ဓားထိုးမှု

မိတ္ထီလာ၊ စက်တင်ဘာ ၁၂၊ ၂၀၂၅။

မန္တလေးတိုင်း၊ မိတ္ထီလာမြို့၊ ရတနာမာန်အောင်ရပ်ကွက်၊ နယ်မြေ ၅ ရှိ လက်ဖက်ရည်ဆိုင်မှာ မုန့်အကြော်ဆရာ ၂ ဦး စကားများရန်ဖြစ်ရာက ဓားထိုးမှုဖြစ်ပြီး ၁ ဦးသေဆုံးသွားတယ်လို့ ဒေသခံတွေဆီက သိရပါတယ်။

စက်တင်ဘာ ၁၁ ရက်နေ့လယ် ၂ နာရီခန့်မှာ မိဘမေတ္တာလက်ဖက်ရည်ဆိုင်မှာ မုန့်လုပ်သူ အသက် ၁၇ နှစ်အရွယ် မောင်ထွေး (ခ) ပျော်ဘွယ်နဲ့ အသက် ၃၇ နှစ်အရွယ် မောင်လင်း(ခ)အလီ တို့ စကားများရန်ဖြစ်ပြီး မောင်ထွေးကို အလီက ကြက်သွန်လှီးတဲ့ဓားနဲ့ထိုးခဲ့တာလို့ဆိုပါတယ်။

“ဆိုင်ဝန်ထမ်းအချင်းချင်းဖြစ်ကြတာ။ အလုပ်လုပ်ရင်းနဲ့စကားများကြတာ။ ဖြစ်စဥ်အစဆုံးကတော့ ကျနော်တို့လည်း ဖြစ်ပြီးမှရောက်တော့ သေချာမသိရဘူး။ သူတို့အချင်းချင်း မုန့်ဗန်းလုရင်း ဖြစ်ကြတာလို့တော့ သိရတယ်”လို့ ဒေသခံတဦးကပြောပါတယ်။

ဓားထိုးမှုဖြစ်တာကြောင့် မောင်ထွေး(ခ)ပျော်ဘွယ်မှာ ဝဲပုခုံးညှပ်ရိုးကြားထိုးသွင်းဒဏ်ရာ၊ ယာဘက် ရင်အုံပွန်းခြစ်ဒဏ်ရာ‌တွေရရှိခဲ့ပြီး မိတ္ထီလာပြည်သူ့ဆေးရုံကို ပို့ဆောင်ရာ ဆေးရုံအရောက်မှာ သေဆုံးသွားတာလို့ ဆိုပါတယ်။

ဓားနဲ့ထိုးသူ မောင်လင်း(ခ)အလီကိုတော့ ရဲကဖမ်းဆီးပြီး မိတ္ထီလာ မြို့မရဲစခန်းမှာချုပ်နှောင်ထားတယ်လို့ သိရပါတယ်။

စာတည်း – လင်း

ပဲခူး၊ မတ် ၁၂၊ ၂၀၂၅။

ပဲခူးတိုင်း၊ ပဲခူးမြို့၊ စိန်ထွန်းရပ်ကွက်၊ လက်ဝဲသုန္ဒရလမ်းမှာ ခင်ပွန်းဟောင်းက သူ့ရဲ့ဇနီးဟောင်းကို ဓားနဲ့ထိုးလို့ သေဆုံးသွားတယ်လို့ ဖြစ်စဥ်ကိုသိရှိထားတဲ့ ဒေသခံတွေထံက သိရပါတယ်။

ဓားနဲ့ထိုးခံရသူဟာ အသက် ၃၀ ဝန်းကျင်အရွယ် မလင်းလင်းကျော်ဆိုသူဖြစ်ပြီး မတ် ၁၂ ရက် မနက် ၁ နာရီကျော်ခန့်က နေအိမ်မှာရှိနေချိန် ခင်ပွန်းဟောင်းဖြစ်သူ ကိုအောင်မြင့်မြတ်က ဓားနဲ့ထိုးခဲ့တာလို့ ဆိုပါတယ်။

“ယောကျာ်းဖြစ်သူက နေအိမ်ထဲဝင်လာပြီး ဓားနဲ့ထိုးသွားတာလို့တော့ သိထားရတယ်။ ဓားထိုးခံရလို့ ဒဏ်ရာတွေရနေလို့ဆေးရုံကိုပို့ပြီး ဆေးကုမှုလုပ်နေချိန်မှာ ဒီမနက်မှာဘဲဆုံးသွားတာ”လို့ ဖြစ်စဥ်ကိုသိရှိထားတဲ့ ဒေသခံတဦးက ပြောပါတယ်။

