နတ်တလင်း၊ ဧပြီ ၁၁၊ ၂၀၂၆။

ပဲခူးတိုင်း၊ နတ်တလင်းမြို့နယ်က ကျေးရွာ ၃ ရွာကို စစ်ကော်မရှင်ဘက်က လေကြောင်းကနေ ဗုံးကြဲခံတာကြောင့် ပြည်သူ ၂ ဦးသေဆုံးကာ နေအိမ် ၄၀ နီးပါး မီးလောင်ခဲ့တယ်လို့ ကျေးရွာနဲ့ နီးစပ်သူတွေဆီက သိရပါတယ်။

ဧပြီ ၉ ရက်မနက် ၁၁ နာရီခန့်မှာ မကျီးပင်ကျေးရွာကို စက်တပ်လေထီးနဲ့ဗုံး ၂ လုံး၊ ညနေ ၅ နာရီခန့်မှာ ကျောက်ခွက်ကျေးရွာထဲကို စက်တပ်လေထီးနဲ့ဗုံး ၂ လုံး၊ ညနေ ၅ နာရီခန့်မှာပဲ ကျောက်ခွက်ကျေးရွာနဲ့ ကျွန်းလေးပင်ရွာတို့ကို ဒရုန်းနဲ့ဗုံးအလုံးရေ ၁၅ လုံးထက်မနည်း၊ ည ၁၁ နာရီခန့်မှာ မကျီးပင်ကျေးရွာစက်လှေဂိတ်ကို ဂျက်ဖိုက်တာနဲ့ ဗုံးသီး ၁ လုံး ကြဲချခဲ့တာလို့ဆိုပါတယ်။

“ပါရာမိုတာလည်း ခေါက်တုံခေါက်ပြန်ပဲ။ ဒရုန်းကလည်း အလုံးရေတောင်မရေနိုင်ဘူး။ အဲဒီအသီးတွေကျပြီး သုံးလေးအိမ် လေးငါးအိမ် အဲ့လိုတွေမီးလောင်တာ။ ဂျက်ဖိုက်တာနဲ့ချတဲ့ ပထမညမှာ သေတာရှိတယ်။ ညကတော့မထိဘူး။ သွားလိုက်လာလိုက် ချနေတော့တာ “လို့ ကျေးရွာနဲ့နီးစပ်သူတဦးက ပြောပါတယ်။

လေကြောင်းတိုက်ခိုက်မှုအတွင်း မကျီးပင်ကျေးရွာက အသက် ၃၀ ဝန်းကျင်အရွယ် ကိုထွန်းထွန်းဦးနဲ့ ကျွန်းကလေးကျေးရွာက ကိုလပြည်ဝန်းတို့သေဆုံးခဲ့သလို ကျောက်ခွက်ကျေးရွာနေ အသက် ၆၀ ကျော်အရွယ် အဖိုးအဖွား ၂ ဦးလည်း ဒဏ်ရာရခဲ့ပါတယ်။

ဒါ့အပြင်ကျောက်ခွက်ကျေးရွာက အိမ်ခြေ ၂၀ ကျော်နဲ့ ကျွန်းလေးပင်းကျေးရွာက အိမ်ခြေ ၂၀ ခန့်မီးလောင်ပျက်စီးထားတယ်လို့လည်း ဆိုပါတယ်။

ဧပြီ ၅ ရက်ကစလို့ နတ်တလင်းကစစ်ကြောင်းထိုးနေတဲ့ အင်အား ၁၀၀ ကျော်ပါ စစ်ကြောင်းနဲ့ ဇီးကုန်း၊ ပေါင်းတည်မြို့နယ်ဘက်ကဝင်လာတဲ့ အင်အား ၂၀၀ ကျော်ပါစစ်ကြောင်းဟာ ဧပြီ ၁၁ ရက်မှာ ကျောက်ဆွယ်၊ ကျောက်ခွက်၊ ရှားစေးဖိုရွာတွေမှာ ရောက်ရှိနေပြီး အင်အားဖြန့်ကျက်ထားတယ်လို့ ဆိုပါတယ်။

စစ်ကြောင်းဝင်လာနေတာကြောင့် ကန်သာယာ၊ ပဲမခမ်း၊ ညောင်ဝိုင်း၊ စံကြီးလောင့်၊ ကျောက်စွယ်၊ ကျောက်ခွက်၊ သရက်ပုဂံရိုး၊ ကျွန်းလေပင်၊ ဆည်းကန်၊ ထန်းတော၊ အိုးဖိုကုန်း ၊ ရေနံကုန်း၊ လယ်မအင်း၊ ဘန့်ဘွေးကုန်း၊ ရှားစေးဖို၊ ချောင်းကမ်းကြီး၊ သာယာကုန်း ၊ ညောင်ဝိုင်းကျေးရွာရှိ ပြည်သူ ၁၀,၀၀၀ ကျော်စစ်ဘေးရှောင်နေရပါတယ်။

