်သား ၁ ဦး မေ ၁၅ ရက်မှာ လက်ပစ်ဗုံး ၂ လုံးနဲ့ ဘက်ပြောင်းခိုလှုံလာတယ်လို့ People Defence Force Chauk သခင်ဖိုးလှကြီးတပ်ဖွဲ့ တာဝန်ရှိသူတဦးက ပြောပါတယ်။

ဘက်ပြောင်းခိုလှုံလာသူမှာ အသက် ၂၂ နှစ်အရွယ် တပ်သား ကျော်ထူး ဖြစ်ပြီး ခမရ ၁၈ ကနေ ရတခနယ်မြေ မွန်နဲ့ကရင်ပြည်နယ်အတွင်း ရှေ့တန်းနယ်မြေကို ပို့ဆောင်ခံရစဥ် ရန်ကုန်တိုင်း၊ သန်လျင်မြို့အခြေစိုက် ခလရ ၁၃၉ တပ်ရင်းမှာ ယာယီတည်းခိုရချိန် ၎င်းတို့တပ်ဖွဲ့ထံ ရောက်ရှိခိုလှုံလာခဲ့တာလို့ ဆိုပါတယ်။

၎င်းဟာ ချောက်မြို့နယ်ဇာတိဖြစ်ကာ ပြီးခဲ့တဲ့ ၂၀၂၄ နိုဝင်ဘာလအတွင်း ချောက်မြို့ကို စျေး ဝယ်လာရောက်စဥ် စစ်ကောင်စီတပ်ရဲ့ပေါ်တာဆွဲဖမ်းဆီးခံခဲ့ရပြီးနောက် ရှမ်းပြည်တောင်ပိုင်း၊ ကျိုင်းတောင်းမြို့အခြေစိုက် အမှတ် ၃ တန်းမြင့်လေ့ကျင့်ရေးကျောင်းကို ပို့ဆောင်ခံရပြီး စစ်မှုထမ်းသင်တန်းအပတ်စဥ် (၁၀) မှာ ၂ လခွဲတက်ရောက်ခဲ့ရတာပါ။

ယခုနှစ်ဖေဖော်ဝါရီလအတွင်း သင်တန်းဆင်းပြီးနောက် ဟဲဟိုးမြို့အခြေစိုက် ခမရ ၁၈ ကို ပို့ဆောင်ခံခဲ့ရကာ ရတခနယ်မြေရှေ့တန်းကိုပို့ဆောင်ခံရဖို့ မေ ၉ ရက်မှာ ရန်ကုန်၊ သန်လျင်အခြေစိုက်တပ်ကို ရောက်ရှိခဲ့တာဖြစ်ပြီး အဲ့ဒီကနေတဆင့် ထွက်ပြေးလာနိုင်ခဲ့တာလို့ သိရပါတယ်။

People Defence Force Chauk သခင်ဖိုးလှကြီးတပ်ဖွဲ့ဟာ မကွေးတိုင်း၊ ချောက်မြို့နယ် အခြေပြုတပ်ဖွဲ့ဖြစ်ပြီး လက်ပစ်ဗုံး ၂ လုံး ယူဆောင်ဘက်ပြောင်းခိုလှုံလာတဲ့ တပ်သား ကျော်ထူးကို တပ်ဖွဲ့ဝင်တွေက စောင့်ရှောက်ထားကာ ၎င်းဟာ တပ်ဖွဲ့ထံပထမဆုံးဘက်ပြောင်းခိုလှုံလာသူဖြစ်တယ်လို့ သိရပါတယ်။

စာတည်း – ဟိန်းစံ

မင်းဘူး၊ မေ ၄၊ ၂၀၂၅။

မကွေးတိုင်း၊ ငဖဲမြို့နယ်၊ နတ်ရေကန်လေကြောင်းကာကွယ်ရေးတပ်က စစ်ကောင်စီတပ်သား ၃ ဦး လက်နက်၊ ခဲယမ်းတွေနဲ့အတူ ဘက်ပြောင်းခိုလှုံလာတယ်လို့ မေ ၄ ရက်ဒီကနေ့မှာ မင်းဘူးခရိုင် အမှတ် ၂ တပ်ရင်းက သတင်းထုတ်ပြန်ပါတယ်။

