လေယာဥ်သတိပေးချက်ကြောင့် လူထိခိုက်မှုမရှိခဲ့

တောင်သာ၊ မေ ၂၃၊ ၂၀၂၅။

မန္တလေးတိုင်း၊ တောင်သာမြို့နယ်၊ ရုံစဥ်လေးကျေးရွာကို မေ ၂၂ ရက်မှာ စက်တပ်လေထီးနဲ့ ဗုံးကြဲ တိုက်ခိုက်ခဲ့တာကြောင့် နေအိမ်တွေပျက်စီးခဲ့တယ်လို့ တောင်သာမြို့နယ်ပြည်သူ့ကာကွယ်ရေးအဖွဲ့ဆီ ကသိရပါတယ်။

မနက် ၅ နာရီလောက်မှာ စစ်ကောင်စီရဲ့စက်တပ်လေထီး ၅ စီးပေါ်ကနေ ဗုံး ၁၄ လုံးကြဲချခဲ့ရာ ရွာတောင်ပိုင်းနဲ့ အရှေ့မြောက်ပိုင်းက နေအိမ်တွေနဲ့ ဘုန်းကြီးကျောင်းထဲကျရောက်ပေါက်ကွဲခဲ့တာပါ။

ရုံစဥ်လေးရွာမှာ အိမ်တိုင်းနီးပါးဗုံးခိုကျင်းရှိပြီး လေကြောင်းအန္တရာယ်ကာကွယ်နိုင်ဖို့ ကြိုတင် ပြင်ဆင်ထားတာကြောင့် ဒေသခံတွေထိခိုက်သေဆုံးတာမရှိခဲ့ဘူးလို့ တောင်သာမြို့နယ်ပကဖ ပြန်ကြားရေးတာဝန်ခံကပြောပါတယ်။

“အဲဒီဘက်တွေက လေယာဥ်နဲ့ပတ်သက်ပြီး သတိဝီရိယထားကြတယ်။ ဗုံးခိုကျင်းတွေလည်း အိမ်တိုင်းရှိတယ်။ လေယာဥ်အချက်ပေးသံချောင်းခေါက်တာကလည်း တနယ်လုံးရှိတယ်။ ပါရာမိုတာ (စက်တပ်လေထီး) ပဲလာလာ၊ လေယာဥ်ပဲလာလာ သံချောင်းခေါက်အချက်ပေးကြတာ။ အဲ့တာကြောင့် လူထိခိုက်မရှိတာ။ ပါရာမိုတာလာချိန် အချက်ပေးသံချောင်းခေါက်လိုက်နိုင်လို့ လူတွေ ဗုံးခိုကျင်းထဲ ဝင်လိုက်နိုင်တာ”လို့ တောင်သာမြို့နယ်ပကဖ ပြန်ကြားရေးတာဝန်ခံကပြောပါတယ်။

ဒီတိုက်ခိုက်မှုအတွင်း ဒေသခံတွေထိခိုက်မှုမရှိပေမယ့် လူနေအိမ် ၅ လုံး၊ ဘုန်းကြီးကျောင်းဝင်းထဲရှိ သိမ် ၁ လုံးနဲ့ ကား ၁ စီးပျက်စီးခဲ့တယ်လို့ ဆိုပါတယ်။

ရုံးစဥ်လေးကျေးရွာဟာ အိမ်ခြေ ၂၀၀ ကျော် လူဦးရေ ၈၀၀ ဝန်းကျင်နေထိုင်တဲ့ရွာဖြစ်ပြီး ယခုဗုံးကြဲခံရတာက ဒုတိယအကြိမ်ဖြစ်တယ်လို့ အထက်ပါပြန်ကြားရေးတာဝန်ခံက ပြောပါတယ်။

ပြီးခဲ့တဲ့ ဇန်နဝါရီ ၅ ရက်ကလည်း အဲ့ဒီရွာကို စစ်ကောင်စီက စက်တပ်လေထီးနဲ့ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးပြီး ကလေးငယ် ၁ ဦးဒဏ်ရာရခဲ့သေးတယ်လို့ သိရပါတယ်။