ဧပြီ ၆ ရက်ကလည်း ပဲမခမ်းကျေးရွာကို စစ်ကော်မရှင်စစ်ကြောင်းကဒရုန်းနဲ့ဗုံးချလို့ အမျိုးသမီး ၂ ဦးသေဆုံးပြီး ၂ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

အောင်စိုး ၊ ကျော်ကြီး

ရွှေကျင်၊ မေ ၂၄၊ ၂၀၂၅။

ပဲခူးတိုင်း၊ ရွှေကျင်မြို့နယ်မှာ ရွှေကျင်မြို့နယ် အမှတ် ၁ ဒေသမှူးအပါအဝင် ၃ ဦးကို စစ်ကောင်စီတပ်ဖွဲ့ဝင်တွေက ပစ်သတ်ခဲ့တယ်လို့ မျက်မြင်တွေ့ရှိခဲ့တဲ့ ရွှေကျင်ဒေသခံတဦးဆီက သိ ရပါတယ်။

မေ ၂၁ ရက်နေ့လယ် ၁ နာရီခန့်က ရွှေကျင်မြို့နယ်၊ ကမ်းနီကျေးရွာအနီးရှိ ရာဘာခြံအနီးမှာ စစ်ကောင်စီကင်းပုန်းနဲ့တိုးပြီး ပစ်သတ်ခံခဲ့ရတာလို့ဆိုပါတယ်။

“ဒေသမှူးနဲ့သူ့ရဲ့ဘတ်စမန်းက ဆိုင်ကယ်တစီးနဲ့ မြို့ကနေလာတာ။ ရာဘာခြံနားအရောက်မှာ စကစတွေနဲ့တိုးတော့ ပစ်ခတ်တာ။ ပြီးတော့ ဓားနဲ့ထိုးကာမျက်နှာကိုစစ်ဖိနပ်နဲ့ကန်တာ။ သူ့နောက်က လာတဲ့ သားမိနှစ်ယောက်ကိုလည်း ပစ်သတ်လိုက်တယ်။ ဒေသမှူးနဲ့က ကျမနဲ့ရင်းနှီးတယ်” လို့ ဖြစ်စဥ်ကို မြင်တွေ့ခဲ့ရတဲ့ ရွှေကျင်ဒေသခံအမျိုးသမီးတဦးကပြောပါတယ်။

သေဆုံးသူတွေဟာ ရွှေကျင်မြို့နယ် KNU အုပ်ချုပ်ရေးအမြဲတမ်းကော်မတီဝင်၊ အမှတ် ၁ ဒေသမှူး အသက် ၅၀ အရွယ် စောအဲစတား၊ ဝိုင်ကျွန်းကျေးရွာက အသက် ၅၄ နှစ်အရွယ် ဦးမင်းအောင်၊ တပင်ချောင်းကျေးရွာက အသက် ၆၂ နှစ်အရွယ်ဒေါ်စန်းဌေးတို့သေဆုံးပြီး သူနဲ့အတူလိုက်ပါလာတဲ့ တပင်ချောင်းကျေးရွာက အသက် ၂၁ နှစ်အရွယ်အောင်ဇေယျာထွန်းမှာဒဏ်ရာရခဲ့တာပါ။

“အဲစတားက ဒေသခံကကားနဲ့ဝါးသွားတင်မှာကို ပွိုင့်သဘောမျိုးနဲ့ဆိုင်ကယ်လေးနဲ့ ဦးမင်းအောင်နဲ့ အတူသွားလိုက်တာ ပစ်သတ်ခံရတာ။ ဒေါ်စန်းဌေးနဲ့ အောင်ဇေယျာထွန်းကတော့ သက်သက် ဆိုင်ကယ်နဲ့လာတာ။ အဲစတားနဲ့ ဦးမင်းအောင်ကိုပစ်ပြီး သူတို့ကိုပါပစ်လိုက်တာ”လို့ KNU ညောင်လေးပင်ခရိုင်ပြောရေးဆိုခွင့်ရှိသူ စောဟဲဂေက ပြောပါတယ်။

မြေလတ်အသံကရရှိထားတဲ့ ဒေသမှူး ဦးအဲစတားရဲ့ ရုပ်အလောင်းပုံမှာတော့ ခန္ဓာကိုယ်အနှံ့အပြားမှာ ဓားထိုးဒဏ်ရာတွေနဲ့ ဘယ်ဖက်နားထင်မှာ သွေးအများအပြားထွက်နေတာကို တွေ့ရှိရပါတယ်။

