မြေလတ်အသံ၊ ဒီဇင်ဘာ ၂၂၊ ၂၀၂၅။

မကွေးတိုင်း၊ မြိုင်နဲ့ ပေါက်မြို့နယ်တို့မှာ စစ်ကော်မရှင်တပ်က လေကြောင်းကနေဗုံးကြဲတိုက်ခိုက်ခဲ့တာကြောင့် သက်ကြီးပိုင်းအမျိုးသား ၁ ဦးထိခိုက်ပြီး နေအိမ်အဆောက်အအုံ တချို့လည်းပျက်စီးခဲ့တယ်လို့ ဒေသခံတွေဆီက သိရပါတယ်။

ဒီဇင်ဘာ ၂၂ ရက်မနက် ၁၀ နာရီခွဲမှာ မြိုင်မြို့နယ်၊ ရွာသစ်ကုန်းရွာကို မကွေးလေတပ်ဘက်က တက်လာတဲ့ MiG-29 ပေါ်ကနေ ဗုံးကြဲ၊ ပစ်ခတ်ခဲ့ပြီး မနက် ၁၀ နာရီ ၅၀ မိနစ်မှာ မုံရွာနမခ ကတက်လာတဲ့ ဂျိုင်ရိုကော်ပတာ ၂ စီးနဲ့ ပေါက်မြို့နယ်၊ လက်ပံတိုရေနံမြေစခန်းအနီးကို ဗုံးကြဲခဲ့တာလို့ ဆိုပါတယ်။

ခုလို ဗုံးကြဲပစ်ခတ်လို့ ရွာသစ်ကုန်းရွာတိုက်ခိုက်မှုမှာ အသက် ၆၀ အရွယ်အမျိုးသား ၁ ဦးထိခိုက် ဒဏ်ရာရကာ နေအိမ် ၁ လုံးပျက်စီးပြီး လက်ပံတိုရေနံမြေအနီးက မှော်မင်းသား KTV အဆောက်အအုံ ၁ ခုပျက်စီးခဲ့တယ်လို့ ဒေသခံတဦးကပြောပါတယ်။

“ဒဏ်ရာရသူ ၁ ဦးတော့ ရှိပါတယ်၊ အသက် ၆၀ အရွယ် အဘိုး ၁ ဦးပါ၊ မစိုးရိမ်ရပါဘူး၊ ပွတ်ပြီးထိသွားတာပါ၊ လောလောဆယ်တော့ နယ်ခံဆေးပေးခန်းမှာ ဆေးထည့်ပေးထားပါတယ်၊ သေဆုံးမှုတော့ မရှိပါဘူး၊ ကျတာကတော့ အိမ်ပေါ်တည့်တည့်ကျတာပါ၊ ကျတဲ့အိမ်ပေါ်မှာက လူက ၁ ဦးမှမရှိလို့ပါ၊ နေအိမ်တော့ပျက်စီးသွားပါတယ်”လို့ မြိုင်မြို့ခံတဦးက ပြောပါတယ်။

ရွာသစ်ကုန်းရွာမှာ အိမ်ခြေ ၂၀၀ နဲ့ လူဦးရေ ၄၀၀ ဝန်းကျင်ရှိပြီး လေကြောင်းတိုက်ခိုက်ခံရပြီးနောက် ဒေသခံတွေဟာ ရွာထဲကနေတိမ်းရှောင်နေကြတယ်လို့ ဆိုပါတယ်။

ဒါ့အပြင် စစ်ကော်မရှင်တပ်က လေကြောင်းတိုက်ခိုက်တာတွေကြောင့် ပေါက်နဲ့မြိုင်မြို့နယ်အတွင်း လူဦးရေ ၃,၀၀၀ ဝန်းကျင်စစ်ရှောင်နေရတယ်လို့လည်း အထက်ပါဒေသခံကဆက်ပြောပါတယ်။

ပြီးခဲ့တဲ့ ဒီဇင်ဘာ ၂၁ ရက်ကလည်း မြိုင်မြို့နယ်၊ ဘုန်းကြီးကန်ရွာကို စစ်ကော်မရှင်တပ်က ဂျိုက်‌ရိုကော်ပတာပေါ်ကနေ ပစ်ခတ်ခဲ့တာကြောင့် အမျိုးသမီး ၁ ဦးသေဆုံးခဲ့ပါသေးတယ်။