ဉာဏ်လင်းသစ်သုသေသနအဖွဲ့ရဲ့ အစီရင်ခံစာအရ အခုနှစ် မေ ၉ ရက်ကနေ ၁၅ ရက်အတွင်း မန္တလေး၊ စစ်ကိုင်းနဲ့ ပဲခူး(အရှေ့) ဒေသများအပါအဝင် ဒေသ ၁၄ ခုမှာ အရပ်သားတွေအပေါ်ပစ်မှတ်ထားတဲ့ လေကြောင်းတိုက်ခိုက်မှု ၆၁ ခုရှိခဲ့ပြီး ဒီတိုက်ခိုက်မှုတွေကြောင့် အရပ်သား ၉၄ ဦးသေဆုံးကာ ၂၄၅ ဦးထိခိုက်ခဲ့တယ်လို့ သိရပါတယ်။

စာတည်း – လင်း

တောင်သာ၊ ဧပြီ ၂၁၊ ၂၀၂၅။

မန္တလေးတိုင်း၊ တောင်သာမြို့နယ်၊ သံဘို(ရွာသစ်)ကျေးရွာမှာ စက်တပ်လေထီးနဲ့ဗုံးကြဲခံရပြီး ကလေးငယ် ၁ ဦးအပါအဝင် ၃ ဦးသေဆုံးပြီး ၄ ဦးဒဏ်ရာရတယ်လို့ ဒေသခံတွေနဲ့တောင်သာပကဖဆီက သိရပါတယ်။

ဧပြီ ၂၁ ရက်မနက် ၂ နာရီ ၄၅ မိနစ်ခန့်မှာ မိတ္ထီလာလေတပ်ကနေ တက်လာတဲ့ စက်တပ်လေထီး ၃ စီးဟာ သံဘိုကျေးရွာကို ဒေသခံနေအိမ်တွေအပေါ် ဗုံး ၁၁ လုံးကြဲချခဲ့တယ်လို့ ဆိုပါတယ်။

“ပြည်သူအိမ်ခေါင်ပေါ်ကို တည့်တည့်ချတာ။ အပေါ်ကနေ စက်လက်တွေနဲ့လည်းကုတ်သွားတယ်။ သားအမိ ၂ ယောက်က ပွဲချင်းပြီး။ တအိမ်တည်းက ၅ ယောက်ထိတာ။ “လို့ ဒေသခံအမျိုးသမီးတဦးကပြောပါတယ်။

စက်တပ်လေထီးနဲ့ဗုံးကြဲခံရလို့ အသက် ၉ နှစ်ကျော်အရွယ် မအေးမြတ်စန္ဒာ၊ မိခင်ဖြစ်သူ အသက် ၄၀ အရွယ် မတူး၊ အသက် ၃၅ နှစ်အရွယ် ကိုကျော်သူလင်းတို့သေဆုံးခဲ့ပါတယ်။

ဒါ့အပြင် မသဲသဲဝေ၊ ကိုဝင်းကျော်ရှိန်း၊ မတင့်တင့်ထွန်း၊ မေသက်နှင်းဦးတို့ ၄ ဦးဒဏ်ရာရခဲ့ပြီး ဆေးကုသဖို့ နီးစပ်ရာဆေးရုံကို ပို့ထားရသလို နေအိမ် ၂ လုံးပျက်စီးပြီး နွား ၂ ကောင်သေဆုံးခဲ့တယ်လို့ သိရပါတယ်။

ထိခိုက်သေဆုံးသူတွေကိုတော့ ဒီနေ့မှာပဲ မြေချသင်္ဂြိုဟ်နိုင်ဖို့ စီစဥ်လုပ်ဆောင်နေကြတယ်လို့ ဆိုပါတယ်။

“နေအိမ်ပေါ်တည့်တည့်ကျတာ ဗုံးက။ မနက်အစောကြီးဆိုတော့ တိုက်ပွဲဖြစ်တာလည်းမရှိဘူး။ ရွာမှာ တော်လှန်ရေးအဖွဲ့တွေနေတာမရှိဘူး။ ဖြတ်သွားဖြတ်လာသဘောလောက်ဘဲရှိတာ။ ရွာကိုတမင်သက်သက်ဗုံးချတဲ့သဘောပါ”လို့ တောင်သာမြို့နယ်ပကဖ ပြန်ကြားရေးတာဝန်ခံကပြောပါတယ်။

