ပေါင်းတည်မြို့နယ်

ပေါင်းတည်၊ စက်တင်ဘာ ၂၈၊ ၂၀၂၆။

ပဲခူးတိုင်းအနောက်ခြမ်း၊ ပေါင်းတည်နဲ့ သဲကုန်းမြို့နယ်တွေက အာဏာသိမ်းစစ်တပ်ကို သတင်းပေးနေသူ ၃ ဦးကို ၁ လအတွင်း ရှင်းလင်းခဲ့တယ်လို့ ဒီကနေ့ရက်စွဲနဲ့ ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ PPDF ၃၆၀၁ တပ်ရင်းက သတင်းထုတ်ပြန် ခဲ့ပါတယ်။

ပြီးခဲ့တဲ့ စက်တင်ဘာ ၂၄ ရက်ည ၈ နာရီခန့်က ပေါင်းတည်မြို့နယ်၊ ပန်းသင်းပင်ရွာအနီး စမ်းကြီးရွာက အသက် ၃ဝ ဝန်းကျင် လွင်မိုးအောင် ဆိုသူ ရှင်းလင်းခံခဲ့ရတာ ဖြစ်ပါတယ်။

အလားတူ စက်တင်ဘာ ၁၉ ရက်နေ့ ညနေ ပိုင်းမှာတော့ သဲကုန်းမြို့နယ်၊ ကန့်လန့်ကုန်းအုပ်စု ကြည်ရွာက အသက် ၅၀ နှစ်ကျော်အရွယ် အေးကို ဆိုသူနဲ့ စက်တင်ဘာ ၄ ရက် ည ၇ နာရီခွဲခန့်မှာတော့ ပေါင်းတည်မြို့နယ်၊ အဂ္ဂရာပြည့်အုပ်စု မှန်ပြင်ကျောတဲတိုက်ရွာက အသက် ၄၀ ခန့် ဌက်ကြီးဆိုသူတို့ကို ရှင်းလင်းခဲ့တာလို့ ထုတ်ပြန်ချက်မှာ ဖေါ်ပြထားပါတယ်။

“သူတို့ကို ကျနော်တို့က စကစဆီကို မဆက်သွယ် သတင်းမပေးဖို့ ကြိုတင်သတိပေးတယ်။ ပြောထားရင် သူတို့က ခဏပဲ ရှောင်နေတယ် ပြီးပြန်လုပ်တယ်။ ဒါကြောင့် မဖြစ်မနေရှင်လင်းလိုက်ရတာ” လို့ ပြည်ခရိုင်တပ်ရင်း ၁ စစ်ထောက်လှမ်းရေးနှင့် သတင်းပြန်ကြားရေးတာဝန်ခံ ရဲဘော်က ပြောပါတယ်။

ပေါင်းတည်မြို့နယ်အတွင်းက ၂ ဦးဖြစ်တဲ့ စမ်းကြီးရွာက လွင်မိုးအောင်ကို စက်တင်ဘာ ၂၄ ရက်နေ့ညက သူ့ရဲ့နေအိမ်မှာ ပစ်ခတ်ရှင်းလင်းခဲ့တာဖြစ်သလို၊ မှန်ပြင်ကျောတဲတိုက်ရွာက ဌက်ကြီးကိုတော့ သူရွာအနီးမှာ ပစ်ခတ်ရှင်းလင်းခဲ့တာဖြစ်ပြီး၊ သဲကုန်းမြို့နယ် ကြည်ရွာက အေးကို ဆိုသူကိုတော့ ရှေ့တန်းမိုင်းကွင်းတွေကို စုံစမ်းပြီး ပြန်လာချိန် စက်တင်ဘာ ၄ ရက်နေ့ညက သူရွာအနီးမှာပဲ ပစ်ခတ်ရှင်းလင်းခဲ့တာလို့ သိရပါတယ်။

