ထွက်ပြေးတိမ်းရှောင်

ပဲခူး၊ ဇွန် ၁၃၊ ၂၀၂၃။

ပဲခူးတိုင်း(အရှေ့ခြမ်း)၊ တောင်ငူခရိုင်၊ ဖြူးမြို့နယ်အရှေ့ဘက်က ကျေးရွာတွေကို စစ်ကောင်စီတပ်သားတွေက လက်နက်ကြီးတွေနဲ့ ပစ်ခတ်နေတဲ့အတွက် အဲ့ဒီဒေသတဝိုက်ရှိကျေးရွာက ဒေသခံတွေ ဆက်နေလို့မရတော့ဘဲ ထွက်ပြေးတိမ်းရှောင်နေရတယ်လို့ ဒေသခံတွေဆီက သိရပါတယ်။

ဇွန်လ ၁၀ ရက်က‌ ဘုရားလဟာရွာမှာ အထိုင်ချတပ်စွဲထားတဲ့ ခမရ ၄၃၉ တပ်နဲ့ ကာကွယ်ရေးအဖွဲ့တွေ တိုက်ပွဲဖြစ်ခဲ့ပြီးနောက် အဲ့ဒီနေ့ကစတင်ကာ ဒီနေ့ဇွန် ၁၃ ရက်ထိ ၃ ရက်ဆက်တိုက် ကျေးရွာတွေဘက်ကို ၈၁ မမ၊ ၄၀ မမတွေနဲ့ ဆက်တိုက်ပစ်ခတ်နေတာလို့ ဆိုပါတယ်။

“ဒီနေ့မနက် ၅ နာရီလောက်ကလည်း စကစတွေက လက်နက်ကြီး အလုံး ၂၀ လောက်ထုပြီး ရှေ့တိုးလာတယ်၊ ငါးမြစ်ချင်းရွာထဲ အများဆုံးကျတယ်၊ ရွာမကြီးထဲ ၂ လုံးကျတယ်၊ ခုရွာသားတွေက အိမ်မှာမနေရဲကြတော့လို့ ရွာတွေကိုစွန့်ပြီး တောတောင်တွေဆီကိုပြေးရတယ်။”လို့ ရွာမကြီးရွာသားတဦးက ပြောပါတယ်။

လက်နက်ကြီးနဲ့ ပစ်ခတ်လို့ ငါးမြစ်ချင်း၊ ရွာမကြီး၊ သင်္ဘောကျွန်း၊ ပုဇွန်မြောင်၊ ဇီးခုန်စတဲ့ရွာက ပြည်သူ ၅၀၀၀ နီးပါး အရေးပေါ်တိမ်းရှောင်နေရပြီး တချို့ကတော့ KNU က အကူညီတွေပေးထားပေမယ့် တချို့တဝက်ကတော့ အကူညီမရကြသေးဘူးလို့ ဆိုပါတယ်။

ရွာမကြီးမှာ အိမ်ခြေ ၄၀၀၊ ငါးမြစ်ချင်းမှာ အိမ်ခြေ ၂၈၆၊ သင်္ဘောကျွန်းမှာ အိမ်‌ခြေ ၆၀၊ ပုဇွန်မြောင်မှာ အိမ်ခြေ ၆၀နဲ့ ဇီးခုန်မှာ အိမ်ခြေ ၁၀၀ရှိတဲ့အတွက် အခုလက်ရှိ အိမ်ထောင်စု ၁၀၀၀ နီးပါး အကူအညီတွေ လိုအပ်နေတာလည်း ဖြစ်ပါတယ်။

ပြီးခဲ့တဲ့ ဇွန်လ ၁၀ ရက်မနက် ၁၀ နာရီက ဘုရားလဟာရွာနဲ့ ငါးမြစ်ချင်းရွာကြားမှာ စစ်ကောင်စီတပ်တွေနဲ့ ဖြူးမြို့နယ် ပကဖ၊ KNLA ပူးပေါင်းအဖွဲ့တို့ တိုက်ပွဲပြင်းထန်ခဲ့ပြီး စစ်ကောင်စီဘက်က ၄ ဦးသေဆုံးကာ အရာရှိ ၂ ဦးအပါအဝင် ၄ ဦး ဒဏ်ရာရခဲ့ပါသေးတယ်။

