တိုက်ခိုက်မှု

မြေလတ်အသံ၊ ဇွန် ၂၁၊ ၂၀၂၅။

မကွေးတိုင်း၊ ငဖဲမြို့နယ်၊ အမ်း – ပဒါန်းလမ်းပိုင်းနံဘေးက နတ်ရေကန်တောင်ဗျူဟာစခန်းကုန်းရဲ့ ကာကင်းစခန်းတခုကို တော်လှန်ရေးပူးပေါင်းအဖွဲ့တွေက တိုက်ခိုက်ဖျက်ဆီးနိုင်ခဲ့တယ်လို့ CDF-Asho က ပြောပါတယ်။

ဇွန် ၂၀ ရက်မနက် ၇ နာရီကျော်မှာ တပ်မ ၉၉ လက်အောက် စစ်အင်အား ၃၀ ခန့်ရှိ ခွန်ဇူရွာလမ်းခွဲအနီး ကာကင်းစခန်းကို တိုက်ခိုက်ခဲ့တာဖြစ်ပြီး တိုက်ပွဲအတွင်း စစ်ကောင်စီတပ်ဖွဲ့ဝင် ၁ ဦးသေဆုံးပြီး ၁ ဦးအရှင်ဖမ်းမိခဲ့တယ်လို့ ဆိုပါတယ်။

” စခန်းကိုဖျက်ဆီးနိုင်ခဲ့တယ်။ စခန်းက စကစတွေကတော့ ကာကင်းစခန်းအနီး မီတာ ၁,၀၀၀ကျော်အကွာ ပဇီရွာဘက်ကိုထွက်ပြေးသွားခဲ့ကြတယ်” လို့ CDF-Asho တာဝန်ခံ ဆလိုင်းရိုးချင်းက မြေလတ်အသံကို ပြောပါတယ်။

တိုက်ပွဲဖြစ်ပြီးနောက် စခန်းအတွင်း ရှင်းလင်းရေးလုပ်ဆောင်ချိန် MA အမျိုးအစားလက်နက်ငယ် ၅ လက်၊ BA 100 ကွန်မန်ဒိုစိန်ပြောင်း ၁ လက်နဲ့အတူ ခဲယမ်းအများအပြား သိမ်းဆည်းရမိခဲ့တယ်လို့ ဆိုပါတယ်။

အဆိုပါကာကင်းစခန်းတိုက်ပွဲကို လူ့ဘောင်သစ်တပ်မတော်-NSA၊ အရှိုချင်းကာကွယ်ရေးတပ်-ACDF ၊ CDF-Asho မဟာမိတ် ၃ ဖွဲ့ကပူးပေါင်း တိုက်ခိုက်ခဲ့တာဖြစ်ပြီး တိုက်ပွဲအတွင်း CDF-Ashoမှ ရဲဘော် ၁ ဦး မစိုးရိမ်ရဒဏ်ရာရရှိခဲ့တယ်လို့ သိရပါတယ်။

ငဖဲမြို့နယ်အတွင်းမှာ CDF-Asho က နတ်ရေကန်လမ်းဟောင်းကို ဖြတ်တောက်တိုက်ခိုက်ရေးလုပ်ဆောင်နေချိန် ဇွန် ၁၂ ရက်ကနေ ၁၄ရက်အထိ ၃ ရက်တာအတွင်းမှာလည်း စစ်ကောင်စီတပ်သား ၁၄ ဦးအရှင်ဖမ်းမိခဲ့တယ်လို့ သိရပါတယ်။

နတ်ရေကန်တောင်ဗျူဟာကုန်းစခန်းကို အာရက္ခတပ်တော်-AA နဲ့ ပူးပေါင်းတပ်ဖွဲ့တွေက ထိုးစစ်ဆင်တိုက်ခိုက်ဖို့လုပ်ဆောင်နေပြီး လက်ရှိမှာအဆိုပါ စခန်းပတ်လည်ကို ဝိုင်းဝန်းပိတ်ဆို့ထားကာ အဲ့ဒီဗျူဟာကုန်းနဲ့ ၁ မိုင်ခန့်အကွာက အဓိကကာကင်းစခန်းကြီးတခုဖြစ်တဲ့ တာဝါတိုင်စခန်းကိုလည်း ဇွန် ၃ ရက်မှာ အပြီးသတ်သိမ်းပိုက်ရရှိထားပါတယ်။