သူတို့ ၃ ဦးကို ပြည်ခရိုင်တပ်ရင်း ၁ တပ်ခွဲ ၁ ကနဲ့ ပြည်ခရိုင်တပ်ရင်း ၁ တပ်ခွဲ ၄ က ပြည်သူ့ကာကွယ်ရေးတပ်ဖွဲ့တွေက ပစ်ခတ်ရှင်းလင်းခဲ့တာ ဖြစ်ပါတယ်။

သေဆုံးသူ ၃ ဦးဟာ တော်လှန်ရေးတပ်ဖွဲ့တွေရဲ့ ထောက်ပို့လုပ်ငန်းတွေ၊ သတင်းအချက်အလက်တွေနဲ့ မြေပြင်လှုပ်ရှားမှုတွေကို အာဏာသိမ်းစစ်တပ်ဆီကို ပေးပို့ကာ PDF တွေထောင်ထားတဲ့ မိုင်းတွေကိုလည်း စစ်တပ်ကို လိုက်လံပြသကာ စစ်တပ်စစ်ကြောင်းထိုးရမယ့် နေရာတွေကိုလည်း လိုက်လံပို့ဆောင်ပေးနေသူတွေ ဖြစ်တယ်လို့ ထုတ်ပြန်ချက်မှာ ဖေါ်ပြထားပါတယ်။

ပဲခူးတိုင်းအနောက်ခြမ်းက ပြည်မြို့နယ်၊ ဝက်ထီးကန်နယ်မြေအတွင်းမှာလည်း ပြီးခဲ့တဲ့ စက်တင်ဘာ ၁၈ ရက်က သစ်ချိုပင်အုပ်စုထဲက သဲကျဲကြီးရွာအုပ်ချုပ်ရေးမှူး ကျော်ဆန်းနဲ့ ကန်စုရွာက စစ်တပ်သတင်းပေး မှုခင်းရှုထောင့် သတင်းထောက် မျိုးချစ်ကို ဆိုသူတို့ကို စက်တင်ဘာ ၁၀ ရက်နေ့က ပစ်ခတ်ရှင်းလင်း ခံခဲ့ရတယ်လို့ ဒေသခံတွေဆီက သိရပါတယ်။

သတင်း – သော်တာအောင်

■ သေနတ်နဲ့ လက်ပစ်ဗုံး ကိုင်ဆောင်ခွင့်ရှိသူဖြစ်လို့ အမှုဖွင့်တိုင်ကြားရဲသူ မရှိ

ပေါင်းတည်၊ ဩဂုတ် ၂၂၊ ၂၀၂၆။

ပဲခူးတိုင်းအနောက်ခြမ်း၊ ပေါင်းတည်မြို့နယ်က ပျူစောထီးအဖွဲ့ဝင်တဦးက အလယ်တန်းကျောင်းသူတဦးကို ခိုးယူပေါင်းသင်းနေတယ်လို့ ဒေသခံတွေဆီက သိရပါတယ်။

ပေါင်းတည်မြို့နယ် ဘုရားငါးဆူအုပ်စု ဘုရားငါးဆူရွာ ခရေပင်လမ်းက အသက် ၅၀ ခန့်ရှိ ပျူစောထီးအဖွဲ့ဝင် ဝင်းကိုဆိုသူက ရွာထဲက အလယ်ကျောင်းမှာ ပညာသင်ကြားနေတဲ့ အသက် ၁၅ နှစ်ဝန်းကျင် Grade- 9 ကျောင်းသူကို ဩဂုတ်လ ၁၆ ရက်နေ့က ခိုးယူပေါင်းသင်းခဲ့တာလို့ ဆိုပါတယ်။

