တိုက်ခိုက်ခံရ

မန္တလေး၊ ဖေဖော်ဝါရီ ၁၇၊ ၂၀၂၃။

မန္တလေးတိုင်း၊ သပိတ်ကျင်းမြို့နယ်၊ တကောင်းတိုက်နယ်၊ ပေါ်တော်မူကျေးရွာအနီးမှာ စစ်ကိုင်းတိုင်း၊ ကသာနယ်ဘက်ကလာတဲ့ စစ်ကောင်စီယာဥ်တန်းကို ဖေဖေါ်ဝါရီလ ၁၇ ရက် ဒီမနက် ၅ နာရီခွဲလောက်မှာ မိုင်းဆွဲတိုက်ခိုက်ခဲ့ရာ ထိခိုက်သေဆုံးမှုတွေ ရှိခဲ့တယ်လို့ ပြည်သူကာကွယ်ရေးတပ်ဖွဲ့ – တကောင်းက သတင်းထုတ်ပြန်ထားပါတယ်။

နတ်မောက်အခြေစိုက် တမခ ၈၈ က စစ်သားအင်အား ၁၀၀ လောက်ဟာ ကား ၃ စီးနဲ့လာတာကို ကြိုပြီးသတင်းရတဲ့အတွက် ရှေ့ထွက်မိုင်း ၃ လုံး ပဒေသာမိုင်း ၂ လုံးနဲ့ တိုက်ခိုက်ခဲ့တာလို့ ပြည်သူ့ကာကွယ်ရေးတပ်ဖွဲ့-တကောင်းရဲ့ တာဝန်ရှိသူက ပြောပါတယ်။

“နာရေးကားတွေရော ထွက်လာတယ်။ လူနာလာကောက်တာ နောက်မှသိရတာက နာရေးကားတွေက ခဏတာကူပေးပြီး မိုင်းစထိတာက နောက်ဆုံးကားဆိုတော့ ဒဏ်ရာရသူတွေနဲ့ သေဆုံးတဲ့လူတွေကို ရှေ့ကား ၂ စီးပေါ် မျှတင်တယ်။ မိုင်းထိတဲ့ကားကိုဆွဲပြီး တကောင်းမြို့ဘက်ကို ဆက်မောင်းသွားတယ်” လို့ ပြောပါတယ်။

တိုက်ခိုက်မှုအတွင်း စစ်ကောင်စီဘက်က ထိခိုက်သေဆုံးမှုတွေ ရှိခဲ့ပေမယ့် မြေလတ်အသံက သီးခြားအတည်မပြုနိုင်သေးပါဘူး။ ဒီတိုက်ခိုက်မှုကြောင့် ကား ၁ စီး ထိမှန်ခဲ့ပြီး စစ်သားတွေဘက်က မိနစ် ၃၀ ခန့်အကြာ လက်နက်ကြီး၊ လက်နက်ငယ်တွေနဲ့ ရမ်းသမ်းပစ်ခတ်တာတွေ ရှိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

သူတို့အဖွဲ့ဟာ ဖေဖော်ဝါရီလ ၁၅ ရက်ညနေကလည်း သပိတ်ကျင်းမြို့နယ်၊ တကောင်းတိုက်နယ်၊ သစ်တပင်ကျေးရွာအနီးမှာ စစ်ကောင်စီရဲ့ အင်အား ၄၀ ပါ ကားတစီးကို Special 9-HPDF နဲ့ပူးပေါင်းပြီး ရှေ့ထွက်မိုင်း ၃ လုံးနဲ့ တိုက်ခိုက်ခဲ့ပါသေးတယ်။

ယင်းမာပင်၊ ဖေဖော်ဝါရီ ၁၅၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ယင်းမာပင်စခန်းမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေကို ဖေဖော်ဝါရီလ ၁၃ ရက်မှာ တိုက်ခိုက်ခဲ့ရာ ၃ ဦး သေဆုံးပြီး ဒဏ်ရာရသူတွေလည်း ရှိခဲ့တယ်လို့ Chindwin Toe Na Yar P.D.F ခေါင်းဆောင် ဗိုလ်မြကြီးက ပြောပါတယ်။

