ဗုံးကြဲ

တန့်ဆည်၊ စက်တင်ဘာ ၂၆၊ ၂၀၂၅။

စစ်ကိုင်းတိုင်း၊ တန့်ဆည်မြို့နယ်၊ ကံထူးမရွာကို စစ်ကော်မရှင်တပ်က လေကြောင်းကနေ ဗုံးကြဲ တိုက်ခဲ့တာကြောင့် အသက် ၂၀ ဝန်းကျင်လူငယ်တွေအပါအဝင် ၈ ဦးသေဆုံးပြီး ၁၂ ဦး ထိခိုက်ဒဏ်ရာ ရခဲ့တယ်လို့ ဒေသခံတွေဆီကသိရပါတယ်။

ကံထူးမရွာက ‘နိုဘယ်ဝမ်း’ ဆီဆိုင်နဲ့ ‘ဇွဲထက်’ အအေးဆိုင်အနီး လူစည်းကားတဲ့နေရာကို စက်တင်ဘာ ၂၆ ရက်ဒီနေ့လယ် ၁၁ နာရီခွဲမှာ ဗုံးကြဲတိုက်ခိုက်ခဲ့တာလို့ ဆိုပါတယ်။

“အခုဆောက်နေတဲ့ နှစ်ထပ်တိုက်အရှေ့တည့်တည့်ကိုကျတာ။ အဲ့ဒီက ပန်းရံလုပ်နေတဲ့ အလုပ်သမား ၅ ဦး သေတာပါ။ တိုက်ပွဲလည်းမရှိဘူး။ လူစည်းကားတဲ့နေရာကို ရည်ရွယ်ချက်ရှိရှိလုပ်တာပါ”လို့ ဒေသခံ အမျိုးသားတဦးက ပြောပါတယ်။

လေကြောင်းတိုက်ခိုက်ခံရမှုကြောင့် အသက်၂၀ အရွယ် ဆီပန့်ဆိုင်ပိုင်ရှင်ရဲ့ သမီး၊ ၂၁ နှစ်အရွယ် ကုန်စိမ်းသည် အမျိုးသမီး ၁ ဦး၊ ၂၇ အရွယ် အမျိုးသား ၁ ဦး၊ ပန်းရံလုပ်နေတဲ့ ၄၃ နှစ်အရွယ် အမျိုးသား ၁ ဦးနဲ့ အသက် ၂၀ ကျော်အရွယ် အမျိုးသား ၄ ဦး စုစုပေါင်း ၈ ဦး သေဆုံးပြီး ၁၂ ဦး ဒဏ်ရာရကာ ၃ ဦးက ဒဏ်ရာပြင်းထန်ခဲ့တယ်လို့ ဆိုပါတယ်။

ဒီဗုံးကြဲမှုမှာ စစ်ကော်မရှင်တပ်က ပေါင် ၅၀၀ ဗုံး ၂ လုံးကိုသုံးခဲ့ပြီး လူ ၅ ဦးရဲ့ ရုပ်အလောင်းကို ပကတိအတိုင်းပြန်ရပြီး ၃ ဦးကိုတော့ အပိုင်းပိုင်းပြတ်နေတဲ့ ခန္ဓာကိုယ်အပိုင်းအစတွေကို ပြန်ကောက်ထားရတာလို့ ဆိုပါတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ စက်တင်ဘာ ၂၅ ထိ စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့ရတဲ့ ဒေသခံစုစုပေါင်း ၇,၂၈၄ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

သတင်း – မြတ်

မြေလတ်အသံ၊ စက်တင်ဘာ ၂၃၊၂၀၂၅ ။

စစ်ကိုင်းတိုင်း၊ ကနီမြို့နယ်၊ သမင်ခြံရွာကို စစ်ကော်မရှင်တပ်က ပါရာမော်တာနဲ့ ဗုံးကြဲချတိုက်ခိုက်ခဲ့လို့ ၄ ဦး ဗုံးစထိမှန်သေဆုံးခဲ့တယ်လို့ ဒေသခံတွေထံက သိရပါတယ်။

