ရွှေဘို၊ ဧပြီ ၂၃၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ တကန်သာကျေးရွာမှာ ဖြစ်ပွားတဲ့ရန်ပွဲအတွင်း ဖမ်းဆီးခံထားရသူ တကန်သာရွာခံ ၄ ဦးပြန်လွတ်လာပြီလို့ ရွာခံတွေဆီက သိရပါတယ်။

လူသေဆုံးတဲ့အထိဖြစ်ပွားခဲ့တဲ့ရန်ပွဲမှာ ပါဝင်တယ်ဆိုကာ ဖမ်းဆီးစစ်ဆေးခံနေရတဲ့ ဇင်ဘိုထက်၊ စိုင်းကို၊ ရဲမြင့်ထွေး၊ ဖြိုးမင်းဦးတို့ ၄ ဦးကို တကန်သာ တိုက်နယ် ၄ ပြည်သူ့အုပ်ချုပ်ရေးအဖွဲ့က ဧပြီ ၁၉ ရက်မှာ ပြန်ခေါ်လာပြီး ကျေးရွာမှာ ပြန်လည်နေထိုင်ခွင့်ပေးထားတယ်လို့ ဆိုပါတယ်။

“ဒီကိစ္စနဲ့ဘာမှ မပတ်သက်တော့ဘူးဆိုပြီး အပြီးတိုင်လွတ်လာတာတော့မဟုတ်သေးဘူး။ တရားရုံးတက်ရတာမျိုးတော့ရှိဦးမယ်။ အမှုကိုဖြေရှင်းတဲ့နေရာမှာ အကျုံးဝင်သေးတယ်။ ချုပ်နှောင်ခံထားရတာမျိုးမရှိဘူး။ ရွာထဲမှာပဲ ကျေးရွာ ပအဖက ပြန်ခေါ်ထားတဲ့သဘော။ ဘယ်မှာတော့မသွားရဘူး၊ လိုအပ်ရင်ပြန်ခေါ်ခံရမှာ”လို့ ရွာခံတဦးကပြောပါတယ်။

ကျန်ဖမ်းဆီးခံရသူတွေဖြစ်တဲ့ ကျေးရွာပကဖအဖွဲ့ဝင် ရဲမာန်၊ ကျော်ကြီး၊ ထက်ဝေ၊ AZ နဲ့ ရွာသား ကိုသက်ဖူး တို့ ၅ ဦးကို ရွှေဘိုခရိုင်ပြည်သူ့ကာကွယ် ရေးအဖွဲ့က လွှဲပြောင်းထိန်းသိမ်းထားပြီး ကိုတင်လင်း ဆိုသူကိုတော့ ပြစ်မှုကျူးလွန်သူအဖြစ် ရွှေဘိုခရိုင်တပ်ရင်း ၅ က မြို့နယ်ပလဖကို လွှဲပြောင်းထားတယ်လို့ အထက်ပါရွာခံက ပြောပါတယ်။

ဒီရန်ပွဲမှာပါဝင်သူတွေကတော့ မြို့နယ်တရားရုံးမှာ အမှုရင်ဆိုင်ကြရမှာဖြစ်ပြီး ရွှေဘိုခရိုင်တပ်ရင်း ၅ ထံမှာ ဆက်လက်ဖမ်းဆီးထားသူမရှိတော့ဘူးလို့ ဆိုပါတယ်။

ဧပြီ ၁၄ ရက် ညနေ ၄နာရီခန့်မှာ ရွှေဘိုမြို့နယ်၊ တိုက်နယ် ၄ နယ်မြေ၊ တကန်သာရွာမှာ ရွာဓလေ့ဘုရားပို့ပွဲပြုလုပ်နေချိန် ရွှေဘိုခရိုင်တပ်ရင်း ၅ က တပ်ဖွဲ့ဝင်အချို့နဲ့တကန်သာကျေးရွာ ပကဖ၊ ပြည်သူအချို့ ရန်ပွဲဖြစ်ခဲ့ပြီးနောက် ရွှေဘိုခရိုင်တပ်ရင်း ၅ တပ်ခွဲ ၃ က တပ်ဖွဲ့ဝင် ကိုရာဇာမှာ ဓားထိုးခံခဲ့ရကာ ဆေးရုံကိုပို့ဆောင်ချိန် လမ်းမှာသေဆုံးသွားခဲ့ပါတယ်။