သံဘိုကျေးရွာက လေကြောင်းကနေ ဗုံးကြဲခံရတာ ၃ ကြိမ်မြောက်ဖြစ်ပြီး အရင် ကြဲခံရချိန်မှာတော့ လူထိခိုက်တာမျိုးတွေမရှိဘဲ တောစပ်နားတွေကျတာကြောင့် နေအိမ်အချို့ဘဲ ပျက်စီးမှုရှိခဲ့တယ်လို့ သိရပါတယ်။

သံဘိုကျေးရွာက အိမ်ခြေ ၆၄ အိမ်ရှိပြီး လူဦးရေ ၂၀၀ ကျော်နေထိုင်ကာ ဗုံးကြဲခံရတာကြောင့် ရွာခံအချို့ကတော့ ယနေ့မနက်ပိုင်းမှာမြို့ပေါ်ပြောင်းရွေ့တာရှိပြီး အများစုကတော့ ရွာက ဗုံးခိုကျင်းတွေမှာ ပုန်းအောင်းနေထိုင်နေကြတယ်လို့ ဆိုပါတယ်။

ဧပြီ ၁၈ ရက်ကလည်း တောင်သာမြို့နယ်၊ နန်းတည်ကျေးရွာပေါ်ကို ဂျက်ဖိုက်တာနဲ့ဗုံးကြဲခံရလို့ ပြည်သူ ၂ ဦးသေဆုံးပြီး ၅ ဦးဒဏ်ရာရကာ နေအိမ် ၇ လုံးပျက်စီးခဲ့တယ်လို့ သိရပါတယ်။

တောင်သာ၊ မတ် ၁၁၊ ၂၀၂၅။

မန္တလေးတိုင်း၊ တောင်သာမြို့နယ်၊ အေးကြင်းကျေးရွာနဲ့ ဇရပ်ကြီးကျေးရွာမှာ လေကြောင်းကနေ ဗုံးကြဲတိုက်ခိုက်ခံရတာကြောင့် ဒေသခံ ၁ ဦးသေဆုံးပြီး ၁ ဦးဒဏ်ရာရတယ်လို့ တောင်သာမြို့နယ် ပြည်သူ့ကာကွယ်ရေးအဖွဲ့ဆီက သိရပါတယ်။

မတ် ၁၀ ရက်ညနေ ၃ နာရီကျော်မှာ အေးကြင်းကျေးရွာကို စစ်ကောင်စီဘက်က ဂျက်ဖိုက်တာနဲ့ ဗုံး ၂ လုံးချတိုက်ခိုက်ခဲ့ရာ ကျေးရွာဘုရားဝန်းအတွင်းရှိ ဓမ္မာရုံပေါ်ကို ကျရောက်ပေါက်ကွဲခဲ့ပြီး ဖုန်းသုံးနေတဲ့ အသက် ၁၆ နှစ်အရွယ် အမျိုးသမီးငယ် ၁ ဦးသေဆုံးကာ အသက် ၃၀ ကျော်အရွယ် အမျိုးသား ၁ ဦးဒဏ်ရာရခဲ့ပါတယ်။

ဒ့ါအပြင် မတ် ၁၁ ရက်မနက် ၁ နာရီခန့်မှာလည်း ဇရပ်ကြီးကျေးရွာကို စစ်ကောင်စီတပ်ဖွဲ့ဝင်တွေဘက်က စက်တပ်လေထီး ၃ စီးနဲ့ ဗုံး ၈ လုံးကြဲချခဲ့ရာမှာ လူထိခိုက်မရှိဘဲ နေအိမ် ၅ လုံးထက်မနည်းပျက်စီးခဲ့တယ်လို့ ဆိုပါတယ်။