ဓားနဲ့ထိုးခံရလို့ မလင်းလင်းကျော်မှာ ဝမ်းဗိုက်မှာ ထိုးသွင်းဒဏ်ရာရပြီး ပဲခူးဆေးရုံမှာ ဆေးကုသမှုခံယူနေစဥ် မနက် ၅ နာရီခန့်မှာ သေဆုံးသွားတယ်လို့ ဆိုပါတယ်။

သေဆုံးသူ မလင်းလင်းကျော်ရဲ့အလောင်းကို ဒီနေ့လယ် ၁ နာရီကျော်မှာ စင်ဖြူကွင်းသုဿာန်မှာ သင်္ဂြိုဟ်လိုက်တယ်လို့သိရပြီး ဓားနဲ့ထိုးသွားတဲ့ ကိုအောင်မြင့်မြတ်ကတော့ မတ် ၁၂ ရက် ညနေပိုင်းထိ ဖမ်းဆီးနိုင်ခြင်းမရှိသေးဘဲ ထွက်ပြေးလွတ်မြောက်နေဆဲလို့ ဒေသခံတွေက ပြောပါတယ်။

ကိုအောင်မြင့်မြတ်နဲ့မလင်းလင်းကျော်တို့ဟာ လွန်ခဲ့တဲ့ နှစ်နှစ်ခန့်ကတည်းက တရားဝင်ကွာရှင်းထားတာဖြစ်ပြီး မလင်းလင်းကျော်မှာ သားနှစ်ဦးကျန်ရစ်ခဲ့တယ်လို့ သိရပါတယ်။

ပြီးခဲ့တဲ့ ဇန်နဝါရီ ၈ ရက်နေ့ကလည်း ပဲခူးမြို့နယ်၊ ဇောင်းတူကျေးရွာမှာ လင်မယားနှစ်ယောက် စကားများရန်ဖြစ်ရာမှ လင်ဖြစ်သူက မယားဖြစ်သူကို ဓားနဲ့ခုတ်လို့ သေဆုံးသွားတယ်လို့ သိရပါတယ်။

စာတည်း – ကိုချမ်း

ပဲခူး၊ ဧပြီ ၃၊ ၂၀၂၃။

ပဲခူးတိုင်းအနောက်ခြမ်း၊ ပြည်မြို့၊ ပြည်တက္ကသိုလ်အနီးရှိ အုန်းတောလမ်းမပေါ်မှာ သမီးရည်းစားချင်း စကားများကြရာမှ ဓားထိုးမှုဖြစ်ပြီး ၂ ဦးစလုံး ဒဏ်ရာရသွားတယ်လို့ သိရပါတယ်။

ဧပြီလ ၂ ရက်မနေ့ညနေ ၆ နာရီခန့်မှာ အသက် ၂၀ ဝန်းကျင်ရှိ သမီးရည်းစားစုံတွဲ ၁ တွဲဟာ လူမှုရေးကိစ္စ စကားများရာကနေ ကောင်လေးဖြစ်သူက ကောင်မလေးကို ဓားနဲ့ထိုးခဲ့တာလို့ ဒေသခံတဦးက ပြောပါတယ်။

“သူတို့က တနေရာရာမှာကတည်းက စကားများလာကြတာ နေမယ်။ ဖြစ်တဲ့နေရာကလည်း လူသွားလူလာရှိတဲ့ လမ်းပေါ်မှာပဲ။ ကောင်မလေးကို ကောင်လေးက သူ့မှာပါလာတဲ့ ဓားမြှောင်နဲ့ ထိုးတာ။ ဓားကို အပြန်အလှန်လုကြရင်းနဲ့ နှစ်ယောက်စလုံး ထိတာလို့တော့ သိရတယ်” လို့ ပြောပါတယ်။

ဒီဖြစ်စဥ်ကြောင့် လူငယ်အမျိုးသားမှာ လက်ချောင်းပြတ်ရှဒဏ်ရာရရှိခဲ့ပြီး၊ အမျိုးသမီးမှာ တံတောင်အောက် ဓါးထိုးသွင်းဒဏ်ရာ ရရှိခဲ့ပြီး၊ သူတို့တွေကို ဒေသလူမှုကူညီရေး အသင်းတာဝန်ရှိသူတွေက ပြည်မြို့ပြည်သူ့ဆေးရုံကြီးကို ပို့ပေးခဲ့တယ်လို့ ဆိုပါတယ်။

သူတို့ ၂ ဦးရဲ့ နေရပ်နဲ့ အသေးစိတ်အချက်အလက်ကို မသိရသေးဘဲ လူငယ်အမျိုးသားကိုတော့ စစ်ကောင်စီလက်အောက်ခံ ရဲတပ်ဖွဲ့က ပြည်မြို့မရဲစခန်းမှာ ထိန်းသိမ်းထားတယ်လို့ သိရပါတယ်။

စာတည်း – လင်း