တိုက်ခိုက်ခံရ

စစ်ကိုင်း၊ မတ် ၅၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်၊ နတ်ခရိုင်ကျေးရွာအနီးမှာ မိုင်းလာရှင်းတဲ့စစ်ကောင်စီတပ်သားတွေ မတ်လ ၄ ရက် မနေ့မနက် ၁၁နာရီကျော်လောက်မှာ တိုက်ခိုက်ခံရတာကြောင့် စစ်သား ၃ ဦးသေဆုံးပြီး ၇ ဦးဒဏ်ရာရရှိခဲ့တယ်လို့ PDFတာဝန်ရှိသူက ပြောပါတယ်။

နုံးတွင်းခြေတော်ရာအမြောက်တပ်ကနေ အင်အား ၂၀ ကျော်နဲ့မိုင်းရှင်းဖို့လာချိန် လယ်ကြီးကျေးရွာနဲ့နတ်ခရိုင်ကျေးရွာကြားအရောက်မှာ ရှေ့ထွက်မိုင်း ၃ လုံးနဲ့တိုက်ခိုက်ခဲ့တာဖြစ်တယ်လို့ Farmers Revolution Force (SGG)မှပြန်ကြားရေးတာဝန်ခံက မြေလတ်အသံကို ပြောပါတယ်။

“စကစတွေက ခြေလျင်လာကြတာ။ မိုင်းတွေကတော့ ကျနော်တို့နဲ့နောက်တစ်ဖွဲ့ထောင်ထားတဲ့မိုင်းတွေပါ။ အဲ့ဒါကိုသတင်းရလို့လာရှင်းတာ။ အဲဒီအချိန်မှာ ကျနော်တို့ကစောင့်ကြိုပြီးတိုက်ခိုက်ခဲ့တာ။ ကျနော်တို့ မိုင်းဆွဲလိုက်တဲ့အချိန်မှာ ၃ကောင်က ပွဲချင်းပြီးသေတယ်။ ၇ ကောင်ကတော့ သွေးသံရဲရဲထွက် ပြီးတော့ကားနဲ့တင်သွားတယ်။ သေဆုံး၊ဒဏ်ရာရတာကိုတော့ ကျနော်တို့မျက်မြင်ပါပဲ” လို့ ဆိုပါတယ်။

မိုင်းဆွဲတိုက်ခိုက်ခံရပြီးတဲ့နောက် စစ်ကောင်စီတပ်က အဲ့ဒီနေရာနဲ့အနီးတဝိုက်ကို စက်လက်တွေနဲ့ပစ်ခတ်ခဲ့ပြီး ဒဏ်ရာရတဲ့တပ်သားတွေကို အရပ်သားကားတစီးနဲ့တင်ဆောင်သွားခဲ့တယ်လို့ အထက်ပါတာဝန်ရှိသူကဆိုပါတယ်။

ဒီတိုက်ခိုက်မှုကိုတော့ Farmers Revolution Force (SGG) နဲ့ စစ်ကိုင်းဖိုက်တာအဖွဲ့တို့ ပူးပေါင်းလုပ်ဆောင်ခဲ့တာဖြစ်သလို ကာကွယ်ရေးရဲဘော်တွေအနေနဲ့ အထိအခိုက်မရှိပြန်လည်ဆုတ် ခွာနိုင်ခဲ့တယ်လို့ သိရပါတယ်။

ပြီးခဲ့တဲ့ဖေဖော်ဝါရီ ၂ ရက်နေ့မှာလည်း စစ်ကိုင်းမြို့ပေါ်ကနေ နုံးတွင်းခြေတော်ရာအမြောက်တပ်ထဲကိုမောင်းနှင်လာတဲ့ စစ်ကောင်စီတပ်ဖွဲ့ဝင် ၇ ဦးစီးနင်းလာတဲ့ကားတစီးကို F.R.Fအပါအဝင် ပူးပေါင်းအဖွဲ့တွေက မိုင်း ၄ လုံးဆွဲတိုက်ခိုက်ခဲ့တာကြောင့် သေဆုံး၊ဒဏ်ရာရမှုတွေရှိတယ်လို့သိရပါတယ်။

စစ်ကိုင်း၊ မတ် ၄၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်ထဲမှာ မတ်လ ၃ ရက် မနေ့ နေ့လယ်ပိုင်းက စစ်ကောင်စီ ယာဥ်တန်းနှစ်ခုဆုံချိန် ဒေသခံကာကွယ်ရေးတပ်တွေက ဒရုန်းနဲ့ ဗုံးကြဲတိုက်ခိုက်ခဲ့တယ်လို့ သိရပါတယ်။

စစ်ကိုင်းအခြေစိုက် တမခ ၃၃ က ထွက်လာတဲ့ ယာဥ်တန်းနဲ့ မုံရွာမြို့ဘက်က ထွက်လာတဲ့ယာဥ်တန်း စုစုပေါင်း ၂၀ စီးလောက် ဆုံရာ စစ်ကိုင်းမြို့နယ်ထဲက မုံရွာ-မန္တလေး အဝေးပြေးလမ်းမ တနေရာမှာ ဗုံးသီး ၄ လုံး ကြဲချတိုက်ခိုက်ခဲ့တာလို့ T. G.R Women Drone Force ခေါင်းဆောင် ကျားခင်စိန်က အခုလို ပြောပါတယ်။