အင်အား ၁၀၀ ဝန်းကျင်နဲ့ တပ်စွဲထားတဲ့ ယင်းမာပင်စခန်းက စစ်သားတွေကို ၁ နာရီကျော် ပစ်ခတ်တိုက်ခိုက်ခဲ့ပြီး၊ တိုက်ခိုက်မှုအတွင်း ၄၀ မမ၊ ၆၀ မမ၊ ၈၀ မမ စတဲ့ လက်နက်ကြီးတွေကို အသုံးပြုခဲ့တယ်လို့ ဆိုပါတယ်။

“ယင်းမာပင်စခန်းမှာ *အင်အား ၁၀၀ ဝန်းကျင်နဲ့ အရပ်ဝတ်တွေနဲ့နေတာ၊ ဘယ်တပ်ကလို့‌တော့ မသိရဘူး။ သူတို့ကယူနီဖောင်းနဲ့နေတာ မဟုတ်ဘူး။ တိုက်ပွဲချိန်က ည ၁၁ နာရီ ၄၅ မိနစ်ကနေ ည ၁ နာရီခွဲအထိ ပစ်ခတ်ခဲ့တာ။ စစ်ကောင်စီဘက်က ၃ ဦး သေဆုံးပြီး ၁ ဦးကတော့ အပြင်းအထန်ဒဏ်ရာရတယ်လို့ အတွင်းဖရဲသီး သတင်းပေးချက်အရ သိရတယ်” လို့ ပြောပါတယ်။

စစ်ကောင်စီဘက်က ထိခိုက်သေဆုံးမှုနဲ့ပက်သက်ပြီး မြေလတ်အသံက သီးခြားအတည်မပြုနိုင်‌သေးပါဘူး။

ဒီတိုက်ခိုက်မှုကို Chindwin Toe Na Yar PDF ၊ Real Hero ၊ Jungle Hunter revolution Force ၊ ယင်းမာပင်တပ်ရင်း ၂၉ နဲ့ Triple Two မဟာမိတ်တပ်ဖွဲ့တွေ ပူးပေါင်းလုပ်ဆောင်ခဲ့တာ ဖြစ်ပါတယ်။

တိုက်ခိုက်ခံရပြီးနောက် အဲ့ဒီစစ်အုပ်စုဟာ အနီးကျေးရွာတွေကို စစ်ကြောင်းထိုး မီးရှို့မယ်ဆိုတဲ့ သတင်းတွေလည်း ထွက်ပေါ်နေတယ်လို့ သိရပါတယ်။

ပြီးခဲ့တဲ့ ဖေဖော်ဝါရီလ ၈ ရက်ကလည်း အဲဒီယင်းမာပင်စခန်းကို Chindwin Toe Na Yar PDF အဖွဲ့က လက်နက်ကြီးတွေနဲ့ သွားရောက်ပစ်ခတ်ခဲ့‌ပါသေးတယ်။

စစ်ကိုင်း၊ ဖေဖော်ဝါရီ ၁၄၊ ၂၀၂၃။

စစ်ကိုင်းတိုင်း၊ မုံရွာမြို့၊ ညောင်ပင်စောက် လဝကရုံးထဲမှာတပ်စွဲနေတဲ့ စစ်ကောင်စီတပ်တွေ ဖေဖော်ဝါရီလ ၁၃ ရက်ညနေ ၄ နာရီလောက်မှာ တိုက်ခိုက်ခံရတာကြောင့် ၃ ဦးသေဆုံးပြီး ၂ ဦး ဒဏ်ရာရသွားတယ်လို့ သိရပါတယ်။

ရုံးထဲမှာ အင်အား ၁၅ ဦးနဲ့တပ်စွဲထားတဲ့အထဲမှ ၅ ဦးမှာ လမ်းသွားလမ်းလာပြည်သူတွေကို စစ်ဆေးဖို့ ရုံးထဲကထွက်ချိန် ကာကွယ်ရေးတပ်ဖွဲ့တွေက အလစ်ဝင်ရောက်တိုက်ခိုက်ခဲ့တာဖြစ်တယ်လို့ မုံရွာခရိုင်ပြည်သူကာကွယ်ရေးတပ်မတော် − Chindwin Attack Force တပ်ရင်း ၂၊ တပ်ရင်း ၃၊ တပ်ရင်း ၄ ရဲ့ သတင်းနဲ့ပြန်ကြားရေးတာဝန်ခံက ပြောပါတယ်။