စက်တင်ဘာ ၂၂ မနေ့ ညနေ ၆ နာရီခန့်မှာ နမခစစ်ဌာနချုပ်ကလာတဲ့ ပါရာမော်တာနဲ့ ဗုံး ၂ ကြိမ်ကြဲချ တိုက်ခိုက်ခဲ့ရာ ကျေးရွာတွင်းနေအိမ်တွေပေါ်ကျရောက် ပေါက်ကွဲခဲ့တာလို့ ဆိုပါတယ်။

” စစ်ရှောင်ရာကနေ အိမ်ပြန်ရတာမှ မကြာသေးဘူး ပါရာမော်တာလာပစ်ခံရတယ်။ ၂ လအတွင်းကို ၅ယောက်သေဆုံးပြီးပြီ” လို့ ရွာခံတဦးက မြေလတ်အသံကို ပြောပါတယ်။

ဗုံးပေါက်ကွဲမှုကြောင့် သမင်ခြံကျေးရွာနေ ဦးကြည်အေး ၇၁ နှစ်၊ မသန်းသန်းပို ၃၃ နှစ်၊ ဒေါ်ပြား ၆၈ နှစ်၊ ကိုကျော်သူ ၃၆ နှစ်တို့ ၄ ဦး ဗုံးစထိမှန်ဒဏ်ရာတွေနဲ့သေဆုံးခဲ့ပြီး နေအိမ် ၂ လုံးပျက်စီးခဲ့ကာ ခြံဝန်းအတွင်းရှိ နွား ၆ ကောင်လည်းသေဆုံးခဲ့တယ်လို့ သိရပါတယ်။

သမင်ခြံရွာကို စစ်ကော်မရှင်တပ်က လေကြောင်းကနေ မကြာခဏဗုံးကြဲတိုက်ခိုက်နေတာနဲ့ စက်တင်ဘာလပထမပတ်အတွင်းဖြစ်ပွားခဲ့တဲ့ ချောင်းမရွာအနီးတိုက်ပွဲတွေကြောင့် ရွာခံတွေက စစ်ရှောင်တိမ်းနေထိုင်ရာက တိုက်ပွဲတွေပြီးဆုံးသွားပြီးနောက် ကျေးရွာတွင်းပြန်လည်နေထိုင်တာ ၇ ရက်ခန့်သာ ရှိသေးတယ်လို့ ဆိုပါတယ်။

သမင်ခြံရွာကို သြဂုတ်လအတွင်းကလည်း လေကြောင်းကနေဗုံးကြဲတိုက်ခိုက်ခဲ့တာကြောင့် အသက် ၁၈ နှစ်အရွယ်ကျောင်းသားတဦး သေဆုံးခဲ့တာလည်း ဖြစ်ပါတယ်။

စာတည်း – ဟိန်းစံ

မြင်းခြံ၊ စက်တင်ဘာ ၁၉၊ ၂၀၂၅။

မန္တလေးတိုင်း၊ မြင်းခြံမြို့နယ်၊ ကျောက်တိုင်ကျေးရွာကို စစ်ကော်မရှင်ဘက်က ဂျိုင်ရိုကော်ပတာ (gyrocopter)နဲ့ဗုံးကြဲလို့ သံဃာ ၁ ပါး ပျံလွန်တော်မူကာ အမျိုးသမီး ၁ ဦးလည်း ဒဏ်ရာရခဲ့တယ်လို့ ရွာခံတွေထံက သိရပါတယ်။

စက်တင်ဘာ ၁၈ ရက်နေ့ မနက် ၁၀ နာရီကျော်ခန့်မှာ မိတ္ထီလာလေတပ်ကနေ တက်လာတဲ့ ဂျိုင်ရိုကော်ပတာ (gyrocopter) ၃ စီးဟာ ကျေးရွာဘုန်းကြီးကျောင်းနဲ့ကျေးရွာအပြင်ဘက် တောစပ်ကို ဗုံး ၄ လုံးကြဲချခဲ့တာလို့ ဆိုပါတယ်။