စာတည်း – လင်း

မြေလတ်အသံ၊ သြဂုတ် ၃၀၊ ၂၀၂၅။

စစ်ကိုင်းတိုင်း၊ မြင်းမူမြို့နယ်နဲ့ မကွေးတိုင်း၊ မြိုင်နဲ့ ဆောမြို့နယ်အတွင်းကို စစ်ကော်မရှင်တပ်က သြဂုတ် ၃၀ ရက်ဒီကနေ့မှာ ဗုံးကြဲတိုက်ခိုက်ခဲ့တာကြောင့် ဒေသခံထိခိုက်သေဆုံးမှုတွေ ရှိခဲ့တယ်လို့ ဒေသခံတွေဆီက သိရပါတယ်။

မြင်းမူမြို့နယ်၊ ငါးကင်းမြောက်ရွာကို ဒီနေ့လယ် ၂ နာရီဝန်းကျင်မှာ စစ်ကော်မရှင်တပ်က ပါရာမော်တာ ၁ စီးနဲ့ဗုံးသီး ၂ လုံးကြဲချခဲ့ရာ အသက် ၃၀ အရွယ်နဲ့ ၅၀ အရွယ် အမျိုးသား ၂ ဦးသေဆုံးပြီး နောက်ထပ် ဒေသခံ ၁၀ ဦးလည်းထိခိုက်ဒဏ်ရာရခဲ့တယ်လို့ ဆိုပါတယ်။

“ရမ်းသမ်းပစ်တာ ၂ လုံးချသွားတာ။ ၁၂၀ မမ ထင်တယ်၊ ထိတာရောက ပြည်သူတွေချည်း။ စစ်ကြောင်းလည်းမရှိတော့ မရှောင်ဘူးဗျ အေးဆေးဖြစ်နေတာကိုလာချတာ”လို့ ဒေသခံတဦးကပြောပါတယ်။

ငါးကင်းမြောက်ကျေးရွာမှာ အိမ်ခြေ ၆၀၀ ကျော်ရှိပြီး ဗုံးကြဲတိုက်ခိုက်တာဟာ ဒီတကြိမ် ပထမဆုံးအကြိမ်ဖြစ်ပြီး ထိခိုက်ဒဏ်ရာရသူတွေနဲ့ပတ်သက်တဲ့အခြေအနေတွေကိုတော့ မြေလတ်အသံက ဆက်လက်စုံစမ်းနေပါတယ်။

အလားတူ မြိုင်မြို့နယ်၊ လယ်တီကျေးရွာကိုလည်း စစ်ကော်မရှင်တပ်က ဒီမနက် ၁၀ နာရီဝန်းကျင်မှာ ပါရာမော်တာ ၁ စီးနဲ့ ၂ ကြိမ် ဗုံးကြဲတိုက်ခိုက်ခဲ့တာကြောင့် အသက် ၆၀ အရွယ် အမျိုးသမီး ၁ ဦး မစိုးရိမ်ရဒဏ်ရာရခဲ့တယ်လို့ နောက်ထပ်ဒေသခံတဦးက ပြောပါတယ်။

“အသက်ကြီးပိုင်း အဖွားအို ၁ ဦးထိတာရှိပါတယ်၊ အိမ်မွေးတိရစ္ဆာန်တွေဖြစ်တဲ့ ဝက် ၁ ကောင်သေပြီး ၃ ကောင် ဒဏ်ရာပြင်းထန်ပါတယ်။ (အဖွားအိုက) မစိုးရိမ်ရဒဏ်ရာပါ။ ရွာအပြင်ပါ နေအိမ်နဲ့ဝေးပါတယ် အဖွားအို ထိတာက ကွဲတဲ့အစလာထိတာ”လို့ ဆိုပါတယ်။