ကိုရာဇာ ဓားထိုးခံရကာ သေဆုံးပြီးနောက် တပ်ရင်း ၅ မှ လက်နက်ကိုင်တပ်ဖွဲ့ဝင် အင်အား ၆၀ ခန့် အခင်းဖြစ်ကျေးရွာကိုရောက်ရှိလာပြီး ရန်ပွဲမှာပါဝင်သူတွေဖြစ်တဲ့ ကျေးရွာပကဖတပ်ဖွဲ့ဝင်နဲ့ ရွာခံအမျိုးသား စုစုပေါင်း ၁၁ ဦးကို တပ်ရင်း ၅ ဌာနချုပ်ကို ဖမ်းဆီးခေါ်ဆောင်သွားခဲ့တာပါ။

အဲ့ဒီနောက် ဧပြီ ၁၅ ရက်ညနေမှာ ဖမ်းဆီးခံရသူတွေအနက် ပကဖအဖွဲ့ဝင်ရဲဝင်းဆိုသူ သေဆုံးသွားပြီး ဒီသေဆုံးမှုဟာ စစ်ဆေးနေစဥ်အမောဆို့သေဆုံးသွားတာလို့ တပ်ရင်း ၅ က ကျေးရွာကို အကြောင်းကြားခဲ့တာလို့ အထက်ပါဒေသခံဆီကသိရပါတယ်။

ပုံစာ – ဓားထိုးခံရပြီး သေဆုံးခဲ့သည့် ရဲဘော် ရာဇာ။

စာတည်း – လင်း

ညောင်လေးပင်၊ ဧပြီ ၁၉၊ ၂၀၂၅။

ပဲခူးတိုင်း၊ ညောင်လေးပင်မြို့ကနေ မွန်ပြည်နယ်၊ ကျိုက်ထိုမြို့နယ်၊ ကဒက်ချောင်းမှာ ဖမ်းဆီးခံထားရတဲ့ ညောင်လေးပင်ကပျူစောထီးမိသားစုဝင် ၄၀ ကျော်ကို ပြန်လွှတ်လိုက်ပြီး အဲ့ဒီထဲက အရေးပါတဲ့ပျူစောထီး ၆ ဦးကိုတော့ ဆက်လက်ဖမ်းဆီးစစ်ဆေးနေတယ်လို့ အမှတ် ၂ စစ်ဒေသခွဲ၊ အမှတ် ၂၇ စစ်ဗျူဟာတာဝန်ရှိသူဆီက သိရပါတယ်။

ဧပြီ ၁၈ ရက်မှာ ဖမ်းမိထားတဲ့အထဲပါလာတဲ့ အသက် ၁၀ နှစ်အောက် ကလေးငယ်တွေ အမျိုးသမီးတွေနဲ့ အသက် ၁၈ နှစ်မပြည့်သေးတဲ့ လူငယ်တွေကို ပြန်လွှတ်ပေးလိုက်တယ်လို့ ဆိုပါတယ်။

“ခေါင်းဆောင်ကတော့ လှိုင်မင်းပါ။ သူနဲ့အတူ ပျူအဖွဲ့ဝင် ၄ ယောက်ပါတယ်။ သူနဲ့ဆို ၅ ယောက်ပေါ့။ ကြီးမားတဲ့ပစ်မှုတွေကို အများကြီး ကျူးလွန်ထားကြပါတယ်။ သူ့မိသားစုဝင်တွေကိုတော့ ကောင်းကောင်းမွန်မွန်ကျွေးမွေးစောင့်ရှောက်ထားပြီး ပြန်လွှတ်ပေးခဲ့ပါတယ်”လို့ အမှတ် ၂၇ စစ်ဗျူဟာ တာဝန်ရှိသူတဦးကပြောပါတယ်။