ကျေးရွာ တောင်ပိုင်းကိုကြဲခဲ့တဲ့ ဗုံးစထိမှန်တာကြောင့် အသက် ၆၀ ကျော်အရွယ် ဒေါ်ခင်မြင့် ဆိုသူလည်ပင်းထိမှန်ဒဏ်ရာရပြီး ဘုန်းကြီးကျောင်း အဆောက်အအုံ ဗုံးကြဲခံရမှုမှာတော့သက်တော် ၆၀ ကျော်အရွယ်ရှိ သံဃာ ၁ ပါးပျံလွန်တော်မူကာ ဘုန်းကြီးကျောင်းအဆောက်အဦး ၂ လုံးလည်းပျက်စီးသွားတယ်လို့ သိရပါတယ်။

“ဘုန်းကြီးကျောင်းထဲမှာ ၂ လုံး။ ကျောက်တိုင်ရွာတောင်ဘက် တောစပ်ကို ၂ လုံး။ ရွာတောင်ဘက်ကျတာက အမျိုးသမီးကြီး ၁ ဦးလည်ပင်းအစမှန်တယ်။ ရွာအရှေ့ဘက်ဘုန်းကြီးကျောင်းထဲကျတာတော့ ဦးဇင်း ၁ ပါးပျံလွန်တော်မူတယ်”လို့ ရွာခံတဦးကပြောပါတယ်။

စစ်ကော်မရှင်ဘက်က ဗုံးလာကြဲတဲ့ ကျောက်တိုင်ကျေးရွာမှာ တိုက်ပွဲဖြစ်တာမရှိသလို ဒေသကာကွယ်ရေးအဖွဲ့တွေအခြေစိုက်လှုပ်ရှားတာလည်းမရှိဘူးလို့ သူကဆက်ပြောပါတယ်။

ဗုံးကြဲခံရပြီးနောက် ရွာခံတွေက ကျေးရွာကနေ ထွက်ပြေးတာမျိုးမရှိကြဘဲ ပုံမှန်အတိုင်းလှုပ်ရှားသွားလာနေကြတယ်လို့သိရပါတယ်။

ပြီးခဲ့တဲ့ ဩဂုတ် ၉ ရက်နေ့ကလည်း မြင်းခြံမြို့နယ်၊ ဗလုံကျေးရွာကို စစ်ကော်မရှင်တပ်သားတွေ စစ်ကြောင်းထိုးလာပြီး လက်နက်ကြီးနဲ့ပစ် မီးရှို့လို့ စစ်ရှောင် ၃ ဦးဒဏ်ရာရကာ နေအိမ် ၁၀၀ ကျော် မီးလောင်ပျက်စီးခဲ့တယ်လို့ သိရပါတယ်။

စာတည်း – မြတ်

မြိုင်၊ စက်တင်ဘာ ၁၈၊ ၂၀၂၅။

မကွေးတိုင်း၊ မြိုင်မြို့နယ်၊ ကျောက်ခွက်ရေနံမှော်နဲ့အနီးတဝိုက်ကို စစ်ကော်မရှင်တပ်က စက်တပ်လေထီးနဲ့ ဗုံးကြဲတိုက်ခိုက်ခဲ့တာကြောင့် ရေနံတူးဖော်နေတဲ့အမျိုးသမီး ၁ ဦးသေဆုံးပြီး ၃ ဦး ထိခိုက်ဒဏ်ရာရခဲ့တယ်လို့ ဒေသခံတွေဆီက သိရပါတယ်။

စက်တင်ဘာ ၁၇ ရက်မနက် ၁၁ နာရီခန့်မှာ ကျောက်ခွက်ရေနံမှော်နဲ့ အနီးတဝိုက်နေရာတွေကို ဗုံး ၃ လုံးကြဲချရာ ၁ လုံးက ရေနံတူးဖော်နေတဲ့နေရာကိုကျရောက်ပေါက်ကွဲပြီး အသက် ၃၈ အရွယ်အမျိုးသမီး ၁ ဦး သေဆုံးခဲ့တာပါ။

“ဘာမှတော့မရှိဘူး၊ နှစ်ရက်ဆက်တိုက် လာနေတာပဲ၊ အမြင့်ကြီးတွေကနေချတာ၊ (စက်) လှည့်နေတဲ့သူတွေတောင် စက်တွေပျက်ကုန်တယ်ပြောတယ်” လို့ ဒေသခံတဦးကဆိုပါတယ်။