အလောင်းတွေကိုတော့ အခင်းဖြစ်တဲ့နေရာမှာပဲ စစ်ကောင်စီတပ်ကထားခဲ့ကာ အဲ့ဒီနေ့ညနေပိုင်းမှာ KNU တပ်ဖွဲ့ဝင်တွေကကောက်ယူပြီးနောက် စောအဲစတားရဲ့ နာရေးကို မေ ၂၂ ရက်မှာ ပြုလုပ်ပေးခဲ့တယ်လို့ သိရပါတယ်။

စာတည်း – လင်း

ပဲခူး၊ ဇွန် ၉၊ ၂၀၂၃။

ပဲခူးတိုင်းဒေသကြီး၊ ကျောက်ကြီးမြို့ရှိ ကျောက်ကြီးမြို့နယ်အထွေထွေအုပ်ချုပ်ရေးရုံးနဲ့ မြို့နယ်ရဲစခန်း ဒရုန်းဗုံးချခံရပြီး ထိခိုက်သေဆုံးသူတွေရှိတယ်လို့ သိရပါတယ်။

ဇွန်လ ၉ ရက် မနက် ၁၀ နာရီခန့်မှာ အထွေထွေအုပ်ချုပ်ရေးရုံး၊ အစည်းအဝေးခန်းမမှာ မြို့နယ်အဆင့်၊ ဌာနဆိုင်ရာဦးစီးတွေ အစည်းအဝေးလုပ်ချိန် ဒရုန်းနဲ့ဗုံးချတိုက်ခိုက်ခဲ့သလို ၁၀ နာရီ မိနစ် ၂၀ ခန့်မှာလည်း မြို့မရဲစခန်းကို PDF ပူးပေါင်းအဖွဲ့တွေက ဒရုန်းနဲ့ဗုံးချတိုက်ခိုက်ခဲ့တယ်လို့ PDF တဦးကပြောပါတယ်။

“ထွေအုပ်ရုံးမှာ သူတို့ အစည်းဝေးလုပ်မှာသိလို့ ဗုံးချခဲ့တယ်။ ဘယ်လိုသိလဲဆိုတာကတော့ သူတို့ဌာနဆိုင်ရာတွေထဲမှာ ဖရဲသီးတွေရှိနေတာလေ။ ကျနော်တို့လုပ်မယ့် မစ်ရှင်တွေအတွက်က သူတို့ထဲကလူတွေ သတင်းပေးလို့ လုပ်ရတာများပါတယ်။ ထွေအုပ်ရုံးမှာတော့ ထိခိုက်သေဆုံးရှိတယ်လို့ သိရတယ်။ ရဲစခန်းမှာ တော့ အထိအခိုက်မသိရဘူး”လို့ သူက ပြောပါတယ်။

ကနဦးသိရှိချက်အရ ထွေအုပ်ဝန်ထမ်း ၂ ဦးထိခိုက်ဒဏ်ရာရတယ်လို့ သိထားရပြီး အစည်းအဝေးလုပ်ချိန်ဖြစ်လို့ ထိခိုက်သေဆုံး ပိုများနိုင်တယ်လို့ ဆိုပါတယ်။

ရဲစခန်းနဲ့ထွေအုပ်ရုံး ဒရုန်းနဲ့တိုက်ခိုက်ခံရပြီးချိန်မှာတော့ စစ်ကောင်စီဘက်က ဒရုန်းကို လိုက်လံပစ်ခတ်တာနဲ့ သေနတ်ပစ်ဖောက်တာတွေရှိခဲ့တယ်လို့ သိရပါတယ်။

စစ်ကောင်စီထောက်ခံတယ်လီဂရမ်မှာတော့ ထွေအုပ်ရုံးမှာ အစည်းအဝေးလုပ်ချိန် ဒရုန်းနဲ့ဗုံးချလို့ မြို့နယ်စိုက်ပျိုးရေး ဦးစီးမှူးဆိုသူ သေဆုံးပြီး၊ မြို့နယ်မီးသတ်ဦးစီးမှုးဒဏ်ရာရသလို စစ်ကောင်စီတပ်ဖွဲ့ဝင်တဦး ဒဏ်ရာရနဲ့ ထွေအုပ်ဝန်ထမ်းတဦးလည်း ဒဏ်ရာရခဲ့တယ်လို့ ဖော်ပြထားပါတယ်။

မြို့နယ်ရဲစခန်းတိုက်ခိုက်ခံရမှုမှာတော့ ရဲမိသားစုဝင်တဦး ဒဏ်ရာရသွားတယ်လို့ ဖော်ပြထားကြပါတယ်။

ဒရုန်းဗုံးကျလို့ သေဆုံးထိခိုက်သွားတဲ့သူတွေကိုတော့ စစ်ကောင်စီအဖွဲ့က ကျောက်ကြီးမြိုနယ်ပြည်သူ့ဆေးရုံကို ပို့ထားတယ်လို့ ဆိုပါတယ်။