ပျူစောထီးတွေကို ဖမ်းဆီးတာဟာ စစ်ကောင်စီထောက်ခံချန်နယ်တွေကဝါဒဖြန့်သလိုမျိုး ဘုရားဖူး ပြည်သူတွေကို အကြောင်းမဲ့ဖမ်းဆီးတာမျိုးမဟုတ်ဘဲ ပျူစောထီးတွေဖြစ်ကြောင်း သတင်းအတိအကျရတဲ့အတွက် ဖမ်းဆီးတာဖြစ်တယ်လို့ အထက်ပါ တာဝန်ရှိသူကဆက်ပြောပါတယ်။

မိသားစုဝင်တွေကိုပြန်လွှတ်ပေးခဲ့ပြီး ပျူစောထီးတွေဖြစ်တဲ့ ခေါင်းဆောင် လှိုင်မင်း၊ ဇနီးဖြစ်သူ ယမင်း၊ သားဖြစ်သူ မင်းမော်ဦး၊ မဲကြီး၊ ကျော်ကျော်ဦး၊ သိန်းဌေးတို့ကို ဆက်လက်ဖမ်းဆီးထားတယ်လို့ ဆိုပါတယ်။

ဆက်လက်ဖမ်းဆီးထားသူ ၆ ဦးက လူသတ်အလောင်းဖျောက်တာ၊ ခမရ ၂၀ က စစ်ကောင်စီ တပ်ဖွဲ့ဝင်တွေနဲ့ပေါင်းပြီး ရွာတွေမီးရှို့တာ၊ လူငယ်တွေကို စစ်မှုထမ်းပေါ်တာဆွဲဖမ်းဆီးပြီး ငွေညှစ်တဲ့ကိစ္စတွေကိုကျူးလွန်ထားတယ်လို့ စစ်ဆေးထားမှုအရ သိရတယ်လို့ဆိုပါတယ်။

စစ်ဆေးပေါ်ပေါက်ချက်တွေအရ ကျူးလွန်ထားတဲ့ပြစ်မှုတွေအတွက် ထိရောက်တဲ့ ပြစ်ဒဏ်ရအောင် ဆောင်ရွက်သွားမှာဖြစ်ပြီး ပြစ်မှုပြစ်ဒဏ်ကတော့ မဆုံးဖြတ်ရသေးဘူးလို့ အထက်ပါ တာဝန်ရှိသူကဆက်ပြောပါတယ်။

ဧပြီ ၁၅ ရက်နေ့လယ် ၂ နာရီခန့်မှာ ကဒက်ချောင်းရှိ ဝါဆိုမိုးစားသောက်ဆိုင်မှာရှိနေတဲ့ ပျူစောထီး ခေါင်းဆောင် လှိုင်မင်း၊ ဇနီးဖြစ်သူ ယမင်းနဲ့ ပျူစောထီး ဒုခေါင်းဆောင် မဲကြီး အပါအဝင် အမျိုးသား၊ အမျိုးသမီး ၄၀ ကျော်ကို အမှတ် ၂၇ စစ်ဗျူဟာတပ်ဖွဲ့ဝင်တွေက ဖမ်ဆီးခဲ့တာဖြစ်ပါတယ်။