ဒါ့အပြင် ဗုံးစထိမှန်တာကြောင့် သေဆုံးသူအမျိုးသမီးရဲ့ သမီးဖြစ်သူနဲ့ နောက်ထပ်အမျိုးသမီး ၁ ဦးအပါ ၃ ဦးမှာ ထိခိုက်ဒဏ်ရာရခဲ့ကာ သေဆုံးသူအမျိုးသမီးကို စက်တင်ဘာ ၁၈ ရက် ဒီကနေ့နေ့လယ်မှာ သင်္ဂြိုဟ်မယ်လို့သိရပါတယ်။

စက်တင်ဘာ ၁၆ ရက်က ပခုက္ကူတပ်မ ၁၀၁ က တက်လာတဲ့ပါရာမော်တာ ၂ စီးနဲ့ မြိုင်မြို့နယ်၊ ဆူးဝန်းကျေးရွာ အရှေ့မြောက်ဘက်ကို ဗုံး ၂ လုံးကြဲချတိုက်ခိုက်ခဲ့ပြီး ဒီတိုက်ခိုက်မှုမှာတော့ ထိခိုက်မှုတွေမရှိခဲ့ဘူးလို့ သိရပါတယ်။

ဒါ့အပြင် ဇူလိုင် ၁၅ ရက်ညနေ ၄ နာရီခန့်မှာ ပေါက်မြို့နယ်နဲ့ မြိုင်မြို့နယ်အစပ်ရေနံမှော်တွေရှိတဲ့ နယ်သတ်ကျေးရွာကို စစ်ကောင်စီရဲ့ဂျက်ဖိုက်တာ ၁ စင်းပေါ်ကနေ ဗုံး ၁ လုံးကြဲချခဲ့ရာ အသက် ၄၀ အရွယ်အမျိုးသမီး ၁ ဦးသေဆုံးပြီး အသက် ၃၀ အရွယ် အမျိုးသမီး ၁ ဦးထိခိုက်ဒဏ်ရာရခဲ့ပါသေးတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ စက်တင်ဘာ ၁၇ ရက်အထိ စစ်ကော်မရှင်တပ်နဲ့ လက်အောက်ခံတပ်ဖွဲ့ဝင်တွေကြောင့် သေဆုံးခဲ့တဲ့ပြည်သူစုစုပေါင်း ၇,၂၆၅ ဦးရှိခဲ့တယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP ကထုတ်ပြန်ထားပါတယ်။

စာတည်း – လင်း

မြေလတ်အသံ၊ စက်တင်ဘာ ၁၆၊ ၂၀၂၅။

မန္တလေးတိုင်း၊ မတ္တရာမြို့နယ်ကို စစ်ကော်မရှင်တပ်က စက်တင်ဘာ ၁၅ ရက်နေ့လယ် ၁ နာရီကျော်မှာ လေကြောင်းကနေ ဗုံးကြဲတိုက်ခိုက်ခဲ့တာကြောင့် ကလေး ၂ ဦးအပါအဝင် ၆ ဦးသေဆုံးခဲ့တယ်လို့ဒေသခံတွေက ပြောပါတယ်။

မတ္တရာမြို့နယ်၊ အရှေ့မြောက်ခြမ်းရှိ ဒီယာနဲ့ ဥက္ကံစတဲ့ကျေးရွာ ၂ ရွာအနီး ကားလမ်းမကို တိုက်ခိုက်ရေးလေယာဥ် ၂ စီး၊ ပေါင် ၅၀၀ နဲ့ ၃၀၀ ဗုံးသီး ၃ လုံးကြဲချခဲ့တာလို့ ဆိုပါတယ်။

“တိုက်ပွဲဖြစ်တာလုံးဝမရှိပါဘူး။ ဥက္ကံနဲ့ ဒီယာရွာက ၂ မိုင်လောက်ပဲဝေးပါတယ်။ ဗုံးသီးက နေအိမ်ပေါ်ကျလားဆိုတော့ ကားလမ်းဘေးဝန်းကျင်ကျတာ။ ကားလမ်းဘေးက ပြည်သူတွေသေရတာပါဗျ”လို့ Wetlet Informational Network မှ တာဝန်ရှိသူ အမျိုးသားတဦးကပြောပါတယ်။