ဇွန်လ ၆ ရက် မနက်အစောပိုင်းကလည်း ကျောက်ကြီးမြို့နယ်၊ နတ်သံကွင်းရဲစခန်းအပါအဝင် စစ်ကောင်စီ တပ်စွဲထားတဲ့နေရာ ၅ ခုကို KNLA ပူးပေါင်းတပ်တွေက ဝင်ရောက်တိုက်ခိုက်ခဲ့ရာ စစ်ကောင်စီတပ်သားနဲ့ရဲ ၃၀ ဦး ထက်မနည်း သေဆုံးခဲ့သေးတယ်လို့ သိရပါတယ်။

စာတည်း – လင်းဇေ

ပဲခူး၊ မေ ၁၉၊ ၂၀၂၃။

ပဲခူးတိုင်းအနောက်ခြမ်း၊ သာယာဝတီမြို့နယ် အနောက်ဘက်က ကျွန်းကုန်းကျေးရွာအုပ်ချုပ်ရေးမှူးကို ပစ်ခတ်ဖို့လာတဲ့သူတွေကို သားဖြစ်သူက ခုခံဖို့ကြိုးစားရာက သေနတ်ကျည်ဆံထိမှန်ကာ သေဆုံးသွားတယ်လို့ သိရပါတယ်။

ကျွန်းကုန်းအုပ်စုအုပ်ချုပ်ရေးမှူး ဦးလှဌေးရဲ့ ကျွန်းကုန်းရွာနေအိမ်မှာ မေ ၁၆ ရက် ည ၉နာရီက ဖြစ်ခဲ့တဲ့ ပစ်ခတ်မှုမှာ သားဖြစ်သူ အသက် ၄၆ နှစ်အရွယ် ဖိုးထောင်(ခ)ကိုအောင်မြင့်ခိုင် သေဆုံးခဲ့တာလို့ ဆိုပါတယ်။

“အုပ်ချုပ်ရေးမှူးလှဌေးကို သေနတ်နဲ့ပစ်တာမှာ ရှောင်လိုက်တော့မမှန်ဘူးတဲ့။ အဲအချိန်မှာလှဌေးရဲ့အိမ်ဘေးကပ်လျက်မှာ အိမ်ခွဲနေတဲ့ သားကသေနတ်သမားတွေကိုခုံခံဖို့ပြင်နေချိန်မှာ သူ့(ဖိုးထောင်)ကိုသေနတ်နဲ့ ၄ ချက်ပစ်ခတ်ခံရပြီး နေရာမှာသေသွားတာ။”လို့ ဒေသခံတဦးက ပြောပါတယ်။

သေနတ်သမား ၃ ဦး ဆိုင်ကယ်၂ စီးနဲ့ လာပစ်ခဲ့တာလို့ သိရပြီး အခုလုပ်ဆောင်မှုကို ဘယ်အဖွဲ့က လုပ်တယ်ဆိုတာ မသိရသေးသလို သတင်းထုတ်ပြန်တာမျိုးလည်း မရှိသေးပါဘူး။

ပစ်ခတ်မှုဖြစ်ပြီး အိမ်နီးနားချင်း ကိုဖိုးကျော်နဲ့ ကိုဖိုးဝင်းတို့ညီအစ်ကို ၂ ဦးကို မေလ ၁၇ ရက်မှာ စစ်တပ်ကဖမ်းသွားပြီး ကိုဖိုးထောင်ကို မေလ ၁၈ ရက် မနေ့က ကျွန်းကုန်းရွာမှာပဲ သဂြိုဟ်ခဲ့တယ်လို့ ဆိုပါတယ်။

ပြီးခဲ့နှစ် နိုဝင်ဘာ ၁၄ ရက်မှာ သာယာဝတီမြို့နယ်က အိုင်ကဒုံရွာအုပ်ချုပ်ရေးမှူး ကိုမင်းနိုင်နဲ့ မြစ်ကျိုးရွာ အုပ်ချုပ်ရေးမှူးကြီးမြင့်တို့ ၂ ဦးကို မြို့နယ်စိုက်ဘဏ်ရုံးကနေ ရွာကိုအပြန် သုံးဆယ်မြို့ ဖိုးခေါင်လမ်းက ညောင်နီကုန်းရွာနဲ့ ရေလဲရွာကြားမှာ သာယာဝတီဂဠုန်တပ်ဖွဲ့ကနန်းထိုက်အောင်စစ်ဆင်ရေးအဖြစ် သေနတ်နဲ့ပစ်လို့ သေဆုံးခဲ့ပါတယ်။

စာတည်း – ဇို