စာတည်း – ဟိန်းစံ

စစ်ကိုင်း၊ ဇွန် ၆၊ ၂၀၂၃။

စစ်ကိုင်းတိုင်းဒေသကြီး၊ ပုလဲမြို့နယ်၊ ဇီးဖြူကုန်းကျေးရွာမှာ အင်အား ၅၀ ကျော်နဲ့ တပ်စွဲထားတဲ့ စစ်အုပ်စုစခန်း တိုက်ခိုက်ခံရပြီး ၁၀ ဦးထက်မနည်း သေဆုံးခဲ့တယ်လို့ သိရပါတယ်။

ဇွန်လ ၅ ရက် မနက် ၃ နာရီလောက်မှာ စစ်သား၊ ရဲနဲ့ပျူစောထီးတွေ စုဖွဲ့နေထိုင်တဲ့ ဇီးဖြူကုန်းစခန်းကို PDF ပူးပေါင်းအဖွဲ့တွေက လက်နက်ကြီး၊ လက်နက်ငယ်တွေနဲ့ ၂ နာရီကျော်ကြာ တိုက်ခိုက်ခဲ့တာလို့ တပ်ရင်းအမှတ် (၂၉) ဒေါင်းမင်းပြည်သူ့ကာကွယ်ရေးတပ်၊ တပ်ခွဲ (၅) Golden Star Force ခေါင်းဆောင်ဗိုလ်တိုက်ဂါးက ပြောပါတယ်။

“လက်နက်ကြီး တပ်ပေါင်းစုအနေနဲ့ ပူးပေါင်းအဖွဲ့တွေက တိုက်ခိုက်ခဲ့တာ။ သူတို့စခန်း တိုက်ခံရတော့ စကစဘက်က လေကြောင်းအကူအညီတောင်းလို့ လေကြောင်းပစ်ကူလာလို့ ပြန်ဆုတ်ခဲ့ကြတယ်။ လေယာဥ်ကတော့ တစီးဘဲလာပစ်တာ။” လို့ ပြောပါတယ်။

အဲ့ဒီတိုက်ပွဲမှာ စစ်ကောင်စီဘက်က ၁၀ ဦးထက်မနည်းသေဆုံးခဲ့သလို ထိခိုက်ဒဏ်ရာရသူတွေလည်း ရှိတယ်လို့ ဆိုပါတယ်။ သို့သော် ဒီသေဆုံးမှုနဲ့ပတ်သက်ပြီး မြေလတ်အသံက သီးခြားအတည်ပြုနိုင်ခြင်း မရှိသေးပါဘူး။

စစ်ကောင်စီဘက်က လေယာဥ်နဲ့လာရောက်ပစ်ခတ်ပေမယ့် ဒေသကာကွယ်ရေးပူးပေါင်းတပ်တွေဘက်က အထိအခိုက်မရှိ ပြန်ဆုတ်လာနိုင်သလို ဒေသခံတွေထိခိုက်တာလည်း မရှိဘူးလို့ ဆိုပါတယ်။

“ဇီးဖြူကုန်းရွာက အခြားရွာတွေနဲ့ကပ်လျက်မဟုတ်ဘဲ ကွင်းထဲမှာ သီးသန့်ရှိတာမျိုးဆိုတော့ ကျနော်တို့ဘက်က ပစ်ပြီး ၂ နာရီလောက်ကြာမှ လေယာဥ်ပစ်ကူက လာပစ်တာ။ ပြန်ဆုတ်လာတာက ဝေလီဝေလင်း အချိန်မို့လို့ ကံကောင်းသွားတာ”လို့ ဆက်ပြောပါတယ်။

အဲဒီတိုက်ခိုက်မှုကို တပ်ရင်းအမှတ်(၂၉) ဒေါင်းမင်းပြည်သူ့ကာကွယ်ရေးတပ်၊ တပ်ခွဲ (၅) Golden Star Force၊ နယ်စည်းမခြား ဇာမဏီပြောက်ကျားတပ်ဖွဲ့၊ B.E.D၊ E.D.F၊ S.B.T.F၊ M.R.D.A တပ်ခွဲ (၆) စွန်ရဲ၊ တောကျီးကန်း ပြည်သူ့ကာကွယ်ရေးတပ်၊ F.B.G.A၊ ယက္ခညီနောင်၊ ခရိုင်တပ်ရင်း (၃၁) ဘဂျမ်း၊ ရောင်နီဦးနဲ့ ညီနောင်မဟာမိတ်အဖွဲ့တွေက ပူးပေါင်းတိုက်ခိုက်ခဲ့ကြတာဖြစ်ပါတယ်။