မန္တလေးတိုင်း၊ မိတ္ထီလာမြို့က တပ်မ ၉၉ လက်အောက်ခံ ခမရ ၄၁၇ တပ်ရင်းကနေ နတ်ရေကန် လေကြောင်းရန်ကာကွယ်ရေးတပ်မှာ လွှဲပြောင်းတာဝန်ထမ်းဆောင်နေတဲ့ အဆိုပါတပ်သား ၃ ဦးဟာ ဧပြီ ၃၀ ရက်မှာ ဘက်ပြောင်းခိုလှုံလာခဲ့တာလို့ ဆိုပါတယ်။

“နတ်ရေကန်မှာ တာဝန်ကျနေတာ၊ သူတို့ ၂၀၂၅ ခုနှစ် ၃ လပိုင်းမှာ တာဝန်ကျတာပါ၊ သူတို့ လုံခြုံရေး အရ အမည်တွေကိုတော့ပြောပြဖို့အဆင်မပြေပါဘူး၊ သူတို့ကတော့ ကျနော်တို့တော်လှန်ရေး တပ်ဖွဲ့တွေဆီမှာ ဆက်ပြီးတာဝန်ထမ်းဆောင်မှာပါ၊” လို့ မင်းဘူးခရိုင် အမှတ် ၂ တပ်ရင်း တပ်ရင်းမှူး ဗိုလ်ဇာမဏီက ပြောပါတယ် ။

အဆိုပါတပ်သားတွေဟာ MA 1 ၃ လက်၊ ၅.၅၆ ကျည် ၆၅၀ တောင့်၊ လက်ပစ်ဗုံး ၁ လုံး၊ အီနာဂါ ၃ လုံး၊ ဦးထုပ် ၃ လုံး၊ အီကွေ့မန့် ၃ ခု ယူဆောင်လာခဲ့တာကြောင့် ဆုငွေချီးမြှင့်ပြီး တပ်ရင်းမှာထားရှိကာ လိုအပ်တဲ့အကူအညီတွေလည်းပေးထားတယ်လို့ ဆိုပါတယ်။

အဆိုပါကစစ်ကောင်စီတပ်သား ၃ ဦးဟာ ၂၀၂၄ နိုဝင်ဘာလမှာ နေပြည်တော်အပါအဝင် ၎င်းတို့နေထိုင်ရာဒေသတွေမှာ ပေါ်တာဆွဲဖမ်းဆီးခံရပြီးနောက် ဗထူး စစ်သင်တန်းကျောင်း၊ ဟိုပုံး နဲ့ ရပ်စောက်တို့မှာ စစ်သင်တန်း ၂ လတက်ရောက်ခဲ့ပြီး ခမရ ၄၁၇ ကိုရောက်ရှိခဲ့တယ်လို့ ဆိုပါတယ်။

လက်ရှိမှာ မင်းဘူးခရိုင် အမှတ် ၂ တပ်ရင်းဆီ ဘက်ပြောင်းခိုလှုံလာတဲ့စစ်ကောင်စီတပ်သား စုစုပေါင်း ၄ ဦးရှိပြီး အားလုံးကို စိတ်လုံခြုံမှု အပြည့်အဝရရှိအောင်ထားရှိထားတယ်လို့ တပ်ရင်းမှူးက ပြောပါတယ်။