စာတည်း – လင်း

စစ်ကိုင်း၊ ဇွန် ၄၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ ညောင်ပင်ကြီးကျေးရွာထဲကို စစ်ကောင်စီတပ်သားတွေက ဇွန်လ ၄ ရက် ဒီမနက် ၉ နာရီလောက်မှာ ဝင်ရောက်တပ်စွဲနေတာကြောင့် ဒေသခံ ၁ သောင်းကျော် ထွက်ပြေးနေကြရတယ်လို့ သိရပါတယ်။

မုံရွာဘက်ကနေ အင်အား ၂၀၀ ကျော်ပါတဲ့ စစ်ကောင်စီတပ်သားတွေက “ကျော်ဇေယျ” အမည်ရှိ အရပ်သားသင်္ဘောတစီးကို ချောဆွဲကာ ညောင်ပင်ကြီးကျေးရွာထဲမှာ ဝင်ရောက်တပ်စွဲနေတာကြောင့် ညောင်ပင်ကြီးရွာအပါအဝင် ကျေးရွာ ၁၀ လောက်ကဒေသခံတွေ ထွက်ပြေးနေကြရတာလို့ ဆားလင်းကြီးမြို့နယ် သတင်းမှန်ပြန်ကြားရေးအဖွဲ့မှ တာဝန်ရှိသူတဦးက ပြောပါတယ်။

“စကစတွေက ရွာရဲ့ကားလမ်းဘေးတို့၊ ဘုန်းကြီးကျောင်းတို့၊ ရဲစခန်းတို့နဲ့ ရွာပတ်ပတ်လည်မှာ တပ်စွဲနေရာ ယူထားတယ်။ ထွက်ပြေးနေကြတဲ့ရွာတွေက ၁၀(ရွာ)လောက်ရှိတယ်။ ရွာနာမည်တွေတော့ မသိရသေးဘူး။ ညောင်ပင်းကြီးနားကိုလည်း တယောက်မှမသွားဝံ့ကြဘူးဗျ။ ပစ်ခတ်သံတွေလည်း မကြားရသေးဘူး”လို့ ဆိုပါတယ်။

ညောင်ပင်ကြီး၊ ရွာရှည်၊ သိမ်တော်၊ နှင်းတော၊ ထန်းတောနဲ့ ရွှေအင်းလေးစတဲ့ ရွာတွေအပါ ကျေးရွာ ၁၀ ရွာလောက်က ဒေသခံတွေ ထွက်ပြေးတိမ်းရှောင်နေရတာပါ။

ညောင်ပင်ကြီးကျေးရွာအနီးမှာ မေလ ၃၁ ရက်က ဆားလင်းကြီးမြို့နယ်ပြည်သူ့အုပ်ချုပ်ရေးအဖွဲ့ဝင် အသက် ၄၀ အရွယ် ဦးဗန့်ဂျီ ဖမ်းဆီးခံလိုက်ရပြီးနောက် ၅ ရက်အကြာမှာ အခုလိုစစ်ကောင်စီတပ်က ရွာထဲကို ဝင်ရောက်တပ်စွဲလာခဲ့တာ ဖြစ်တယ်လို့ ဒေသခံတွေကပြောပါတယ်။

လက်ရှိမှာ စစ်ကောင်စီတပ်သားတွေက ညောင်ပင်ကြီးကျေးရွာကနေ ပြန်လည်ထွက်သွားခြင်း မရှိဘဲ တပ်စွဲနေသေးတာကြောင့် နောက်ဆက်တွဲအခြေအနေကို စောင့်ကြည့်နေရဆဲဖြစ်တယ်လို့ ဒေသခံတွေက ပြောပါတယ်။

စစ်ကောင်စီတပ်သားတွေဟာ ဦးဗန့်ဂျီကိုတော့ ဇွန်လ၃ ရက်နေ့လယ် ၁ နာရီကျော်မှာ ဖမ်းဆီးထိန်းသိမ်းထားတဲ့ ဆားလင်းကြီးမြို့နယ်၊ နောင်အိုင်ကြီးရဲစခန်းကနေ မုံရွာမြို့က စစ်ကြောရေးတနေရာကို ပို့ဆောင်လိုက်ပြီလို့ သိရပါတယ်။