သေဆုံးသူ ၆ ဦးမှာ ဥက္ကံကျေးရွာမှ အမျိုးသား ၃ ဦး နဲ့ ဒီယာကျေးရွာမှ အမျိုးသား ၃ ဦးတို့ဖြစ်ပြီး အဲဒီထဲမှာ အသက် ၁၀ ကျော်အရွယ်အမျိုးသား ၂ ဦးပါဝင်ပြီး အသေးစိတ်အချက်အလက်တွေကိုတော့ ဆက်သွယ်ရေးအခက်အခဲကြောင့် လောလောဆယ် မသိရှိရသေးဘူးလို့ အထက်ပါအမျိုးသားက ပြောပါတယ်။

ပြီးခဲ့တဲ့စက်တင်ဘာ ၁၃ ရက်ကလည်း မတ္တရာမြို့နယ်အရှေ့ခြမ်းရှိ အင်ကြင်းမြိုင် ကျေးရွာအနီးကို စစ်ကော်မရှင်တပ်က Y12 လေယာဥ်နဲ့ ဗုံးကြဲတိုက်ခိုက်ခဲ့ရာ ဘုန်းကြီးကျောင်းနဲ့ သီလရှင်ကျောင်းတွေကို ကျရောက်ပေါက်ကွဲခဲ့တာကြောင့် ကိုရင် ၁ ပါးအပါအဝင် ၃ ဦးသေဆုံးတယ်လို့ သိရပါတယ်။

စာတည်း – လင်း

မြေလတ်အသံ၊ စက်တင်ဘာ ၁၆၊ ၂၀၂၅။

မန္တလေးတိုင်း၊ မိုးကုတ်မြို့ကို စစ်ကော်မရှင်တပ်က စက်တင်ဘာ ၁၆ ရက် ဒီမနက် ၇ နာရီ ကျော်မှာ ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးဒဏ်ရာရရှိပြီး လူနေအိမ် ၄ လုံး ပျက်စီးခဲ့တယ်လို့ ဒေသခံတွေဆီက သိရပါတယ်။

မိုးကုတ်မြို့အရှေ့ပိုင်း၊ အုန်းကိုင်းရွာသစ်ရပ်ကွက်ရှိ လင်းရောင်ခြည်ဘုန်းကြီးကျောင်းအနီးကို စစ်ကော်မရှင်ရဲ့ တိုက်ခိုက်ရေးလေယာဥ် ၁ စီးက ဗုံး ၁ လုံးကြဲချခဲ့ရာမှာ ထိခိုက်ခဲ့ကြတာပါ။

“သက်လတ်ပိုင်း ပြည်သူအမျိုးသမီး ၁ ဦး ထိခိုက်ဒဏ်ရာရတယ်။ ဒဏ်ရာကတော့ မစိုးရိမ်ရပါ။ လူအသေအပျောက်မရှိခဲ့လို့ ကံကောင်းတယ်လို့ပြောရမယ်။”လို့ မိုးကုတ်မြို့ ခံ အမျိုးသားတဦးက ပြောပါတယ်။

ပျက်စီးသွားတဲ့နေအိမ်တွေဟာ လင်းရောင်ခြည်ဘုန်းကြီးကျောင်းအနီးက လူနေအိမ် ၄ လုံးဖြစ်ပြီး ဘုန်းကြီးကျောင်းကတော့ ပျက်စီးမှုမရှိခဲ့ဘူးလို့ အထက်ပါအမျိုးသားက ပြောပါတယ်။

အလားတူ သြဂုတ် ၂၅ ရက်ကလည်း မိုးကုတ်မြို့၊ စည်ပင်သာယာရပ်ကွက်ကို တိုက်ခိုက်ရေးလေယာဥ် ၁ စီးနဲ့ ဗုံး ၂ လုံးကြဲချတိုက်ခိုက်ခဲ့တာကြောင့် အမျိုးသား ၁ ဦး ထိခိုက်ပြီး လူနေအိမ် ၅ လုံး ပျက်စီးခဲ့ပါသေးတယ်။