“မနေ့က စကစ ကားတန်းတွေက ရှုပ်နေတာပဲ။ မုံရွာကနေရော၊ စစ်ကိုင်းကနေရော သူတို့တွေ ကားနဲ့ ပစ္စည်းတခုခုကို သယ်ဆောင်နေကြတာ။ သူတို့ကားတန်းတွေ အဝေးပြေးလမ်းမပေါ် ရောက်လာတဲ့အချိန်မှာ ဒရုန်းနဲ့ကြဲချလိုက်တယ်။ ထိခိုက်မှုတွေတော့ ရှိပါတယ်။ အတိအကျတော့ မသိသေးပါဘူး” လို့ ဆိုပါတယ်။

ဒီပစ်ခတ်မှုကို T. G. R Women Drone Force၊ မြောင်မြို့နယ် T.G.R ပြည်သူ့ကာကွယ်ရေးတပ်ဖွဲ့နဲ့ Black Eagle People Defense Force တပ်ဖွဲ့တို့က ပူးပေါင်းဆောင်ရွက်ခဲ့ကြတာ ဖြစ်ပြီး အဲ့ဒီယာဥ်တန်းတွေပေါ်ကလည်း ပြန်လည်ပစ်ခတ်မှုတွေ ရှိခဲ့တယ်လို့ ဆိုပါတယ်။

T. G. R Women Drone Force တပ်ဖွဲ့ဟာ ပြီးခဲ့တဲ့ ဖေဖော်ဝါရီလထဲမှာလည်း စစ်ကောင်စီတပ်ဖွဲ့တွေကို ဒရုန်းနဲ့ ၆ ကြိမ်ထက်မနည်း တိုက်ခိုက်ခဲ့သေးတယ်လို့ သိရပါတယ်။

ဒါ့အပြင် ဇန်နဝါရီလ ၇ ရက် မနက် ၆ နာရီဝန်းကျင်မှာလည်း စစ်ကိုင်းမြို့ဘက်က ထွက်လာတဲ့ စစ်ကောင်စီကား ၃ စီးကို မြင်းမူမြို့နယ်၊ ဂွေးပင်တောရွာနဲ့ နတ်ရေကန်ရွာကြားမှာ တိုက်ခိုက်ခဲ့ရာ စစ်ကောင်စီဘက်က ထိခိုက်သေဆုံးမှုတွေ ရှိခဲ့ပါသေးတယ်။

စစ်ကိုင်း၊ မတ် ၄၊ ၂၀၂၃။

စစ်ကိုင်းတိုင်း၊ စစ်ကိုင်း – မုံရွာလမ်းမှာ သွားနေတဲ့ ၁၂ ဘီးကားစစ်ယာဥ်တန်းကို မတ်လ ၃ ရက် မနေ့ကနေ့လယ်ပိုင်းမှာ နေရာနှစ်ခုကနေ မိုင်းဆွဲတိုက်ခိုက်ခဲ့တယ်လို့ People Defence force – South Monywa က သတင်းထုတ်ပြန်ထားပါတယ်။

စစ်ကိုင်းမြို့နယ်၊ ဂွေးပင်တောရနဲ့ ရေပိုးစားရွာကြားကနေ နေ့လယ် ၁ နာရီ ၄၅ မိနစ်မှာ ပဒေသာမိုင်း ၃ လုံး၊ နေ့လယ် ၂ နာရီခွဲလောက်မှာ ပဒေသာမိုင်း ၃ လုံးတွဲ ၂ တွဲနဲ့ ဒုတိယအကြိမ် စောင့်ကြိုတိုက်ခိုက်ခဲ့တာလို့ ဆိုပါတယ်။

“ပထမစစ်ယာဥ်တန်း ၃ စီးက မုံရွာကနေ စစ်ကိုင်းကို သွားတာ။ နောက်ဆုံးက ကားရဲ့ နောက်ပိုင်းကို ထိတယ်။ ဒုတိယအကြိမ်က စစ်ကိုင်းကနေ မုံရွာကို သွားတဲ့ကား ၅ စီးကိုတိုက်တာမှာ နောက်ဆုံးကားပဲ ဘော်ဒီတွေ စုတ်ပြတ်သွားပြီး ဒဏ်ရာရရှိခဲ့သူတွေ ရှိတယ်” လို့ South Monywa မှ တာဝန်ရှိသူက ပြောပါတယ်။

ဒီလှုပ်ရှားမှုကို People Defence Force South-Monywa မုံရွာခရိုင် အမှတ်(၁၁)တပ်ရင်း၊ Monywa People’s Liberation Force ဒေါင်းမင်းစစ်ကြောင်းတပ်ခွဲ၊ Black Hunter people Task Force၊ Romin Thirteen People People Defence Force တို့ ပူးပေါင်းလုပ်ဆောင်ခဲ့တာဖြစ်ပြီး၊ တိုက်ခိုက်ချိန်အတွင်း စစ်သားတွေဘက်က ပြန်လည်ပစ်ခတ်မှုတွေ ရှိခဲ့ပေမယ့် တိုက်ခိုက်ရေးရဲဘော်တွေ အန္တရာယ်ကင်းခဲ့တယ်လို့ ဆိုပါတယ်။