“ဇရပ်ကြီးမှာက အချိန်မရှိမှလာကြဲသွားတာ။ ပါရာမိုတာနဲ့ လာကြဲသွားတာ။ တိုက်ပွဲမဖြစ်ဘူး။ စကစဘက်က လေကြောင်းကနေ လာကြဲတာပဲ။ အေးကြင်း က ညနေပိုင်းဂျက်ဖိုက်တာနဲ့ချတာ။ ဓမ္မာရုံပေါ်ကျတာ။ ဖုန်းသုံးနေသူတွေထိတာ”လို့ တောင်သာမြို့နယ်ပြည်သူ့ကာကွယ်ရေးအဖွဲ့ တာဝန်ခံကပြောပါတယ်။

အေးကြင်းကျေးရွာနဲ့ ဇရပ်ကြီးကျေးရွာဟာ ၁၀ မိုင်ကွာဝေးပြီး ဗုံးကြဲချချိန်နေအိမ်တွေရှိ ဗုံးခိုကျင်းတွေမှာ ပုန်းအောင်နေထိုင်နေကြပြီး ကျေးရွာကနေထွက်ပြေးတိမ်းရှောင်တာမျိုးမရှိဘူးလို့ ဆိုပါတယ်။

ဇရပ်ကြီးကျေးရွာမှာ အိမ်ခြေ ၁,၄၀၀ ကျော် လူဦးရေ ၆,၀၀၀ ကျော်ရှိပြီး ၂၀၂၃ ခုနှစ်အတွင်းက ရွာထဲကို စစ်ကောင်စီတပ်တွေစစ်ကြောင်းထိုးမီးရှို့တဲ့အတွက် နေအိမ် ၅ လုံးမီးလောင်ပျက်စီးခဲ့ပါတယ်။

ဒါ့အပြင်အိမ်ခြေ ၁၅၀ ခန့် လူဦးရေ ၅၀၀ ရှိတဲ့ အေးကြင်းရွာမှာလည်း ခုလိုတိုက်ခိုက်ခံရတာဟာ ပထမဆုံးအကြိမ်ဖြစ်တယ်လို့ ဆိုပါတယ်။

တောင်သာမြို့နယ်ထဲကို စစ်ကောင်စီဘက်က စက်တပ်လေထီး၊ ဂျက်ဖိုက်တာတွေနဲ့မကြာခဏ ဗုံးကြဲနေလို့ လေကြောင်းအန္တရာယ်သတိထားကြဖို့ ဒေသကာကွယ်ရေးတပ်ဖွဲ့တွေက သတိပေးနှိုးဆော်မှုတွေပြုလုပ်ထားပါတယ်။

မတ် ၄ ရက်နေ့ကလည်း တောင်သာမြို့နယ်၊ နတ်စောင့်ကျေးရွာမှာ လေကြောင်းကနေ ဗုံးကြဲခံရလို့ ဒေသခံ ၆ ဦးသေဆုံးပြီး နေအိမ် ၃၀ နီးပါးမီးလောင်ပျက်စီးခဲ့ပါသေးတယ်။

နိုင်ငံရေးအကျဥ်သားများကူညီစောင့်ရှောက်ရေး – AAPP ရဲ့အစီရင်ခံစာအရ ၂၀၂၁ စစ်အာဏာ သိမ်းချိန်ကနေ ၂၀၂၅ မတ်လ ၁၀ ရက်ထိ စစ်ကောင်စီတပ်နဲ့ ၎င်းတို့ရဲ့လက်ပါးစေတွေ ကြောင့် သေဆုံးခဲ့တဲ့ပြည်သူစုစုပေါင်း ၆,၃၈၉ ဦးရှိပြီလို့ သိရပါတယ်။

စာတည်း – လင်း

တောင်သာ၊ မတ် ၅၊ ၂၀၂၅။

မန္တလေးတိုင်း၊ တောင်သာမြို့နယ်၊ နတ်စောင့်ကျေးရွာမှာ လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံ ၆ ဦးသေဆုံးပြီး နေအိမ် ၃၀ နီးပါးမီးလောင်ပျက်စီးခဲ့တယ်လို့ တောင်သာမြို့နယ်ပြည်သူ့ကာကွယ်ရေးအဖွဲ့ရဲ့ ပြန်ကြားရေးတာဝန်ခံဆီက သိရပါတယ်။