ပုံစာ – ပျူစောထီးခေါင်းဆောင်လှိုင်မင်း။

သတင်း – ကျော်ကြီး၊ စာတည်း – လင်း

ညောင်လေးပင်၊ ဧပြီ ၁၇၊ ၂၀၂၅။

ပဲခူးတိုင်း၊ ညောင်လေးပင်မြို့ကလာတဲ့ ပျုစောထီးခေါင်းဆောင်အပါအဝင် မိသားစုဝင် ၄၀ ကျော်ကို မွန်ပြည်နယ်၊ ကျိုက်ထိုမြို့နယ်၊ ကင်မွန်းစခန်းကျေးရွာရှိ ကဒက်ချောင်းရေတံခွန်မှာ တော်လှန်ရေးအဖွဲ့တခုက ဖမ်းဆီးသွားတယ်လို့ ပဲခူးတိုင်းအခြေစိုက် ဒေသကာကွယ်ရေး အဖွဲ့ဝင်တွေဆီက သိရပါတယ်။

ဧပြီ ၁၅ ရက်နေ့လယ် ၂ နာရီခန့်မှာ ကဒက်ချောင်းရှိ ဝါဆိုမိုးစားသောက်ဆိုင်မှာရှိနေတဲ့ ပျူစောထီးခေါင်းဆောင် လှိုင်မင်း၊ ဇနီးဖြစ်သူ ယမင်းနဲ့ ပျုစောထီး ဒုခေါင်းဆောင် မဲကြီး အပါအဝင် အမျိုးသား၊ အမျိုးသမီး ၄၀ ကျော်ကို ဒေသအခြေစိုက်လက်နက်ကိုင်အဖွဲ့တခုက ဖမ်းဆီးသွားတာလို့ ဆိုပါတယ်။

“ကျနော့်အထင်ဆို အဲဒီမှာပျူ အားလုံး ၁၃ ယောက်လောက်ပါမယ်။ ယောကျ်ားလေးတွေ တော်တော်များများက ပျူတွေ။ အားလုံးတော့ ပျူတွေမဟုတ်ဘူး။ မိန်းကလေးတွေနဲ့ ကလေးတွေလည်းပါတယ်။”လို့ ပဲခူးတိုင်းအခြေစိုက် ဒေသကာကွယ်ရေးတပ်ဖွဲ့တခုမှ တပ်ဖွဲ့ဝင်တဦးက ပြောပါတယ်။

ဖမ်းဆီးခံရသူတွေကိုတော့ ဧပြီ ၁၇ ရက်အထိ ဖမ်းဆီးသွားတဲ့အဖွဲ့က ထိန်းသိမ်းထားပြီး ဆက်လက်စစ်ဆေးနေတယ်လို့သိရကြောင်း သူကပြောပါတယ်။

ဖမ်းဆီးခံရသူတွေထဲမှာ ပျူစောထီးအဖွဲ့ဝင်တွေရဲ့ မိသားစုဝင်တွေဖြစ်တဲ့ အသက် ၁၀ နှစ်အောက် ကလေးငယ် ၈ ဦးခန့်နဲ့ သက်ကြီးပိုင်းအမျိုးသမီးအချို့လည်းပါဝင်ပြီး သူတို့ကို ဘယ်လိုအရေးယူဆောင်ရွက်မယ်ဆိုတာကိုတော့ မသိရသေးဘူးလို့ ဆိုပါတယ်။

အဆိုပါ ဖမ်းဆီးထားမှုနဲ့ပတ်သက်ပြီး သက်ဆိုင်ရာအဖွဲ့တွေဘက်ကလည်း သတင်းထုတ်ပြန်တာမျိုး မရှိသေးပါဘူး။

စစ်ကောင်စီရဲ့ ဧပြီ ၁၆ ရက်ထုတ်ပြန်ကြေညာချက်မှာတော့ ကျိုက်ထီးရိုးဘုရားဖူးလာတဲ့ ပြည်သူ ၄၈ ဦးကို ကဒက်ချောင်းရှိ စားသောက်ဆိုင်တခုကနေ PDF အဖွဲ့က ခြေလျင်နဲ့ရောက်လာကာ လိုက်ထရပ်ကား ၂ စီးနဲ့ဖမ်းခေါ်သွားခဲ့တယ်လို့ဖော်ပြထားပြီး ဖမ်းဆီးခံရသူတွေက ဘယ်သူဘယ်ဝါတွေဖြစ်တယ်ဆိုတာကိုတော့ ဖော်ပြထားတာမျိုးမရှိပါဘူး။