စစ်ကောင်စီတပ်တွေဘက်က ထိခိုက်ဒဏ်ရာရ အခြေအနေတွေကိုတော့ မြေလတ်အသံက သီးခြားအတည်မပြုနိုင်သေးပါဘူး။

ပြီးခဲ့တဲ့ ဖေဖေါ်ဝါရီလ ၂၄ ရက် နေ့လယ်ကလည်း People’s Defence Force – South Monywa အဖွဲ့ဟာ မဟာမိတ်တွေနဲ့ပေါင်းပြီး မုံရွာမြို့လဝကရုံးမှာ တပ်စွဲထားတဲ့ စစ်အုပ်စုကို ဒရုန်းနဲ့ ဗုံးကြဲတိုက်ခိုက်တာအပြင် RPGတွေနဲ့ပါ တိုက်ခိုက်ခဲ့လို့ သေဆုံးမှုတွေ ရှိခဲ့ပါသေးတယ်။

ဘုတလင်၊ မတ် ၃၊ ၂၀၂၃။

စစ်ကိုင်းတိုင်း၊ ဘုတလင်မြို့က စစ်ကောင်စီ စစ်ဆေးရေးဂိတ်ကို မတ်လ ၂ ရက်မနေ့ကမနက်အစောပိုင်းမှာ အလစ်အငိုက် ဝင်ရောက်တိုက်ခိုက်ခဲ့တာကြောင့် စစ်သား ၃ ဦး သေဆုံးကာ သေနတ် ၂ လက်နဲ့ ကျည်မျိုးစုံကိုလည်း သိမ်းဆည်းနိုင်ခဲ့တယ်လို့ Depeyin Local Mobile Team ဆီက သိရပါတယ်။

ဘုတလင်မြို့အထွက်၊ မုံရွာ – ရေးဦးကားလမ်းပေါ်က အဆိုပါဂိတ်ကို မနေ့ကမနက် ၅ နာရီလောက်မှာ ဝင်ရောက်တိုက်ခိုက်ခဲ့တာလို့ Kaung Kin Local Squad နဲ့ Local Mobile Team ရဲ့ စစ်ဗျူဟာမှူး ဗိုလ်ကောင်းကင်က ပြောပါတယ်။

“စစ်သား ၃ ယောက် မနက်အစောပိုင်း အိမ်စီးကားအဖြူနဲ့ ဂိတ်ကို ရောက်လာတာကို တိုက်ခိုက်ခဲ့တာပါ။ စစ်သားတွေ တချက်မှ ပြန်ပစ်ချိန်တောင် မရဘူး။ ပစ်ခတ်ချိန် ၅ မိနစ်အတွင်း နေရာမှာပဲ ပွဲချင်းပြီး သေကုန်တာပါ” လို့ ပြောပါတယ်။

အဲ့ဒီစစ်ကောင်စီဂိတ်ဟာ ဒေသခံပြည်သူတွေဆီက ပိုက်ဆံတောင်းကြမ်းသလို တောင်သူတွေရဲ့ ပဲဆီတွေကိုလည်း ပုံးအဝါနဲ့ ထည့်လို့ဆိုကာ သိမ်းယူတာတွေလည်း ပြုလုပ်လေ့ရှိတယ်လို့ သူကဆက်ပြောပါတယ်။

MA4 တွဲ ၁ လက်၊ MA 11 ၁ လက်၊ ၄၀-မမ အသီး ၁၅ လုံး၊ MA11 ကျည်ဘောက် ၄ ခု၊ လက်ပစ်ဗုံး ၂ လုံးနဲ့ 5.56 ကျည်တောင့်တွေကိုပါ သိမ်းဆည်းနိုင်ခဲ့တယ်လို့ ဆိုပါတယ်။

တိုက်ခိုက်မှုအတွင်း စစ်သား ၃ ဦး သေဆုံးခဲ့တယ်လို့ ကာကွယ်ရေးရဲဘော်တွေက ပြောပေမယ့် ဒီသေဆုံးနဲ့ပတ်သက်ပြီး မြေလတ်အသံက သီးခြားအတည်ပြုချက် မရရှိသေးပါဘူး။

ဒီစစ်ဆင်ရေးကို Local Mobile Teamနဲ့ ကြေးမုံတပ်ရင်း တပ်ခွဲ-၃၊ တပ်ရင်း ၁၂ ရွှေဘိုခရိုင် – တို့ ပူးပေါင်းကာ ပြောက်ကျားစစ်ဆင်ရေးအဖြစ် တိုက်ခိုက်ခဲ့တာလို့ သိရပါတယ်။

Depeyin Local Mobile Team ရဲ့ထုတ်ပြန်ချက်မှာတော့ အခုစစ်ဆင်မှုဟာ ဆပ်ပြာကျင်းတူမီး တိုက်ပွဲမှာ ကျဆုံးခဲ့ရတဲ့ အာဇာနည်ရဲဘော်တွေရဲ့ ၁ နှစ် ၈ လပြည့် ကြေကွဲဝမ်းနည်းဖွယ် အမှတ်တရနေ့အတွက် သူရဲ‌‌ကောင်းတို့အမှတ်တရ အထူးစစ်ဆင်ရေး ပြုလုပ်ခဲ့တာဖြစ်တယ်လို့ ဖော်ပြထားပါတယ်။