ဓါတ်ပုံ – အညာပစ်တိုင်းထောင်လေးများအဖွဲ့။

စာတည်း – လင်း

စစ်ကိုင်း၊ မေ ၂၆၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ရေဦးမြို့နယ်မြောက်ဘက်ခြမ်းကို ဒီကနေ့မေလ ၂၆ ရက် မနက် ၁၀ နာရီလောက်မှာ စစ်ကောင်စီတပ်တွေက စစ်ကြောင်းထိုးနေလို့ ထောင်နဲ့ချီတဲ့ ဒေသခံတွေ ထွက်ပြေးတိမ်းရှောင်နေရပါတယ်။

စစ်သားအင်အား ၁၂၀ လောက်နဲ့ စစ်ကြောင်းဝင်လာတာကြောင့် မုံတိုင်ပင်၊ တပ်သစ်၊ ရွာဗုကြီး၊ ဇီးကန်၊ ပန်းကုံး စတဲ့ကျေးရွာတွေက ဒေသခံ ၅ ထောင်နီးပါးထွက်ပြေးတိမ်းရှောင်ခဲ့ရကာ လက်ရှိမှာ စာသောက်ရေးအတွက် အခက်အခဲဖြစ်နေတယ်လို့ ရေဦးမြို့နယ် – စစ်ရှောင်ပြည်သူထောက်ပံ့ရေးအဖွဲ့ တာဝန်ရှိသူက မြေလတ်အသံကိုပြောပါတယ်။

“စစ်သားတွေက ရေဦးမြောက်ဘက် ချောင်းဦးနဲ့စခန်းသာရွာမှာ ညအိပ် စခန်းချတယ်။ အဲ့နားက ရွာသားတွေလည်း ရှောင်ပြေးနေရတယ်။ စစ်ရှောင်တာ ၅၀၀၀ လောက်ရှိမယ်။ ထမင်းထုပ်တွေ တနိုင်လာပေးတာတော့ ရှိပါတယ်။ စားစရာလည်းမသယ်နိုင်တော့ စစ်ရှောင်ပြည်သူတွေ စားစရာမရှိဖြစ်နေတယ်”လို့ ပြောပါတယ်။

ဒီနေ့နေ့လယ် ၁ နာရီခွဲလောက်မှာတော့ စစ်ကောင်စီတပ်ဖွဲ့တွေက အောင်သာရွာ(ပျူရွာ)မှာ ဝင်ရောက်တပ်စွဲထားတယ်လို့ ဆက်ပြောပါတယ်။

မေလ ၂၅ ရက် မနက် ၁၀ နာရီလောက်ကလည်း စစ်ကြောင်းဝင်လာတာကြောင့် ရေဦးနယ်ထဲက ဗိုလ်ရုံ၊ အုန်းနှဲပေါင်း၊ ဖိန်းကား၊ ချောင်းဦး၊ စခန်းသာ၊ ကံပေါက်၊ ဆပ်သေ၊ အင်တော ကျေးရွာက ဒေသခံတွေလည်း ထွက်ပြေးတိမ်းရှောင်ခဲ့ရပါသေးတယ်။

အဲ့ဒီနေ့ (မေ ၂၅)မှာတင် စစ်ကောင်စီတပ်ကို PDF တပ်ဖွဲ့ဝင်တွေက မိုင်းဆွဲတိုက်ခိုက်ခဲ့ရာ အထိနာတဲ့အတွက် ဖိန်းကားရွာကိုဝင်ရောက်ကာ ရွာထဲပိတ်မိနေတဲ့အသက် ၈၀ ကျော် အဘွားအိုတဦးကို ပစ်သတ်ခဲ့ပြီး၊ နေအိမ် ၇ လုံးကိုလည်း မီးရှို့ဖျက်ဆီးခဲ့ပါသေးတယ်။

