ထိခိုက်

မကွေး၊ မေ ၂၆၊ ၂၀၂၃။

မကွေးတိုင်းဒေသကြီး၊ ဂန့်ဂေါမြို့နယ်ရှိ တောင်ခင်ရန်းရဲစခန်းတိုက်ခိုက်ခံရပြီး စစ်ကူလာတဲ့ ပျူအဖွဲ့ပါ ကြားဖြတ်တိုက်ခိုက်ခံရပြီး စစ်ကောင်စီတပ်သား ၃ ဦး သေဆုံးကာ အရာရှိ ၁ ဦးအပါအဝင် ၈ ဦး ဒဏ်ရာရသွားတယ်လို့ သိရပါတယ်။

မေလ ၂၅ ရက်မနက် ၉ နာရီကနေ ညနေ ၄ နာရီလောက်အထိ စစ်ကောင်စီတပ်သားနဲ့ ရဲအင်အား ၇၀ လောက်ရှိတဲ့ တောင်ခင်ရန်းရဲစခန်းကို ၆၀ မမတွေနဲ့ အဆက်မပြတ်တိုက်ခိုက်ခဲ့တယ်လို့ ABSDF Column – 3 တာဝန်ခံ ကိုရွှေကျီးကပြောပါတယ်။

“ဒီဘက်က ပူးပေါင်းအဖွဲ့တွေက ကိုက် ၃၀၀ ဝန်းကျင်လောက်နေ လက်နက်ကြီးတွေနဲ့ ပစ်ခဲ့တာ။ သူတို့စခန်းတိုက်ခံရလို့ မြောက်ခင်ရန်းဘက်က ပျူတွေကလည်း စစ်ကူလာတာကို လမ်းကနေဖြတ်ပြီး မိုင်းဆွဲတိုက်ခိုက်ခဲ့တယ်။ သူတို့လာမှာသိလို့ အဖွဲ့ခွဲပြီး စောင့်နေခဲ့တာ။ ရဲစခန်းက အဖွဲ့တွေက ဒေသခံတွေကို နည်းလမ်းပေါင်းစုံ ဒုက္ခပေးနေတာဆိုတော့ တိုက်မှဖြစ်တော့မယ်ဆိုပြီး တိုက်တာ”လို့ ပြောပါတယ်။

တောင်ခင်ရန်းရဲစခန်းကို တိုက်ခိုက်ချိန် စစ်ကောင်စီတပ်သား ၃ ဦးသေဆုံးပြီး၊ အရာရှိ ၁ ဦး ခြေထောက်ထိမှန် ဒဏ်ရာရသွားတာကို ဒေသခံတွေရဲ့ ပြန်လည်ပြောပြချက်အရ သိရတယ်လို့ ဆိုပါတယ်။

ရဲစခန်းကိုတိုက်ခိုက်ချိန် စစ်ကောင်စီဘက်က RPG၊ ၄၀ မမ၊ လက်နက်ငယ်တွေနဲ့ ပြန်လည်ပစ်ခတ်ခဲ့ပေမယ့် ပူးပေါင်းအဖွဲ့ဘက်က ထိခိုက်တာမရှိဘူးလို့ ဆိုပါတယ်။

ဒါ့အပြင် အဲ့ဒီနေ့မနက် ၁၀ နာရီလောက်မှာတော့ မြောက်ခင်ရန်းကျေးရွာဘက်ကနေ တောင်ခင်ရန်းရဲစခန်းကို ကား ၄ စီးလောက်နဲ့စစ်ကူလာတဲ့ ပျူအင်အား ၁၀၀ လောက်ကို ရွှေဘို-သင်းတောရွာကြားမှာ မိုင်းဆွဲတိုက်ခိုက်ခဲ့ရာ ကားတစီးထိမှန်ပြီး ပျူ ၇ ဦးဒဏ်ရာရသွားခဲ့တာလည်း ဖြစ်ပါတယ်။