ဒီပဲယင်းမြို့နယ်၊ ဆပ်ပြာကျင်းရွာတိုက်ပွဲဟာ ပြီးခဲ့တဲ့နှစ် ဇူလိူင် ၂ ရက်က ဖြစ်ပွားခဲ့တာ ဖြစ်ပြီး စစ်ကောင်စီတပ်က အင်အား အလုံးအရင်းသုံးကာ တိုက်ခိုက်ခဲ့တာကြောင့် ဒေသခံပြည်သူ့ကာကွယ်ရေး ရဲဘော် ၂၆ ဦး ကျဆုံးခဲ့တယ်လို့ Depeyin Local PDF Team ရဲ့ သတင်းပြန်ကြားရေးတာဝန်ခံဆီက သိရပါတယ်။

Depeyin Local Mobile Team အဖွဲ့ဟာ ဇန်နဝါရီလ ၂၉ ရက်ကလည်း ဒီပဲယင်းမြို့တွင်းကို ဝင်ရောက်တိုက်ခိုက်ခဲ့ရာ စစ်သား ၃ ဦး ပြင်းထန်ဒဏ်ရာရခဲ့ပြီး ဒလန်လို့ သတင်းကြီးသူ တဦးကိုပါ ရှင်းလင်းခဲ့ပါသေးတယ်။

စာတည်း – လင်း

ဝက်လက်၊ မတ် ၁၊ ၂၀၂၃။

စစ်ကိုင်းတိုင်း၊ ဝက်လက်မြို့နယ် အနောက်ဘက်ခြမ်းက စစ်ကောင်စီစစ်ကြောင်းကို ဖေဖေါ်ဝါရီလ ၂၈ ရက် မနေ့မနက်ပိုင်းက စောင့်ကြိုတိုက်ခိုက်ခဲ့ရာ စစ်သား ၁ ဦး သေဆုံးခဲ့ရာ ၂ ဦး ပြင်းထန်ဒဏ်ရာ ရရှိခဲ့တယ်လို့ Eagle Guerrilla Force အဖွဲ့ဆီက သိရပါတယ်။

ဝက်လက်မြို့နယ်၊ ဘိုတဲကျေးရွာကနေ အင်အား ၈၀ လောက်နဲ့ လာတဲ့စစ်ကြောင်းကို မနက် ၉ နာရီခွဲလောက်က မုဆိုးခြုံရွာအနီးမှာ ရော့ကက် ၁၀ လုံးအပြင် ၉၀ မမ လက်နက်ကြီးတွေနဲ့ အချိန် ၁ နာရီနီးပါးကြာ တိုက်ခိုက်ခဲ့တာလို့ ဆိုပါတယ်။

“စစ်ကြောင်းက ခြေလျင်ထွက်လာတာ၊ ရှေ့တကြောင်း နောက်တကြောင်းလာတာကို နောက်ကစစ်ကြောင်းရှေ့ကို ရော့ကက်ကျည်ကျသွားတာမှာ စစ်သားတယောက် သေပြီး ၂ ယောက် ဒဏ်ရာရသွားတယ်” လို့ Eagle Guerrilla Force အဖွဲ့တပ်ရင်းမှူး ဗိုလ်ကောက်ရိုးက ပြောပါတယ်။

စစ်ကောင်စီဘက်က ထိခိုက်သေဆုံးတာနဲ့ပက်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

အဲဒီစစ်ကြောင်းဟာ ည ၁၁ နာရီလောက်မှာတော့ ဘိုတဲကျေးရွာကို ပြန်လည်ထွက်ခွာသွားပြီး အဘွားအိုတဦးကို မီးရှို့သတ်ဖြတ်သွားတယ်လို့ သိရပြီး၊ အဲ့ဒီဖြစ်စဥ်နဲ့ ပတ်သက်တဲ့ နောက်ဆက်တွဲ အခြေအနေတွေကိုတော့ မြေလတ်အသံက ဆက်လက်စုံစမ်းနေဆဲပါ။

ဒီတိုက်ခိုက်မှုကို ရွှေဘိုခရိုင် အမှတ် – ၁၅ တပ်ရင်း Eagle Guerrilla Force တပ်ခွဲ ၁ နဲ့ ရွှေဘိုခရိုင် အမှတ် ၁၅ တပ်ရင်း Fight For Freedom တပ်ခွဲ ၂ တို့ ပူးပေါင်းခဲ့တာ ဖြစ်ပြီး၊ တိုက်ခိုက်ရေးရဲဘော်တွေ အန္တရာယ်ကင်းခဲ့တယ်လို့ ဆိုပါတယ်။

Eagle Guerrilla Forceအဖွဲ့ဟာ တိုက်ခိုက်ရေးတွေအပြင် ပြီးခဲ့တဲ့ ဖေဖေါ်ဝါရီလ ၂၄ ရက်ကလည်း ရွှေဘိုမြို့နယ်ထဲက NUG မူလွန်ကျောင်းတကျောင်းကို မလေးရှားနိုင်ငံ ဂျိုဟိုးစီနိုင်း ၂ ငါးလုံးအဖွဲ့က လှူဒါန်းတဲ့ ကျောင်းသုံးပစ္စည်းတွေကိုလည်း အလှူရှင်တွေကိုယ်စား လှူဒါန်းခဲ့ကြပါသေးတယ်။

