နေအိမ်

ကန့်ဘလူ၊ ဖေဖော်ဝါရီ ၂၁၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်၊ မလည်တိုက်နယ်ရှိ မြေမွန်ရွာကို စစ်ကောင်စီတပ်တွေက တညအိပ် စခန်းချသွားတဲ့အပြင် နေအိမ် ၂၀၀ ကျော်ကိုလည်း မီးရှို့ဖျက်ဆီးခဲ့ပါတယ်။

ပြီးခဲ့တဲ့ ဖေဖော်ဝါရီလ ၁၈ ရက်မှာ ဟုမ္မလင်းအခြေစိုက် ခမရ ၃၆၉ က စစ်သားအင်အား ၇၀ ကျော်ဟာ မြေမွန်ရွာမှာ စခန်းချခဲ့ပြီး ၁၉ ရက်နေ့လည် ၂ နာရီလောက်မှ ရွာကို စတင်မီးရှို့ခဲ့တာလို့ ကျွန်းလှ တက်ကြွလှုပ်ရှားသူများအဖွဲ့မှ တာဝန်ခံတဦးက ပြောပါတယ်။

“ထိတွေ့တိုက်ပွဲ မရှိပါဘူးဗျ။ အဲ့စစ်ကြောင်းက ကောလင်းကနေ ကန့်ဘလူမြို့နယ်၊ ချပ်လယ်ဘက်ကို ဝင်ခဲ့တဲ့ စစ်ကြောင်းပါ။ အဲ့ဒီကနေ ကန့်ဘလူအရှေ့တောင်ဘက် စံပါယ်နံ့သာကနေ ကွင်းကိုးတပ် (ကြံစိုက်ခင်းတခု)မှာ နားပြီး မြေမွန်ရွာဘက်ကို စစ်ကြောင်းထိုးခဲ့တာပါ။ နေအိမ်တဝက်လောက်က မီးထဲ ပါသွားပါပြီ” လို့ ဆိုပါတယ်။

ခုလို မီးရှို့ဖျက်ဆီးလို့ အိမ်ခြေ ၅၅၀ ဝန်းကျင်ရှိ မြေမွန်ရွာက နေအိမ် ၂၀၀ ကျော် မီးလောင်ပျက်စီးခဲ့ပြီး စစ်သားတွေကတော့ ညနေ ၄ နာရီလောက်မှ ရွာကနေထွက်ပြီး မြေမွန်ရွာရဲ့တောင်ဘက်ကို စစ်ကြောင်းထိုး ထွက်ခွာသွားခဲ့တယ်လို့ သိရပါတယ်။

အဲ့ဒီနောက် ဖေဖော်ဝါရီလ ၂၀ ရက် မနေ့ကညနေပိုင်းမှာတော့ မြေမွန်တောင်ဘက်ရှိ တရော်ကိုင်းရွာကို စစ်ကြောင်းထိုး မီးရှို့ခဲ့ပြီး၊ အဲ့ဒီရွာက မီးလောင်ဆုံးရှုံးတဲ့ အိမ်ခြေအရေအတွက်နဲ့ နောက်ဆက်တွဲအခြေအနေတွေကိုတော့ မြေလတ်အသံက ဆက်လက် စုံစမ်းနေဆဲဖြစ်ပါတယ်။

“တရော်ကိုင်းကလည်း အခုမှရှို့ခံရတာပါဗျ။ ၂ အိမ်လောက်ပဲလို့ သိထားပါတယ်။ လောလောဆယ်က အတိအကျ မသိရသေးဘူး။ တရော်ကိုင်းရွာကနေ စခတွေက ထွက်သွားပြီလို့တော့ ကြားတယ်” လို့ ကျွန်းလှတက်ကြွလှုပ်ရှားသူများအဖွဲ့မှ တာဝန်ခံက ပြောပါတယ်။

ခုလို စစ်အုပ်စုက စစ်ကြောင်းထိုးမီးရှို့နေတာကြောင့် မလည်တိုက်နယ်ထဲက မြေမွန်၊ သီရိမွန်၊ စကျင် နဲ့ တရော်ကုန်းရွာက ဒေသခံ ၅ ထောင်ကျော် နေရပ်စွန့်ခွာ တိမ်းရှောင်နေကြရပါတယ်။

စစ်ကိုင်း၊ ဖေဖော်ဝါရီ ၁၉၊ ၂၀၂၃။

စစ်ကိုင်းတိုင်း၊ ပုလဲမြို့နယ်၊ နှောရိုးရွာက နေအိမ် ၃ လုံးကို စစ်ကောင်စီတပ်သားတွေက မီးရှို့ဖျက်ဆီးခဲ့ပြီး နေအိမ်တွေထဲကပစ္စည်းတွေကိုလည်း မွှေနှောက်ယူသွားတယ်လို့ သိရပါတယ်။

အင်အား ၇၀ ဝန်းကျင်ပါတဲ့စစ်သားတွေဟာ ဖေဖော်ဝါရီလ ၁၈ ရက်မနေ့ကမနက် ၉ နာရီလောက်မှာ ဝင်ရောက်မီးရှို့ခဲ့တာလို့ Pale Joker PDF မှ ဗိုလ်ပုလဲက ပြောပါတယ်။