“စကစ ၃ ကောင်က ကျနော်မျက်စိရှေ့မှာတင် သေဆုံးခဲ့တာ။ နောက်ထပ် ၂ ကောင်ကတော့ ရုံးထဲကို ပြေးဝင်သွားတယ်။ ဒီကောင်တွေရုံးထဲကအထွက်မှာဘဲ တိုက်ခိုက်လိုက်တာ။ သူတို့ဖက်က ပြန်မပစ်နိုင်ခဲ့ဘူး။ ပြီးတော့ စကစတွေက ရုံးထဲမှာတပ်စွဲနေတာကြာပြီ”လို့ ဆိုပါတယ်။

ဒီတိုက်ခိုက်မှုကိုတော့ မုံရွာခရိုင်ပြည်သူကာကွယ်ရေးတပ်မတော် (Chindwin Attack Force) တပ်ရင်း – ၄၊ မုံရွာခရိုင်ပြည်သူကာကွယ်ရေးတပ်မတော် (Chindwin Attack Force) တပ်ရင်း – ၄ အထူးကွန်မန်ဒိုတပ်ဖွဲ့ ( Monywa The Boys )အပါအဝင် မဟာမိတ်ပူးပေါင်းအဖွဲ့တွေက လုပ်ဆောင်ခဲ့ကြတာလည်း ဖြစ်ပါတယ်။

ဒါ့အပြင် ပြီးခဲ့တဲ့ဖေဖော်ဝါရီလ ၅ ရက်မှာလည်း မုံရွာမြို့အခြေစိုက် အနောက် မြောက်တိုင်းစစ်ဌာနချုပ် (နမခ)ကို အဆိုပါကာကွယ်ရးတပ်ဖွဲ့တွေကပဲ ၁၀၇ မမရှော့တိုက်ဒုံးနဲ့ ၂ ကြိမ် ပစ်ခတ်တိုက်ခိုက်ခံရတာကြောင့် ဗိုလ်ကြီးတဦး၊ တပ်ကြပ်ကြီးတဦး၊ ဒုတပ်ကြပ်တဦးအပါအဝင် ၂၂ ဦးသေဆုံးခဲ့တယ်လို့ Chindwin Attack Forceမှ သတင်းပြန်ကြား ရေးတာဝန်ခံက မြေလတ်အသံကိုပြောပါတယ်။

စစ်ကိုင်း၊ ဖေဖော်ဝါရီ ၁၄၊ ၂၀၂၃။

စစ်ကိုင်းတိုင်း၊ ခင်ဦးမြို့၊ အောင်ချမ်းသာရပ်ကွက်နေ ဒလန်လို့လူသိများသူ မင်းသိုက်ရဲ့နေအိမ်မှာ တပ်စွဲထားတဲ့စစ်ကောင်စီတပ်တွေ ဖေဖော်ဝါရီလ ၁၂ ရက်နေ့လည် ၃ နာရီမှာ တိုက်ခိုက်ခံရတာကြောင့် ၂ ဦးသေဆုံးပြီး ၁ ဦးဒဏ်ရာရသွားတယ်လို့ သိရပါတယ်။

အင်အား၂၀ ကျော်နဲ့တပ်စွဲထားတဲ့ အဲ့ဒီစစ်အုပ်စုကို ဒရုန်းနဲ့ ဗုံးသီး ၂ လုံးချ တိုက်ခိုက်ခဲ့တာလို့ Royal Tiger Guelliria Force ရဲ့ ခေါင်းဆောင်ကပြောပါတယ်။

“ကျနော်တို့တိုက်ခိုက်တဲ့အချိန်မှာ စကစတွေရဲ့ ဘန်ကာထဲကို ကျသွားတာ။ အဲဒီအချိန်မှာဘဲ နေရာမှာတင် ၂ကောင်ပွဲချင်းပြီးသေတာ။ ၁ ကောင်ကတော့ ဆေးရုံကိုပို့လိုက်တယ်။ အခုလို သေဆုံး၊ဒဏ်ရာရတာကို ဒရုန်းကင်မရာကနေမြင်ခဲ့ပြီး အတည်ပြုနိုင်ခဲ့တာ”လို့ ဆိုပါတယ်။

ဒီသေဆုံးမှုနဲ့ပက်သက်ပြီး မြေလတ်အသံက သီးခြားအတည်မပြုနိုင်သေးပါဘူး။
အဆိုပါ မင်းသိုက်ရဲ့ တိုက်နေအိမ်ထဲမှာ စစ်ကောင်စီတွေတပ်စွဲနေတာ ၁ နှစ်ကျော်ရှိနေပြီဖြစ်ပြီး ပြည်သူတွေကိုဒုက္ခတွေအမျိုးမျိုး ပေးနေတာကြောင့် အဲဒီနေရာကိုပဲ Royal Tiger Guelliria Force အဖွဲ့က တိုက်ခိုက်တာ ၁၀ ကြိမ်ထက်မနည်းရှိပြီလို့ ဆိုပါတယ်။