ဒါ့အပြင် ဆောမြို့နယ်ထဲကိုလည်း ဒီမနက် ၁၀ နာရီဝန်းကျင်မှာ ဂျက်ဖိုက်တာ ၂ စီးနဲ့ ဗုံးကြဲတိုက်ခိုက်ခဲ့ပြီး ထိခိုက်သေဆုံးမှုတွေတော့ မရှိခဲ့ဘူးလို့ သိရပါတယ်။

သြဂုတ်လဆန်းပိုင်းကစလို့ စစ်ကော်မရှင်တပ်ဟာ စစ်ကိုင်း၊ မကွေးတိုင်းက ကျေးရွာတွေကို မြေပြင်အင်အားသုံးစစ်ကြောင်းထိုးတာအပြင် လေကြောင်းကနေပါဗုံးကြဲတိုက်ခိုက်မှုတွေကို ခပ်စိပ်စိပ် လုပ်ဆောင်လျှက်ရှိနေပြီး ဒေသခံတွေလည်း ထိခိုက်သေဆုံးမှုတွေရှိနေပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ သြဂုတ် ၂၉ ရက်ထိ စစ်ကော်မရှင်တပ်နဲ့ လက်အောက်ခံတွေကြောင့် သေဆုံးခဲ့ရတဲ့ပြည်သူစုစုပေါင်း ၇,၁၅၉ ဦးရှိတယ်လို့ နိုင်ငံရေး အကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း

နတ်မောက်၊ ဩဂုတ် ၃၀၊ ၂၀၂၅။

မကွေးတိုင်း၊ နတ်မောက်မြို့နယ်၊ ကံသာကျေးရွာ၊ စက်တောကျေးရွာ၊ ကျောက်အိုးကျေးရွာကြားရှိ ဒေသအခေါ် သနပ်ပေါက်ကျောတဲတိုက်တွေအတွင်းကို စက်တပ်လေထီးနဲ့ ဗုံးကြဲခံရလို့ အမျိုးသမီး ၁ ဦးသေဆုံးပြီး ဖခင်ဖြစ်သူဒဏ်ရာရတယ်လို့ နတ်မောက်မြို့နယ်ပြည်သူ့ကာကွယ်ရေးအဖွဲ့ တာဝန်ခံဆီက သိရပါတယ်။

ဩဂုတ် ၃၀ ရက်မနက် ၉ နာရီကျော်မှာ မိတ္ထီလာဘက်ကတက်လာတဲ့ စက်တပ်လေထီး ၄ စီးထဲက ၁ စီးက ဗုံး ၄ လုံးကြဲချခဲ့ချိန် သနပ်ပေါက်ကျောတဲတိုက်မှာနေထိုင်ပြီး စိုက်ပျိုးရေးလုပ်နေကြတဲ့ သားအဖ ၂ ဦးကို ဗုံးစထိမှန်ပြီး ထိခိုက်သေဆုံးခဲ့ကြတာပါ။

“ဖအေက လယ်ထဲတဲဘေးမှာ ငရုပ်ခင်းဆေးဖြန်းနေတာ။ သမီးဖြစ်သူက ပေါင်းပေါက်နေချိန်မှာ ထိတာ။ အဲ့နားကတော်လှန်ရေးအဖွဲ့လည်းမရှိဘူး။ တိုက်ပွဲဖြစ်တာမရှိဘူး။ စစ်ကြောင်းထိုးတာလည်း မရှိဘူး”လို့ နတ်မောက်မြို့နယ်ပကဖ တာဝန်ခံကပြောပါတယ်။

ဗုံးထိမှန်တာကြောင့် အသက် ၂၆ နှစ်အရွယ် မအေးမာစိုးမှာ ဦးခေါင်းနဲ့နံကြားဗုံးစမှန်ပြီးနေရာတင်သေဆုံးသွားသလို ဖခင်ဖြစ်သူ အသက် ၅၀ အရွယ် စောလင်းဆိုသူမှာလည်း နောက်ကျောပေါက် ဒဏ်ရာရသွားတယ်လို့ ဆိုပါတယ်။