“ဇီးဖြူကုန်းရွာကို စစ်ကြောင်းရောက်ကတည်းက အနီးအနားကရွာတွေကို စစ်ရှောင်ဖို့အတွက် အကုန်လုံးကို ဆော်သြထားတာ၊ နှောရိုးရွာကို စစ်ကြောင်းထွက်လာတော့ ရွာမှာက လူတွေမကျန်ခဲ့ဘူး၊ အားလုံးရွာကထွက်သွားကြတာ၊ မနေ့က ဇီးဖြူကုန်းရွာကိုရောက်ပြီး မနက် ၉ နာရီခွဲမှာ နှောရိုးရွာဘက်ကို ထွက်လာတာ။ ရွာလယ်က ‌နေအိမ် ၃ လုံးမီးရှို့၊ နေအိမ်တွေက ပစ္စည်းတွေကို မွှေနှောက်ယူသွားတယ်”လို့ သူကပြောပါတယ်။

နှောရိုးကျေးရွာမှာ အိမ်ခြေ ၁ ထောင်နဲ့ လူဦးရေ ၁၅၀၀ ဝန်းကျင်ရှိပြီး စစ်ကောင်စီတပ်တွေရဲ့ မီးရှို့တာကို ခံရတာဟာ ပထမဆုံးအကြိမ်ဖြစ်တယ်လို့လည်း ဆိုပါတယ်။

အဲ့ဒီစစ်ကောင်စီတပ်တွေဟာ ပြီးခဲ့တဲ့ဖေဖော်ဝါရီလ ၁၅ ရက်ကလည်း ကိုင်းတွင်းရွာက PDF စခန်းတခုနဲ့ နေအိမ် ၂ လုံးကို မီးရှို့ခဲ့ပြီး၊ အဲ့ဒီကနေတဆင့် ၁၆ ရက်မှာတော့ မင်းတိုင်ပင်ရွာက နေအိမ် ၆ လုံးနဲ့ စာသင်ကျောင်းတကျောင်းကိုပါ မီးရှို့ဖျက်ဆီးခဲ့ပါသေးတယ်။

အဲ့ဒီစစ်အုပ်စုဟာ လက်ရှိမှာတော့ နွယ်အင်းကျေးရွာကိုရောက်ရှိနေတယ်လို့သိရကာ နှောရိုး၊ သပြေအေး၊ မင်းတိုင်ပင်ရွာစတဲ့ ကျေးရွာတွေက ဒေသခံ ၆ ထောင်ကျော်လည်း ရွာကနေ ထွက်ပြေးတိမ်ရှောင်နေရတယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၇၊ ၂၀၂၃။

စစ်အာဏာသိမ်းပြီးနောက် မီးရှို့ဖျက်ဆီးခံရမှု အများဆုံးဖြစ်တဲ့ စစ်ကိုင်းတိုင်းမှာ နေအိမ်တွေ ပြန်လည်ဆောက်လုပ်ပေးရတာတွေ များပြားလာလို့ အိမ်ဆောက်ရာမှာ အသုံးပြုတဲ့ ထန်းရွက်တွေ ရှားပါးလာတယ်လို့ ဒေသခံတွေဆီက သိရပါတယ်။

အရင်ကတော့ ရာသီပြောင်းချိန်တွေမှာပဲ အိမ်အမိုးလဲဖို့အတွက် အသုံးပြုကြလေ့ရှိပြီး အခုကတော့ ရွာလုံးကျွတ်တွေ ပြန်လည်ထူထောင်ရတဲ့အတွက် ထန်းရွက်ခုတ်ယူမှုနှုန်းတွေ အဆမတန်များလာကာ စတင်ရှားပါးလာပြီလို့ ဆိုပါတယ်။

“ဟိုးနှစ်တွေတော့ ပုံမှန်အမိုးလဲတာလောက်ပဲ။ ခုဟာကျ အစကနေအဆုံးထိ ရွာလုံးကျွတ်ကြီး ပြန်ဆောက်ရတာဆိုတော့ တော်တော်လေးတော့ ကုန်တာပေါ့။ အိမ်တလုံးကို ထန်းရွက် ၃၅၀ လောက် ကုန်တယ်။ တပင်မှ အလွန်ဆုံးရ အရွက် ၃၀၊ အဲ့အရွက် ၃၀ ကလည်း တကယ်ကိုမှ အပင်ကိုဝဲကျနေတဲ့ဟာမှ ရတာ။ အိမ်တလုံးကို အနည်းဆုံး ၁၀ ပင် ၁၅ ပင်လောက်ကုန်တယ်” လို့ စစ်ရှောင်တွေအတွက် နေအိမ်တွေ ပြန်လည်တည်ဆောက်ပေးနေတဲ့ S&C အဖွဲ့ တာဝန်ခံက ပြောပါတယ်။

ပြန်လည်ထူထောင်ရေး လုပ်ကိုင်နေသူတွေအနေနဲ့လည်း အမိုးအကာလုပ်ဖို့အတွက် မိုးကာ၊ သွပ်နဲ့၊ တခြားအစားထိုးပစ္စည်းတွေ သုံးဖို့ စီစဉ်နေကြပြီး အိမ်တလုံးကို ၅ သိန်းဝန်းကျင်နဲ့ ကုန်ကျစရိတ် ပိုများသွားနိုင်တဲ့အတွက် ငွေကြေးအခက်ခဲရှိလာနိုင်တယ်လို့ ဆိုပါတယ်။