စာတည်း – လင်း

ခင်ဦး၊ ဧပြီ ၁၉၊ ၂၀၂၃။

စစ်ကိုင်းတိုင်း၊ ခင်ဦးမြို့နယ်ကို စစ်ကောင်စီတပ်က ၂ရက်ဆက်တိုက် စစ်ကြောင်းထိုးကာ လက်နက်ကြီး၊ လက်နက်ငယ်တွေနဲ့ ကျေးရွာတွေဘက်ကို ပစ်ခတ်နေတာကြောင့် ဒေသခံ ၅၀၀၀ ခန့်ထွက်ပြေးနေကြရတယ်လို့ သိရပါတယ်။

အင်အား ၁၀၀ ကျော်ပါတဲ့ စစ်ကောင်စီတပ်သားတွေဟာ ဧပြီလ ၁၈ ရက်မှာ တကြိမ်၊ ၁၉ ရက် ဒီမနက်မှာ တကြိမ် မြကန်ရွာ၊ အင်းပတ်ကွေ့ရွာ၊ မြင်းဒေါင်းကျေးရွာတွေကို စစ်ကြောင်းထိုးဝင် ရောက်ကာ အနီးပတ်ဝန်းကျင်တွေကို လက်နက်ကြီးတွေနဲ့ ပစ်ခတ်နေတာကြောင့် အခုလို ထွက်ပြေးနေကြရတာဖြစ်တယ်လို့ ခင်ဦးမြို့နယ် သတင်းမှန်ပြန်ကြားရေးအဖွဲ့မှ တာဝန်ခံက ပြောပါတယ်။

မနေ့က စစ်ကောင်စီတပ်တွေက ရွာတွေထဲပစ်ခတ်မှုတွေလုပ်တာကြောင့် ထွက်ပြေးသွားရတဲ့ဒေသခံတွေ ကိုယ့်အိမ်ကိုယ် မပြန်ရသေးခင်မှာ နောက်ထပ်ကျေးရွာတွေက ဒေသခံတွေကပါ ထပ်မံထွက်ပြေးနေရတာ ဖြစ်ပါတယ်။

“အခုက စစ်ကြောင်းက မြကန်၊ မြင်းဒေါင်းရွာဘက်ကို ရောက်နေပြီ။ လက်နက်ကြီးတွေ ဆက်တိုက်ပစ်တယ်။ ပြေးနေရသူတွေကို ထမင်းထုပ်ဝေငှဖို့ရာ အခက်အခဲဖြစ်နေတယ်။ နေဖို့နေရာရယ်ပေါ့” လို့ ခင်ဦးမြို့နယ် သတင်းမှန်ပြန်ကြားရေးအဖွဲ့မှ တာဝန်ခံက ဆိုပါတယ်။

ထွက်ပြေးတိမ်းရှောင်နေကြရတဲ့ ဒေသခံ ၅၀၀၀ ခန့်ဟာ မြကန်၊ အင်းပတ်ကျေးရွာ၊ အင်တိုင်လေး (တောင်/မြောက်)ရွာ၊ သရက်ပင်စု၊ မြင်းဒေါင်း၊ မကျီးအုပ်ကျေးရွာတွေကဖြစ်ပြီး ဒီကျေးရွာတွေဟာ စစ်ကောင်စီတပ်ရဲ့ စစ်ကြောင်းထိုးပစ်ခတ်တာတွေကို မကြာခဏ ခံနေရတဲ့ ကျေးရွာတွေဖြစ်တယ်လို၌ ဒေသခံတွေဆီက သိရပါတယ်။

“အခုကျနော်တို့ရွာဘက်တွေမှာလည်း လက်နက်ကြီးတွေလာကျလို့ ထွက်ပြေးနေရတာ။ ရွာ ၅ ရွာကျော်ရှိမယ်၊ ပြေးနေရတာ။ မနက်စာတွေလည်း မစားကြရသေးဘူး။ တိုက်ပွဲဖြစ်နေလား၊ ဘာကြောင့်လည်းတော့ မသိဘူး” လို့ လက်ရှိ ကိုယ်တိုင်ထွက်ပြေးနေရတဲ့ သရက်ပင်စုကျေးရွာသားတဦးက ပြောပါတယ်။