ဒါ့အပြင် နွား ၁ ကောင်သေဆုံးပြီး သူတို့နေထိုင်တဲ့ တဲ ၁ လုံး ပျက်စီးသွားတယ်လို့သိရကာ ဦးစောလင်း ကိုတော့ နီးစပ်ရာဆေးခန်းကိုပို့ဆောင်ပြီး ဆေးကုသမှုပေးနေတယ်လို့ သိရပါတယ်။

ပြီးခဲ့တဲ့ ဩဂုတ် ၂၄ ရက်ညပိုင်းကလည်း နတ်မောက်မြို့နယ်၊ လဲ့ဘူးကျေးရွာကို စစ်ကော်မရှင်တပ်က လေကြောင်းကနေဗုံးကြဲခဲ့တာကြောင့် ကလေးငယ် ၂ ဦးအပါအဝင် ၅ ဦးသေဆုံးပြီး ၁၁ ဦး ဒဏ်ရာရခဲ့သေးတယ်လို့ သိရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ သြဂုတ် ၂၉ ရက်ထိ စစ်ကော်မရှင်တပ်နဲ့ လက်အောက်ခံတွေကြောင့် သေဆုံးခဲ့ရတဲ့ပြည်သူစုစုပေါင်း ၇,၁၅၉ ဦးရှိတယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း

အောင်လံ၊ မေ ၅၊ ၂၀၂၅။

မကွေးတိုင်း၊ အောင်လံမြို့နယ်၊ ကန်သာယာကျေးရွာကို စစ်ကောင်စီတပ်က ၂ ရက်ဆက် ဗုံးကြဲခံရတာကြောင့် ဒေသခံ ၄ ဦးထိခိုက်ပြီး နေအိမ် ၁၀ လုံးကျော်ပျက်စီးခဲ့တယ်လို့ ရွာနဲ့ နီးစပ်သူတွေဆီက သိရပါတယ်။

မေ ၃ ရက်နေ့လယ် ၁ နာရီခန့်မှာ ဂျက်ဖိုက်တာ ၁ စီးက ကန်သာယာကျေးရွာထဲကို ပေါင် ၂၀၀ ဗုံး ၂ လုံးကြဲချခဲ့ရာ ကျေးရွာအရှေ့ဘက်ကိုကျပြီး နေအိမ် ၃ လုံးပျက်စီးခဲ့ပါတယ်။

မေ ၄ ရက်ည ၇ နာရီ ၄၅ မိနစ်ခန့်မှာလည်း Y 12 လေယာဥ်နဲ့ ၆၀ မမ ဗုံးသီး အလုံး ၂၀ ခန့်ကြဲချခဲ့ရာ ကျေးရွာထဲ ၆ လုံးကျရောက်ပေါက်ကွဲပြီး ကျန်ဗုံးသီးတွေက ကျေးရွာအပြင်ဘက်ကို ကျရောက်ပေါက်ကွဲတာတွေရှိခဲ့တယ်လို့ ဆိုပါတယ်။

“ကန်သာယာမှာက ဗုံးသီးအလုံး ၂၀ လောက်ချသွားတာဆိုတော့ အိမ်တွေထိခိုက်တာ၊ ပျက်တာ လန်တာပျံတာတွေရှိတယ်။ လူထိခိုက်တာလည်းရှိတယ်။ အိမ်တွေဆို ထရံပေါက်တာတွေပါဆို ၁၀ လုံးလောက်ရှိမယ်”လို့ ရွာနဲ့နီးစပ်သူတဦးက ပြောပါတယ်။

ဗုံးကျပေါက်ကွဲလို့ အသက် ၁၆ နှစ် နဲ့ ၂၀ နှစ်အရွယ် အမျိုးသား ၂ ဦး၊ ၄၀ ကျော်အရွယ် အမျိုးသား ၂ ဦး စုစုပေါင်း ၄ ဦး မစိုးရိမ်ရဒဏ်ရာရသွားပြီး နွား ၄ ကောင်သေဆုံးခဲ့တယ်လို့ ဆိုပါတယ်။

အိမ်ခြေ ၁၂၀ ခန့်ရှိတဲ့ကန်သာယာရွာဟာ ခုလိုလေကြောင်းကဗုံးကြဲခံရတာ ပထမဆုံးအကြိမ်ဖြစ်ပြီး လက်ရှိမှာ ဒေသခံ ၄၀၀ ခန့်လည်း ဘေးလွတ်ရာကျေးရွာတွေဘက်ကို ထွက်ပြေးတိမ်းရှောင်နေရပါတယ်။