မတ် ၄ ရက်ည ၁၀ နာရီ ၃၀ မိနစ်ခန့်မှာ စစ်ကောင်စီတပ်ဖွဲ့ဝင်တွေဘက်က ဂျက်ဖိုက်တာ ၁ စီးနဲ့ နတ်စောင့်ကျေးရွာထဲကို ဗုံး ၁ လုံးကြဲချခဲ့ရာ လူနေအိမ်တွေအကြား ကျရောက်ပေါက်ကွဲခဲ့တာလို့ ဆိုပါတယ်။

“ချတာက ၁ လုံးတည်း။ မိသားစု ၁ စုဆို အိမ်ပေါ်တည့်တည့်ကျတာလားမသိဘူး ဘော်ဒီကိုမရဘူး။ အရိုးစုပဲရတော့သံပုံးထဲ ထည့်ထားရတယ်။ မနက်လင်းမှ ကောက်ရတာဆိုတော့ တညလုံး လောင်ကျွမ်းထားတဲ့အခြေအနေကြောင့်လားမသိဘူး။”လို့ တောင်သာမြို့နယ် ပြည်သူ့ကာကွယ်ရေးအဖွဲ့ ပြန်ကြားရေးတာဝန်ခံကပြောပါတယ်။

ဗုံးကြဲခံရလို့ အသက် ၇၀ ကျော်အရွယ် ဦးညွန့်ရီ၊ အသက် ၁၃ နှစ်အရွယ် ယေကျ်ားလေး ၁ ဦး၊ အသက် ၄၀ ဝန်းကျင်ရှိ အမျိုးသမီး ၄ ဦး စုစုပေါင်း ၆ ဦးသေဆုံးသွားတယ်လို့ ဆိုပါတယ်။

အဲ့ဒီထဲမှာ အသက် ၁၃ နှစ်အရွယ် ယောကျ်ားလေး ၁ ဦးနဲ့ အမျိုးသမီး ၄ ဦးက မိသားစုဝင်တွေဖြစ်တယ်လို့ သိရပါတယ်။

ဒါ့အပြင်နေအိမ် ၃၀ နီးပါး မီးလောင်ကျွမ်းခဲ့ကာ မတ် ၅ ရက်ဒီမနက်ပိုင်းထိ ဒေသခံတွေက မီးငြှိမ်းသတ်နေရတယ်လို့ ဆိုပါတယ်။

ပြီးခဲ့တဲ့ဖေဖော်ဝါရီ ၆ ရက် ညနေ ၃ နာရီကျော်ခန့်မှာ ညောင်ချောင်းကျေးရွာကို စစ်ကောင်စီဘက်က Y 12 လေယာဉ်နဲ့ကင်းထောက်ပြီးနောက် ဂျက်ဖိုက်တာနဲ့ ဗုံး ၂ လုံးကြဲချခဲ့ရာ နေအိမ် ၅ လုံးပျက်စီးခဲ့ပါတယ်။

အလားတူ ဖေဖော်ဝါရီ ၃ ရက်ကလည်း တောင်သာမြို့နယ်၊ ရုံးစည်ကြီးကျေးရွာမှာ လေကြောင်းနဲ့ ပစ်ခံရလို့ နေအိမ် ၄ လုံးထိခိုက်ပျက်စီးခဲ့ပြီး သံဃာ ၁ ပါးနဲ့အမျိုးသား ၁ ဦးလည်း ထိခိုက်ဒဏ်ရာရခဲ့သေးတယ်လို့ သိရပါတယ်။