ချောက်၊ မတ် ၁၊ ၂၀၂၃။

မကွေးတိုင်း၊ ချောက်မြို့၊ အနော်ရထာ တံတားအနီး၊ မြို့တွင်းကုန်းလမ်းရှိ စစ်ကောင်စီတပ်တွေရဲ့ နဂ/ ၆၀ စစ်ကြောရေးစခန်းဝန်းထဲက အရာရှိနေအိမ်မှာ ကင်းစောင့်နေတဲ့ စစ်သားတွေ တိုက်ခိုက်ခံရပြီး ၂ ဦး သေဆုံးခဲ့တယ်လို့ သိရပါတယ်။

ဖေဖော်ဝါရီလ ၂၈ ရက်ည ၇ နာရီခန့်မှာ ကင်းစောင့်နေတဲ့စစ်သား ၃ ဦးကို ပစ်ခတ်ခဲ့ရာမှာ ၂ ဦးက သေဆုံးခဲ့တာလို့ Chauk Guerrilla Force မှ ဒုတာဝန်ခံ ဗိုလ်ပေတက ပြောပါတယ်။

“ကျနော်တို့ သိရသလောက်က သူတို့က ရေနံဌာနက အရာရှိနေအိမ်ကို ဝင်စီးဖမ်းခေါ်ထားပြီး စစ်ကြောရေးလုပ်နေချိန်လို့ သိထားရတယ်။ ကျနော်တို့က သူတို့ နဂ/၆၀ စစ်ကြောရေးစခန်းကို ပစ်ဖို့သွားတဲ့အချိန် သူတို့အရာရှိနေအိမ်က မီးအလင်းရောင်အောက်မှာ ကင်းစောင့်နေတဲ့ စကစ ၃ ယောက်ကို တွေ့လို့ပစ်ခဲ့တာ။ ပစ်ခတ်ချိန်ကတော့ ၁၀ မိနစ်လောက်ဘဲ ကြာတယ်။ စကစ ဘက်က ထိခိုက်သေဆုံးကတော့ မျက်မြင်ပါ” လို့ ပြောပါတယ်။

အဲဒီပစ်ခတ်မှုမှာ ကင်းစောင့်နေတဲ့ စစ်ကောင်စီတပ်သား ၂ ဦး သေဆုံးသွားပြီး ချောက်ဆေးရုံ ရင်ခွဲရုံထဲကို ပို့ထားရတယ်လို့ ဆိုပါတယ်။

သွားရောက်ပစ်ခတ်ချိန်မှာ စစ်သားတွေကလည်း စစ်ကြောရေးစခန်းရဲ့ တပ်ဝန်းအပြင်ထိ ထွက်လာပြီး လိုက်လံပစ်ခတ်တာတွေ လုပ်ခဲ့ပေမယ့် PDF ဘက်က ထိခိုက်တာမရှိဘူးလို့ သိရပါတယ်။

နဂ/ ၆၀ ဟာ ရှေ့ခေတ်ရေနံမြေအရာရှိ အိမ်ရာတခုဖြစ်ပြီး စစ်ကောင်စီတပ်တွေက ဖမ်းဆီးထားသူတွေကို စစ်ကြောရေးလုပ်တဲ့ နေရာတခုလည်း ဖြစ်ပါတယ်။

အဲဒီတိုက်ခိုက်မှုကို Chauk Guerrilla force၊ Chauk ပကဖ၊ Hunter Dragon Group၊ K. F People Defense Force တို့က ပူးပေါင်းတိုက်ခိုက်ခဲ့တာလို့ ဆိုပါတယ်။

ဖေဖော်ဝါရီလ ၁၀ ရက်ကလည်း ချောက်မြို့ရှိ ရွေးကောက်ပွဲကော်မရှင်ရုံးကို ဒေသခံကာကွယ်ရေးတပ်တွေက သတိပေးတဲ့အနေနဲ့ ဗုံးဖောက်ခွဲခဲ့ပြီး လူထိခိုက်တာမရှိဘဲ ရုံးအဆောက်အဦး အနည်းငယ်ထိခိုက် ပျက်စီးခဲ့သေးတယ်လို့ သိရပါတယ်။

စာတည်း – လင်း

ပခုက္ကူ၊ မတ် ၁၊ ၂၀၂၃။

မကွေးတိုင်း၊ ပခုက္ကူခရိုင်၊ မြိုင်မြို့အနောက်ဘက် စစ်ကောင်စီစစ်ဆေးရေးဂိတ်က ပျူစောထီး၊ ရဲ နဲ့ စစ်သားတွေကို အနီးကပ်ပစ်ခတ်တိုက်ခိုက်ခဲ့တယ်လို့ ပြည်သူ့ကာကွယ်ရေးတပ်ဖွဲ့-မြိုင်မြို့နယ်ဆီက သိရပါတယ်။