“စကစတွေက အိမ်ထဲမှာ ဘန်ကာတွေနဲ့ ခိုင်ခိုင် မာမာတပ်စွဲထားတာ။ ပြီးတော့ ဒီကောင်တွေက လမ်းသားလမ်းလာပြည်သူတွေကို အမြဲတမ်းလိုလိုစစ်ဆေးတယ်။ ပိုက်ဆံတွေတောင်းနေတာ။ ကျနော်တို့အကြိမ်ကြိမ် တိုက်ခိုက်ပေမယ့်လည်း ဒီနေရာကိုမစွန့်ခွာကြဘူး”လို့ ဆိုပါတယ်။

ပြီးခဲ့တဲ့ ၂၀၂၂ ခုနှစ်၊ ဒီဇင်ဘာလ ၂၆ ရက်မှာလည်း အဲ့ဒီနေရာကိုပဲ Royal Tiger Guelliria Force ကတိုက်ခိုက်ခဲ့တာကြောင့် စစ်ကောင်စီတပ်သားတဦးသေဆုံးပြီး အများ အပြား ဒဏ်ရာရရှိသွားတယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၁၊ ၂၀၂၃။

စစ်ကိုင်းတိုင်းဒေသကြီး၊ စစ်ကိုင်းမြို့နယ်၊ အုန်းတောကျေးရွာနဲ့ ဆားတောင်ကြားမှာ ရိက္ခာသယ်ပြီးလာတဲ့ ပျူအဖွဲ့ တိုက်ခိုက်ခံရလို့ ၃ ဦးထက်မနည်း သေဆုံးနိုင်တယ်လို့ သိရပါတယ်။

ဖေဖော်ဝါရီလ ၁၀ ရက်နေ့ မနက် ၁၀ နာရီခန့်မှာ ​ကြွယ်ပုံရွာဘက်ကနေ စစ်ကိုင်းဘက်ကို အင်အား ၃၀ ကျော် ကား ၃ စီးနဲ့လာတဲ့ ပျူစောထီးအဖွဲ့ကို ပဒေသာမိုင်း ၈ လုံးနဲ့ တိုက်ခိုက်ခဲ့တယ်လို့ တိုက်ခိုက်မှုမှာပါတဲ့ အညာသားလေး SGG အဖွဲ့တာဝန်ခံက ပြောပါတယ်။

“သူတို့ရွာက ရိက္ခာကုန်ရင် စစ်ကိုင်းဘက်ကနေ သွားသွားသယ်နေကြပါ။ လိုက်ထရပ် ၂ စီးနဲ့ ဖောကား ၁ စီးနဲ့ လာတာ။ အဲဒါကို ပဒေသာမိုင်းနဲ့ တိုက်ခိုက်လိုက်တာ ဖြစ်တယ်။ မိုင်းထိလို့ သူတို့ကားပေါ်က ပစ္စည်းအချို့တောင် ကျကျန်ခဲ့တယ်။ သူတို့ပြန်ပစ်လို့ ဒေသခံ ၁ ဦးတောင် ဒဏ်ရာရသေးတယ်။ ရွှေမိုးဟိန်းဆီဆိုင်နားက ၁ ယောက်ထိ သွားတယ်” လို့ ပြောပါတယ်။

မိုင်းဆွဲတိုက်ခိုက်ခံရလို့ ပျူစောထီး အဖွဲ့ဝင် ၃ ဦးထက်မနည်း ထိခိုက်သေဆုံးခဲ့ပြီး ပျူစောထီးဘက်က ပြန်ပစ်သွားလို့ ဒေသခံ ၁ ဦး ထိခိုက်ကာ နွား ၄ ကောင် ထိခိုက်ခဲ့တယ်လို့ ဆိုပါတယ်။

အဲဒီတိုက်ခိုက်မှုကိုတော့ အညာသားလေး (SGG)၊ စစ်ကိုင်းမြို့နယ် ပ.က.ဖ၊ Fight For Federal ညီနောင်မဟာမိတ်အဖွဲ့က ပူးပေါင်းတိုက်ခိုက်ခဲ့တယ်လို့ သိရပါတယ်။