“ကျနော်တို့ဒေသမှာ နေ့စဥ်နဲ့အမျှ မီးရှို့ခံနေရတော့ ထန်းရွက်ရှားလာတာပါ။ ၂ ခန်းတွဲ အိမ်တလုံးကို ထန်းရွက် ၂၅၀ ကနေ ၃၀၀ လောက်ကုန်ပါတယ်။ လူများလို့ တဲ့၊ ဇောင်းပါထပ်ထည့်ရင် ၃၀၀ ကျော် ၄၀၀ လောက်ကုန်ပါတယ်” လို့ ဒေသခံရွာသားတဦးက ပြောပါတယ်။

အာဏာသိမ်းပြီး ၂ နှစ်အတွင်း မီးရှို့ဖျက်ဆီးခံရမှုတွေရဲ့ ၇၁ ရာခိုင်နှုန်းဟာ စစ်ကိုင်းတိုင်းထဲက ဖြစ်ပြီး၊ နေအိမ် ၄၃၂၁၆ လုံးထပ်မနည်း မီးရှို့ဖျက်ဆီးခံထားရတယ်လို့ ISP Myanmarရဲ့ စစ်တမ်းတွေအရ သိရပါတယ်။

စစ်ကိုင်း၊ ဖေဖော်ဝါရီ ၁၄၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်၊ တင့်တယ်ရွာကို စစ်ကောင်စီတပ်က ဖေဖေါ်ဝါရီလ ၁၂ ရက်မှာ မီးရှို့ခဲ့တဲ့အပြင် ဘုန်းကြီးတပါးနဲ့ ရွာသား ၂ ဦးကိုပါ သတ်ခဲ့တယ်လို့ သိရပါတယ်။

တမခ ၃၃ က စစ်သားတွေနဲ့ပျူအင်အား ၁၀၀ လောက်ဟာ တင့်တယ်ရွာကို ၁၂ ရက်မနက်ပိုင်းက ဝင်ရောက်မီးရှို့ခဲ့တာကြောင့် စပါးတင်း ၁ သိန်းကျော်နဲ့ နေအိမ် ၂၀၀ ဝန်းကျင် မီးလောင် ပျက်ဆီးခဲ့တယ်လို့ ဒေသခံတဦးက ပြောပါတယ်။

“တင့်တယ်ရွာက နေအိမ် ၂၀၀ လောက်နဲ့ စပါးတင်း ၁ သိန်းလောက်ကို မီးရှို့သွားတာဗျ။ စပါးဖိုး သိန်း ၂ သောင်းလောက်ရှိမယ်။ ဘုန်းကြီးတပါး၊ အမျိုးသမီးတဦးနဲ့ အမျိုးသားတဦးကိုလည်း သတ်သွားတယ်။ မီးလောင်ထားတော့ အသက်ကခန့်မှန်းရခက်တယ်”လို့ ဒေသခံတဦးကပြောပါတယ်။

သေဆုံးသူတွေဟာ ဘယ်သူဘယ်ဝါဆိုတာကို မသိရသေးပေမယ့် သူတို့ရဲ့အလောင်းကို ဖေဖေါ်ဝါရီလ ၁၃ ရက်မနေ့ကမနက်မှာသဂြိုလ်ခဲ့ပြီး စစ်အုပ်စုက တင့်တယ်ရွာအနီးဝန်းကျင်မှာပဲရှိနေတာကြောင့် ဗုဒ္ဓဘာသာဓလေ့အရ သရဏဂုဏ်တင်ပေးနိုင်ခြင်းမရှိခဲ့ဘူးလို့လည်း ဆိုပါတယ်။

စပါးတင်း ၁ သိန်းကျော်မှာ ကျေးရွာသားတွေရဲ့ လယ်ထွက်စပါးတွေအပြင် ကုန်သည်အချို့ဝယ်ယူသိုလှောင်ထားတဲ့ စပါးတွေပါဝင်ပြီး တင်း ၁၀၀ လျင် ကျပ်သိန်း ၂၀ ပေါက်စျေးရှိတဲ့ ရွှေဘိုဒေသထွက် ပေါ်ဆန်းဘေးကြားစပါးတွေဖြစ်တယ်လို့လည်း ဆိုပါတယ်။

အလားတူ ဖေဖေါ်ဝါရီ ၁၂ ရက်မနက်ပိုင်းမှာပဲ အဲဒီစစ်တပ်ဟာ တင့်တယ်ရွာအနီးရှိ ကျောက်မြင့်ရွာက နေအိမ် ၁၀ လုံးလောက်ကိုလည်း မီးရှို့ခဲ့ပါသေးတယ်။

ဒါ့အပြင် ဖေဖေါ်ဝါရီလ ၁၃ ရက်မနေ့ကနေ့လယ် ၁၂ နာရီလောက်မှာလည်း မဲတောရွာကို ဆက်လက်မီးရိူ့ခဲ့ပြီး ညနေ ၃ နာရီခန့်အထိ အဲဒီရွာထဲမှာပဲရှိနေသေးတယ်လို့ အဲဒီဒေသခံဆီက သိရပါတယ်။