ဒါ့အပြင် ပြီးခဲ့တဲ့ဩဂုတ်လအတွင်းမှာ စစ်ကော်မရှင်တပ်က မိုးကုတ်မြို့ပေါ်ကို ဗုံး ၅ ကြိမ် စုစုပေါင်း ဗုံးသီး ၁၁ လုံးကြဲချတိုက်ခိုက်ခဲ့တာကြောင့် သာမဏေ ၂ ပါး၊ ကလေးငယ် ၄ ဦး၊ အမျိုးသား ၁၈ ဦး၊ အမျိုးသမီး ၁၇ ဦး စုစုပေါင်း ၄၁ ဦးသေဆုံးပြီး ၂၄ ဦးဒဏ်ရာရရှိခဲ့တယ်လို့ တအာင်းအမျိုးသားလွတ်မြောက်ရေး တပ်မတော် – TNLA ရဲ့ မှတ်တမ်းအရ သိရပါတယ်။

စာတည်း – လင်း

မတ္တရာ၊ စက်တင်ဘာ ၁၄၊ ၂၀၂၅။

မန္တလေးတိုင်း၊ မတ္တရာမြို့နယ် အရှေ့မြောက်ခြမ်းကို စစ်ကော်မရှင်တပ်က လေကြောင်းကနေ ဗုံးကြဲလို့ ကိုရင် ၁ ပါးအပါအဝင် ၃ ဦးသေဆုံးတယ်လို့ ကျေးရွာနဲ့နီးစပ်သူတွေထံက သိရပါတယ်။

စက်တင်ဘာ ၁၃ ရက် ည ၇ နာရီခန့်မှာ စစ်ကော်မရှင်တပ်က Y12 လေယာဥ်နဲ့ အင်ကြင်းမြိုင်ကျေးရွာအနီးဝန်းကျင်က တောင်ကြောတွေကို ဗုံးကြဲချခဲ့ရာ ဘုန်းကြီးကျောင်းနဲ့ သီလရှင်ကျောင်းတွေကို ကျရောက်ပေါက်ကွဲခဲ့တာလို့ ဆိုပါတယ်။

” တောင်ကြောတွေပေါ်မှာ PDF တွေရှိတယ်အထင်နဲ့ ဗုံးလာကြဲတာ။ တောင်အောက်မှာက ဘုန်းကြီးကျောင်း၊ မယ်သီလရှင်ကျောင်းတွေရှိတော့ လျှောက်ချတာဆိုတော့ အဲ့လိုနဲ့ထိကုန်တာ။ တိုက်ပွဲဖြစ်တာလည်းမရှိဘူး”လို့ ကျေးရွာနဲ့နီးစပ်သူတဦးက ပြောပါတယ်။

ဗုံးထိမှန်တာကြောင့် အသက် ၁၁ နှစ် ကိုရင် ၁ ပါး၊ အသက် ၇၀ နှစ် သီလရှင် ၁ ပါးနဲ့ အသက် ၄၀ နှစ် အမျိုးသမီး ၁ ဦးတို့သေဆုံးခဲ့ပြီး ဘုန်းကြီးကျောင်းနဲ့ သီလရှင်ကျောင်းက အဆောက်အအုံတွေလည်း ပျက်စီးမှုရှိခဲ့တယ်လို့ သိရပါတယ်။

စစ်ကော်မရှင်ဘက်က လေကြောင်းကနေ ဗုံးလာကြဲချိန် သံဃာတော်၊ ကိုရင်၊ မယ်သီလရှင်တွေနဲ့ ကျေးရွာနေပြည်သူတွေက ပုန်းအောင်းနေရပြီး ရွာကနေစွန့်ခွာထွက်ပြေးကြတာတော့မရှိဘူးလို့ ဆိုပါတယ်။

စက်တင်ဘာ ၁၃ ရက် ယမန်နေ့မှာပဲ သပိတ်ကျင်းမြို့နယ်၊ ညောင်ပင်သာနဲ့ ကျောက်ဖြာရွာတွေကို စစ်ကော်မရှင်တပ်က လေကြောင်းကနေ ဗုံးကြဲလို့ ကလေး ၁ ဦးနဲ့ အမျိုးသမီး ၁ ဦး သေဆုံးပြီး မတ္တရာနဲ့သပိတ်ကျင်းမှာ တရက်တည်း အရပ်သား ၅ ဦးသေဆုံးခဲ့တာလည်း ဖြစ်ပါတယ်။