စာတည်း – လင်း

တောင်သာ၊ ဧပြီ ၂၈၊ ၂၀၂၅။

မန္တလေးတိုင်း၊ မြင်းခြံခရိုင်၊ တောင်သာမြို့မှာ လုံခြုံရေးစောင့်နေတဲ့ ရဲတပ်သား ၁ ဦး လက်နက်ခဲယမ်းတွေနဲ့ ဘက်ပြောင်းခိုလှုံလာတယ်လို့ Myingyan Black Tiger-MBT မြင်းခြံခရိုင်တပ်ရင်း ၉ ဆီက သိရပါတယ်။

အသက် ၂၇ နှစ်အရွယ် ရဲတပ်သားဟာ ရန်ကုန်တိုင်း၊ မှော်ဘီအခြေစိုက် ရဲတပ်ရင်း ၅ ကနေ တောင်သာမြို့က အထက စာသင်ကျောင်းကိုပြောင်းရွှေ့ပြီး လုံခြုံရေးစောင့်နေတဲ့အချိန် ဧပြီ ၂၆ ရက်မှာ တော်လှန်ရေးတပ်ဖွဲ့ဝင်တွေနဲ့ ချိတ်ဆက်ပြီး ခိုလှုံလာတာလို့ ဆိုပါတယ်။

“သူက သင်္ကြန်အပြီး နှစ်ဆန်း ၃ ရက်မှာ တောင်သာမြို့မှာ တာဝန်ကျတာ၊ ဧပြီ ၂၂ ရက်မှာ ကျနော်တို့ကို ဆက်သွယ်လာတယ်၊ ဧပြီ ၂၆ ရက်မှာ ကျနော်တို့ MBT တပ်ဖွဲ့ထံကို အလင်းဝင်ရောက်လာတာပါ၊ ကျနော်တို့ တောင်သာမြို့ပေါ်အထိ ဘေးအန္တရယ်ကင်းကင်းနဲ့ ခေါ်ဆောင်လာခဲ့နိုင်ပါတယ်။”လို့ Myingyan Black Tiger-MBT မြင်းခြံခရိုင်တပ်ရင်း ၉ ခေါင်းဆောင်ဗိုလ်မိုက်ခဲက ပြောပါတယ်။

စစ်တပ်ရဲ့လူမဆန်တဲ့ အကျင့်ပျက်ခြစားမှု၊ နှိပ်စက်ဖိနှိပ်တာတွေ၊ ပြည်သူအပေါ်ကျင့်သုံးနေတဲ့ စစ်တပ်ရဲ့ဆက်ဆံရေးတွေကို သဘောမကျတာကြောင့်ခုလို ဘက်ပြောင်းလာခဲ့တာလို့ ရဲတပ်သားပြောပြချက်ကို ကိုးကားပြီး ခေါင်းဆောင်ဗိုလ်မိုက်ခဲက ပြန်ပြောပါတယ်။

အဆိုပါရဲတပ်သားနဲ့အတူ အူဇီသေနက် ၁ လက်၊ ကျည်ဘောက် ၃ ခု၊ G3 ကျည် ၂ တောင့်၊ 9 မမ ကျည် ၂၀၀ အတူပါလာတဲ့အတွက် ကျပ် ၂၅ သိန်း ဆုချီးမြှင့်ပေးထားပြီး သူနေထိုင်ချင်တဲ့နေရာကို သူ့မိသားစုနဲ့ အတူလုံခြုံစွာပို့လိုက်ပြီလို့ ဆိုပါတယ်။

စစ်အာဏာသိမ်းချိန်ကနေ အခုနှစ် ဧပြီ ၂၈ ရက်အထိ Myingyan Black Tiger-MBT မြင်းခြံခရိုင်တပ်ရင်း ၉ ဆီကို ဘက်ပြောင်းခိုလှုံလာသူ ရဲတပ်သားနဲ့ စစ်ကောင်စီတပ်သား စုစုပေါင်း ၈ ဦးရှိပြီလို့ အဲ့ဒီအဖွဲ့ဆီကသိရပါတယ်။