ဇန်နဝါရီလ ၂၆ ရက်နေ့က ကြွယ်ပုံရွာမှာ တပ်စွဲထားတဲ့ စစ်ကောင်စီနဲ့ ပျူစောထီးအဖွဲ့ တိုက်ခိုက်ခံရပြီး ထိခိုက်သေဆုံးတာတွေ ရှိခဲ့သေးတယ်လို့ သိရပါတယ်။

ကလေး၊ ဖေဖော်ဝါရီ ၁၀၊ ၂၀၂၃။

စစ်ကိုင်းတိုင်း၊ ကလေးမြို့၊ ခရိုင်ဆည်မြောင်းရုံးနဲ့သစ်တောရုံးမှာ တပ်စွဲနေတဲ့စစ်ကောင်စီတပ်သားတွေ ၂ ရက်ဆက် တိုက်ခိုက်ခံရပြီး ၉ ဦးသေဆုံးခဲ့တယ်လို့ ကလေး UG တာဝန်ရှိသူတဦးက ပြောပါတယ်။

ဖေဖော်ဝါရီလ ၈ ရက်ည ၈ နာရီခန့်မှာ ဆည်မြောင်းရုံးထဲကင်းစောင့်နေတဲ့ စစ်ကောင်စီတပ်သား ၁၅ ဦးကို ၄၀ မမနဲ့ ၃ လုံးပစ်ခတ်ခဲ့ရာ ၆ ဦးသေဆုံးခဲ့သလို ဖေဖော်ဝါရီလ ၉ ရက်ည ၆ နာရီမှာ အဲဒီရုံးကိုရောက်လာတဲ့ အင်အား ၄၀ ပါစစ်ကြောင်းကို ၄၀ မမနဲ့ ၂ လုံးနဲ့ ပစ်ခတ်ခဲ့ရာ ၃ ဦးသေဆုံးခဲ့တယ်လို့ ကလေးမြို့မြို့ပြစီမံချက် UG တပ်ရင်း ဦးဆောင်သူရန်မင်းနိုင်က ပြောပါတယ်။

“ကျနော်တို့ကပစ်ကတည်းက အနီးကပ်ပစ်တာလေ။ သေဆုံးတာကို မြင်ရတာပေါ့။ ကိုက်သုံးဆယ်လောက်ပဲဝေးတာကို။ ၉ ယောက်သေဆုံးတာကို ကျနော်တို့မျက်စီနဲ့မြင်ပြီးအတည်ပြုခဲ့တာပါ” လို့ ဆိုပါတယ်။

တိုက်ခိုက်ခံရတဲ့ စစ်ကောင်စီတပ်တွေဟာ ကလေးမြို့ဒေသကွပ်ကဲရေးစစ်ဌာနချုပ်က ဖြစ်ပြီး သူတို့ဟာ ဆည်မြောင်းရုံးနဲ့သစ်တောရုံးမှာ အထိုင်ချနိုင်ဖို့ ကြိုးပမ်းနေကြတာ ဖြစ်တယ်လို့ ကိုရန်မင်းနိုင်က ပြောပါတယ်။

“တိုက်ခိုက်တဲ့အချိန်အတွင်းမှာတော့ စကစတွေဖက်က ရမ်းသမ်းပစ်ခတ်တာတွေရှိခဲ့တယ်။ ဒါပေမဲ့ရဲဘော်တွေအထိအခိုက်မရှိခဲ့ဘူး။ မြို့ထဲနဲ့မြို့နားနီးတဲ့အထိုင်ဂိတ်တွေမှာတော့ ဒကစနဲ့တပ်မ ၂၂ ကကောင်တွေများတယ်” လို့ ဆိုပါတယ်။

ပြီးခဲ့တဲ့ဖေဖော်ဝါရီ ၆ ရက်မှာလည်း တောင်ဇလပ်ရပ်ကွက်မှာ စစ်ဆေးရေးဂိတ်အသစ်ချဖို့ အင်အား ၃၀ ခန့်နဲ့လာကြတဲ့ စစ်ကောင်စီတွေ တိုက်ခိုက်ခံရပြီး သုံးပွင့်ဗိုလ်ကြီးတဦးအပါအဝင် ၆ ဦးသေဆုံးခဲ့တယ်လို့ သိရပါတယ်။