ထွက်ပြေးနေကြရတဲ့ ဒေသခံ ၅၀၀၀ ခန့်မှာ အဝတ်အထည်၊ စားနပ်ရိက္ခာတွေ အရေးပေါ်လိုအပ်လျှက်ရှိနေတယ်လို့ ခင်ဦးမြို့နယ် သတင်းမှန်ပြန်ကြားရေးအဖွဲ့ရဲ့ တာဝန်ခံက ပြောပါတယ်။

ခင်ဦးမြို့နယ်ထဲက ကျေးရွာတွေကို လက်ရှိစစ်ကြောင်းထိုးနေတဲ့ စစ်ကောင်စီတပ်သားတွေဟာ ရေဦးမြို့နယ်၊ တိုင်းရင်းဆေးရုံမှာ အထိုင်ချထားတဲ့ အင်အား ၁၀၀ ကျော်ရှိတဲ့ စစ်ကြောင်းဖြစ်တယ်လို့ သိရပါတယ်။

စာတည်း – လင်းဇေ

ပေါက်၊ မတ် ၁၆၊ ၂၀၂၃။

မကွေးတိုင်းဒေသကြီး၊ ပေါက်မြို့နယ်အတွင်း စစ်ကောင်စီက လက်နက်ကြီးတွေနဲ့ ပစ်ခတ် စစ်ကြောင်းထိုး ဖမ်းဆီးဖျက်ဆီးနေလို့ ဒေသခံတွေ ထွက်ပြေးတိမ်းရှောင်နေကြရတယ်လို့ သိရပါတယ်။

ကျေးရွာတွေထဲက ပစ္စည်းတွေ မွှေနှောက်ရှာဖွေ ယူဆောင်တာ ဖမ်းဆီးခေါ်ဆောင်ပြီး လူသားဒိုင်းအဖြစ် ခေါ်ဆောင်နေတာတွေ နေ့စဉ်ဆိုသလို လုပ်နေတာကြောင့် တိမ်းရှောင်သူတွေ များပြားလာတာလို့ သိရပါတယ်။

“စစ်ဘေးရှောင်ရွာသားတွေက ခြောက်ထောင်ကျော်လောက်ရှိမယ်။ ဖြစ်သလိုနေ ဖြစ်သလိုစားနဲ့ နေရတာ။ အမိုးအကာလည်း လုံခြုံမှုမရှိပါဘူး။ စစ်ကြောင်းဝင်လာတာနဲ့ ဘေးလွတ်ရာ ကူညီပြောင်ပေးနေရတယ်။ ညပိုင်း ကင်းစောင့်ရတာပေါ့။ ပြည်သူတွေအတွက် အကူအညီလိုအပ်နေတာက အများကြီးပါ” လို့ ပေါက်မြောက်ပိုင်းကာကွယ်ရေးတပ်ဖွဲ့ဝင် ဗိုလ်လရောင်က မြေလတ်အသံကို ပြောပါတယ်။

အင်အား ၅၀ နဲ့ ၁၀၀ ကြားရှိ စစ်ကောင်စီတပ်ဖွဲ့ဝင်တွေက မတ်လ ၉ ရက်နေ့ကနေ ၁၅ ရက်နေ့အထိ ကျေးရွာနေအိမ်တွေကို မီးရှို့တာ၊ စစ်ကြောင်းထိုး လက်နက်ကြီးနဲ့ ပစ်ခတ်တာတွေကြောင့် ဒဏ်ရာရတာ သေဆုံးတာတွေရှိနေတယ်လို့ သိရပါတယ်။

လက်ရှိမှာတော့ အုန်းတောတောင်စု၊ မြောက်စု၊ ကမ်းပြို၊ မုန်းတော၊ ဆူးလေကုန်း၊ အင်ပင်၊လယ်ဘဲ့၊ သီးချောက်၊ မြို့ခင်းသာ၊ ရေတိမ်၊ ချိုင်ဇောက်အုပ်စု ရွာများမှ ဒေသခံ ၆၀၀၀ ကျော်ဟာ စစ်ကောင်စီတပ်ဖွဲ့တွေရဲ့ ဘေးကနေ လွတ်ရာ တောတွင်းတွေထဲမှာ ရှောင်ပုန်းနေရလို့ နေရာထိုင်ခင်းနဲ့ အစားအစာအခက်ခဲတွေလည်း ရှိနေတယ်လို့ ဆိုပါတယ်။