စာတည်း – လင်း

စစ်ကိုင်း၊ ဧပြီ ၁၈၊ ၂၀၂၅။

စစ်ကိုင်းတိုင်း၊ စစ်ကိုင်းမြို့အခြေစိုက် တပ်မ ၃၃ က စစ်ကောင်စီ ဒုတပ်စိတ်မှူး ၁ ဦးနဲ့ တပ်သား ၁ ဦး ဧပြီ ၁၆ ရက် မနက်ပိုင်းမှာ တပ်ထဲကထွက်ပြေးပြီး ဘက်ပြောင်းခိုလှုံလာတယ်လို့ လျှပ်စီးတပ်ခွဲ မုံရွာခရိုင် အမှတ် ၁၂ တပ်ရင်း တပ်ခွဲ ၃ အဖွဲ့ဆီက သိရပါတယ်။

ဘက်ပြောင်းခိုလှုံလာသူတွေဟာ အသက် ၂၈ နှစ်အရွယ် ဒုတပ်စိတ်မှူး ဖြိုးသီဟနဲ့ ၃၆ နှစ်အရွယ် တပ်သား မောင်သက်တို့ဖြစ်ပြီး သူတို့ကို ဒေသခံကာကွယ်ရေးတပ်ဖွဲ့ဝင်တွေက သွားရောက်ခေါ်ဆောင်ခဲ့ရတာလို့ ဆိုပါတယ်။

“လမ်းမှာစစ်ကောင်စီကလည်း နောက်ကနေ ခရာတွေ တရစပ်မှုတ်ပြီးတော့ သူတို့နောက်ကို အတင်းလိုက်လာတာဖြစ်တဲ့အတွက် လက်နက်တွေသယ်ဆောင်နိုင်တာမရှိတာနဲ့ (သူတို့ယူလာတဲ့လက်နက်ကို) လမ်းတနေရာမှာ သိမ်းဆည်းထားခဲ့တယ်လို့ ပြောတယ်၊” လို့ လျှပ်စီးတပ်ခွဲ မုံရွာခရိုင် အမှတ် ၁၂ တပ်ရင်း တပ်ခွဲ ၃ သတင်းနဲ့ ပြန်ကြားရေး တာဝန်ခံက ပြောပါတယ်။

သူတို့ ၂ ဦးစလုံးဟာ ၂၀၂၄ နိုဝင်ဘာလက စစ်မှုထမ်းအတွက်ဖမ်းဆီးခံခဲ့ရပြီး ရန်ကုန်တိုင်း၊ တိုက်ကြီးမြို့နယ်ရှိ အမှတ်(၁)တန်းမြင့်လေ့ကျင့်ရေးကျောင်း(ဂျိုးဖြူ)မှာ စစ်သင်တန်း ၄ လ၊ ပဲခူးအခြေစိုက် တပ်မ ၇၇ မှာမွမ်းမံသင်တန်း ၁ လ တက်ခဲ့ရတယ်လို့ ဆိုပါတယ်။

သင်တန်းပြီးတဲ့နောက် စစ်ကိုင်းတိုင်း၊ ကသာမြို့နယ်အတွင်း စစ်ကြောင်းသွားခဲ့ရပြီး အဲ့ဒီကတဆင့် စစ်ကိုင်းအခြေစိုက် တပ်မ ၃၃ ကိုရောက်လာချိန်မှာ ဘက်ပြောင်းခိုလှုံဖို့ ကာကွယ်ရေးတပ်တွေကို ချိတ်ဆက်ခဲ့တာလို့ အထက်ပါသတင်းနဲ့ပြန်ကြားရေးတာဝန်ခံကပြောပါတယ်။

လက်ရှိမှာ သူတို့မိသားစုတွေဆီကို တပ်ဖွဲ့ဝင်တွေက ဧပြီ ၁၈ ရက်မှာ ပြန်လည်ပို့ဆောင်လိုက်တယ်လို့ ပြောပါတယ်။