စစ်ကိုင်း၊ ဖေဖော်ဝါရီ ၉၊ ၂၀၂၃။

စစ်ကိုင်းတိုင်းဒေသကြီး၊ ကန့်ဘလူမြို့နယ် ကိုးတောင်ဘို၊ စံပယ်နံသာနဲ့ အမှတ် ၆၀၀၆ အမြှောက်တပ် ၃ ခု တိုက်ခိုက်ခံရပြီး စစ်ကောင်စီဘက်က လက်နက်ကြီးပြန်ပစ်လို့ စျေးနဲ့ လူနေအိမ်တွေ မီးလောင်ပျက်စီးခဲ့တယ်လို့ သိရပါတယ်။

ဖေဖော်ဝါရီလ ၈ ရက်နေ့ည ၁၀ နာရီကျော်ခန့်က စတင်ပြီး စံပယ်နံသာကျေးရွာက စစ်ကောင်စီတပ်စွဲထားတဲ့နေရာ၊ ကိုးဘိုတောင်က ခမရ ၃၆၁ တပ်နဲ့ အမှတ် ၆၀၀၆ အမြှောက်တပ်နေရာတွေကို တပြိုင်နက်တိုက်ခိုက်ခဲ့တယ်လို့ ကန့်ဘလူမြို့နယ် ပအဖ တာဝန်ရှိသူက ပြောပါတယ်။

“မနေ့ညက တပြိုင်နက် စကစ နေရာစခန်းတွေကို ဝင်တိုက်တာ။လက်နက်ကြီးတွေနဲ့ သူတို့စခန်းတွေကို ပစ်တာလည်း ရှိတယ်။ အနားကပ် တိုက်တာလည်း ရှိတယ်။ စုပေါင်းတိုက်ပွဲ ဖော်ဆောင်လိုက်တဲ့ သဘောပါ။ စကစဘက်က ထိခိုက်သေဆုံးတာတွေ များတယ်။ သူတို့စခန်းတွေ တိုက်ခိုက်ခံရလို့ လက်နက်ကြီးတွေနဲ့ တရစပ် ပြန်ပစ်တယ်။ ၆၀၀၆ ကနေဆို ဟောင်ဝစ်ဇာ အမြှောက်တွေနဲ့တောင် ပြန်ပစ်တာ” လို့ ပြောပါတယ်။

စစ်ကောင်စီနေရာ ၃ ခု တိုက်ခံရချိန်မှာ စစ်ကောင်စီဘက်က ၁၅ ဦးထက်မနည်း သေဆုံးပြီး ထိခိုက်သေဆုံး အသေးစိတ် သိရဖို့ စုံစမ်းနေတယ်လို့ ဆိုပါတယ်။

စစ်ကောင်စီဘက်က ပစ်ခတ်တဲ့ လက်နက်ကြီးထိလို့ ကိုးတောင်ဘိုစျေး မီးလောင်ပျက်စီးသွားပြီး ဆိုင်ခန်း ၅၀ ကျော် မီးလောင်ပျက်စီးခဲ့တယ်လို့ သိရပါတယ်။

အဲဒီအပြင် ၆၀၀၆ အမြှောက်တပ်က ပစ်တဲ့ လက်နက်ကြီးထိလို့ ထန်းကုန်းကျေးရွာက နေအိမ် ၄ လုံး ပျက်စီးသွားသေးတယ်လို့ သိရပါတယ်။

အဲဒီတိုက်ခိုက်မှုကိုတော့ ကန့်ဘလူမြို့နယ် ပကဖ၊ ကန့်ဘလူ တပ်ရင်း(၂)၊ တပ်ရင်း(၃)အပါအဝင် ကန့်ဘလူမြို့နယ်ထဲက PDF အဖွဲ့တွေ ပူးပေါင်းတိုက်ခိုက်ခဲ့တာ ဖြစ်တယ်လို့ ဆိုပါတယ်။

ဇန်နဝါရီလ ၃၁ ရက်နေ့က စစ်ကောင်စီအင်အား ၁၅၀ လောက်ဟာ ညောင်ဇင်ကြီးကျေးရွာကို ရောက်လာပြီး နေအိမ်တွေကို အကြောင်းမဲ့ မီးရှို့လို့ ညောင်ဇင်ကြီး၊ မဲသည်၊ အင်းလည်ကြီး၊ ပေလည်​ကျေးရွာတွေ အပါအဝင် ကျေးရွာပေါင်း ၈ ရွာက ဒေသခံတွေဟာ ထွက်ပြေးခဲ့ရသေးတယ်လို့ သိရပါတယ်။