ဖေဖော်ဝါရီလ ၂၈ ရက် မနေ့ ညနေပိုင်းက မြိုင်မြို့ကနေ ချောင်းဆုံရွာဘက်ကို ထွက်တဲ့ အဲ့ဒီစစ်ကောင်စီဂိတ်မှာ လမ်းသွားလမ်းလာ ပြည်သူတွေကို စစ်ဆေးရေးလုပ်နေတဲ့ စစ်ကောင်စီတပ်သားတွေကို အနီးကပ်ပစ်ခတ် တိုက်ခိုက်ခဲ့တာလို့ ပြည်သူ့ကာကွယ်ရေးတပ်ဖွဲ့-မြိုင်မြို့နယ် ဗိုလ်လက်ယာက ပြောပါတယ်။

“အဲဒီစစ်ဆေးရေးဂိတ်မှာ စစ်ခွေး ရဲခွေး နဲ့ ပျူခွေး ၁၈ ကောင်လောက် ရှိတယ်။ ကျနော်တို့ ဘောလုံးကွင်း ၁ ကွင်းစာလောက်ကပ်ပြီးတော့ အရင်ပစ်ခဲ့တာ။ အခုမနက်တော့ ၃ ယောက် သေပြီး ၂ ယောက် ဒဏ်ရာရတယ်လို့ ကြားတယ်။ သေတဲ့အလောင်း ၃ လောင်းကို အဲဒီအနားမှာ သင်္ဂြိုဟ်နေတယ်လို့ သိရတယ်။ တပ်မ ၁၀၁ က စစ်သားတွေပါ။ ပစ်ခတ်တာက ၁၁ မိနစ်ပဲ ကြာတယ်” လို့ ဆက်ပြောပါတယ်။

လက်ရှိအချိန်ထိ အဲဒီ‌စစ်ဆေးရေးဂိတ်နေရာမှာ စစ်သား၊ ရဲနဲ့ ပျူစောထီးတွေက အထိုင်ချပြီး မြိုင်မြို့ပေါ်က စစ်ကောင်စီတပ်စွဲနေတဲ့ နေရာတွေမှာလည်း အင်အားထပ်တိုးချထားတယ်လို့ ဆိုပါတယ်။

အဲ့ဒီ စစ်ဆေးရေးဂိတ် တိုက်ခိုက်မှုကို ပြည်သူ့ကာကွယ်ရေးတပ်ဖွဲ့-မြိုင်မြို့နယ် နဲ့ နံ့သာမြေအဖွဲ့တို့က ပူးပေါင်းတိုက်ခိုက်ခဲ့တာလို့ ပြောပါတယ်။

ပြီးခဲ့တဲ့ ဖေဖော်ဝါရီလ ၂၅ ရက်ကလည်း မြိုင်မြို့နယ်အတွင်း စစ်ဆေးရေးလုပ်ဆောင်ဖို့ လာတဲ့ စစ်အုပ်စုကို မြိုင် PDF က ပစ်ခတ်တိုက်ခိုက်ခဲ့လို့ စစ်သား ၃ ဦး သေဆုံးခဲ့တယ်လို့ သိရပါတယ်။

ပခုက္ကူ ၊ ဖေဖော်ဝါရီ ၂၈၊ ၂၀၂၃။

မကွေးတိုင်း၊ ပခုက္ကူမြို့နယ်အစပ်မှာ စစ်ကြောင်းထိုးနေတဲ့ စစ်အုပ်စုကို ဒေသခံပြည်သူ့ကာကွယ်ရေး မဟာမိတ်အဖွဲ့တွေက တိုက်ခိုက်ခဲ့တာကြောင့် စစ်သား၂ ဦး သေဆုံးခဲ့တယ်လို့ ဆိပ်ဖြူမြို့နယ် ဒရုန်းတပ်ခွဲ ၄ – Dog Hunter Uav Force က သတင်းထုတ်ပြန်ထားပါတယ်။

ဆိပ်ဖြူမြို့နယ်ဘက်ကနေ ပခုက္ကူမြို့နယ်၊ စညောင်းရွာအနောက်ဘက် တောထဲကို ရောက်နေတဲ့ အင်အား ၆၀ လောက်ရှိတဲ့ စစ်တပ်ကို ဖေဖေါ်ဝါရီလ ၂၅ ရက်မနက် ၁၀ နာရီလောက်က ဒရုန်းအသုံးပြုပြီး အီနာဂါဗုံးသီးနဲ့ တိုက်ခိုက်ခဲ့တာလို့ ဆိုပါတယ်။

“စစ်တပ်က တောထဲမှာ ပုန်းနေတာကို အီနာဂါနဲ့ ပစ်ချခဲ့တာပါ။ စစ်သား ၂ ယောက် သေတယ်။ မျက်မြင်တွေ့တာက တယောက်သေတယ်။ ဗီဒီယိုမှတ်တမ်းထဲမှာ တယောက်၊ စစ်သားသေတာ မြင်ရတယ်။ ၂ ယောက် သေတာပါ” လို့ Dog Hunter Uav Force ရဲ့ တပ်ခွဲမှူး ဗိုလ်ဆင်ရိုင်းက ပြောပါတယ်။