လျှပ်စီးတပ်ခွဲ မုံရွာခရိုင် အမှတ် ၁၂ တပ်ရင်း တပ်ခွဲ ၃ အဖွဲ့ဟာ စစ်ကိုင်းတိုင်း၊ မုံရွာမြို့နယ်အခြေစိုက် တပ်ဖွဲ့တခုဖြစ်ပြီး အထက်ပါစစ်ကောင်စီတပ်ဖွဲ့ဝင် ၂ ဦးဟာ သူတို့ဆီ ပထမဦးဆုံး ဘက်ပြောင်းခိုလှုံလာတာလို့ သိရပါတယ်။

စာတည်း – လင်း

ကျောက်တံခါး၊ ဧပြီ ၁၁၊ ၂၀၂၅။

ပဲခူးတိုင်း၊ ကျောက်တံခါးမြို့နယ်၊ အုန်းနဲပင်ကျေးရွာရှိ စစ်ကောင်စီတပ်စခန်းက စစ်ကောင်စီတပ်သား ၁ ဦး ဧပြီ ၉ ရက် မှာဘက်ပြောင်းခိုလှုံခဲ့တယ်လို့ ပဲခူးခရိုင်၊ အမှတ် ၂ တပ်ရင်း၊ P2-3702 တပ်ဖွဲ့ဆီက သိရပါတယ်။

ပဲနွယ်ကုန်း-နတ်သံကွင်းလမ်းပေါ်ရှိ အုန်းနဲပင်ရွာစခန်းမှာတာဝန်ကျနေတဲ့ တိုက်ကြီးမြို့ဇာတိ အသက် ၃၉ နှစ်ရှိ စစ်ကောင်စီတပ်သားဟာ MA 1 ၁ လက်၊ ကျည်ဘောက် ၃ ခု၊ 5.56 ကျည် ၁၀၅ တောင့်နဲ့အတူ ဘက်ပြောင်းခိုလှုံလာတာလို့ ဆိုပါတယ်။

“ကျနော်တို့နဲ့ ကြိုတင်ချိတ်ဆက်တာမရှိဘူး။ ကင်းစောင့်တဲ့အချိန်မှာ လက်နက်ယူပြီးတော့ ထွက်ပြေးလာတာ။ သူစစ်မှုထမ်းတာက ၂ လလောက်ပဲရှိသေးတယ်။”လို့ ပဲခူးခရိုင်၊ အမှတ် ၂ တပ်ရင်း၊ P2-3702မှ တာဝန်ရှိသူတဦးက ပြောပါတယ်။

လက်နက်တွေပါလာတဲ့အတွက် အဆိုပါစစ်ကောင်စီတပ်သားကို ငွေကျပ် ၁၀ သိန်းချီးမြှင့်ခဲ့ပြီး NUG အစိုးရရဲ့ “ပြည့်သူရင်ခွင်”နဲ့ ချိတ်ဆက်ကာ လိုအပ်တာတွေကို ဆက်လက်ဆောင်ရွက်ပေးထားတယ်လို့ သူက ဆက်ပြောပါတယ်။

ပဲနွယ်ကုန်း၊ နတ်သံကွင်း၊ ကျောက်ကြီး စတဲ့နေရာတွေက နောက်ထပ်ဘက်ပြောင်းခိုလှုံလိုတဲ့ စစ်ကောင်စီတပ်သားတွေအနေနဲ့ ၎င်းတို့ ဆွေမျိုးသားချင်းတွေကတဆင့် ပဲခူးခရိုင်၊ အမှတ် ၂ တပ်ရင်း၊ P2-3702 Page ကနေ ချိတ်ဆက်နိုင်တယ်လို့ အထက်ပါတာဝန်ရှိသူက ဆိုပါတယ်။

P2 -3702 ဆီကို ၂၀၂၅ ဖေဖော်ဝါရီကနေ အခုဧပြီ ၁၁ ရက်အထိ လက်နက်နဲ့ဘက်ပြောင်းခိုလှုံလာတဲ့ စစ်ကောင်စီတပ်သား ၃ ဦးရှိပြီလို့ သိရပါတယ်။