စာတည်း – လင်း

မုံရွာ၊ ဧပြီ ၁၅၊ ၂၀၂၅။

စစ်ကိုင်းတိုင်း၊ မုံရွာမြို့မှာ သင်္ကြန်လည်နေတဲ့ လူငယ်အမျိုးသား ၂ ဦးကို စစ်ကောင်စီတပ်ဖွဲ့က ဖမ်းဆီးသွားခဲ့တယ်လို့ ဒေသခံတွေဆီက သိရပါတယ်။

ဧပြီ ၁၅ ရက် ( သင်္ကြန်အကြတ်နေ့) မနက် ၉ နာရီဝန်းကျင်က မုံရွာမြို့၊ ဒေါနခြံရပ်ကွက်၊ ရေစင်ကြီးမီးပွိုင့်အနီး သင်္ကြန်အလည်အပတ်ထွက်လာတဲ့ ဆိုင်ကယ်စီးအမျိုးသား ၂ ဦးကို အိမ်စီးကား ၃ စီးနဲ့ အရပ်ဝတ်စစ်ကောင်စီတပ်ဖွဲ့ဝင် ၁၅ ဦးခန့်က ဖမ်းဆီးခေါ်ဆောင်သွားခဲ့တာလို့ ဆိုပါတယ်။

” တချို့က စစ်သားမဟုတ်ဘူး ရဲတွေကျည်ကာကတော့ စစ်အရောင်ဝတ်ထားကြတယ်။ ကောင်လေးတွေ မောင်းလာတဲ့ ဆိုင်ကယ်ရှေ့ကို ပိတ်ရပ်လိုက်တယ်၊ ပြီးမှ ကားပေါ်ကဆင်းပြီး ကောင်လေးတွေကို သေနတ်နဲ့ချိန်ကားပေါ် အတင်းဆွဲခေါ်သွားတာ” လို့ မျက်မြင်တွေ့ရှိသူ အသက် ၃၀ ကျော်အရွယ် အမျိုးသမီးတဦးက မြေလတ်အသံကို ပြောပါတယ်။

စစ်အာဏာသိမ်းပြီးနောက် စစ်ကောင်စီက မုံရွာမြို့ပေါ်မှာ အမျိုးသား ၂ ဦးတွဲ ဆိုင်ကယ်စီးနင်းတာနဲ့ အမျိုးသမီးအနောက်မှာအမျိုးသားစီးနင်းမှုတွေကို တားမြစ်ထားပြီး တွေ့ရှိပါက ဖမ်းဆီး၊ သေနတ်နဲ့ပစ်ခတ်တာတွေကို လုပ်ဆောင်တယ်လို့ ဆိုပါတယ်။

ပုံစာ – မုံရွာ၊ ရေစင်ကြီးမီးပွိုင့်အနီး သင်္ကြန်အကျနေ့ မြင်ကွင်း ( ဓာတ်ပုံ – မြေလတ်အသံ)။

သတင်း – ခေတ်သဒ္ဒါ၊ စာတည်း – ဟိန်းစံ

ကန့်ဘလူ၊ မတ် ၅၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်၊ ကာဘိုးကျေးရွာမှာ စစ်ကောင်စီစစ်ကိုင်းတိုင်းဝန်ကြီးချုပ် ဦးမြတ်ကျော်ရဲ့ခယ်မ အပါအဝင် ၆ ဦးဖမ်းဆီးခံရတယ်လို့ ကာဘိုးတိုက်နယ်ဒေသကာကွယ်ရေးအဖွဲ့ဝင်တဦးထံက သိရပါတယ်။