စာတည်း – 007

ယင်းမာပင်၊ မတ် ၁၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်ထဲက ကုန်းရွာနေအိမ်တွေကို စစ်ကောင်စီတပ်က မီးရှို့နေလို့ ဒေသခံ ၁ သောင်းခန့် ထွက်ပြေးတိမ်းရှောင်နေရတယ်လို့ Bo Thurain-Yinmabin PDF တပ်ရင်းဆီက သိရပါတယ်။

စစ်ကောင်စီတပ်ဖွဲ့တွေဟာ အင်အား ၁၃၀ ‌နီးပါးနဲ့ ယင်းမာပင်မြို့နယ် ကုန်းရွာက နေအိမ်တွေကို ဖေဖော်ဝါရီလ ၂၈ ရက် ညပိုင်း ၇ နာရီအချိန်ကစလို့ ‌မီးရှို့နေတယ်လို့ ဆိုပါတယ်။

“စစ်ကောင်စီတပ်သားတွေက ဝါးရုံတောထဲကနေလာပြီး ကျွန်းတော၊ မြင်သာကုန်းကနေ ကုန်းရွာဘက်ကိုဝင်လာတာ၊ ရွာရဲ့အနောက်ဘက်က နေအိမ်တွေဖျက်ဆီးပြီး မီးတွေရှို့တယ်၊ ကုန်းရွာရွာမကြီးထဲကတော့ အိမ်‌ခြေ ၈၀၀ လောက်ရှိတယ်၊ စတင်မီးရှို့တာက ည ၇ နာရီမှာမီးရှို့တာ၊ လက်ရှိအချိန်အထိ စစ်**တွေက ရွာကနေအိမ်တွေကို မီးရှို့နေလို့ အိမ်ဘယ်လောက်မီးထဲပါတာအတည်မပြုနိုင်သေးဘူး၊ ကုန်းရွာ ဒေသခံ ၁ သောင်းကျော်ထွက်ပြေးနေရတယ်” လို့ ဗိုလ်သူရိန်က ပြောပါတယ်။

စစ်ကောင်စီစစ်ကြောင်းက ဒီကနေ့မနက်(မတ်လ ၁ ရက်)အထိ မထွက်သေးပဲ ကုန်းရွာကိုထပ်မံမီးရှို့နေပြီး စစ်ကောင်စီစစ်ကြောင်းထိုးနေလို့ ကုန်းရွာ၊ ရုန်းလေးပင်ရွာ၊ ပေါက်ပန်းဖြူရွာ၊ ဇီးတောရွာက ဒေသခံတွေ ထွက်ပြေးတိမ်းရှောင်နေရတယ်လို့ သိရပါတယ်။

အဲဒီစစ်ကြောင်းက ယင်းမာပင်မြို့နယ်ထဲက ထန်းတောကြီးရွာကို စစ်ကြောင်းထိုးလာပြီး ပုလဲဘက်ကလာတဲ့ စစ်ကြောင်းလို့ သိရပါတယ်။

ရွှေဘို၊ ဖေဖော်ဝါရီ ၂၅၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်ထဲက ကျေးရွာတွေဘက်ကို စစ်ကောင်စီတပ်က လက်နက်ကြီးနဲ့ ပစ်ခတ်လို့ ကျေးရွာ ၇ ရွာထက်မနည်း ထွက်ပြေးတိမ်းရှောင်နေရတယ်လို့ ဒေသခံတွေဆီက သိရပါတယ်။

စစ်ကောင်စီတပ်ဖွဲ့တွေဟာ အင်အား ၁၀၀ ‌နီးပါးနဲ့ ခင်ဦးမြို့‌ပေါ်မှာ အခြေချထားပြီး ဖေဖော်ဝါရီ ၂၅ ရက် ဒီနေ့ နေ့လယ် ၁၂ နာရီခွဲလောက်မှာတော့ မြို့ပေါ်ကနေ ခြေလျင်နဲ့ ထွက်လာပြီး လက်နက်ကြီးတွေနဲ့ စတင်ပစ်ခတ်ခဲ့တယ်လို့ ဆိုပါတယ်။