စာတည်း – လင်း

မန္တလေး၊ ဖေဖော်ဝါရီ ၂၀၊ ၂၀၂၅။

မန္တလေးတိုင်း၊ တောင်သာမြို့နယ်က စစ်ကောင်စီတပ်ဖွဲ့ဝင်တွေနဲ့ ပျူစောထီးတွေတပ်စွဲထားတဲ့ ထနောင်းကုန်းရွာ ပျူစောထီးစခန်းကို ဒေသခံကာကွယ်ရေးပူးပေါင်းတပ်ဖွဲ့တွေက ဖေဖော်ဝါရီ ၁၉ ရက်မနေ့က တိုက်ခိုက်ခဲ့ကြတယ်လို့ Pakokku Underground Force အဖွဲ့ဆီက သိရပါတယ်။

စစ်ကောင်စီတပ်ဖွဲ့ဝင်တွေနဲ့ ပျူစောထီးအင်အား ၅၀ ၀န်းကျင်ရှိတဲ့ တောင်သာမြို့နယ်၊ ထနောင်းကုန်းရွာ ပျူစောထီးစခန်းကို မနက် ၅ နာရီ ၄၉ မိနစ်ကနေ ၁ နာရီခွဲကြာအောင် တိုက်ခိုက်ခဲ့တာလို့ ဆိုပါတယ်။

တိုက်ခိုက်မှုအတွင်း စစ်ကောင်စီတပ်ဘက်က ၂ ဦးသေဆုံးပြီး ဘန်ကာအချို့ပျက်စီးခဲ့တယ်လို့ ဆိုပါတယ်။

“မျက်မြင် အလောင်း ၂ လောင်းတွေ့ရှိရတယ်၊ အကုန်လုံးတော့ မသိမ်းနိုင်ခဲ့ဘူး။ Mi 35 ၁ စီးက မိနစ် ၃၀ အကြာ ကာပစ်ပေးသွားတာကြောင့်ပါ။ ကျနော်တို့သိရှိရတာကတော့ မုံရွာ နမခ ကနေ တက်လာတာ။ ကျ‌နော်တို့ ဘန်ကာအချို့ကိုတော့ သိမ်းနိုင်ခဲ့တယ်၊ အတွင်းစည်းအထိတော့ သိမ်းပိုက်တိုက်ခိုက်နိုင်ခဲ့တယ်။”လို့ Pakokku Underground Force တပ်ဖွဲ့၀င် ကံကောင်းက ပြောပါတယ်။

ပျူစောထီးစခန်းတိုက်ခိုက်ပြီးနောက် စစ်တပ်ထုတ် ကာဘိုင် ၂ လက်၊ KIA ထုတ် KA ၁ လက်၊ ပွိုင့် ၂၂ လက်လုပ် အတို ၂ လက်၊ MG 1 လက်ပစ်ဗုံး ၁ လုံး၊ ကာဘိုင် ကျည်ဘောက် ၄ ခု၊ ကာဘိုင်ကျည် ၁၀၅ တောင့်၊ ပွိုင့် ၂၂ ကျည် ၈ တောင့် ၊ စစ်ဦးထုပ် ၂ လုံး၊ ဖုန်း ၃ လုံး၊ အင်ဗာတာအသေး ၁ လုံး ၊ ပိုက်ဆံ ၁,၅၂၀၀ ကျပ်၊ သေနတ်ပစ်ပြိုင်ပွဲဝင်ဆုတံဆိပ် ၆ ခု တို့ကို သိမ်းဆည်းရခဲ့တယ်လို့ သိရပါတယ်။

စစ်ကောင်စီဘက်က သေဆုံးတဲ့စစ်သားအလောင်းတွေကို ‌မနေ့ကညနေ မှာသင်္ဂြိုဟ်ပြီး ပျက်စီးသွားတဲ့ဘန်ကာအချို့ကို ပြုပြင်မှုတွေလုပ်နေတယ်လို့သိရ‌ကြောင်း ပြောပါတယ်။

ဒီတိုက်ခိုက်မှုကို Pakokku Underground Force၊ မန်းဘခိုင် (BNU) ပြည်သူ့လွတ်မြောက်ရေးတပ်မတော်နဲ့ မဟာမိတ်တပ်ဖွဲ့ တို့က ပူးပေါင်းလုပ်ဆောင်ခဲ့တာလို့ သိရပါတယ်။

စာတည်း – လင်း