အခုနှစ်စပါးရိတ်သိမ်းချိန်ကလည်း စစ်အုပ်စုဟာ ဒေသခံစိုက်ပျိုးထားတဲ့စပါးတွေကို ခိုးယူရိတ်သိမ်းခဲ့တဲ့အပြင် စပါးရိတ်နေတဲ့ ရိတ်ခြွေစက် ၁ စီးနဲ့ထော်လာဂျီတစီးကို သိမ်းယူခဲ့လို့ ဒေသခံလယ်သမားတွေ စပါးမရိတ်သိမ်းရဲတာကြောင့် ရွှေဘိုမြို့နယ်၊ သီးလုံးရွာနဲ့ ဇီဖြူကုန်းရွာဝန်ကျင်က စပါးစိုက်ဧက ၁၀၀ နီးပါး အကျိုးမဲ့ပျက်စီးခဲ့ရပါသေးတယ်။

မကွေး၊ ဖေဖော်ဝါရီ ၁၃၊ ၂၀၂၃။

မကွေးတိုင်း၊ ပခုက္ကူမြို့နယ်၊ စံပြကျေးရွာက ဒေသခံနေအိမ် ၁၀၀ နီးပါးကို စစ်ကောင်စီတပ်တွေက မီးရှို့ဖျက်ဆီးသွားတယ်လို့ သိရပါတယ်။

ဖေဖော်ဝါရီလ ၁၂ ရက် မနေ့ကမနက် ၉ နာရီလောက်မှာ မြစ်ခြေဘက်ကို စစ်ကြောင်းထိုးလာတဲ့ စစ်ကောင်စီအင်အား ၁၀၀ ကျော်ဟာ စံပြကျေးရွာကိုရောက်လာပြီး နေအိမ်တွေကို မီးတင်ရှို့ခဲ့တာလို့ ဒေသခံတဦးက ပြောပါတယ်။

“ပြီးခဲ့ရက်ပိုင်းက မြစ်ချေက စကစ မွေးမြူရေးတပ် တိုက်ခိုက်ခံရလို့ သေဆုံးတာတွေရှိတာကို မကျေနပ်လို့ ရွာတွေဘက်ကို စစ်ကြောင်းထိုးလာတာ။ မနေ့ကဆို လာတာက အင်အား ၃၀၀ ကျော်လောက်က ကျေးရွာတွေဘက်ကို စစ်ကြောင်းတွေခွဲပြီးလာကြတာ။ သူတို့တွေလာမယ်ဆိုတာသိလို့ ရွာသားတွေက ကြိုရှောင်နေကြတာ။ အဲဒါကို အိမ်တွေ မီးရှို့သွားတယ်” လို့ ပြောပါတယ်။

ခုလို မီးရှို့သွားလို့ အိမ်ခြေ ၁၀၀ ကျော်ရှိတဲ့ စံပြရွာဟာ ဘုန်းကြီးကျောင်းတွေ အပါအဝင် အားလုံးနီးပါး မီးလောင်သွားပြီး နေအိမ် ၅ လုံးသာ ကျန်ခဲ့တယ်လို့ ဆိုပါတယ်။

စစ်ကောင်စီတပ်တွေ လာမယ်ဆိုတဲ့ သတင်းအရ စံပြကျေးရွာခံ ၆၀၀ ကျော်ဟာ ဘေးလွတ်ရာကို ကြိုတင်တိမ်းရှောင်နေရတယ်လို့ သိရပါတယ်။

စစ်ကောင်စီအဖွဲ့ဟာ စံပြရွာကို မီးရှို့ပြီးနောက် ရေချိုကျေးရွာဘက်ကို ဆက်ထွက်သွားပြီး ညနေပိုင်းမှာ ကျေးရွာအနီးက PDF စခန်းတခုကို ဝင်ရောက်မီးရှို့သွားတယ်လို့ ဆိုပါတယ်။

PDF စခန်းကို ဝင်ရောက်မီးရှို့ချိန်မှာ စခန်းက ဆိုင်ကယ်တွေနဲ့အသုံးအဆောင်ပစ္စည်းတွေကို သိမ်းဆည်းသွားပြီး တဲတွေကိုတော့ မီးရှို့သွားတယ်လို့ ဒေသခံတွေကပြောပေမယ့် ဒီဖြစ်စဥ်နဲ့ပက်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

ဖေဖော်ဝါရီလ ၁၁ ရက်ကလည်း မြစ်ခြေ မွေးမြူရေးတပ်စခန်းကို PDF ပူးပေါင်းတပ်တွေက ဝင်ရောက်တိုက်ခိုက်လို့ စစ်ကောင်စီဘက်က အရာရှိတွေအပါအဝင် ၇ ဦး သေဆုံးပြီး ၃ ဦး ဖမ်းမိခဲ့တယ်လို့ သိရပါတယ်။

အဲဒီနောက်ပိုင်းမှာ စစ်ကောင်စီဘက်က အင်အား ၃၀၀ ကျော်နဲ့ မြစ်ခြေဘက်က ကျေးရွာတွေကို အခုလို စစ်ကြောင်းထိုးနေတာလည်း ဖြစ်ပါတယ်။