ဒီတိုက်ခိုက်မှုတွေကို ABSDF Column – 3၊ အမှတ် ( ၁၂ ) တပ်ရင်း၊ ယောဒေသစခန်းနဲ့ ဒေသခံ PDF တပ်ဖွဲ့အချို့၊ သင်တော ပကဖ၊ ဟံသာဝတီ ပကဖအပါအဝင် ပကဖ အဖွဲ့အချို့က ပူးပေါင်းတိုက်ခိုက်ခဲ့ကြတာပါ။

တိုက်ပွဲဖြစ်ပွားချိန်မှာ နှစ်ဖက်အပြန်အလှန် ပစ်ခတ်နေလို့ တောင်ခင်ရန်းကျေးရွာသား ၂၀၀ ကျော်ဟာ ဘေးလွတ်ရာကို တိမ်းရှောင်သွားရတယ်လို့ သိရပါတယ်။

မတ်လ ၃၁ ရက်ကလည်း ဂန့်ဂေါမြို့နယ်၊ ကန်ရွာနယ်မြေရဲစခန်းကို ကာကွယ်ရေးပူးပေါင်းတပ်တွေဘက်က ဝင်ရောက်တိုက်ခိုက်ခဲ့ရာ သေနတ် ၆ လက်နဲ့ ဆက်စပ်ပစ္စည်းတွေ သိမ်းဆည်းနိုင်ခဲ့ပြီး စစ်ကောင်စီနဲ့ ရဲအဖွဲ့ဝင်တွေ အများအပြားသေဆုံးခဲ့သေးတယ်လို့ သိရပါတယ်။

စာတည်း – လင်း

မကွေး၊ မေ ၈၊ ၂၀၂၃။

မကွေးတိုင်း၊ ပခုက္ကူမြို့အခြေစိုက် တပ်မ ၁၀၁ က ထွက်လာတဲ့ စစ်ကောင်စီ ၁၂ ဘီးကားယာဉ်တန်း ပခုက္ကူ – ကံမ လမ်းပိုင်းမှာ မေလ ၇ ရက်မနေ့မနက်ပိုင်းက ဒရုန်းဗုံး၊ မိုင်းတွေနဲ့ တိုက်ခိုက်ခံခဲ့ရတယ်လို့ သိရပါတယ်။

တပ်မ ၁၀၁ ကလာတဲ့ ၁၂ ဘီးကား ၅ စီးပါ ယာဉ်တန်းကို မနေ့မနက် ၈ နာရီဝန်းကျင်က ပခုက္ကူမြို့နယ်၊ သာတောင်ကြီးရေနံမြေစခန်းအနီး အရောက်မှာ ဒရုန်းနဲ့ဗုံးချတိုက်ခိုက်ခဲ့တာလို့ ပခုက္ကူပြည်သူ့ကာကွယ်ရေးတပ်ဖွဲ့ တာဝန်ခံက မြေလတ်အသံကို ပြောပါတယ်။

“ပခုက္ကူကနေထွက်လာတဲ့ စစ်ကား ၅ စီးကို ဒရုန်းနဲ့ အီနာဂါ ၆ လုံးကြဲတာမှာ ကား ၂ စီးထိပြီး ၄ ဦး ဒဏ်ရာရတယ်” လို့ ပြောပါတယ်။

ဒါ့အပြင် စစ်ကောင်စီတပ်သား ၁၅၀ ဝန်းကျင်ပါ အဲ့ဒီ ၁၂ ဘီးယာဉ်တန်းကိုပဲ မနက် ၈ နာရီခွဲက ကန်တော်ကျေးရွာအနီးမှာ မိုင်းပွိုင့်တပွိုင့် မိုင်းကြီးတလုံးနဲ့ ထပ်မံမိုင်းဆွဲခဲ့တာလို့ ပြည်သူ့ကာကွယ်ရေးတပ်ဖွဲ့ – မြိုင်မြိ့နယ် တာဝန်ခံ ဗိုလ်လက်ယာက ပြောပါတယ်။