ဒါ့အပြင် ပြီးခဲ့တဲ့ ဇွန်လ ၂ ရက်ကနေ ၄ ရက်နေ့အထိလည်း အဲ့ဒီ ဇီးဖြူကုန်းကျေးရွာတပ်စခန်းက စစ်သားတွေနဲ့ ဒေသခံမဟာမိတ်ပူးပေါင်းတပ်ဖွဲ့တို့ ထိတွေ့တိုက်ပွဲဖြစ်ခဲ့ရာ စစ်ကောင်စီတပ်သား ၁၀ ဦးထက်မနည်း သေဆုံးခဲ့သေးတယ်လို့ သိရပါတယ်။

အလားတူ မေလ ၁၀ ရက်နေ့မှာ ပုလဲမြို့နယ်၊ ကန်ဒေါင့်ကျေးရွာ နဂါးမတောင်အနီးရှိ စစ်သား၊ ရဲနဲ့ ပျူ အင်အား ၇၀ လောက် တပ်စွဲထားတဲ့နေရာကို ကာကွယ်ရေးအဖွဲ့တွေတိုက်ခိုက်ခဲ့ရာ စစ်ကောင်စီဘက်က ၅ ဦးထက်မနည်း ထိခိုက်သေဆုံးခဲ့ပြီး ပူးပေါင်းတပ်တွေဘက်က ၉ ဦး မစိုးရိမ်ရဒဏ်ရာ၊ ၁ ဦး စိုးရိမ်ရဒဏ်ရာရခဲ့တယ်လို့ သိရပါတယ်။

စာတည်း – လင်း

မကွေး၊ မတ် ၃၁၊ ၂၀၂၃။

မကွေးတိုင်း၊ ဂန့်ဂေါမြို့နယ်မြောက်ပိုင်း၊ ကန်ရွာနားမှာ စစ်ကောင်စီနဲ့ နယ်မြေခံကာကွယ်ရေးအဖွဲ့တွေ ထိတွေ့တိုက်ပွဲ ပြင်းထန်နေပြီး စစ်ကောင်စီဘက်က လေကြောင်းတိုက်ခိုက်မှု အလွန်အကျွံ ပြုလုပ်နေတယ်လို့ သိရပါတယ်။

မတ်လ ၃၁ ရက် ဒီကနေ့ မနက် ၆ နာရီဝန်းကျင်ထဲက ပစ်ခတ်မှုတွေစတင်နေတာ ဖြစ်ပြီး မနက် ၁၀ နာရီလောက်မှာ စစ်ကောင်စီဘက်က လေကြောင်းတိုက်ခိုက်မှုတွေ ဆက်တိုက်ပြုလုပ်လာတာ ဖြစ်တယ်လို့ ဆိုပါတယ်။

“မနက်အစောထဲက ဖြစ်နေတာ၊ လေယာဥ်ပစ်ကူကို ၁၀ နာရီလောက်ကနေစတင်တာဗျ။ လေကြောင်းမလာခင်ထိတော့ ကိုယ့်ဘက်က အခြေနေကောင်းပါတယ်။ အဲ့နောက်ပိုင်းတော့ အတိအကျပြောလို့ မရသေးဘူးဗျ။ ခုနကလေးတင် ပစ်နေဆဲပါ။” လို့ ဂန့်ဂေါဒေသခံတဦးက ယနေ့ နေ့လည် ၂ နာရီခွဲခန့်က ပြောပါတယ်။

စစ်ကောင်စီဘက်က အထိနာလို့ မနက် ၁၀ နာရီဝန်းကျင်မှာ ပထမဆုံးလေကြောင်းတိုက်ခိုက်မှုစတင်ခဲ့ပြီး ၅ ကြိမ်မြောက် လေကြောင်းပစ်ခတ်မှုကိုတော့ နေ့လည် ၁ နာရီခွဲက ပစ်ခတ်သွားတာဖြစ်တယ်လို့ ဆိုပါတယ်။

လေကြောင်းပစ်ခတ်မှုတွေကြောင့် မြေပြင်အခြေအနေစုံစမ်းလို့မရဖြစ်နေပြီး တိုက်ပွဲတွင်းပစ်ခတ်သံတွေတော့ ငြိမ်နေပေမယ့် လေ‌ယာဉ်တွေကတော့ နေ့လည် ၃ နာရီထိ ကောင်းကင်မှာ ဝဲနေတုန်းဖြစ်တယ်လို့ သိရပါတယ်။

ဒါ့အပြင် စစ်ကောင်စီဘက်က လေယာဉ်နဲ့ အင်အားဖြည့်တင်းတာတွေကိုလည်း လုပ်ဆောင်နေတယ်လို့ ဆိုပါတယ်။

စာတည်း – 007