စာတည်း – လင်း

ရွှေဘို၊ ဧပြီ ၃၀၊ ၂၀၂၅ ။

စစ်ကိုင်းတိုင်း၊ ရွှေဘိုမြို့နယ်၊ ကွေ့တက်ကြီးကျေးရွာမှာ နေအိမ်ထဲ ဒရုန်းဗုံးကျပေါက်ကွဲလို့ မိသားစုဝင် ၃ ဦးဒဏ်ရာရခဲ့တယ်လို့ ရွှေဘိုမြို့နယ်ပကဖထံက သိရပါတယ်။

ဧပြီ ၂၈ ရက် မနက် ၁၀ နာရီခန့်မှာ အဆိုပါကျေးရွာနဲ့ ၂ မိုင်ခန့်အကွာ မခေါက်ကျေးရွာမှာတပ်စွဲထားတဲ့ စစ်ကောင်စီတပ်နဲ့ပျူစောထီးတပ်ဖွဲ့ဝင်တွေက ကွေ့တက်ကြီးရွာကို ဒရုန်းနဲ့ ဗုံး ၁ လုံးချခဲ့ရာ ရွာခံ ဦးဘိုကြည် နေအိမ်ခြံဝန်းအတွင်း ကျရောက်ပေါက်ကွဲခဲ့တာလို့ ဆိုပါတယ်။

“ အဲ့ဒီ(မခေါက်)ရွာက ဒရုန်းတက်လာတာကို ဒေသခံတွေက မြင်လိုက်တယ်” လို့ မျက်မြင်ဒေသခံတွေရဲ့ ပြောပြချက်ကို ရွှေဘိုမြို့နယ်ပကဖတာဝန်ခံက ပြောပါတယ်။

ဒရုန်းဗုံးပေါက်ကွဲတာကြောင့် အသက် ၅၉ နှစ်အရွယ် ဦးဘိုကြည်မှာ ဝမ်းဗိုက်ဗုံးစမှန်၊ သားဖြစ်သူ အသက် ၁၆ နှစ်အရွယ် မောင်တရုတ်မှာ ညာဘက်ဒူးဗုံးစဖောက်ဝင်၊ တူမဖြစ်သူ အသက် ၂၂ နှစ်အရွယ် မငြိမ်းသဇင်ကျော်မှာ တင်ပါးဗုံးစမှန်ဒဏ်ရာ(မစိုးရိမ်ရ)တွေ အသီးသီးရရှိခဲ့တာကြောင့် နီးစပ်ရာဆေးခန်းမှာ ဆေးကုသမှုခံယူနေရပါတယ်။

” တိုက်ပွဲလည်းမရှိဘဲနဲ့ ပြည်သူကို ရည်ရွယ်ချက်ရှိရှိနဲ့ လာတိုက်ခိုက်တဲ့သဘောပါ” လို့ ရွှေဘိုမြို့နယ်ပကဖတာဝန်ခံက ပြောပါတယ်။

မခေါက်ကျေးရွာမှာ စစ်ကောင်စီတပ်လက်အောက်ပြည်သူ့စစ်(ပျူစောထီး)အင်အား ၄၀ ခန့်နဲ့ စစ်ကောင်စီတပ်ဖွဲ့ဝင် ၇ ဦးခန့် တပ်စွဲထားပြီး ယခင်ကလည်း ကွေ့တက်ကြီးကျေးရွာကို ဒရုန်းဗုံးချတိုက်ခိုက်မှုတွေ ရှိခဲ့တယ်လို့ ဆိုပါတယ်။

မတ် ၂၅ ရက်ကလည်း ရွှေဘိုမြို့၊ အမှတ် ၁ ရပ်ကွက်ရှိ အောင်ဇေယျစျေးထဲ စစ်တပ်ပစ်တဲ့ လက်နက်ကြီးကျလို့ ကလေးငယ်အပါအဝင် ၅ ဦးဒဏ်ရာရတယ်လို့ သိရပါတယ်။