“ ၅ စီးလာတာမှာ ပထမဆုံးကားကို မိုင်းဆွဲတာ ၈ ယောက်လောက် ဒဏ်ရာရတယ်။ ကားကဆက်မောင်းသွားပြီး ကံမမြို့အနီး ဂျိုးပျံရပ်ကွက်မှာ မီးလောင်သွားတာ။ ဒဏ်ရာရတဲ့ ၈ ဦးကို‌တော့ အဲ့ဒီရပ်ကွက်မှာပဲ ဆေးကုနေတယ်” လို့ ပြောပါတယ်။

မေလ ၇ ရက်နေ့မနက်ပိုင်းမှာပဲ ပေါက်မြို့နယ်၊အုန်းတောရွာအနီး လမ်းသွားလမ်းလာတွေကို အုပ်စုဖွဲ့ စစ်ဆေးနေတဲ့ စစ်ကောင်စီတပ်သား ၄၀ ခန့်ကို မိုင်း ၁၆ လုံးခွဲပြီး တိုက်ခိုက်ခဲ့လို့ စစ်ကောင်စီတပ်ဘက်က ထိခိုက်သေဆုံးမှုတွေရှိခဲ့တယ်လို့ မြိုင် PDF က ထုတ်ပြန်ထားပါတယ်။

စာတည်း-ရင်ငြိမ်း

ပဲခူး၊ ဧပြီ ၁၀၊ ၂၀၂၃။

ပဲခူးတိုင်း၊ သနပ်ပင်မြို့နယ်၊ မြို့အဝင်စစ်ဆေးရေးဂိတ် ကန်သာယာစားသောက်ဆိုင်အနီးရှိ စစ်ကောင်စီစစ်ဆေးရေးဂိတ် မိုင်းခွဲခံရပြီး စစ်ကောင်စီတပ်သားတွေ ထိခိုက်နိုင်တယ်လို့ သိရပါတယ်။

ပဲခူး-ခရမ်း-သုံးခွလမ်းပိုင်းပေါ်က အင်အား ၁၀ ဦးကျော်ရှိတဲ့ အဲ့ဒီစစ်ကောင်စီဂိတ်ကို ဧပြီလ ၉ ရက် မနေ့ ည ၇ နာရီခွဲခန့်မှာ မိုင်း ၃ လုံးနဲ့ ဖောက်ခွဲတိုက်ခိုက်ခဲ့တာလို့ ပဲခူးမြို့နယ် ပကဖတာဝန်ရှိသူက မြေလတ်အသံကို ပြောပါတယ်။

“ရဲဘော်တွေက စကစတွေနဲ့ အနီးဆုံးနေရာထိ သွားပြီးတော့ မိုင်းဆင်ဖောက်ခွဲခဲ့တာဖြစ်တယ်။ ဂိတ်အနီးကို သိပ်ကပ်လို့မရတာကြောင့် အထိအခိုက် မခန့်မှန်းတတ်သေးပါဘူး။ ဗုံးကွဲပြီးတော့ အဲ့ဒီဂိတ်ကို လူနာတင်ယာဉ်တချို့ရောက်လာလို့ ထိခိုက်မှုရှိတယ်လို့ ပြောလို့ရတယ်” လို့ ပြောပါတယ်။

စစ်ကောင်စီဂိတ် မိုင်းပေါက်ကွဲမှုဖြစ်ပြီးနောက် စစ်အုပ်စုက မြို့ပေါ်ရပ်ကွက်တွေမှ ပိတ်ဆို့စစ်ဆေးခဲ့တဲ့အပြင် ဧည့်စာရင်း စစ်ဆေးတာတွေလည်း လုပ်ခဲ့သေးတယ်လို့ သိရပါတယ်။

အဲ့ဒီ စစ်ဆေးရေးဂိတ်ဟာ လမ်းသွားလမ်းလာ ခရီးသွားကားတွေကို စစ်ဆေးငွေတောင်းတာတွေ၊ တရားမဝင်ပစ္စည်းတင်ကားတွေဆီကနေ ပိုက်ဆံတောင်းယူတာတွေ လုပ်ဆောင်နေပြီး စစ်ဆေးမှု တင်းကြပ်တဲ့ဂိတ်တခု ဖြစ်တယ်လို့ သိရပါတယ်။

စာတည်း – ရင်ငြိမ်း