မကွေး၊ ဖေဖော်ဝါရီ ၁၂၊ ၂၀၂၃။

မကွေးတိုင်း၊ မြိုင်မြို့‌၊ အမှတ် ၁ ရပ်ကွက်ရှိ ပျူစောထီးခေါင်းဆောင်နေအိမ်ကို ဒေသခံကာကွယ်ရေးတပ်တွေက မိုင်းထောင်ခွဲခဲ့ပြီး အဲ့ဒီပေါက်ကွဲမှုကိုလာစစ်ဆေးတဲ့ စစ်သားနဲ့ပျူစောထီးအဖွဲ့တွေကိုပါ လက်ကျန်မိုင်းနဲ့ ထပ်မံတိုက်ခိုက်ခဲ့တယ်လို့ သိရပါတယ်။

ပျူခေါင်းဆောင် ကိုထိန်လင်းရဲ့နေအိမ်မှာ ဖေဖော်ဝါရီလ ၁၂ ရက်ဒီမနက် ၃ နာရီလောက်မှာ ဖောက်ခွဲခဲ့ပြီးနောက် ညနေ ၃ နာရီလောက်မှ စစ်ဆေးဖို့လာတဲ့ စစ်သားနဲ့ပျူ ၈ ဦးဝန်းကျင်ကို ထပ်မံတိုက်ခိုက်ခဲ့တာလို့ ပြည်သူ့ကာကွယ်ရေးတပ်ဖွဲ့ – မြိုင်မြို့နယ် ဗိုလ်လက်ယာက ပြောပါတယ်။

“ကျနော်တို့ လွန်ခဲ့တဲ့ ၂ ရက်က မြိုင်မြို့ပေါ် အမှတ် ၁ ရပ်ကွက်မှာရှိတဲ့ ပျူစောထီးခေါင်းဆောင်နေအိမ်ကို မိုင်း ၂ လုံးထောင်ထားခဲ့တာ၊ ဒီနေ့မနက် ၃ နာရီ ၄၅ မိနစ်မှာ ဟန်ပြ ၁ လုံးခွဲလိုက်တယ်၊ မိုင်းပေါက်ကွဲပြီး ဒီနေ့ညနေ ၃ နာရီ ၁၅ မိနစ်မှာ စစ်သားနဲ့ပျူတွေ လာစစ်တဲ့အချိန် ထပ်ခွဲလိုက်တယ်၊ မိုင်းပေါက်ကွဲပြီး စစ်သား ၁ ဦး သေဆုံးပြီး ၂ ဦး ဒဏ်ရာရတယ်” လို့ ပြောပါတယ်။

ဒီထိခိုက်သေဆုံးမှုတွေကို ဒေသခံတွေရဲ့ပြောပြချက်အရ အတည်ပြုနိုင်ခဲ့တယ်လို့ ကာကွယ်ရေးရဲဘော်တွေက ဆိုပေမယ့် မြေလတ်အသံက သီးခြားအတည်မပြုနိုင်သေးပါဘူး။

လက်ရှိအချိန်ထိ ပျူခေါင်းဆောင် ကိုထိန်လင်းရဲ့နေအိမ်မှာစစ်ကောင်စီတပ်တွေရှိနေပြီး ဘေးပတ်ဝန်းကျင်က နေအိမ်အချို့ကိုလည်း မီးရှို့နေတယ်လို့ဒေသခံတွေဆီက သိရပါတယ်။

ပြီးခဲ့တဲ့ဖေဖော်ဝါရီလ ၁၁ ရက်ကလည်း ပခုက္ကူခရိုင်၊ မြစ်ခြေ စစ်ကောင်စီမွေးမြူရေးတပ်စခန်းကို ပြည်သူ့ကာကွယ်ရေးတပ်ဖွဲ့ – မြိုင်မြို့နယ်အဖွဲ့နဲ့ မဟာမိတ်အဖွဲ့တွေက ဝင်ရောက်စီးနင်းတိုက်ခိုက်ခဲ့ရာ အရာရှိ ၂ ဦးအပါအဝင် ၇ ဦးသေဆုံးပြီး ၃ ဦး အရှင်ဖမ်းမိခဲ့တယ်လို့ သိရပါတယ်။

ခင်ဦး၊ ဇန်နဝါရီ ၃၀၊ ၂၀၂၃။

စစ်ကိုင်းတိုင်း၊ ခင်ဦးမြို့နယ်၊ ဗျိုင်းကြိုင်ရွာက ဒေသခံ ၂၀ ဦးကို စစ်ကိုင်း တပ်မ ၃၃ ကတပ်သားတွေက ဇန်နဝါရီလ ၃၀ ရက် ဒီ‌နေ့မနက်ပိုင်းမှာ ဝင်ရောက်လာပြီး ဖမ်းဆီးထားတယ်လို့ သိရပါတယ်။

မအူပင်မြို့ပေါ်ကနေ အင်အား ၈၀ ကျော်ရှိတဲ့ စစ်ကိုင်းတပ်မ ၃၃ တပ်သားတွေက ဇန်နဝါရီလ ၃၀ ရက် မနက်ပိုင်းမှာ ဗျိုင်းကြိုင်ကျေးရွာက ဒေသခံ ၂၀ ဦး ဖမ်းဆီးထားပြီး နေအိမ်တွေကို မီးရှို့နေတယ်လို့ FIRE DRAGON PDF ဗိုလ်‌ပျောက်ကြီးက ပြောပါတယ်။