မတ် ၃ ရက် မနက် ၉ နာရီခန့်မှာ စစ်ကောင်စီအင်အား ၂၀ ကျော်လောက်က ကျေးရွာထဲကို ကားတွေနဲ့ဝင်လာပြီး ဦးမြတ်ကျော်ရဲ့ ခယ်မဖြစ်သူ ဒေါ်ကေသီ ၊ ကိုအောင်ကျော်၊ ဦးမျိုးဝင်းမောင်၊ ဒေါ်ဝင်းတင့်နဲ့ နောက်ထပ်အမျိုးသမီး ၂ ဦး စုစုပေါင်း ၆ ဦးကို ၎င်းတို့ရဲ့နေအိမ်တွေကနေ အသီးသီးဖမ်းဆီးခေါ်ဆောင်သွားတာလို့ ဆိုပါတယ်။

“သူတို့ဘက်က မသင်္ကာဘူးဆိုပြီး လာဖမ်းသွားတာပဲ။ ကာဘိုးက စကစကုန်းရှိတယ် တပ်စွဲထားတာ။ ဖမ်းခံရတဲ့ရွာခံအချို့လည်း သာမန်ဒေသခံတွေပဲ။ အရက်ရောင်းတာ၊ လက်ဖက်ရည်ရောင်းတာတွေပဲ။”လို့ ကာဘိုးတိုက်နယ် ဒေသကာကွယ်ရေးတာဝန်ရှိသူတဦးက မြေလတ်အသံကို ပြောပါတယ်။

ဖမ်းဆီးခံရသူတွေထဲမှာ အမည်မသိအမျိုးသမီး ၂ ဦးက အရပ်သားအစိုးရလက်ထက် စစ်ကိုင်းတိုင်းဝန်ကြီးချုပ် ဒေါက်တာမြင့်နိုင်ရဲ့ ဇနီး ဒေါ်ရီခင်နဲ့သမီးဖြစ်သူတို့ဖြစ်တယ်လို့ သတင်းတွေ ထွက်ပေါ်နေပြီး အတည်ပြုနိုင်ဖို့စုံစမ်းနေတယ်လို့ သူကဆက်ပြောပါတယ်။

စစ်ကောင်စီအဖွဲ့ဝင်တွေဟာ ဖမ်းဆီးထားသူ ၆ ဦးကို ကန့်ဘလူမြို့အခြေစိုက် ၆၀၀၆ တင့်ကားတပ်ထဲကိုခေါ်ဆောင်သွားခဲ့တာဖြစ်ပြီး မတ် ၅ ရက် ဒီကနေ့ နေ့လယ်ပိုင်းအထိ ဖမ်းဆီးခံရသူတွေနဲ့အဆက်အသွယ်မရဘူးလို့ ဆိုပါတယ်။

ကာဘိုးကျေးရွာဟာ စစ်ကောင်စီခန့်စစ်ကိုင်းတိုင်းဝန်ကြီးချုပ် ဦးမြတ်ကျော်ရဲ့ ဇာတိကျေးရွာဖြစ်ပြီး အဆိုပါကျေးရွာကို စစ်ကောင်စီတပ်က ထိန်းချုပ်ထားကာ ကျေးရွာထဲမှာ စစ်ကောင်စီတပ်အင်အား ၅၀ ကျော်နဲ့ စခန်းအထိုင်ချတပ်ဆွဲထားတယ်လို့ သိရပါတယ်။

ဖေဖော်ဝါရီ ၂၃ ရက်ကလည်း ငှက်ပျောတိုင်းကျေးရွာမှာတပ်စွဲထားတဲ့ စစ်ကောင်စီတပ်ဖွဲ့ဝင် ၁၅ ဦးခန့်က ငှက်ပျောတိုင်း-ကျေးပင်အက်လမ်းအတိုင်း ကင်းလှည့်နေစဥ် ရွှေကပ်ကျော် ဘုရားအနီးမှာ လူ ၇ ဦးကို ဖမ်းဆီးခဲ့ပြီး ၄ ဦးကို သေနတ်နဲ့ပစ်သတ်ခဲ့တယ်လို့ သိရပါတယ်။

စာတည်း – ဟိန်းစံ