“ကောင်မလေးကို သူတို့ကျောင်းက ဝါဆိုသင်္ကန်းကပ်တဲ့နေ့က ခေါ်သွားတာလို့ ပြောတယ်။ အိမ်ကနေစီးသွားတဲ့ စက်ဘီးက မြသိန်းတန်ဘုရားနားက ရေတွင်းနားမှာတွေ့လို့ မိဘတွေ အရမ်းစိတ်ပူသွားတာ။ နောက်ရက်ကျမှ ကလေးမလေးက ပြည်မြို့မှာရောက်နေတယ်လို့ ဖုန်းလှမ်းဆက်လို့ ဝင်းကို ခေါ်သွားတာကို သိရတာ။ အရွယ်မရောက်သေးတဲ့ ကလေးအတွက် ရင်လေးစရာပဲ”လို့ ကျောင်းသူလေးရဲ့မိဘတွေနဲ့နီးစပ်သူတဦးက ပြောပါတယ်။

ပျူစောထီးဝင်းကိုဟာ သေနတ်တလက်နဲ့ လက်ပစ်ဗုံးတလုံးကို အမြဲဆောင်ထားလေ့ရှိသလို ကြံ့ခိုင်ရေးဟောပြောပွဲတွေကိုလည်း သူ့ရဲ့နေအိမ်မှာ လက်ခံကျင်းပလေ့ရှိသူတဦးဖြစ်ပြီး အိမ်ထောင်ရှိသော်လည်း မိန်းမကိစ္စ ရူပ်ပွေသူတဦးဖြစ်တဲ့အတွက် မိဘတွေက စိတ်ပူနေတယ်လို့ သူကဆက်ပြောပါတယ်။

ကျောင်းသူလေးကို ခေါ်သွားချိန်မှာ ကျေးရွာအုပ်စုအတွင်း စစ်မှုထမ်း​ကြေးအတွက် ကောက်ခံစုဆောင်းထားတဲ့ကျပ်သိန်း၂ဝဝ ကို တပါတည်းယူဆောင်သွားတယ်လို့ သတင်းတွေထွက်ပေါ်နေပေမယ့် မြေလတ်အသံအနေနဲ့ သီးခြားအတည်ပြုနိုင်ခြင်း မရှိသေးပါဘူး။

ဒီဖြစ်စဉ်နဲ့ပတ်သက်ပြီး ကလေးမလေးအတွက် အမှုဖွင့်ဖို့လိုအပ်ပေမယ့် မိဘတွေဘက်က အမှုဖွင့်ထားမထား မသိရသေးဘူးလို့ ဒေသခံနောက်တဦးက ဆိုပါတယ်။

“ငဝင်းက အရင်က ပေါင်းတည်မြို့နယ်စစ်ကောင်စီအဖွဲ့ဝင် ဗိုလ်မှူးကားကိုမောင်းတဲ့ ပျူစောထီးပါ။ ဗုံးတွေ သေနတ်တွေ အမြဲကိုင်တယ်လို့ ကြားတယ်။ အခုကိစ္စအတွက်တော့ သူ့ကိုတရားစွဲသင့်တယ်။ ကောင်မလေးက အပျိုပြန်မဖြစ်ပေမယ့် နောင်တရပြီး ပြန်ကောင်းသွားနိုင်တယ်။ ကလေးမလေးမိဘတွေက လိုက်ရှာနေတာ မနေ့ကအထိတော့ ကလေးမလေးကို မတွေ့သေးဘူး။ အမှုဖွင့်လား မဖွင့်လားတော့ မသိဘူး” လို့ သူက ပြောပါတယ်။

ပေါင်းတည်မြို့နယ်ရှိ ပျူစောထီး (ခေါ်) ပြည်သူ့စစ်တွေဟာ လုံခြုံရေးအကြောင်ူပြပြီး ဂိတ်စောင့်တာ၊ စစ်မှုထမ်းတပ်သားသစ် ဖမ်းဆီးတာအပြင် မူးယစ်ဆေးဝါး ရောင်းချတာ၊ တရားမဝင် ကျွန်းသစ်ခိုးတာတွေနဲ့ လောင်းကစားဒိုင်တွေ၊ KTV၊ မာဆက်တွေဆီကနေ ဆီက လိုင်းကြေးတောင်းကာ ဝင်ငွေဖြောင့်သူတွေ ဖြစ်တယ်လို့ ဒေသခံတွေဆီက သိရပါတယ်။