“မနက် ၉ နာရီလောက်ကနေ မအူပင်ကနေ စထွက်လာပြီးတော့ ရွှေဘိုမြို့နယ် အင်ကြင်းပင်ရွာအနောက်ဘက်က တဲတွေမီးရှို့တယ်။ ခင်ဦးမြို့နယ် ဗိုင်းကြိုင်ရွာမှာ မီးရှို့နေတယ်။ အိမ်ခြေက ၁၅၀ လောက်ပဲရှိတာ။ အခုမှ မီးစရှို့နေတာ။ စစ်ခွေးတွေက အဲဒီရွာမှာ ခဏနားနေတယ်။ ပြည်သူ ၂၀ ကျော်လောက် အဖမ်းခံထားရတယ်။ တပ်မ ၃၃ က စစ်ခွေးတွေနဲ့ ပျူတွေဝင်ရောက်နေတာ” လို့ ဗိုလ်ပျောက်ကြီးက ပြောပါတယ်။

ဗျိုင်းကြိုင်ကျေးရွာက ဖမ်းခံရသူတွေဟာ အသက် ၄၀ ကျော်နဲ့ ၅၀ ဝန်းကျင်အမျိုးသားတွေ ဖြစ်ကြပြီး ကလေးအမေတွေကိုပါ ဖမ်းဆီးထားကာ လက်ရှိစစ်ကြောင်းဝင်လာလို့ ထွက်ပြေးရသူ ၇၀၀ ကျော်ရှိတယ်လို့ ဆက်ပြောပါတယ်။

ဗျိုင်းကြိုင်ရွာကနေ စစ်သားအင်အား ၄၀ နဲ့ခွဲထွက်သွားပြီး ယခုအချိန်မှာ စိုင်တိုးရွာ မီးရှို့နေတယ်လို့ ဆက်ပြောပါတယ်။

ပဲခူး၊ ဇန်နဝါရီ ၂၄၊ ၂၀၂၃။

ပဲခူးတိုင်းအနောက်ခြမ်း၊ ပြည်ခရိုင်၊ ပေါင်းတည်မြို့မှာ ဇန်နဝါရီ ၂၅ ရက် ဒီနေ့မနက်အစောပိုင်းက နေအိမ်တလုံးနဲ့ စပါးကျီတလုံး မီးလောင်ဆုံးရှုံးခဲ့တယ်လို့ ဒေသခံတဦးဆီက သိရပါတယ်။

ပေါင်းတည်မြို့နယ်၊ ဗျက်ကြီးတောင်ကျေးရွာမှာ ဒီနေ့မနက် ၂ နာရီလောက်က လောင်ကျွမ်းခဲ့တာလို့ သိရပါတယ်။

“မီးကြွင်းမီးကျန်ကပဲစပြီး လောင်တယ်လို့ ပြောရမယ်။ ၂ ထပ် သွပ်မိုးပျဥ်ထောင်အိမ်တလုံးနဲ့ စပါးကျီတလုံး မီးထဲပါသွားတယ်။ လာရောက်ကူညီပေးတဲ့ အမျိုးသမီးတဦး မီးလောင်ဒဏ်ရာရရှိပြီး စိုးရိမ်ရတာကြောင့် ပေါင်းတည်ဆေးရုံကို ပို့ဆောင်ထားတယ်” လို့ ဒေသခံတဦးဆီက သိရပါတယ်။

ပေါင်းတည်မြို့နယ် မီးသတ်စခန်းက မီးငြှိမ်းသတ်ယာဉ် ၂ စီး၊ ရေသယ်ယာဉ် ၁ စီး၊ မင်းကွက် ၁ အရန်မီးသတ်စခန်းက မီးငြှိမ်းသတ်ယာဉ် ၁ စီးတို့နဲ့ နာရီဝက်အကြာ ငြိမ်းသတ်ခဲ့ရတယ်လို့ သိရပါတယ်။

ပြီးခဲ့တဲ့ဇန်နဝါရီလ ၁၃ ရက် ညနေ ၆ နာရီကလည်း ပေါင်းတည်မြို့ပေါ် ရွေးကောက်ပွဲကော်မရှင် ခြံဝင်းအတွင်းက အမှိုက်မီးရှို့ရာက ရုံးရှေ့ ပိတောက်ပင်ကို မီးကူးစက် လောင်ကျွမ်းခဲ့လို့ မီးသတ်ယာဥ် ၂ စီးနဲ့ အချိန် ၁ နာရီလောက်အကြာ ငြိမ်းသတ်ခဲ့ရပါသေးတယ်။