ဒီသေဆုံးမှုနဲ့ ပတ်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

ဒရုန်းအသုံးပြုရာမှာ မီတာ ၇၀၀ လောက်က ပျံရမှာကို မီတာ ၅၀၀ လောက်နဲ့ ပျံသန်းခဲ့တာကြောင့် စစ်ကောင်ရဲ့ဂျမ်မာနဲ့ ပစ်ချဖျက်ဆီးတာကို ခံလိုက်ရလို့ Dog Hunter Uav Force ရဲ့ တိုက်ခိုက်ရေး ဒရုန်းတစီး ပျက်စီးခဲ့တယ်လို့လည်း ဗိုလ်ဆင်ရိုင်းက ဆက်ပြောပါတယ်။

ဒီတိုက်ခိုက်မှုကို ဆိပ်ဖြူမြို့နယ် ဒရုန်းတပ်ခွဲ ၄ Dog Hunter Uav Force အဖွဲ့က ဦးဆောင်ပြီး King Fighter Special Guerrilla Force နဲ့ ပူးပေါင်းလုပ်ဆောင်ခဲ့တာလည်း ဖြစ်ပါတယ်။

အဲဒီစစ်ကြောင်းဟာ ဖေဖေါ်ဝါရီလ ၂၃ ရက်နဲ့ ၂၄ ရက်တွေကလည်း ဆိပ်ဖြူမြို့နယ်နဲ့ ပခုက္ကူ နယ်စပ်တလျောက်မှာ စစ်ကြောင်းထိုးခဲ့ကြတာကို Dog Hunter Uav Force၊ Oak Awe UG (Salay)၊ King Fighter Special Guerrilla Force၊ ပေါက်တောင်ပိုင်း ကျန်းမာရေးနဲ့ သူနာပြုတပ်ဖွဲ့၊ Black Hawk Seikphyu Revolution Front အဖွဲ့တွေက ဒရုန်းတွေ လက်နက်ငယ်တွေနဲ့ တိုက်ခိုက်ခဲ့ကြလို့ စစ်သားတွေ ဒဏ်ရာရခဲ့ကြပါသေးတယ်။

ဝေါ၊ ဖေဖော်ဝါရီ ၂‌၇၊ ၂၀၂၃။

ပဲခူးတိုင်း၊ ဝေါမြို့နယ်၊ ဝေါမြို့ကနေ ဘုရားပျိူကျေးရွာဘက် အထွက်မှာရှိတဲ့ စစ်ဆေးရေး ဂိတ် တိုက်ခိုက်ခံရပြီး ၃ ဦး သေဆုံးကာ ၄ ဦး ဒဏ်ရာရသွားတယ်လို့ သိရပါတယ်။

ဖေဖော်ဝါရီလ ၂၆ ရက် မနေ့က ည ၈ နာရီ ၃၀ မိနစ်ခန့်မှာ စစ်သား၊ ရဲ၊ ပျူစောထီး၊ မီးသတ် အင်အား ၁၀ ဦးခန့် ရှိနေတဲ့ စစ်ဆေးရေးဂိတ်ကို ဝင်ရောက် တိုက်ခိုက်ခဲ့တာဖြစ်ပြီး အလစ်အငိုက်တိုက်ခိုက်နိုင်ခဲ့လို့ စစ်ကောင်စီဘက်က ထိခိုက်သေဆုံးမှုများခဲ့တာလို့ ဝေါမြို့နယ် ပကဖ တာဝန်ရှိသူက ပြောပါတယ်။

“အဲဒီဂိတ်က ရန်ကုန်-မော်လမြိုင်လမ်းပိုင်းပေါ်က စစ်ဆေးရေးဂိတ်ကြီး မဟုတ်ဘူး။ အဲ့ဒီဂိတ်က ဖွင့်ထားတာ ၁ နှစ်လောက် ရှိပြီး သူတို့အဖွဲ့တွေ အမြဲတမ်းရှိတဲ့နေရာတော့ မဟုတ်ဘူး။ စကစ ဘက်က သတင်းရတာမျိုးရှိရင် လာစောင့်ကြတယ်။ ပြီးရင် တရားမဝင် ဖြတ်သန်းသွားလာတဲ့ ကားတွေကို ငွေတောင်းတဲ့နေရာပါ” လို့ ပြောပါတယ်။

စစ်ဆေးရေးဂိတ်ကို တိုက်ခိုက်မှုအတွင်း စစ်အုပ်စုဘက်က ပျူစောထီး ၁ ဦးနဲ့ မီးသတ် ၂ ဦး သေဆုံးပြီး စစ်ကောင်စီတပ်ဖွဲ့ဝင် တပ်ကြပ် ၁ ဦး၊ နယ်ထိန်းရဲတပ်ကြပ် ၁ ဦး၊ ပျူစောထီး ၂ ဦး ဒဏ်ရာရသွားတယ်လို့ ဆိုပါတယ်။

အာဏာသိမ်း စစ်ကောင်စီဘက်က ထိခိုက်သေဆုံးသွားသူတွေကို ဝေါဆေးရုံကို စစ်ကောင်စီဘက်က တင်ပို့ထားပြီး ဒဏ်ရာပြင်းထန်သူတွေကိုတော့ ရန်ကုန်ဆေးရုံကို ထပ်မံပို့ဆောင်ထားရတယ်လို့ သိရပါတယ်။