အခုလို ကျေးရွာတွေဘက်ကို လက်နက်ကြီးတွေနဲ့ ပစ်ခတ်ခဲ့လို့ ကျေးရွာ ၇ ရွာနီးပါးက ဒေသခံပြည်သူ ၉ ထောင်ကျော်ဟာ ထွက်ပြေးတိမ်းရှောင်နေရတယ်လို့ ခင်ဦးမြို့နယ်သတင်းမှန်ပြန်ကြားရေးမှ တာဝန်ခံတဦးက မြေလတ်အသံကို ပြောပါတယ်။

“စစ်ကောင်စီက တပ်ရင်းတပ်မ ဘယ်လောက်ကလဲဆိုတာ မသိရသေးပါဘူး။ ခင်ဦးနယ်ထဲရောက်နေတာကတော့ ၂ ပတ်ကျော်ပါပြီ။ မြို့ပေါ်ရောက်နေတာ ၂ ရက် ရှိပါပြီ။ အခုက အနောက်ဘက် သူတို့လာခဲ့တဲ့ ရေဦးမြို့ဘက် ပြန်ခေါက်ဖို့ စစ်ကြောင်းထိုးနေတာပါ” လို့ ဆိုပါတယ်။

အခုလို ခင်ဦးမြို့ အနောက်ဘက်မှာရှိတဲ့ ကျေးရွာတွေဘက်ကို စစ်ကောင်စီက လက်နက်ကြီးတွေနဲ့ ရမ်းသမ်းပစ်ခတ်နေလို့ ကံသာယာရွာ၊ ကံသစ်ရွာ၊ ဌက်ပျော်ရွာ၊ ဗအိုးရွာ၊ အင်တိုင်ကြီးရွာ၊ စည်ပုတ္တရွာနဲ့ အနီးနားကျေးရွာက ပြည်သူတွေပါ ထွက်ပြေးတိမ်းရှောင်နေကြရတယ်လို့ အထက်ပါ တာဝန်ခံက ဆက်ပြောပါတယ်။

“သူတို့ ဗအိုးရွာထဲကို လက်နက်ကြီးတွေ ပစ်ပြီး ဝင်နေတယ်။ စစ်ကြောင်းထွက်ရင်း လမ်းကြောင်းရှင်းတဲ့ သဘောနဲ့ ရမ်းပစ်နေတာ အခုလည်း ဗအိုးရွာထဲက နေအိမ်တွေကိုလည်း ဖျက်ဆီးတာတွေ လုပ်နေတယ်။ ထွက်ပြေးနေရတဲ့ ရွာတွေက တရွာနဲ့တရွာ ပေ ၂ ထောင်လောက်ပဲ ဝေးကြတာ” လို့လည်း ဆိုပါတယ်။

အခုလက်ရှိအချိန်ထိ စစ်ကောင်စီစစ်ကြောင်းဟာ ကျေးရွာရဲ့ အနီးနားတဝိုက်မှာ ရှိနေသေးတဲ့အတွက် ဒေသခံပြည်သူတွေဟာ ကျေးရွာထဲကို ဝင်ရောက်နေထိုင်ခြင်း မရှိသေးဘူးလို့ သိရပါတယ်။

ဖေဖော်ဝါရီ ၂၄ ရက်ကလည်း အဲဒီစစ်ကြောင်းဟာ ခင်ဦးမြို့ပေါ်က အောင်ချမ်းသာရပ်ကွက်မှာ နေထိုင်တဲ့ မိသားစုဝင်တချို့နဲ့ လူလတ်ပိုင်း အမျိုးသား ၁၀ ဦးထက်မနည်း မြို့ပေါ်ကို ဖမ်းဆီးခေါ်ဆောင်သွားပြီး ယနေ့ထိ ပြန်လွှတ်မပေးသေးဘူးလို့ ခင်ဦးမြို့နယ် သတင်းမှန်ပြန်ကြားရေး Page မှထုတ်ပြန်ထားပါတယ်။