ပဲခူးတိုင်းအနောက်ခြမ်းမှာ ပေါင်းတည်မြို့က မီးလောင်မှု ၂ ကြိမ်အပါ အခုနှစ်ဇန်နဝါရီလအတွင်း မီးလောင်မှု ၄ ကြိမ်ဖြစ်ပွားပြီး အခုလ ၁၁ ရက်က မိုးညိုမြို့နယ် မှက္ကတန်ရွာက နေအိမ် ၁၅ လုံး၊ ဇန်နဝါရီလ ၁၅ ရက်က ပြည်မြို့ကျောင်းကြီးအိုးတန်းရပ်ကွက်က မွေ့ယာအရောင်းဆိုင်တို့ကိုလည်း မီးလောင်ကျွမ်းခဲ့ပါသေးတယ်။

စစ်ကိုင်း၊ ဇန်နဝါရီ ၁၈၊ ၂၀၂၃။

စစ်ကိုင်းမြို့နယ်၊ မင်းကွန်းတိုက်နယ်၊ ထုံးဘိုရွာကို ဇန်နဝါရီ ၁၇ ရက်နေ့မှာ တပ်စွဲဖို့လာတဲ့ စစ်ကောင်စီတွေ တိုက်ခိုက်ခံရလို့ တပ်မစွဲခဲ့ရတာကြောင့် ပြည်သူ ၁ ဦးကိုသတ်ပြီး နေအိမ်တွေကို မီးရှို့သွားခဲ့တယ်လို့ သိရပါတယ်။

အင်အား ၁၀၀ ခန့်ရှိတဲ့စစ်ကောင်စီတပ်သားတွေက အိမ်ခြေ ၅၀၀ ခန့်ရှိတဲ့ ထုံးဘိုရွာကို ပစ်ခတ်ဝင်လာချိန် ကာကွယ်ရေးတပ်ဖွဲ့တွေက ခုခံပြန်တိုက်ခဲ့တာကြောင့် ကျေးရွာသားတွေ ထွက်ပြေးချိန်ရခဲ့ပေမယ့် ဘုန်းကြီးကျောင်းကို ဆွမ်းဂျိုင့်ပို့ဖို့သွားနေသူ ၁ ဦးကို သတ်ပြီး ဘုန်းကြီးကျောင်းအပါအဝင် လူနေအိမ် ၁၀ လုံးကျော်မီးရှို့ ထွက်သွားတယ်လို့ မတ္တရာမြို့နယ်နဂါးနီပြောက်ကျားတပ်ဖွဲ့ တာဝန်ခံကိုသားငယ် ကပြောပါတယ်။

“ရွာမှာ ပကဖ တွေပြောက်ကျားတပ်‌ဖွဲ့တွေရှိတော့ လမ်းအတိုင်းမလာပဲ တောထဲကနေ အလစ်၀င်ပြီး ပစ်၀င်၀င်လာပါတယ်ဗျ။ ဒါကိုကျနော်တို့တွေက လက်နက်ငယ်တွေ၊လက်နက်ကြီးတွေနဲ့တိုက်ခိုက်ခဲ့တယ်။ မနက်ကနေညနေအထိတိုက်ခိုက်ခဲ့လို့ စကစတွေရွာမှာ မနေနိုင်ခဲ့ဘဲပြန်ထွက်သွားခဲ့တယ်။ ကျနော်တို့က ရွာမှာရှင်းလင်းရေးတွေလုပ်နိုင်ခဲ့တယ်” လို့ဆိုပါတယ်။

အသတ်ခံရသူမှာ အသက် ၄၀ ကျော်အရွယ် အမျိုးသားဖြစ်ပြီး စစ်ကောင်စီတွေကသူ့ကို ပစ်သတ်ပြီး ဘုန်းကြီးကျောင်းဆောင်တွေနဲ့အတူ မီးရှို့ထားခဲ့ကြတာဖြစ်တယ်လို့ ကိုသားငယ်က ဆက်ပြောပါတယ်။

“သူတို့သတ်သွားတာက ခြေတွေလက်တွေအရင်ဖြတ်ပြီးမှ မီးရှို့သတ်တယ်လို့ ယူဆရပါတယ်ဗျ။ ဘုန်းကြီးကျောင်းကို ဆွမ်းဂျိုင့်ပို့သွားတဲ့လူပါ သူကဆိုင်ကယ်နဲ့ပါဗျ။ သူ့ဆိုင်ကယ်နေရာကနေ မီးရှို့တဲ့နေရာကို ဝါယာကြိုးနဲ့ချည်ပီးဆွဲသွား‌ပါတယ် ‌သွေးတွေက အတန်းလိုက်ကြီးဗျ ပြီးမှ ဘုန်းကြီးကျောင်းကိုရော မီးရှို့ပစ်ခဲ့တာပါ” လို့ ဆိုပါတယ်။

ဒီစစ်ကောင်စီတွေက ကျေးရွာထဲမှာတပ်စွဲဖို့လာခဲ့တဲ့ ရည်ရွယ်ချက်က မင်းကွန်းမှာ ဘုရားထီးတင်ပွဲကို စစ်ကောင်စီအကြီးကဲတွေလာရောက်မှာဖြစ်လို့ နယ်မြေရှင်းလင်းတဲ့သဘောနဲ့ ဝင်ရောက်လာခဲ့ကြတာဖြစ်ပြီး ကာကွယ်ရေးပူးပေါင်းတပ်ဖွဲ့တွေက ရွာမှာတပ်မစွဲနိုင်အောင် ပြန်လည်ခုံခံတိုက်ခိုက်ခဲ့တာ ဖြစ်တယ်လို့သိရပါတယ်။