တိုက်ခိုက်မှု ဖြစ်ပွားပြီးနောက် ဖေဖော်ဝါရီလ ၂၇ ရက် ဒီကနေ့ မနက်ပိုင်းမှာတော့ စစ်ကောင်စီဘက်က အင်အား ၂၀ ကျော်ဟာ ကား ၄ စီးနဲ့ ရောက်လာပြီး ဘုရားပျိုကျေးရွာ အနီးဝန်းကျင်ကို တောနင်း ရှာနေတယ်လို့ ဆိုပါတယ်။

ဒီဇင်ဘာလ ၅ ရက်နေ့ကလည်း ဝေါမြို့ ကန်တော်ရပ်ကွက်က အုပ်ချုပ်ရေးမှူးရုံး မိုင်းခွဲခံရပြီး ရုံးအဆောက်အဦး ထိခိုက်ပျက်စီးသွားသေးတယ်လို့ သိရပါတယ်။

မြင်းမူ၊ ဖေဖော်ဝါရီ ၂‌၇၊ ၂၀၂၃။

စစ်ကိုင်းတိုင်း၊ မြင်းမူမြို့နယ် Zero ပြောက်ကျားတပ်မဟာ တပ်ရင်း ၇-မြင်းခြံခရိုင် စခန်းကို မျက်စိလည် ရောက်လာတဲ့ မုံရွာ နမခ က စစ်ကြောင်းဟာ တိုက်ခိုက်ခံရပြီး ၁၇ ဦး သေဆုံးခဲ့တယ်လို့ အဲဒီတပ်ဖွဲ့ထံက သိရပါတယ်။

ယမန်နေ့ ဖေဖော်ဝါရီလ ၂၆ ရက်နေ့ နံနက်ပိုင်းမှာ လေယာဉ်နဲ့ချသွားတဲ့ အင်အား ၁၀၀ ဝန်းကျင်ရှိ စစ်ကောင်စီစစ်ကြောင်းနဲ့ PDF အဖွဲ့တွေ ထိတွေ့တိုက်ပွဲ ဖြစ်ခဲ့တယ်လို့ Zero ပြောက်ကျားတပ်မဟာ တပ်ရင်း ၇-မြင်းခြံခရိုင် တပ်ရင်းမှူး ဗိုလ်သက်ကြီးက ပြောပါတယ်။

“မနေ့က မြင်းမူမြို့နယ် ညောင်ပင်ကန်ကျေးရွာကနေပြီးတော့ ထိုးလာတဲ့ စစ်ကြောင်းက ကန်တော်ဘက်ကို တည့်တည့်လာတယ်။ မနက် ၉ နာရီလောက်ကတည်း စပြီး‌တော့ ထိတွေ့တိုက်ပွဲ ဖြစ်တယ်။ ည ၇ နာရီခွဲမှာ တိုက်ပွဲပြီးတယ်။ ကျနော်တို့က စခန်းကို ဟပေးလိုက်တာ၊ တိုက်ပွဲက ပြင်းထန်းတယ်။ ရန်သူ့ဘက်က စစ်** ၁၇ ကောင် သေတယ်။ ကျ‌နော်တို့ဘက်က ဆားတောင်မိုးကြိုးအဖွဲ့က ရဲဘော် ၂ ယောက် ကျဆုံးတယ်” လို့ ဗိုလ်သက်ကြီးက ပြောပါတယ်။

Zero ပြောက်ကျားတပ်မဟာ တပ်ရင်း ၇-မြင်းခြံခရိုင် စခန်းက မရွှေ့ပြောင်းနိုင်တဲ့ပစ္စည်း သိန်း ၃၅၀ ဖိုးလောက် ဆုံးရှုံးခဲ့ရပြီး မုံရွာ နမခ စစ်ကြောင်းက ကန်တော်ရွာ ဘုန်းကြီးကျောင်း ၂ ကြောင်းလည်း မီးရှို့သွားတယ်လို့ ဆက်ပြောပါတယ်။

တိုက်ခိုက်မှုကို Zero ပြောက်ကျားတပ်မဟာ တပ်ရင်း ၇-မြင်းခြံခရိုင်၊ တပ်ရင်း ၂ မြင်းခြံခရိုင်၊ ကျောက်ဆည်ခရိုင် တပ်ရင်း ၁၊ စစ်ကိုင်းခရိုင် တပ်ရင်း ၂၊ ဆားတောင်မိုးကြိုးအဖွဲ့၊ နယ်မြေခံအင်အားစုအချို့ နှင့် လက်နက်ကြီးအဖွဲ့အချို့တို့က ပူးပေါင်းတိုက်ခိုက်ခဲ့တာလို့ သိရပါတယ်။

ပြီးခဲ့တဲ့ ဖေဖော်ဝါရီလ ၂၄ ရက်နေ့ကလည်း အရာတော်မြို့နယ်မှာ နေအိမ်တွေကို မီးရှို့နေတဲ့ မုံရွာ နမခ က စစ်ကောင်စီစစ်ကြောင်းနဲ့ Zero ပြောက်ကျားတပ်မဟာ တပ်ရင်း ၇-မြင်းခြံခရိုင်တို့ တိုက်ပွဲဖြစ်ပြီး စစ်သား ၁၀ ဦး သေဆုံးခဲ့တယ်လို့ သိရပါတယ်။