ပုံစာ – စစ်ကောင်စီတပ်ဖွဲ့ ဒရုန်းအသုံးပြု လေ့ကျင့်နေ့စဉ်။ (Photo – PCT News)

စာတည်း – ဟိန်းစံ

ရေစကြို၊ ဧပြီ ၁၂၊ ၂၀၂၅။

မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသရှိ သာဂေါင်ကျေးရွာကို စစ်ကောင်စီတပ်က လေကြောင်းကနေဗုံးကြဲတိုက်ခိုက်ခဲ့တာကြောင့် ထိခိုက်ပျက်စီးမှုတွေရှိခဲ့တယ်လို့ ရေစကြိုမြို့နယ် ပြည်သူ့ကာကွယ်ရေးအဖွဲ့ဆီက သိရပါတယ်။

ဧပြီ ၁၂ ရက်ဒီနေ့မနက် ၁၀ နာရီလောက်မှာ မတ္ထီလာလေတပ်ဘက်ကလာတဲ့ ဂျက်ဖိုက်တာနဲ့ ဗုံး ၂ လုံးချ တိုက်ခိုက်ခဲ့တာလို့ဆိုပါတယ်။

“ပြည်သူအထိအခိုက် အသေအဆုံးတော့ မရှိခဲ့ဘူး၊ စာသင်ကျောင်းကို ပစ်မှတ်ထားပြီးတော့ ကြဲချ တိုက်ခိုက်သွားတာ၊ စာသင်ကျောင်းတော့ ပျက်ဆီးဆုံးရှုံးသွားတယ်။ ကျောင်းသားတွေနဲ့ ဆရာ၊ ဆရာမတွေကတော့ ကျောင်းပိတ်ရက်ဆိုတော့ ကျောင်းမှာမရှိဘူး၊” လို့ ရေစကြိုပြည်သူ့ကာကွယ်ရေး တပ်ဖွဲ့ သတင်းနဲ့ပြန်ကြားရေးတာဝန်ခံက ပြောပါတယ်။

တိုက်ခိုက်မှုကြောင့် စာသင်ကျောင်းနဲ့ ကျောင်းသုံးပရိဘောဂပစ္စည်းတွေပျက်သွားခဲ့ပြီး ပျက်စီးမှု အတိအကျကိုတော့ အတည်မပြုနိုင်သေးဘူးလို့ ဆိုပါတယ်။

သာဂေါင်ကျေးရွာကို ခုလိုဗုံးကြဲတိုက်ခိုက်ခံရတာ ၃ ကြိမ်မြောက်ဖြစ်ပြီး ပြီးခဲ့တဲ့ ဇန်နဝါရီလနဲ့ ဖေဖော်ဝါရီလထဲမှာလည်း စစ်ကောင်စီကဗုံးကြဲတိုက်ခိုက်ခဲ့သေးတယ်လို့ ဆိုပါတယ်။

ပြီးခဲ့တဲ့ ဇန်နဝါရီ ၁၆ ရက်မနက်အစောပိုင်းမှာ သာဂေါင်ကျေးရွာကို လေကြောင်းကနေ ပေါင် ၅၀၀ ဗုံး ၂ လုံး ကြဲချတိုက်ခိုက်ခဲ့တဲ့အတွက် အသက် ၁၆ နှစ်နဲ့ အသက် ၅၅ နှစ်အရွယ် အမျိုးသား ၂ ဦးတို့ သေဆုံးခဲ့ပါတယ်။

ဒါ့အပြင် ဖေဖော်ဝါရီ ၁၃ ရက် မနက်အစောပိုင်း ၂ နာရီခန့်မှာ ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် ကျေးရွာအနီးကျရောက်ပေါက်ကွဲပြီး အမျိုးသား ၁ ဦးဒဏ်ရာရကာ နေအိမ်တွေထိမှန် ပျက်စီးခဲ့တယ်လို့ ဒေသခံတွေဆီကသိရပါတယ်။