အမျိုးသားညီညွတ်ရေးအစိုးရ – NUG၊ ကာကွယ်ရေးဝန်ကြီးဌာနရဲ့ ၂၀၂၄ ခုနှစ်၊ စစ်ရေးဖြစ်ပေါ် တိုးတက်မှုအခြေအနေ အစီရင်ခံစာအရ နိုင်ငံတဝန်းမှာ ပြီးခဲ့တဲ့ ၂၀၂၄ ခုနှစ် တနှစ်တာအတွင်း စစ်ကောင်စီတပ်သား ၄၂၅ ဦး၊ ရဲ ၁၄၂ ဦး ၊ စုစုပေါင်း ၅၆၇ ဦး အလင်းဝင်လာခဲ့တယ်လို့သိရပါတယ်။

စာတည်း – လင်း

မုံရွာ၊ ဧပြီ ၁၀၊ ၂၀၂၅။

စစ်ကိုင်းတိုင်း၊ မုံရွာမြို့က စစ်ကောင်စီလက်အောက်ခံ ဒုရဲအုပ် ၁ ဦး လက်နက်၊ ခဲယမ်းတွေနဲ့အတူ တော်လှန်ရေးတပ်ဖွဲ့တွေထံ ဘက်ပြောင်းခိုလှုံလာတယ်လို့ မုံရွာခရိုင်တပ်ရင်း ၂၅ ထံက သိရပါတယ်။

ဘက်ပြောင်းလာသူမှာ မုံရွာမြို့ အမှတ် ၂ ရဲစခန်းက ဒုရဲအုပ် အေးသန်းထွန်း ဖြစ်ပြီး မုံရွာခရိုင်တပ်ရင်း ၂၅ တပ်ခွဲ ၄ ကတဆင့် ချိတ်ဆက်ပြီးနောက် ဧပြီ ၇ ရက်မှာ ဝင်ရောက်ခိုလှုံလာခဲ့တာလို့ ဆိုပါတယ်။

“သူအရင်ထဲက ထွက်ချင်နေပြီး ချိတ်ဆက်ထားပြီးသားပါ ။ အခုကတော့ နယ်မြေအချိန်းပြောင်းနဲ့ အခွင့်ရေးရလို့ထွက်လာနိုင်တာ။” လို့ မုံရွာခရိုင်တပ်ရင်း ၂၅ တပ်ရင်းမှူး သံမဏိ က ပြောပါတယ် ။

၎င်းနဲ့ အတူ BA 63 (G3) မောင်းပြန်ရိုင်ဖယ်သေနတ် ၁ လက်၊ ကျည်ဘောက် ၂ ခု ၊ ၇.၆၂ မမ ကျည် ၄၉ တောင့်တို့ ယူဆောင်လာခဲ့နိုင်တာကြောင့် ဆုငွေ ကျပ် သိန်း ၃၀ ပေးအပ်ဖို့ ဆောင်ရွက်နေတယ်လို့ ဆိုပါတယ်။

မုံရွာခရိုင်တပ်ရင်း ၂၅ ထံ ဘက်ပြောင်းခိုလှုံလာသူ ၁၅ ထက်မနည်းရှိပြီဖြစ်ပြီး ယခုနှစ်ပထမသုံးလပတ်အတွင်းမှာပဲ လက်နက်ပါလာသူ ၂ ဦးနဲ့ လက်နက်မဲ့ ၄ ဦး ဝင်ရောက်လာခဲ့ကာ ၎င်းတို့ထံဘက်ပြောင်းခိုလှုံလာတဲ့မည်သူမဆိုကို စိတ်လုံခြုံမှုအပြည့်အဝရရှိအောင်ထားရှိပေးတယ်လို့ PDF တပ်ရင်းမှူးက ပြောပါတယ်။

သတင်း – ဟယ်သာ၊ စာတည်း – ဟိန်းစံ