မကွေး၊ ဒီဇင်ဘာ ၃၀၊ ၂၀၂၂။

မကွေးတိုင်း၊ မြိုင်မြို့နယ်ထဲရှိ ကျေးရွာ ၃ ရွာက နေအိမ်အချို့ကို စစ်ကောင်စီတပ်သားတွေနဲ့ ပျူစောထီးတွေက ဒီဇင်ဘာလ ၂၉ ရက်နဲ့ ၃၀ ရက်အတွင်း မီးရှို့ဖျက်ဆီးခဲ့တာကြောင့် နေအိမ် ၁၃၄ လုံးပြာကျ ပျက်စီးခဲ့တယ်လို့ သိရပါတယ်။

အဲဒီစစ်အုပ်စုဟာ ဒီဇင်ဘာလ ၂၉ ရက်နေ့လည် ၂ နာရီလောက်မှာ အိမ်ခြေ ၁၀၀ ခန့်ရှိတဲ့ ကန်နက်ရွာကို မီးရှို့ခဲ့တာကြောင့် အိမ်ခြေ ၂၈ လုံး ပျက်စီးခဲ့သလို ဒီဇင်ဘာလ ၃၀ ရက်ဒီကနေ့မနက် ၄ နာရီဝန်းကျင်မှာလည်း အိမ်ခြေ ၃၀၀ ခန့်ရှိတဲ့အိုးဘိုရွာကို မီးရှို့ခဲ့တာကြောင့် အိမ်ခြေ ၇၀ လုံးပျက်စီးသွားခဲ့တယ်လို့ နွေဦးတော်လှန်ရေး – မြိုင်မြို့မှ တာဝန်ရှိသူတဦးက ပြောပါတယ်။

“ဒီစစ်ကောင်စီတွေနဲ့ ပျူတွေက မနေ့ကဆိုရင် မန်ကျည်းလေးပင်ရွာကို စပြီးတော့ မီးရှို့တယ်။ ပြီးတော့ ကန်နက်ရွာကို မီးရှို့တယ်။ အဲဒီကနေ အိုးဘိုရွာကိုဝင်ပြီး ညအိပ်တယ်။ မနက်ရောက်တော့ အိမ်တွေကို မီးရှို့တော့တာပဲ။ မီးရှို့ပြီးတော့ အဲဒီကောင်တွေက ၁၂ နာရီလောက်မှာ ပြန်ထွက်သွားတယ်။ အခုတော့ မီးရှို့ခံရွာတွေကို ကာကွယ်ရေးတပ်ဖွဲ့တွေက ရှင်းလင်းရေးလုပ်ပေးနေကြတယ်” လို့ဆိုပါတယ်။

ဒါ့အပြင် အဲ့ဒီစစ်အုပ်စုဟာ ဒီဇင်ဘာလ ၂၉ ရက်မနေ့ကမနက်ပိုင်းမှာလည်း အင်အား ၁၀၀ ဝန်းကျင်နဲ့ မန်ကျည်းလေးပင်ကျေးရွာမှ အိမ်ခြေ ၃၆ လုံးကို မီးရှို့ခဲ့ကြသေးတယ်လို့ အထက်ပါတာဝန်ရှိသူက ဆက်ပြောပါတယ်။

“မနေ့က မီးရှို့ခံရတဲ့ မန်ကျည်းလေးပင်ရွာမှာ အိမ် ၃၆ လုံး ပျက်စီးသွားတယ်။ စကစတွေက တရွာဝင်တရွာထွက် မီးရှို့နေတာ။ တိုက်ပွဲမဖြစ်ဘဲနဲ့ အကြောင်းမဲ့ရှို့နေတာ။ အခုမီးရှို့တဲ့ ပျူတွေနဲ့စကစတွေက ကန်နီပျူစခန်းကို ဝင်သွားကြပြီ” လို့ ဆိုပါတယ်။

အခုနှစ် စက်တင်ဘာ ၅ ရက်မှာလည်း ကန်နီရွာကပျူတွေနဲ့ စစ်ကောင်စီတပ်သားတွေ ပူးပေါင်းပြီးတော့ ကန်နက်ရွာက နေအိမ် ၂ လုံး၊ အိုးဘိုရွာက နေအိမ် ၁၄ လုံး၊ စုစုပေါင်း ၁၆ လုံး ပထမအကြိမ် မီးရှို့ ဖျက်ဆီးခဲ့ကြသေးတယ်လို့ သိရပါတယ်။

မကွေးတိုင်းဒေသကြီးအတွင်းမှာ စစ်တပ်အာဏာသိမ်းတဲ့ ၂၀၂၁ ခုနှစ်၊ ဖေဖော်ဝါရီ ၁ ရက်ကစပြီး ၂၀၂၂ ခုနှစ်၊ နိုဝင်ဘာ ၃၀ ရက်အထိ စစ်ကောင်စီတပ်တွေက အိမ်ခြေ ၇,၈၁၈ လုံး မီးရှို့ဖျက်ဆီးခဲ့တယ်လို့ Data For Myanmar က ဒီဇင်ဘာ ၁၀ ရက်မှာ ထုတ်ပြန်ထားပါတယ်