စာတည်း – လင်း

စစ်ကိုင်း၊ မေ ၂၀၊ ၂၀၂၃။

စစ်ကိုင်းတိုင်းဒေသကြီး၊ စစ်ကိုင်းမြို့နယ်၊ ညောင်ငုတ်တိုကျေးရွာရှိ စစ်သားနဲ့ပျူ ပူးပေါင်းတပ်စခန်း ဒရုန်းနဲ့ ဗုံးသီးချတိုက်ခိုက်ခံရတယ်လို့ သိရပါတယ်။

အင်အား ၅၀ လောက်နဲ့ အထိုင်ချတပ်စွဲထားတဲ့ အဲ့ဒီစခန်းကို မေလ ၁၈ ရက် နေ့လယ် ၂ နာရီခန့်မှာ ဒရုန်းအသုံးပြုပြီး ဗုံးသီး ၄ လုံးချ တိုက်ခိုက်ခဲ့တယ်လို့ Unicorn Guerrilla တာဝန်ရှိသူက ပြောပါတယ်။

“ရွာကတော့ ပျူရွာပဲ။ စကစနဲ့ပျူတွေက ရွာအပြင်ဘက်မှာ သီးသန့်စခန်းချထားပြီးနေတာ။ တခုက သူတို့ရွာက ပျုကော၊ စကစအဖွဲ့တွေက အခြားရွာတွေကို ဒုက္ခပေးတာနည်းတယ်။ သူတို့ဟာသူတို့ နေတာများတယ်။ ကြွယ်ပုံ(ရွာ)ဘက်က ပျူနဲ့စကစတွေလိုတော့မဟုတ်ဘူး။ ကျနော်တို့ဘက်က ဒီထက်ပိုပြီး စကစကို တိုက်ခိုက်နိုင်ဖို့ ကြိုးစားနေတယ်။ ပြီးခဲ့တဲ့ မစ်ရှင်တခုတုန်းက ဒရုန်းတစင်းပျက်ကျခဲ့ရလို့ ပြည်သူအကူအညီတွေလည်း လိုအပ်နေပါတယ်” လို့ ပြောပါတယ်။

တိုက်ခိုက်ချိန်အတွင်း စစ်သားနဲ့ပျူတွေဟာ စခန်းအဆောက်အဦးနဲ့ ကတုတ်ကျင်းတွေထဲကို ပြေးဝင်ပုန်းသွားတာတွေတွေ့ရကာ ထိခိုက်ဒဏ်ရာရသူတွေလည်း ရှိတယ်ဆိုပေမယ့် အရေအတွက်အတိအကျကိုတော့ မြေလတ်အသံက သီးခြားအတည်မပြုနိုင်သေးပါဘူး။

ဒရုန်းနဲ့ တိုက်ခိုက်ခံရပြီးနောက်မှာတော့ စစ်အုပ်စုဘက်က ၄၀ မမ အပါအဝင်လက်နက်ငယ်တွေနဲ့ ဒရုန်းလာရာ လမ်းကြောင်းကို လိုက်လံပစ်ခတ်တာတွေရှိခဲ့ပေမယ့် ဒရုန်းတွေ ထိခိုက်တာမရှိဘူးလို့ သိရပါတယ်။

အဲဒီတိုက်ခိုက်မှုကိုတော့ Phoenix (SGG)၊Unicorn Guerrilla၊ Fight For Federal၊ Young Wolf၊ Sadaung Revolution Army၊ အညာသာလေး(SGG)၊ စစ်ကိုင်းခရိုင် တပ်ရင်း(၇)၊ စစ်ကိုင်းမြို့နယ် ပကဖ တို့က ပူးပေါင်းတိုက်ခိုက်ခဲ့တာပါ။

ပြီးခဲ့တဲ့ မေလ ၁၀ ရက်ကလည်း စစ်ကိုင်းမြို့နယ်၊ ညောင်ပင်ဝန်းကျေးရွာနဲ့ နှုံတွင်းကျေးရွာကြားမှာ မိုင်းရှင်းပြီး ကင်းပုန်းဝပ်နေတဲ့ စစ်ကောင်စီအဖွဲ့ ဒရုန်းနဲ့တိုက်ခိုက်ခံရပြီး ၄ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း